HRÂNG NAMEN

HRÂNG NAMEN

Hluhlu-i Khiangte

Ni sa vawl vawl hnuaia thlan tui luang zawih zawih chunga hlo kan thlawh hnu-ah, inchiah dai paha lèn den tumin kei leh Dtea bakah, u Liana te chu Tuichang lam panin kan chhuk leh ta hnak hnak a.

Tuikhur tura kan hai kawng aţanga kalin kan chhuk zel a, ţum thum chu ka tawlhtlu hman hram e😂

Kar lovah lui kan thleng thuai a, a engamah hma-in ka chapal bun chu tui khauhin min laksak leh ta nghal a. Ditea'n min chhar sak vat, a huh phah hluam a, ka inthiamlo viau, ka chapal pawh chu bun ngam tawh lovin ka ah tir ta ngawt a, a hlimawm dawn e.

Kawi hnih vel lui dung kan zawh thlak hnu chuan a chho zawngin lui dung chu kan zawh leh a, u Liana chuan len chu a deng ţan a, kan man tam vak lo naa kan man ve phauh phauh, tui nut hun lai a ni a, tui chu a nu phût a, pawn lam aţanga a landan aiin tui a khauh bawk, suar laiah chuan Nghalerh an awm duh ve viau a, kan man tam ber pawh a ni awm e.

Kei hi ka hming chu Lalnunhlu-i a ni a, Hluhlu emaw Sexy tiin min ko mai ţhin, kan chhungte dang hi kan khaw lamah la inbengbel vekin keini chhungkaw bil hi Aizawl lamah hmasawnna beiseiin kum 6 vel liam ta khan kan pem kha a ni a, mahse, kan khaw lamah hian kan la zin fo, tun pawh hi ka hna lam ka awl lai a ni rih nen ka hawi thawveng duh a, tin, ramhnuai rim ringawt pawh ka thlahlel bawk nen ka ni te kiangah thlengin an lo lamah ka riak ve mek a ni.

Dtea hi ka ni fate zinga a pang ber dawttu a ni a, a felin a hmel a ţha hle a, mahse, kei ang bawkin ram lamah chuan a chhawr tlak bik miah lo, kan hlothlo pawh buh leh hnim mai bakah, thlai ţiak leh hnim hrilhfiah chawp ngai kha kan la ni ve a, ka ni tan a hahthlak hle awm e. Tin, u Liana hi ka ni te hlawhfa chhawr a ni a, tihian amahin a riak a, a lo thlo char char bawk a, mahse, ka ni te hian kumin chu chul an rih bakah ring thar nen a ni a, a zau tham ve bawk nen, chul phei chu hlo a harin Vawmkûr leh Hloarlei te nen a nih avangin hlothlawh a sawt mawh viau mai.

Kan kual rei ta, tichuan len chu kan deng chho zel a, kan kal thui viau tawh, kei chu engmah thiam nei ve ik lo akara a hmeichhia ber ka ni bawk a, ka laktlak loh viau, u Liana khaini bur lo ken ve chu ka hna a ni ber a, ka chhawrtlak loh viau🤭

Thui fe mai kan chhoh hnu pawh chuan kan man tam hleithei der lo mai a, beidawng duh bik lo chuan kan kal zel bawk a, u Liana deng peih tawh lo, kei leh D-a min tihhnual a hreh si chuan a deng lui sawk sawk tawh ni mai hian ka hria😂rei vak lo lui dung kan zawh chhoh leh chuan ka ni te'n an rama thing ngil leh lian ţha tak tak hlawhfa ruaia an zaina hmun kan thleng a, an sulhnu a hmuhnawm khawp mai, la hmu ngai lo ta na nâ na chuan ka en duh viau a, thing zaina hmuna thing bung awm ruau te chu an hmuhnawm kher mai, ni a tla tawh a, khua a thim a ni ruai tawh.

Thing zaina hmun chhakah chuan thingkung lian em em mai, zâr dû mai hi a awm a, u Liana hnenah a hming te ka'n zawt a, a hre bik lo, Hmawng a ang lek lek a, Hmawng chu a ni lawi si lo, a zar aţang chuan lui lamah a zung ni awm tak te pawh a rawn uai thla zuar a, chu thing zawn lui chu a thim bikin a tui pawh a hit deuh bikin ka hre pek a, hlauh rukna riau ka nei tlat, ka zeldin thil mai mai a ni ang tia mahnia inhnem chawpin kan sangha man pawh chu ka rilru ah a lut hleithei lo, hrang leh huai lam thawnthu ngaina tak ka ni a, hlau chung chunga ngaithla mai zelin ka thawnthu ngaihthlak nasat luatah zeldin thil ka kal thui puiin ka inhre leh hnuhnawh a, mahse, mihring rilru dawih laklawh hi a lo dawih khawp a, chu thingkung chuan huai nei tur tea zeldin zelin ka ngaihtuahna ang chiah pu ka nau Dtea a lo awm ve bawk nen, chu thingkung chu huai nei anga ziah a, thawnthu a phuahchhuah ve ngial chu tumin ka ziah dan tur min hrilh nasa mai a.

Tihian ziah ka tum a, mahse, ka peih leh ta lo a ni😂