KA PA KHA 2

KA PA KHA


Ţhen hnihna


Hluhlu-i Khiangte


(Hna ka thawk a, sei tak ka tlin rih lo, zantin erawh ka la tum ve ngar ngar e🥰)


Ka muthmunah chuan ka nu thusawi nia ka pa sawi, ''Chhanhim, min phatsan a nih chuan nang ka dem lo ang che, min phatsanna nu pawh ka dem lo ang, keimah hi ka inhmusit dawn a ni", tih chu ka ngaihtuah zawm a, ka nu khan phatsan a nih vang chauha natna ni lo, mahni insitna, inhmuhhniamna nen hun a hmang dawn chu a ni si a, chuta chhapah, kei lah kha a phurrit ti zualtu ka ni dawn si.
Rim taka hna thawkin min enkawl a, hmangaihna nen, ka pa vanga a natna kha thupin ţawngkam nei lo mah se, rawlthar ka nih ve takah khan ka hrethiam chho ve chauh kha a ni a, mahni inenkawl theia min hriat hnu-ah a ni mahna le, min kalsan zawm ta mai si nen huatna leh khakna nen ka lo seilian zel a, tikhan ngap takin ka tal chho chu a ni si a.


Ka mut hmunah chuan ka nu ka lainat vangin ka hui leh pup ţhin, ka muhil thei ngang lo chuan ka pa diary bawk chu ka keu leh a, ka chhiar chhunzawm ta a.


"Mahni insitna nun ka pe a, pasal tana ţha tawk lo nia inhriatna, tling tawk lo nia inhriatna a rilruah a tuh sak hial chung pawhin hetiang hian min la hmachhawn thei chu a ni si a, Lalremruat, hmeichhe chak tak i va ni em ka ti ru vawng vawng, chaw chu kan han kil ve tak naa kan lem hlei thei hlawm lo, kan tho vat hlawm a, amah vek chuan ka thawmhnaw chu bag-ah min khungkhawm sak vek hnu-ah chhuak turin min ti a, lunghnur tak chungin kan inzui chhuak.
Ka pa te in lam ka pan a, kan thlen hnu chuan kan chanchin ka hrilh a, ka nu a ţah rualin ka pa erawhin kut min thlak hial, do let tumna ka nei lo, ka thiam lo a tin ni.



'Puitlin kawng zawh tura ka duh vang che in ka mo pawh ngaihsak duh lovin kawng hran ka zawh tir che u a, heti mai hian maw kan thu ngai miah lova i thlan, i hmangaih pawh i thlauhthlak leh tak?' Tia ka pa min zawhna chu chhan a va har em!
Thiamthu sawi tur ka nei lo a, hnawhchhuah erawh kan ni em lo e, ka fa pai mektu vang te pawh a ni mahna le.



Tichuan a tawi zawngin, sumdawnna chu chhunzawmin in hrang kan chang leh ta a, rilru nuam famkim ţhin lo mah se kan fa lo piang tur vangin Chhingpuii chu hlim hmel ka hmuh ţhin, Remruati pawh chu ka fapa chawmna tur pek tuma tlawh leh tumin ka chhuak a, mahse, a lo awm tawh lo! Ţhenawmte lah chuan a kalna chin an hre si lo, a phone number bakah ka fapa sikul luhna thlengin a thlak vek bawk si chu ka hui ru pap pap ţhin, ngaihsak ngam tur mi lo mah ila tlemazawng tal ka fapa tan tal pawh chuan sum pek ka tum ve kha a ni a, mahse, ni e, ka hmel pawh a hmu duh tawh lo a ni.



Ka thinlung pawh chu hmalam pan turin ka fuih mawlh mawlh a, a nih nih a ni zo tawh bawk a tiin ka nupui thar leh ka fa lo piang tur tan chuan ka thawk leh ta, a lo piang a, hmeichhia a ni, ka hlim a, ka fanu vang chuan, ka fapa leh a nu erawh ka nghilh ngai lo thung.
Ka sumdawnna pawh a hlawk chho zel a, fanu dang kan neih leha an leikan meuh chuan in ropui leh lian tak a din ve ta bawk. Milian tia sawi tur ka ni chho a, ka nun erawh a ruak a, ka thil tihsual avanga phuba a ni mahna, ka nupui ka phatsan vangin ka nupui thar chuan mim phatsan ve leh a, ka nâ a ni.
Ka fate pawh a hruai a, mipa dang min neih san, chutah chuan a ni ka nupui, Lalremruati thinlung ka sawisak retheih zia ka hriat fiah tak ni.



Ka tal ka tal a, ka vak kual ruai ţhin, ka fapa leh a nu kha hmuh leh ka duh a, anni chu hmu lehin ngaihdam vawikhat tal dil ila, thlamuangin ka thi thei ang tiin ka zawng kual ruai ţhin, ka neih sa ka ei a, hnathawh lam ka ngaihsak tawh lo, ka sum leh pai ît-a nuam min chenpui tum nula hmai fai tak tak tar alamah ka tawng a leh a, chung chuan min nghawng pha lo, zû ah ka tlan a, ka tar bawih bawih thei, ka nun chu sawisak a ni ve a, mahse, kei erawh, keimah leh keimah ngei ka insawisa a ni. Ka nâ a, nat awmzia hriattir ka ni, Remruat, ka fapa nen khan vawikhat chauh, ngahdam dil chung cheu a kuah che u ka va chak em, min nuihsawh tur talin ka hmuh theihah rawn inlar hram teh u." Tiin.



Ka mittui a tla a, he hringnunah hian mipa biangah pawh hian mittui a va luang zing em!


Ka nu chan ka ngaihtuah a, ka lainat, ka pa chan ka ngaihtuah a, ka na lo chuang si lo.
'Ka pa, ka ngaidam che, ka nu erawh pialralah nangmah ngeiin ngaihdam dil rawh aw, nu ropui tak a ni a, a ngaidam thei ngei ang che', tiin ka phun sup a, hriat loh karin khua pawh a lo var ta bawk.



Tichuan, ngui ru leh hnîm ruih chungin hringnun chu ka pal chho ve zel a, ka pa in min rochun in chu ka luah lut ta bawk, ka nunah hmeichhia lo lang ve ţhin mah se hnaih ka ngam tawh ţhin lo, phatsan nih ve ka hlau a, ka nu leh pa natna ang kha tuar turin ka chak ve tawk lo tih ka hria, ka hna ka thawk a, ka inkhawm a, Pathian fakin ka zai a, ka lawm tawk em em, ka pa min hnutchhiah in leh lo ţha tak ka nei ta bawk a, lungkham tur dang vak khawvel thilah ka nei lo, chutiang ngawt chuan kum ka chhir liam a, ka ţhiante chuan hmeichhia ngaihsak turin min nawr fo.
Mahse, ka hlau a ni!



Ka kum a naupang tawh lo a, min tur min tur ta chu a hnu-ah chuan ngaihzawng neih ve leh te chu ka pawm ta mai a, ka chhai a, ka rim pawh ngai hran lovin kan bial chhung ami, bial zaipawl a ka member pui nula hleitling leh chhelo ve tak, fel leh mi biangbiak thiam tak, a leplerhna sawi tur ka hriat miah si loh chu ka tan an lo be fel diam mai!
Tichuan, lirthei nei kan ni hlawm bawk a, zanah chuan Mangaihi chu kan va rim ta a lawm le, ka tlangval tirha ka hmangaih nia ka hriat Remsangi bak nula melh ngai hek lo i, ka lai khawp mai a, mahse, ka che chhe em lo e.



Kohhran a inhmang ţhah kan ni bawk a, a nu leh pa te pawhin ngaihngam takin min thlah falin min mutsan ta daih!
Ka ţhiante lah chuan chhuanlam fahrah zet siamin min chhuah san ta daih si, Vala lû a va hai ru em. Nakinah ka hnek khawp ang mawle.


Mahse, bul ka ţan ngai lovin Mangaihi chuan min besâwm siam siam a, inngaihzawnna lam pawh kan sawi hran lo, a zia phian e, haw a lo hun chuan bah ru nak hian, 'Mangaih, min duh em ni?' Ka'n ti thawr a, lai zeta min melh pahin a nui rah rah mai, 'umm', ti sapin a kun daih a, 'aw le, naupangchhia tak kan ni lo ve ve tawh a, i duhdan sawi la, keiin ka duhdan', ka ti leh hmiah a, chutah chuan min melh kal chung hian, 'ka tan i rinawm tur a ni, kei hi min duh ta lova, hmeichhe dangin i thinlung an luah a nih chuan tlang takin min hrilh la, ka nâ a nih pawhin ka na mai ang, inkawp kual vel a, inthlim, inbum ka duh lo ang, chuan, zu leh ruihhlo dang itih chu ka ring lo naa, i lo ti hlauh a nih chuan kei nen inzawmna kan nei thei lo.' A ti ta a.



Bu nghat nghat pahin, 'phatsan nih nat zia min hriattir suh ang che', tiin a chalah ka fawh sak zauh a, a îp ru chawih tih erawh ka hre thei, nuih sukin ka mang ţha zui ta a.



Ka in zau tak, ka pa min rochun ka luh chuan ka lung a leng nghal em em zu nia!
Mangaihi chu ka thlen tawh thu hrilha biak tumin ka mobile ka phawrh a, a mobile number ka save lo tih ka hre chhuak nghal zat.
Ka lû ka tuai vut a, ât theih ngai ve.


Mahse, bial zaipawl hian whatsapp group kan nei a, chuta ţang chuan ka la tawh mai a ni ang chu, ka zawng kual ta vat a, ka save nghal vat bawk, message inthawn a inbiak chiam ka peih loh deuh vangin ka call a, rei pawh a ring hma-in a lo pick-up nghal thuai.
Ka thlen tawh thu ka hrilh a, ngaihthlak nuam zeta a lawmawm thu min hrilhin ka ţhiante pahnih a lawm thu a sawi a, ka lo ner sak.



'I ţhiante khan nang hian min duh thu min hrilh a, keilah hian ka lo hnar phal lo, a mawihnaiah ţawngkam ţha-in a tirah ka hnar ve naa aw ka pawh ta mai a nih kha, chuvang erawh chuan min zuam loh ka beisei.' A ti a, chu lamah chuan a rilru tihah lo turin ka hrilh nghal vat, rei tak inbe lovin kan in mut tui, mang ţha ta a, ka mut lah chu a tui kher lehnghal.
Ngaihzawng ka han neih ve a chin chu khawvel te hi a thar vûk hian ka hria a, mipa tih chi ni lo viauin ka hre lehnghal, whatsapp status ah kûr nguai lo mah ila ni chhuak te chu a ni telin a mawi zual zel hian ka hria a, thli thaw te chuan ka tan malsawmna nasa tak an pai tam bik hian ka hre ţhin. 


Mangaihi nen pawh kan inpawh telh telh a, a zawng zawng chu hrilh lo mah ila kan chhungkaw chanchin tlangpui chu ka hrilh.
Ani pawhin min ring ngamin an chhungkaw chanchin te min hrilh ve a, an in pawh ka chuangkai zing narawh e, a nu leh pa lam aţang pawhin dodalna awka kan hre lo, min iai lovin ka hria a, ka lawm ve ţhin viau, inneih lam erawh kan la sawi ri rih lo.



Mahse, tukkhat, Mangaihi hnen aţanga phone call ka dawn chuan Vala lungphu kal ţha hle hle lai hi a tawp tir dûk ni maiin ka hria!
'Mangaihi kan kaitho zo lo, Durtlang Damdawi in kan panpui, ICU ah an dah lut', tia Mangaihi nu, nu Maduhi ţap pûr chunga a ţawng chuan min ti nâ.
Ţawngkam khat mahin ka chhang lo, ka taxi la chhuakin Durtlang lam chu ka pan nghal vut.