KA PA KHA bonus chapter

KA PA KHA

Ţhen ngana(real last)

Hluhlu-i Khiangte

Mangang ru em emin ka awm a, ka nupui lah chuan min rawn call sek lehnghal, ka pick-up ngam thlawt lo, Hotel lam a rawn call ka hlauh vangin ka awm loh thu a chhang turin ka ti nghal vat bawk a, ka inbual sur sur, mittui nen a ni ka inbual ni. Mipa bianga mittui a luan chin hi chuan a na thawkhat a ni ang nge? Ka zuau vang zawk ka hre lo e.

Ka taksa bal chu tuiin tleng fai thei mah se, ka tenawmna a silfai ve si lo, mahse, kei chuan ka pa ang khan ka nupui fanau te hi chan ka tum lo, ka thup bawk hek lo ang, ka nupui chu a rilru a na ngei ang, mahse, min kalsan lo turin ka chelh dawn a ni.

Ka inhak fel hnu-ah kan chenna in lama ka haw hma-in ka nu leh pa te thlan ka tlawh leh phawt a, ka mangan rukna ka va inhrithla a ni ber e, tihdan tur ka zawt ngial naa, chhanna erawh ka hmu lo.

Phur lo fahranin ka haw a, ka nupui leh ka fate chuan min lo lawm vat, ka biak loh vanga a mangan thu a sawi mawlh mawlh lai chuan ka hmelah dik lo a hmuh vang a ni ngei ang, kan fate chu kan nula te hnen-ah dahin kan nupa pindan lamah min luh pui a, eng buaina nge ka tawh tih min zawt nghal vat.

Kei chuan sawi chhuah harsa ti hle mah ila ka sawi chhuak ta a, ka zan hun hman dan zawng zawng chu.

Ka nupui chu ka melh ngam hlawl lo, a inhnit faih faih ri ka hriat pawh chuan hnem turin ka kut chu ka phar chhuak ngam lo a, ka ţhu kun ngur ringawt.

Ka nupui chuan min kalsan duhna rilru a put ka ring, ka rin ang ngeiin a che thawm ka hria a, chutah zet zawng, mangang em emin ka hawi ruai a, a chet velna kiangah chuan ka lo awm ve reng, min kalsan lo turin ka ngen a, ka mang hi a va ang ngai ve.

Ani erawh chuan chhanna pawh min pe lovin a insiam zawm mawlh mawlh a, mahse, a thawmhnaw erawh a khung lo, amah chu chhuak tur ni awm takin a insiam lawi si.

Ka mang a ang a, ka tihngaihna hre tawh lo chu ka ţhingţhi rawp.

Chutah chuan min rawn ngaihvenin min rawn tawk a, min kaitho riai riai, amah chu enin ţawngkam chhak chhuak tawh lovin ka mit hmangin min kalsan lo turin ka ngen ngawih ngawih a, a mittui tuai hulin min nuih sen sen.

'Tu in nge ka chhuahsan dawn che tih sawi a? Insiam rawh, i chunga chutiang thil titu chu kan chhuichhuah ngei a ngai a lawm', a ti a, ka hamhaih atalangin ka ka deuh hau ringawt.

'Rilru fim tak pu in i thu ngeiin zu in la, chuvanga min phatsan chu ni la ka chhuahsan ngei ang che, mahse, juice i in a, i juice in-ah khan damdawi phultu an awm a ni, chu thil titu chu kan hriat chhuah a ngai a ni.' A ti leh ta a.

'Mahse, engtin?' Ka ti hawlh ringawt.

'Hnuchhui thiam kan ni lova, a thiam kan ruai dawn mawle', a tih chuan a sawi awmzia ka hrethiam nghal.

Ka insiam ve mawlh mawlh a, ka inpeih chuan Annie pawh a lo inpeih diam tawh.

Kan nula te hnen-ah chuan chhuahna tur pawimawh tak kan neih vangin kan fate lo enkawl ţha turin a chah a, kan chhuak ta.

Tunge kan pan dawn ka hre lova, min pui theitu tur a ni tih erawh ka hria, Annie kalna lam zelah chuan ka zui mawl ve tawp a ni ber.

Kan kal tumna kan thleng tih hriat takin a ding chat a, kan luh hma-in, 'Boss Amanda ruai ila ka duh a, mahse, ani chu nau a nei hlim a, bakah, tunlai kan ram buaina nen hian amah beitu an tam si, Damdawi in-ah a awm mek nghe nghe-in ka hria, Detective Genevieve kan pun mai loh chuan,' tiin a ţawng chhuak a.

Ni e, tunlai kan ramah Zoram hmangaih tute din pawl lian tak, mipui titi lailum luahtu ZCP a awm a, chumi chhui hna chu Amanda hian a thawk, mahse, dikna ngaina mi a ni a, a hranpa in va hre tehchiam lo mah ila dikna duh mi a nih erawh Zoram hriat a ni, a fapa piang hlim hlawt te kha ruk sak niin a rutu erawh a fapa an hmuh let hnu thlengin tlangzarh a ni lo a(INFERNO), ka sumdawnna leh ka nupui fanau te lakah ka buai ve bawk nen, kei ngei pawh hian zawm ka duh ve khawp mai. Mahse, ka nupui hian min la khap a, dikna a duh loh vang ni bik lovin, kan fate chu fahrah an nih a hlauh vang a ni.

Kawngkhar chu ka kik dat dat a, aw zangkhai vah hian lut turin min lo sawm a, kan lut nghal vat, hmeichhe naupangchhia tawh vak lo, invawng tak a ni tih erawh a hriat theih thung, sam ţawn sang vah mai leh mipa, ka rualpui tur ang velah ka ngai, an lo awm a, min lo ngaihsak vat bawk. Ka sawi ngai lovin ka nupui chuan kan harsatna te chu a sawi mawlh mawlh a, hmeichhia, Genevieve tia ka nupuiin a koh chuan keimah min en kar thung.

Ka thawhpui te zingah han lerh ve zuai tura min sawm ching emaw, min nel deuh ang chi an awm em tih min zawt a, ka ngaihtuah ngial pawhin chutianga min fiam ţhin an awm lo, ka lerh ve duh lo te kha chu min han chhaih a, min nuih chang nei mah se a hranpa vaka chutianga min nel an awm lo a, ka nula mutpui hming emaw, a address ka hriat leh hriat loh min zawt a, ka lo hre chuang hlek lo.

A hmel tal ka la hre thei em tih zawhna erawh, 'ka kumkhaw inchhirna tur ka ti a, chuthil ka tih pui chu ka la hre khawp mai', tiin ka chhang thung.

Lemziakthiam ruaiin ka hmeichhe mutpui hmel puthmang chu a ziak a, a ziah zawha min entir meuh chuan a tak tak ang mai a ni, kha nu ngei kha a ni.

Amah ngei a ni tih ka sawi chuan Genevieve-in 'Zothan' tia a koh mipa leh amah Genevieve-i chu an ka deuh hau a, mahse, an insum leh vat, 'he nu hi kan hria alawm', an ti ta mai a, Annie nen kan inmelh reng ringawt.

Zothana chuan, 'ani hi Rinzuali a ni a, ka makpa, Zorema bialnu hlui a ni, hetiang hian call girl hial a lo ni ta a ni maw? A address tak chu Zorema aţangin a hriat theih ang.' A ti ta a, tichuan, phone call hmanga Zorema a tih chu bia-in Rinzuali address chu a zawt a, kan va kal ta a, an in chu lian leh ropui tak a ni a, sum mamawhna vanga khatiang mi kha nih thlang ni ta se a thlan chhan tur ka hre lo, kan luh lah chuan lawm takin a nu ni awm tak chuan min lo dawngsawng si, Genevieve-i chu ţawng chhuakin, 'Rinzuali ţhiante kan nia, a remchang em a, kan rawn sawm ve mawle, chaw kan eikhawk dawn a', a ti a, kan lo ngawi ran reng ringawt.

Rinzuali nu chuan a fanu chu ko-in amah, Rinzuali a pindan aţanga a rawn chhuaha, min han hmu chu a mengphawk viau a, ka nupui in ka kut a rawn uum ran bawk, nghet takin, Rinzuali chuan thil awmzia a hria tih rhiat takin 'ka'n insiam lawk ang e', tiin a lut leh vat a ,kan lo nghak mawl tawp.

Inpeih diama rawn chhuakin, 'kal ila', a rawn ti a, a hmel chu a ţha, mahse, eng ang nun nge maw a neih le ka lo ti rilru naa engmah ka sawi lo, Genevieve-i te office ah kalin thu an zawt mawlh mawlh a, dawp ngai lem lovin awlsam takin amah ruaitu chu a sawi mai bawk, Mr. Kumaar Singh a ti!

Ani chu ka pa thawhpui ţhin, tuna ka thawhpui ni ta a ni a, meeting zawh lamah zu leh a kaihhnawih chu in ve mah se chutianga nula lama a talhiar chu ka hre lo, tin, amah chu talhiar duh pawh nise engahnge kei chu min hraiin hrtiang hian plan a siam kher le tih zawhna ka nei.

A hnu-a Genevieve-i te hmalakna aţanga amah ngei an biakpawh takah chuan heti hian a sawi a, 'Mr. Chhana(ka pa) kha kan sumdawnna kawngah ka pha thei ngai lova, ka itsik ţhin, diktak chuan, ani kha ka aia sanga awmchhun a ni, kan line bikah, ka thik a, rem ka ruat a, khami zan, Guwahati ah pawh khan Hotel an chan loh thlengin ka plan vek a ni, Hotel an hmu reng, mahse, a nghaktu kha ka tham a, Hotel man tur ang aia a leta tam ka pe, an innghahna hotel thlengin ka zui ru a, ka ruahman angin engkim a kal dik vek, hunawl remchang bih a, a thil in tura damdawi phul tur pe-in Hotel hnathawk ka chhawr bawk. Mr. Rema(keimah) in tura ka phul ang tho kha a ni a, a mizo pui hmeichhia nen an lo in dun hlauh a, khatiang kha a lo ni, nghawng a nei dawn tih ka hriat chhan pawh a nupui leh a fapa a ngaihsak zia leh a hmangaih zia ka hriat vang a ni. Tichuan, ka rin a dik a, ka chefuh a, ani chu tlahniamin kei chu kan sumdawn ho naah a sang ber ka ni ta a, ka hlim viau, mahse, tunah, kum tam ral hnu-ah a fapa a rawn inlar a, bul a rawn ţan thar leh a, kha chen ka lo beih a ka lo sual tawh Hotel pakhat pawh ka la din theih loh laia ka thanga ka awh tawh fapa in min hmakhalh leh chu ka ngaithiam lova, a pa sumdawn pui, a ţhianţha anga inchhal in ka thawhpui ta a, ani phei hi chu a kamchhuak hrim hrimah a pa ang vek a ni, a pa pawh a la khum theih mai ka ring, a pa chak lohna bawk a nei ve tih ka hria a, hriat harsa a ni lo, a nupui leh a fate a hmangaih zia chu an ţhenawmte khan an sawi thei mai. Chuvangin, nakinah, a len tak tak hmaa tihchhiat ka rilruk a, ruahmanna ka siam leh ta a ni.' Tiin.

Ka nupui chuan min ngaidam a, 'i tihsual a ni lo, phiarruk i tawk a ni, chutiang bawkin ka pa(keima pa a sawina) pawhin,' tiin lainatna leh hmangaihna nen min kuah vawng vawng, hah a va han ti dam tehlul em.

Ka pa chan chu ka ngaihtuah a, ama sualah a puh vek awm si a, a inchhir in a na em em a, kei leh a nupui min thlauhthla hial a, a fapa min hmuhlet veleh Khawvel a chhuahsan leh ta mai si.

Phiarruk a nih a hre lo nge, a diary ah lah khan a ziak tel si lo, ka lainat ngawih ngawih a ni.

Ka pa, dam rawh aw, keipawh ka dam e, ka nu, nangpawhin engkim i hre tawh tiraw, nu ropui tak i ni a, ka pa kha lo kuangkuah la, a tihsual ni lovin midang tihsual zar a zo tih hrilhin lo duat rawh aw.

🔥A TAWP TA🔥