NUNNEM NUNRAWNG

NUNNEM NUNRAWNG!

Hluhlu-i Khiangte

(He thawnthu hi ka ţhianţha tak, Zoduhsangi, January ni 26 a khawvel eng lo hmu ta tan ka hlan a, a thawnthu tak hi chu fiction liau liau a ni e.)

🔥Chuan, cover hi Daduhi chu aw, happy birthday my dear🔥

Hmeichhe nunnem tak mai, â phuang bawk si Fakawmi tih hmingpu chu a indawmkun ngawih ngawih a, a vawikhat tihsual chuan a nun a nghawng a ni, bulţan lo ngam khan a nun lo hmang se tiin a ngaihtuah a, amah leh amah a inhaw lutuk chu a samah inkek in a au chhuak ţhawt mai, a puma a pai mek a fa chu a lainat a, thil tam tak a ngaihtuah rualin a ngaihtuah ber chu sawi tur a hre lo, a chhungkua, a pasal, a hmangaihte a ngaihtuah a, tunhma nun a ngaihtuah a, a tun dinhmun a ngaihtuah tel bawk, a hmabak erawh a dâwn thui ngam lo.

Bual in chhungah chuan inkalh hnanin tui a herh haw a, tui chuan amaha thisen kai te chu a tlengfai a, a intenna leh a pawikhawih erawh a tlengfai si lo!

A kianga awm, a hma lawka tual a thahna hmanrua chem hriam zet chu a melh a, amah leh amah pawh khawvel hrehawmna ata chu inlakhrana a nunna thlah mai a nap a, mahse, a puma a pai mek, naute chuan a dal si.

He hmeichhia, lungngaihna in a bawm Fakawmi hi kum sawmhnih leh paruk mi a ni a, chhungkaw harsa kan tih ţhin zing ami a ni.

A laiah hming chu Lalfakawmi a ni a, Fakawm tih emaw, Faki tiin an ko mai ţhin, ni, ani erawh kha chuan 'Awmawm' a ti teh tlat.

Rualawh nachang hre lo a nih lai chuan a hlim ve ţhin a sin, kan Fakawmi hi.

Mahse, a hlimna pâr chu kum tam a lo vei chuan a lo chuai a, a par a mawi reng lo.

Tleirawl te a nih lai chuan pawl sawm a zir kumin damlohna in a tlakbuak a, neih zawng zawng senga a zirna senso an tumna chuan rah duhawm chhuah lovin a kumtluan thawh rah chu 'pawl sawm a fail' tih chu a ni ta mai.

A kehchhe ve takmeuh meuh a, a damlo kher kher chu a thin te a ur ţhin, mahse, Hostel ah pawh awm thei lo, a chang phei chuan nikhua hial hre lo leh kal pawh kal thei lo khan a awm a ni si a, nâ a ti.

Khawsak harsa an ni kan tih tawh kha, zirna in, Sikul chu kai chhunzawm ta lovin a bansan ta a, a suangtuah ve ber College pawh a kal ve thei ta lo, a ţul ţul thawkin nitin kawla ni chhuak chhiarin leipui lamah a feh ve a, inngaihtuah hahna hun nei lova hun a hmang chu a lawm mah, hmeichhia a ni a, in lam hna nen, an vawk vulh chaw tur nen a kaihkawp a ngai ta bawk nen lehlam kawng tak chuan a zia viau mai.

Thingtlang khua, Thingdawl a awm an ni a, Kolasib Dist a ni nghe nghe, chutia zirna in lama a lawi luh loh takah leh, hna hrâm leh hahthlak te a khawih takah chuan, pumraw lama lo lian ve lam a ni bawk nen, an khawsak dinhmun chuan a kaihruai puitling ve leh zel bawk a, kum sawm leh pasarih mi chiah la ni mah se kohhran leh khawtlangah a phak tawkin a inhmang chho a, a rualpui dang te aia nula a ni ta der mai, tichuan, kohhran lama a inhman pui, an bial chhung ţhalai ah pawh hruaitu ni bawk, Kolasib khaw tlangval nen chuan inkawmnel in hmel induhtawnna a lo thleng a, inngaihzawnna hial a lo piang ta.

A hlim a, a lawm ţhin. A bialpa chuan a duh ve hle-in a hria a, chhungkaw khawsak lamah lah a hausa leh Kolasib ah chuan a neinung pawl an ni ve, tlangval ţha lai, hmel lah ţha bawk, chuta kara Kohhran leh khawtlanga inhmang, zukhmuam lah ti bawk si lo a ni leh zel a, phûlo hliah hliahin a inhre ţhin, hna nghet neiin innghah ngamna mipa niin a hre bawk nen, a nih ang anga a pawm thu lah chu a hrilh châmchi reng bawk a, hlu bik nia inngaihna neiin a hringnun par chu a vul thar ve leh ta, inngaihzawnna thu an thlun dun lai chuan Fakawmi hi kum 20 mi niin a bialpa lo ni ta, Zosangzuala chu kum 24 mi a ni tawh thung.

A ngaihzawng mipa chu a hmangaih niin a inhria a, Sangzuala pawh chuan a hmangaih niin a hria, an induhtawnna a nasa viau a, kan Fakawmi'n kum sawmhnih leh pahnih a tlin champha, an inngaihzawnna pawhin kum hnih cham a hmuh ni-ah tak chuan titi dunin, inneih hial an sawi ri ve ta nghe nghe a.

Dan anga kala palai te kalin an inneih ni atan February ni 14, inhmangaih te ni ngei chu an ruat fel ta a, ni e, Fakawmi hi January ni 19 a piang niin, chhungte lam ve ve in remna thu an thlung vat a, a rang thei ang ber an duh bawk nen, he ni hi an ruat ta a ni. Hun ropui chu a lo thleng ta, a ngaihzawng chu a pasal a lo ni ta a, ni e, a par a mawi a ni.

Mahse, rin loh lamah thil a lo inher a.

Kan Fakawmi hi a pasal chhungte lam hian an lo iai ru reng chu niin, a pasal hian a hmangaih ve mauh mai si a, mahni a intungnung thei khawpa mipa a lo ni ve bawk nen, a nei lui a lo ni.

A mawihnaiah chuan an inneih ni-ah a pasal chhungte hi an kal ve a, an tuam mawi ve lek a lo ni.  Chu pawh mi hriat hlawh an nih vang chauhin. Mualpho hlau hlawm hek!

Ţawngkam a ţha a, leili chu khawizu, thinlung quinine an tih ang hi an ni ta tlat. An fapa Sangzuala, Fakawmi pasal lah chu Momma boy a lo ni a, an inngaihzawn laia a nupui tana a inpumpek na chu dawt a chang ta.

A ngaihsak lova, nupa nun an hman chuan a lawm mai zel.

Neuh neuh ngah mi a ni a, hmeichhia a ni tlat, hmeichhe dang tawn ang nawm loh leh han period chang te hian a na leh zual ţhin, a pasal chhungte leh a pasal ngei pawhin an ngaihsak si lova, mahni khua ni lova pasal nei a lo ni bawk nen, a ţap ru ta fo mai.

Chuta karah, Kristian chhungkaw dik tak kara pianga seilian a ni a.

A pasal pa, pu Ramlawma lah chu zu ngawlvei a lo ni ru reng!

Mi anga ti bual bual chu a ni lo naa, inchhung khurah chuan Sakei siar a ni, a mo, Fakawmi lakah a ni leh zual. Pawn lamah erawh chuan pa ţha tawp niin mite tana malsawmna pawh a ni tam narawh, Inspector a ni nghe nghe!

Chhungkaw lû ber, pa ber ni ve si chu a nupui leh a fanau dangte aiin phun anna tur zu hmu tam a!

A famo chu a beisei ru fo a, 'pasala chhungte an ni si, min duh loh sa nak laiin tihchhiat chi a ni si lo, ka pa min beisei dan hi ka sawi chhuah chuan harsatna tam ka tawk dawn si,' tiin Fakawmi chu a inngaihtuah fo ţhin.

A pasal hnena indan mai a rawt ve lahin Sangzuala chu fapa mal a ni a, thiang lo ang hialah a ngai si, ani chu ţhen mai turin a ţhianţha tia a chhal ve ber Remsangi chuan a ti nghe nghe a, kawng dang a hriat sak bik ngang lo, mahse, a pasal chu ţhen tuma a inralrin ve laiin nau a lo keng ta tlat, amah tihhlim phahtu mah nise engemaw chang chuan a rila rah, a fa ngei pawh chu a pian hma aţang hauhin a hnawk ru ta fo a, a fa chu tih tlak emaw, fahrah tir chu a ngai ngam si lo. A nun chu a khirhin a rawng em em ve ţhin a ni.

Pu Ramlawma chuan beisei ţhin viau mah se a lakah a la him rih a, a lawm ţhin. A lawmna runthlak zia chu, a va lainatawm em.

Mahse maw, amah duhtu a lo lang ve a, tunhmaa an khaw lama a lo kawmngeih ve ţhin, Mawizuala a ni..A pasal neih tawh thu te chu hrilhin mawi takin a lo hnar a.

Sangzuala chu a hmangaih miau vangin hlim a tum ve nasa ţhin, mahni leh mahni infuih in he hun rapthlak hi a la paltlang ang a, a hrehawm tawrhna hian rah ţha a chhuah a la beisei ve fan a, mahse, chu chu beiseina chauh a ni, a rilru natna te chu sawi lang hreh si hian amah in a na tlawk tlawk ţhin a, amah lo duha lo ngaihventu laka a natna te chu hrikthlak te a ching ve chho ta. Sangzuala awm lai chuan a chhungte chu vantirhkoh anga mawi an ni a, a awm loh veleh vanram chu hremhmun a chang ta ţhin.

Chutiang na nâ na chu amah lo beiseitu nen an inkarah chuan inngaihven tawnna leh inhlutna a lo pung chho a, Fakawmi tak pawhin hnar reng har a ti ţan ta hial.

Kum a lo vei a, hun tam la liam lo mah se, 'a chûl nel peih peih', an lo tih ang deuhin Fakawmi thinlungah amah lo ngaihtuahtu Mawizuala chuan hlutna aţangin hlut lehzualna a lo ngah chho ta tial tial a, tunah meuh chuan, inngaizawng hmingpu si lo, inhnar tawn reng, inmamawh tawn si an lo ni ta.

Mahse, an fair ve tlat, mipat hmeichhiatna lam kawngah an insumin an inthlakhlelhna an tilang duh lo a, natna runthlak tak tuar reng chungin 'ka dam e' tiin an inhnem tawn ţhin.

I dem em? Ni e, 'a nuamah leh a hrehawmah pawh', tiin hmangaihna hming chângchawiin nupaah an insiam a, mipa dang emaw, hmeichhe dang ngaihmelh an tan thiang a ni ve tawh lo.

Mahse, hmeichhe awmnem te mai, la naupang si hringnun thawnthu hi engtinnge a kal zel ang a, nakinah hei aia nasa zawk humsual te hi daiin mualphona a tawngbua ang tih te hi a va hlauhawm em.

Fakawmi naupai pawh a lo lang zel a, a puar ve ak tawh, rai lian mi a ni lo nge, a naupai chu a thla phu lohvin a te reuh a, mahse, lungkham ngaiah em em an ruat lo, amah lo ngaizawngtu, amah pawhin a duh let ve hial tawh Mawizuala nen chuan inremna an siam a, "inbe tawh lo ang, kawngdik zawk kan zawn hram hram a ngai a ni" tiin.

Mahse, naupai lai ni si chu pu Ramlawma chuan a beisei fo a, hunawl zeuh, midang awm loh lai te hian a hnathawhna lamah chhuanlam siamin a haw ta fo a, a haw hun tak chuan Fakawmi bak in lamah a awm ţhin si lo, a vau reng a, amah lah a nihna nen, dan leh dun a hria a, Fakawmi'n a hek tur thu a a vau ve kha kha na te chu a nuih liam mai zel a, ani Fakawmi lah chu lehkha zir sang lo, hawiharh lutuk bawk si lo, dan lam hre vak lo mi a ni bawk nen, a hnial thla hneh ţhin khawp mai.

A rilru hah leh nâ chuan a nghawng miau a, a naupai tan tak pawh a hlauthawng, misual a ni lova, a harsatna tawrh vanga a fa chu tihhrehawm a duh lo, a inthiam thei ngai dawn si lova.

Tiang reng reng chuan a hringnun a chhiar a, vanduaithlak takin zan khat chu Sangzuala nutei, a nu nau, Aizawl ami chu a boral tlat mai, zan thil mah ni se a pawimawh si a, an insiam chûk chûk a, Fakawmi kal ve erawh an remti lo, nau a pai si a, karkawng a chhe bawk nen a insawh pawi an hlau a ni.

Pu Ramlawma chuan rilru chhe tak pu chungin, 'ni e, nangni zawng han kal mai ula, kei leh Faktei kan lo awm ang e, hna lam kan buai tho bawk nen, min han phat sak ula, hmeichhe naukeng lehnghal chu mahni chauha in nghah tir chi a ni lo ve', a ti thluam mai.

Fakawmi chuan a hreh em em a, a han ţawng ve lah chuan indim a ngaih thu hrilhin an hau nghal titih bawk nen, a ngawi ta chawrh chawrh a, Sangzuala te Aizawl lam pana an kal chhuah veleh rang takin pindan lamah a lut vat a, kawng chu na taka kharin a kalh nghal sawk sawk.

Pindan pawn lama Ramtenawma nui huk ri a hriat phei chuan a thin zawn a dawm chawt ringawt, a thlanfim a tla zawih zawih a, a hlau a ni.

A khur dar sar a, a sahal vek, bual in hi a hranin an nupa pindan ah kawngkhar dang awmin a awm leh a, chutah chuan lutin a ţap ngawih ngawih mai, a ipik leh a sahal bawk nen, a zia deuh tak avangin a intleuh ta ringawt bawk.

Chu zan chu muhil zawm ta miah lovin khua a nghak var a, chu zan chu a la him phawt.

Pindana tawm reng theih ni hek lo le, a tho a, khawsak a rel nghal sawk sawk, a peih fel hnu pawh chuan a pa chu a la tho lo a, a chawchhun pai tur a siamsak fel leh hnu-ah an ţhenawmah a len san daih, a pa hnathawk tur chhuah hnu chuan tukţhuan va bar ve sawk sawkin a let leh, nilengin a tap ta a, ni danga leng lut zen zen si lo chu a chhan an lo zawt vat, Sangzuala nutei a thih thu leh amah leh a pa tih loh chu an kal vek thu te chu an ţhenawm chiah an nih anga an hriat hnu mah nise a sawi leh a, a pa hnathawka a chhuah nilen vanga mahni chauha in zau pui maia tawm chu a hlauh thu a sawi.

Ni dangah pawh amah in a awm fo a, mak chu ti mah se tun ţum chu thihna vang a ni a, a naupai lai nen a thauah a man a nih an ring leh hnuhnawh a, an lo thlamuan vat, an ţhenawm te hi nupa reka khawsa an ni a, an nu zawk Siamtei phei chu Fakawmi aia upa hrat chauh a ni nghe nghe, an inneihna a la rei lova, nau pawh an la keng lo a ni.

Leng lut ziah tur te chuan insawm in chaw chhun tuihnai tak a hlui bawk a, Fakawmi chu a lawm kher mai, a hnuk a ulh lek lek hial.

Zan lam nen len luh reng theih ni hek lo le, zanriah erawh chaw chhum bak a ngai lo naa khawsak rel hun chuan a haw phei ve ta a, a ţi leh dêk tawh, a pa chu a ban a hun tawh, mahse, a rawn tlai danah zu a in kawi a nih a ring, a zeldin a, a hlau, a phi ruai a, sana chek ri te chuan a ti phu leh zawk zel, a hlauh ang ngei ngeiin a pa chu a rawn haw ta, a hre nghal mai, Ramtenawma zu rim chu, a insum hman lo, a uak nghal ţhat a, a pa thin a tih ur a hlauh luatah, 'ka chawhmeh siam rim chu aw', a ti sap.

Pu Ramlawma chu a nui vur vur a, kawngkharpui chu a kalh nghal bawk, engmah sawi lovin an nupa pindan lamah a lut a, a inthlak dawn a ni mahna.

Faki chu a thaw huai mai, mahse, a zâng rei lo.

Pu Ramlawma chu rawn chhuakin thuk lam hawia Faki awm chu thawmdim fe in a panhnai a, a nihna hmanga a lei hnimhlum chu a kut dinglamah a keng rân bawk, kelawngin a kal a, thawm a hriat loh, misual man tum ang maia thawm dimin a mo chu a vehin a veh hnai hriau hriau mai.

A hnung lawka a din hnu chuan a aw a thian khurh a, Fakawmi phu nasa lutuk chu a kat dawrh mai, Ramhnapa erawh a nui sûng a, a awmzawn dawma a mo thaw dep dep chu chetla thutin a hnimhlum chu a hnar ah a hup bet a, rei loah Faki chu a zawi ta hnawk mai le.

Ramtenawma chuan nui vur vur chungin Faki chu a pawm a, a fapa nena an pindan ngeiah chuan luh puia an khuma nghatin a duhtawkin a mo chu a sual ta!

Fakawmi chu lu hai bûrin a harh a, a luak a chhuat ut ut bawk, a tho a, pai chan chan chungin bual in lam a pan nghal, a insum hman lo chuan commode a thlen hma-in luak a thlauh hial, tuiril hlir mai a luak chhuak a, chau em emin a ţhu zawi nguai mai, a luhai nen, a luak chhuak la reh si lo chu a uak leh ţhin, luak chhuah tur erawh a nei tawh lo, a hrawk a thip hlur tawh, a hmai phihin a lû a leih huh a, a zia deuh chuan a hria.

Mahse, a thil hriat hnuhnun ber chu a mitthlaah a rawn lang a, a tho hluai, a nâ reng reng a hre chang tawh lo, amah chu a inen a, kawr chu ha mah se hnuailamah engmah a lo ha lo!

Nichin mai kha chuan a hre miah lo kha a ni a, a na ta ngut ngut, rang takin a pindan chu a chhuahsan a, an nupa khuma a pasal pa, Ramhnapa saruak ngalngata mu hnar bur bur chu a va hmu ta, a thal hual a, Fakawmi chu chhuatah a ţhu hnawk.

A nat dan chu amah ngei pawhin a hre fiah lo, a pasal pa in a beisei ringawt lai khan a na ngei mai, mahse, tunah, a tak ngeia a tihhlawhtlin takah chuan chu ai fe chuan a lo nâ a, a hrawk te chu tawtin a na ngawih ngawih a ni ber.

Tenawm a inti a, a inkhawngaih a, a zak bawk.

A tho lawk a, a kekawr leh a kekawrte chhuata lo tla chu chharin khur zawih zawih chungin a inbel a.

Pindan chu chhuahsanin kehlap in choka lam a pan chhat chhat.

A thleng a, chemte inhung far chu mawi tih hmel zet leh mitmeng de sawr sawr chungin a melh vang vang a, choka lama che ber a nih vangin chemte zinga hriam ber chu a hrechiang khawp.

A la a, a vawnna chu a dum, a tle sar mai a, a hmawr erawh a zum lo chi a ni, a hriam lam chu Ara hâ ang hian a kir a, nui sak chungin an pindan lam chu a pan leh ta.

Ramhnapa chu tui tih hriat tak hian a lo la mu a, an khum kiang vel a enchian leh hnu chuan khum bul maiah zu bur ruak let ngût pawh a hmu e, nghet taka chatthla tura zu a lo in chu a lawm kher mai, an thawmhnaw bawm hawngin a nghawngawrh a la chhuak a, mitenawm chu a kut leh ke la kawp ve ve in nghet takin a phuar ta a, a chem ken chu a lek kang vâ bawk, a nunnemna neih ve zawng zawng laksaka awm ta Fakawmi chuan a mi huat, amah leh amah intena siamtu chu inngaihtuah nawn hauh lovin rem veng vawngin a dawm a, a hrawkah chuan a zai ta ngat ngat mai, eng anga chatthla nghet pawh nise a hrawk zai sak a nih chuan a harh a, a lo zai kak thuk viau tawh, a tal fat fat a, mahse, a kut leh a ke chu phuarbeh a ni tlat.

Thaw hrawp hrawpin a leng awt awt a, a mo, a duh ang thala darkar tam pawh la liam lova a suasam Fakawmi'n a hrawka a zaina aţang chuan thisen lum pup mai hi a chik ţhawt ţhawt a, a hák bawrh bawrh bawk.

Fakawmi chuan a hmai leh a kawr awm bakah, a kut a thisen chik te chu nuam ti zetin a dawh heuh heuh a, a thisen lum zual zelin chu naupai lai, a hming a pu zo mange tia mite fak rawn ni ve ţhin chuan nunrawnna nen a pasal pa, tenawm leh verther taka sualtu chu a nunna a chhah sak ta.

Pu Ramlawma'n a nunna a thlah fel veleh chuan a nui var var a, a mittui a tla zung zung bawk, a tualthahna hmanrua chu dah thlain a hmui a hup a, a khur ngawt ngawt. A thinurna in a tuam lai khan nuam ti takin a awm kha a ni a, thisen chik ţhawt ţhawt te khan a tihlim tlat a, thisen rim te kha tui ti zetin a hip a nih kha, mahse, tunah chuan a thinurna kal kiangin natna in a rawn bawm a, a kut hmang chuan naute mit awmna tur zawn nia a rin a pum chu a hup leh chawih ţhin.

A sulhnu, pu Ramlawma hrawk pawrh tuam mai leh thisenin a bual zuih chu en-in ama sulhnu hnutchhiah mah nise a râp thar leh a, amah leh amah pawh chu a inrâp hial!

Mahse, awm mai mai hman a ni tlat lo, a mi thah tak a pasal pa chu khum ata hnuk thla-in bed sheet te chu a pawt hlip vek a, chokaah kalin tui a chhuang a, a tui chhuan a so veleh chawhtawlh ah a bun a, puanchhia la-in thisen kai te chu a hru fai vek a, a mi thah tak ruang erawh chhuat faiah a mut rih tawp, thisen thâng rim ti reh turin a shampoo hman lai rimtui tak hmang chuan pindan chhuat chu a hru leh vek a, tunah chuan a hmanrua chemte bakah amah, puan leh thuamhnaw a thisen kai leh pu Ramlawma senghawi bak chu tih tur a nei ta lo.

Pu Ramlawma chu an Store room a luggage lian tak, an insingsak laia an dah, la ţha vek si chu la chhuakin rit ti tak chunga rei fe a beih hnu-ah a khung a, tichuan, thawm dim taka tho-in kawngkhar a hawng da da, motor a khalh ve thiam a, Sangzuala nen an inngaihzawn lai khan Sangzuala hian a zirtir ve a ni.

A khalh zen zen lo naa a tum ram a thlen ve mai a ring, an khua in bawlhhlawh an paihna hmun, a hma kum lawka ruang an chharna hmun lamah chuan inkhalh chhuakin a thlen hnu chuan, kham awihah chuan luggage, pu Ramlawma ruang a dahna chu a nam liam a, a hah bawk a, a thaw hlawi hlawi mai, bawlhhlawh paihna aţanga hla vak lo-ah chuan motor chu kawng sirah a hung a, 

an pindana pu Ramlawma zu inna bur ruak chu a dah a, hnawk thei ang berin a siam bawk.

A kuthnu a lan theih lohna atana kutkawr bun chu a hlip a, a sulhnu la chambang awm tur ang chu a thiam leh theih tawpa hru faiin thawmhnaw fai a ken chu a inthawlh a, sarangah a thawmhnaw thisen kai chu khungin a khai nalh nalh bawk, ke in a haw ta hnak hnak a, hlauhna chuan hmun a chang ta lo, a inngaihtuah nasa viau thung, a ngaihtuahna a hman dan chu mak a inti, tiang lam hi a la tawng lo a, tualthat tura rilru a siam chhin vawikhat naah a puitlin nghal mai si, mak a inti, mahse, a ngaihtuah pha lo a ni, serial tamtak hnuchhuina lam a awm a, Mizoramah pawh kan ţawng ngeia letling in hmuh tur kan nei nual, chuta karah, hnamdang chauh ni lo, Mizo zinga ziakmi tamtak te'n ziakin tualthahna leh hnuchhuina thawnthu in an dah fer fur a, mit lama harsatna nei tan tiin youtubers te'n an chhiar fur bawk.

Fakawmi pawh hian thawnthu chhiar leh ngaihthlak te, serial en te hi a tui pui ve em em a, a duh anga hnamdang ţawng a thiam loh avang erawh chuan Mizo ţawnga an lehlin bak a en ngai lo.

Chuta ţang chuan hetianga ruang senghawi nachang te, sulhnu thenfai dan te hi a hriat loh karin a lo zir ve reng hi a lo ni.

In a thlen chuan hmutu an awm leh awm loh a en kual a, ruang a paihna aţanga hla fe kham awih bung vutah a thawmhnaw, thisen kai a khaina sarang chu a paih bawk a nih kha.

In chhungah chuan a lut a, sulhnu a la dah ţha em tiin a endik leh vat vat bawk.

Amah hriat theihna tur awma a hriat loh takah chuan amah chu intifai turin Bual in ah a lut a, Bual in chhungah chuan a inkalh hnan nghal, tui herh haw-in tui chuan a taksa a thisen la chambang, lo khir iai tawh te chu a tlengfai a, a intenna leh a pawikhawih erawh a tlengfai zo si lo!

A kianga awm, a hma lawka tual a thahna hmanrua chem hriam zet chu a melh a, amah leh amah pawh khawvel hrehawmna ata chu inlakhrana a nunna thlah mai tak hi a nap a, mahse, a puma a pai mek, naute chuan a dal si.

"Engatinge that lo khan Police hnen-ah ka report mai loh? Tinge ka harh a huatna ka pai lai te khan ţhenawm hnaiah tlan lut a ka dinhmun ka sawi loh? Min ring zo awmin min hum thei an awm mial mahna, min ringtu hmu lo pawh ni tehreng ila tinge insiama he in anchhedawng hi chhuahsana min hmangaih tute kiang ka pan mai loh le?" Ti te-in amah leh amah te chu a inchhal leh thul.

Ni e, huatna nasa tak a pai a, tihnatin a awm a, chu a huatna pai chu thunun hman lovin midang nunna hial a la ta der chu a ni si, nau pai chung leh nghalin!

A chemte chu uluk taka sil fai a hrukpuan hmanga a hruk ro thlap hnu-ah a hmun-ah a dah leh a, inchhung pum chu room freshner in a kap chhuak vek bawk, a sulhnu chu a endik leh te te a, a mu ta, an pindanah mu ngam lovin ţhutkhawmna pindanah chuan puanhlap silhin a mu kawm ngât a, ceiling chu melhin a khap fak fak.

A tette aţanga chhuiin a tun hun thlengin a ngaihtuah a. Za lo zetin a ţhen sak, a hun hlimawm leh a chetchhiatna lai a ngaihtuah phei chuan nui leh var varin nui reng chung chuan a mittui a tla reng ţhin.

Tunhma kha chuan nuiin hlim ve ţhin mah se a tun hun hrehawm lutuk hian tunhmaa a lo hlim ve na ţhin kha a chawk reh chiang kher mai.

A hui pap pap a, a puma a pai a fa chu ngaihdam a dil leh sap ţhin, hre thei tak maw.

Zingkhua a var a, a mutna ata chu tho chhuakin a mutna te chu a siam fel a, a tuktin dan ang bawka a inphihfai hnu-ah khawsak a rel leh ta, a pasal pa, pu Ramlawma chawchhun pai tur chu siamin a peihfel hnu chuan an Veranda phiat turin a chhuak a, mahse, kawngkhar chu chhung lam aţangin a inkalh miah lo!

Mak ti deuhin a chhuak a, an kawta an garage chu a lo inhawng, a pa hna kal a la hun si lo!

Mak ti deuh chuan a phiat a, a naupaiin a uai rit ve bawk nen a kawng a kham thuai a, inchhung lamah a lut leh ta a, tuk danga a tih ang lo taka a pa in a lo thawh khalh chu mak a ti viau a, a ngaih erawh a ţha lo hran lo a ni mahna a zai rat rat danah.

Mahse, a hna kal hun-ah pawh a pa chu a la rawn hawn tak loh fo avangin a call ta a, a pa te pindan lamah a ri si, a va hawng da da a, mobile chu khum bul dawhkan te-ah a lo nghawr dat dat, mak a ti ta viau a, an ţhenawm chiah Siamtei te in-ah chuan kalin a pa chhuah hun an hriat leh hriat loh a va zawt a, anni chuan zing dar 4 a an thawh tawh thu leh, an tual phiah pawha an Garage chu inhawng tawh a nih thu an lo hrilh si.

A mangang ta viau a, a pa mobile chu la-in a pa thawhpui pu Saia number chu a mobile ah a chhu lut a, a call ta, hna pawimawh an neih leh neih loh a zawt a, an neih loh thu in a lo chhang mai, a pa awmna a hriat loh thu chu a hrilh a, a mobile pawh an pindana a awm thu nen, ngaih tih ţhat loh na atana a la hma avang chuan pu Saia chuan a lo hnem vat a, a morning walk a tawi khawmuang te pawh a ni thei a sin, patling a pumpa ngaihtuah viau duh suh te chu a ti a, ni e, zing hma taka insawizawiin a mu ţha leh ţhin kha a nia, tukţhuan ei dawn hnaiah bak pindan a rawn chhuahsan ngai lo, tichuan, ngaih an han ti ţha leh deuh a.

Mahse, chawchhun ei hun thleng pawha pu Ramlawma thawm riva an hriat tak lohah chuan pu Saia pawh chu a ngaih a ţha lo ta a, a kalna tur awm anga an hriat chu an dap kual kim ta vek mai, chutia an vir buai lai chuan khua pawh a lo thim ta mai a, ngawih bopui chi a ni lo tiin Aizawl lama lusun avanga a nupui fanau te awm pawh chu be pawpin chanchin an han hrilh ta, Sangzuala leh a nu bakah a farnu pawh chu hmanhmawh taka insiam in Kolasib lam an pan ta a, darkar 24 em pawh a la ral loh avang erawh chuan khawtlang erawh an la pun lo, pu Ramlawma thawhpui te bakah ţhenawm hnai zual mi tlawmngai te chuan a ruk thei ang berin an zawng a, pu Saia chuan a motor a Faki phur chungin an tlan chhuak a, bawlhhlawh paihna aţanga hla vak lo-ah a motor an hmu ta, zu um nen, condom nen a lo hnawk nuai mai a, pu Ramlawma motor chabi pawh a lo invuah!

Zawngtu dang te chu a motor an hmuh thu hrilhin chu hmun-ah chuan an kal khawm a, a bulhnai ber Bawlhhlawh paihna hmun chu an dap ta chat, sihdet te nen an zawng a, bawlhhlawh chitin reng paih a nih vang chuan an zawng rei hrep, an beidawng lek lek ta tih ah chuan thlang lam aţangin a ruang awmna luggage ngei chu Siamtei pasal chuan a rawn hmu ta!

An bawlhhlawh paihna hmun chu a awih deuh avangin chhoh lam chu an buai viau, pu Ramlawma lah pa lian sâr vuah a ni a, a rit mai si a, kawng zâl nuam anga zawn theih a ni si lo, rem lo tak leh hah tak chung chuan kawngpui an inthlen thei hram a, a ruang chu an han en a, an chek tlat tlat, Ara hâ ang maia zai pawr hrup a ni bawk nen mipa ho pawh an mur ve uai uai mai, hmeichhe awm ve a mo Faki leh Siamtei phei chu an ţap pur a, an hlauin an râp tih hriat takin an khur nasa viau bawk.

Ruang chu in lamah an hawn a, motor erawh enfel leh atan tiin an locked a, an la hnutchhiah rih e.

Sangzuala te nufa thum an rawn thleng a, an ţap hawm hawm, Sangzuala chu a bing mum mum a, a nupui hlauthawng taka lo ţap pûr mai chu kuah a duh, a nu a thlamuan a ngai bawk, a farnu lahin amah uaiin ţahhla a chham rawih rawih bawk nen, amah chuan a pa a sun avangin a ngawng chhû bawk nen awmngaihna ber a hre lo.

Chutiang chuan ruang chu an kil a, mahse, thah ngei tih a lan avangin postmortem turin an phur ta, an chhungkaw pa ber chansawm a ni tur chu ui teh mah se amah thattu zawnhmuh na kawnga puitu tur a nih an hai bik si lo a.

Ui tak chungin an kal tir ta a nih kha.

A motor a zu bur leh condom an hmuh thu an hriat phei chuan pu Ramlawma nupui pi Dawngi chu a na em em a, a pasal in zu a in ţhin tih chu a hai lo, amah ngei pawhin a pasal zu dahţhat a lo in ruk a, a hriat a hlauh avanga tui a lo pawlh zauh ţhin te chu a hre chiang lutuk, nula dang, hmeichhe dang lakah erawh a them pawhin a la ringhlel ngai lova, rinhlelh tur pawhin a awm ngai lo kha a nia. Postmortem result a a thih hma-in sex a hmang tih a hriat phei chuan nikhua a hre lo hial. Ni e, a na miau a lawm.

A hmeichhe hmuh ţhin ang ang, an ţhenawm te, a hna lam aţanga a hmuh tur ang chi te pawh an kawm kim nual tawh a, an hmu thei lo, a thawhpui Police lam phei chu an pu thih na a hma an la chak thei lo leh thil sual titu an man thei lo chu an zakin an indem em em a, hrawn nuam, pa zaidam, inla lo tak mai, nui huah huah ţhin an chân chu an ngui rawih mai.

Chutiang chuan tualthattu man thei si lovin hma an la kal reng a, mahse, kawng an bo tak meuh meuh a ni.

Kum thum hial a lo vei ta, pu Ramlawma thih hnu-in, Fakmawii pawhin fanu duhawm tak a nei a, a hmingah Zoduhsangi tih an sa nghe nghe, 'Daduh' tiin an ko ţhin, an pa an sunna pawh kan Daduhi vang chuan zawi zawiin a reh ve a, an nghilh ta tihna erawh a ni lo.

Mi nunnem Lalfakawmi pawh, hmeichhe nunrawng tak a nih hnu-ah, a nihna dik tak hneichhe nunnem leh zawiawi tak a ni leh ta.

A thinlungah erawh tuma hriat pui loh ser leh mahni intenna a la awm reng e.

'A TAWP TA'