TERI MERI KAHANI LAST

TERI MERI KAHANI


Chapter - 12(last)



Hluhlu-i Khiangte



Ka khum ah ka ţhu hnawk a, ka khur dawt dawt, ka thu hriat khan min ţhawng em a ni, ani kha thah ka tum maw? Ka hmangaih em em, ka pasal chu engvanga thah tum nge ka nih tehlul ang? Min hrilh teh u.
Ka chhang thei miau lova, phone a dah leh hmak a nih kha, ka tha khur nasa zual a reh a, ani khan a duh ang angin min puh a, kei hian ngawi rengin ka lo pawm mai ang maw, a teuh lo mai.



Ka thawmhnaw ka thlak sawk sawk a, ka chhuak nghal, kawngpui ka thlen thlak veleh taxi hman tur ka hmu nghal mai bawk a, ka kal duhna hmun ka sawi hnu chuan hmanhmawh turin ka to zui zat. Ka sa pup pup reng a, ka taksa pawh a thlan dapin ka hria, ka sam, ka khuih loh vanga thur deuh bâm mai, ka thlah mawl tawp chu ka tuai leh thuak ţhin.


Ruatdika te in kawt kan thleng a, chuan man ka pek fel hnu-ah ka pan nghal, lawmthu pawh ka sawi hman lo, kawngka chu a lo inkhar lova, ka lut tlang nghal tawp.
Nu Rami leh pa Buata(Ruatdika pa) chu ţhutkhawmna pindanah an lo ţhu a, min hnu chu mak ti hmel an pû.
Ka ngaipawimawh lo, 'khawiahnge Ruatdika' ka ti a, a pindana a awm thu min hrilh, biak chhunzawm tawh lovin Ruatdika pindanah ka lit tlang nghal a, a lo awm miah lo, mahse, bual in lamah chuan thawm ka hria a, a inbual a ni mahna, a khum sira ţhutna lian lo tak an hunah chuan ka ţhu a, ka lo nghak ta a.



A sam huh hrukpuana hru mawlh mawlh chungin a rawn chhuak a, boxer chiah a rawn ha chhuak bawk, ka lo awm ran min hmuh chuan a ding dat, mahse, a chet ngaiin a che zawm a, awm ve lo ang maiah min ngaiin a inthlak mawlh mawlh, 'inbiak kan ngaiin ka hria', ka ti a, min chhang lo.
A hmel a rum ul a, min rawn bia a nih chuan min vin chiam ka ring, kut min thlak hial te pawh a hreh lo niin ka hria.


'Thah che ka tum lo', ka ti te te a, a lo nui hawk, mahse, a nuih a za lo tih ka hrechiang lutuk mah mah.



'Inkutsuih hman lo mah ila ka pasal angah ka ngai char char ţhin che, Remruatpuii nen in infawp lai ka mit ngeia ka hmu chung pawhin i nupui ka nih thu hrilhfiah che ka tum a, mahse, nangmah aţangin min huatna bak ka hmu lo, i hriatna i hloh vangah puhin na tak chungin chelh hram che ka tum a, mahse, nangmah ngeiin min pek ka ţhi awrh lai ngei mai ka tihbo avangin i hnenah fiahna phawrh tur ka nei ve lo, hmeichhe dawheh nihna bak ka hlawh chhuah tak lohah chuan ka reh san mai che a ni.
Chuti chung pawh chuan ka hmangaihna che a reh lova, kan inkara rawn inrawlh a, nangnen kan inţhen theihna atana i nu pawh zuah lova bumtu vang bawk khan ka kalsan leh che a ngai a, mahse, chu hmeichhia nena in landunna pawh nise, i kianga ka awm ve theih tawh loh avangin in thlalak dun tal ka en ţhin, ka theihnghilh theihna atan che Pathian hnenah ka dil ngai lo, hriat reng che ka duh, mahse, ka suangtuahnaah chauh ka ta ini thei dawn tih pawm tumin ka bei a, Pathian pawh ka dil ţhin. Ngatinge, ka tawrhna nasa lutuk zual kha a reh ve dawn a, pawm thiam ka zir ve a, a der tel lovin ka nui ve ta zeuh zeuh a, dawtthu hmang bawka natna min rawn siam leh? Min hmangaih lova, min hrereng chak ve lova min theihnghilh bik inih pawhin ka nun hrehawm zia i hria a ni lo'm ni? Hetiang dawt thu rapthlak lutuk hmanga ka nun kaltluang ve ţan tur hi engvang tehlul chuan maw min rawn dan chah sak zel a?'



Ka thusawi tawp lamah chuan ding chhuakin a auin ka au tawn tawn, ani lak aţang kher dawta puhna ka dawng hi nâ ka ti lutuk.




Ka che buai ta, ka thin tawt lutuk awmngaihna hre si lo chuan ka sam ka kek nawk nawk a, a hmel pa hrâk leh ţha zet chu enin ka hmangaih lutuk leh ka haw lutuk bawk si chuan min ti nâ a, ka ta ni ve thei lo tur ka la hmangaih tlat bawk si chuan mahni inhmuhhniamna min pe bawk nen ka taksa rem lai lai chu ka inch dawt dawt bawk ţhin, chesawn lovin ka talbuai lai chu hamhaih leh lainat hmel tak hian min en a, a ban a phar hluai ringawt, ka ţap thei lo thin tawt si chu chhuatah ţhu sawp niaiin ka awm ka chum leh dawt dawt a, chutah zet chuan ka kiangah rawn ţhu thla vutin min rawn kuah khawm ta, ka theihtawpa nâ-in ka tal ve tak naa a chak zawk miau a, ka tal chhuak thei lo, ka chalah a rawn fawp tawk a, ka thinhnawhtu chu lakkian nghal hlawk ang maiin ka ţap chhuak ta hawk hawk.



Keimah chu inkhawih tawh lovin Ruatdika zawk chu ka chum vak vak a, a chhipsamah ka ţham leh chiam ţhin bawk, zaidam zet hian a lo dawh mai a, ka thin a ti ur tulh tulh lehnghal.


Reife mumal nei lova ka awm hnu-ah chuan ka zawi ta hnawk a, Ruatdika chuan a khumah min mut tir a, ka bula rawn mu a min kuah a tum chu thei leh thei lovin ka lo dang, min kuah a tumna a bân chu a la let a, ka bulah erawh a mu ve run tho, a pangtilum erawh chuan min ur ham ham danah kan inhlat lo hle, amahah tlukluh ka duh tawh lo, beidawnna chauh ka chan leh tur a ni tih ka hria!...



Ka lung a chhe em em a, 'Lalpa, ka nu kiangah min hruai ve tawh mai rawh, Khawvel chu a hrehawm em mai', zawite te in ka phun sep sep a, 'ka chau tawh lutuk, ka phatsan hma che in i bulah min hruai hram rawh Lalpa', ka ti leh ţhin.
Ka mittui a luang zung zung a, Pathian ka au mawlh mawlh, 'Lalpa, min thih tir mai rawh, a nâ ka ti em mai', ka ti leh ngawih ngawih a, ka ţap chau zo tawh.



Ka lo muhil a ni ngei ang, thawm ri bengchheng zet karah ka harh hlawl.
Ka hawi kual nghal ruai a, ka awmna pindan chu a lo thim ruai tawh, kawngka chhete a inhawng aţanga eng rawn lut chu a ni deuh mai e.
Pawn lamah chuan mipa thinur inhrosa thawm leh hmeichhe mangang au thawm a ri chel chul a, inţhelh thawm nen min ti phawk viau.



Khum aţanga tho-in ka va chhuak a, thawm chu a reh dûk tawh, ka va lang ve chiah chu Ruatdika'n min lo en run, a bulah chuan police panga ngawt an awm a, an piah deuhah chuan Remruatpuii a lo ţhu sawp niai bawk, a bulah police hmeichhe pahnihin an lo din chilh ran bawk a, Ruatdikan min hmu chiah chu thinrim thar leh tih hriat tak hian min rawn pan a, ka lo ip chawih mai, mahse, dam dapa min kuahin ka chhipah a fawp vang vang a, "ka tihpalh ka nupui, ka tihpalh", a ti mawlh mawlh.

.Engkim mai chuan min ţhawng tih mai loh chu sawitur ka hre lo. Remruatpuii lam chu hawiin, "En rawh, he ka hmeichhe hmangaih hi en teh, i thiltih tenawm zet vanga natna ka pek nasat zia hi i hria em? Ka nupui hi na tawpin ka siam a sin, nangmah vang hian", tiin a pan hnai leh a, police te chuan an lo chelh vat, Nu Rami chu a ţap tlawk tlawk a, pa Buatan hnem tumin a darah a kuah sak thung, lainat hmel tak hian min en dun a, kei chuan thil awmzia ka la hrethiam chiah lo.


"Bawihi, accident, hrep hian, nang hi ka puh che a", tiin a chhip sam a tuai pawk a, a thinrim lutuk chu khap tum takin a darah ka ban ve da da, a khur ru dur dur a, a hnung zangah ka beng ta thak thak.


Ruatdika khan a hriatna a hloh ngei a, kha kha remchangah la-in Remruatpuii khan min beihna atan a lo hmang char char, an dr zir lai thlalak te hmuhin kan inhriat ve hma daih aţanga inhria an ni bawk a, an sulhnu ţhenkhat chu Ruatdika pawhin a lo hre chhuak ve a, zawi zawia dawt thu fahin awihawm thei ang berin lem a lo chang kual a, keipawh kha ka va inlan ve chhen vang khan hnawksak min ti hle, Ruatdika ţhi min pek erawh nikhaw hre lova ka awm lai khan a lo la daih tawh, nia, ka harh chhuah hnu-a Ruatdika ka va hmuh khan ka ţhi a bo tih ka hre chiah a nih kha.



A nupui hual ka nih thu chu tlang titi aţang pawhin a hre dawn tho tho tih a hria a, chuvang chuan thlalak phuahchawp tak tak, Nu Rami a thawn ang chi tho bawka mipa dang nena kan landunna te hmuhin a nupui nih ka duh loh thu leh, kan kal thui tawh si avanga amah thah mai tum angah min ngaih theihna turin police lam pawh a lo tham fel vek a lo ni.



Ka hriat loh karah Ruatdika chuan a hriatna a lo nei kir leh vek a, mahse, a bula awm chu kan Remruatpuii bawk a nih vangin leh, a thusawi chu awih harsa a tih hnu-ah pawh police te leh truck driver te nen lam keima tirh a ni tih an hrilh vek vangin min haw em em chungin hun a lo hmang a, mahse, min huat em em lai pawh khan jail run thim min belh tir a phal lo, case pawh a lo siam duh lova, mahse, tukin khan a ngaihtuahna vir zawk kha thunun hman lovin min rawn call a ni awm e.



Ka va kal ta hial a, khati em ema ka talbuai min hmu leh ta si kha Ruatdikan ringhlelin Remruatpuii chu a lo chhu zui nghal a, police lam biain amah sutu truck khalhtu kha a va hmuh hnu-ah reife a va dawp a, thudik hre vek chunga let lehin Remruatpuii hi chaw eiah a sawm a, police pawh a ko nghal bawk, thudik engkim, truck driver thusawi record zawng zawng chu a play khum hnu-ah pawh Remruatpuii chu a la pha char char a, a thinrim insum zo tawh lovin kut a thlak a ni, mahse, police an awm vangin an lo dang ve a, khawih erawh a khawih na hman hran lo.



Ruatruati chu police lamin an la a, an kaih chhuah dawn chuan nasa takin min ankhum, a ta ka chhuhsak vangin thahah min vau a, mahse, mak tak maiin Remruatpuii chuan ka nun tibuai viau mah se ka lainat tlat a nih chu, hmeichhe rilru ţha fal bik tak ka ni lova, Pathian ka hriatna leh Pathianin min hriatna hian humsual dai lo turin min veng ta ni berin ka hria, ka kehsawm a, ka kehchhiat vek lai pawhin zu leh ruihhlo a tlan tumna ka nei ngai lo, ka pa zu in mi a ni ţhin tih ka sawi tawh kha, tlakranna bak min thlen loh zia hrechiangtu ka nih vang te pawh a ni mahna ruihhlo ka hmangaih loh!



Ruatdika chu a inthiamlo em em a, a thiamloh a nih loh thu ka hrilh fo naa ngaihdam min dil a bansan hlei thei lo, kei erawh ka kim a, keimah dik tak ka ni leh thei tawh e, kha hun thlen aţanga thla thum a lo ral leh meuh chuan, Biak in kawtah, mokawr var sar ha-in ka pasal kiangah hlim takin ka ding thei ta, ka nu leh Marova erawh ka theihnghilh lova, ka nu chu ka rohlu a nih vang a ni a, Marova erawh kan tana a nun hlantu angin ka hrereng tawh ang.
Keini pahnih hi lo inhmangaih lo ni ila chuan Marova hian thihna a pumpelh maithei a sin.



Kum li lai kan inneih hnu-ah chuan fa pawh pahnih ngawt kan nei ta a, mipa leh hmeichhia an ni, ka chhungten an ngai em em a, an rawn leng fo mai, ka pasal nu leh pa te pawhin an duat em em a, ka pasal ber mai hian a atchilh ni hialin ka hria, Doctor mah nise nau ka neih dawn meuh kha chuan a chebuai vek a, keimah zawkin na tuar chungin ka hnem let zawmah a, doctor te'n phal lo mah se nau neihna roomah a rawn lut lui thul, a kut chelh lova thihna kotlanga ka dah a remti reng reng lo, lungngaih mittui amah vangin a tla ngai tawh lova, ka mittui tla chhun erawh hlimna vang chauh a ni ta, Lei Eden ka ta a ni a, vanram lah kan chan tura Lalpa'n a dah a ni bawk, kei leh ka lungngaihna let za tamtak hlimna min petu ka chhungkua hi tawp chin awm lovin ka hmangaih a, Pathian ţhat zia ka sawi nawn fo ţhin.



(Ka story min hlut sak tute hnenah lawmthu ka sawi a, induhkhawp loh na laiah min hau hreh lo ula ka duh, ka tan inzirna zel a ni e, ka lawm e)