MALSAWMDAWNGZELA zo tawh

MALSAWMDAWNGZELA

Hluhlu-i Khiangte

Rawlthar kum 16 mi a ni a, hmel pa hrâk mai, ria ţhalh mai a ni a, lungngai zet hian a indawmkun ran mai, mipa, mahni tawka pa inti rual a ni naa a mittui a far fap fap a, a nau te pathum chu melh kualin a nu ruang, kuanga an zalh, a hnara lapua an hnawh chu a en leh ngawih ngawih ţhin a, a lung a awi zo mawlh lo, awrawl chhuahin ţap hawm hawm lo mah se a chhungril chu na tuarin a rum vawng vawng a, a pa lahin a hma kum lawkin a ram vahna lamah intipalh in a kal san tawh bawk nen ani ang rual mai tan chuan tawrh thiam ngaihna a awm lo ve em bawk a ni.

Engtinnge hun kan hman ang? Engtinnge kan awm chhunzawm zel ang tih chu a ngaihtuah lo! A thiam ang tawkin a tuarin a na ve tawp mai a ni.

A nu ruang an thlak aţangin zan thum a liam ta, khawhar in riak te an kiam zo a, a hlinchhawn a la niin an lungngaih pawh a zia viau mai, mahse, an khawhar hlau a puitling lam lenpui tute pawh hna ţul nei an nih ve vek vangin a nu thih cham a nih meuh chuan an ţîl zo ta.

An unau chuan an khawsa ve rak rak a, ei leh in mamawh lo ni bik hek lo le, a tirah chuan a nu leh apa te lam pawhin ngaihsakin ei leh in, sum leh pai te nen an phaktawk ţheuhin an vur reng a, mangangin an awm bik lo, mahse, chutiang chuan thil a kal thei bik reng lo a, zing lamah chuan tlai lam chaw chhum tur phàn chang an nei ta zauh zauh mai! Chawhmeh chu an ti ve naw naw thei zel a, hmeh tur an neih loh changa tuisik an chawm te, hmarcha uhhmui, cheng 30 man chauh pawh lei na tur an neih loh chang te a awm ta, chu chu thuhran. Buhfai pawh lei ngai a ni zel tawh mai si, a nau te hriat loha a hui pap pap chang lah chu a ni telin a zing ta tial tial a, an in ve lah, mi in an luah hawh a ni a, thla khatah cheng 1000/- an chawi ve ţhin.

An chhiat tawh hriain thla khat luah man chu a in nei tu te'n an ngaidam zawk hlauh a, mahse lw, chutiang ngawt chu a ni reng thei bik si lo.

MALSAWMDAWNGZELA chu a mut hmunah a inngaihtuah nasa ţhin a, a hui ru pup pup ţhin, a tawpah zawng, Khawpui lam pan ve tawp a, inhlawhna a hmuh ang ang thawh ve mai chu a rilruk ta a. Amah berin hna a thawh theih chuan a nau te chu thla tin maia an sikul kai man chawi ngai ni lem lo, Sorkar sikul a kal tir ve chu a tum a ni. Ei leh in pawh an phang bik lo turah a ngai.

A nau te chu a thiam ang tawka hrilh ve in phur ber ni awm tak chuan a chhaih nui vei iar iar a, a rilru chhungril erawh a nuam zan bik lo.

In luah tur an hmuh hmaa an belh tur a Nutei te lah chu a hrawn tam bik si lo a! Risk la tak meuh meuha a nau te chu a kal pui rawih a ngai niin a hre si!

A va mangang ru em.

An kal dawn pawh chuan ţhenrual ţha te, a nu leh a pa lama an chhungte pawhin duhsakna nen an thlah liam ve a, Aizawl khawpui chu an thleng thla ve ta rawih mai.

Kan la sawi lo tak e, anni hi Kawlkulh khuaa awm an ni a, a pa hi pu Ringa niin lo a nei ve ţhin, pa taima tak a ni a, mahni ţhat ţhata ţha tawp chi kan tih ang hi a ni. Mahse, A lo vahna lamah a chesual a, a ni, mau hmun a ni a, a han vat kha mau a sah na lamah a indâwt palh a, a thi ta mai a ni. 

Hmeithai an ni ve ta reng mai a, khawsak nuamsa tak ni lem lo mah se an hlim ve ţhin. Mahse leh, pa ber a awm ta lo, an kehchhia a, pa ber awm loh vanga tlukchhiat mai erawh a tum bik lo, a fa te chuan thil thui zawk an la thlir thiam lo naa an nu ber, Pi Tlanmawii chuan manganga a fate siam chu a tum bik lo.

A hlimchhawnah kha chuan a ngui ţhin a, an ram neih ve chhun, a pasalin rimtawng taka a lo vah en ve chu a hralh a, an thla a muang rih, a fa tê ber lah hmeichhe naupang khirh zet mai, Wai wai an lei ve changa Chocolate ngen tlat, chocolate an lei ve laha Wai wai chhum ka duh zawk ti tlat ang chi! Suakbak tak mai hi a ni reuh a, a hming chu Lalnunziri a ni, an milai lah hmeichhia tho niin, a tet deuh laia a kan na lamah a kut a kawm a, a kut vei lamah chuan kutţang pahnih chauh hi a nei a, ramtuileilo a ni der mai si! A rilru lamah lah dik lohna chen, mi pangngai aia hniam ngaihtuahna pu a ni lehzel a, a sikul kal na laman hmuhsit a tawk fo nen ani phei chuan sikul a bang daih tawh, pawl nga(5) zirlai chauh a nihin, a hming chu Fakzuali a nk ve thung, a fapa rawlthar kum 15 mi, Msa erawh chu lehkha a thiam thei nen, nakin lawkah hlawhtlinna te a la chang ve ang a, amah leh a nau te pawh chu a khai ding thei ang tiin pi Tlanmawii chu a inthlamuan ve ţhin, mahse, nat lawk pawh nei lovin a kal ve ta mai bawk si a! A fate chu a ngaihtuah ve takzet ang le.

Chutiang chu an chungkaw dinhmun a ni a, chhungte dang tibuai lo thei ang bera an tun dinhmun aia kân zawk a inbeiseina nen Msa chuan a nutei te chu a zu pawh ve ta hlawl kha a ni a , a nutei te pawh chuan ţha tak hian an lo dawngsawng a, Aizawla awm mah nise milian chhungkua an ni bik lo nen rei tak erawh an kianga an khawsak theih loh tur thu ţha takin an hrilh a, Msa(MALSAWMDAWNGZELA) pawhin a hrethiam em em mai. In luah tur chu a dapin a dap a, hna a melh ve pah reng bawk. 

A vannei nge ni dawn ni, inhlawhna tur chu a hmu mai reng a, in luah tur a hmuh hma aţangin a inhlawh ve ţauh ţauh ţhin. Kum lamah upa la ni lo mah se a dinhmunin a zir a, a nau te ngaihtuah reng chungin a thawk a, cement work lam ah helper niin vai mistiri a zui ţhin a, rawra leh balu vel a thlen changin ţheka in a thawk bawk ţhin.

Thla khat lai a nutei te bulah chuan an aam tawh a, an kiangah ţawngkam hriat hrehawm phuh chhuak lo mah se Msa chu a inthlahrung ţhin. An ţhenawm khawveng te'n anni unau chanchin an zawh changa a nutei ngeiin chhanna a pek ţhin dan chuan a ti na ve a ni. 'Fahrah an ni a, hei, a upa ber hi a inhlawh ve a, in luah tur an hmuh veleh an chhuak dawn' a tih chu a ni, fahrah an nih a hria a, a theihtawpin a thawk ve bawk. A nutei te lakah chuan a inkiltawih a, hrehawm a ti ţhin, a tawrh theih loh ber erawh a nau chiah Fakzuali, a nutei fa te'n 'piangsual' tia an loh ţhin chu a ni, vawikhat chu a nau a chhanna lamah a nutei fa te chu a hau a, mahse, naupang ţawngthei ve ek ek hlawm e ti lovin a nu chuan a chhan hlur mai a, amah Msa zawk chu a ankhum hrep mai a, boruak alh hluai erawh an nei zawm lo hlauh.

A tum a ruh zual sauh a, a hnathawhna lamah chuan in luah tur a duhthu chu a sawi ve zauh zauh a, an lo ngaihven pui bawk nen, helper ve tho, a thawhpui Puia hnen aţangin in luah tur a hre hlauh,  chumi zan chuan an zanriah ei laiin in luah tur a hmuh thu chu a sawi a, a nutei te nupa pawh chuan an lawmpui thiam ve viau, in hrang an luah hnu-ah pawh harsatna leh manganna an neih chuan bia a tlawhpawh zel turin an inchah a, a hnathawh loh ni, Pathian ni ah chuan Puia kawhhmuh, in ruakah chuan an invawmlut ve ta a, a nau te bulah pawh chuan theihtawpin a hrilhfiah ve, an chaw ei lai chuan an in luah aţanga hnaivai berah chuan a nau Fakzuali pawh sikul kal tir a tum thu a sawi a, mahse, amah Faki chuan a hnial tlat, a kut vang te chuan hmuhsitna tawh leh a hlau a, tin, an naupang ber chu sikul a kal san chuan engtinnge a lo awm chuang ang tiin a u chu a kar ve reng.

Msa pawh chuan a ngaihtuah a, a nau Faki chuan sikul kaiin lehkha zir pawh ni se hmuhsitna a tawh chu a hlauh pui, tin, Faki sawi angin an naupang ber Ziri chuan awmtu a mamawh ve tho si nen a nau pawh chu a ti lui ta lo a. Faki chuan Ziri a awm ţhin ang a, ani erawhin inhlawhna a hmuh ang angah a thawk zel ang, Ziri leikan ve hun-ah erawh naupang dang anga sikul kal tir a, sang tak thlen tir chu an tum unau ve tawp rih.

Chutiang chuan mi inhnuai zim te mai chu Saron Vengah an luah ve ta a, a nutei te erawh kha chu Bethlehem Venga awm an ni thung, an inhlat lo naa, Aizawl chu Aizawl nge nge, intlawhpawh a lo har a, Faki chuan Ziri chu a lo awm ţhin a, chhun rilţamah chuan wai wai pakhat an lei a, an chhum ve in chaw ţhing nen an ti ve thei mai zel, Gas an nei lo a, an khaw lamah pawh khan an nei lo, mei thuk an hmang mai zel kha a nia, current thuk neiin a chak ţha bawk a, tui lumna hot pot an nei bawk a, an buai em em bik lo, ţhutthleng sei un ve tawh tak pahnih, ţhutna dup pawh pawr pawp fap tawh hi an nei ve a, zin bag ang chi ah an thuam chu an dah mai, an still almira neih ve kha chu ken kual lû lû a rem lo bawk nen an Aizawl chhuk hma-i n tlawm te-in an ti ral ve kha a ni a, an in chu a kawrawng viau mai.

Mahse, in chhung bungraw ţha an neih loh vang chuan an lungngai rih lo, puar khawp ei tur leh in luah man, electric bill leh tui bill te an nei thei a, an hautak hran lo bawk.

Ziri chu a khirh ve fu na-in an harsat a hrethiam ve reuh nge mawni dawn ni. A khirh zual lutuk erawh a reh ve a, a tlei ve naw naw thei zel.

Msa chu a taima bawk a, a hnathawhna te chuan an duhsak viau, ni khatah anni ang helper chuan cheng 550/- an hlawh a, a tlangpuiin hmun danga thawk chuan chhun lam eitur dawngin 500/- an hlawh ţhin a, anni erawh chuan tiffin paiin an chhun thingpui in na man ve aiah cheng 50 an belh thung.

Buhfai lah nise an ţhenawm te ration lak te tlawm te-in an lei chhawng ve ţhin a, thlaphangin an awm lo, khum hun tur an nei lo a, an mutpuan neih ve ang ang te chu phahin an unau thumin an mu mai zel, an mut pindan ve lah chu puana zarhliah mai chauh a ni a, kawrawng viau mah se ei leh in tur an la nei ve zel a, an lawm tawk viau tho.

Chutiang chuan hun an hman bek bek laiin Msa chuan vanduaina a tawk hlauh mai a, an Beam chhunna lamah a dinna rap lekin a tla a, sang tak a ni lo naa a insawh fuh viau nge a ke a tliak tlat, hna han thawhpui chi ziazang ni hek lo, in lamah a awm tawp a, a thawh ve tawhna neih ve chhun chhun lah a thawh zawm theih hmaa an ei leh in manah a ti ve bawk si, Damdawi in pawh pan buai lem lovin an vengchhunga mi hmet thiam pi Dari chu a pan a, ani chuan hmeh sakin a dam har a rinloh thu a hrilh a, ani rei lo tih erawh Msa tan chuan rei tak a ni. Kar hnih ngawt tal chu a kal thei lo a, zunram a thiar dawn chuan Faki'n a kaikuah mai ţhin, an sum neih ve sa a en ţhin, a beitham si, chuta karah zankhat an mu chu hlau tih hriat tak hian Ziri chu a rak chiam a, hawi kual ruaiin a ţap ngak ngak reng. 

Mangchhia a mang ve a nih ringin an han kuahin an han thlamuan ţhin, hlauh nei ni awm takin a awm tlat mai si a, a bang ve dawn ta nia ngaiin an thaw huai ţhin, mahse, a ţap reng mai si a, 'ka hlau, ka hlau', a tih bak a sawi si lo. A nu thlâ-in a tlawh a ni ang a tiin an han ring ve chhin ren rawn bawk a, mahse, 'ka nu', tia a'n han koh pawhin engmah danglam anni chuan an hmu si lo, an mangan em em lai chuan an inchung pa a lo chhuk hlauh, an inchung te hi nupa reka awm an ni a, an in au pawh ve reng ţhin, a bangbo ve viau a, a nupui a han ko ngawt, anni lah naute la nei lo tih takah an bangbo ve viau tho a, an han ngaihtuah ve ngial hnu-ah Msa te inchung pa chuan damdawi in kal a rawt ta a, ani hian mi Taxi khalh hawhin a kawl nghal mai zel nen a taxi hmang chuan Civil Hospital lamah an inphur chho ve ta rawih a, Doctor te chuan damdawi hmangin an lo chiu a, tui takin a muhil ve siai siai. A ei tur damdawi pathum an lo chawh bawk a, thaw deuh huaiin an haw ve ta a, an han mut fel leh meuh chuan Msa chu a mangang takzet ta.

A pawisa neih sa lah Ziri damdawi manah an hmang a, eng hmeh nge an ei tak ang le, cheng 500/- zawng chu an kawl sa a ni ta mai a, a hui pup pup reng mai, muthilh chu khawi lam, a nau te pahnih tui taka muhil chu thlirin a rilru-ah chuan mahni nunna lak mai te chu a lang vei ut ut a, mahse, thi ringawt sela a nau te chu engtinnge an awm ang? Faki lah chu ramtuileilo, rilru a midang pha zan lo a ni a, Ziri lah ţawngthei ve tawh viau mah se mahni chauha nilenga han awm lah a thei dawn chai si lo. 

Taksa hliam bawk, rilru dam si lovin chu zan chu a hmang zo ta mai a.

Zing khua a lo var pawh chuan eng tehchiam mah a ngaihtuah chhuak chuang lo, a rilru a siam a, a nutei te chu hreh hle mah se tihbuai chu a tum ta ngawt mai a ni.

An chhungkaw phone neih ve chhun, a nu in a thihsan tak chu a ban a, a nutei chu a phone ta ngawt mai a, mahse, a nutei te chuan an haraat thu hrilhin an lo pui thei bik si lo.

A harsatna chu a thawhpui, an inluah tur pawh kawhhmuhtu Puia chu phone hmangin a hrilh ta ngawt a, ani chuan eizawnna ţha tawk tak mai, pawn lamah pawh chhuah buai ngai hran lo a hriat thu a hrilh a, Msa chuan a bengkhawn viau a, a ha lang ţhâtin a nui ve hial, mahse chu hna chu damdawi a tel tlat.

Mi titi aţanga a hriat ve danin damdawi chu a zuar a nih chuan man a tawk ang a, an khawtlang hruaitu te'n an hnawhchhuah a, tun ai maha an baihvai a hlau si, kawng dang a en ţhin, a ping vekin a hre bawk si.

Puia chuan a sawimawi thiam viau bawk nen, an in-ah leng lut satliah angin damdawi rawn dahtu an awm ang a, chutiang chuan in lama lenglut ve tho dang te hnenah chuan damdawi chu a lo pe ţhin dawn a ni. A nu in a fuih ţhinna thu chu a hre chhuak iar iar a, 'eng anga kawng bumboh leh harsa pawh zawh mah ila, midang nun tihchhiat theihna leh mahni nun chhiat vek theihna chu tih loh hram tur a ni.' Tiin a sawi ţhim. Damdawi a zuar a nih chuan mi fa duatlai te kha tûr a pe reng ang a, amah lah thinthi in a awm thei dawn lo tih chu naupangtê mah nise a hrethiam ve tho, mahse, 'ka ke a nat chhung, thla hnih bawr vel ti ila, hna ka thawh theih veleh ka bansan mai ang, chutih chhung chuan fimkhur takin ka che ang a, ka nau te pawhin an hre tur a ni lo. Tichuan ka dam veleh a hma ang khan ka inhlawh leh ang a, nun pangngai tak kan zawh leh ang', tiin thu a ti tlu ta a, a kawng thlan chu dik tak maw!

Chutichuan hun an hmang a, inleng an nei fo mai chu Faki chuan mak ti ve ţhin mah se damdawi tih an lamrik ţhin vang chuan a u chuan damdawi ruih chi a zuar tih a man lo! A u hrilh danin damlo te dam na'n damdawi a la a, a zuar leh ţhin tih chu a ring mai, lu na leh khawsik vel a neih changa a a u Msa hnena damdawi a dil erawh chuan an damdawi zawrh ni lo, damdawi dang a pe ţhin a, mak chu ti ru ţhin mah se engmah a sawi bik lo.

Mahse, inthup theih loh chen a lo thleng a, man an tawk ta hlauh mai, nasa taka ngaihdam a dil hnu-ah leh ti leh tawh ngai lo tura a intiam hial takah chuan Saron Veng hruaitu te pawh chuan lungdam lo ru tak chungin an ngaidam a, Msa pawhin khawih chhunzawm a tum tawh bik lo.

A hnathawh bawlhhlawh ru tak aţanga a khawl ve sa te chuan Chawhmeh te khar chhawngin an vengchhungah chuan Faki chuan a zuar kual ve ţhin a, mahse, naupamg ve tak, kum 14awrh a ni bawk nen chutianga chawhmeh a zuar kual chu a zak ru ţhin, a rualpui te chu sikul kaiin nitin an nu leh pa te thawhchhuah ringin an khawsa a, hlim hmel takin an nui ţhin, an vengchhunga sikul ah te chuan a zuar ţhin a, chu Sikul a zirtirtute chuan an lo dawr ve fo, ani tan erawh lungchhiatna, rethei bik nia inhriat na te, inkiltawihna te a piang lo thei ta lo, a u hnen-ah chuan a thiam ang tawkin a vui ve fo ţhin a, Msa lû a hai ţhin teh e.

Mahse, 'Mate, keini chu nu leh pa kan nei lo a, ei leh in kan hmuh ve na atan hetia kan khawsak hi a ţul si a, chhel takin awm rawh aw', tiin a fuih ve ţhin, chutianga a fuih chang chuan Faki pawh chu a lung a awi chhawm ve leh mai zel a, a u ke dam hun chu a nghak ve ngat ngat mai a ni. Msa pawh chuan dam vat a duh a, ruh tliak a nih vang erawh chuan duh ang thala khawsak pui a har a, mahse, rilru leh taksa in a tum ve em avangin a kal luih pui ve thei fo tawh mai. Nitin amahin a. j chhung dungah chuan Faki puihna tel lo pawhin a tei a tei ve thei tawh a, hna thawh zawm leh chu a rilruk ta a, la kal bai deuh mah se a ti lui thei phian.

Natna nei ta na nâ na chuan a thawhpuite a phak loh chang a tam a, a lakah ţha ţhin viau mah se tha thawh hlawk thei deuh chu, sum sen inang rau rauh a thawhna te pawh chuan an lo thlang a, an iai a nih ber chu. Hna nei lovin a aam chu a ni ve leh der mai. A kal te lah chu a bai suih suih reng a, zah lamah cuan zahna a nei lo, a vanduai vang a ni miau a, mahse, a thinlung rûm ri erawh chu darkar tin mai hian a ring a, amah lah chu a sa a ţhat loh sa nen rilru hahna in thunun miau hek, a cher zual kawk kawk mai bawk a, inthiam lo viau mah se a hna ngai bawk, damdawi vawrh chu a tum leh ta!

Veng danga an awmhmun pawh chu sawn mai turin a ngaihtuah a, man an nih leh hlauh chuan nasa lehzualin an mualpho dawn tih a hai si lo. Tichuan Tuikual vengah an in luah hmasa aia te mahah chuan an invawm lut leh ta rawih a, amah dawr ţhin tute biahpawhna tur a nei bawk nen hui ru pap pap chungin a hna ngai bawk chu a chhunzawm leh ta, hna rum lutuk lo, rit chawi leh kal kual sek ngai si lo chu a dap ve pah reng a, vanneihthlak takin Temple sir lawka thingpui dawr tereuhte ah chuan eisiam tu tur an duh hlauh. Choka-ah awmin ei a siam ang a, vei leh tei reng ngai a ni dawn lo bawk nen amah pawh a phur viau, menu pawh an ngah hran lo a, chow leh rice bakah Sachek, Bawngsa soup nen, chang tlemazawng nen chuan a ni mai a, eisiam lamah thiamna nei sa lo mah se a huphurh hran lo.

Tichuan a thawk ve ta a, mahse, thil hi a lo darj chak khawp, bazar veivak leh mi chitinin an dawr ve ţhin an nih avang chuan amah pawh chu an veng hlui lam ami te'n an hmufuh fo a, a damdawi lo vawrh ve zauh chu a thawhna te chuan an hre lo thei lo a, sawimawi tum tak si, rêl hmingpu si chuan an hrilh peih bawk nen rei pawh a thawh hma-in ban a ni leh ta.

Chutiang reng reng chuan hna hrang hrang a thawk kual a, a ke lah chuan bai hlen a tum nge nâ a awm tawh loh hnu-ah pawh a la kal bai fo bawk si.

A hnathawhnaah chuan taima in ţhahnem ngaih pui viau ţhin mah se, a mangan lutuk laia kawng awmchun nia a hriat, a dandawi vawrh ve zauh chuan a umzui zel a, a zawmthawt vang ni hauh lovin a hna ngai chu rei a chelh thei lo ţhin.

Mi hnuaia va inhlawh kual ai chuan an in luah lama eisiam a, an pack fel hnu-a zawrh chhuah chu a tum ve ta a, chu aia ţha kawngdang a hre lo, mi in-ah lut kualin chow leh rice chauh chu an zuar kual ve a, hah mah se an eizawnna a nib ve tak avang chuan sum a lut a, a hlim ve viau ţhin.

Chutiang hlir mai chuan an khawsa ta a, hun a liam a, kum a vei ve ta, Ziri pawh chu sikul kai rual a ni ve ta bawk a, Mary Mount ah chuan an luh tir ve ta a, test ngai neuh neuh te laltlang ve-in Kg1 ah a kal ve a, ama tawkah a hlim ve ţhin viau, a duhawm a, a nui ver ver ţhin, a u te pahnih, Faki leh Msa ang lo takin a ngo ver mai bawk a, duhawm an ti ţhin hlawm hle. 

Faki chuan Ziri chu a sikul kal naah a hruai ţhin a, Tlangnuamah daih a kal vangin tei sek ai chuan tiin a nghak tlang mai ţhin, veng hla tak tak aţanga naupang hruai ţhin dang pawh chuan an nghak ţhin a, a ţhenin tiffin paiin an rilţamn an phuhruk ţhin a, a ţhen erawh thingpui dawrah an inhnawhpuar ţhin, naupang sikul kal nghak ho chuan an tiffin pai te chu an insem ve liam liam ţhin a, Faki chuan ngaihdan neiin a u a hrilh a, a u in a siam a, a zawrh kual bakah amah chuan pack fel sa-in a keng ang a, chung naupang nu ho hnenah chuan zawrh a tum ve ta a, Msa pawhin a lo pawmpui viau.

Tichuan manganna em em tawk tawh lovin hun an hmang a, ţumkhat erawh Faki chu a khawsik a tlun hluah vangin Msa chuan damdawi a ei tir a, in lama lo awm tur leh a thawh kân peih tak hlauh chuan chow leh rice-a an phul tur sa te lo chhum a, lo sawngbawl tur chuan a ti a, amah Msa chuan Ziri chu a hruai ve ta a, Faki tihdan fo chuan ani pawh chuan zawrh tura an pack sa rice leh chow chu a khai a, a nghak ve ta ran a, lo ţhut ngawt aiah tiin Ziri sikul kalna hnaivaiah te chuan a kal kual pui pah bawk a, chutah chuan a ni, a thinlung lalnu a tawn ve tak ni.

An dinhmun leh khawsakin a zir miau loh vangin ngaihzawng lam a lo ngaihtuah hman ngai lo a, a muthmuna hmeichhia a ngaihtuah ve chhun lahin insitna hlirin a bawm ţhin, a thawhrim vangin a thû thalh a, chu chu thuhran, an chhungkaw dinhmun a ngaihtuah chang phei chuan tumahin an duh ve a ring ngai lo kha a ni a.

Ziri te sikul bang lo chhuak chu lawm takin a lo nghak a, Zori chu amah ang zet mipa naupang nen an rawn inkai chhuak a, chu naupang nen chuan an rawn hlim hmel hle, a nau hlim hmel a hmuh chuan a lawm em em a, tute'n emaw anmahni lo hrechiangin, an dinhmun vang chuan Ziri chuan hmuhsit leh diriam a tawh a hlau a, mahse, buaina a la tawk lo a ni mahna le.

A nau rawn kaih chhuah mipa naupang chu a lo melh a, Faki a ngaihtuah ve bawk nen haw pui vat a tum a, mahse, mipa naupang chuan hruaitu a nei lo nge, a la ding reng, chutiang ngawt chu tiin mipa naupang chu a hnaih a, a hming te zawtin a kawm a, a chhungte an lang ve lo em ni tia a zawh vel mek lai chuan hmeichhe aw nem tak mai hian, 'Bawihpui', a rawn ti, chu aw lo chhuahna lam chu a en a, mipa naupang lunghnur hmel tak pawh chu a hmel a eng sawt sawt hian a hriat.

Chu nu chu la naupan hmel ve tak a ni a, amah en chuan Faki nen an inrual vel a ring, a rawn ri chûl a, chhungkaw buaina vanga a tlai deuh thu sawiin Msa chu lawmthu a hrilh a, lawmthu sawina tur khawpa thil ţha a tih loh thu sawiin lawm takin a lo chhawn a, tichuan hlim takin an inţhen ta a, zan lama a muthmunah pawh chuan vawiin a nau rawn hruai tu hmeichhia mawlh kha a ngaihtuah, a bialnu han ni mai se tiin duhthu a sam ve hial a, mahse an dinhmun chu kar lovah ngaihtuah chhuakin a lu a thing deuh nawk nawk, a muthilh theih mai loh avang erawh chuan a lo mitthla leh ţhin, ka muhil thei chuang lo ti rilru in a tho a, a tuk lama a eisiam tur a telh tir carrot leh zikhlum te chu a nau te tihharh hlau tak chungin a chan ta mai mai a, kar lovah a mut lo chhuak ve in tui takin a muhil a, a mang lamah lah chuan hmeichhe duhawm zet, a hming pawh a hriat loh, a hmel pawh vawikhat chiah a la hmuh nen chuan an lo inhmangaih dun em em mai a, mang a zawnga mang nuam ber a ni ngei ang le.

Zingah chuan hma takah tho-in khawsak a rel a, engvang ber chu ni maw Faki khawsik lah chu nachhawkna in a chhawk chhung tih loh chu a awm zel a, khawsik satliah ang lo deuhin a tlun nghal zel nen, nachhawkna pawh an ei sang narawh e, chutih chhung chuan Msa chuan Ziri chu a sikul kal a hruai zel a lo ngai a, in lamah a nawm deuh changa a lo chet bak chu a u chuan chhuah phal hek lo, in-ah a awm ngawt ngawt mai zel, nitina sikul a kal ta na nâ na chu a vei ruk ve ngawih ngawih hmeichhia nen chuan an inhmu zing a, a hming pawh Lalmuanawmi niin Muante an ti mai ţhin, Tlangnuam Venga khawsa an ni a, a nau hruai ţhin chu a u fapa a ni, zirlai a la ni a, mahse, sikul pangngai a kal lovin open in a kal thung, chhungkaw member panga zawng an ni a, a nu leh pa leh a u bakah, an naute Sawmzela chu an ni mai, Sawmzela nu, Muantei u neihchhun hian a bialpa lakah fa paiin inneih an tum a, mahse, an inneih hma-in a pasal tur, Sawmzela pa Rindika chuan natlawk pawh nei lovin a thihsan ta mai a, mipa dang pawh melh tawh lovin a fapa chu a enkawl ve tawp, sum leh pai lamah harsatna an nei lova, a nu leh pa te'n naute, pa nei lova awm ringawt tur chu ngaingam lovin mipa dang te an han melh sak naa, amah Sangpuii chuan a hmangaih em em, a pasal ang hiala a ngaih tawh chu uire san angin a inngai tlat, a ngaihven loh em avang chuan an nawr lui duh bik lo, fam hnu ngaiin a kûr ru ve fo ang le, Muantei chu a chhungte'n hnathawka an chhuahsan vek ţhin vangin ani chuan sikul a kai lo a, awmpui nula pawh nei thei an ni naa mi rinawm lo an tawng fuh zel a, pathum ngawt an la tawh, chuvang chuan an la duh ta lo hi a ni a, Muantei lahin sikul kal reng ai chuan open a zir theih tho chu tiin a hnial lo bawk nen chuti chuan an khawsa ho ve a ni, an inkawmnel chhoh takah chuan inngaihzawnna pawh awm hran lovin number te an inpe a, an chhungkaw chanchin te, an dinhmun te chu an sawidun ve neuh neuh ţhin, Msa ei tur zawrh te pawh chu a dawr ve ziah a, ani erawhin an veng a hla lo bawk nen, a u fapa chu nghak ve lovin an ban hun awmah a hruai mai ţhin, mahse, mobile aţanga inbia in an innel ve em em tho.

Chutianga an awm lai chuan zankhat chu Msa chuan call a dawng a, a duh ruk em em, phu lo nia a inngaih Muantei call ngei a ni, phur tak, phur surh anga lang hreh zet si hian call chu a pick-up a, mahse, Muantei ţap hlawp hlawp thawm a ni a hriat ni, a nghing lawih a, a hriatthiam si loh chuan Muantei ţap ri chuan a thinlung a ti na ve dawt mai, 'eng nge thil awmzia? I ţha em?' Tiin a zawt vat a, a aw chu a khur deuh bawk.

Engmah sawi lovin Muantei chu a ţap reng a, a hnu-ah chuan insum in, 'tal chhuah ka duh a ni', a ti ţiau mai, Msa chuan a hrethiam lo em em a, eng lak aţang nge talchhuah a duh ang? Sum leh pai-ah lungngaihna tur a awm lo a, lehkha zir thei lo khawpin a hriselna a panin a hre si lo, an inchhung lamah buaina an nei em ni tiin a ngaihtuah a, chutia a rilru in kiltin a dap lai chuan Muantei chuan, 'thih mai ka duh a ni', a rawn ti leh hlawl.

Msa chu a tho uaih a, a tuk lama titi dun turin a sawm ringawt, Muantei pawh chuan a dah ve mai a, a harsatna chu hrilh tumin thutlukna a siam a, a tum angin thi pawh nise a chhungte an bangbo lutuk loh na atana a thuchah hrilh turin Msa chu a duh a, a ring tawk a ni.

Tichuan Msa leh Muantei chu ngaihtuahna kawmin an tlaivar dun ţhak a, biak chu an inbe tawh lo.

Phak chualin an tho ve ve a, tichuan, Msa chuan a dan ngai angin a nau chu a hruai leh ta a, Muantei chuan Sawmzela chu a rawn thlah ve bawk a, mut a hmu ţha bik lo tiin dark circle pawh a nei râih, tichuan, 'kan in lamah', tiin a kal a, Msa pawhin a zui ve mai.

Muantei te in chu a zau nuam em em a, bungrua te chu changkang tak vek a ni.

Mahse, in enkual tura kal an ni tlat lo, Msa chuan, 'Muante, i sawi duh chu sawi mai la', a ti a, Muantei pawh chuan a aw a thian khar kharh, 'kei hi drugs addict ka ni', a ti a, Msa chu a nghing lawih!

Engmah a sawi lo naa a hmelah chuan mak tihna bak a lang lo, hul hakin Muantei chu a nui a, sawi zawm lehin, 'chhungkaw nuam tak ka nei a, ka nu leh pa te hian min hmangaih tih pawh ka hria, mahse ka nu leh pa te an ni lo a, kei hi fahrah ka ni, ka nu leh pa te ka hre lo a, fahrah in kawtah hnutchhiah ka ni. Tuna ka nu leh pa te hian ka u Sangpuii lo hi fa an nei thei tawh lo a, fa pakhat chauh chu tiin kei hi min la a, an lakah vui na ka nei ngai lo, min hringtu an ni-ah ka ngai ţhin a, mahse, vawikhat in ka tifai chuan an file pawimawh ho ka remfelna lamah fa atana min lakna lehkha ka hmu fuh a, khatih lai khan ka kehchhia, i hriat angin naupang te mai ka la ni a, kum 16 ka ni ve awrh, mahse, naupang engmah hrethiam lo ka ni bik lova, fahrah ka nihna chuan min tina a, ka u Sangpuii nen hian ka nu leh pa te hian min enhrang ngai lo. Min duat em em ţhin.'

'Mahse, fahrah leh falak ka ni mai chuan min tina em a, tichuan, mi tamtakin an rilru hah na chhawk na atana an tih ţhin damdawi chu ka ei ve ţhin a, ka damdawi ei hmanga mumang rama ka chen lai chuan nâ ka hre ngai lo, ka ti rei telh telh a, a ei chi ringawt duhkhawp lovin inchiu lam hial ka khawih ta, ka u Sangpuii hi Doctor a ni a, damdawi hi a kawl ţhin, damlo ho a enkawl na atana a tih, a pindana a dah hmang chuan ka inhrai rui ţhin. Ka addict ta hial a, harhchhuaka insiamţhat ka tum meuh chuan rei pawh ka la khawih loh, damdawi chu ka lo mamawh tawh, addict ka ni der tawh a nih chu.

Zan ka mu thei lo a, chaw lah ka ei thei lo, nitin chutianga awm ta na nâ na chu ka u chuan min man chhuak a, min zilh nasa, ţawngkam vin pawh a hmang chuang lo.'

'Ka tum phawt chuan ka nghei theih tur thu min hrilh a, ka nu leh pa hrilh hre kher lo chuan ka u min fuihna nen nghei ka tum ve leh ta, mahse a har takzet a ni. Chuta karah kei hian ka inchiu avang chuan natna ţha lo ka lo pai reng a, vawikhat ka syringe hmu zo lovin ka u room bawlhhlawh bawm ami chu ka hmang a, mahse, kha syringe kha a dam loh vanga ka u rawn inchiu tirtu hman kha a lo ni, kha pa khan chu natna chu a vei a, kei chuan a natna ka lo kai ta a nih chu.'

'Tenawmah ka inngai a, ka u hriat lohin ka nuam lo reng chu ka inentir, ka natna chu ka hre chhuak a, dam hlutna chu ka hria, HIV hlauhawm dan leh kan vei a nih palh pawha inenkawlna a ţhat thute chu ka hre ve lutuk naa, fahrah ka ni bawk, chuta kara damdawi addict, HIV natna kawl bawk nih chu ka ngam lo a ni, zan tam ka inngaihtuah a, thih mai hi ka duh a ni.' A ti chhuak a, a mittui tla mah se a ţap chhuak em lo.

Msa chuan han hnem vak dan tur chu a vài hle mai a, mahse, 'keini hi fahrah kan ni a, chutiang natna chu kan nei lo, tin, ruihtheihthil ka ti lo a, ka la ti chhin lo, ka pa hian zu in zauh a ching ve ţhin a, hrawn hrehawm chu ni lo mah se vawikhat a hnathawk chu a zu ruih vangin fimkhurna a hloh nge? A chesual a, lo a vahna lamah, a mau sah na lamah a chesual a, min kalsan ta mai a, sum harsatna te chu pa nei tawh lo ni mah ila ka nu in min enkawl a, ka hre vak lo, ka la naupang ve bawk nen, mahse, ka nu in min kalsan ve leh a, ka pa thih aţanga kum khat hnu lekah, ta ţang chuan retheihna awmzia hi ka hmelhriat a ni, kan chhungte lah harsa ve te te an ni a, eizawnna a awlsawm zawk na atan tiin Aizawlah ka nau te hi ka rawn pem pui a ni, ka hnathawhna lama ka chetsual vangin ka ke ruh a tliak a, tunah pawh i hria ang a, ka la kal bâi hi, ka nau ka rawn hruai ţhin lah kha naupang te mai a la ni a, kan milai lah a kanna lamah ramtuileilo a ni der mai si, a sikul kal na lamah hmuhsitna te a tawk ve a, amah hi mi â tih ka phal hauh lo na-in mi pangngai aia hniamna lai a nei ve a, ka ko-ah engkim a tla ta, sum leh paiah ka mangang chuan damdawi ka zuar ve hial a, mahse, man chhuah tawkin veng chhung aţanga hnawhchhuah chu ni hman em lo mah ila, kha thil, sumdawnna ţha lo ka kal pui chhung reilote khan ka nunah nghawng lian tak a neih zawm dawn tih ka hre lo, hna hrâm lutuk thawk thei ka ni ta lo a, a rem remah, thingpui dawr lamah te ka inhlawh ţhin.'

'Mahse, damdawi vawrh ve tawh ka lo nihna khan mi rinawm lo-ah min siam a, min ring zo lova min ban leh ta te pawh ka tawng ve nawk, ngaihtuahna dang neiin in lamah ei leh in ka siam ta a, tihian ka zuar a ni. Fahrahah pawh kan fahrah nih dan a inang lova, a daitu ka nih loh miau avangin i rilru puthmang ka rawn hrethiam kher lo mai thei, mahse fahrah nihna in thinlung a hliam theih zia chu ka hre ve a ni. Tizawng hian ngaihtuah la, thisenah in inzawm hauh lo, mahse, i sawi angin enhranna che an nei lo a, damdawi pawh nghei nghal hmak thei lo mah la i tum chuan i thei, i natna ang lah chu ka pai ve miau loh vangin ka hrethiam pha kher lo ang, mahse, insitna nei ve ve ah kan insit dan inang lo mah se, miin min thinhrik ai chuan mahni ngei inten hi a hrehawm tih erawh ka hrethiam.'

'I nu leh pa bakah i u chu hrilh la, theihtawp an chhuahpui che ka ring tlat a ni, tin, i u lah Doctor a ni a, hriselna a nghawng theih danah pawh midang va hriattir aiin a enkawl thei ang che, hmangaihna nen a enkawl bawk ang che a, mi pangngai aia sangaj i inhlan theih ka ring tlat, pasal pawh neiin fa te pawh awt ve ni la, damdawi hmanga inenkawl in i fa leh i pasal i kai loh dan kawng a awm tawh a, a tihdan erawh chu kei aia lehkhathiam leh doctor ni ngei i u bawkin a hria ang, mihring hmelma lian ber chu keimahni kan ni a, mahni nunna pawh hlut zo lova i awm tak miau chuan, i rilru hliam hi a na tawk viau tih lah sawi ngai lova chiang a ni. Kei chuan beidawng turin ka duh lo che, i nun a thil thleng zawng zawng ka hre lo a, kan natna pal leh kan dai chen lah a inang hek lo, mahse kei chuan, beidawn hi ka tum lo, beidawng tur hian huaisen a ngai tih hi ka ngaihdan a ni a, thi pawh ni la engtinnge i awm ang? I inpek pawh ni hauh lo, sum tamtak pawhin a lei theih loh i nunna kha hlut hram rawh.' Tiin a thiam ang tawkin a hrilh ve mawlh mawlh.

'Ka chhungte hrilh chu ka duh ve lutuk, naupang chhe lutuk ka ni tawh bik lo a, ngaihdan nei hrang thei pawh ka ni e, mahse, fahrah, an falak hi min hmangaih pawh nise ka natna pai hi an pawmzam thei ang em le? Sawi dan vak ka thiam lo a, ka hlau a ni, ka hmangaih leh min hmangaihtu te hian min sit ka hlau a ni, keimah ka insitna pawh a nasa tawh si a, ka tuar zo lo ang', tiin Muantei chuan a sawi ve leh a.

'Mihrang daih, kei pawhin beidawng tura ka duh lo che a, thinhrikna che ka nei lo a nih chuan, nangmah hmangaihtu che i chhungte hian an sit che in ka ring lo, an thinlung chu a na ngei ang le, mahse, hna sang tak chelh an ni a, mi â an ni lo, an hethiam in an enhran phah che ka ring lo a ni', Msa chuan a ti leh a, an titi chhung a rei bawk a, an nau te ban a lo hun reng tawh mai, an nau te hruai tur chuan an chhuk ta a, an sawizawm tawh lo.

Tichuan Msa chuan Ziri chu in lama a dah hnu-ah, a inzawrh kual hman loh vanga a ei tur siam la awm râih chu la in a zuar kual leh a, mahse, vanduaina dang bawk a ni.

A kawng kal lai chu car hian a su hlauh mai, a su tu chu hmeichhia lehnghal a ni, Msa chuan nikhua a hre lo nghal a, mi an tlankhawm ţak ţak hnu-ah ro an han rel a, damdawi in lamah an sutna motor chuan phur ta vat a, a sutu chu tudang ni lovin Sangpuii, Muantei u chu a ni reng mai, a nau message a hmu a, a hna laklawh tlansanin hmanhmawh takin a inkhalh haw a, Msa kawng kân tur kha a tum lawk ni hauh lovin a su ta a ni, a thawhna damdawi in, Civil Hospital ah chuan a phur vat a, hmanhmawh takin an lo buaipui bawk.

Ngaihtuahawm em em ni lo mah se a lû kha a insawh na lamah a hliam a, chu chuan nikhua a hriat loh tir ta a ni.

Tunge a nih an hre si lo, a kekawr ipte te an han check ţhin, a ID vel an hmu si lo, a phone chu an hmuh chhun a ni mai a, a chhungte emaw han phone an tum a, a lo in lock lo hlauh, a contact list te en-in phone kual an han tum a, 'U Gary-a' ti-a a save chu an han phone a, ani lah chuan an inhnuai an luah ţhin a, mahse, vengdangah an insawn thu a lo hrilh, Tuikual veng tih chu an hre thei ta a, an phone neih chhun tiin a chhungte biak pawh theihna a lo nei si lo, Sangpuii chuan Tuikual a zawn tawp mai chu a rilruk a, mahse, Msa enkawltu chuan a harh vat tur thu a sawi a, va phek zawn chiam lah khan Aizawl te zawng, inhre sa nih lem loh chuan ţhenawm hnai lawk te pawh an inhre lo fur a, a harh hun nghah mai chu a rilruk ta a, darkar khat awm vekah chuan Msa pawh a rawn harh ve mai bawk.

Tui te pe-in nâ a neih leh neih loh an zawt a, a lû chu a nat deuh thu a sawi chuan Doctor chuan damdawi a pe a, Sangpuii chuan a be vat, a chetsual palh vang liau liau a a sut thu te sawiin a chhungte biak mai ngaihna a hriat loh thu chu a sawi a, Msa chuan a pawi loh thu sawiin, 'chetsual palh te chu awm thei a lawm tiin a hnem let zawmah a, an bul lawka Doctor coat fual ha chu melhin, 'Doctor, ka chhuak nghal thei ang em le? Ka nau te ka ngaihtuah a, ka nau chiah a dam meuh si lo, Ziri lah naupang tetakte mai chauh a la ni si a, min ngaihtuah ve dawn em mai, ka chhuak nghal thei ang em le?' Tiin a bia a, Doctor pawh chuan a chhuah theih thu a hrilh ve mai bawk, damdawi erawh a pe a, senso ngai ang chu Sangpuii chuan a pe thung a, thlah haw pawh a tum.

Tichuan, Msa chuan hnial a tum zet naa, Sangpuii inthiamlo hmel chu man thiamin a thlah chu a remti a, Temple ah an inthlah hnu-ah an inkalsan ta a, harsatna dang, a hkiam tawrh vanga a neih chuan amah be tura hrilhin Sangpuii chuan a number a pe ta a, Msa pawhin a la ve mai bawk.

Msa lu tuam lûk mai leh a pilh phung an hmuh chuan thil awmzia an lo zawt vat a, 'ka tlu palh a lawm le', tih bak a sawi lo thung.

A lu na chuan a tur deuh avangin nachhawkna, Doctor in a pek chu a hmawm a, zanriah pawh ei lovin a tlu zal nghal, a phone ah chuan mesaage a rawn thleng a, number lawng a ni.

'Eng nge i an? I ţha em?' Tih hi a lo ni, amah sutu kha a ni tih a hria a, 'buaina ka nei hran lo e', tih chu a thawn let a, amah sutu dp chu a ensak a, Sawmzela, Muantei hruai ţhin thlalak chu a lo hmang. A about chu a en a, 'ka rohlu' tih a lo hmang bawk a, Sawmzela chu a ni chiang mai tiin a ngaihtuah a, a number lah chu Muantei û hming angin a save si.

'Ka tihpalh aw, ka tumluih a ni lo a nia,' tia thupha a rawn chawi leh na chu, 'i thlalak hman hi i fapa em ni?' Tiin a va chhang a, 'aw, a nih ve hi', a rawn ti ve mai.

'Anih chuan Muantei u, Sangpuii ini maw? Doctor kha', a ti a, Sangpuii chuan mak ti hmel rak emoji a thawn hnu-ah, 'aw ni e, mahse engtinnge min hriat?' A ti hâ mai.

Msa chuan an inhmelhriat dan sawiin, 'a ngui hmel ţhin lutuk a, harsatna a nei a nih ka ring,' a ti a, a hriatthiam a ring, mi â a ni lo tlat a.

A mesage chu seen a nih hnu lawkah call a dawng nghal zat a, 'nang hian thil hriat i nei, ka nau chungchangah hian,' a rawn ti deuh hmuk.

'Ni e, amah Muantei min hrilh chin chu,' a ti ve mai a, an ngawi vang vang, 'naktukah ka rawn kal ang', tiin Sangpuii chuan a thlah a, Msa pawhin aw a pawh ve mai.

Zing khua a var a, tukţhuan te an han ei a, dan ngai te-in Msa chuan Ziri chu kal thei lo tawp a ni lo bawk a, nachhawkna eiin a nau chu a hruai thei mai, a zawh loh a hlauh deuh vangin Bus hmanga kal lovin Taxi erawh a hmang thung, thil han zawrh kual chu a zuam lo deuh a, bakah, eitur pawh a siam peih meuh lo nen a awl ve ringawt rih, in lamah haw in a mu zal a, thil tamtak a ngaihtuah.

Sangpuii nen chuan inbia in an awmna lai tak te a hrilh a, tichuan an inhmu ta.

Muantei thil sawi ang ang chu a hrilhchhawng a, Sangpuii mitmengah chuan rilru natna a lang.

Mahse, 'thisenah kan inzawm lo tih chu ka hria, kan inthlau a, ani kum 16 a nih mek laiin kei chu kum 26 ka ni tawh, kum 10 in kan inthlau a nih chu, ka nu leh pa te'n ka nau tia an rawn hawn chuan ka la hrethiam chiah lo a, mahse, ngaihtuah nachang ka hria a, amah ang rual ka nih lai vel hian zawhna ka ngah, ka nu leh pa te hian min hrilhfiah ta a, ka lainat em em, ka nau diktak angin ka pawm nghet hmiah a, chutiangin ka nu leh pa te pawhin, a hriatchhuah chuan a nat lutuk kan hlauh vangin kan zep thung, mahse, midang kâ aţangin a hriat palh hlauh chuan tiin zep hlen erawh kan tum bik lo a, kum 18 tal han tling phawt se tiin kan la thup a, mahse, a lo hrechhuak hman a ni.' Tiin a sawi a, a hmel landan leh a kamchhuakah chuan dawt a tel-in a hre lo, amah Muantei pawhin a sawi a, Sangpuii nen, tider hmel an pu lo ve ve.

'Tunah hian a damdawi tih leh a natna hi ka nu leh pa te'n an hre lo a, nizanah ka kiangah ka riah tir a, min hrilh vek a ni, doctor ka ni a, ka nau natna chu ka hria, enkawl pawh ka inhuam, a rilru nâ erawh enkawl dan ka hre lo a ni. Fuih hian awmzia a nei ang em? Mahni leh mahni insitna hian a tichhe mek a, siamţhat theih loh khawpin a kehsawm ka hlau a ni.' A ti a, a mittui a tla, a hmangaih em em a ngaihtuah chhuak a, a rilru hahna te chu a hnena han thlen a, ani'n hnem na atan a kuah te chu a thlahlel.

'Hmangaihtu a mamawh ber', Msa chuan a ti sup a, sawiduah lo mah se Sangpuii pawh chuan a hrethiam, 'a rawn biak che pawhin lo fuih ve zel rawh aw,' tia inthlah in a hawsan a, amah kan na atan pawisa a pe bawk, Msa chuan ţul ti lo viau mah se a hnawn lui tlat mai a, a la ve ta nge nge a.

Zan lamah chuan Muantei te in chhung a khawsa ho, Sawmzela tih loh chu an ngui nghiai a, a chanchin chu Muantei'n a hrilh a ni, pu Ruattluanga, Muantei pa chu a thin a thawk phut a, Muantei chu a beng nghe nghe, a nupui, Nu Ramtei erawh chu a ţhu ngawi reng ringawt, Sangpuii chuan a pa chu lo dangbetin a khap a, insum takin Pu Ruattluanga pawh chu a ţhu ţha ve leh mai, a reh dâk a, 'a va pawi tak em', tih bak sawi tur an hre lo tlang.

Sangpuii chuan Muantei thlavang chu hauhin a natna chungchangah te, a ruihhlo khawih ţhinah te pawh chhungkua an ţanrual chuan hmeichhe zahawm tak a la ni thei a, a la tlai loh thu te chu Muantei fuih pah ni bawk, a nu leh pa te hrilhfiah tum ni bawk chuan a sawi kauh kauh a, an sa phat a reh ve ta bawk a, pu Ruattluanga chuan a ben avanga Muantei chu ngaihdam dil supin a ding hluai a, ţawngţaina hun hmangin Pathian hnenah an chhungkua chu a kawl tir a, kal dan tur an thiam theih na'n te leh Muantei tan bik tak pawh a dil uluk hle.

Tichuan, buaina em em tawk lovin an inenkawl chho ve zel a, a buaipui thiam ber a ni bawk a, Sangpuii chuan chawlh la-in Muantei nen chuan an awmdun ţhin a, Msa pawhin chanchin te a rawn zawt ve ţhin, inbe chho zelin Msa leh Muantei chu an inngaizawng ve ta hial a, an chanchin erawh Sangpuii chauh chu an hrilh, a hriat tirh chuan Sangpuii chu a lawm ve hle a, a chanchin hre reng chunga Msa'n a nau a lo hmangaih ve hle chu a lawm rualin thui tak a ngaihtuah ţhin, nakin zelah, nupaah pawh insiam dawn se amah, Msa chuan a iai leh mai a hlau a ni, amah ngei pawh chuan Msa chu a titipui fo a, Msa chuan, chutianga Sangpuii'n a biak fo takah chuan, 'ka pawm thlap, Muantei hi ka hmangaih niin ka hria a, amah ka hmangaih a nih chuan, kha a natna pawh kha ka hmangaih tur a ni, amah ngeiin min phatsan a nih loh chuan ka vuan tlat ang', a ti ţhin a, a ngaihdan diktak a ni bawk, tunah chuan tlangval pangngai a ni ve tawh a, a dinhmunin a zir bawk a, a puitling viau.

Sangpuii pawh chuan Msa chu fel a ti em em a, amah ang hi a ni mipa diktak a lo tih ţhin, a hmangaih em em, boral ta chu a hre chhuak ziah a, Msa nen hian an inang a ti, an rilru puthmang pawh a ngil dun a ti ţhin.

Mahse, a mak khawp a, engtin emaw pu Ruattluanga leh pi Ramtei chuan an fanu leh Msa chanchin chu an hre tlat, an fanu hmangaihtu chu an duh ve tlat lo, an chhui a, a nunhlui, hun reilote chhunga a damdawi vawrh ve chu chhuanlamin Muantei nu leh pa te chuan an khap tlat!

Sangpuii leh Muantei chuan an nu leh pa te chu theihtawp chhuahin hrilhfiah an tum ve ţhin a, mahse, a sawt lo kher mai, Muantei chu a nguai em em reng a, Sangpuii hian fuih ngat ngat lo ee zawng, a nun hi a chhat duh tawh hial ang le, Muantei hnena an inkawp an remti lo tih an sawi mai an duhtawk lova, Msa chu an in-ah va lenchilhin ani chuan puitling takin lo dawngsawng mah se.

'Fahrah rethei, kebai,' an tih leh a nau, a hmangaih em em, Faki'n mi a an phak lohna hmanga hmuhsitna ţawngkam a dawn chuan mipa rilru a dêng na teh e, a rilru a siam fel a, vawikhat te mah hi Muantei a biain a ngaihsak tawh lo ang tih hi.

A be duh ta hauh lo a, a simcard leh an inluah pawh a thlak, chu mai duhtawk lovin, Ziri sikul kaina pawh a sawn ta vek a, an harsa bawk nen, thla tin luh man chawi ngai leh fees eng engemaw tam ve bawk a, Sorkar sikul ah a luh tir ta a, a eizawnna ngai chu chhunzawm leh mah se Muantei hmuh turah a inlâr ngai lo.

Chutih lai mek chuan Muantei erawh rilru na em emin hun a hmang a, a hmangaih em em biak ngaihna a hre si lo, a u Sangpuii khawngaihna dilin an chenna in te an pan, an insawn thu bak an sawi si lo, chuta karah a natna in a hmet chau a, a la pawm thiam lo viau, a hmangaih vang leh ama tan ni bawk a dandawi nghei tum lah chu, a dap ruai reng a, mi â ang maia khawsak chang te a nei ta!

'Inthil tih pawi zia hi inhria em? Mi â ah ka nau hi inchhuah a nih hi, Msa hnena inthusawi kha hre ngat phei se chu, hmelma enin a en ang che u', khur hlak hlak chungin Sangpuii chuan a nu leh a pa te chu a en ngar a, a tha nat lutuk vangin a mittui a tling pam hial mai.

(Kum sawm hnu-ah chuan)

'Kebai mai mai, ka nunah inrawlh suh', titu a nau, a hmangaih em em, amah vanga zah pawh dâwn zo lova khawlaia a eitur siam ang ang a zawrh ţhinna chhan, a lo innghah ruk ve ngawih ngawihna chu a en ţhin, ani lah chuan huat hmel takin a bia a, Msa chu a ding khawng lah.

'Ziri', tih bak a sawi thei lo, mipa biangah mittui a luang a, Faki chuan ding chungin, 'Lalnunzir, i zak hauh nange, nang vanga ka u tawrhna hi', a lo tih ve ţhat chuan, 'piangsual pahnih', tiin ngeiawm takin Ziri chuan a chhang leh hmiah!

'A tawk e, i duh chu um la, vawikhat mah rawn let tawh suh, humsual i dai hlaua ka fuihna che pawh huatah i la ta maw, i hlimna tur nia i hriat kawng chu zawh la, kei leh i u hi chu min rawn ngaihtuah tawh hauh suh Mate, dam takin le', Msa chuan a aw-a rilru natna thuk tak lang chhuak chungin a chham chhuak a, Ziri meuh pawh a meng dul deuh, mahse, tleirawl nun a chen mek a, a tan hmangaiha zilhhautu chu hnawksak a chang tlat miau a, nakinah inchhir tak maw?

Amah vanga a u thawhrimna te chu haiderin, a u kebai vanga a ţhiante hmuhsitna ţawngkam chu a hmu lian a, a kal ta.

Faki muhil hmel chu a thlir ngawih ngawih a, a nghawnga a valh fel diam tawh a hruihrual vawn chu a en leh ţhin, a biangah mittui a luang a, diktak chuan, amah Ziri ngaihtuah lo nise a ke hi a enkawl dam thei, sum a ngai tam em mai pawh a, a neih ve ang zawng zawng chu mahni inenkawl damna atana hmang phal lovin a nau te mamawh leina atan a dah ve kauh kauh kha a ni a, engvanginnge a hmangaih nu leh pa te'n, a kebai nihna leh a fahrah nihna hmanga an hnawl hnu pawha, a nau ngei mai, a thisen zawmpui ngeiin amah hmuhsit leh diriamna atan a hman khum leh kher ni!

A nghawnga a valh, hruihrual chu vuan ranin a suih nghet sauh sauh a, muangchangin inchung lam a hawi a, na taka a mitchhing sawkin, 'ka nu, ka pa, min ngaidam teh u aw', tiin a dinna thing ţhutthleng chu a rap pial ta.

MALSAWMDAWNGZELA hian malsawmna a va dawng khât tehlul em!