TERI MERI KAHANI 6
TERI MERI KAHANI (story of you and me)
Chapter 6
Hluhlu-i Khiangte
(He story ka ziah chhan pakhat, Dr Ruatdika zaninah hian a rawn kal a, black coffee a rawn chah vel a nih chu, ka coffee siam tui taka a in bakah a mobile number naupangho hnen aţangin ka nei bik)
Ka lungphu a rang nghal dawt dawt a, Dr Ruatruati khan a hnena ka thil sawi te kha Ruatdika a hrilh ang em? Mizoram chhuahsan ka tum tih te kha a hrilh ang em? Tih vel ngaihtuahin ka buai ka buai a, ka buai karah khawsak rel a lo hun der lehnghal, hotpot kettle ah tui ka lum a, thlairah ka bai a, alu leh changkha ka kan pawlh bawk a, a ro rap hnu-ah chawbel ka chhuang leh ta a, ka zo der, zing lama ka pa Sangha chhum a la awm bawk a, bawl duah a ngai lo, thak tek tawka siamah Zawngţah ka ziat leh a, ka ziat ţan chiah tihah ka nau leh ka pa an lo haw mai bawk, an inbual a, ka nau inbual zo chuan min nuih sûng mai!
Mitko kan ak ak hian mitmeiin min nuih chhan ka zawt a, nui tuh tuh chungin, "Nu-i, zawngţah pawh i ziat thiam lo a nia, pasal i hmu zo lovang, i zawngţah ziah ve dan kha ka thiam hmaa ka ziah dan a nih kha", a ti a, ka lo ner nâwng mai, chanchinbu hlui pahnih dawhkanah ka phah a, a chungah Zawngţah chu mutin ka ziat a, ka thiamlohna ka hre der lo, Bawihtea chuan ka zawngţah ziah lai chu min laksakin chhuatah chanchinbu chu a phah a, a kut veilama zawngţah keng kângin a ziat vei hoh hoh a, a la ziat chak phian lehnghal, ka nui ve ta ringawt.
Ka thiam ve lo tak tak!
Hma takah zanriah kan ei a, kan eipuar hnu chuan thleng kan han seng fel a, TV enin kan ţhu ta ţhap, zam deuh tak hian, 'pa, vairam lamah hnathawkin zu awm ve ka tum deuh a, eng nge i ngaihdan?' Ka'n ti dâk dâk a, a mitko a chuar nghal nûng mai, Bawihtea pawhin a pubg khelh laklawh lai dah meuhin min en a, ka ţhawng tih ka hria, engmah sawi lovin min endun run bawk si nen, 'sum leh paiah pawh kan ziaawm ve deuh zawk ang a, boruak thar hip na'n ka duh hrim hrim nen', ka ti nawi leh nak a, ka pa chuan, "Nubawih, i duh chuan kal rawh", min ti, a aw chu a chang hrek hrawk hle a, ka en dawrh mai, Bawihtea'n, "a ţullo", a lo ti hluk thung.
'Pa', ka ti sep a, "i nu angin min ngaina lo tih ka hria, min hmangaih loh vang ni lovin i nu hnena i engkim i hrilh a i ţhian inih tir ang khan min ti lova, a chhan chu pa ka ni a, mipa ka ni, i harsatna zawng zawng ka hriatthiam pui ve kher lo maithei che, hmeichhia ka ni ve lova, mahse, ka fanu mita natna lang chhuak leh zanrei a kan muhil emaw tia a ţah ruk te, tlansan duh nei tlat mitmeng inringtawk zo lo lutuk hi ka hmu thiam ve, pa ka nihna angin", a ti charh charh a, ka mittui bawk a lo tla leh ta.
"I harsatna zawng zawng ka zawt lui lo ang che, mahse, pa leh unaupa i nei a, laizawn i nei bawk, kan hnenah awm tawh lo mah se i laizawn a nihna leh a hmangaihna che a kiam lova, tin, chung i laizawn, i nuţa leh i pa ai maha hmangaihtu che Pathian i nei bawk tih hria la, kan tan chuan lunghlu ţha mi aia hlu ini bawk, i hlutna hria la, chapo si lovin inringtawk la ka duh, harsatna hi huaisen taka paltlang tur a ni ngai a, mahse, harsatna ţhenkhat hi chu hèl a ngaih chang te a awm ve bawk tih ka hriat vanga phal sak che ka ni.", A ti leh duah a, ka hriat theih china ka pa ţawng tam ber a ni ang, pa ngawichawi, mahni ţhat ţhata ţha hi a ni a, a tlak duah ngai lo, ka nu kan sûn pawh khan, "i kiangah min hruai ve mai lova", a tih sup sup bak a ţahhla chham reng reng ka hre lo!
Ka nau pawhin engmah a sawi lova, a game khelh erawh a tui tawh lo tih hriat takin a out a, youtube ah lutin pasalţha thawnthu a ngaithla ta daih.
Kan chhungkua hi tumahin Mizoram kan la chhuahsan lova, hnathawka han chhuah phei chu kan ngaihtuah ngai lo.
A chhan pakhat pawh, chhiat tawk thut thei, a chhe ber thlenga zankhat mitchhin tawk thei reng kan nih vangin engemaw thila kan ruang dai pawh kan inthlah liam loh kan hlau a ni.
Tin, ka nu in a sawifo ţhin pakhat chu, "Ram danga awm chu inngaihtuah a na dawn em mai, helaiah chhungkim te-in awm ila, Pathian zarah mi chaw khawn emin hei chen kan la awm hleinem", a ti ţhin, ka u hian a nulat laiin ramdang(Mizoram pawn) a hnathawh hi chak ve-in ka nu leh pa te a dil ţhin a, ka nu in a hnial ziah thung.
Kan kianga awm ve tawh lo ka nu thu ka kalh vanga ka pa leh Bawihtea pawh phàwk an ni reng a, chhungkima awm hram hram kan tum ţhin, Pathianni tlai lamah ka u te nupa chaw eiah kan sawm fo a, chawhlui kan kilho ţhin, kan hmeh a tui emaw, tui lo emaw awmho a hlu tih kha ka nu thupui ber pakhat a ni miau a.
Kan mu ta a, kan in luahah hian khum pahnih a awm ve a, pindan pangngai si lo, zar hliah chawp maiin kan mutna a awm a ni, khum hi pakhat single niin pakhat erawh double a ni a, khum lian zawkah ka pa a mu a, kei single bed ah ka mu thung, Bawihtea hi ţhutthlengah a mu mai zel, kan in luah aia lian hi kan han zawng ru ve ţhin tak naa ka nu sulhnu awmna hmun a ni a, Bazar panna leh han chhuahvahna hmun atan a remchang nen chep ve hle mah ila kan la chhuahsan hleithei lo chu a nih hi.
Ka pa chu a ţawng ri ka hriat tham si loh hian a ţawngţai a, a mittui a tla tih ka hria, patling pawh hi an mittui a tla ve fo a ni.
Rei fe muhil thei lawk lova ka men reng hnu-ah ka muhil ve ta hram a, mangchhia neiin ka la ţap chhuak lehnghal. Ka pa hi a harhvan mai bakah kan inhnaih bawk nen min rawn ngaihven thuai a, 'pa tiin ka kuah a, ka ţap hlap hlap mai, Bawihtea erawh a harh lem lo thung.
Engmah sawi lovin ka pa chuan ka hnungah a beng thuk thuk a, ka thla a muang ngawih ngawih.
Ţawngţai lawk ang aw tiin ka khumah min ţhut tir a, ka lu chungah kut nghatin min ţawngţai a, "Lalpa, ka fanu rilru natna leh a huntawn rit tak hi kei chuan ka chhawk thei lo, mahse, nangin i thei tih ka hria a, i hnenah ka rawn kawltir e, nangin kaihruai tlat ang che, kei misual, i duh loh dana nung ţhin hi min ngaidam duh a, ka ţawngţaina i ngaihthlak ţhin vangin ka lawm e", a tih chuan min hneh hle a, ka rilru in, "Lalpa, Lalpa", ka lo ti ve leh ţhin.
A ţawngţai zo chu mak tak maiin ka nui var var a, muhil leh turin min ti.
Ka muhil leh vat a, tui takin, zing ka ţhanharh chuan ni chhuak a lo sang leh hle tawh, Bawihtea leh ka pa in chaw an lo ei mek a, ka tho chhuak min hmuh chuan, "i tho thei maw? Hei kan lo ei san mai che", ka pa in a lo ti vat a, ka bu nghat, ka hmai te phihin ka ha te ka nawt te te a, ka pa te erawh hna lamah an kal thung.
Chaw chu châk lo chung chungin ka nam liam vel mai mai a, Dr Ruatruati min lo biak hun ka ngaichang tawp mai a ni.
Inhmatawnin Dr Ruatruati nen chuan kan ţhu dun ran a, a hmel chu a chiai deuh niai hian ka hria a, a chhan zawh duh viau mah ila mi dilchhut tak nih hi ka duh lem lo, ngaihţha vak lovin, 'i ţha em?' Ka ti ta nge nge a, min en ve reng emaw tih laiin khawvel hranah a cheng tih hriat takin a phu zuk thung.
Ngaih ţha lo fe hian ka melh a, "Aw, ahh, i sawi nawn thei ang em?" A ti sep, a ţah a chhuah hmel ka ti.
Ka sawi nawn leh a, ani chuan thaw hap chungin, "ka pa ka zai a, a la harh chhuak lo", a ti ta a, ka phu dawrhin ka hria, eng anga Doctor thiam pawh ni se mahni pa te zai chu a awlsam lo ang tih ka ring, a zâmin a hlauthawng em mai.
A kut ka vawn sak vat a, a khur der der mai, ka lainatin ka inthlahrung hle, kei min ngaihtuah vangin a pa a zai zo chauh, a pa la harhchhuah hma hma-in ka hnenah a rawn kal a ni a, ka inthiamlo ngawih ngawih, pawi ka ti lutuk ka ti a, ka thiamloh a nih loh thu min hrilh.
Ka kalna tura a lo rilruk chu Bangalore a ni a, tah chuan a cousin pawh hnathawkin a awm tih min hrilh, a cousin chu hotel ah singer a ni a, Bangalore Mizo welfare Association lama hruaitute zinga a tel thu a sawi bawk, amah in in a luah a, a hnenah khawsa in a hotelthawhnaa ka thawh theih thu min hrilh a, harsatna engpawh tawk ila amah emaw, a cousin chu engmah hrilh hreh lo turin min chah bawk.
Kei chuan duh han thlan tur ka hre lova, a sawi ang ang chu ka lo buk liam pui vel mai mai.
Kal turin thutlukna ka siam fel takah chuan ka u te nupa an lo leng a, ka u chuan ţawngţaina hmangin min fuih reng a, ka lung an tichhia, kal leh loh mai ka duh rum rum a, mahse, Dr Ruatruati ka hmaizah tawhin keima'n kal ka duh tih ka sawi tawh tawh a, rei em em pawh awm kher lova kal thlak ve rawih phawt chu ka tum nghet lehzual ta a ni.
Lengpui Airport ah ka awm ta vang mai, ka kiangah Dr Ruatruati a awm bawk a, ka chhungte erawh min thlah buai kher duh lo turin ka hmin thei hram a nih kha.
Ka luh a hun mai dawn a, ka luh hma-in a la hma bawka tiin Airport luh hma deuha thingpui dawrah chuan lassi kan han in dun leh te te a, hlau lo tur leh harsatna engpawh tawk ila amah be fo turin min chah mawlh mawlh reng mai.
Ka thla a muang hle a, ka ram vawikhat ka chhuahsanna tur a ni erawhin ka sawithiam chiah si lohin min nih tir huih mai, lassi kan han in zo a, ka lut dawn ta, Airport chhung ka pen luhna atan pen tam a ngai tawh lo tihah chuan, "Rodawngkim", ti fiak ţhak thawm ka hria a, aw lo chhuahna ka hnung lam chu ka hawi dawrh mai.
Chau tih hriat takin wheelchair ah Ruatdik a alo ţhu a, a mit a sen rûm tih ka hmu thei!
Chu mai ni lovin a nu khan a wheelchair nawrna chu a vuan a, mittui tling pam hian min lo en ve bawk a nih chu!
Chapter 6
Hluhlu-i Khiangte
(He story ka ziah chhan pakhat, Dr Ruatdika zaninah hian a rawn kal a, black coffee a rawn chah vel a nih chu, ka coffee siam tui taka a in bakah a mobile number naupangho hnen aţangin ka nei bik)
Ka lungphu a rang nghal dawt dawt a, Dr Ruatruati khan a hnena ka thil sawi te kha Ruatdika a hrilh ang em? Mizoram chhuahsan ka tum tih te kha a hrilh ang em? Tih vel ngaihtuahin ka buai ka buai a, ka buai karah khawsak rel a lo hun der lehnghal, hotpot kettle ah tui ka lum a, thlairah ka bai a, alu leh changkha ka kan pawlh bawk a, a ro rap hnu-ah chawbel ka chhuang leh ta a, ka zo der, zing lama ka pa Sangha chhum a la awm bawk a, bawl duah a ngai lo, thak tek tawka siamah Zawngţah ka ziat leh a, ka ziat ţan chiah tihah ka nau leh ka pa an lo haw mai bawk, an inbual a, ka nau inbual zo chuan min nuih sûng mai!
Mitko kan ak ak hian mitmeiin min nuih chhan ka zawt a, nui tuh tuh chungin, "Nu-i, zawngţah pawh i ziat thiam lo a nia, pasal i hmu zo lovang, i zawngţah ziah ve dan kha ka thiam hmaa ka ziah dan a nih kha", a ti a, ka lo ner nâwng mai, chanchinbu hlui pahnih dawhkanah ka phah a, a chungah Zawngţah chu mutin ka ziat a, ka thiamlohna ka hre der lo, Bawihtea chuan ka zawngţah ziah lai chu min laksakin chhuatah chanchinbu chu a phah a, a kut veilama zawngţah keng kângin a ziat vei hoh hoh a, a la ziat chak phian lehnghal, ka nui ve ta ringawt.
Ka thiam ve lo tak tak!
Hma takah zanriah kan ei a, kan eipuar hnu chuan thleng kan han seng fel a, TV enin kan ţhu ta ţhap, zam deuh tak hian, 'pa, vairam lamah hnathawkin zu awm ve ka tum deuh a, eng nge i ngaihdan?' Ka'n ti dâk dâk a, a mitko a chuar nghal nûng mai, Bawihtea pawhin a pubg khelh laklawh lai dah meuhin min en a, ka ţhawng tih ka hria, engmah sawi lovin min endun run bawk si nen, 'sum leh paiah pawh kan ziaawm ve deuh zawk ang a, boruak thar hip na'n ka duh hrim hrim nen', ka ti nawi leh nak a, ka pa chuan, "Nubawih, i duh chuan kal rawh", min ti, a aw chu a chang hrek hrawk hle a, ka en dawrh mai, Bawihtea'n, "a ţullo", a lo ti hluk thung.
'Pa', ka ti sep a, "i nu angin min ngaina lo tih ka hria, min hmangaih loh vang ni lovin i nu hnena i engkim i hrilh a i ţhian inih tir ang khan min ti lova, a chhan chu pa ka ni a, mipa ka ni, i harsatna zawng zawng ka hriatthiam pui ve kher lo maithei che, hmeichhia ka ni ve lova, mahse, ka fanu mita natna lang chhuak leh zanrei a kan muhil emaw tia a ţah ruk te, tlansan duh nei tlat mitmeng inringtawk zo lo lutuk hi ka hmu thiam ve, pa ka nihna angin", a ti charh charh a, ka mittui bawk a lo tla leh ta.
"I harsatna zawng zawng ka zawt lui lo ang che, mahse, pa leh unaupa i nei a, laizawn i nei bawk, kan hnenah awm tawh lo mah se i laizawn a nihna leh a hmangaihna che a kiam lova, tin, chung i laizawn, i nuţa leh i pa ai maha hmangaihtu che Pathian i nei bawk tih hria la, kan tan chuan lunghlu ţha mi aia hlu ini bawk, i hlutna hria la, chapo si lovin inringtawk la ka duh, harsatna hi huaisen taka paltlang tur a ni ngai a, mahse, harsatna ţhenkhat hi chu hèl a ngaih chang te a awm ve bawk tih ka hriat vanga phal sak che ka ni.", A ti leh duah a, ka hriat theih china ka pa ţawng tam ber a ni ang, pa ngawichawi, mahni ţhat ţhata ţha hi a ni a, a tlak duah ngai lo, ka nu kan sûn pawh khan, "i kiangah min hruai ve mai lova", a tih sup sup bak a ţahhla chham reng reng ka hre lo!
Ka nau pawhin engmah a sawi lova, a game khelh erawh a tui tawh lo tih hriat takin a out a, youtube ah lutin pasalţha thawnthu a ngaithla ta daih.
Kan chhungkua hi tumahin Mizoram kan la chhuahsan lova, hnathawka han chhuah phei chu kan ngaihtuah ngai lo.
A chhan pakhat pawh, chhiat tawk thut thei, a chhe ber thlenga zankhat mitchhin tawk thei reng kan nih vangin engemaw thila kan ruang dai pawh kan inthlah liam loh kan hlau a ni.
Tin, ka nu in a sawifo ţhin pakhat chu, "Ram danga awm chu inngaihtuah a na dawn em mai, helaiah chhungkim te-in awm ila, Pathian zarah mi chaw khawn emin hei chen kan la awm hleinem", a ti ţhin, ka u hian a nulat laiin ramdang(Mizoram pawn) a hnathawh hi chak ve-in ka nu leh pa te a dil ţhin a, ka nu in a hnial ziah thung.
Kan kianga awm ve tawh lo ka nu thu ka kalh vanga ka pa leh Bawihtea pawh phàwk an ni reng a, chhungkima awm hram hram kan tum ţhin, Pathianni tlai lamah ka u te nupa chaw eiah kan sawm fo a, chawhlui kan kilho ţhin, kan hmeh a tui emaw, tui lo emaw awmho a hlu tih kha ka nu thupui ber pakhat a ni miau a.
Kan mu ta a, kan in luahah hian khum pahnih a awm ve a, pindan pangngai si lo, zar hliah chawp maiin kan mutna a awm a ni, khum hi pakhat single niin pakhat erawh double a ni a, khum lian zawkah ka pa a mu a, kei single bed ah ka mu thung, Bawihtea hi ţhutthlengah a mu mai zel, kan in luah aia lian hi kan han zawng ru ve ţhin tak naa ka nu sulhnu awmna hmun a ni a, Bazar panna leh han chhuahvahna hmun atan a remchang nen chep ve hle mah ila kan la chhuahsan hleithei lo chu a nih hi.
Ka pa chu a ţawng ri ka hriat tham si loh hian a ţawngţai a, a mittui a tla tih ka hria, patling pawh hi an mittui a tla ve fo a ni.
Rei fe muhil thei lawk lova ka men reng hnu-ah ka muhil ve ta hram a, mangchhia neiin ka la ţap chhuak lehnghal. Ka pa hi a harhvan mai bakah kan inhnaih bawk nen min rawn ngaihven thuai a, 'pa tiin ka kuah a, ka ţap hlap hlap mai, Bawihtea erawh a harh lem lo thung.
Engmah sawi lovin ka pa chuan ka hnungah a beng thuk thuk a, ka thla a muang ngawih ngawih.
Ţawngţai lawk ang aw tiin ka khumah min ţhut tir a, ka lu chungah kut nghatin min ţawngţai a, "Lalpa, ka fanu rilru natna leh a huntawn rit tak hi kei chuan ka chhawk thei lo, mahse, nangin i thei tih ka hria a, i hnenah ka rawn kawltir e, nangin kaihruai tlat ang che, kei misual, i duh loh dana nung ţhin hi min ngaidam duh a, ka ţawngţaina i ngaihthlak ţhin vangin ka lawm e", a tih chuan min hneh hle a, ka rilru in, "Lalpa, Lalpa", ka lo ti ve leh ţhin.
A ţawngţai zo chu mak tak maiin ka nui var var a, muhil leh turin min ti.
Ka muhil leh vat a, tui takin, zing ka ţhanharh chuan ni chhuak a lo sang leh hle tawh, Bawihtea leh ka pa in chaw an lo ei mek a, ka tho chhuak min hmuh chuan, "i tho thei maw? Hei kan lo ei san mai che", ka pa in a lo ti vat a, ka bu nghat, ka hmai te phihin ka ha te ka nawt te te a, ka pa te erawh hna lamah an kal thung.
Chaw chu châk lo chung chungin ka nam liam vel mai mai a, Dr Ruatruati min lo biak hun ka ngaichang tawp mai a ni.
Inhmatawnin Dr Ruatruati nen chuan kan ţhu dun ran a, a hmel chu a chiai deuh niai hian ka hria a, a chhan zawh duh viau mah ila mi dilchhut tak nih hi ka duh lem lo, ngaihţha vak lovin, 'i ţha em?' Ka ti ta nge nge a, min en ve reng emaw tih laiin khawvel hranah a cheng tih hriat takin a phu zuk thung.
Ngaih ţha lo fe hian ka melh a, "Aw, ahh, i sawi nawn thei ang em?" A ti sep, a ţah a chhuah hmel ka ti.
Ka sawi nawn leh a, ani chuan thaw hap chungin, "ka pa ka zai a, a la harh chhuak lo", a ti ta a, ka phu dawrhin ka hria, eng anga Doctor thiam pawh ni se mahni pa te zai chu a awlsam lo ang tih ka ring, a zâmin a hlauthawng em mai.
A kut ka vawn sak vat a, a khur der der mai, ka lainatin ka inthlahrung hle, kei min ngaihtuah vangin a pa a zai zo chauh, a pa la harhchhuah hma hma-in ka hnenah a rawn kal a ni a, ka inthiamlo ngawih ngawih, pawi ka ti lutuk ka ti a, ka thiamloh a nih loh thu min hrilh.
Ka kalna tura a lo rilruk chu Bangalore a ni a, tah chuan a cousin pawh hnathawkin a awm tih min hrilh, a cousin chu hotel ah singer a ni a, Bangalore Mizo welfare Association lama hruaitute zinga a tel thu a sawi bawk, amah in in a luah a, a hnenah khawsa in a hotelthawhnaa ka thawh theih thu min hrilh a, harsatna engpawh tawk ila amah emaw, a cousin chu engmah hrilh hreh lo turin min chah bawk.
Kei chuan duh han thlan tur ka hre lova, a sawi ang ang chu ka lo buk liam pui vel mai mai.
Kal turin thutlukna ka siam fel takah chuan ka u te nupa an lo leng a, ka u chuan ţawngţaina hmangin min fuih reng a, ka lung an tichhia, kal leh loh mai ka duh rum rum a, mahse, Dr Ruatruati ka hmaizah tawhin keima'n kal ka duh tih ka sawi tawh tawh a, rei em em pawh awm kher lova kal thlak ve rawih phawt chu ka tum nghet lehzual ta a ni.
Lengpui Airport ah ka awm ta vang mai, ka kiangah Dr Ruatruati a awm bawk a, ka chhungte erawh min thlah buai kher duh lo turin ka hmin thei hram a nih kha.
Ka luh a hun mai dawn a, ka luh hma-in a la hma bawka tiin Airport luh hma deuha thingpui dawrah chuan lassi kan han in dun leh te te a, hlau lo tur leh harsatna engpawh tawk ila amah be fo turin min chah mawlh mawlh reng mai.
Ka thla a muang hle a, ka ram vawikhat ka chhuahsanna tur a ni erawhin ka sawithiam chiah si lohin min nih tir huih mai, lassi kan han in zo a, ka lut dawn ta, Airport chhung ka pen luhna atan pen tam a ngai tawh lo tihah chuan, "Rodawngkim", ti fiak ţhak thawm ka hria a, aw lo chhuahna ka hnung lam chu ka hawi dawrh mai.
Chau tih hriat takin wheelchair ah Ruatdik a alo ţhu a, a mit a sen rûm tih ka hmu thei!
Chu mai ni lovin a nu khan a wheelchair nawrna chu a vuan a, mittui tling pam hian min lo en ve bawk a nih chu!
Comments
Post a Comment