KA PA KHA 3

KA PA KHA


Ţhen thumna


Hluhlu-i Khiangte


(Ka lehkhabu tur man tuakin zingkarah hna ka kal a, canteen ah a nia, thingpui leh eitur semin ka tei kual reng a, ka haw meuh chuan dar 6:30pm a lo ni leh tawh ţhin si a, sei tak min lo beisei lo hram hram u aw🥰)



Synod Hospital, Durtlang ka han thlen ve meuh chuan, chhungkaw hlimawm tak din pui hial tlak khawpa ţha hmeichhia, rinhlelhna mitmeng pawha ka melh ngai loh, ka nun hlimna chu kaihthawh zawh lohin a lo chatthla fel chiah!
Beiseina mei eng min pe tu, ka favang ni eng, ka varparh Aisi, ka engmawi ber mai chu nunna nei lovin a lo mu bam a, a taksa pum chu puanvara khuhin an rawn nawr chhuak a, rawl chhuah meuhin an ţap rawih rawih, kei erawh chintawk nei lovin ka thinlung hi nghaisak a ni a, a nat dan hi ka sawifiah thiam ngang lo, biangah mittui luang ve bawk mah se, ka natna lanchhuah tir dan ka va vài tehlul em!



An in lamah Ambulance hmangin kan phur haw a, an in chu tlawmngai ho-in an singsa a, aw... Kei zawng, ka va na em.


Tawrh dan ka thiam lova, thiam lah ka duh hek lo, kan thlalak dun, kan nuih dun lai te, naupangchhia taka a insiamchhe lai te chu nui chungin ka thlir a, aw ka nui ngei, mahse, biangah mittui a luang tho si!


Zing lama kal a nih vangin lumen a rem lova, chawhnu lam dar 1:00pm ah ka hmangaihi chu thlankhura thlak a ni ta. Hmangaihtu tan hian a va na ngai em, hlim takin duhthu kan sam dun a, a la rei lo, mahse, a kianga ka awm changa ka hahdam zia te chu ka hria a, ka va ngai dawn em.
Hun a liam a, a ral zel a...
Ni a chhuak a, a tla leh a, mitin deuhthaw chu nunphung pangngaiin an awm mek a, thli te thaw-in ruahtui a tla a, mahse maw...
Ka tan chuan ni chhuak chuan enna a thlen ve ta lova, chhemdam thlifim te lah chu an hnawksak zo a, malsawm ruahtui takngial pawhin ka lungngaih mittui zu han kaichhuak a mawle!



Mihring hi kan hlim chuan khawvel hi a mawi a, kan lungngaih chuan engkim mai hian min vel leh si.
Tuktin ka hmangaihi kiangah, a thlana kal ka ţhulh lova, midang awm laia ka natna ka thup tr kha ka hmangaihi kiangah ka va bun ţhin, 'good morning' tia tuktin wish tur a awm lova, mahse, a thlan tal tiin ka pan ziah, ka thinlungin Pathian ka au a, ka natna min chhawk zangkhai a, a kianga min hruai ve mai turin ka dil hial ţhin.



Ka hmangaihte, ka nu, ka pa leh ka bialnu ruang dai ka thlahliam a, mittui nen ka thlir liam a, tunge ka ruang hi rawn tuam ve ta ang? Tih zawhna te ka inzawt kual a, ka hahin ka pik ţhin, dam ka duh a, ka taksa chu dam mah se ka thinlung nâ a reh thei si lo.
Midang hmaah nui hmel ka pu lui a, mahse, ka chhungril erawh a ţap reng, ban zai a rel thei lo, thinlung na damdawi hi engvanginnge, heng mithiam tamtak zingah hian siam chhuaktu pakhat tal pawh an awm loh le? Tihtheih loha kan ngaih pawh an siam chhuak a ni lo'm ni?
Nunphung pangngai ka pha thei ta meuh lova, ka chaw lem a tui thei lova, ka mut lah a tui thei hek lo, mangchhia in min bawhbuai a, ka mang lama ka hmangaihte hmel ka hmuh ve chhun chuan hlim takin ka tho a, mahse, reiloteah dawt tih ka hre leh si ţhin🥺




A ni telin ka cher zual a, hna lah ka ngaihtuah thei lo, hmathlir neih dan ka thiam ta lova, ka khawhar hnem tumin ka ţhianpa te pahnih hian min rawn tlawh ţhin lo phei se chu ka va mangang dawn lehzual em, an hlutna hi teh a teh chi pawh a ni lo ve, anni hmel ka hmuh lah chuan natna min thlen tho si, ka tana Mangaihi an va biaknlai te, Mangaihi te in lama kan zan hmasa bera chhuanlam siama min chhuahsan daih lai te ka ngaihtuah let a, nuih pui mah ila natna an pai lawi si. Aw, hringnun hrehawm hi, engtinnge ka pal ve zel dawn le.



Khawhar reng reng leh lungngai reng renga hun ka hman lai chuan, ka nun-ah hmeichhia a lo lang leh ta. Ani chu Annie Lalenkawli a ni a, Mangaihi ţhianţha ber a ni, kan bial zaipawl member ve tho a ni a, Mangaihi hian scooty a khalh thiam loh vangin Annie hian a phur kual ţhin, an inzui reng a, Mangaihi nen kan inkarah pawh hmun pawimawh tak a luah a ni. Mangaihi khan a tana Annie pawimawh zia hi a sawi fo ţhin, inngaizawng ta na nâ na chu buaina tenau te kan tawk ve ţhin a, ka service laklawh laia min biak theih loh te hian min ngai a min thlahlel ve si hi a hrethiam lo ve lek lek ţhin, mahse, Annie hian puitling takin a lo fuih a, a lo zilh ţhin a ni. Mangaihi leh Annie hi naupan tet aţanga inţhenawm, sikul pawh kai ruala, Sunday Sikul pawh kal dun, ţhu dun chawt an ni a, Mangaihi thih vuakvet ah pawh khan a pawimawh khawp mai, Pathian thu nen min hnem a, min fuih a, ka khawhar hlaua ka inchhung a rawn rah hial chang pawh a awm.



Chutih lai vel chuan a ni, ka nun thuruk engkim ka hrilh ni, ka nu leh pa, ka chanchin engkim mai chu zep ţhen nei hauh lovin ka hrilh a, ka pa diary a thu inziak chenin, a hnen-ah ka inbunruak a nih ber chu, ţap chungin min ngaithla a, kan inpawhna pawh a nasa zual sauh bawk, mahse, ka nun thawnthu ka hrilh aţanga rei vak lo-ah chuan min hmangaih thu min hrilh ta mai a, mak ka tiin ka phu nasa hle nghe nghe.
Kei chuan min lainata min khawngaih vangah ka ngai a, kha khawngaihna kha hmangaihna emaw a ti a nih ka ring a ni. Chu chu amah ka chhanna pawh a ni.


Mahse, ani chuan, 'khawngaihna aţanga lo piang pawh ni fahmiang, hmangaihna chu hmangaihna tho a ni, ka ţhiannu ka zah lutuk, mahse, mahni rilru puthmang pawh thup duh khawpa dawihzep ka ni lo a tin ni, min hmangaiha min duh let phutin ka hmangaih thu che hi ka hrilh lo che, ka thup duh loh vang zawkin ka hrilh che, min duh let ve lo a nih pawhin inthiamlohna i neih a ngai lo, i ţhian, i hmangaihi ţhian ka nih anga min en zui zel i duh a nih pawhin ka hnial lo, tihbuai che a, zarbuai sek che ka tum lo, ka mizia lah a ni hek lo, ka rilru puthmang ka hrilh mai chauh che a ni', a ti a nih kha.



Chumi zan chuan chhin khat te pawh ka chhing lo, ka ngaihtuahna a buai a, ka rilru puthmang ka hrethiam lo, ka va duh lo hluah hluah lam a ni lova, ka va duh em em lah ka hre hek lo, ani nena inzawmna siam chu remti ta ni ila, Mangaihi a na dawnin ka hre tlat, huiham, ka va buai tehlul em.



Mahse, chumi ni bak chu min duh thu emaw, min hmangaih thu a chhak chhuak tawh lova, a hmaa min kawm dan ngaiin min la kawm reng, ka ngaihbel nge, tlawh erawh min tlawh khat ta deuh.
Iai chhan tur ka neih ka hre lova, nula hmai fai leh fel tak pawh a ni, mahse, Mangaihi ka ngaihtuah kai a, ka zah tlat.



Mahse leh, hun hian rilru sukthlek pawh a lo ti danglam a ni mahna, Annie in min biak khat deuh chuan ka khua a har fo a, Mangaihi ka ngaih vanga lungleng ah ka inruat lui naa, 'a ni lo' tih keimah bawk hian ka chiang si!
Tichuan, inhmuh ka duh thu Annie chu ka hrilh ta chawt a, ani pawhin a lo remti a, Mangaihi thlana inhmuh kan tum ta a ni.



Kan thlen chuan kan ngawi dun reng a, a ţhiannu tana a ken sak pangpar mawi taka bawr laih mai chu a dah sak a, chibai a buk bawk.



A mittui a tla a, keipawhin ka mittui em tla lo mah se ka nâ tih ka thup lo e.
Mangaihi thlan hma-ah chuan ţhingţhiin, 'Mangaih, nang chu i dam tawh a, i ngaih ber Lalpa hnen i thleng ta, i ţhiannu, ni lo, kan ţhiannu Annie nen hian inzawmna siam ta ila min dem ang em?' Tiin ka ţawng chhuak a, min chhang thei lotu zawhna zawh chu a reh tlawk tlawk ringawt lawi.
Annie pawhin ka dara min rawn hmer sakin, Mangaihi thlan chu en pah siin tihian a sawi a, 'Ţhiannu, ka hlim i duh a, i hmangaih Remruata hlim pawh i duhsak tiraw? Nang hi la dam ni la he hun hi kan tawng hauh lo tur, mahse, i liam a, min hrilh lawk miah lovin, i kalsan tak i hmangaihte pahnih hian, kan khualzin kawnga kan infuih tawna, kan intihchak tawn theihna atan inzawmna siam kan tum a, i phalna kan rawn dil e', tiin.



Rei fe kan awm leh hnu chuan haw zai kan rel a, ka in lamah kal hmasa in eitur te kan siam dun a, kan pahnih chanchin te chu sawiin, a lungngai lo zawngin thu kan la hram hram a, kan nui dun ve hawk hawk mai.
Chutichuan, Annie nen chuan inngaizawng chho-in hmalam kan pan dun bek bek a, Mangaihi thlan pawh kan remchan hun apiangin kan tlawh dun ţhin.
Kan hun hman dan te kan hrilh a, kan chetchhiatna te kan hrilh ţhin, la dam ang maia ngaiin kan chhaih bawrh bawrh a, a thlarau pawh a hlimin kan ring ţhin.


Ka hringnun par chu a vul chho leh ţan a, nat leh mai erawh ka hlau ţhin, Annie pawh ka veng khur reng a, ani pawhin ka rilru puthmang hrethiamin lunglohah a la ngai bik lo, a lungno tur zawk hian min dawm thiam a, keipawhin hahdam nawm zia ka tem ve leh ta.