KA PA KHA 1

KA PA KHA


Hluhluhmelţhatei Khiangte


Ţhen khatna


(Fiction)



Phatsantu kha min hringtu chu a ni ngei si maw? Tiin ka rûm ru vawng vawng a, phatsanna ka huat chhan pawh ka nu leh kei kan rethei lutuk kha a ni ber e, ka pa khan kei leh ka nu kha min phat lo se chu kan nun a nuam deuh tur, ka nu chu phatsanna runthlak a tawrh avanga a thinlung hliam chuan a tisa a khawih tel hial a, a hrisel lo chho em em, sikul pawh kai chhunzawm thei lo khawpa betin kan awm kha a ni a.
Khawsak a chhiat vang nge, ka zir lo zawk, hmangaih tawnga ka nun a hlim chhung pawh rei a ni lo.
Iai ka ni a, ka theihtawp chhuaha hna te thawkin chawkhawn ngaiin kan khawsa bik lo naa nei tia sawi tur kan ni mawlh lo.


Ka nun chu rethei viau mah se hmangaiha fuihtu nu ka neih avang khan mi hlu takah ka inngai ţhin, mahse, ka khawvel chu a kehchhe nawn leh a, ka nu ka kaitho zo tlat lo a tin ni.
Ka au chiam a, ka na lutuk chu ka mipa nihna nghilh khawpin ka che bawraw chho ta, mahse, hunpui a lo thlen apiangin ka thiam leh theih tawka ka nu thlan chei chu ka ţhulh ngai bik lo.
Ka nun a ngap chho zual a, khawtlang mi te hmuhmawh ka lo ni chho ta, vengchhung aţanga hnawhchhuah ka ni ta hial, ka nu khan hria se a va na dawn em! A mittui tla lai min hmuh duh lo khan a hru ru leh ngei awm si a, puhmawh tur zawngin ka rûm ru ţhin.


Ka pa chu ka hua a, ani erawh nupui fanau dang nei lehin Aizawl khawpui a mi lian tia sawitur a lo ni ta hial.
Ka hmu ngai lova, ka vah vel naah lah ka hmu fuh ngai hek lo, a chanchin kimchang hre zui lo mah ila nupui fanau dang a nei leh tih chu ka hre ve mai a, min hrilhtu lah kha ka hnek ţhelh bawk, kha phatsantu chanchin kha ka hre chak eih hleinem!


Tichuan, a chang leh hmun kilkhawr laiah te riak mai maiin ka mut lum ve na atan mi puanpho te ka ru a, thawk thei lo khawpin ka hriat loh karah ka taksa a lo chaurau chho ta, man ka tawk zauh zauh a, a nuam zawk letling hial, ei leh in ka dawng a, tihduhdah lah ka ni ngai hek lo, mutna tur kilkhawr ka dap a ngai tawh lo a, thlakhlelh tur in ka nei lo cheu, chuta chhapah chhungkua lah ka nei hek lo, ka nu lama ka chhungte chuan ka nun hman chhoh dan vanga lungawi lovin min tuithlar ta hmak bawk nen, an sawi 'mi vakrawlai' ka ni ta mai si a.
Beisei tur nei lo niin ka inhre chho ta.



Mahse maw, ţumkhat man ka tawk chu, Police motor hmangin Vanapa Hall lam kawngah phurh ka ni a, mi ţhahnem tak hi Pathian fakin an lo zi luih luih, ro deuhin ka nui hawk ringawt.
Pathian hi a awm takmeuh a maw? Mi zawng zawng hi a fate kan nih si chuan, nun nuam taka nung leh fahrah te hi tinge kan awmhran kher? Rualkhai taka roreltu tur a ni lo em ni? Pathian chu!



Traffic a jam avangin kan ding deuh reng a, aurinna hmanga Pathian thu an au pui dum dum avangin bengchhet ni bik lo ta chuan ka lo ngaithla ve zel.
Chuta thusawitu in a sawi pakhat chu maw, "Vanduai bik nia i inhriat chang leh, chaua i rûm changin, nang aia vanduai zawk thlir ţhin ang che aw ka unau" tih hi a ni.


Ka ner deuh sawk a, chutih lai chuan kan tlan zawm leh ta mai bawk, tan-in chhungah chuan ka mu ran a, ka muhil thei lo lah chu ka let sek lehnghal.
'Nang aia chan chhia', tih thu chu ka bengah hian a ri tluk tluk mai a, ka ngaihtuah chiang ta a lawm le.


'Kut ke kim ka la nei a, chhungkua nei lo mah ila kei hian ka hma chu ka hai ve tur a ni lo em ni? Ka hmelma lian ber ka pa hmuhah tal pawh, zahawm taka lan ka tum tur a ni lo em ni?' Tih chu ka inzawt rilru mawlh mawlh.
Min vengtu chu ka ko a, a muthlu suar suar pawh a rawn harh zawk, ka lo nui sak a, rawn tho chhuak a min rawn pan hnaiin, ka hnenah chuan zaidam awka takin, 'Vala, eng nge ni ta?' Min ti nghal, keimahah chuan eng thil nge thawk ka hre lo a, ka mittui a parawl ringawt!



'Pathian hi biak ka duh a ni.' Ka ti mawl tawp a, a meng fiah leh zual kawk mai.


'I ruih a la reh lo a ni maw?' Min tih paha min nuihsawh ka ring a, mahse, ka tisual a ni.
Ka awmna Tan-in kawngkhar chu a chabi pai hmanga rawn hawngin a rawn lut a, min ţhuthniam tirin ka lu chungah kut a nghat a, 'ţawngţai ang aw', a tih rual chuan ka mit ka lo chhing nghal.


'Lalpa, i fapa hian a ngai che a ni, tuna a nun aţanga a talchhuah theihna atan hian pui hram la, tumruhna leh luhlulna hmangin thuam ang che, i duhdana kal nawm zia hriattirin, mipa chhuanawm tak a nih theihna atan i chakna hmangin khawngaihin kai kal hram ang che aw', tia chhamin a tawp a khar a, ka mittui a lo tla zung zung.
Thu ţha tamtak min fah leh hnu-ah chuan, 'mut tui, mang ţha', tiin kan inthlah a, chu zan ang em ema ka mut a tui chu ka la hre ngai lo.



Ka nun chu midang fight tur a ni lo tih hriain ka fight chho a, ka taksa chak lo te pawh ruihhlo ka thlah avangin zawi zawiin a lo ţha chho ta, midang zawng aia chak ni lo mah ila ka thar vâwk a, ka hlim surh ţhin, Pathian thu han sawiho te chu nuam hi ka ti chho em em a, ka tan pui te nen pawh chuan kan sawiho ţhin, tichuan, ka chhuah a lo hun a, ka chhuak ta.


Khawvel chu a thar vek ni maiin ka hria a, ni chhuak te chu a mawi bikin thli thaw te chuan min fan bikin ka hre hial, tichuan, riahchilh theih hna zawngin ka kual ta a, ka hmu vat mai bawk, ka hlawhchhuah chu ka mamawh bik te bak hmang phal lovin ka dahţha zel a, ka nun hi a nuam bik ka tiin vannei bik ni-ah ka inngai chho ta, ţawngţai nuam ka ti a, mi han puih mai te chu nuam ka ti ta em em.
Tichuan, kum khat zet maia ka hlawhchuah hmang chuan ka mamawh hrang hrang ka indap khawm ve a, ka theihtawp ka chhuah avanga ka hnathawhna te'n min duhsak letin, bungrua leh ilo pawh a pekin min pe ve nual mai.


In ka luah ve aţang pawh chuan ka thawh ngai, Taxi khalh chu ka la zawm reng a, ka vah vel naah chuan ka lo hmelma en ţhin, ka pa ngei chu ka tawng hlauh, a kum a lo tam ve ta a, a lang tar angreng, ka nun chu a nawm tak bik em avang chuan, 'midangte tana malsawmna nih', thu changchawiin kut ke kim lo te leh kum upa zawk te chu chuan man te ka laksak duh lo ve ţhin a, chutianga ka tih chuan ka hlim em em mai ţhin.


Ka mi phurh chu ka pa a ni tih ka hre naa pawh tumna ka la nei lo cheu, mahse, amah zawk chuan zu rim nam huam chung hian, 'Vala, phatsan i tawk ve tawh em?' Min ti a.
Ka chhing sawk mai.
Ka ngawih vang vang hnu-ah, 'tawk ve tawh e', ka ti chhuak a, a nui suk.
'In inrual vel-in ka ring, ka fapa nen khan', a ti a, keimah min sawina nge ni ang, a nun thara a fa te tih zawhna ka nei ru nghal deuh naa, min kalsan lai khan ka kum a nau hran tawh lo, fa dang ka rualpui tur a neih ka hre si lo.


Keimah min sawina a nih ka ring a, ţawng erawh ka ţawng chhuak tawh lo thung.
Mahse, amah zawk chuan, 'amah a ni, he thlalak hi, amah ngei kha a ni', tiin ka nu thlalak, ka motor khalh a ka dah chu a rawn hmu fuh a, a rawn ban nghal chung, 'ka nu a nih kha', ka lo ti a. A chelai a tawp chawp.


Bak nak hian, 'a nih chuan, nang hi ka, ka', a ti a, lo sawi khalhin, 'ni e, i fapa ka ni, i phatsan tak kha', ka ti chhuak deuh hrawih.
Ka insum leh vat a, ka ding chawt bawk.
'Min chhuk san tawh mai teh, khawngaihin,' tiin kawngkhar ka hawn sak a, mahse, eng nge thleng ta? Ka pa, phatsantu chu muangchanga rawn chhukin, lei a rah rual rual chuan a mittui a luang a, thup tum taka kun ngur chung chuan, 'phatsan nat zia hrilh hriatin ka awm ve tawh a sin ka fapa', tiin harsa tih hmel zet hian a sawi a, rawn hawi chhuaka chik taka min en hnu-ah chuan, min hnungchhawn zawnga inher in a kal ta boh boh a.



Ka thinlungah, chiang em emin, 'ngaidam thei lotu', tih thu a rawn ri dawt.
Na taka thawk la hawkin chak takin ka pa lam pan chuan ka kal a, 'ka pa, i fapa hi min hnungchhawn nawn leh ang maw?' Ka tih chuan a rawn inher ruai ruai.


Ka pa mitah chuan mittui a tling tih ka hmu a, amah chu panhnai leh zualin nghet tak hian ka kuah thlawp a, kan awmna hmun chu khawilai nge, min thlirtu an awm em tih lah ka ngaihtuah tawh hek ll, 'nang chauh neih ka nei tawh, chhungkua ni leh ang', ka ti chawm.
Ka pa chu a khur dar dar a, ka hnungah min ben sam thak thak hnu-ah, 'a nih chuan haw ila', a ti, ka hlim a, ka lung a chhe bawk.
Ka taxi ah chuan lut dun lehin ka in lam ka pan pui hma chuan, 'ka nu tlawh ang aw', ka ti a, a bu nghut naa a huphurh tih ka hre thei.



Nungdamin a hmu tawh dawn si lo a, ka nu chanchin kha a hria nge hre lo lah ka hre hek lo, mahse, kan pafa a ka nu in min hmuh chuan a hlim ka ring a ni.
Ka rin dan ang chiahin thlanmual lam ka pan takah chuan ka pa chu a kâng awk a, zawhna mitmeng nen min en, 'ni e, ani chu a dam tawh, rilru natna leh damchhung lungkhamin a chimbuai ve pha tawh lo e', ka ti chhuak a, ka pa mitmengah chuan, mahni inthiamlohna, inchhirna leh natna a lang dawt zut, a ngawi ran naa a nâ tih ka hre thei, mipa na tawrh dan chhut pui thiam lo tur khawpa naupangchhia lah ka ni tawh hek lo e.


Kan ngawi dun reng a, ka nu an zalhna thlan lam chu pan puiin kan thlen veleh chuan, 'nu, he hun hi tawng ve la i hlim dawn si a', ka ti rilru mawlh mawlh. Ka pa erawh ka nu thlan kiangah chuan ţhingţhiin ka nu hming ziah chu a chûl riak riak reng a, na takin thawk a la leh hawlh ţhin.
Khaw thim dawn thleng kan awm ta tihah chuan 'haw ang hmiang' tiin ka pa chu ka sâwi a, mahse, ka neihchhun, hmathlir neih pui ka tum ka pa chu a lo khawng vek!


'Ka pa, ka pa' tiin na leh zualin ka sawi nawk nawk a, ka mangang chuan ka pa chu ka pawm a, ka taxi ah chuan dah lutin chak takin Damdawi in lam ka pan pui ta nghal, mahse, Doctor te chuan hmanhmawh takin lo en mah se ka pa thih thu hrilh hriat ka ni leh ta tho!
Awmngaihna ka hre lo a, hmathlir ka neih pui ve tur ber ka pa chu lak sakin ka awm leh ta chu a nia! Kum tam hnu-ah inrem in kan awm dawn a, pa leh fa nihna kan chelh dun leh chiah a sin le.



Ka pa chu a in pawh ka hriat loh vangin ka in luah lamah vuina hun kan hmang a, ka chenna veng thlanmualah vuiliam a ni ta, ka hnathawhna te chhungkua bakah ka ţhenawm khawveng te, kohhran hrang hrang ţhalai te bakah ka lawina kohhran te pawh chuan min ţawiawm ţha em em, ka beisei phak miah loh thil thlengin ka pa nupui hlui leh an fate pahnih pawh chu an rawn lang ve a, chu a chhapah tuna an pa ni mek, pu Zuimawia chuan a rawn tel pui thlap. Sumdawng mi a lo ni lehzel tih hriat takin a sumdawn pui ţhin te pawh an rawng lang khup khup a, mi tana awhawm tak a nih nen a chhungril nun erawh a lo rethei ţhin hle tih ka man thiamin ka hria.




Chuta ţang chuan ka pa chenna in awmna te ka hre chho a, a nupui hlui kha hmeichhe sual tak chu a lo ni bik lo nge, ka pa in leh lo chu ka chan tur a nih thu a sawi ta mai, ka beisei lo a, mamawh ka inti hek lo, anmahni chu chang tura ka tih chuan, 'i pa khan i hmingin a dah vek a lawm, kha kha kei chu ka lung a dam lo a, ka fate tan ka duh a ni, mahse, i pa rilru kha ka sûk sak thei ta lo a, chumi lungawi lo chuan pasal dang ka umsan ta hial a nih hi, mahse, Pathianah harh tharna changin tunah chuan ka dam tawh a sin, i pa khan inchhir reng rengin hun a hmang a, diary a ziak ţhin, a in-ah pawh chuan ka kal pui ang che, i duh phawt chuan', tiin min hrilh a, keipawhin hma hun ka hre lo naa, ka pa sulhnu chu ka chhui poh a ni ang chu.


Lusun khawhara indawmkun reng zawng a sawt lo e tiin ka pa in min kalsan aţanga kar khatna ah chiah chuan a in lam chu ka pan a, a nupui hlui leh a fate'n min kal pui bawk, in chu lian leh ropui tak a ni a, a chhunga cheng ţhin te kha an lo hlim hik chuang miah lo tih te ngaihtuahin inchhung lamah chuan ka pen lut a, an chenna hlui a an han lut leh chu an lung a chhe ve tho tih hriat takin an han ţap leh rawih rawih phawt a, nu ber, pi Chhingpuii chu inthingharh in ka pa nena an chenho laia an pindan lam chu min pan pui a, ka pa lehkha pawimawh dahna te chu hawngin in leh lo lehkha te bakah lehkha pawimawh ang ang chu kan han hai darh a, chutah chuan diary kan hmu tel hlawl.



Chu diary bakah lehkha pawimawh zual chu keiin hawnin a ngai ang ang chuan kan kalsan leh rih a, kei lehkhathiam lo, sapţawng pawh thiam lo tan chuan lehkha hrang hrang chu a pawimawhna pawh ka hrethiam pha meuh lo, mahse, ziak leh chhiar erawh ka thiam a, a diary chu ka chhiar poh a ni ang chu. Ka in ka thlen chuan ka pianthar tak hnu-a ka rawngbawl pui ţhin, ka ţhalai pui te zinga ka kawmngeih fal bik pahnih, Rempuia leh Ramsanga chu an rawn inzui lut a, min chawh hlim tum takin an rawn phul hlut bawk.
Keipawhin lo chhawn vatin ka lo nuih pui hawk hawk a, zanriah ei tura sawmin ka pa diary ka hawn thu ka hrilh a, ka nun thawnthu te pawh hrilh pah ka tum a ni.



Anni pawh chuan min remtih puiin an chhungte an han phone leh a, an remtih hnu-ah chuan khawsak rel surh surh pahin ka pa in ka nu nena min phatsan dan te, chumi hnu a ka nu-in min kalsan dan te leh ka nun bawraw chhoh dan te leh vengchhung aţanga hnawhchhuah ka nih dan te, chumi hnu-a ka inhmuhchhuah dan te chu tawi thei ang berin ka hrilh mawlh mawlh a, ngaihnawm tih hmel tak hian an lo ngaithla naa min lainatna mitmeng an pu.
Ka pa nen kan intawn leh dan leh ka nu thlana kan awm lai meka min kalsan dan ka sawi thlen chiah phei chuan Ramsanga zawk chuan, 'ka ngaithla ngam tawh lo e', tiin min lo pawtchat vut a, ama chanah a dah tih ka hria. Chutiang bawkin Rempuia pawhin.


Titi dang vawrh leh rihin Ramsanga chhai lai ve deuh Tluangpuii chanchin chu ka sawi ta daih a, kan hmel pawh hmuh a nuam leh tlang ta deuh e.
Zanriah te chu tui ti takin kan ei ho a, inkhawm loh zan a ni bawk a, ka pa diary chu keimahin ka en ngam chiah loh vangin min enpui turin ka sawm leh tawp a, pa lo min tih ka hlau leh deuh naa ka sawi laklawh tawh si, mahse, beisei ngam lo deuh mah ila anni chuan min enpui ta a, Ramsanga chuan a chhiar ri nghe nghe, hetiang hi ka pa diary a a inziah dan chu a ni.


"Kei hi Lalchhanhima ka ni a, Chhana tiin min ko ţhin, chhungkaw pangngai ve tak ni mah ila hung tak erawh kan ni lo, harsatna lian tham tak chu tawk lo mah ila neuh neuh neiin ka seilian zel a, ka college kal na hmuna nula, ka hmangaih hmasa ber, ka bialnu hmasa ber ni bawk Lalremruati nen chuan kan zir chhuah hma-in kan inru ve ta tawp a, kan chhungte ve ve chu lawm kim chiah lo mah se chutia inru ta na nâ na chu min suihrem ve mai bawk a, Pathian zarah nau pawh kan pai vat nghe nghe, ka pa erawh a lawm chiah loh vangin in hrang chang turin min ti a, keipawh a rem rema inhlawh in ka nupui chu ka enkawl chho ve a, kan kara nau lo piang kai tur awm bawk nen kan hlim dun ţhin hle mai, ka ngai ţhin.


Kan fa chu a lo piang a, zai chhuah a ni nghe nghe, ka lawm em avang leh fuke kima a pian avangin a hmingah pawh Vanlalremruatfela tiin ka sa nghe nghe a, kan nun a tihlim ţhin, nau puan leh ilo, ţul dang kan mamawh nasat vangin keipawhin ka thawhchhuah aţang chuan sumdawnna lampang bul ka ţan chho ve a, sum hlawm a ngaih avangin ka nupui hriat lohin ka nu ka dil nghe nghe, ka hlawhtlin huna ka rulh turin, phal takin ka nu chuan min pe a, ka pa in a hriat erawh chuan a thinrim deuh, mahse, ka nu in a thlem ve a ni mahna, engmah chu a sawi bik lo, ka nupui bulah pawh ka pha mar hram a, ani pawh a dilchhut duh bik lem lo.



Ka fapa chu a lo seilian ve zel a, sikul pawh a kai ve ta hial.



Ka chhungkua chu an ţâm ka hlau a, an nat ka phal lo, ka sumdawnna chu zauh zelin phai lam nen te pawh indawrna kan nei chho a, zinkual te a lo ngai ta, ka zinkual na lamah a ni tuna ka nupui, Chingpuii nen pawh hian kan intawn tak ni, a tirah chuan thawkdun mai kan ni a, engtik lai khan nge kan karah in ittawnna a lo thlen ka hre lo, kan zinkual nasat vangin taksa a lo rim ve ta deuh a, zu han in ruk zauh zauh te ka nei chho ta, ţum khat chu Guwahati kan awm laiin kan thlen na atana kan hman ziah hotel ah chuan pindan ruak pakhat chiah an lo nei hlauh mai a, hmun dang pan kan tum zet naa kan thawhpui te nen kan indawr na lamah kan tlai ve angreng tawh si, zanin chiah chu tiin pindan pakhat chu inluah ţawm kan ti tlu ta a, khum pahnih a awm bawk nen pawi turah khan ka lo ruat lo, kan hotel hmanah chuan in tur an kawl ţhin vangin ka lam nghal zat bawk, Chingpuii chu nula chhelo tak a ni a, a nu leh pa te chawmna atana amaha eizawng a ni, a pachang angreng hle, a zawng zawng hre lo mah ila fakawm ka ti ru ve ţhin reng mai.



Chutia pindan pakhat kan han luah takah chuan kan chanchin kimchang zawk deuh te inhrilh tawnin kan titi a, kan in dun pah karh karh bawk, a nu leh pa te hi thingtlang lam mi niin harsa tak an ni a, nau, naupang te mai pahnih a nei bawk, a sawihmangin a nu leh pa te upat lam fa niin phir an ni nghe nghe, a nau te an han pian hian a nu chu a hriselna a tlahniam chho ta a, a pa lah chu a thing kihna lamah che sualin a bawksawp ta, ani chu chhungkaw khaidingtu a nih tawh thu te a sawi siam siam a, keipawh chuan nupui leh fapa ka neih thu ka hrilh ve mai bawk, mahse, ţawngkam hmanga inchhai pawh awm si lo chuan kan han kai ta deuh chu engtinnge a thlen ka hre lo, kan mudun ta ringawt a, mipat hmeichhiatna kan hmang bawk, kan hman zawh rual chiaha ka nupui phone call ka dawn chuan inchhirna in ka khat nghal.



Hmun dangah zin chhuak fo mah ila ka chin hi ka hrilh ziah a, ka chin ka hrilh si lo chu min rawn ngaihven tih ka hre mai, inthiamlo tak chungin ka nupui call chu ka la a, zaidam tak leh mut chhuah hmel zet hian ka ţhat leh ţhat loh min rawn zawt a, dawta pha marin rei pawh be lovin ka mang ţha vat.
Zinga ka harh chuan Chhingpuii chu a lo tho tawh a, bual in lamah a awm a nih ka ring, a ri sar sar mai, a inbual a ni ngei ang, hrukpuan hmanga intuam chungin a rawn chhuak a, chibai min buk zauh, chibai buk let pahin, 'nizan kha' ka ti chhuak hawlh a, min rawn melh zawk ringawt, Lotion inchulh in a inha mawlh mawlh a, a chet pah chuan, 'ka raina chance san lai a ni a, invenna lah kan hmang hek lo, ka rai hlauh chuan kan inneih a ngai ang' a ti hmiah mai, ka kâng awk a, ka nupui leh ka fapa ka mitthlaah ka hmu nghal zut zut a, a tawpah mahni indemna in ka khat leh ţhin.



Chutiang chuan kal zelin Mizoram lama ka awm hnu-ah pawh ka rilru in Chhingpuii chu ka ngaihtuah fo a, thla nga ngawt a ral hnu-ah pawh min la rawn be pawp miah lo chuan ka rilru a tidam viau in mutmawhah ka hmang tawh lem lo, mahse, kan chetsual aţanga thla ruk hnu-ah chuan min rawn be pawp a, a rawn ţap hlawp hlawp mai, ka nupui leh ka fapa an muhil tawh a, an hriat hlau takin pawnah ka chhuak a, ka va be ta a, a rai thu leh a nu leh pa in an tuithlar thu rawn sawiin tunah khawlaia a awm thu a rawn sawi ta mai, ka thawk a pik a, chutianga ka fa paitu khawlaia a awm chu rem ka ti thei lo, a awmna hmun a sawi lam chu panin hotel ka biak sak a, a inentirna lehkha pawh min hmuh thlapin kan chetsual hun leh tuna naute upat dan hi a inrual chiah bawk, chu zan chu ka nupui bulah ni lo, ka fa paitu bulah chuan ka hmang ta a, mipat hmeichhiatna erawh kan hmang lo.



Zankhua in ka muhil lo a, nasa takin ka inngaihtuah bawk, Chhingpuii chu tuithlar a ni a, pan tur a nei lo, Remruati erawh chuan chhungkua, hmangaihtu a nei a, ka nupui chuan phatsan a nih thu hria se, min ngaidam thei dawn chuang em ni? A thil hlauh ber phatsanna kha a chungah ka thlen ta si a, min pawm thei chuangin ka ring lo, ka fa paitu Chhingpuii hi ka neih a ngai a ni tiin ka rilru ka siam fel a, harsa erawh ka ti!
Nuam leh hrehawm min lo pal pui tu a ni a, ka chauh changa hmangaih taka min kuahtu Remruati rilru na hmel ka thlir ngam ang em? A bianga mittui luang chu ka hmu ngam dawn em ni?



Ka nupui fanau te nena kan chenna in, KAN IN ni ţhinah chuan ka kal ngam lo a, mahse, kal ngei a ngai si, tichuan, zingkhua a lo var a, Chhingpuii nen chuan ka nupui leh ka fapa awmna lam chu kan pan ta, amah ngei pawh chuan a huphurh ve tih ka hria, mahse, kan pal a ngai a ni.
In kan thlen chuan ka nupui chuan ka bo daih chhan leh call pawh ka chhan theih loh chhan min lo zawt nghal a, ka fapa sikul kal tur a lo siam mawlh mawlh bawk, ka hnunga lo kal Chhingpuii raipuar âk mai a hmuh chuan a meng buai nak a, a thil tih laklawh lai chawl meuhin min rawn panhnai.



'Bawiha khan sikul kai phawt se, kan sawi dawn nia' ka ti ta ringawt a, a sikul kaina a hlat lutuk loh vangin rei pawh an va inthlah lo, an va inthlah chhung pawh chuan Chhingpuii nen chuan mikhual ngam lo ang mai hian kan lo ţhu ngawi dun reng ringawt.
A rawn let leh chuan thil awmzia min zawt ta a, harsa ti tak chungin ka hrilhfiah, ka sawi zawh chuan ka nupui lam chu ngam leh ngam lo hian ka va en a, min hauha min ankhum a tum lo, mi nupui te angin a pasal fa paitu Chhingpuii chu kawh pawh a tum hek lo, kan hmazawn ţhutthlengah chuan a ţhu a, a mit a chhing ngawt ngawt, a mittui erawh chu a luang reng a, ţah rik erawh a hlau ni hmiang, a inpetruh fan fan.


Ka hnem ngam lo a, ngaihdam lah ka dil ngam hek lo, chutiang chuan reife kan ţhu ngawi reng hlawm a, a hnu-ah chuan Remruati chu tho-in, 'aw le, chaw ei ila, kan eipuar hun-ah Chhanhim, i thawmhnaw siamin min chhuahsan rawh u, naupai lai a ni a, chaw a mamawh, i bialnu khan, i pa te in lam inpan mai dawn nia, he in hi chhuahsan tumna ka nei lo' a ti a, sawi harsa a tihzia a lang reng, tho chhuakin chaw ei a siam a, kan hnial ngam loh vangin kan kil ve mai bawk.
Thilsual ti tute zawk kan ni miau a, chutianga boruak ri hluai kan tawng lo te chu mak ka ti.
Remruati sawi ka la hriat reng chu, 'Chhanhim, min phatsan a nih chuan nang ka dem lo ang che, min phatsanna nu pawh ka dem lo ang, keimah hi ka inhmusit dawn a ni', a tih kha a ni."



'Ka ngaithla chhunzawm duh tawh rih lo e', tiin ka tukkhum ka dawm vang vang a. Ka ţhiante chuan ka dar min ben sak thak thak, insum thei lovin ka mittui chu a tla a, ka nu, ka va lainat tak che em, khatih lai khan i mak ti hmel leh phatsan nih i hlauh vanga i tha khur te kha ka lo hrethiam lo a, 'engkim a ţha vek' tia kuah tur che ka nih kha lo hria ila aw....
Kan ngawiho reng a, sawitur a va vang em.
Thingpui in ang u tiin thingpui ka lum leh ngawt a, in ho mah ila nidang ang chuan kan nui ho thei lo achha chu a ni e, rei fe min ţhut pui leh hnu-ah muthilh tum hram tura min chah chungin min hawsan ta a, thil ţha lo lam ngaihtuah lo turin min fuih bawk.


Keipawh chuan mawihnai taka thlahin min liamsan hnu chuan ka ţhu chawrh chawrh a, 'ka nu' tia ţawng chhuakin ka thaw leh vak ringawt ţhin, ka va lainat tehlul em.