PC LALREMRUATA 1

PC LALREMRUATA

Hluhlu-i Khiangte

Kum 1998 a ni a, Mizorama khaw pakhat, West bunghmun ah chuan nu naupai, a naupai dik lo deuh, khawpui pan ngai a awm a, retheihna in a tlakbuak avangin ţawiawmtu pawh a nei lo.

Chu naupai nu hming chu pi Lalsangzuali a ni a, Sumo a a chuan lai chuan mittui far deuh fap chungin a dul chu duat tak hian a chûl leh ţhin, a naupai a fual a, nau a la no deuh laiin a chhiat ţhelh bawk kha a ni a, a thinlung hmangin a fa chu chhan hram turin a rin, Pathian chu a ko mawlh mawlh reng, ngaihtuahna sual lutin a nau pai lai chu thi saa piang mai tur te hian a suangtuah fo a, a ţap leh nge nge ţhin, a fa hi sûn a duh lo, ni e, tu nu in nge duh bik ang le!

An khawsak a harsat avangin an sum neih zawng zawng kengin a kal a, a pasal pawhin a ţawiawm thei lo, dinhmun a harsat chuan ngaihsak loh vang ni miah lovin, harsa ti tak chungin a kal tir a ni, pu Denga pawh hian.

Harsatna lian tham tawk lovin Mizoram khawpui, Aizawl chu pi Lalsangzuali chuan a thleng a, man chawia riahna tur zawng turin a sum kenin a tlin lo, zan khat riah man pawh cheng 300/- ngawt a ni a, ani ang rual tan chu zawng, a tam em a ni.

Zah pawh dawn lovin mi in chu kik kual mai turin a rilru a siam a, mahse, a vawikhatna ah chuan Zo nun zemawi lo langin an lo pawm nghal em em mai, lawm takin a innghat a, a huntawn chhoh mek chu a thiam tawkin, insawi khawngaihthlak tum miah si lovin a sawi ta a, an lainat hlawm viau mai, a thlen in-ah chuan chhungkaw nu ber leh pa ber, an fate pathum nen an awm a, an fa upa ber Tluangpuii chu a naupangchhia tawh lo, a zeihawiin a che reng reng chu a ni thlarh vek a, pi Sangi pawh chu a hnem thiam viau mai, a insilna tur tui te chu lum sak diamin bual in lamah a siam peih sak vek a, hrukpuan leh sahbawn te pe in a ngaihsak ţha viau, a nau te pahnih erawh tleirawl zah hre rual an ni a, phir an ni nghe nghe.

An ti cheih cheih a, hmeichhia vek an ni.

Zanriah te hma takah eiin pi Sangi mut na tur te chu an phah sak a, naupai lai ni bawk nen, zinkawng a zawh chau dawn nen tiin a tlawmngaihna awka te chu haiderin an mut ta hmiah a, pi Sangi lawm lutuk chu a mittui a hnâm sawk nghe nghe.

Tichuan muthmun a rem hnu chuan a chhungte a chin hrilh turin inbiakpawhna nei hek lo le, a taksa a lo chau deuh bawk nen a muhil nghal vat a, tui taka muhil in zing hma takah a tho a, a tho hma ve viau naa a thlen in te erawh a thawh khalh chuang lo, mi tlangkam aţangin Khawpui mi chu an murei tih te a lo hre ve bawk nen mak a ti ru viau a, a tho hnuhnung bera a ţang te chu a zak lek lek, mahse, a mutbu pawh ama seng phal lovin an seng sak a, thingpui senhang ngei chu an chhawp khu nghal vat vat bawk.

Damdawi in lamah pawh Tluangpuii chuan a kal pui thlap a, thingtlang nu mawlmang ve tak, in lama nau chhar thiam ruaia a fa dangte pawh hring mai ţhin a ni a, dammawh hritlan chang pawha an khaw sub centre pan mai ţhin an ni.

Lehlamah an vannei a, khumbet a nat an nei meuh lo, retheihna in a sawi hriam an ni bawk a, an tha pawh a ţha, an chhel na hi fak loh rual a ni lo ve.

Tluangpuii chuan tihtur ngai ang zawng zawng a tih pui vek a, a nau pai hrin a hun mai dawn tawh si a, Damdawi in thawktute chuan a tuk tukleh lama lut tur chuan an lo ti a ni.

An haw leh a, tichuan, intifel in an theihtawpin an han insiam lawk ve a, siam tur phei chu an nei tam lo. Nau puan lah chu lei mai na tur a neih loh vangin an khaw lam aţanga a ken sa tlemte chu a ni mai a. A hahin a rit viau, mahse, nu chhel ngang a ni a, hmel hmuh hrehawm a lantir ngai lo thung. A innghahna te chhungkua chu fel leh ţha hi a ti em em a, a tan chuan lei vantirhkoh an ni hawt e. A ni lah tak a, an chhungkua an bul si a, mamawh changa han pûr ţhin turin nitin a an eichawp dap ngawr ngawr an ni ve hlawm bawk a, mahse, Kristian te chuan innghahna tlak Pathian nung kan nei miau a, hun hrehawmah pawh Lalpa bawk kan hmachhuan a, chu chuan thla a ti muangin lung a ti dam fo. Chutiang bawk chu pi Sangi innghahna pawh a ni, a rin a Pathian lah a ring sual hek lo.

Doctor leh Nurse te kut chu Lalpa'n hmanruaah hmangin fapa duhawm em em mai hi a hring a, a hlim teh e, fuke kim thlap a ni lehnghal a, a chhungkua hrilh a chak, mahse leh, inbiakpawhna turin mobile phone an nei lo a, landline lah an nei hek lo, chutiang karah chuan amahin na tuar chungin nau a chawi a, mahse, a vui lo, a fa chuan hlimna chhiar sen loh a pe miau atin ni.

A thlen in te chu ţha viau mah se an awmpui reng hman bik lo a, Tluangpuii'n a awm pui loh karah chuan mak tak maiin pi Sangi fapa, a hming pawh la sak loh chu a chhan pawh hriat loh hian a ţap chiam mai a, nurse leh doctor te'n han en ve bawk mah se a nâ sawi tur an hre tlat lo mai. Mangang em emin an thlir tawp a, a hnungzâng te chu chul sakin hnute te an han pe leh ngawt ţhin, rei a hne duh si lo, chutia mangang em ema an awm lai chuan pa pakhat, khawpui pa tih hriat tak mai, sàr vuah mai hi a laina hnai nau nei kan turin a rawn lut ve a, chu pa chuan a laina hnai pawh chu pan lovin pi Sangi te lam chu a pan ta daih mai.

A kal a, naute ţap ngak ngak mai, nurse pakhat in mangan hmel zeta a lo awih lai chu laksakin a kerekah a man a, nui vur vurin a linglet zawngin a khai ta mai a, an lo ţe ţhat hlawm a, naute ţap erawh a reh hmiah!

Chu pa chu a nui huah huah a, 'ka fapa pianghlim ang chiah' ti chhuakin naute chu a pe let leh mai bawk, naute chu an han en ţhin, tui takin a lo muhil chiah chiah mai. An bul vela awm te pawh chu an lo ka deuh hau hlawm mai a, ni e, thil mak a tling ve a lawm.

Chu pa chu a hming Pu Lawma a ni a, pi Sangi kiangah chuan ţhu-in a chanchin te a zawt ta, pi Sangi'n a harsatna a sawi chuan pu Lawma chuan a khawngaih ta em em mai a, aniin hman sen loh a nei a, mi tamtak tan pawh a neih chu a luan chhuahtir fo. Pi Sangi hnenah chuan a senso leh Damdawi in a chhuahsan hmaa a buaipui tur thu chu hrilhin a fapa hming chu sak tir turin a ngen ta chawm mai a, pi Sangi pawh chu a inngaihtuah rei khawp, a inhliam nasat deuh avangin Damdawi in-ah chuan zan nga bawr vel tal chu riah a la ngai dawn tih a hria, a pawisa pai ve lah chu a tlem tawh hle tih a hre miau si a, han rawn eih turin a chhungte awm hek lo, rem a tihsak ta a.

Tichuan, pu Lawma chuan naute hmingah 'Malsawmtluanga' tih a sa ta a ni.

Pi Sangi'n mamawh a neih ang ang chu pu Lawma chuan a pe hmiah hmiah mai a, a kan chamchi reng bawk, amah chauh ni lo, a nupui nen te pawh an kan hial a, inawm dam law law tura an tih luih miau avangin pi Sangi pawh Damdawi in-ah a riak rei ta viau mai, tunah chuan pi Sangi pawh a dam ve tawh viau a, motor chuan pui ngam nia a inhriat hnu leh amah leh a fa pawh chu a chhungte'n an ngaihtuah dawn viau nia a hriat avangin haw zai a rel ve ta a ni, pu Lawma te chuan an vai liam mai bakah sumfai an la hum haw tir cheu a, a motor chuan naah pawh mittui hru zauh zauh chungin Pi Sangi chuan a chunga ţhat chhuah tute chu malsawmna a dil sak reng bawk.

Khua a thleng a, a chhungkua te chuan an lo lawm viau, ţhenawm khawveng te pawhin nau an rawn en ve liam liam hlawm a, a hlimin nuam a ti viau.

Mahse, a fapa hminga pu Lawma'n a sak, 'Malsawmtluanga' tih chu a pasal, pu Tluanga chuan a duh ta tlat lo.

Pu Tluanga hi Pachuau lunglian a ni ve a, a fapa hming chu midang daih, khualkhua ami daihin a sak chu duh lovin midang hriat hma chuan, a hmingah 'LALHMANGAIHZUALA' tih a sa leh ta a ni.

Kum a liam a, hun a vei a, Hmangaihzuala(Zuala) chu thing delh loh, lung delh loh ta na nâ na chu a lo seilian ve zel a, a hrisel lutuk lo naa buaina liantham erawh an tawk lo hlauh e, tunah phei chuan kum 3 mi niin mipa naupang duhawm tak mai a ni ve tawh a, a hrisel lutuk loh vang erawh chuan naupang dang anga chum buang a ni hran lo, Aganwadi a kal ve tawh a, nuam a tiin lemziah te chu a hlimpui em em a, a u te ho lehkha pawimawhah te chuan a lo thai râng veleh chiam ţhin. Naupang ber leh chhia leh ţha thliar thiam lo a la ni bawk a, an hau phal mang lo chu a ni e.

Umm, mak tak maiin Sorkar Sikul a Nursery a kal ve chinah phei chuan a kum phu lovin lemziak chu a thiam em em mai a, pawl 4 zirlai tam zawk pawhin an tluk ta meuh lo, a pa phei chuan a uan pui huah huah fo a, a lemziahna a a mamawh chu a la tam lemlo bawk a, a neih kim tir viau, Notebook erawh a heh deuh awm e.