KA HRE LO

KA LA HRE LO

Hluhlu-i Khiangte

 

"Lalremsang, Lalawmpuia ai thlawt chuan u Zothana ketin kara bawlhhlawh tang palh pawh ka duh zawk daih", ka ti hlar a, a nui tawp, Opa hi min duh pui ve em em a, ka duh thei tlat lo lehnghal, min duh eih lo tu u Zothana ka duh daih hi keipawhin mak ka ti ve tho... . 

Hlupuii'n min rawn kuk fawk a, mawl bet bet lutuk min ti leh tawh, "Vanlalhlupui, kei mai mai min duhtu hi duh tlakah ka ngai hleinem, min duh lotu ngat hi nia ka duh, i lian ropui si, kut min thlak ziah suh",  ka la ti zarh zarh a, Remsangi leh Hlupuii chu an inen a, beidawn hmel takin an lû an thing na na ta ngawt a.

Kei hi Lalruatkimi ka ni a, Kimkim tiin min ko mai thin, thau ni si lo hian ka khat hmek a, ka tawi fel et awt viau bawk, Remsangi hi kei aiin a sang deuh a, Hlupuii hi chu a lian hle, a taksa chanve ang tiat lek kan ni. 

Hnahlan khua ka ni a, kan hriat awlsam dan tur chuan Hnahlan volleyball court bul lawka awm kan ni, Aizawlah lehkha zirin ka awm thung a, HBC ah ka lut thin, kan college chhak lawka hostel ah ka awm thin a, Remsangi hi Khawlailung lam mi niin Hlupuii erawh Lawngtlai khua a ni thung a, anni pawh hostel ah awm ve in kan class a inang a, room khatah kan awm ho bawk nen kan inkawm tam a, 1st sem atanga inkawm chho tan kan niin kan inngai em em a, hostel ah pawh awm peih tawh lovin 3rd sem kan nih hma deuh hlek hian Chanmari west ah in kan luah a, 3rd sem kan zawh chuan zir zawm peih tawh lovin kan tuina lamah kan kal ta hlawm a, kan chhungte theuh chu an lungawi tehchiam hlawm lo, keini thian ho erawh kan hlim tlang thinin ka thiantha ber an ni tawh. 

Opa leh u Zothana hi kan college a kan senior te an ni thin a, thian dun an ni, Opa'n min duh laiin u Zothana ka duh tlat thung lawi a, Opa chu kawm nuam leh fiamthu duh tak, a bula awm hahdam thlak tak mi a ni a, u Zothana erawh ngawi chut chut reng mai a nih rualin a nerd miah lo, tunlai tawng takin mipa cool tak a niin ka hria. 

Pa lian ve pangngai tak an ni a, midang an kawm awm pawh ka hre ngai lo, an pahnih hian an inkawm a, an tlei dun ve em em tawp, Opa zawk hian fiamthu a thawh a, mi pawisawi zawng ni miah si lo hian a ri barh barh reng a, a bulah u Zothana a lo nui ve suk suk zel. 

College life chu kalsan ila, tunah chuan mahni tuina lam theuhah kan kal ka tih tawh kha, kan lehkhazir lah kan chhawr lo ve angreng hlawm khawp a, kei leh Hlupuii hian Zion street ah restaurant kan nei a, kan thawk dunin a hlawkna pawh kan insem mai a, Remsangi erawh hmeichhe nû hnap a ni lo bawk nen workshop a nei teh hleuh a, patil erawh a ni hran lo, loan a puk hmanga a workshop hi dinin a rul pah mek a, a intodelh tawk viau, in erawh kan la luah ho reng a, Opa te nen pawh kan la inkawm ve zel, ngaihzawng en erawh in tun thlengin ka en thei thak lo thung, ka tan chuan ka nuta ang mai a ni a, u Zothana erawh Opa nen an inkawm ka hmuh fuh bak a hranpa in kan inkawm lo thung, Opa hian zan lama lo len te hi min dil thin a, ka hnar ziah vangin ka thiante hauh ka tawrh phah fo a, zanin chu lo leng rawh ka ti tha ve mai, a lo leng ta reng a, u Zothanan a rawn zui ka rin tehlul nen a rawn tel miah lo, kei hi tawngkam tuihnai tak phuh chhuak thiam lo leh thu thluaithlum thiam lo tih takah Opa'n min rawn thut hnaih hrut hrut kha ka ning a, "Op, haw tawh mai la", ka ti chut kha a nia ka thiante pawhin min hauh chiam ni! 

Kan in luah ah hian bedroom 2 a awm a, Remsangi nen hian kan intawm a, room 1 zawkah Hlupuii amahin a awm thung, ti ila kan room a kan riah ho hi a tam zawk a ni mah awm e.

Ka thianten min hauh chiam hnu chuan mùk zawkin kan titi a, Opan min duh zia te, min nghah rei zia te hmangin short sermon min thlak khum nek a, hnial pawh ka hnial peih tawh lo. 

Hlupuii ngat phei chu Opa ngaizawng ve tura min duh lutuk na lamah a tap tep nghe nghe a, u Zothana hi kei chu ka hlau deuh tlat, pawisak a neih loh hmel ka ti te a ti ta hial, ka lo nuih tawp, keipawhin thu tak deuhin, "Opa chu min duh vang ringawtin ka duh ve a ngai kher hleinem, keipawhin ka khawngaih ve tho a, mahse, duh lo chungin ngaizawng ta ila amah a serious nasa dawn si, ka rilru ah mipa dang an awm reng chunga ka ngaihzawn chuan nakinah hei ai hian a la na zawk dawn sin, keimahni thinlung pawh kan control zawh loh hi", ka ti charh charh a, ka thiante pawh an ngawi hmiah, inkuah khawm rialin kan mu ta a. 

Tum khat kan thianho leng chhuak chu ngaihthat lohna in min tuam a, min en zui rengtu awm ang mai hian ka hria a, ka thiante lah chuan an hriat ve hmel lem si lo, an nui ang uar uar a, Remsangi chu a hnathawk pakhat Dinsanga nen dem belin Hlupuii chu a rak ring NASA mai a, Remsangi lahin a lo duh lo ve tumhrang bawk nen an bengchheng dun teh e.

Ngaihtha vak lo va ka hawi kual pawh chu ka hnunga min rawn ben thawr avangin ka phu dawrh a, min nuih dun tak hawk hawkah chuan nui chungin ka um a, kan ninhlei a zarah taxi ding tha hle hle lai kan su bawp bawp zui bawk nen Taxi driver lo awm te pawh chuan min hau der laih laih, hna kan thawh ve vek avangin zan hun bak hi kan inhmu khawm bik meuh lo va, Remsangi lah hna a thahnemngai lutuk chi a lo ni bawk nen kan mut hnu-a lo haw te a nei fo mai a, Hlupuii nen erawh thawk dun tih takah kan inawmchilh reng bawk a, kan inhnaih deuh zawkin a hriat thung, kan pathuma hun kan neih chhunah hi chuan kan inngai in kan nui reng a tih theih awm e. 

Opa pawhin min rawn be khat ta khawp mai a, ka tan erawh a hahdamthlak, biak peih vak loh lo biak that vel hi ka thiam vak lo nen nuam ka ti phian zawk a, Hlupuii nen erawh min hrilh ngai lo mah se an inbe zeuh zeuh tih ka hria. 

U Zothana pawh hi ka duh ka ti nangin ka duh tih hi a hre lem lo va, ka star ve em em ringawt mai a ni, college kan kal lai phei kha chuan ka mangah te hmu-in ka pasal te a lo ni thin a, ka suangtuah naa ka bialpa nih tirin mahni in ka nui leh vur vur thin, mahse, hnaah kan buai ve a, inhmu khat ta na nâ na chu han vei zui pawh ka nei bik chuang lo, ka la star em tih pawh ka hre thiam vak lova, a hmeltha ka la ti hle tih erawh phat rual a ni lo e. 

Opa erawh a rawn leng leh ta zeuh zeuh a, Hlupuii nen an inkawm deuh ber a, an inngaizawng em ni aw tih ka ngaihtuah rauh rauh zel a, ka zawt chuang lem lo, Remsangi a rawn haw hma chang chuan ani nen pawh an Inkawm hlut thin a, kei erawh tunhma anga min hnaih vak a tum tawh lo a ni ang chu, ka dam tha em tih leh ka chhungte an dam tha em tih min zawh bak min be ngai vak lova, kan inbiak chhun lah a tawi tek tawk thei viau, a rawn len chang pawhin pindanah ka awm san daih thin a, Hlupuiin, "Kim, Opa nen hian inngaizawng ta ila min ngei ang em? ", A tih zan chuan, "ngei dawn lo nasa, ngei chhan tur che ka nei hleinem, ni ngei ngei r'u, in inhmeh dawn si", tiin nui chungin ka chhang nangin mut hmunah ka inngaihtuah ve nasa. 

Opa thu min hrilh pakhat ka hre chhuak a, " min ngaitu, min hluttu, min mamawhtu te kianga awm hi a nuam a, keimahni pawhin kan hlutna kan hriat phahin kan nun a hlim thin", a ti a nih kha. 

An inngaizawng ngei niin ka hria a, pindanah awmsan mah ila an nui dun hawk hawk ka hre thin bawk nen ka thik ru ve deuh em aw tiin ka inngaihtuah a, awiawmloh tiin keimah leh keimah ka inkuk ringawt thin, keimah hlir min ngaihsak thin vangin hetianga Hlupuii nen an hlim dun ta viau hi mak ka ti rih mai mai a ni tiin ka inhnem ta ngawt a. 

Ngaihzawng tia sawi tur hi ka nei ngai reng reng lova, ka neih ve deuh ber pawh kan khuaa High School ka kal laiin kan class mipa a hmeltha ber ni ngat, Khuangphah atanga kan school a rawn lut Muanzela nen khan kan inmelh shala ve thin a, vawi khat phei chu ka biangah a chuks tawh, mahse, a pa a boral hnu khan unau zinga upa ber a ni bawk nen a nu hrisel lo nen school pawh a chawl chhunzawm ta mai kha a ni a, kei lah fanu mal ka lo ni bawk nen ka nu leh pa te'n duat tur dang an nei lo bawk a, hausa tak ni lo mah ila an phak tawkah min duat bawk nen han vei zuina pawh ka nei lo kha a ni. 

Opa pawh min duh tih kha chu a tilang fo a, mahse, han duhna ang chu feelings kha ka nei ngaiin ka hre lo, U Zothana kha hmeltha ka tiin pa ka ti em em a, ka mit a la thin e tih kha a ni mai a, rei tak phei chu ani ngei pawh kha ka vei ngut ngut chuang lo a nih kha. 

Sunday a ni, Christmas a hnai a, boruak pawh a vawt surh tawh, thawhtanni leh thawhlehni a bazar hlawm a, nilaini a mahni khaw lam theuh pan kan tum tawh avangin kan hlim sarh reng mai, ka pasal zawnna bai tia ka uan pui ve em em, ka chawhmeh siam thiam ber mai thlairah bai ka siam lai pawh "tui takin lo chhuak rawh aw", tia nui sûng chunga ka chawh melh melh lai  chuan thu lawmawm lo tak ka dawng ta, kan khaw lam atangin phone call ka dawng a, kan khaw YMA president ka patea ni bawk Pate Saia number a ni, engemaw ni tehmial le ti nuah nuaha call ka chhan chuan tap ri nuai nuai thawm ka hria a, ka bo hle mai, nat lawkna pawh awm lo va ka nu zan mu an kaihthawh zawh loh thu a rawn sawi ta mai a, a aw chhuak pawh tah chhuah insum aw ngei a ni, ka thu hriat chuan min vilh na nghal ngut ngut a, ka thaw a tawp mai dawnin ka hria a, ka awih phal meuh lo. 

"Pate, ka lo haw tep tawh, keima nu ve em em khan min ngai tawh lutuk in min rawn tihder tir che a ni maw", tia nui lui hak haka ka zawhna pawh chu, " Bawihte", tia tap chhuak hawk ri bak chhangtu ka nei lo. 

Ka patea chu a fiamthu mai mai a ni lo tih ka hrethiam a, ka bai chawh lai pawh ngaihsak tawh lovin ka dinna chhuatah chuan ka tlu rawk rawk a, pindan lama ka thiante inchhaih nui ar ar pawh ka kiangah an rawn tlan vat, thil awmzia min zawhna pawh chu chhan ngaihna hre lovin ka hawi â heu ringawt a, Hlupuiin ka mobile min lak sakin pate Saia chu a bia a, phone call an dah hnu ah ka mobile min pe letin ama mobile atangin Opa a call nghal a, an thusawi pawh ka hre chiang lo. 

Kei erawh ka phone a ka nu nen kan thlalak te chu hmet chhuak a enin ka bianga mittui luang ngiai ngiai chung siin ka nui ver ver reuh a, suangtuahna rama ka chen delh delh lai chuan tu emaw hian min rawn kuah a, min kuahtu chuan ka chala min fawh sakin ka hnung a beng thek thek bawk, hawi â ruai chungin ka melh chho a, Opa a ni, ka hawi kual zau deuh a, u Zothana pawh a lo awm, ka thiante 2 nen an pathum a lo ding tlang hlawmin an zavaia mitmengah chuan hrehawm tihna leh min lainatna chiang taka ka hmuh rualin pachang taka awm tura min duhna ka hmu tel a, ka haw duh tiin ka phun sep ringawt, an bu nghat nghat hlawm a.

Hlupuiin Opa call in ani chuan u Zothana lo hrilh ve in hmanhmawh takin an rawn kal a lo ni, kan bungrua te chu Opa car a dah luta min buaipui zung zungin a seat hnung lamah chuan ka thiante'n min karcheh in min thut tir a, Opa'n car khalhin u Zothana pawh Opa bulah a thu, kan khaw lam panin kan tlan ta vang vang a, kawng tluanin Dulte daia zunram kan thiar tih loh chu chawl hauh lovin kan tlan char char a, ka thiante pawhin tap tura min thlemin an tawng tam lo khawp mai a, keilah mi â ang maiin ka ngawi reng bawk chhan tumna ka nei lo a, suangtuahna ramah lengin ka nu in fanghma pil hmanga ha lem min siam sak lai te, chu ha lem chu vuaha ka pa hnathawk rawn haw kan lo barakhaih lai te leh kan nufa hlim dun lai chu suangtuahna rama hmu-in ri miah lovin ka nui leh tawp mai thin. 

Kawng a tha in kan tlan muang lo viau a ni ang chu zing lam dar 8 vela chhuak kan ni a, chawhnu dar 3.30pm velah kan thleng a, kan in ah kan khaw mipui te an lo awm thup a, in chhunga leng lo pawh pawnah an lo awm nual, kan in chhung lamah ka thiante chuan min kuah lut vatin ka nu, kuanga an zalh chu ka hmu a, ka pa pawh a ri meuha tap chhuak hawm hawm chunga ka nu au in, an fanu neih chhun kei chu ka thlen tawh thu a hrilh a, Aizawla zirna vang leh eizawnna vanga ka awm pawh phal ve meuh lo tu, min ngai em em a, keipawhin ka ngaih, inbe lo va rei awm thei lo, a hma zan lawk pawha rei tak inbia a nui dun hawk hawk, nufa inhmangaih tak karah thihna in thla a zâr a, ka ngaih nin theih loh leh min hmangaih ning chhin ngai miah lotu ka nu erawh chuan min lawm miah lovin ngawi rengin a mu reng a nih chu! Ruang kil thenkhat chuan thutna min lo kian sap sapin ka nu bulah chuan ka thiante nen kan thu a, ka nu biang chu ka chul riak riak.

Nui ver ver pahin ka nu chu ka ko sep sep a, mahse, min chhang miah lo! 

Ka pa chu a riin tap tawh miah lo mah se a hmel en in a tuar na tawk tih a hriat viau, kei erawh ka mittui tla reng siin ka ngawi reng a, a riin ka tap thei hauh lo! Ka kawchhungah min hnawhtu awmin thawk lak harsa ka ti a, ka awm te chu ka chum leh dawt dawt ngawt thin, ka kiangah mipui tamtak awm ve mah se ka rilru chu chhung kim tea kan len lai hunah a cheng daih a, a hma ni lawka ka nu nen inbia a nail polish hawn sak tura min chah lai leh kan nuih dawn hawk hawk lai te mitthla in ka hun tawn mek chu ka ring phal lo viau a, mahse, a tak a ni si. 

Hun chu a kal mawp mawp a, kan dil na min ngaihpawimawh sakin zan lamah lumenpui niin a tuk chhun dar 12:00pm ah ka nu chu vui liam a ni a, thla kan lak lai te pawh chuan ka la tap chhuak chuang lo! 

Thlan mual lamah kalin ka nu chu tlangval tlawmngai ho in thlan, an zahna lantir na atana thuk taka an lo laih ah chuan dah thlak a ni a, chutah meuh chuan ka thinlung tawt lutuk chu a puak keh ta. 

Lei ah chuan thu hnawkin ka tap chhuak ve ta, ka nu chu a fanu hian ko lawm lawm mah ila chhan zai reng min rel lova, ka thianten pangpar min ken tir chu thlakin min kal sawn pui ta

Mangchhe rapthlak lak ata harh chhuah chak em em, harh chhuak thei si lo ah hian ka inchan ta ber. 

Ka thiante leh u Zothana pawhin min haw san a, inleng pawh kan nei mumal tawh lo, kei erawh chu suangtuahna rama chen ka la bansan thei lo va, zan mut hun tih loh chu ka nu thlanah ka awm reng a ni hawt e, ka nu thlanlungah pawh thu mawi tak ka duh dan ang taka ziah a ni a, zut riak riak bak tih theih kan nei si lo. Opa chuan min haw San ve lovin ka kiangah a awm reng a, zan lamah pawh ka room ah riak ve mai in ka khum bul chhuatah mutna a siam a, a mu ve mai thin. 

Hmeichhe harhvang leh tawng barh barh thin ka nih vei tehlul nen ka tawng tlem ta em em a, ka tawng ve chhunah ka nu awm ve laia kan nun hlimawm bak sawi tur ka hre meuh lo! 

Ni a liam a, thla a liam a, hun leh tui luangin chawlh zai reng a rel ngai lo angin a liam zung zung. Christmas pawh lungchhe taka hmang liam ve mai zelin kum tharah pawh Opa chu ka kiangah a la awm reng a, keipawh a sarhu laia ka buai ang em em ka ni ta bik lo. 

Kan khaw lama ka awm reng chuan ka tan a tha lo ang tih ka chhungte ho inrawn khawmin hlau in Aizawl lamah min chhuk tir ta a, Opa nen kan inkawp ta chawt, hnaah te buaia hun kan hman liam ve tak zelah chuan April thla kan chuangkai leh ta reng mai, Opa pawhin min ngaihsak a thulh ngai lova, an in lam aiin ka kiangah a aam tam zawk, tin, Hlupuii nen an lo inkawp pawh kha keimah min tihel na'n leh ka feelings kaihthawhna atana an lo ruahman a lo ni a, ani nen pawh inngaizawng tih theihin kan awm ve ta, ka hmangaih em ka hre lova, min hmangaih takzet tih erawh hnial rual lohin ka hria a ni. 

Ka nu ngaia ka tah apiangin ka kiangah awmin min kuah thin a, ani hi awm lo se engtinnge ka paltlang ang ka hre lo a ni, a fiamthu duhna leh a mize lawmawm tak chuan min nuih tir ve ta fo a, keipawhin a tel lova awm chu harsa ka tiin ni khat lek pawh amah ka hmuh loh chuan ka lung a leng viau tawh. 

Kartawp chawlh apiangin min hawi thawven pui turin hmun hrang hrangah min hruai thin a, kan dawr pawh Hlupuii kutah ka dah vek rih tawp a ni, ka kal ve chang pawhin chet an phal ngai meuh lo va, rilru kawm nasat ka duh loh vangin ka thawk lui ve mai thin zawk chauh a ni, keipawh ka nu theihnghilh miah chuang si lovin ka na zual lutuk leh ka vai ruai reng pawh a reh ve ta deuh.

Opa chanchinah lut ta lawk ila, Chaltlang Lily venga awm niin mi hlun an ni a, wholesale dawr lian tak chhungkaw dawr an neih bakah ama pualin Reiek kaiah picnic spot a nei a, thawktu ruaiin amah hi chuan a tlawh zeuh zeuh chauh a ni.. 

Neinung lutuk tia sawi tur ni lo mah se an rethei hauh lova, chu erawh ka duh chhan a ni hauh lo. 

An sumdawnna thilah phai lam te pawh zan 2/1 riakin a kal fova, keipawh tum khat chu min hruai ve nghe nghe. 

Chawl lova hun kal ta reng chu ka nu thih cham pawh kan thleng a, Opa erawh an sumdawn naa an buai zual lai tak a nih avangin min zui haw ta lo, ka nu thlan cheina tur chu Aizawlah min bazar pui vek a, ka nu thlan pawh mawi taka chei a ni. 

"Ka nu, i zal na thlan chu mawi taka chei a ni a, nang erawhin puan tha leh mawi i inbel thei tawh si lo", tiin engkim mai chuan lungchhiatna min thlen a ni hawt e. 

Hun a liam a, kum a liam ve zel a, Opa nen pawh kum 3 lai chu kan inkawp ve ta reng mai, ka thiante pahnih chuan kan inluah pangngaiah la awmin kei erawh Aizawla ka awm pawhin ka ni te hnenah, Laipuitlangah ka awm thin a, kan sumdawn ve na pawh Hlupuii kutah ka dah fai ta vek a, ka pa in min ngaihtuah vang a ni pakhat a, ka peih chang changin ka ni te dawr, bazarpui a mi chu ka nghah pui ve thin tih loh chu hna pawh ka thawk mumal ta lo.

Opa chu keipawhin ka thinlung ka pe ve tak tak tawh a, ka tel lova a tlei thei lo angin keipawh a tel lovin ka tlei famkim bik hauh lo, kan pahnih inkarah sawiselna tur ka hmu ngai hauh lo a, ka pa pawh a chanchin zawta be fo-in a taksa tana tha tur nia a hriat te chu buai sawi miah lovin a thawn a, an inpawh dun viau tawh, min dawhtheiin ka thu a ngai thiam em em a, chutih rualin pal luih theih erawh a ni chuang hauh si lo, ka rilru tihrehawm zawngin min khawsak khum ngai lova, ngaihngam takin a kiangah ka awm thin a ni, inneih hi a sawi ve fova, ka pa leh ka ni te chhungkua mai bakah ka chhungte dang pawhin min duh pui em em, Hlupuii leh Remsangi te nen pawh inhmu reng thei lo mah ila phone kal tlangin kan inbe deuh reng a, ka nu boralna leh keimah min treat danah tu mai pawh hian min duh pui a ni ber e, u Zothana erawh mi hausa an ni a, Delhi ah hotel changtlung tak an nei nghe nghe, chumi chu a enkawl avangin kan inhmu ngai lo tluk a ni a, Opa nen erawh an inbe zeuh zeuh a, kan innei dawn a nih chuan Opa thiana din erawh a tum nghet hle niin Opa hian a sawi. 

Sawi lang ngai miah lo mah se kha chen ka lo star a nih thin vang leh, u Zothana hian khang hunlaia ka duh thin zia hmanga Opa fiam zuk zuk a chin avang hian Opa hian a thiantha ber mah nise a thik deuh thin a, keimah tak hi chuan ka be mang lo. 

Chutianga kum 3 zet kan inzui ve takah chuan keipawhin inneih mai chu ka hnial ta lova, palai te pawh kal in a rem thlup tawh, kan khuaah phei chuan hre lo an awm tawh lo tih theih a ni a, min hmu dun apiangin duhsakna min hlan a tih theih awm e. 

Man hlan hun atan 4th April ruat niin inkutsuih hun turah 6thApril ruat a ni a, tunah hian 2ndApril niin U Zothanan Opa hruai kher a phut der vang leh an sumdawnna thila tih tur a neih pah tho avangin Opa pawh phaiah a kal a, kei erawh kan khuaah ka awm tawh thung. 

A tuk maia Mizorama rawn haw tur an ni nghal bawk nen zan lamah chuan hlim tak in video call hmangin kan inbia a, u Zothanan, "Bawiha hi a tlangval hun tawpna tur party kan nei dawn", a rawn ti lawng lawng a, phal takin ka lo nui var var, Opa hian zu hi han lem ve zeuh mah se engemaw ni bik te a nih loh chuan a lem ngai lem lova, mahni inthunun thei lo khawpin a awm ngai lo tih ka hria a, nula dang lakah lah ka ringtawk em em bawk. 

Opa chuan ka kuta kaiin hmanhmawh takin min tlan pui a, kan chhak ko chu a ri rum rum, lei chuan min rawn delh dawn ta mai a, Opa chuan min nam vakin ka kat dawrh a ni ber, hawi ruai ruai pah chuan ka au nghek nghek a, ani chu leimin chuan a chhilh ta! 

Tap hlawp hlawp chunga lei chu ka theih tawka haiin ka hmangaih chu ka au chiam a, chhangtu erawh ka hmu lo, mangang lutukin ka thu chhuak hlawl a, ka thlan in min bual huh zûih mai, ka awm dawma ka mumang a nih vanga Lalpa hnena lawmthu sawi chunga keimah leh keimah ka inthlamuan mawlh mawlh lai chuan ka phone a ri tlang tlang a, ka phu nghek mai. 

Opa call a ni, a va rawn bei hma ve tiin la hlauthawng ru deuh tak chungin call ka la a, Hello pawh ti lovin "I tha em? " ka ti nghal tawng, thaw hawk ri ka hria a, Opa aw a ni lo. 

Hello, hello, ka tih chuan u Zothana chuan, "Kimkim, Bawiha a thi", a rawn ti a, U Zothana leh Opa inkoh dan ve reng a ni, chu thu ka hriat chuan ka taksa a hik nghal vek! 

" Wow", ka ti ro halh a, ka thin a rim nghal up up, "Hetiang hi infiamna chi a ni lo, mangchhia nen ka mangan em em laia, Lalawmpuia chu phone pe teh", tia ka vin hlar chuan, " engtinnge maw ka sawi fiah dawn le", a rawn ti leh hulh a, ka la awih chuang lo. 

"Ka pasal kha phone pe rawh ka tih chu", ka tih leh chiam takah chuan ka aw a zawi lo bawk nen ka pa pawh ka kiangah a lo ding ran tawh, phone chu min laksak in loudspeaker ah a dah a. 

" Bawiha ruang chu postmortem tura tih a ni a, tunah damdawi inah ka awm mek", a rawn ti leh tawp a, ka la awih phal lo cheu. 

Ka thin zawn hi a thip vawt vawt a, keimahah hian engemaw thil hlawm lian takba inhnawh khawm tlat bawk, thawk harsa ti em em in ka awm ka chum a, hei chu a ni em em tawh lo Lalpa! 

Hmanhmawh phelenga a zan a zana Aizawlah chhukin ka ni te inah pawh innghat buangbar lovin Opa te inah kan tlu lut rawih a, ka nu ni ve mai tur, Opa nu chuan min kuahin min tahkhum hawm hawm, kei erawh thinrimna in min tuam mup mup a, min tihder ni ah ka ngai tlat, Nu Maremi pawh chu ka hnem ve mawlh mawlh a, Lengpui Airport lam panin kan kal ta, an chuanna thlawhtheihna chu a rawn tum a, Opa nu, Nu Maremi chuan min kuah a, min hmer ngawt ngawt. 

Hlim taka nui sanga min rawn pana min tihder thu min hrilh ringin beiseina sang tak nen khualzin ho an lo chhuahna tur lam chu ka en reng a, u Zothana chu mutmu tuah tha lo tih hriat tak leh pawr hrap chunga rawn chhuakin kan lo bawr nghal laih, "U Zothan, khawnge ka pasal", ka tih chuan lainat hmel em em in min en a, " a lo chhuak tep", a tih chuan ka thaw huai! 

"Ka nu, ka tih reng kha, Lalawmpuia chu a fiamthu te hi a sang thin a, min tihder a nih lek chu, kan hau hrep dawn nia", ka la ti fan a, ka nu Maremi erawh a tap uar sauh. 

Nghakhlel taka a lo chhuah huna ka hauh dan tur tawngkam te theihnghilh hlau tak chunga ka lo thlir lai chuan, bawm lian tak hi Airport a thawk tute'n an rawn nawr chhuak a, lei ah chuan ka thu ta hnawk, ka hmangaih chu bungrua ang maia cheibawlin an rawn nawr chhuak a nih chu! 

bawm lian tak ata a kuang chu la chhuakin Chapel ah chuan an dah a, chu hmun nghaktu Pastor ni awm tak chuan thusawina te neiin tawngtaina hun te a hmang a, kei erawh ka â leh ruai tawh. 

Ka pasal an zalhna kuang chu Ambulance ah hlan luh niin a kiangah keipawh ka thu ran a, kuang inchhin phui mai ni lova inchar bet tlat chu ka melh ngawt ngawt. 

An in kan thleng ta, mi hlun tih takah mipui tamtak an lo awm a, a kuang chu nghah a ni, ka hmangaih hmel chu hmu chak teh mah ila a kuang chu char phui vek a ni si a, a zalna kuang kuah ngawih ngawih bak tih theih ka nei leh ta lo. 

Ka na lutuk leh tawt lutuk chu nikhaw hre lovin ka awm ta hial a, ka harh leh meuh chuan Opa room ah ka lo mu ran a, ka kiangah Hlupuii leh Remsangi an awm bawk, ka harh tih an hriat chuan buhhawp chu min barh an tum a, kei erawh chuan, "ka pasal rual lo chuan ka ei dawn lo", tih chu ka ngaihdan a ni bur. 

Thisen chaw khai chungin ka hmangaih chu ka thlah liam ve a, a tana ka rinawm reng tur thu tiam charh charh chungin a thlan chu ka kalsan ta. 

Mu leh mal nei thei lovin ka awm mawl tawp a, reife chu keimah in inbual pawh ka inbual thei lo, Hlupuii leh Remsangi te inluahah chuan awm lut ve lehin anni bawkin min buaipuiin min bual a, thawmhnaw pawh min hak tir ang ang ka ha tawp. Engmah ka kaah a lut thei lova, keimah pawh ka cher rawk rawk, thisen chaw khai reng ka ni a, minung pawh ka ang meuh tawh lovin ka ring. 

Ka suangtuahnaah chuan Opa leh ka nu chu ka kianga awm rengah ka ngai a, min hmangaih em em tute pahnih chuan "Bawihte, tap suh" tia ka mittui hruk an tum tur, an hru thei si lo tur hrehawm ti leh rilru na lutuka an mitmeng hnual ruih tur te ka hmu a, ka chau ngawih ngawih mai a ni. 

Chaw pawh tlem chu ka lem ve thei ta a, ka harh huaiin ka hre nghe nghe, ka pasal thlan ka tlawh awl lova, tum khat a thlan atang ka haw chu in lamah tlang lovin Biak inah ka tlan lut a, lamtual a thingthi hnawkin Lalpa ka au mawlh mawlh, "Lalpa, min hmangaihtu ka nu ka chan tawh, ka tan nui leh tura ka hringnun ka pal hi a awlsam loh zia min hriat pui a ni lo'm ni? Engvanginnge, engvang teh hrep chuan nge ka nun hlimna thlentu, min hmangaihtu leh ka hmangaih ni bawk ka pasal, hlim leh thei tura min siamtu hi min lak sak leh? " Tiin ka au tuar tuar a, Ka hlim hi i phal ve lo a ni tiraw? Min pe let dawn lo a nih chuan ka nunna hi la ve mai rawh, an hnenah ka kal ve duh Lalpa tiin lungchhe van kaiin ka tap leh ta hawm hawm. 

Kei zawng, lungawi thiam hi har ka va ti em!

Night club ah chuan chu mihring lêm chuan sexy thei ang bera ka hriatin ka lam hah hah a, mitmeng dava riaiin ka melh sawr sawr bawk, a hmelah chuan a phur zia chiang takin a lang a, ka thinlung chuan anchhia ka lawh mawlh mawlh, a mipatna pawhin hna a thawk tha hle aniang chu min pawm kang nawlhin private room a book lamah chuan min hruai ta, min fawp bawrh bawrhin nalh min tih thu a sawi chamchi a, banga min nawr beta ka nghawng a fawh ruai lai chuan a hmuh loh lamah ka hmel ka siam chhe chiam. 

Nui hak hak chunga i hmanhmawh lutuk lo maw tiin ka nam sawn det a, a ban a phar hluai, no 1 ve ve chu kan in leh hlek dawn lo'm ni? zankhua in hun kan nei alawm tiin mit ka siai sak, whiskey bottle chu la chhuakin ka thli a, ani erawh washroom ah zunram thiarin a kal, chu hun rangkachak chu chuhin ka boot bun kara ka zeh damdawi chu la chhuakin a no ah chuan ka pawlh zeuh a, ka hnung lam atanga min rawn kuahin ka nghawng a rawn fawp ri chawk a, a glass chu pein ka glass in ka khawng ri keuh a, kan thawk khat dun ta pawp. 

Cigar fawp khu hlat hlat pahin kan mi tenawma muhil chu huatna nasa tak nen ka melh ralh a, ka rualin hremhmunah ka hnuk lut ve dawn che ka ti sep. 

ka thi awrh mek locket a Opa thlalak tetakte ka dah chu enin, "I phuba chu ka la mawlh ang", tiin ka fawp zeuh a, ka thawmhnaw thehlep tak chu hlipin inbual turin washroom ka pan ta a, ka inbual zawh chuan zan lama sex kan hmang dun nia a rin theihna atan panty leh brazier chiah ha in chu mihring bulah chuan ka mu ta a ni.

Ni e, ka pasal ang hiala ka ngaih tawh, kan inneihna tur pawh ni reilote chiahin a dal tawh lai khan ka Opa kha a boral kha a ni a, u Zothana sawi dan chuan kha zana an party kha an kai deuh hlek a, a in luah an thleng tep, an haw kawng step thui lo te-ah Opa kha tlu in a insawh fuh viau a, damdawi in lamah kal pui nghalin an thlen meuh chuan a thlarau in a taksa kha a lo chhuahsan fel diam tawh a ti a nih kha. 

Midang mai bakah Opa chhungte pawhin accident liau liau ah an ngai vek a. 

Mahse, kei hian ka ring mai mai lo. 

U Zothana chu nasa takin ka ringhlel a, ka theih tawpin ka chhui zui ta bawk, misual chu an thiltih sual a lang chhuak leh nge nge thin tih ang deuhin u Zothana chuan a thianpa Opa nupui ni mai tur leh a hmangaih ka nih avanga thiantha tih tur tia chhuanlam siamin min ngaihsak em em a, ka mangan buai lai zawng zawng pawhin ka kiangah a awm reng, keimah ngei leh midang pawhin a thianpa tan a inpek zawh zia chu mak tiin kan fak luih luih a, mahse, tum khat Opa thlana min hruai, Opa rauthla biaa ka phun mawlh mawlh lai chuan a ner sawk sawk tih ka hmu ru a, khata tang khan ringhlel in ka thiam ang tawkin ka chhui ta a ni. 

Delhi a a hotelah hnathawh ve dilin, "Mizoramah chuan kan sulhnu hlir ka hmu a, hmalam pan ka duh ve tawh, bakah, Opa thiantha ber i ni a, i kiangah hian ka thla a muang", tih chhuanlam ka siam chu a awih hle nghe nghe kha a ni a, an chhungkaw hotel a enkawl atanga hla lo tak a a apartment luahah fin ve maiin kum khat zet awm dun tawhin ani pawhin min ngainatna a tilang tam tial tial bawk nen ka ngaizawng der ta a ni. 

Ka rinhlelhna hi a ni telin a zual a, sex erawh kan la hmang dun lo, nizan ang kha vawitam a thleng tawh a, zan khat phei chu a zu in tura damdawi ka pawlh hnathawh avanga a chahthlak dawnin Opa sawi lang zeuhin, "Bawiha, ka tihpalh, mahse, ka hmangaih ve miau si a, i nei mai tur kha ka thlir thei thlawt lo a ni", tiin a riat nawk nawk a, chuta tang phei chuan engemaw tak Opa thihnaah khan a inhnamhnawih tih ka chiang hlein ka hre bawk. 

Delhi a ka awm hnu a ka thian chhar thar, Opa nen phei chuan lo inhmelhriat ve tak mai Mr Sanjay chu a puihna dilin ani in ti tura min tih ang apiang chu ka ti a, hma pawh kan sawn ve zelin a lang, ani hian Opa postmortem a nihna hmun Hospital lam a theihtawpa chhui zuiin chanchin lawmawm a hriat thu min hrilh nghe nghe a, chu erawh fimkhur a ngaih vang leh ka kianga U Zothana a awm tam em avangin kan inhmuh paha sawi dunah kan ti ta thung.

Ka off day a ni a, u Zothana erawh an partner te nen meeting pawimawh tak an neih vangin ka tan hun tha a ni, Sanjay nen chuan kan inhmuh na thin hmunah chuan kan thu dun leh ran tawh a, fimkhur luat a awm love tih thilah ka inchei danglam bawk. 

A hmasawnna min hrilh chuan mittui tling pamin ka en a, khami tuma Hospital duty te kha thamna tamtak pein Opa thih chhanah khan accident pangngai anga report lem siam tura tih an lo ni awm e, Opa kha u Zothana thah ngei a ni tih kan thinlungah chuan a chiang viau tawh, mahse, he kan finfiahna neih hi a la tawk zo hauh lo, thamna dawng tute pawhin Zothana hmel an hmu lova, phone kaltlanga inbia in an sum dawn tur pawh an in kawngkhar theuha dah tawp a ni hlawm,. Delhi hotel rau rauah pawh Zothana te hotel hi a lian pawl tak an nih vangin min lehthal hneh dawn em a, a hmelhriat te an lawk hlawm bawk nen hei aia fiah, phat ngaihna awm lo khawpa chiang kan mamawh a ni. 

A hnaihtu ber ka nih avangin ka fimkhur a ngai viau a, amah hi mi â a ni lo bawk nen ka hlauthawng ru thin hle, zan khat phei chu zu a in duh miah lova, tal chhuahna dang ka dap nasat poh leh hnialkhan a hre zel bawk si, min ringhlel titih a a thinrim takah phei chuan duhthlan tur dang ka tan awm lova hriain sex kan hmang dun ta! Ka thinlungin Opa chu min ngaidam turin ka dil mawlh mawlh a, chumi hnu atang phei chuan fiahna ka hmuhna a nih phawt chuan sex hman pawh chu pawi tihna ka nei tawh lo! 

Ka thinlung chuan thil tha lo a nih ka hria a, mahse, diktak chuan ka thil tawn te avangin mahni inkhawngaihna in min luah NASA em em a, Kristian te Pathian hnen atangin ka duh ang chhanna ka dawng lo bawk nen ka ring ta meuh lo, a hnenah ka tawngtai ngai tawh hek lo. 

Kan mut dun apiangin pills ka ei thin a, he mitenawm fa hi pai ka tum reng reng lo. 

College kan kal lai atang tawhin ka star che a, khang hun lai te khan min duh daih tur alawm tiin Opa chu ka nu thihna a ka talbuai laia ka kianga awm reng a nih vang leh, ka hmangaih diktak amah u Zothana'n min hawi ve si lo nia ka hriat avanga Opa chu hmaizah a, chhang ve ta mai ang te'n ka sawi ta vel thin a, ka thusawi avang chuan keimah leh keimah pawh ka inten fo thin. 

U Zothana pawhin min ring em em tawh a, a rin theih turin lem ka chang thiam bawk nen inhmangaih dun tak angin kan lang tawh a, social media ah pawh kan pahnih a kan awmdun na, thawmhnaw mumal lo tak nena kan thlalak te chu ka hmangaih lutuk anga a inngaih theihna atan tiin ka dah chiam thin, kan chanchin hriaa Hlupuii leh Remsangin phone kaltlanga Opa thlarau i zah lo em ni, a thiantha ber nen berkher tia a thlavang hauh lutuk a min rawn ankhum bawrh bawrh pawhin an hnenah ka sawifiah thei si lo, min hringtu ka pa ngei pawhin chutianga ka talhiar vel chu lo hre ve-in min zilh tam em em a, mahse, ka luhlul ka chhuah NASA bawk nen min tuithlar ta hial a, mahse, thinrim leh min dem nasa ber tura ka rin Opa nu leh pa chuan an fanu ang chiaha min ngaiin min be tha em em reng a, Zothana nen chuan lawmpuina thu te min hlan hial a, ka nu Maremi phei chuan, "Bawiha awm tawh lo mah se, Zoa pawh kan fapa ang chiah a ni a, Bawiha thlarau pawhin hetianga innghahna tur i nei a, a unaupa nen in inkawp hi a dem miah lo ang che" min ti hial a, kei erawhin ka thinlungin, "amah thattu ngei ka kawp a, a rilru ka tina khawp ang le", tiin ka chhang thung. 

U Zothana lah rinhlelhna tur leh fiahna tur eih kan hmuh belh bawk si lo nen ka lemchan, ka nun hman dan chu ka ning em em tawh a, dawhtheihna pawh ka nei pan tawh hle mai,  tur chak tak leiin zan khat chu U Zothana in turah ka pawlh ta a, chu tur a in hnu chuan thisen a khuh bawrh bawrhin anchhia min lawh nasa mai, kei erawh chuan nui var var chungin ka phuar hlawm a, a thawk muang thei ang turin ka pawlh sak mai mai che a nih kha tiin ka pasal a thah dan sawi tura vau in min hrilh loh chuan tur thahna ka pek loh tur thu in ka kar ve tlat a, a tawpah chuan thih a hlau bawk nen harsa ti taka tawng chhuakin Opa a thah Dan chu a sawi fai ta vek a, an party zan Khan Opa in tur ah rilru buai mup theihna tur damdawi chak tak pawlh sakin a rilru a buai lai tak chuhin a tukhumah na takin a vua a ni, miin an rinhlelh lohna atan damdawi in lama thawktute pawh thamin thiantha ber angin lem a chang a, a chhan pawh, kei hi min lo duh ruk reng vang a lo ni! 

College kan kal ho lai atang tawha min duhin, Opa'n min duh ve si avangin a lo inthup reng thu te, ka nu thihna leh ka mangan lai pawha Opa chu a tluk theih loh thu leh keipawhin Opa chu ka duh ve nia a hriat vanga Delhi lama an sumdawnna pawh enkawl ta a, min theihnghilh tum a lo ni a, mahse, khatia Opa nen inneih meuh te kan tum takah chuan thlir liam leh thei lawi si lovin khatiang khan a lo che a ni, "Bawiha kha kei ai chuan sum pai ang zawng chuan a hausa lo, mahse, a rilru a hausa a, nu tia koh tur ka neih loh laiin a nei a, engtik lai mai pawhin a hlim a, ka pa tilawm tura rim taka hna ka thawh a ngaih laiin ani chuan nu leh pa hrethiamtu neiin, a hmeichhe hmangaih a nei bawk a, a nun leh ka nun a innawm hleih em em laiin theihtawp chhuaha theihnghilh ka tum, nang tehhrep chanchin hi ka bulah a sawi fo a, ka hne ngawih ngawih", a ti tuar a, kei erawhin rapthlak ti takin ka lo en ngawt ngawt. 

A sawi zawh hnu chuan tur thahna chu min dil a, kei erawhin chu damdawi chu wash basin ah ka leih baw vek thung, chemte hriam tak ka chher tir chu lekin ka phuar hlawm a, ka hmangaih min thah saktu chu tap chunga au khum tuar tuar chungin a rem lai laiah ka vit pawp pawp a, keipawh thisenin min bual nuai mai, hah hnep khawpa Zothana ka sawisak hnu chuan zawi zetin ka thu hnawk a, "ka pasal kha, a ruang pawh ka chul thei lo a sin, hlimna min petu leh khawvel mawina min hmuh tir leh tu a nih kha", tia tapin ka au nghek a, mi tenawmpa thusawi zawng zawng leh ka thah lai ngei record tura ka phone a ka video cover chu Sanjay thawnin social media ah ka post darh bawk a, Sanjay chu rang takin kan apartment ah chuan police te nen an rawn kal a, an rawn thlen meuh chuan Zothana chu chhan tlak awm lovin a lo thi fel der tawh, a taksa chu hmuh hrehawm khawpin ka sawisa chhia a, NASA min tih hmel hlawm ngei mai, hmeichhe police thau hnek hnuk chuan min man nghal! 

Sanjay chuan, "dan angin kal pui la, i tawrh ve kher a ngai lo tur", tiin min chek khum tlawk tlawk, kei erawhin ka hmangaih tana fiahna min zawn pui avangin lawmthu ka lo hrilh daih thung. 

Court ah hruai ka ni a, ka thiante, ka pa ngei pawhin hmangaihna leh khawngaihna mit mengin min melh leh ta. 

Mahse, Dan a awm miau a, ngaihdamna erawh ka chang lo. 

Roreltute chuan na tuar tam lo va injection hmanga ka nunna lak mai an rel a, thihna ka hmachhawn hmaa ka duhthusam sawi tura min tih chuan ka nu leh ka pasal thlana vawi khat kal ka duh thu ka sawi a, min din saktu lawyer in khawngaihna min ngensak nasat em avangin phal sak ka ni. 

Ka chanchin chuan Mizoram mai ni lo India ram pum mai chu deng chhuakin a tam zawk chuan min khawngaih em em a, zalenna ka phu nia ngai pawh an tam a ni, thenkhat chuan dan anga kal theih reng, keimaha phuba ka lo la chu ka chantawk ka hmu ah an ngai thung bawk a, kei erawh chuan ka nu leh ka pasal tel lova khawvel  hmachhawn ka duh lo, ka pasal tana phuba lak chu ka dam chhanah ka ngai a, ka hlen ta bawk nen thi turin ka inpeih a. 

Thih hnu piah lam ramah hmun nuam chang dawn lo mah ila, ka thinlung nâ hian beidawng tura huaisenna min pe tlat a ni. 

Ka nu leh ka pasal thlan chu police ho venna hnuaiah tlawhin Opa nu leh pa, ka pa leh ka thiante chuan tap hawm hawm chungin min en a, kei erawh ka mittui far khat pawh a tla tawh lo, nu Maremi erawh mak tak maiin min melhna mitmengah chuan huatna ka hmu a, a fapa thattu ka tihlum ve chu a lawm hmel loh khawp mai, tihhlum ka nihna hmun turah hruai let leh niin injection min pek tur chu nghahhlelh hmel takin ka thlir a, ka taksa a damdawi thun luh a nih takah chuan, "ka hmangaih, ka pasal kiangah ka mu duh e", tia nui var var chungin ka mit ka chhing ta riai riai a.!

REMSANGI POV

Ka thiannu, Kimkimi pasal hual thihna leh Kimkimi phuba lak dan chuan sawi zui a hlawh hle a, kei ngei pawh chu ka thiannu a nih vangin zawhna chhan sen loh ka dawng nawlh nawlh reng mai. 

Kimkimi kha a beidawng hneh em a, a nunna pawh hlut zo lo khawpa beidawnna in a lo tlakbuak kha ka thiam loh liau liau niin ka hre tlat, kha ai nasa khan lo ngaihsak ila, a thinlung ipikna a sawichhuah ngamna turin lo inhawng ila tiang hi a thleng lo tur tiin ka indem a, thiantha nih tling lo hle-a inhria in engmah a sawt tawh chuang bawk si lo. 

Chutia mahni indem tak chunga nun ka hman lai chuan Kimkimi chanchin duhawm lo takin min deng leh ta, Kimkimin Zothana a thah lai kha social media a a darh miau avangin kan hmu fur a, Kimkimi chu Zothana a thah lai ang maia thisen kai hnuanga an hmuh thu an sawi thin chuan Aizawl khawpui chu a khah a, mipui zawng zawng mai chu kan ti dûk vek niin a lang, zan lamah phei chuan leng vak ngam pawh an awm mang lo va, kei erawh chuan ka la hmu miah lo thung, thlarau chu nel miah lo mah ila ka hmu chak em em a, ka mithmuhah a inlar duh bawk si lo chu zanah a thlanah kalin ka hmaa rawn inlar turin ka au nghek. 

Ka au vak vak hnu lawk chuan thli vawt tak maiin min chhem a, ka vawt nghal sung sung, ka hawi kual ruai a, tumah ka hmu lo, "min tihthaih lovin rawn inlan rawh Lalruatkim", ka ti leh chiam a, ka hnung lam atang chuan Kimkimi aw ngeiin, " Remsang", tiin min rawn ko sep, rang takin ka hawi let a, ka mi hmuh Kimkimi ngei a ni, thisen in a bual a, a rapawm takzet, mahse, ka thiannu a nih vang leh engvanginnge midang rikrap zawnga a chet tih ka hriat duh vangin hlau lo angin ka lang tlat a, ka khur ru der der thung, ka ngaihtuahna hria ni awm takin, "min hlau suh, tumah ka tina ngai lo", a rawn ti sep a, a hmel pawh hmuh a nuam ta deuh. 

Midang hlauh tura a inlar fo chhan chu ka zawt nghal mawlh mawlh a, " ka thlarau a hahdam thei lo a ni, ka pasal thih naah khan Zothana ni lo kha midang inhnamhnawih an awm atin ni", a ti hnual ruih a, mak ti takin ka en hau ringawt. 

"Opa thihna a bul tumtu ber chu a nu, nu Maremi a ni", a tih phei chuan ka mitmu a pawng chhuak dawn hialin ka hria.

Amah bawk chuan sawi zawm lehin, " Zothana kha nu Maremi fa diktak a ni a, Opa kha chu pa Mawia(Opa pa) fa bik a ni, Zothana pa, pu Remzuala leh Nu Maremi te hi inngaizawng thinin innei si lovin Zothana hi an nei a, Opa aiin kum khatin a upa bawk, pu Remzuala chhungte hian Nu Maremi hi a fahrah em avang leh an thlahtute lamah iaiawm tak an awm avangin an duh lo bawk nen naute chiah chu an chhuhsak a, pu Remzuala pawhin tun thlengin nupui a neih tak miah loh hi, Opa nu hian Opa a neih hian raicheh in a boral a, Pa Mawia hian amaha a fapa chu pawmin chhungte sawirem vangin nu Maremi nen hian an innei ta a ni", a tih leh charh charh chuan ka lo bu nghat nghat. 

Zothana leh Opa hian an nu leh pa te chanchin hre miah lovin an inkawmngeih em em a, Nu Maremi leh puitling dang te erawh chuan Zothana kha nu Maremi fapa a ni tih a hre reng thung, mahse, thudik chu naupang hriat ve kher a ngai lo tiin an lo zep a lo ni, Opa nen kan inngaizawng pawh kha nu Maremi hi a thinlungin a lo lawm miah lo, a fapa Zothana khan min duh tih a lo hre lawk a, khatiang Khan a fapa chu hmanruaah hmangin ruahmanna a siam ta a ni. 

A fahrin ni miah lovin nu leh pa hmangaihna a dawn bik laia a fapa in nu tia koh tur a nei lo khan a ti nâ a, chuta karah, a fa te pahnih in hmeichhe pakhat an hmangaih rual ta si kha ama fahrin zawk nge nge chu a lo hmangaih zawk daih chu niin, Opa thih dan tur kha a ruahman ta a ni. 

Finfiahna chu Zothana leh nu Maremi te phone atangin a hmuh theih ang a tih leh hnu chuan a ral ta riai riai a, ka thaw hawk mai. 

Hlupuii hrilh ve in ka sawi lai chuan a meng kawk kawk a, a mitmeng chu mak tihna te, thinrimna te, Opa leh Kimkimi te khawngaihna in a inthlak zut zut a ni mai e, kei ai mahin a thu hriat chuan a thawng nâ a, a mak ti lutuk zual a reh hnu chuan ro kan rel dun nasa, tih vak ngaihna erawh kan hre lo thung, police hnenah thlen tawp ila tih dawnin finfiahna kan nei si lo, mahse, ro fing tak leh thumum kan neih theih loh takah chuan police hnena kan thil hriat ang chu hrilh mai kan ti tlu ta nge nge a. 

Police station ah chuan kalin kan thusawi chu an awih lo mai pawh ni lovin min lo nuihzat nasa mai a, mahse, ngen tak te leh uang hauh lova kan ngen hnu chuan nu Maremi leh Zothana phone endik chu tha an ti ve ta a, an inbiakna chu a theihtawpin nu Maremi chuan lo tih bo tum mah se mithiam ten an inbiak nâ chu awlsam takin an hai chhuak a, nu Maremi ruahmanna ngei a lo ni tih hriat chhuah niin ani chu man a ni ta. 

Pa Mawia pawh a fapa thihna a tawrh mai bakah a fapa ang maia a lo en ve in a fapa chu a lo thah reng thu te, a mo ni mai tur Kimkimin a fapa phuba a laksak hnu a tihhlum a nih dan te, a fapa leh a mo leh a nupui fa bik, a fapa ang maia a lo en ve thin te pathum thih naa lo in phum ru reng chu a nupui a lo ni bawk nen a hriselna pawh a tlahniam rawk rawk a, Zoram khawvel ah pawh titi dang a leng thei mawlh lo a ni e, social media hmun tinah titi tui ber a ni a, ka thiannu Kimkimi pawhin lainattu a ngah rualin a chhe zawnga sawi tawk an bo thei bik si lo, thaw ipik lutukin kan hun tawn te'n min siam a, mahse, Nu Maremi hremna pek a nih hnuah erawh Kimkimi thlarau hmu a hlau thin tu te pawhin thu thar an sawi zui hriat tur a awm ta lo.

Pa Mawia, Kimkimi pa leh Hlupuii mai bakah kei chuan Kimkimi leh Opa zalh dun an nihna thlan chu kan theihtawp a nalhin kan chei a, Kimkimi duh ang ngeiin an thlanah chuan, "HETAH HIAN INHMANGAIH TE AN ZÂL E", tih ziah a ni, kan chei zawh hnu chuan haw tumin kan intintuah a, Pa Mawia leh Kimkimi pa chu Hlupuiin kaiin a chhoh hmasak pui a, kei chu a hnung berah kan ningnawi te khaiin ka bawr hle a, thlan kalsana pen sawm vel lai ka pen tawh tihah chuan min kotu awma hriain ka hawi let a, an thlan kan chei kiangah chuan Kimkimi leh Opa chu ding dunin, "kan lawm e", tiin min lo nuih sâng a, an hlim dun hmel kher mai. 

Mittui tla pah reng chunga nui seihin ka buk khum nghat nghat a, ka melh reng lai chuan nui dun var var chungin an ral ta riai riai a.