PHUBA LAKNA RUNTHLAK 5(last)

Part 5(last)


Hluhlu-i Khiangte



Zing khua a lo var a, ni dang ang bawkin nî a chhuak a, mitin chu an hna ţul thawkin an phu suau suau a, kei erawh ka nawmloh chhuanlamin ka chawlh tur thu ka sawi lawk vek tawh thung, Pa Thanga pawh biain ka in lama lengah ka sawm a, a rawn kal ngei dawn tih ka chiang, zan lamah an in hnung lam, biru ve zetah chuan ka hriamhrei ka chhawp lawk vek tawh a, a nupui nen an in ngeiah phuarhlawmin, na tuar, awrawl chhuaha au chhuak thei si lovin ka nghaisa dawn a ni.
Ka rinlawk ang chiahin a rawn kal ta reng a, amah chauh ni lo, ka nî pawh a rawn hruai, ka lo dam ţha viau tih an hmuh chuan inti hrethiam zet hian an nui a, ka lo nui ve mai bawk.


Lu hai chiai chiai theihna chu kan in ho a, kan ţawng pawh a nuam sawt ta viau e, an kai ţha hle tih ka hriat chuan a hun ta ka ti rilru a, an in lama kal puiah ka sawm ta a ni.
Ke chuan kan kal a, mask ka hreng reng thung, tu khawkha mah chuan min ngaihsak pawhin ka hre lo, an in kan thlen chuan ka in lama ka mobile ka theihnghilh thu sawiin ka chhuak leh vut a, ka chhuak chiah tih chuan an ţhenawmnu lut tur nen kan inhmu bawk, pa Thanga nen kan inkawp tam avang hian min hre ve viau tawh a, min be nghal var, 'ka rawn thlah mai mai, ka hawsan ang e, ka nuam lo deuh a', ka ti ve mai bawk a, an in hnung lama ka hmanraw dah chu ka la zal zal. An ţhenawmnu chhuah hun chu ka nghak a, a la rei hrep lehnghal, mahse le, a tawp a tawpah a rawn chhuak ve ta hram e, ka lut lai min hmu tu tur awm ang an awm lo tih ka chian hnu-ah hmanhmawh takin ka lut leh a, an lo la ţha dun viau mai.



Ka thil khai luh chu eng nge a nih min lo zawt vat a, ţha taka phawrhin ka hmuh, an mengphar deuh awk naa game khel ila tiin ka vehthlem a, an phur zawng tak chu lo niin, tape hmanga an kâ ka châr ve ve hnu-ah an choka a chair ah chuan ka phuar hlawm ve ve a, an mitmengah chuan phurna leh nuihzatna hlir ka hmu, ka nui suk a, anmahni hmachhawn zawnga dingin ka hreite leh ka chemte chu ka kut lehlam lehlamin ka keng ve ve a, 'khawi zawk hian nge thah induh?' Ka ti vawt raih, ka mitmeng pawh a uangthuang tawh lo viau ang le, mahse, lemchang angin an inngai miau a, an mit hmang chuan hreite chu an melh dun nupa, umm, nupa lungrual tak an nih ang ngei hian a rual bawkin an hnuk ka chhat ang chu le.


Ka tetlai nun, ka pa an thah thu te, ka pa an thah avanga tuna ka nu dinhmun leh keimah ngei pawh fahrah nia hun ka hman dan chu muang ban charh, fiah fai tak hian thinrimna nen ka sawi ta kalh kalh a, an mitmeng ka en ran bawk, mak tihna leh huatna te, nuihza mitmeng ni awm tak leh inthiam chiah lo mitmeng te chenin ka chhiar a, ka thusawi ka tihtawp ruala an mitmeng erawh khâkna hlir a ni ta.
Ka nuih khum sâwng a, ka mitah erawh huatna an hmu-in ka ring, an zurui mitmeng paih bo-in min melh dun kar a, hlauhna pawh ka chhiar thei.


.Hmanhmawhna nei hauh lo, muangchang thei ang berin an taksa hmun tin mai chu ka chem hmang chuan thuk em em si lo hian ka zai thler hawk hawk a, an thlanfim a bawl ţawk ţawk, an ţawng chhuak thei si lo chu an mengphar leh awk awk ţhin.
Kei erawh chu an na tuar hmel ka hmuh chuan ka hlimna a sosang sauh sauh a, ka thisen a lum belh zel bawk, ring si lo, an hriat phak tur chuan an beng bulah 'a nuam em?' Tiin ka zawt zauh zauh reng a, an mitmengah chuan nâ tuar rei tir lova that mai tawh tura min ngenna ka hmu.


Chutih lai tak chuan kawngkhar a rawn inkik a, khatih laia an hmel mawlh kha!
Beiseina, an himna hmu ta angah an inngai a, naupangin an nu leh pa te kianga lungkuai taka ţap chunga an duhzawng an ngen hnu-a an duh hmu ta tih hriat taka an hlim hmel, a der tel miah lo ka hmu.
Kawngkhar lah chu ka nî leh pa Thanga ko pah hian a rawn inkik reng a, kei chuan hmanhmawh a ngai tih ka hai lo, ka duh ang thal chuan la che lo mah ila pawlh buaitu ka neih tak avangin an hrawkah ve ve chuan ka tha tawpin ka zai leh hrawih a, ka chem a hriam a, ka thinrim tha a nih bawk avangin a thler zau hek hawk hle, ka hmanrua te chu la-in an in hnung lam, an nupa pindan tukverh chu thawm dim takin ka hawng a, ka per thla chiah tihah kawngkhar inchhu ri bur bur ka hre zawm nghal zat, hmanhmawh tak siin phen tur zawngin ka insaseng vat a, ka in lama haw mai lo chuan tuiluankawr ţawp takah ka hmanrua te chu ka paih vat.


Ka silai pawh chu ka paih tel a, ka in lama haw vatin engmah thleng lo ni awm tak chuan nachhawkna leh lu na damdawi ka lei haw vat bawk, nakinah min rinhlelh thil thu-a thu min zawh takin tiin ei awm ang takin mum thum ve ve chu ka paih a, ka mu nghal hmak.



Ka rin ang ngeiin thu zawhfiah ve ka ni a, tuar ang taka ka lan a ngai bawk, mahse, ka tan chu thil chu a harsa lo, ka ngaihtuah fel diam tawh, ka haw tur min hmutu an ţhenawmnu a awm cheu bawk a, hriatthiamna min dil chungin min chhuah a, thu thar ka hriat chuan hrilh turin min ti bawk.
Mahse, tunhmaa lo inkawp reng ţhin MLA leh a pa, Pu Tluanga thihna bakah tuna pa Thanga leh ka nî thihna nen ruahman lawk a nih an ring a, a ni reng bawk lah tak a, hmanraw inang a ka thah vangin ka sulhnu pawh a inang phian ang le, pa Thanga nen kan inkawp tam avangin thu erawh min zawt ngun mawlh mawlh khawp mai.
Min rinhlelh vang lam ni lovin mi pawi khawih an lo nei ho tawh em ni? Hmanrua a inang bawk si tiin ka hriatchian an ring ţhin a ni, kei chuan chutianga thu min zawh apiang chuan, 'tunhnai ah pa Thanga nen hian kan inkawm chho ve chauh a ni', tiin ka chhang mai ţhin. Ka in pawh an dap uluk tawh viau naa rinhlelhna tur min hre lo a ni mahna le, awihawmloh khawpin Police ho nen chuan kan inkawmngeih ta viau mai.




Police zinga ka ţhianţha ve ber Rinzuala kâ aţangin Detective thiam tak, hlawhchham nei lo khawpa lu zo leh thluak hmang thiam Boss Amanda an ruai tih te ka hre chho a, Amanda chanchin ka hriat avangin huphurhna chu ka nei deuh, mahse, min man chhuak ta pawh ni se pawi tihna em em ka nei lo, ka phuba lak duhna te chungah ka duh angin ka che tawh tho a lawm le ka ti ve thung, ka nu erawh ka ngaihtuahna aţangin a pengbo ngai lo thung.



Amanda pawh hmaichhanah ngei hnu-in ka titi pui a, a lo chhui chhuak nasa teh e, ka pa thihna, ka nu mi an lohna chhan leh an fapa ka nih thu, pa Thanga chu ka ţhian ni lova ka nî pasal a nih thu te chu a lo hre kilh kelh a, keipawhin phat huai tum mai lovin ka thil tih chhan chu ka hrilh hmiah.
Min hrethiam a, dan anga hma ka la mai lo chu min dem tih ka hre bawk.
Tlak tam duah mi a ni lova, a hmel a ţha-in a mitmeng ringawt pawh zuam sual awl tak tur a ni tih ka hmu ve thiam mai.
Mahse, min man zu tum miah lo a!


'Dan lo angin i che a, mahse, he i thisen ngamna hi mamawh hun ka la nei dawn, tlanbo lo la, ka duh hun-ah Tan-in a thawn thei che ka ni, kal la, i nu chu enkawl rawh', tiin min thlah hmiah!
Zoram pum hriat, mitin titi ZORAM CHHANTU PAWL(ZCP) hi an inlar leh ngei dawn tih ka hre ve thiam mai.
Keipawhin lawmthu ka hrilh hnu-ah ka chhuahsan a, ka nu ka tlawh nghal, ka la chhuak a, ka kiangah ngei ka chentir bawk, a tirah chuan khirhin min hre lo mah se ka tet lai a kan chhungkaw thlalak ka neih chu ka entir a, ka pa chu a lo la hre nangiang mai, a fapa ka nih thu a pawm ve ta, kum hial a vei hnu-ah phei chuan mi pangngai la pha chiah lo mah se mi pangngai ang mai a ni tawh, mite tan chuan ka nu hi, 'mi ang pha lo', mai mah nise, ka tan chuan rohlu a ni.


ZCP member ţangkai tak ka ni chho a, thawh pawh ka thawkrim, sum lamah erawh buaina ka nei ngai lo a, malsawmna ka dawng nge phei chu ka hre lo a, hman sen loh ka nei reng, ka kalbo a ngaih changa ka nu lo enkawltu tur nula fel tak, ZCP member ni ve tho chu ka nei bawk a, thla a muangin ka dam ta e.
Mahse, ka mang lama ka pa in, 'Ka fapa, ka thisen phuba la thei khawpa huaisen ini hi ka lawm a, ka chhuang che, mahse, tualthattu te i thah khan nangpawh anmahni ang bawka nunrawng, tualthattu chu ini ve tho a sin', tia min hrilh aţang kha chuan khang mi tenawm ho kha, that kher lova an hringnun hremhmuna ka lo siam sak ta mai lo kha ka inchhir lek lek ţhin.



(A TAWP TA...INFERNO ka vei lutuk a, ka che ZCP leh ţhin🥰)