TERI MERI KAHANI 4

TERI MERI KAHANI


Chapter - 4


Hluhlu-i Khiangte



VIP ah chuan ka kal a, VIP kan tih hi kan dawr aţanga mitthi dah lailawkna lamah a awm a, zunram thiarna bakah hmun zau lutuk lo kawtzawl tia vel lek a awm bawk, chutah chuan tlangban siamin keini ho hian thawmhnaw zarna atan te kan hmang ţhin a, tin, Hospital area ah mei zuk phal a nih loh ţhin avangin zuk hmuam ti duh te'n an kamchhe tleuhna atana an pan ber a ni bawk, kan hawi khawthawn ve na hmun a nih ber chu, Ruatdika chu a lo ding run mai, ka thawm hriain a rawn hawi a, rang fahranin min rawn pan, chik zetin min en a, kei erawh ka thaw ham ham ringawt.
"Enginnge i rilru tibuai?", A ti sup a, ka lu ka thing nak nak.
Ka mumang chanchin ka sawi chuan a hnual phah ka hlau tlat a nih chu.



Min zawh chhuah theih tak lohah chuan nui sukin min kuah hlun a, a rim chu am takin ka lo hip vang vang, ka ngai hliah hliah ni maiin ka hria.
"Ka bansan tawh", a ti sup a, hrethiam lo deuh hian ka en chho hâ mai, a nui leh mai a, mitko ti kâng ak akin ka zawt nawn leh ngat.


"Hlat che tum hi mawle", a ti ta a, a hmel a thutak hle, min nawr hla deuh a, ka dar tawn tawna vuanin uluk fe hian min melh a, chutah, "i kiangah hian ka hlim, min duh a, ka duh bawk che, ka natna hi indelhbeh tir ka tum tawh lo, ka lo hneh zo ta ngang lo a nih erawh chuan i na dawn a nia", fiah felfai takin a ti ta kalh kalh a, a thutak hle bawk.
Mittui khap per sak chungin ka nui a, ka hlim takzet.




Inngaiin inthlahlel viau mah ila a dam chiang si lova, keimah zawkin duhtawk ka rawt ta a, darkar chanve vel ngawt chu kan awm hman tho awm e, inthlahlel takin kan inkuah rial a, ral a Aizawl khawpui pe un chu kan thlir dun a, ţawngka ni lovin kan hmui leh lei hmangin biahthu kan infah dun mawlh mawlh a nih kha.


Hlim em emin ka mu leh ta a, ka mut pawh a tui nangiang mai.


In lamah a haw ta a, ka ngai thei hle, hunawl neih chhun chhunah kan inbe awl lova, inhne leh innin a awm lo, ka hne thei ngai pawhin ka ring lo, a hnathawhna hlui leh ka awmna a nih vang pawh ni maw, ţul em em lovah pawh a rawn kal fo a, vanneihthlak takin a natna in a taksa ah nâ a siam tam lo a, hma a sawn zel a nih ber chu.
Kan hlim dun em em a, zing taka kan inhmu thei lo erawh a hrehawm ţhin, lungleng thei tak ka ni a, ka nunah ani a awm belh leh phei chu ka lung a leng thei hle, hunawl ka neih loh em avangin ka hna aţanga bang turin min duh tih ka hria, mahse, ka hna hi a zah a, a sawi lang ngai lo thung.



Damlai rengin pialral par kan chen ţhin a ni hawt e.


Mahse, hun a kal a, a kal zel a.
Ka zia a ka nei tel tih ka hriat miah lohin ka thikthu a chhe em em a, atan ninawm mai a chang ang tih ka hre tho chung pawhin ka inthunun thei ţhin lo, a natna avanga ngaihsaka betu a nei fova, hmeichhe nalh leh changkang fe fe lah an tam narawh e, a thawhpui ţhin Doctor nula ţha tak tak te, a zir pui ţhin nula hmel fai tak tak te an ni a, kan inhmuh apiangin a mobile ka check ziah!
Amah chuan ngaihkawih theih turin a be ngai lova, mahse, he thinlung thikthuchhe lutuk hian a thik ţhin tho, mahni ka insit a, kan khawsak dinhmun leh ka hnathawh te ka sit a, hna hi zahawm lo a awm bik lo ve tih ngaihdan nei ţhin khan hna zahawm nia hriat bik te ka nei zel a, a tan chuan ka te lutuk a ni tih te ngaihtuahin ka na fo ţhin, mahse, amah bawk chuan min thawi dam leh ţhin.


Suangtuahna pawh ani nen a ni ta zel a, ka hmangaih hluah hluah hian ka hre ber tawh.



Beisei loh lam aţangin vanduaina kan tawk ta, kan phaktawkah hun tam inpe tawn thei lo mah ila kan inhnaih miau a, a chhungte lamin lo hriain a nu meuhin min rawn kal chilh riap mai, dawr chhunga chawl te zawng zawng hriatah a fapa tana ka ţhat tawk loh zia leh, nupui hual a neih sak tawh thu a rawn tlangau pui a, dawr chhung mai ni lo, casualty leh a kawt vela awm pawhin an hre vek.


A ţawngkama nâ ka tih ber erawh, "en mai hi chuan hmeichhe pangngai tak inih hmel a, mahse, i chhungril erawh a tuiek thung, i taksa hmanga ka fapa lem kualin mipa te chak lohna ber sex i hmachhuan a, a ruk chuan ka fapa pawhin a ten hle che, a nei duh tak tak hauh lo che", tih chu a ni, ka nâ a, chu ka nâ chuan min vilh ngut ngut, ka zak a, ka tlawm hle bawk.



Hamhaih tak leh rilru na tak chungin ka en tlawk tlawk a, dawr a chhuahsan hnu-ah zawite-a thawk la hawkin, 'hmeichhe thianghlim ka la ni a sin', ka ti sap, nui lui var var chunga customer te hnena ngaihdam dilin choka lamah ka lut a, hnathawh lam a lang tawh lo, bual in lamah tlan lutin ka thawm an hriat lohna atan tui ka herh haw a, ka ţap tlawk tlawk.



Ka hna chungchang a sawi te, ka retheih thu a sawi te kha ka haw lo, nâ pawh ka ti hran lo, mahse, sex hmanga Ruatdika thlem a, nawmchenna lipuia pil tura ka sawm ang hiala a sawi kha a ni ka nat! Chutiang thil serious chu a rinthu in a sawi dawn lo tih pawh chiang takin ka hria, Ruatdika zawkin min thei tawh anga a insawi a nih loh chuan ani ang nu vantlang chunglam khan rinthu maiin khatiang thu kha a chhak chhuak hauh lo ang, ka ţah chhuak zualpui a reh a, mit sen râmin bual in ka chhuahsan.



Min ngaihtuah hmel takin ka thawhpui te chuan min en a, an mitmengah min khawngaihna ka hmu thei, chu chu ka duh hauh lo, min ti chak lotu a ni, mi te khawngaih nih hi ka duh miah lo!



Ka na ngut ngut te chu thinurna in a rawn luahlan a, Ruatdika number chu hmet chhuakin ka call nghal zat.
A rawn Hello rual chuan ka puak pawp a ni ber mai, ka ang phiar phiar a, 'Nang hi engtik laiin nge ka thlem che, engtik mah chuan maw sex hman puiah ka sawm che? Engtik lai khan nge k hmaah ka thuam hlipa saruaka ka thlem che? Sawi rawh", ka ti phiar phiar. Hriatthiam loh hmel fe hian bah deuh nakin, "Engmaw i sawi a? Eng nge a awmzia", a rawn ti hû a, chu chu ka chhanna duh a ni hauh lo.



A insawifiahna ngaithla lovin ka reh san hmak a, ka block lo thing, call ka lak duh miau loh vangin message tamtak min hnutchhiah a, ka chhiar ngai lo thung, ka hmangaih em a, ka nem phah ka hlau a ni.
Kar khat a liam ta, min biak duhin message min thawn chamchi tu kha a reh ta a, ka na zual telh telh thung, hmaichhan ngeia min biak a duh ka lo ring a, teuh lo mai, min hmuh tumin vawikhat te mah a lo lang lo!



Ka nat lohna turah ka nâ tiin ka inhnem a, a chang leh ka inhau a, mahse ka na si!



Ani khan min lo hmangaih ve miah lo tih keimah leh keimah inpawm tir ka tum a, midang hi engtinnge kan thunun theih tehlul ang ni, keimahni ngei pawh kan inthunun thei si lo, chaw ka ei thei lova, ka mu thei lo va, dirk circle fiah em emin ka nei kulh a, ka taksa a tla dâwk bawk si, hna ka thawk a, ka hah bawk, rilru dam lo, taksa chakna atana chaw ţha hmu si lo ta na nâ na chu nikhawhre lovin ka tlu ta hial a, ka harh leh chuan ka hawi ha ha mai, ka banah hriau an lo vit a, thisen chaw min lo khai a ni.




Ka kiangah tumah an awm mai lova, ka hawi ruai ruai mai, ka hamhaih zual a reh chuan ka awmna chu cabin a ni tih ka hria a, mak ka ti hle, Ruatdika damloh laia a cabin berkher lehnghal, ka thaw halh a, ka tluk dan ka ngaihtuah a, chuvanga heta awm hi ka ni ta phawt, ngaihtuah thui duh lovin ka lû a hai deuh bawk nen ka mit ka chhing leh ta riai riai.



Mang rapthlak tak ka mang leh a, Ruatdika nen hmana ka man ang chiah kha a ni, kan chung zawnah chhum dum chhah tak awm bik tlatin ka phal lo chung chung min kalsan leh ta, ngaiah neih a har ngei mai, nasa taka ţap hlawp hlawpin ka harh chhuak a, mangan hmel fe hian Zorina nu khan min lo en a nih chu.



Ka mang vanga ka natna chu ka zahna leh tlawm intihna ten an rawn belh a, ka na ngawih ngawih lutuk!



"Ka va lainat tehlul che u em ka fate u", ţah chhuak insum tih hriat takin a ti hraih a, min chhuah san nghal.


Mak ka ti a, ka hamhaih hle bawk, ka natna erawh a kiam chuang lo, ka inkhawngaih a, ka insit hle, keimah keimah ka inhmusit a nih tak ber hi, ruah a sur buan buan a, ka huntawn manganthlak zet ata min la sawn tura Pathian auh tumin ka mit ka chhing a, "LALPA" tih bak ka sawi thei lo, ka lei hi hian chham tur reng reng a hre lova, ka mittui a rawn tla leh ta, 'ka ngai che Lalpa', tiin ka ţap hlawp hlawp, kawlphe leh ruahsur te chu ka hlau lova, ka nâ min tuarpui tu ni maiah ngaiin ka ţhian ah ka ngai rilru hial nia mawle!