pialralah tal zo tawh

PIALRALAH TAL

Ka mit aţanga mittui lo chhuak chu duh lovin ka nuai a, mahse, mittui luhlul tak a ni, lo chhuak lo tura thu ka pe chung pawhin a rawn chhuak lui tlat a nih chu! 

Hah zeta thawk la hawkin ka âwm ka dawm vang vang a, ka pasal tan hian hmeichhia nih ka tling lo em ni tih chu ka zawhna a ni.

Ka mitthlaah hmeichhe dang nen duhthawh taka hmangaihna an chen dun lai chu a cham reng a, an thawm te chu ka bengah a cham reng, a nâ tih hian a nat zia sawifiah zo lo.

Mahni insitna in ka khat a, ka pasal khamkhawp pe zo lo nia inngaiin ka inhmuhniam ngawih ngawih.

Lalmuanpuii ka ni a, kum 25 mi niin pasal ka nei tawh a, ka pasal chu Rosangpuia a ni, kum 27 mi a ni tawh.

Ka pasal nen hian inngaihzawnna em em kan nei lova, ka mipa hnaih hmasak ber a niin ka hmangaih em tih ka hre lo, ka nunah mipa an awm ngai lova, a awmchhun chu ani leh ka pa chauh an ni, neih pawh hi ka duh ngei em ka hre hran lo, mahse, ka nu leh pa te'n nei turin min ti a, kei, nu leh pa te thu hnial hreh em em hian ka hnial zo lo a ni.

Tichuan ka pasal Rosangpuia nen hian kan innei a, nupa in a an tih tur te chu ti dunin nau hial ka lo keng ta, thla 5 mi lai a ni ve tawh, ka pasal chu ka duh chhawm ve mai bawk, ka hmangaih em ka hre lo, mipa leh hmeichhe kar hmangaihna ka hrethiam tlat lo, min ngaihsakin min duatna a ti lang ţhin a, awmdun, chengdun na nâ na chu duhna a lo piang ve mai a ni mahna le, mahse, tunah hian kei hi ka na, ni e, ka na takzet.

Tu pa fa hian nge a pasal leh hmeichhe dang nuam tawl lai chu nui var var chunga thlir thei bik ang le, kan nupa khum ngeiah, kei, a nupui min thlimin hmeichhe dang nuam a chenpui a, ka ta ni a ka lo ngaih, ka pual liau liau emaw ka lo tih kha hmeichhe dangin min ţawm asin!

Rilru na em emin ka tlan chhuak a, ka nu leh pa inah kalin ka mit, mittuiin a chim khah vek chhan chu min zawt mah se chhang lovin ka pindan ni ţhinah chuan ka inkhung a, ka ţap tlawk tlawk. 

Ngaihtuahna fim ka hmang thei lova, natna nasa takin min chiah tlat, ka na tih hian ka nat zia a sawi fiah zo mawlh lo.

Ka âwm chu ka ţham tawk tawk reng a, phatsanna tawk ngai lo hmeichhe tan chuan phatsanna chu a nunrawng zual bik lutuk tlat!

Ka mobile ri tlang tlang chu ka en a, a vawi 3 na atan ka pasalin min rawn call tawh, ka hmu tih an hriat hma-in ka tlan chhuak miau a, phatsantu anih zia thupin sual kawng a dai zawh veleh min rawn ngaihven der tih ka hre nghal, ka rilru na leh bum kawi mai mai ka nihna ka hriat tak miau avangin ka tawt up up a, ka mittui erawh a tla tawh lo.

Vanvadakin thawk ka la leh hawk ţhin a, ka mittui tla a tawp hnu-ah pawh chuan ka tawt dan a la ngai reng.

Mawl intih luat avangin ro zetin ka nui leh hawlh ţhin, nung reng chunga thi niin ka inhre ber.

Pindan pawn lama ka nu ţawng ri lang lang chu ka hria a, a ţawngkam hmanah chuan ka pasal nen an inbia tih ka hre bawk, ka kal leh kal loh a zawt a ni mahna ka kal thu a sawi a, an inbiakna a tawp hnu-ah ka pindan kawngkhar a inkik ri karh karh bawk a, a rik rualin ka nu in hawng turin min ti zawm zat.

'Nu, reilote chiah', tiin ka mu kawm ngal a, ka tai bawr te chu a na in ka vial deuh ngawng ngawng, ka pum a puar lian ve tawh si a, duh angin ka che thei lo zawk.

Inbeng kângin khum lu lamah lukham ka thuah a, ţhu mu chungin ka pum chu ka chûl kual ruai a, ka naute pawh a kimki chawih chawih hialim ka ring.

A pa leh hmeichhe dang khawsa dun lai kha a hmuh ve ringin ka thaw hawk a, a mit awmna tur rinzawn chawpin ka hup tawk tawk a, awmzia a awm lo kher lehnghal.

Ka lo muhil a ni ngei eng, kawngkhar inkik ri ah bawk ka harh a, ka harh rual rualin ka na lehnghal ngut ngut, ka pasal aw ri ngei a ni kawngkhar hawng tura min ti tu chu, a aw ka hriat te chuan luak chhuakin min hnawh up up a, ka uak chhuak ţhawt teuh kher mai.

Muangchangin ka tho ţham ţham a, kawngkhar ka hawn rual rualin ka hmingpum a min ko ri ka hre zawm nghal zat, mangang lutuk a ka siam avangin ka banbul nghet zetin a rawn man chawt a, a rilru a hah hman thu a sawi nghal zuah zuah, kei erawh chuan nep ti lutuk leh mangang a ka siam avanga a hmel phelh phang te chu huatna leh tenna nen ka melh ngawt ngawt tawp.

Ka hmel put hmang a hmuh chuan min hau mawlh mawlh chu a tawp chawt a, min vawnna a kut chu la thla ruai ruaiin ngawi ngur chunga min en vang vang hnu-ah thil thleng a awm leh awm loh bakah ka ţhat leh ţhat loh min zawt nghal sup.

Ro zetin ka nui hawk a, a hrilhhai lutuk hmel chuan ka nuih ti za zualin ka nuih chhunzawm hawk hawk. Mahse, ka nuih rual chuan ka biangah mittui a rawn luang lum nghal pap a, ka hmai hup thawkin thawk ka la ham ham.

Min ngaihtuah hmel fe a thawk na taka la hawkin min pawm chawt a, min kuah beh rual chuan a ri meuha ţap chhuah hawk pahin ka tal nawk nawk.

Min thlah leh ruai ruai a, pindan chhung lamah min nawr lutin khumah chuan min ţhut tir a, mangang leh ka awmdan chu hrethiam lo tih hriat taka hmel phelh phang chung chuan ka hma zawnah a ţhingţhi a, ka mal chunga ka kut dah chu humin a hmuiin a nawr tâwk a, na zet zetin thawk a la ham ham.

Ka nu leh pa in ka ţah avanga buai ru zet chungin thil awmzia hriat duhin an rawn lut ve vut a, mahse, 'nu, pa, kan inbe lawk ang chu', tiin ka ţha tih an rin theihna atan an lam hawiin ka nui lui sâng a, ngaihţhat hmel loh zeta min en hnu-ah hreh hmel zetin an chhuak leh a, kawngka pawh dimte in an khar bawk.

Ka pasal Rosangpuia chu en-in, 'ka hmu che u', ti ţiakin ka mit ka chhing ngawt ngawt a, vanvadakin ka thaw ham ham.

Ka kut a hum beh tlat chu a thlah ruai ruai a, ka mit mengin ka en a, a hamhaihin a hmel chu a buai ru nuai(h)! 

Sawi tur reng reng hre lovin a ţhingţhit ngai chuan a ţhingţhi reng a, a sam chu tuai thuakin a hmai a tuai leh pâwk a, a thawk lak dan chu a rit lutuk tlat.

Pawi tihna, hrilhhaina, natna, inchhirna a mitmengah chuan nasa takin a lang dawt zut a, kei chuan a mangang talbuai chu mit hmuh phê riai chungin ka thlir a, ţawng tuma a kâ ang zuaiin a thaw chhuak leh hawk ţhin.

'Engatinge, min mamawh chuan i nupui ka nih ang ngeiin itan ka awm lo em ni? I khamkhawp pek loh che leh lungawi lo taka siam che ka nei em? Ka theihtawp tak meuh meuhin nupui ţha tak nih ka tum ve asin, kei hi engah ber chuan nge min lo kham loh a? Ka fel famkim hauh lo, mahse, ka theihtawpin hmangaih che tumin nupui ţha nih ka tum ve asin, tinge, engvang tak chuan nge kei leh he ka pum chhunga i fa ngei hi min phatsan!?', Tiin ka ţap chhuak hawk a.

'Ka tihpalh', tih zawng a sawi a nih chu!?

'Aih, tihpalh a awm lo, he khawvelah hian maw, tihpalh a awm lul lo, i duhthlanna ngeiin a ni min phatsan ni!

Tihpalh a ni lo, tihpalh a ni lul lo, i duhthu, sual leh ţha i thliar thiamna thluak, thinlung leh rilru ngei ţawmpuina in a ni min phatsan ni'. Tiin ka au ţhat a, ka thinrim leh rilru na lutuk bawk si chu ka khur ngawt ngawt hial, ţawng leh a aukhum leh ka tum a, mahse, ka tha khur nasa lutuk chuan ţawng thei lo lêkin min siam!

Ka thinurna pawh au chhuahpui thei lo a ka awm chu mahni inhaw lutukin ka awm ka chum dawt dawt a, ka tawt leh ipik lutuk chuan keimah a na thei awm zawng zawng a ti na chhuak vek hialin ka hria.

Engmah sawipui theih si loh, rilru mang lutuk leh thinur lutuk a ka awm avangin ngaihdam min dilna pawhin awmzia a nei lo tih a hre miau a, kan nupa in-ah, hmeichhe dang nena kan khumpui ngei a nuam an chenna in-ah chuan min haw san a, a haw hma-a rilru fim ka put hnu a inbe tura min ngenna chu chhan pawh chhang lovin ka bula lukham in ka vawm ţawlh a nih kha.

A haw hnu-ah chuan ka nu leh pa te pindan ah rawn lutin thil awmzia min zawt a, harsa ti lutukin ka pasal chetdan chu ka sawi a, ka pa inchhir lutuk hmel mawlh kha!

A na tawk a ni tih hriat lutukin ka kiangah a rawn ţhingţhi a, ka pasal tura min thlan sak chet duhdan leh an thu ka zawm avanga a fanu, a hmangaih em em chunga natna nasa lutuk thleng anga ngaia amah indem in, a indem lutuk leh ka laka a inthiam lo lutuk chuan a vaw na tawk tih hriat takin ka pa, pa rorum ve tak, mahni thu duh leh dik ni a a hriat chu ti mai ţhin chuan a fanu, kei, ka hmaah ngei chuan mittui tla chungin ngaihdam min dil!

Ka nu erawh chu engmah sawi thei lova awmin, ka pa chezia en pah leh phatsan ka nih avanga ka natna chu nâ min tih pui tih hriat takin a ţap tlawk tlawk.

An thiam loh a nih loh thu hrilh sepin keimah a ka awm duh thu ka hrilh a, inthlahrung takin min chhuahsan ruai ruai.

Thinrimin an âng lova, ka pasal dem zawngin ţawng an cheh hek lo, min hmangaih avanga ka nawmsakna tur an umna lamah pasal min neih tir a, ka huntawnah chuan anmahni indem vekin an tihsual a nih thu bak ţawngkam khat pawh an chhak chhuak hauh lo!

Muhil thei lovin ka let ka let a, zanriah pawh ka pum a naute vang liau liauin ka ei lui, mahse, lem a har kher mai, ka ei tam theih miau loh avangin ka nu-in bawnghnute tal hi in rawh tiin min tulh lui a, keipawhin ka hnial hran lo, keimah chauh inngaihtuah thei ka ni lova, ka pum chhunga awm naute hi ka mawhphurhna a nih zia chiang takin ka hria.

Ka pindanah bawk chuan ka lut a, ka mittui a tla tawh lova, ka thinlung erawh na tuarin a la rûm vawng vawng.

Ka muhil thei lova, ka inlet sek, min rawn hmel duh ve aţanga min rim a min chhai lai te, ka hawi vak lo tih a hrereng chung pawha beidawng duh lova min ngaihsakna lantir a bansan chuang lo te, ka nu leh pa te laka a tlaktlum zia leh kan inneih hnu-ah pawh min duat thiam zia te, engkimah min duatin min dah hmasak ber ţhin zia te bakah nau ka pai tih ka hrilh laia a hmel a hlimna nasa lutuk lang chhuak te kha a der maw? Ni lo, khatianga lemchan kha a ngai hauh lo!

Min phatsan leh tur si chuan engvanginnge ka neih loh hlau a a vir buai cheng? Min phatsan a min ti na leh tur siin engatinge amahah ka tluk theih na atan ţan a lak? A lakah ka tlawm a, min ngaihsakna nasa lutuk leh min duat em avangin ka hriat loh karin ka rilru ka lo pe a, a fa ngei ka pai sak hnu-ah phei chuan amahah ka innghatin amah kha ka engkim, ka fa te pa tur, ka pasal, ka ta chauh, ka zawng zawngah ka pawm ve hial asin!

Mahse, tunah chuan, ka pum chhunga a fa ngei pawh zah zo lo leh kan nupa khumpui ngei pawh zah zo lovin chet a la a, huh!

Ka hriat loh karin ka lo muhil a ni ngei ang, ka harh hlawl a, ni a lo eng ut tawh, ka awmna hmun chu hrethiam lo zetin ka hawi kual hû hû a, mahse, rei nghah a ngai lo, chiang takin ka pasal leh a hmei nu te'n a nuam an chen dun lai chu chiang takin ka hre chhuak a, ka thawk ka hip let hrawk.

Hetiang a awm reng ngawt zawng a ţha lo e tih rilru pu-in ka tho a, ka intihfai zawh hnu-ah pindan ka chhuahsan a, ka thawm hriain ka nu leh pa te chuan min lo en nghal vut a, zan lamah an mu ţha bik hauh lo tih an hmel phelh deuh phangah chuan chiang takin ka hmu thei, 'i rawn tho thei maw? Chaw ei la, i chawhmeh duh ber mautuai ka bai hluah a nia', tiin min tih hlim tum takin ka nu chuan min lo be nghal bawrh bawrh a, ka lu ka thing nghut chuan ka nu chuan beidawng fe a thawk la halhin lainatna mit nen min en ta ngawih ngawih.

'I bungrua kan va la ang', ka pa min en chung chuan a ti nghut a, ka bu nghat ringawt.

A ţhuthmun thawh sanin a rawn ding hluai a, kal mai inpeih zetin min en a, kawngka lam a pan nghal vut.

Muangchang a ka ke penin ka zui a, ka ke pen chu a sak ţalh ţalh kher mai.

Ka pasal in kan thlen hma, an vengchhung kan luh chuan ka tha a khur ţan lehnghal der a, ka ding dat, ka pa in min en nghal vut a, ka lam rawn panin hlau lo tur leh zam lo tura min duhna mitmeng nen a min melh chungin ka banrek a rawn vuan chawt a, min kai kal dat dat.

Ka pasal in kawtzawl kan thlen chuan ka zam takzet, ka pa chuan ka lam rawn hawiin min hnem na'n ka chalah min fawh sak a, nui lui hawlh a a bânrek a hmer zeuhin ka pasal in-ah chuan ka pen lut a, ţhutkhawmna pindan a ka pasal lo ţhu chu kan thawm hriain a rawn hawi vut a, en zeuhin kan nupa pindan, min phatsana hmeichhe dang a mutpui na hmun ngeiah chuan mikhual ngam lo ang maiin ka pen lut a, ka pen luh a pindan chhung ka en chu ka meng kâwk.

Khum leh pindan chhunga bungraw tam zawk chu hnawk fahran hian a lo let rem rum a, a inthiam lo leh a mangang lutuk inhrikthlakna atan a hmang tih hai rual a ni lo.

Ka thawmhnaw dahna bawm lian zet chu ka pan a, ka hawn veleh ka thawmhnaw ka phih chhuak nawk nawk.

Mangang taka na zeta thawk la hawk hawk thawm chu ka hnung lawkah a ri a, Thawmhnaw dahna chhuar chunga luggage chu dingdihlip âk âkin ka ban a, ka thawmhnaw lak chhuah sa chu thinrimna leh natna nen ka hnawh lut mawlh mawlh, ka khung zawh hnu chuan ka ding riai riai a, ka luggage hnuk a pindan chhuahsan ka tum meuh chuan rang lutukin ka pasal chu a rawn che vut a, ka luggage chu min phihsawn sak nawkin ka hnung lam aţangin min rawn kuah bet chawt a, tal lovin inhumruh ngar ngar chungin ka ip chawih chawih.

'Khawngaihin, khawngaih takin min chhuahsan suh, min ngaidam thei ngang lo a nih pawhin ka kiangah hremna min pe tur talin awm rawh, khawngaihin, kan fa, kan pahnih fa kha fahrah tia miin an kawh loh na atan tal ka kiangah awm rawh aw', tia sehchilh nawk nawk leh hlauthawng lutuk a a ţawng bah nuai chuan a aw ri ah chuan ngenngawl lutuk râwl leh manganna thuk lutuk ka hre thei hial!

Ka lu ka thing nawk nawk ringawt!

Na tuar a ka vial ngawih ngawih chu mitmeng phelh phangin min en a, hlau lo turin min fuih mawlh mawlh, nau neihna pindanah min nawr lut a, rawn luh ve a tum viau a chu Doctor leh Nurse te chuan an remti lo a ni mahna, a au ţhawt a, ka mitchhingin ka insehruh ngawt ngawt.

Nâ ka tuar avanga thlanin min bual huh zûih chung chuan ka theihtawpin ka sang a, min buaipui tu Doctor leh Nurse te chuan min fuih mawlh mawlhin ka naute a chhuah ţep thu min hrilh a, ka naute a chhuah nawlh rual chuan ka au chhuak ţhawt a, lungkuai zeta ţap râih râih ri ka bengin a hriat rual chuan ka mittui a tla nghal zung zung.

'Mipa, mipa a ni, kutke kim thlapin, a duhawm lutuk, a va han hmel ţha tak em', tia nurse ţawng mawlh mawlh chu thei leh thei lovin ka ban ţawk ţawk a, min hrethiam zetin ka lam a rawn pan vat.

Chau tak chungin mittui nen ka nui hawk a, nau pianghlim puannem var mawi taka an tuam, ka  hmuh theih tura ka kiang a an rawn dah chu ka en ngawih ngawih, ka fa, ka fapa hmel ka hmuh chuan ka na chu ka hlimna in a hneh a, lawm avangin ka mittui a tla zung zung.

Ka inhliamna te min ţhuiin ka fapa chu an la chhuak a.

'I ropui lutuk, nu ropui tak ini, fapa min pek avangin ka lawm e', tiin ka pasal chu nau neihna pindan aţanga min nawr chhuah rual deuhthaw chuan ka fapa pawm chungin min lo be mawlh mawlh a, harsa ti zetin ka nui seih.

Ni e, ka pasal chu ka fa hma hun ka ngaihtuah avangin phatsantu ni mahse ngaidam hmingpu in a kiangah ka khawsa chhunzawm kha a ni a, ka lawm lohna tura awm a hlauh luat avangin tlawm tak te-in ka lakah tlawmin a hma zawng aiin min ngaihsakna a lantir a, min duat bawk.

Mahse, kha mihring ka hriat aţang khan kei chuan min ti na tu, na taka min siamtu ka pasal thiltih ang chiah kha ka ti ve a, uirena sualah ka tlu lut a nih chu!

Min vilh na ngut ngut ţhin tu, ka fa hmakhua ka ngaih avang chauh a ngaidam hmingpu a ka vawn leh ka pasal kha, ka fa min petu leh phatsanna nunrawng zet min pe tu ngei kha, ngaidam hmingpu chauhin a ni ka lo vawn, ka ngaidam ni lovin! Ka na reng a, han nghilh zeuh a nupa a nuih dun, nupa nun hlim taka hman pawh kan nei ngei e, mahse, he mifel famkim ni bik lo, fa a hmangaihna avanga a tihtur diktak ti nia inngai nu lèlo hian maw, ka fa tan ka ti ti reng chung siin ka fa tana ti ka lo ni lo, ka fa tan ti ni tak tak chu ni ila ka fapa pa chu ka ngaidam pumhlum thei tur hi a ni a, mahse, mahni hmasial thinlung hian ngaihdam harsa ka la ti cheu a nih chu!

Ka fapa ka enkawl bak chu hna dang thawkin ka chhuak ta lova, ka fapa pian aţanga hun rei pawh la liam lo-ah nupa nun hmang dun ta na nâ na chu nau ka keng leh mai bawk. Ka dam thei ngang lo anih chuan ka chhuak ang ti a thutlukna siamtu chuan phurrit ka neih belh! Ka fa chu phurrit tiin ka sawi maw?! Ni lo, phurrit a ni lo, rohlu a ni, rohlu.

Ka fate ka hmuh chauh hian a ni ka thinlung chhungril ber aţanga ka nuih ve theih chu! Phurrit an ni lul lo ve.

Chutianga nau pai chung leh ka fapa nausen mai awm chunga in a awm ta tlut tlut chu mobile te ka kawmngeih chho ve ta a, facebook leh whatsapp te khawihin thawnthu te ka chhiar a, video hlimawm tak tak te bakah lairil fan khawpa ţah pui tur te hmu-a en-in ka nun chu ka ti hlim ve a, mahse, kha nun hlimna ka zawnna hmun social media kha lo khawih malek ila ni tur, uirenu-ah ka chhuak chu a ni der si a!

Ni e, ani nen khan kan inbia a, a tirah chuan ka chhang ţha bik lo, hmeichhia mawi lo taka be mi a ni lova, polite takin, zahawm takin min be ţhin, ngaihkawih tur takngial pawh a awm ngai lo!

Chutianga nungchang mawi na nâ na chu chhan loh ngawt ţhin chu a chapo thlak tihna rilru te pu-in a message te chu chhanglet ve ta ţhin a, a tirah chuan zing chibai inbuk te, zan a mut tui ti a inthlah bakah ni kan hman nawm theihna atan te duhsakna inhlan tawnin bul kan ţan ve ngei a, mahse, kan inkawm nel telh telh a, kan duhzawng, kan ei leh in ngainat te, kan ngainat loh thil te inhrilh tawnin kan nun hial kan inhrilh tawn a, ani chu sipai(army) niin Kolkata ah a post a, nupui a nei tawh a, kei ang tho-in fanu leh fapa duhawm tak a nei bawk.

Mahse, mit a man awm si lovin a nupui chu a ringhlel ţhin a, sawi sep a tamin mi ka aţang ngei pawhin a hre ta zeuh zeuh, mit a inman awm si lo leh rinhlelhna thinlung in a chiahpiah hneh em avangin uiresan ah a inngai ta hial a, a fate'n amah chhunna an nei miah lo te nen a rinhlelhna chu hmehbel chho-in a nupui chu biak lohah a tlak ta a, amah miţha tak a ni a, zu leh sa bakah nula te nen erawh hun a hman phah lo, mahse, a nun tawt leh ipik lutuk si chuan kei min ring ngamin ka lakah a inbunruak a, rinhlelhna mai ni lo, ka mit ngei a ka hmuh laia phatsan ka nih tawh miau avangin ka nat pui rawih rawih.

Uirena leh phatsanna ka huat a zual a, ka pasal lak aţang pawhin ka hriat loh karin ka lo hla tial tial a, ka inbih chian meuh chuan nupa satliah, tukţhuan leh zanriah kil dun a, kan fa te hmuh a nui hmel pu lui nupa, nupa kara nupa nihna awm famkim si lo, inkarhlat tak kan lo ni reng tawh.

Ka pasal chuan na taka min siam a, min phatsan tawh miau avangin min pawh hmasa ngam lo tih ka hai lo, keiin engkim a ţhat thu hrilh a, chhungkaw hlim ka duh tia hrilh turin hnaih harsa ka ti telh telh si.

Chulai karah ka anpui, phatsanna in a sawp chauh ve tho ţhian ka nei bawk nen, kan titi duhzawng te, kan ngainat zawng te, kan thil thlir dan te a inang chho zel mai si a, ţhian ni a inbunruahna atana inhmang tawn chu inngaihzawnna khurah kan tlu lut ta hial a, ani pawh a huat em em phatsantu nihna a nei a, keipawhin uire nihna ka nei ta! Ni e, kan kuthmawr pawhin kan intawk in kan la indek lo, kan inhmuhna chu video call a ni mai a, mahse, kan thinlung a uire miau si alawm!

Kan huat em em, kan hringnun vaw chau a thinlung chhungril ber aţanga kan fa te kan hmuh chang chauh a nui ve ţhin a min siamtu phatsanna nunrawng ngei chuan kan nunah bu a khuar a, kan huat em em ti tu kan lo ni ve der mai!

Kan inthlahlel dun em em a, kan aw mai ni lo, kan message a kan ţawngkam hman aţang pawhin kan nat leh nat loh, kan hlim leh hlim loh te, kan chauh leh chauh loh te bakah buaina kan neih leh neih loh te thleng a inhriat sakin kan inhrechiang dun em em a, kan kûr dun ngawih ngawih reng a, sakhmel tawn loh zunah hian a lo uai theih, kan zawng zawng hi a lo pek theih ti chiangtu chu keini pahnih hi kan ni! Keiin ka pasal aia ka biak tam zawk ang chiahin ani pawhin a nupui aiin min be tam bawk a.

'Naute, ka fate hi chu awm lo se chuan engkim huamin ka vuan ang che, mahse, ka fate, ka fa an ni nge ni lo pawh ka chian ngam loh hi ka hmangaih takzet asin, chuvangin, rem ngai chuang lo tur beisei reng a intihhah tawn ai chuan, inbe zawm tawh lo mai teh ang, nangpawhin i hrin ngei, i ril a rah te fahrah i hlauh luata an hring tu pa i vawn ang khan ka fate hi fahrah turin ka phal bik si lo, duhthlan tur dang kan nei lo'.

A ţawngkam hman chu ka chhiar nawn sek a, a dik vek! Mahse, thudik hi a kha, aw, a kha takzet, a kha satliah lova, natna nasa lutuk a pai tel a, min vilh ngut ngut thei, thawk la ve reng chung siin minung ka ni lo ni maiin ka hre hial!

Vawi khat chauh kan tum lova, vawitam, kan fate chungchang te, kan inhmangaih zia te, a rem si lo te chu sawidunin inthlah kan tum fo a, mahse, kan thei lo fo, hmangaihna in min sawp chau a, min nghaisa in rawng takin min hrawm nawk nawk fo asin!

Tawpna siam tak tak tuma kan inbiak hnuhnun ber ţum chuan ka ipik leh tawt lutuk chu ka fapa leh ka fanu chu ka nu leh pa te in-ah ka dah a, kan veng a a ruk deuha kawl ve ţhin ni a an sawi chu ka pan tawp, a tirah phei chuan in tur lam ka ti ngai si lo nen min pe phal lawk lova, mahse, a hnu-ah chuan ka tih tak zia a hrethiam a ni ang e, min pe ta hram a, ka rilru tawt leh ipik lutuk chu ka landan ah a lang chhuak a ni mahna, nu Ruati chuan ka darah hmer vang vangin min hnem nan a min kuai kunin, ka chalah min fawh sak a, na takin thawk ka la hawlh ringawt.

Ţawngkamin engmah a sawi chhuak lova, min en chung a a nuih var var hnu-ah a lu a bu nghat a, keipawhin buk khum nghatin ka chhuahsan.

Chaw eina pindanah chuan ka zu lak chu thli in ka in pap pap a, ka ner leh nang zel, mahse, ka in duh a ni rih tawp. Ka in lui a, ka in lui zel a, a tawpah chuan mumal lo zeta rak chhuakin ka sam ka kek nghek a, ka baw ta hawk hawk.

Ka talbuai lai chuan ka pasal a lo haw a, a rawn luh rual rualin mangang taka min hnaihin min kuah a, kei chuan sehchilh nawk nawk chungin ka ankhum bawrh bawrh thung, a thin a thawk ve ta, 'i mipa biak ţhin ka hai hleinem, phatsantu ve tho ini', a tih hrawk rual chuan ka ankhum leh tawn tawn a.

'Ni e, kei chuan mipa ka bia, ka be ngei alawm, mahse nang chuan ka mithmuh ah ngei mai min phatsan asin, ka ngaidam ngai lo ang che, kei chuan ka fate pa, ka fa te bakah nang, ka fa te min pe tu hi a tak ramah ka la phatsan ve em hleinem che', tiin ka rak chhuak tuar a, hah hmel zeta a lû tuaiin a hmai a tuai leh pawk ringawt.

Chu hun aţang phei chuan kan inhlat zual leh sauh a, a der takngial pawhin ka nuih hleithei der tawh lo!

Ka hmangaih em em Remruatpuia chu ka ngai em em reng a, ani pawhin min ngai tih ka hria, insum zo lovin chhuţi a neih thu ka hnenah a rawn sawi a, ţap chungin kan inbia anih kha.

A rawn haw hun chu a thleng a, ka tihtheih tawk chu a rawn thlen ruala rilru na tak chung leh a fate hmangaih em em chung si a a kuah ngawih ngawih lai ral aţanga lo thlir chu a ni!

Mittuiin ka mit a bu a khuar tlat avanga khawhmuh phe riai chungin inchhung a an inzui lut chu ka thlir a, vawikhat chauh tal nghet takin kuah thei ila, vawikhat chauh, minute khat lek tal nghet takin, lungchim takin kuah vawng vawng thei ila tih chu ka duhthusam chaurau zet in a thlen ngam chin a ni si a.

A chhuk thlak leh a hun tawh a, a thlawh chhuah hun tur pawh ka hria, mahse, ka thlah liam ve thei lo, chawhnu lam dar 3 a ri a, 'nakinah, chatuan hmun kan pan hunah, intawhkhawmna a thlen hunah chuan, he lei a mi te hi angkhat vekin kan inhmangaih vek tawh ang tiraw? Chutih hunah chuan kan inhmangaih hi a sual tawh bik lo ang tiraw? Ruatpui, mahse, pialralah lehzel pawh i chhungkua, i nupui leh i fate kut chauh i vuan ang a, keiin ka pasal leh ka fate chauh ka vawn chuan, kan tan pialral pawh chu a va nunrawng dawn em! Chuvangin Lalpa, he thinlung uire hnu hi khawngaihin ngaidam la, chatuan hmunah chuan a kut ka vawn min phalsak hram rawh aw..' tiin bianga mittui luang chungin ka sawi a.

Ka dar a nghet taka vawn a nih ka hriat rual chuan ka hawi vat a, ka pasal a ni, thaw hrawihin a awmah min kuahbet a, 'ani khan enkawl ţha tur che-in min chah asin, i ţah a phal lo a, i mittui tih tlak sak lo tur che-in min ngen asin', ti chhuak hrawih paha ka chhip a a fawh deuh tawk rual chuan ka khawng nghal lah a.

Ka tha tawpa tal chhuakin mak ti taka mengphawk hra in ka pasal chu ka en a, 'pialralah tal chuan in inhmangaih a rem tawh em em ang, Pathian hi ka dil dawn a ni', ti a ro zeta a nuih hawk chuan zawite in, 'PIALRALAH TAL AW!' Ka ti chhuak sap a.

Tia a chanchin min hrilhtu chu ka en ngawih ngawih a, ka thin a rim, ka rilru a na bawk si!

'Pasal an neih tir dawn che khan lo huaisen la ţha tur, a nih loh pawhin phatsan inih khan i puma naute enkawl tur khan inringtawk la tiraw?

A kal vek tawh si a, tunah chuan chhungkua in kehchhiat chuan in fa te tan a ţha lo lehzual si a, kan inhre har ka ti em mai.

I dinhmunah khan ding ila ka tihtur ka hrilh ang che aw, nau ka pai a, kan fa hmasa ber tur ka pai laiin ka pasal in hmeichhe dang lakah a hmanrua a lek a, ka phawk a, ka na ang.

Tlawm ka inti ang, mahse, ka fa hmakhua ka thlir vangin ka chhuak zawk ang, eng nge a chhan, Pathian leh a Kohhran hmaa thu ka thlun pui, rinawmna thu ka tiampui, kha mihring, Pathian leh a Kohhran hmaa rinawmna thu a tiam pawh zah zo lova bawhchhe ngam kiangah khan ka fa a ţhanlen ka rem ti lo. Mahse, tunah chuan a tlai tawh a, thinlung uire ini reng tawh a, chu chu sual tho a ni. Mahse, tihtheih i nei', ka tih chuan min en ha a, ka nuih var var.

'I fate i pek theih ţha ber, hmangaihna i pek theih thuk ber chu anmahni pa, anmahni hringtu pa hmangaih a ni', tiin ka nuih leh var var a.

A mittui a tling pam mai, keipawhin Pathian hnenah, chatuan ramah tal, Lalmuanpuii leh Remruatpuia hi an intawn a, an inhmangaih theihna atan ka dil ang, 'PIALRALAH TAL'tiin ka phun ve sap a.