TERI MERI KAHANI 3

TERI MERI KAHANI

(Story of you and me)

Chapter - 3

Hluhlu-i Khiangte

Vawiin chu ruah a tla a, khua a dai ve deuh, ruah a sur apianga ka insumtheihlohna chhuakin awl lai chuhin ka tlan chhuak a, cabin a pek tur ei leh in pack sa diam chu ka khai nalh bawk.

"Lalnûte", ka boss aw ri chu hre mah ila ka hre lo der hmiah, ka tlan tar tar a, ruahin ka hmai a rawn nan huh nghal vek, hlim deuhin ka nui var var a, kar lovah ka lû leh taksa pawh a huh kim nghal titih, cabin awmna bik building chu ka hria a, ka kal ngai lo thung, mahse, ka bo nachhan tur a awm lo, order paper ah a man zat ziah sa vekin a awm miau.

Karei, ka ngaihtuah tawi lutuk, Building chhungah hetianga huh zawr chung hian ka lut thei lo ang, luh dawna security duty chu ka nuih tlawn var var a, 'Mily' ka ti sap, ani hi security ah chuan ka ngaina ber mai, hun a neih phawt chuan a rawn ei ziah a, kei nen pawh kan inhriat phah, phun hluk pahin eitur chu min laksak a, min pek sak nghal. Pawnah ka lo ding far tlak tlak a, "Rodawngkim", heiham, thinrim deuh hian ka hawi let a, Doctor-a nen kan inhmachhawn leh ran tawh, "Tinge ruah i do", inla strict deuh hian a ti khur khur a, ka ner sak ringawt, "ka bia che", a rawn tih leh hluk chuan ka melh nghek a, 'ka do châk', ka ti chiam.

A nui suk a, nuihzat vang a ni lo tih erawh k hrethiam ve, "i damlo mai ang asin", a ti sup a, 'i buaina tur a ni lo", ka tih leh chuan a meng thim khup, "min ngaina lo viau a ni maw", tiin a nihliap dum chu a tiparh a, a kal nul nul.

Keia pawh chu, tinge hepa bulah hian ka mize ni lo pui pui ka lantir fo ni, ţawngkam duhtui em em ka ni ţhin emaw ka tia!

Inthiamlo deuh takin ka en vang vang a, a rawn hawi let tawh lo, a cher deuh kuamin ka hre lehnghal, an duty hi a hahthlakin an rim ve em mai a, a chau te pawh a ni mahna.

Dawr ka thlen chuan min hau nghal liam liam, ka inthiam chiah bik lo, ka nuih tlawn hlawm rkngawt, ni e, ka hriselna a pan ru hle a, tunah pawh damkawr ka la nih naklaiin ruah ka do lui leh sia, ka damloh leh mai an hlau tih ka hria.

Ruatdika nen pawh kan inhmu ngai lova, kei chokaah ka awm reng nen a rawn lan loh chuan inhmuh ngaihna a awm lo, order pawh a rawn siam ngai lo!

Ka ngaihtuah fova, kan inhmachhawn dan a fuh lo thei em a, kan inhmuh hnuhnun bera a ţawngkam nen phei chuan ka ngaih chu a ţha chiah lo deuh.

'Doctor Ruatdika hian a va rawn chah khat ve', ka ti satliah a, "a chawl alawm", an lo ti mai a, ka phâwk hrâ thung.

Ka ngawi hle hle thei lo, 'ngatinge a chawlh ngawt a', ka ti leh a, Tluangtluangi chuan, "a damlo in ka hria, Doctors room a ka deliver khan Dr Zualtei leh Dr Obed khan an sawi, a chhungte lamin an nawr a ni awm e, amah kha chuan thawh a duh rengin ka hria te an ti a", a ti leh mak a, ka ngaihtuah ta rauh rauh.

Kan inhmuh hnuhnun ber khan a cherin ka hre reng a ni, a damloh vang a nih dawn chu, Doctor ve si, han damloh ka ti rilru a, ka thusawi ngei chu awmang lo ti zetin ka ner leh nâng tho. Doctor pawh an damlo ve thei tho alawm le.

Zankhat chu emergency a awm nge ni, inkhar dawn a ruaiah an ri nak nak a, coffee leh nestea vel lam an ni, dar 10 a hnai tawh a, chauh nen jnkhar a chakawm viau, mahse, kan hna hi rawngbawlna chi khat ang deuh hi a ni a, kan eizawnna a nih piahlamah tlawmngaih chhuah a ngai ve miau a, kitchen lam thil lam an awm lo a, machine ami leh kan chhang kawl sa hmangin customer te chu an inhnawhpuar hlawm.

Kitchen ah tih tur a awm tawh loh vangin keipawh ka tei chhuak ve a, mi 15 vel an ni, a ţhen chu casualty kawtah an phei lehnghal mai a, mi ţhenkhat erawh dawrah ţhu kher lovin an ei leh in chu an ei hlawm.

"Eng emergency nge ni a?", Ka boss chuan a ti thuphung a, an chhanna erawhin min ti phu dawrh, "Ruatdika a nia, a natna hian a ei chhe chak hle mai, hman ni lawkah a nu leh pa te nawrluihna vangin hna aţangin a chawl a, hei a tla nghal rawk rawk mai, ICU lama luh te pawh a ngai maithei a ni", an ti deuh duah.

An Ruatdika sawi hi ka Ruatdika a ni em? Enga? Ka Ruatdika, huh, ka ta a ni der si lo!

Ka ngaihven ru reng a, an titi aţangin Doctor Ruatdika ngei a ni tih ka hre tawh bawk, ani hi a lo cancer reng a maw? Ka rin loh lam daih a ni.

Mawihnai lo tak tak te khan ka chhang si a, ka inthiam lo viau, an sawi angin ICU ah a awm bawk a, a rawn ţawiawmtu tam zawk te chu an haw tawh thung, an sawihmangin a farnu in a awmpui dawn a ni awm e, awmpui ti ila, ICU chhungah a lut thei lova, ICU pawnah damlo chhungte tana mutna hmun tur room zau lutuk lo a awm thung, mut hmunah chuan muhil thei lovin ka let sek a, umm, ka muhil thei dawn chuang lo tiin ka tho a, ka thawhpuite tihharh hlau zetin ka tho ta ţhem ţhem a.

Casualty ah chuan lutin a  hnungah ka lut tlang a, casualtu hnungah hian ICU pan chhohna a awm a ni. ICU kawt ka thlen chuan damlo chhungte an lo ţhu far, an bulah ka ţhu ve thawr, tiang dinhmunah chuan muthilh a har viau ang le, damlo awm ho hming ziahna white board ah chuan number panga naah Ruatdika hming chu a lo chuang vang a, luh theih chuang hek lo le, darkar chanve vel ka ţhut hnu chuan ka let leh ta, hepa in min hip tlat hi mak ka ti, ka ngaihtuah rm em a, han chûkha chiam turin kan inhre ţha pawh a ni lo, min hip deuh tlat si a ni.

Lu na fek fek chungin ka tho a, ka zi ţalh ţalh, ka mit lah chu a ngap ruap mai a, nizan lam mut ka hmuh ţhat loh vang a ni, ni e, Dr Ruatdika ngaihtuah in ka muhil thei lo a nih kha.

Kal mai tur anga ngaih ni chunga ni thum leh zan thum ngawt mai ICU a a awm hnu chuan mak taka hmasawn viauin cabin lamah an insawn lut a, a chanchin chu naupangho ka aţangin ka hre ve zel a, thaw pawh a veng ve huai mai, ka rilru a a cham reng mai hi mak ka ti a, ka hriatthiam phak loh a ni. Ngaihzawng lama bil tak ka ni bik hran lo naa Ruatdika laka ka feelings neih ang hi ka neih ţhin awm pawh ka hre lo, amah nena awmdun tur anga suangtuahna ka hman chhin ringawt pawhin ka zam em em a, zam ru tak chung si chuan ka hahdam lawi a!

Cabin a an awm a chin pawh ni li lai a liam leh tawh a, naupang ho pawhin a chanchin ka zawh ngun em avangin Ruatdika lakah ka rilru ka seng tih an hrethiam vek a, kan ve turin min tur chamchi hlawm ţhin, ni hnih hnu-ah tun ang renga hma a sawn zel chuan a chhuah theih tawh tur thu ka hria a, va kan ve chu a sualin ka hre ta lo.

A tana lem nuam tur ni-a ka rin Bawnghnute leh omelette ka ken sak a, ka va lang ve hlawl, a cabin chhung ka luh dawn chuan ka zam hle a, ka khur ru hial, mahse, nakinah ka lo ti ta lo a aw...tia ka inchhir leh tur chu hmu tlang vekin ka huaisenna zawng zawng sawmkhawmin ka lut ve rawih a, amah awmpuitu a nu chu a lo awm lo, a chhuak lawk a ni mahna, damlo khuma mu chungin fiah zet hian min lo en ngur a.

Min biak hmasak tum hmel a put loh avangin, 'Ehhh, i chhuak thei dawn hnai tih ka lo hria a, ka lo kan ve che, ih, i reh ţhin sia, lo awm leh vat rawh aw', ka tih bah nak chuan a lo nui suk a, nuihzat tur ka sawi ka hre miah lo!

"Damlo leh thuai thuai turin min duh tihna em ni", nuihzat hmel zeta a tih chuan ka ner ta nâng ringawt, ngainatawm takin a nui ta var var a, ka nuih let ve sen sen bawk.

'Damlo ang ni lovin, damlo enkawltu ang zawkin mawle', ka tih chuan lungngaih hmel takin a meng ngui nghal ruai a, ka inchhir chawpchilh nghal der.

'Doctor i ni a, damlo beidawng tak tak te pawh beiseina an neih theihna atan theihtawpin i pui ţhin ngei ang, hneh theih loh a ni lova, Pathian nen, beidawng suh', ka ti leh sap a, ka ti tak hle bawk.

Chuan, a hmaa zamna ka neih ţhin kha chu thu ka sawi lai chuan ka nei miah lo.

"Ka ngaihtuahna i hre thei tiraw?" A rawn ti teh daih a, ka hawi â nghal heu.

"Ka sawi chhuah kher ngai lovin ka hmel landan aţangin ka rilru puthmang i hre thei a, min chhiar thei, keipawhin i ngaihtuahna ka hre thei ţhin asin, i rilru insual buai laia lû i thing nak ţhin te, nang hian min chîk a, keipawhin chutiang tho chuan, kan thinlung a inpawh ru riau a sin", a ti deuh duah a, ka lungphu a rang ta dawt dawt thung.

Nui suk chunga sawi zawm lehin, "kan inhriatna a la rei lova, inpawh a inchhiar thiam tur hialin kan inhnaih ngai hek lo, mahse, min hip a, ka hip bawk che, inkawprem tur kan ni mahna", a ti leh a, sawi ve tur reng reng ka hre lo.

"Mahse, kei chu ka duh emaw, duh lo emaw he ka natna hian ka thinlung duh dan zawm lovin min eiral tial tial dawn a, i laka ka feelings ka tihlan a rem lo, hlimna tlemte ka tawngbuak pui che ang a, chu hlimna let za tamtak lungngaihna ka pe ang che, i thinlunga ka hming awm, fiah lo taka inziak kha nawhreh a harsat hma-in nawtreh la, min hlat rawh", a ti leh a, mak tak maiin ka mittui a tla ringawt.

Ka lû ka thing nawk nawk a, lainat hmel zetin min lo melh ngawt ngawt.

Chau hnepin ka mu zawi ngiai a, Ruatdika hnenah khan, 'beidawng mah la ka beidawng ve lo, min hlat i tum poh leh i hnaihah ka awm zel ang', tiin a mobile number ka la a, ka haw san a nih kha.

Ni e, ka duh tih ka hria, hmeichhe tiha mawi lo a ni tih ka hriat avangin ka inthunun mai a ni. 

Mahse, a laka ka feelings neih te a hrethiam ta sa sa, zah a ţulna ka hre lo, a natna avanga hnaih min hreh a nih pawhin, kei hian ka theihtawpin ka hnaih zel ang tiin rilru ka siam fel hmiah.

Thlifim thaw heuh heuh leh thing rim nam chek chek karah chuan inkuah rialin Ruatdika nen kan ţhu a, kan hlim tih hai rual lohin kan nui dun var var, kan kiangah chuan nula tlangval inhmangaih te an awm ve fur bawk a, mahse, thawklehkhatah chhum chhah tak, thim mup mai chu kan pahnih chung zawnah chauh chuan rawn inlet tawp tawpin khawpui a ri dur dur a, ruahmal lian tak tak a rawn tla bawk, mak ti takin ka hawi kual ruai, midang chuan kan chunga thil thleng chu mak tihna mitmeng leh lainatna mitmengin min lo en hlawm a, ka hamhaih hle, Ka kianga ţhu chuan, "ka kal a hun tawh", tiin min kalsan tumin a ding uai a, rang taka ding ve in Ruatdika chu nghet takin ka kuah thlawp, min kalsan lo turin lungchhe taka ţap chungin ka ngen lawm lawm a, mahse, a tisa ka tawh chu a ral tial tial tlat.

Manganna avangin ka lungphu a rang hlawp hlawp a, a thamral ta, chu kan chunga ruahsur bik chuan min nan huh vek a, chau taka lei a ţhusawp niai in ka lo ţap hlawp hlawp.

Hlauthawng takin ka tho chhuak hlawl, ka thlanin min bual huh zûi a, ka hawi kual nghal ruai, ka awmna chu ka hnathawhna dawr a ni, mangchhia ka mang tih ka hrethiam chawpchilh nghal a, mahse, manganna vanga ka lungphu rang erawh a reh lo.

Ka mobile chu hmet nghal nawk nawkin Ruatdika chu ka call a, zanin hi a riak ang a, naktuk lamah a chhuak dawn a ni. Rei pawh a in ring lo tih chuan a pick-up a, ka thaw ham ham, "Hello", a rawn tih chuan lawm vangin ka ţap a, ka insut nghal hraih hraih.

"Rodawngkim, i chungah eng nge thleng", a rawn ti fiak deuh ţhak a, kei erawh a lei taksa chhuahsan tura a thlarau a la hruai loh avangin Pathian hnenah ka rilru in lawmthu ka sawi mawlh mawlh.

A ri rawk rawk a, "VIP ah lo phei rawh, ka lo kal", a ti deuh hrawk a, harh chhuak thutin, 'Aihhhh', ka ti nghal tûng.

Chhuak tura min hrilh nawn leh supin call a dah a, ka tho ve vat bawk.