TERI MERI KAHANI 1

TERI MERI KAHANI
(Story of you and me)


CHAPTER - 1


Hluhlu-i Khiangte


"Mi fate nipui hi a va vawt tak", tiin ka phun hlak, ka mit a kham na urh a, ka thawk a sa ham ham bawk, tukin ah ngawt pawh ţum thum(3) lai ka luak tawh a, ka zawi tawh hle, chhun buai tak takah ka tlu mualpho thei mai dawna hriain ka huphurh hle a, inthlahrung tak chungin ka boss hnenah chawlh dil turin choka kawngkhar ka hawng a, ka ke ka pen pawh tha hman a ngai nasa kher mai, ka khur der der.


Ka boss chuan min lo ngaihtuah viau mai a, "lo nghak rawh Nûte, pindanah lo va awm hahdam la, naupang ho hi card ka va lak tir ang e", tiin min tir lut leh a, keipawh pindan ka thlen veleh ka ţhu zawi hnawk, ţhutthleng nghenchhan neiah hahdam tum takin ka ţhu dar dar a, ka mit kham lutuk tih ziaawmna atan ka mit ka chhing riai riai, ka nu ka ngai kher mai.


Rodawngkimi ka ni a, kum 25 mi ka ni, Nûte tiin min ko tlangpui, kohhran Hospital pakhata an canteen ah ka thawk a, choka ah awmin coffee leh special tea vel siamtu bakah order suaktu ka ni deuh ber, helaia thawk ho zingah rau rau chuan ka senior ve tawh a, he canteen an tih hmaa an dawr hmasa aţangin kan pi te hnuaiah hian ka thawk ve tawh a, hna piahlam, chhungkaw thilah pawh kan inpawh viau tawh bawk.



Thla thum liamta mai khan ka nu in a pasal leh a fate ni lo, a in diktak, chatuan hmun lamah min haw san a, ka tuarin min nghawng na hle, kan chhungkaw khawsakin a zir lova, rei tak indawmkun thei ka ni lo, hna ka thawh lai remg pawhin ka thawhpuite pawh zah zo lova ţah chhuah phawng changte ka nei a, inthlahrung viau mah ila ka insum thei ţhin lo, mahse, a sarhu lai ka kalpel a, hnathawka phi buai reng ta na na na chu ka tuar tawh lo ve tihna ni lovin, ka insum in ka hmelhmaiah ka lungngaihna pawh langsar in a inbel lutuk ta lo.



Mahse leh, rilru dam si lo chu taksa hian a lo tuar khawp a, hrisellohna chitin rengin min tlakbuak ta bawk nen dam ver vawr ni ka hmu ta meuh lo, khawsik ka nei zeuh zeuh reng a, chaw ei ka thei chiam si lo nen ka pum lam nghawngin luak te, luhai te ka nei ta deuh reng, nachhawkna ka ei a, rei vak lo ka'n awm hahdam deuh chuan ka ţha veleh mai zel a, mahse tukin zet zawng, ka chau zawr chhe der mai. Naupang ho chuan card an va la a, casualty ah ka va kal nghal, zingkar ngang a ni a, emergency a awm vak lo nen koh hma ka ni, nurse duty fel zetin ka bp te min han check sak a, ka rin ang rengin a lo sang hret, a normal pawh hi a sang lam a ni hrim a, mak ka ti hran lo, Doctor ka hmu a, ka hmuh fo ţhin, kan dawrah pawh eitur rawn lam zing pawl a ni tih ka hria, ka nel ru hle a, hmeichhe hawihhawm leh duhawm tak a ni, ka nat dan min zawt nghal zar zar, keipawhin ka sawi a, test nei turin min kal tir ta phawt. Laboratory ah leh Microbiology dept lamah kalin ka thisen te ka va laktir hnu-ah result nghakin dawr lamah ka va let leh a, darkar hnih hnu velah a lam theih tur thu min hrilh.




Dawrah pawh chuan engmah ti peih lovin ka mu vei zar a, kan choka kil lamah hian store room lian lutuk lo a awm a, refrigerator pathum leh chow bag te, rice chhum sa leh chow chhum sa dah khawmna atan kan hman bakah, kan mutmu leh thawmhnaw vel dahna atan bang depah chhuar lian lutuk lo 2 kan dah bawk. bench pakhat kan dah a, dawhkan mi 5 vel ţhut lenna leh stool kan dah bawk a, bench ah hian kan nawmloh deuh chuan kan mu mai zel. Naupang pakhat rawn tirin ors siam peih sa thlap mineral water burah min rawn chhawp tir a, ka lo in nghal khawlh khawlh.



Ka na te a zia a, ka lo chhing hman sek, tukţhuan ei a hun tawh avangin min kaiharh a, inthlahdah lova dutu reng a ngaih avangin chaw pawh kan inei chhawk ţhin, châk lo tak chungin tlem chu ka'n bar lui ve a, a nam liam ve theih ţawk ţawk e, ka test result lam pawh kar lovah a lo hun a, ka va lam ta, ka result te chu doctor hmuh tir leh turin ka kal leh a, rei vak lo pawna ka nghah hnu-ah ka lut ve thei ta, chu doctor chu ka la hmu ngai lo, a thar a ni mahna, Dengue leh Typhoid ka neih thu a sawi chuan ka bu nghat nghat, admit i ţul viau mai a ti sup a, ka dâng nghal sawp sawpin ka ring.



Kan sum neih dinhmun ka ngaihtuah nghal ruai a, 'Ih, ih, doctor, pawisa ka nei lo', ka ti ta phawng, min melh deuh run a, ka sawi dan teh tawp kha atan pawh a hamhaih thlak ang tih ka hre leh hnuhnawh. 'In restaurant ah hian ka thawk a, harsatna ka neih chuan ka tan lo kal a harsa lo, in admit tur chuan pawisa ka nei lo', ka ti chuai ta râih. Ngun taka ngaihtuah ni awm takin a ngawi vung vung a, kei chuan uluk takin ka lo en ran, ka ţah a chhuak ru ţûn bawk, admit ngei ngei a ngai tia a sawi ka hlau takzet.


Mahse, min hrethiam takin rei fe a ngawih hnu-ah damdawi chu theihnghilh lova, ţha taka ei turin min chah uluk hle a, ka natna in a ngeih loh thil, Artui, sahel, a bikin Arsa min chah uluk hle, ultrasound ti leh lawk la tiin min kal tir, ka thaw ru huai a, ni e, kan tan chuan inentirna, test chi hrang hrang tihna pawh a man a sang lutuk. In admit chu ka ngaihtuah ngam lo. Ultrasound tihna room ah chuan ka va kal a, helai canteen kan luah hma daih aţanga lo awm tawh, Doctor Zo-a a lo awm hlauh, ngaihngam takin ka lut ta a, a diktak chuan doctor mah nise, hmelhriat hleih loh hmuha ka dul han hlim vel kha nuam zawk zawk a ni dawn lo. Uluk taka min en hnu-ah ultrasound result chu a ţha tih min hrilh a, pharmacy store ah doctor lehkha hmuh tirin ka damdawi mamawh ka lam kim nghal vek.


A tam hle a, Dengue leh Typhoid bakah ka tai bawr nâ vel ka sawi vangin ka zun ka test tel a, ka zunah thisen a tam tiin min hrilh tel a nih kha, damdawi chi hrang hrang, a tuiril leh a mum chi nen, ka khai ta lûk a, dawr ka luh chuan ka chau hnawk thei.



Doctor in ka natna te a sawidan chu ka thiam ang angin ka sawi chhawng a, min khawngaih hmel hlawm viau.
Noodles lam hrim hrim pawh insum tura a hma aţanga tih ka ni tawh sa bawk nen ei theih loh ka ngah leh ta sawt a, chu chu hrehawm ka tih lam ber a ni bawk, ei an phal loh lah hi ka chak nghal huam huam lehnghal, chilthli tla lek lekin Artui chhum hmin sa thlap kan chhawpna te chu ka melh dauh dauh!



Tichuan ka awm ta naw naw a, mahse, choka a kan mut hahdamna hmun a zim bawk nen in lama haw thlak ka dil ta chawt, Damdawi in zawk kalsana kan in lam pan ka sawi chu min hnial dawn zet naa, choka hmui leh khu velin ka luak a ti chhuak zel bawk nen min phalsak ta a, 2wheelee taxi la in in lam ka pan thla ta.



In ka thleng chiah pawh ka luak nasa leh hle a, ka lu a hai deuh vang a ni pakhat, ka taksa nâ a chhuah zual deuh changa nachhawkna ei tur Doctor in min pek chu mum khat ka hmawm a, ka mh nghal vang vang, ka mit ka chhin veleh kha Doctor thar hmel kha a lo lang a, a sam chu kir ni si lovin a mawi tawk lekin a kawi a, mawi lo ni pha si lovin a thur deuh bawk a nih kha, damdawi min chawhna lehkhaa a ziah aţangin doctor kha Ruatdika a nih tih ka hre bawk.


A ngo chiam lova, a hang run lem lo bawk, a hnar ngul a sang deuh vah a, a mithmul a dum ţha hle tih chu ka hria a, a hmelţha vût lo naa a cool hle bawk a nih kha, min biak paha a nui leh suk suk hmel te kha a rawn inlâr iar iar a, ka lû ka thing deuh nawk naa ka aiah ţhat, ka taksa nâ ka theihnghilh hmin der a nih chu!



Ngaihtuah zui loh tumin thildang ka ngaihtuah lui ta tlat a, ka nu hmel ka mitthla nghal, lunglenna in min zem a, ka damloh laia ka lu chunga kutnghata min ţawngţaisak lai te, khawsik ka neih hleka pangchang taka a bula ka mut tlat ţhin lai te ka ngaihtuah a, ka mittui a hnai kuar, ngaihtuah zawm loh tumin hmalam hun ka suangtuah a, ka u in pasal a nei tawh bawk nen ka pa leh ka nau mipa rawlthar nen chauh kan ni. Hmalam pawh suangtuah dan vak ka thiam lova, engpawh ngaihtuah ila ka mittui a hnai zel, ka nu ka ngaihtuah chhuak lo thei lova, a tel lo chuan kan in zimte, tawt ve em em hi a ruak huai lawi si.



Ka hriat loh karah ka lo muhil a ni ngei ang, pang kham na et et vang chuan ka harh a, ka taksa nâ vanga rum ţuah ţuaha inlet thakin ka mumang ka ngaihtuah let nghal zat, ka mumang lamah chuan kha Doctor Ruatdika nen khan hlim takin insi rialin hmun zawl zau nuam zetah kan lo ţhu dun a, thing leh hnim rim a nam chák châk bawk a nih kha. Vawiin lawka ka hmuh leh hriat ni si ka mang lam thleng thlenga ka hmuh le tiin ka tho chhuak a, damdawi ka ban lehnghal, banga Sana intâr chu enin ka thaw hliai a, khawsak rel a hun tawh takzet, taksa na chung chung chuan khawsak ka rel mawlh mawlh a, ka peih hma-in ka pa leh ka nau pawh an lo haw, ka pa hi Cement mistiri a ni a, ka nau hi rawlthar te mah nise zirlai a ni tawh lo, ani pawh kan kohhrana kan ţhalai hruaitu pakhat zuiin a inzir nitin a, rawng kah, furniture siam vel an khawihin ka hria, an hna ka sawithiam chiah lo, inzir pah zel a nih vang erawh chuan a hlawh a la ţha lutuk lova, ni khatah 450/- hlawhin a ţan a ni.



Aizawl hi kan khaw chhuahna a ni lova, kum nga vel lek kan la awm, tuna kan khawsakna pawh hi mi in kan luah a ni a, kan khawchhuahna chu Khawzawl a ni thung. Zep thu a cheng lo, ka pa hian zu lem a ching ţhin a tunhma in, kan nihna tur ang kan pha lo hle ti mai teh ang, inchhung bungrua kan nei ţha lova, sum khawl lah kan nei thei ţhin hek lo, ruihhlo hi chuan nunphung a tibuai a nih hi.