KA PA KHA last

KA PA KHA


Ţhen lina(last)


Hluhlu-i Khiangte



Chutiang chuan hringnun chu ka zawh chho ve leh a, ka hmaiah nui hmel ka bel chawp a ngai ta lo.
Thinlung zawng zawnga ka nuih chang a tam a, Mangaihi ka nghilh ta tihna erawh a ni lo.
Harsatna leh buaina kan tawk ngai loa, Annie chuan sawisel ka ngaih naah min fak der mai lovin min zilh ţhin, fakna dawng tlaka min hriat pawhin fakna a chhak chhuak hreh chuang lo.



Nula leh tlangval, naupang tak kan ni ta lo bawk a, inneih te hial kan sawi chho ve ta bawk, Mangaihi kan hrilh hmasa leh ber a, a thlanah, tichuan, Mangaihi'n a kalsan tak a chhungte kan hrilh leh bawk, ţap chungin lawmpuina thu min hlan a, Mangaihi nu leh pa chuan, 'Annie i nei a nih phawt chuan, kan fapa, kan makpa ini tho tihna a ni, kan hrin loh fa inni e', min ti hial a, kan thinlung pawh a hlim hle, tichuan, chhungkhat chu la nei mah ila, ka nun ngap laia min tuithlar avangin ka bel duh bik lova, palai kal tur pawh Mangaihi pa leh a ţhian sabeng an ni.



Rem lohna awm lovin inneih phalna min pe a, fanu mal a ni a, kei lah, ngaihsak ngai dang vak nei lo ka ni bawk a, sum lamah harsatna kan tawk lo, kan dinhmun chelhin a zir em bawk a, kan inneihna pawh a ropui e, Pathian leh a kohhran hriatpui naa kan insuih hnu-ah dan pangngaiin lawiţhat zan kan hmang a, chutah chuan a ni, ka thinlung chu a nat leh tak ni, ka nupui, Annie Lalenkawli chu hmeichhe thianghlim a ni tlat lo.


Ka tisa chakna chu a reh hmiah a, ka ti lui thei thlawt lo.
Ka thawhsan vut a, a ngaihna hre lo zetin ka nupui chu a hawi, thil awmzia min zawt vat bawk.
A thianghlim tawh loh thu chu ka sawi tlang ta rawng a, kei chuan kohhrana inhmang, bial zaipawl member ni lai mek bawk kha chu thianghlim turah ka lo ngai!
Mak takin hmangaihnaa ka tluk luh lai te, ruihhlo a ka tlan a, ka nun ngap lai ber pawh khan mipat hmeichhiat naah ka fihlim thlap.
Mahse, mipa ka ni a, hmeichhe thianghlim leh thianghlim lo chu ka hre thei a ni.



Rawn tho chhuakin a thusawi ngaithla turin min ngen a. Keipawhin ka ngaithla ve mai.
'Ni e, kei hi nula thianghlim tawh lo ka ni, hun harsa i pal a, chumi chuan nghawng che-in nang chu ruihhlo-ah i tlan a, keipawhin hun harsa ka tawng ve tawh a, mahse, kei chu, ruihhlo-ah ni lo, mipat hmeichhiatna lamah ka tlan ta a ni.' A ti a.
Zawhchian lehzual ka duh viau naa, keipawhin ka huntawn hi mi zawng zawng hriat ka duh lo, sawi chhuah pawh a hrehawm ka ti ţhin, Annie pawh hian nakinah min la hrilh mai ang ka ti a, ngaihdam te dilin ka insangmar a, nupa nun ka hman pui leh ta a ni. A tawp thlengin.


Kan innei tluang zel a, Annie chanchin, midang hriat loh a thuruk te chu ka hre chho zel a, kan inngaihzawn lai khan helam hi ngaihtuah ngaiah ka lo ruat lo, thianghlim ve ve turah ka lo ngai tawp kha a ni a, mahse, rin loh lamah Annie hringnun chu a lo inherkual nasa mai chu niin.


Hetiang hi a ni Annie Lalenkawli hringnun chu.


Annie Lalenkawli hi Roman Catholic in an enkawl hnuchham in a an dah a ni a, a nu leh pa te hriat a ni lo, tun thlengin, mahse, a sen lai tak takin tuna a nu leh pa te an fa tlum ber ni turin an la a, fapa pahnih an nei, Annie chuan fahrah nihna a nei tih inhre miah lovin hringnun a pal chho a, a hlim ţhin, kha thil a hriat hma kha chuan.
A la rei lo, a sawi hmangin Mangaihi nen kan inkawp lai kha a ni awm e, a nu leh pa te pindan a tihfel na lamah amah, fa atana an lakna lehkha chu a hmu tel hlauh mai a, chu chuan a chhungril nasa takin a sawp a ni.



A mang a ang a, fahrah nih a duh lo, a hlau a, nakin lawka an thlauhthlak te a hlau, Pathian ringtu inti in thil dangah chhel viau mah se, engkim hrethiam tawh a ni a, kha chen, chawi seilian tute, hmangaih tute a nu leh pa dik an ni lo tih a hriatna khan a rilru lam a nghawng nasa mah mah a ni.
Chu chuan pawisak neih lohna a siam chho hial a, kohhrana a inhman na chu a ban san chuang lo, mahse, zan khat chu engtin tin emaw zu a nei hlauh a, a in ta a ni.
Chu zu hmang chuan Setana'n thlemin, Setana chuan tenawm, fahrah tlaktlai lo nia inhriatna te a neih chho tir zel a, pawisak neih lohna rilru neiin, sex hman duhna hial zu han tuh saka mawle!



Zanah a rukin a chhuak a, khawlaia mipa damdawi rui ni awm tak chu va pawhin awlsam te-in an mudun ta mai a ni awm e, tichuan, chu a thil tih chu a harhfim hnu-ah a inchhir nangiang mai, mahse, ruihhlo in bual à lo mah se, sex hial a hman takah chuan, tenawmah a inngai chho a, a remchang a piang a mutpui ta mai a ni!
A sawihmangin mipa hran hlak, panga ngawt a mutpui tawh, mahse, vawikhat ţheuh chauh a ni awm e.
Kan rilru kal sual nasat ţhin zia hi aw.....


Mahse, ringtu, Pathian hriat nge nge chu tlu rei lovin, a inhmuchhuak a, hrehawmna an tawrh tir lova, an fa tak tak, a nuţa te aia an enhranna sawi tur a them pawh a hre si lo, mahni leh mahni a lo inti tenawm chawp a ni tihte inman chhuakin a inchhir ta em em a, a sual ngaihdamna atan Lalpa lakah thupha te chawiin a hma aia nasa lehzualin Pathian a belbul ta a ni.


Keipawhin ka ngaidam a, kan intawn hma thil a ni a, ka va thunun theih a ni tawh lo, thinlung taka ngaidamin nupa hlim tak kan ni a, kan hlimna tizual turin Annie in nau a lo pai ta bawk nen, ka hlim zual ngei mai.
Theihtawpin ka duat a, taxi khalh reng chu tiin tiral si lovin hlawhfa ka ruai ta bawk, ka pa sum neih sa, min hnutchhiah hmang chuan Hotel lian tak ka siam bawk a, mi hotel sak sa ka lei a ni mah, hlawhfa tamtak ka chhawr bawk, ka pa sumdawn pui ţhin te be pawpin kan thawk ho bawk a, sum lamah chuan lungkham tur a awm lo ve, mahse, kei, phatsanna hawtu inti hian ka nupui ka phatsan!



Ka fapa Lalrinawma pawhin kum khat a tling ve tawh a, chutiang bawkin ka fanu Hmingthantluangi nen, ni e, phir duhawm tak kan nei a, nula awmpui mamawh inti ngai lo khan nula pahnih ngawt kan la ta bawk, Annie a phar buai ţhin si a, ka lainat a ni.



Ni e, nizanah khan kan thawhpui te nen inhmuhkhawmna hun kan nei a, ni dangah chuan wine takngial pawh ka lem duh ngai lo, juice ka in mai ţhin, ka thawhpuite chuan min nuih ru deuh ţhin naa ka uksak lem lo.
Ka rinah ka chiang ka ti ţhin.
Mahse, engthil tehhrep nge thleng hi ka hre thiam lo, nizanah khan zan dang ang bawkin meeting zo kan han khawmuang khan Apple juice ka in leh a, ka in turah damdawi engemaw tak pawlh sak ka ni a ni ngei ang, hurna sualin min bawh tlat, ka insum theih loh ka hlauh avangin ka la fim deuh lai chuan ka Hotel a pindan ruak pakhatah ka lut ta daih, ka ţhiante pawh a ţhen riakin haw pawh an awm, chung ho pawh chu thlah mawi hman lovin ka luhsan a, ka luhai ka chhuanlam.



Mahse, ka luh hnu rei vak lo-ah chuan nasa takin ka tisa châkna a chhuak a, insum zo lovin mahni in ka inhrithla ngawt bawk, khumah ka mu phar duai a, ka hai chiai a, nuam tak a ni.
Nula a rawn lut zan zan a, thawmhnaw thehlep tak inbel chungin, khuma ka mu chu min rawn zutin min rawn chhai kual ta, ka tisa châkna chu kaihthawh hranpa pawh a ngai tawh lo, ka lo inpeih nghal at.
'Nangni hian min hrai a ni', tiin châkna avanga aw khur dur dur chungin ka ţawng chhuak a, min nuih hak ringawt.


Kan che buan buan a ni ber mai, chet ka lak pah te chuan ka nupui fanau te ka mitthla a, mahse, ka insum zo ngang lo!
Zing khua a lo var meuh chuan lu rit bûrin ka tho a, ka kiangah zan lama ka mutpui nula chu a lo la muhil barh barh bawk.
Thinrim lutukin ka phih tho nawk a, chhuak turin ka ti nghal, sum a phut thu min hrilh a, ka la hmuh ngai pawh a ni lo, a sawihmangin ani chu rawih a ni a, call girl a ni!



Pawisa hlawha mi mutpui ţhin a ni a, a customer hlun takin ka tan a bia tih zawng a sawi, a dang chu a sawi duh lo, a pawisa duh zat te zawtin a sawi ang zah chu ka pe a, a inhak fel hnu-ah a chhuak nghal.
Lungngai takin ka indawmkun a, ka nupui leh ka fate bakah ka nu leh ka pa ka hrechhuak bawk.
Ka huat em em ţhin phatsanna chu keimah ngeiin ka tawng a, tunah chuan phatsantu ka lo ni ta, he dinhmun a ka din mek lai hian ka huat em em ţhin ka pa kha ka ngai a ni.
Ani chuan kawng min kawhhmuh tur a hriain ka ring a, engtinnge huaisen takin ka pa ang khan ka phatsan thu ka nupui ka hrilh ngam ang?
Ka fate'n min haw ve tura ka ngaihtuah ringawt pawhin ka nâ a, ka nupui na tuar hmel tur ka mitthla ngam lo chungin ka mitthlaah a lang si, ka va laktlak loh tehlul em, a chhan chu engpawh nise phatsantu ka ni tho si!
Aw....Ka pa, ka va ngai che em, ka pa mawlh mai kha.