TERI MERI KAHANI 5

TERI MERI KAHANI(story of you and me)

Chapter - 5

Hluhlu-i Khiangte

"Ka ngai lutuk che Lalpa", ka ti leh ţiau ringawt ţhin, chu thu bak chu ka sawi thei lo, ni e, ka ngai em a ni.

Lalpa nen chuan ţahna pawh hlim vang a ni ţhin a, Lalpa nen chuan ka tih tlat lai kha chuan engkimah khan lawm ka tum ţhin, ţap mah ila ka thinlung hi a nui ţhin a, mahse, ka nu in min muthilhsan chiah a, mihring chuan mitthi an ti ţhin, mahse kei chuan muhil angah ka ngai a, ka pawmdan pawh a ni.

Nakinah a muhil chu kaihharh in a la awm dawn a, Lalpa'n amah ring a, a thu zawmtute chu a hnena kumkhua chatuana cheng tawh turin min hruai dawn tih ka nu in min hrilh ţhin, ka ring hle bawk a, lungngaihna pawh inhneh tir loh ka tum ve ţhin, ka ngaihzawng hmasa in min phatsan pawh khan ka nâ a, tlawm ka inti hle bawk, mahse, Lalpa nen ka tuar chhuak a, ka dam leh ta a ni. 

Ka nu a muhil ta, ka kehsawm a, ka engkim, ka zawng zawng ka hrilh ţhinna, ka nu mai ni lova ka ţhianţha ni bawk khan min muthilhsan a nih chu!

Ka nu ah khan ka lo innghat nasa lutuk a, keimah hi chu engmah ka lo ni lo!

Pathianah beiseina ka nei zo lo fo a, ringhlel ngam si lo, amaha rinna zawng zawng hlan pumhlum thei si lovin, Pathian lakah ka hel ţan ta a ni!

Suahsual rawng ka bawl em em hran chuang lova, Khawvel thilah ka tlan phah hek lo, keimah leh Pathian inkar ka tizau a, ka au ngai ta mang lova, harsatna ka tawh vanglai takin ka hre ngai lo ni lovin mamawh bik lo niin ka hre ţhin hial a, ka hmangaih em em, ka tana mi hlu tak min laksak avangin ka dem hle a nih kha.

Mahse, tuna ka thinlung nâ hi chu keimah chauhin tawrh dan ka thiam lo, hetiang em em hian hmangaihna vangin ka nâ ang tih ka hre lo, ka ngaihzawng hmasa in min phatsan te kha chu ka dam leh vat, kawp nih kha ka zak a, ka tlawm hle in ka hre bawk a, kha khan min tina a ni, mahse, tun ţum erawh ka hmangaih tana ka tlin tawk loh zia hriattir ka ni a, a hringtunu kâ ngei aţang lehnghal mawle, dawta puh ka ni bawk a, ka zah leh tlawm nia ka inhriat vang ni lovin ka hmangaih ka chân ta chuan a ni min ti na ber ni.

Sermon pakhat ka ngaihthlakah chuan, Bible chang lâr tak "I vanglai hian i siamtu hre reng rawh", tih thupui kha a hmang a, a sawi dan ki kha ka rilrem zawng tak a ni mahna, "He vanglai hian mihring ţhat vanglai, nulat tlangval lai a kawk bik kher lova, hlimna kan tawn san vanglai tak, lungngaihna kan tawrh vanglai tak te hian Pathian kan hriat a va pawimawh em", tiin a sawi a nih kha.

Harsatna ka tawk a, thinlung na em emin ka ţap tlawk tlawk a, Pathian chu ka hria a, ka lo hlatna zawng zawng kha ţhiatin a hnenah thinlung kehsawm chungin ka ţap mek a nih hi!

A angchhungah tluk luh a, amah Pathian ngei han hmuh a, ka hmuh rual ruala amah kuah chunga ţah hlawp hlawp chu ka chak a, ka ngai em a ni, cabin hi a phui ţha tih ka hre bawk a, ruah sur thawmin min pui bawk nen insum hauh lovin a ri meuhin uar lehzualin ka ţap rawng rawng.

Ka hriat loh karin ka lo muhil a, mangchhia in min tibuai zui ta lo, ka harh leh chuan ka hawi kual nghal a, a lo eng ut tawh mai, ka lû a na lûk mai a, ka ţah nasat vang tih ka hai lo, nurse leh Doctor Ruatruati an rawn lut a, min check zung zung.

Helai hmun canteen a thawk ka nih miau vangin min hre ve hle a, nelawm takin min nuih sêng mai, Doctor Ruatruati chuan, "i inenkawl ţha lova, i taksa mamawh tawk chaw i ei lo, tui i in ţha lo bawk, chuan, ka rindanin cigar i zu nasa in ka hria", a ti hliai a, ka lo nui tawi tak mai.

Nia, tunlai hian cigarette ka heh zual a, a tlangpuiin mei hi chaw eikham velah hian ka zu ve zeuh zeuh chauh, mahse, ka rilru a hah emaw ngaihtuahna ka hman nasat chuan ka zu sek zel.

"Thawhah i nei tih i inhre lo em ni?" A ti chang ya fak, ka lo nui leh mai, helai Doctor awm zinga ka nel ve ber a ni a, ani pawhin nau anga min enin min hau ngam tur pawh a ni.

Ka nu khan thawhah a nei a, keipawhin ka nei, mahse, nasa tak a ni lova, engemaw changa a chhuak zauh tih loh chu harsatna min thlen hran lo, School ka kal lai phei chuan sports lamah ka kal ve a, Boxing, Football leh Volleyball ka khel thei ve pangngai, medal tenau ka dawng ve far bawk. Harsatna lian tham min thlen ngai lova, inenkawlna pawh ka nei chuang lo, mahse, meizuk hi ka ngeih lo hle tih erawh ka hre thung.

Ka chhan loh avang chuan a ner deuh nâng a, "a hrisel loh hrim hrim chu thuhran, nangmah phei chuan i ngeih lo zual, nikhawhre lova i tluk chhan tak chu a ni lo naa a nghawng tel reng a nia, i la naupang a, a la lang tam lo mai mai, hei aiin han upa leh deuh la tuna i mei zuk effect hi a la rawn lang dawn a nia", a tih leh dap dap chuan ka lo bu ve nghat a, Doctor in damlo a hrilh a nih piahlamah min duhsakna a tel tih ka hria a, a mitah min ngainatna a lang a ni.

Min check zo a, nurse chu a chhuah tir a, ani erawh a la ţhu thung, "eng harsatna nge i neih?" Min ti ta chat.

Ka hmaia ka nui hmel bel chawp chu a reh tial tial a, chawplehchilhin ka mitah mittui a tling nghal nia mawle!

Ka nu mitmeng ang maia mitmeng dam thliam a nei a, ka nu in min duatna ţhin awrawl ang maiin ka lo dawngsawng a ni. Pangchang em em hian 'U Ruatruat' ka ti ţiak a, min kuah nghal thlawp.

Rawl chu chhuah em lo mah ila ka insût hraih hraih a, engvanga hetiang em ema ţahbelh ta hi nge ka nih pawh ka hre niau lo ve.

"Doctor Ruatdika nu kha" ka ti leh ringawt a, ka hmuh sual nge Dr Ruatruati mitmeng chu a rum deuh, mahse, ka en chian chuan a lo nem leh thluam lawi a, ka mittui tla mithmuh phê nen ka hmuh sual a nih ka ring ta, ka thiam ang angin ka harsatna te chu ka hrilh a, Ruatdika nu ţawngkam min hman khum erawh ka sawi vek lo, a fapa tan min duh loh thu ka sawi mai a, mahse, mi titi ah a hre vek sa ang tih erawh ka ring.

Min lainat hmel fe hian min en a, "I la naupang a, hmakhaw eng tak ila nei alawm, a harsa ang tih ka ring a, mahse, i theih ngei ka ring, tun thlengin hmu tur che-in amah Dr Ruatdika ngei pawh a la rawn kal lo a ni a, theihnghilh tum la, i hna aţangin chawl la, hna dang hahdam deuh zawk zawng rawh, keipawhin ka pui thei ang che, helaiah chuan a sulhnu i hmu reng dawn a, itan a hrehawm ang, amah leh a sulhnu awm lohnaah kal la a fuh ka ring, theihnghilh a awlsam deuh dawn a, chuan, ngaihthlak hrehawm ti dawn viau mah la a hmangaih tak tak che-in ka hre lo", a ti sep sep a, ka awm zawn hi a na sa veng veng mai, ka mittui a hul tawh a, mahse, ka thinlung chhungril nâ hi a reh si lo.

Dr Ruatruati thusawi chu a dik tih ka hria a, mahse, pawm a harsa ka ti, ka duhdan chuan, "amah ngei pan la, sawipui la, hmaichhanah", min ti se ka duh, chu chu ka rilru lehlam pawh a ni a, mahse, a rilru tam zawk hian Dr Ruatruati thusawi kha a pawm zawk miau a, na hle mah se ka pawm a ngai.

Damlo serious ka nih hran loh vangin zan khat ka riah leh hnu-ah ka chhuah theih tur thu min hrilh a, taksa tana damdawi ţha vitamin chitin reng min chawh thung.

Min chhuahsan dawn chuan, "Puih i ngai a nih phawt chuan ka awm a nia, vairamah te kal daih rih la, kum hnih khat te chu han awm la, boruak thar, hna thar, ţhian thar nen, itan a ţhat ka ring, i duh chuan ka pui ang che, ka thusawi kha ngaihtuah la", ka kut min hum sak chungin min hrilh kalh kalh a, hetiang hi min hnawhbo duh viau te an nih ngawt loh chuan min hmangaih viau tu tih turah ka ngai, hmelhriat satliah kan ni a, kan hnathawhna hmuna kan inhmuh tam ve deuh vanga innel mai kan ni, ka ţah khuma ka rilru natna ţhenkhat ka hrilh mai pawh kha mak ka ti, ka tawt em a, insawithawl ka mamawh vang te pawh a ni mahna.

Damdawi in ka chhuahsan aţangin kar khat a ral leh tawh a, dawrah pawh ka thawk ta lo, Ruatdika nen kan inkar pawh a hma aiin a chhia a, ka sawi awmzia chu min call a tum tawh ngai lova, text message min thawn tawh hek lo, a message hnuhnung ber chu tawite a ni a, "KA NGAI CHE" tih te mai hi, message box hawng kher lovin ka chhiar thei a, a message pawh za chuang a awm, ka la open chuang lo! Mahse, a reh ta veng veng a, ni 5 vel chaub reh mah se ka tan kum tam hen a ni. Damdawi in aţanga ka chhuah rual rualin kan in lamah ka haw a, ka taksa in a tlin rih lo a ni, thinlung nâ a lo tel bawk nen, in ah ka awm ngawt ngawt a, suangtuahna kawma, a changa nuih a, a changa ţah chu ka hna pui ber a ni rih, mi pawhin an tawng a, kei angin an nep kher lo tiin ka inhau thul, mi ka ni lo miau a, lo nep bik pawh ni ila tihtheih ka nei lo, ka na miau si a.

Dr Ruatruati thu min hrilh pawh ka ngaihtuah zui ve reng a, thutlukna ka siam ta, ka mobile ka hmet eng a, a ring chhung te chuan insangmarin thawk ka la hawk hawk mai. A rawn pick-up ta a, 'U Ruatruat, Nutei ka ni a, vairamah chuan ka kal duh' ka ti nghal tawng, a hrethiam nghal tih hriat takin zawite in a rawn thaw hliai a, second 10 vel a ngawih veng veng hnu-ah "Aw le, nakinah message ka rawn thawn ang che, mi zai tur ka nei a, ka dah rih phawt ang", a ti a, call a dah hma si chuan, "Dr Ruatruat", chau aw hmel tak hian a rawn ti a, chu aw chu Dr Ruatdika aw a ni tih ka hre chiang mah mah a ni.