THLARAU LAINATAWM zo tawh

THLARAU LAINATAWM RINMUANI LEH TERESY LALNGILNEII

'Teresy, hmanhmawh teh, kan ni hmasa ber a ni si a, kan tlai dawn a nia, muangchang thei leh lutuk mai, Satel ţuan pawh i tluk lo', tia âng hlak hlak chung a ka pindana tei târh târh mai ka ţhianţha ber Melinda Lalhlupuii chu hmanhmawh taka insiam sawk sawk chungin ka nuih hak hak.

'Mely, darkar khat ngawt kan la neih hi mawle, phí ruai ţhin lo teh', ka ti nghat a, 'chu pawh nise kan room tur kan zawn chhung nen, huiham, harh ve deuh teh, a thu hrimah tuk danga tho hma thei viau si tinge vawiin ang ni pawimawh lutuk a thawh i hai', min tih leh hlak hlak chuan ka nui hmel a tawp riai riai a, ka mang lama ka thil hmuh kha ka ngaihtuah nghal.

'Ka mamawh che', ti a kawrfual var sar mai,a kerèk thleng a fual hnalh, a ban sîn tê mai ha chung a in ram tawh tak chhung aţanga lungngai hmelpu chunga tukverh lam thlir dauh dauh mai, a hmel ţha taka lungngaihna chambang awm lawi si, hmui phun eih loa min be tu, ka mangrama ka hmuh kha ka hrechhuak a, a sam pawh a vàr a, a sei ngíl sang a nih kha.

Chhan tum a ka kâ ka âng hman zuai tihah ka harh hlawl a, muhil thei lo in ka tâl ta reng, a chhan pawh ka tî a mur sang sang a, boruak vawt deuh vurin min tuam a, ka hlau hran lo naa muthilh erawh ka har phah ta anih kha, varţianah muhil leh chauhin thawh ka hai phah nghe nghe.

'Hey hey, suangtuahna ram a chen kha bansan la, rang takin kal ang, ka tlan ni a nilo lehnghal, ka ring che a nia', ti a ka mit zawna kut rawn hmet ri khap tu Melinda chu ka melh a, ro zetin ka nui lui sak, ka bag ak in kan in aţangin kan chhuak a, ka bike chabi ka theihnghilh zui leh ta nghal, hrep hian.

Phun nang nang chungin Mely chuan chabi a va la a, helmet khum in ka tlan pui vawk vawk. Ka hnung aţang chuan min kuahbet ţai chungin a ţawng lawng lawng a, a sawi tak phei chu hre hlei loin, 'aw, ni e' tiin ka chhang ve tho! Ka dan ve reng a ni, mi dilchhut ka ni lo a, ka beng lehlam lehlam hi a chhûng lamah a vûng ve ve a, ka ri hriat theihna a khawih pawi deuh, treatment erawh ka la reng tho a, bengvar ve deuh chang nei mahila ri dang tamna hmun ah chuan ka hre hleithei lo ţhin. ENT specialist hnen ah pawh kan in entir tam narawh e.

Kei leh Mely hi kum sawmpakua ve ve kan ni a, kan chenna in pawh a insi chét a, keini leh anni hi chhungkua ang mai a inpawha awma khawsa ho kan ni, Kulikawn vengah khawsain kan khawsak a chhe hran lo ve ve a, fanu mal duat rawn ve ve kan ni, Mely-i hian nuţa pahnih a nei a ,amah hi an milai a ni, kei erawh ka nu in nau a ken theih loh avangin unau pianpui tumah ka nei lo a, ka pian hma hret in an nau keng thei lo beidawngin fa atan mipa naute, Lalremruata tih hming pu fa atan an la a, an lak hian kum hnih mi a ni tawh nghe nghe, an lak aţanga kum khat pawh a tlin hma in kei hi an vanneih asiam in beisei loh zetin min pai ve ta a ni, chutiang a nih avang chuan min duatin ka duh ang hi chu min pek loh an nei ngai lo.

Ka u Remruata pawh hi HBC ah lut vein ani chu Last semester a ni tawh a, BA a graduate hnu-ah chuan MZU ah a kal duh emaw, phai lam a zirna a zawm duh anih pawhin an dal lo ang, ka nu leh pa te hian an fa hrin ni lo mahse an hmangaihna a dal phah lo a, fapa mal a ni ve bawk nen duat tak tein an duat ve tho, kei erawh naupang zawk ka ni a, hmeichhe âwmnem zawk ka ni bawk nen ka u pawhin min duat viau, ka hming pawhin min ko phal lo a, 'Mate' min ti fo a, engemaw chang phei chuan, 'ka rangkachak duhawmnu', min ti kher ţhin, min naupangchhe chei lutuk hi ka thin a rim ru ţûn ţhin a, mahse, an laka pangchan erawh ka chingin ngaiah ka nei zo tawh.

Hmeichhe harhvang leh lu zo ve tak, min mil lo duhtu tan phei chuan inla ve tak ka ni a, chapo min ti tawk an awm fo bawk, ka chapo na phei chu ka hre lem hlei lâw! Midang chungtlak a hnuaichhiah ka ching ngai lo a, mahse, mi hausa fanu duat sual, chapo min ti tawk an la awm tho. Engahmah ka ngai chuang lo, ka awmna hmun apiang ah ka hlim a ni mai, ngaihzawng ka nei ngai lo a, kei leh ka chhungkua, ka ţhiannu Mely ka neih chuan ka hlim a ni mai, anni chuan min hmangaih si a.

Mely pawh hi keimah ang tho,ngaihzawng lam ngaihsak map bik lo a ni a, kan nu leh pa te ve ve leh kan nuţa te hian naute angin min cheibawl bawk nen kan in la naute dun thei viau a,inla naute viau e ti lo in Bike kan lawm dun tlat lawi, 'hmeichhia chuan scooter emaw, scooty te hi khalh mai mai ula', kan chhungte hian an ti vawng vawng ţhin, mahse, Bike kan nei ve ve a, kan hetih vang hian 'Lesbian couple' min ti tawk an awm fo bawk, kan incheina a nú zêm ngai lo bawk nen a awm ve tho mai.

College kan thleng a, kan class tur lam nia kan hriat chu panin ka bike ka hun rem hnuah kan tlan chho hlawk hlawk a, kei ai mahin kan Mely hi ala tlan chak lehnghal ,ka um dawr dawr a ,mahse, thil hrechhuak thut in a hmingpum ngatin, 'Melinda Lalhlupui' ,ka ti tuar a, a tlan lai ding chawtin a rawn lehhawi a, rang taka ka lama rawn let lehin ka kianga a lo thlen veleh ka banbul a hnek dawt, ka ràk ţhat a, vín hlar chungin, 'kan classroom tur i hria em ni?', Ka ti hlar a, hre lo tih hriat zetin a hawi buai nak, hawikualin kan inen a, chutah, za em emin kan nui dun hawk hawk a, kan bul vel a zirlai dang te chuan mak tih hmel zetin min en deuh ha ha hlawm.

'Au Remruat', ti a Mely au lawng lawng ri-ah chuan ka pum dawm ngawih ngawih chungin ka hawi chhuak a, ka nuih nasat luatah ka pum a na vek thei miau. Mely en na lam ka thlir ve nghal a, ka u kan lam pan a nui var var chunga arawn phei chu kan lo thlir dun ran a, ka u in kan bul a rawn thlen veleh kan chhipsam tuai thur in, 'ka duatlai te pahnih hi an che chhe leh tawh em ni?', Tiin a mitko min san khum zeuh zeuh.

Kan classroom awmna kan hriat loh thu leh, hre map loa kan rinthua hmanhmawh lutuk a kan tlan dawr dawr thu chu nui hak hak chungin kan hrilh a ,ka u pawh a lo nui ve hawk hawk, 'intlai palh ang e', tiin min kai a, kan classroom awmna lamah min hruaiin kan ţhutna hmun tur thlengin min hruai thlap. Kan ţhut fel hnuah an room lama kal turin min chhuahsan a, kan classmate tur hmeichhe hoin an thlir zui vawng vawng tih ka hmuh chuan ka lo thinrim ru ţun thei.

Bialnu a neih ka phal lo a, a nei anih chuan min duat tawh dawn lo tih hi ka thupui a ni tawp.

Break hun ani a, library-ah Mely nen kalin kan mamawh ho kan la khawm a, kan ni hmasa ber chu fel tak kan ni, kan fel rei leh chuang lo ang. Kan dan ve reng a ni miau a.

'Ka zun a chhuak lutuk, ka cheh dawn', tiin ka bula ţhu Mely chu a tho vut a, kal pawh kal ngil loa a chhuak ţuang ţuang chu ka nuih hak hak, kawngkhar hawngin a chhuak a, a khar leh rual rual chuan nasa lutukin ka phu dawrh,ka mumang a ka hmuh nula kha kawngka a khar khan ka hmu!

Rang taka tho vatin kawngka inkhar lam chu ka pan hlawk hlawk a, ka tlan a ni mah, thawm dim lo zeta hawng ţhuai in ka hawi chhuak a, a awm hauh lo!

Amah ngei kha a ni si a, ka hawikual ruai a, zirlai naupang ho vei suau suau bak ka hmu lo!

Thli a rawn thaw hak a, thli satliah a ni lo, a vawt vur, ka ţhanharh ruala thli thaw ang chiah kha, thli lo thawtna lam ka hawi vat a, ka manga ka hmuh ngei mai kha pindan inkalpawhna dungah kalin kawngpenga kawi ta mai lo chuan bangah a kal a, a kaltlang a nih chu!

Ka deuh hau chungin ka thlir a, chetsawn nachang ka hre lo, mak ti taka a paltlang tak bang chhah zet thlir mai loh chu.

Chetsawn nachang hre loin ka melh ngawt ngawt a, ka tiril a khur ru dar dar bawk, min sawi dawt dawt chunga ka hming a zawi si leh vin zet a min kotu awmah chuan ka harh hlawl a, mak tih hmel takin Mely'n min lo en ran, 'ih, i hmu ve em?' Ka ti bah niai a, vin hlarin 'henglai mi tamtak zingah hian tu ber nge i sawi, sawlai a Lukhum khum saw chu ka hmu ngei mai ahhh, a chhe lo hle bawk', mitmeng kal ralh chungin min chhang a, hah zetin ka lo thaw hap thung.

Chutah, thutak hmel pu zawkin, 'tak takin, tinge bang lam i thlir reng a, mak itih hmelin i phâwk hrâ roh si a, koh pawh hre lo lekin', a tih chuan ka kâ ânga ka thil hmuh sawi ka tum chuan ka hrawk a phui vek!

Ka sir aţangin thli vawt var a rawn thaw leh a, ka hawi vat, ka mang a ka hmuh leh nichin maia ka mi hmuh khan sawi lo turin min duh tih hriat zetin a lu a lo thing nar nar a, harsa ti lutukin ka buk khum nghat, mitkhap kar loah a bo lehnghal a, ka ţawng hun min ngaichang tih hriat taka min melh tu ka ţhiannu chu ka melh a, engmah a nih loh thu leh chhelo deuh mipa ka hmu a, ka lo suangtuah zui veng veng thu inti thawveng lui zeta ka sawi chuan a nui chhuak hawk hawk a, a rindan chiah a nih thu a sawi làng làng.

Kei erawh hlauhnain a rukin min tuam a, ka tiril khur lah a reh thei lawk lo. Ka mang a ang ru em em a, kha nu khan keimah chauh min hrilh duh a nei a ni. Ka mang satliah a ni hauh lo bawk, chhun pachangah ngei ka mithmuh ah a rawn inlâr a ni si a. Engthil tak ni ang maw.

Break a zo a, kan inphur haw leh vuk vuk a, nidang a ka tih loh dan deuhin len khawthawn ka rawt a, ka ţhiannu pawhin min pawmpui nghal hmiah, Aizawl khawpui ah kan tlan kual ngar ngar a, han lenna tur chuang kan hre lo, thimhlim ah khawi em em ah kal lo in kan inphur haw leh a, kan chhungte ve vein pawnah min lo nghak ran, ni e, kan kal na tur chin kan hrilh miau lo a, kan mobile kan silent daih nen an chhungkaw naute duat rawn ve ve chu namen lo in min ngaihtuah a lo ni, inthlahrun hmel fe in dawih zetin kan meng dun ralh ralh a, min hau rei lem lo, ka pindanah kalin ka inbual nghal a, ka inbual lai chuan thli thaw, vawt deuh vuk kha a rawn thaw leh a nih chu!

Hmanhmawh zetin ka intleuh sawk sawk a, ka chhuak vat, mahse, ka khum a ka thil hmuh hi eng thil hrep nge ni!

Kha kawrfual var ha bawk kha ka khum ah a lo ţhu ran a, amah ka hmuh ang ni lo zetin a lo huh hniang a, a sam sei tak leh a kawrfual aţang chuan tui a far fap fap, ka lam a rawn hawi a, hlau zet a rak chhuah ka tum chu ka hrawkah hnawhtu a awm leh tlat, a hmel chu a dâng var pup a, a mitmeng a thim deuh run bawk, minung hmel reng a pu lo, ka khâ a chih zo a, ka hrawk ka dawm chawt.

'Min hlau suh, min hlauh tlat chuan ka harsatna ka hrilh thei lo che, inthlah dul la, zaninah ka rawn tlawh leh ang che', tia min hrilhin thawklehkhatah a bo leh hmak!

'Engatinge kei kher? Engvangin nge keimah kher min tihbuai, lo lang tawh suh, ka duh lo ,ka hlau, lo kal tawh suh', tiin ka ţap chhuak hawk a, ka mumang kha chu ka hlau lo, mahse, kan College-ah leh tuna ka pindan ngeia ka hmuh dan leh mak taka a khawsak danah khan thlarau emaw ramhuai a nih ka ring, ka hlau takzet.

Kawr anga hak theih hrukpuan, ka intuamna hmalam chu ţham tawkin ka ţhu hnawk, ka lu tuamna hrukpuan kek thlain ka sam ka ţhàm tawk tawk a, kha nu khan ka thawk a ti pik lutuk chu chintawk nei loin ka rak tuar, ka ţap hawk hawk bawk a, ka room kawngkhar ri rakin ka u Remruata a rawn tlan lut.

'Mate', tiin min pan vat a, mu leh mal nei lo zetin, 'ka hmu duh tawh lo, ka hlau, min kalsan turin hrilh rawh', tia ţap chungin ka u chu ka lo kuahbet rawk rawk.

'Mate, hahdam phawt la', tiin min kuah hlu hlu a, ka khawsa zia avang chuan a mangang tih a aw phelh deuh phangah chuan ka hre thei.

'U, ka hlau emai, kal bo turin hrilh rawh', ka ti leh ţiak a, min hnem tum zetin ka hnung a chul hauh hauh.

Reilote-ah ka nu leh ka pa an rawn lut ve a, 'engthil nge Mate', min rawn tih a min ngaihtuahna awrawl ka hriat chuan pangchang zetin ka ţap uar leh sauha ,ka u lak aţanga kalsawnin ka nu ka kuah bet thlawp.

'Hlauh a nei anih kha', tiin ka u chuan ka awmdan a hrilh a, thil awmzia min zawh chuan sawi thei loin ka hrawk a inhnawh phui leh tlat, ka kiangah awm ve a awm bawk, mahse,ka hmu thei tawh hauh lo thung, 'ka inbual zo kha ka muhil a, ka chhing sek a, mangchhia ka mang a', tiin dawt ka phuah ta ngawt a, chutianga ka ti lo a nih chuan kha nu khan min tina dawnin ka hre tlat.

Ka inthlak a, ka room ah ka u in min awmpuiin min nghak reng mah se ka thla a muan miau loh avangin ka theihtawp a rangin thawmhnaw ka ha sawk sawk a, ni e, ka hmanhmawh luatah cream pawh ka inchulh lo hial!

Zanriah kan kil pawh chuan chaw lem a sak kher mai, mahse, ka chhungte mangang a ka siam ka hlauh avangin ka lem lui hram hram a, ka pa chu a ngaih a ţha mai a, ka nu leh ka u erawh chuan ka chezia min chik ru reng tih ka hria.

Mely a rawn kal a, Mely titi ngaithla in keipawh ka nui ve leh hak hak tawh, mahse, vawiin lam a mipa chhelo ka hmuh thu leh min koh pawha eih nachang ka hriat loh thu te, bang lam ka en ngar ngar thute sawi paha a nuih var var erawh chuan ka u in mitkhap lek lo in min melh ngur a, zawhna a nei tih hai rual lohin a mitmengah a lang chhuak hial bawk, ka nu leh ka pa erawh an pindan lamah an kal tawh thung a, ka u pawhin min melh ngur mahse min zawt chuang lo, mahse, hei hi ka chiang, Mely haw hunah zawhna min zawt dawn tih hi.

Ka ring sual lo e, Mely a haw a ,ka u chuan zawhna min zawt ta ngei, chhan ngaihna hre lovin ka riat nawi nak a, a lungawi loh hmel kher mai, mahse, mi zaidam tawpkhawk a ni miau a, ka sawi duh loh sawi turin min nawrlui lo, a bula riah ve ka dil chuan a bu nghut a ,a pindan lam kan pan, ka lawm kher mai, keimah chauhin ka mu ngam ngang lo, a kiangah mu-in a awmah ka kuah a, aniin a ban min kham tir bawk, ka naupan tet aţanga ngaihnawm ka tih em em mai *MAURUANGI* thawnthu chu min hrilh a, kar loah tui zetin ka muhil.

'Tess, min hlau lo la, hlauhawm ka ni lo, ka chanchin i hriat ka duh a ni', ti tu chu kha kawr var ha nu bawk kha a ni.

Ka chil ka lem khalh a,ka bu nghat nghat.

'Kum sarih mi chauh ka ni, kha thil a thlen lai khan, Keifang khua kan ni a, kuthnathawk a eizawng kan ni, sikul ka kal ve ţhin a, pawl hnih zirlai lek ka la ni nghe nghe, kan khua aţanga kilometre sarih ze a hla-ah lo neiin kan lo pawh a lian hle a, ţin thum hmun ngawt a ni ve, nitin ka nu leh ka pa an feh ţhin a, a chhan pawh an fanu leh fapa kha min riah bosan duh loh vang a ni bawk, ka pa hian Scooter upa ve tawh tak a nei ve a, chu chuan an kal mai ţhin, ka u hi Hmingsanga a ni a, kei aiin kum thum in a upa a, mahse, vanduaithlak takin a thluak lam a chiang lo a, zirna sikul a bel ve thei lo', tiin a thaw hap a, ngaihnawm ti zetin ka lo ngaithla thung.

'Thawhţanni a ni a, Kum tawp lam niin khua pawh a vawt vur tawh nghe nghe, lo lam buhseng a hun viau tawh naa ka nuamsam lo a, tlang hrileng man in ka hritlang a, ka khua a sik hluah bawk, ka nu leh ka u chu hlawhfa pahnih chhawrin lo lam ah an riak a, ka pa erawh a káwng a nawm loh deuh vang a ni pakhat bawk, kei leh ka pa chu in lamah kan awmdun rak rak a, a kiang mah ka thla a muang ţhin, ka pa a ni miau a', tiin ka lam rawn hawiin a nui seih, a hmel chu a var pap a, khawharna in a luahkhat ni berin ka hre hial.

Chutah, a hmel chu lungngaihna in a bawm khat a, a mittui a luang, ni e, chu thlarau chu a mittui a luang, mak ti fahran in ka thlir a, a hmui var da lep chu liak zauhin, 'Mahse, ka rinphak bak thil ka chungah ka pa khan a thlen tir a, a fanu ngei chu tihluihna in min sual a, na tak a ni, dim lo lutukin min hrawm nawk nawk a,naupang te mah ni ila ka theihnghilh thei lo, tun hnu, ka thih hnu thleng pawh hian', tiin a ţap chhuak a, a ţap ri chu a mak lutuk, a hrám nge a rúm ka hrethiam lo, a sawi tirhin aw dam dap hmang mah se a tawp lam erawh rapawm tak a ni.

A ţawng ri chu awrawl pangngai a ni hauh lo, a rúm a, a thaw ri pawh ruahthimpui inţham laia khawpui rapawm zeta ri hum hum-ah ka chan ber.

A tira hlau hauh si lo khan awrawl rapthlak tak mai, ri hum hum, tuilen lai a luang ri hum hum ang mai a rapawm, min lenbo vang vang thei khawp a khauh leh li thûk ni awma mawi a chhuah chuan hlauh vangin ka ràk ţhawt a, ka harh hlawl bawk, ka thlan tuiin min bual huh hnap a, room thim zetah chuan ka hawi kual ruai, ka bengah kha thlarau rapawm zet awrawl kha a chàm a, mangang zetin ka kianga mu ka u chu ka sawi nawk nawk.

Rang taka inperh thoin min kuahbet thlawp a, hlauh luat avanga khabe inkhawng sâi dat dat chungin ka tha tawpin ka kuah ve sauh sauh.

'Ka mangah ani kha ka hmu leh a', ka ti ţiau a, na zet a thaw hawkin ka u chuan ka bekah a fawp tàwk a, min kuahna, nghet tak chuan min thlamuanin ka thawk pawh a mumal ţan, ka thaw siai siai a, muthilh leh erawh ka ngam tawh ngang lo, ka u hnen ah chuan ka mang lamah leh a takah ngei, kan college ah leh ka room ah ngei pawh min mamawh a ka ţanpuina min diltu a awm thu ka hrilh a, a harsatna erawh ka sawi thei lo, a ngai ang bawkin ka hrawk ah hnawh tu a awm miau a, ka nawrlui duh bik lo.

Min tlaivar pui ta ţhak a, a tukah pawh college kal loin kan unau chuan kan inawm ran a, ka nu leh pa hnathawkin an chhuak thung, ka u chuan chiang zawka hriat chak viau mahse sawitheih chin ka nei si a, tihngaihna tak pawh kan hre lo, ka rilruah zawhna tam tham tak a awm a, engvanga ka kiangah kher inlar nge anih?Engvanga a thih hnu thleng pawh a hahdam thei lo nge a nih? Tih zawng zawng bakah, kei ve tehlul hian engtinnge ka puih theih ang? Thei ta tehreng pawh ni ila engthil ti turin nge min duh tih te chu ka zawhna neih a ni.

Tichuan, ka hnawh bo theih si loh, ka hmuh loh der theih loh khawpa langsara ka hmaa inlan ţhin thlarau, a hming Rinmuani chuan ka mumang lamah min tlawh ta ziah a ,a nun a thil thleng min hrilh chuan ka thinlungah huatna nasa tak min tuhsak ve hial!

Kan inchung zawlah ka ţhu a, ţhutthleng lian ve tak kan dah ah chuan ţhu in Rinmuani thusawi ka ngaihtuah a, ka rilru ah engdang mah a lut thei lo.

'Tichuan,ka nu te riah bo chhung, karkhat chhung ngawt chu min mutpui ta zel a, duh loin ţang ve ţhin mah ila ka pa a ni miau a, "i sawichhuah chuan ka that ang che, i nu leh i u pawh ka that ve ang," tia min vauna te avang chuan ka ngawi a, ka ngawi zel a, remchang a hmuh apiangin min sual ta ziah a ni.

Ka kum a lo tam chho ve zel a, ka tette aţanga chutianga sual luih ka tawhna chuan ka nunah nasa takin nghawng a nei chho a, Middle school ka kal chuan ka sikul kal naah ngaihzawng te neiin a rem dan apiangin kan mu dun ţhin, ka ngai ho tawh a nih tak ber chu, in lamah lah nise ka pa in zantin deuhthaw ka nu muthilh hnuah min kaiharhin min khawih ziah a, ram lam hna pawh a kâwng dam reng tawh si chu benvawn anga sawiin hlawhfa a ruai a, ka nu erawh lo lamah a la feh ziah tho, chutiang a hun ka tawnah chuan mak takin ka pa min khawihna te chu nuam ti takin ka lo dawngsawng ţhin ,ka zahpuiawm asin.

Hun a kal zel a, kum 17 ka ni ve ta ,mahse, high school kal lo in zirna ka chawlhsan a, ka pa thuchhuak a ni, ka nu chuan zirzawm turin min duh tih ka hria ,mahse, ka tette aţanga amah hlauhna ka thinlung a min tuhsak tlattu ka pa thu ka hnial ngam lo thung, tukkhat ka pum a no nghulh a, ka lu te haiin ka luak a chhuak ut ut a, insum hman loin ka chaw eisiam lai kalsanin tuidehna ah ka va uak tuar tuar a, luak chhuah tur erawh ka nei lo, chau hnepin ka uak nghe nghe, a tirah chuan ka hrethiam hauh lo, .

mahse ,a reh duh mai lo, chaw ka ei hleithei lo a, ka ei ve chhun lah ka luak chhuak leh zel a, chutichuan ni li ngawt ka awm a, ka tla hman dawk nghe nghe, ka pa in ka nu kiangah sub centre a min hruai tur thu a sawi a, ka nu lahin min kalpui duh viau mah se, ka u Hmingsanga,a thluak lam chiang lo ka tih kha a natna zualin a bawhbuai reng nen min kalpui thei ta lo, tichuan kan khaw sub centre ah kan va kal ta a, chulai hmun ah chuan ka pum chhungah naute a awm thu min lo hrilh!' Ti a mittui tla chunga a sawi lai te kha ka ngaihtuah a, Rinmuani pa chu ka huatpui ngawih ngawih.

Rinmuani chungchang ngaihtuah a ka lo ţhut veuh veuh lai chuan ka phu nghek, ka ţhutna aţanga tho zawkin ka per dawrh .Engdang vang a nilo ,ka u in min barakhaih vang a ni, ka thinphu dawt dawt chu ka dawm a, thinrim taka ka nu leh pa te koh mai ka tum chuan zinglam ah an hna thilah min zin san tih ka hre leh a, mittui tling pam chungin ka u ka melh a ,ani lah chuan a pum dawm meuhin min lo nuih hawk hawk.

'Lalremruat, thi se min ti em ni?', Ka ti tuar a, ka u nui lai a tawp chawt.

'Engthil nge maw i sawi le?' Tiin hamhaih hmel zetin min melh a, a chil a lem khalh rual chuan a hrawk bawk a che ralh.

Haw zet a melhin, 'Ka phu hlum lo chauh a nih kha, min barakhaih vangin ka lung hi sawtchhuak daih se, thi daih se min ti a nih kha', ka ti leh ţhat a, thutak zeta min melh ngur hnuah min kuahbet thlawp, kei erawh duh lo zetin ka lo tal nghek thung. Mahse, ka thatawpin tal ve mahila a chak lutuk a, ka tal chhuak thei lo,hah zeta thaw hapin ka tal zawi tial tial a, ka tha ka thlah hnu-ah pawh min la kuahbet reng.

'Shh, Mate, tihpalh, ka ko che a, i hre thei si loa, ka lo ţhawng mai mai che anih kha, ka ti tawh lo ang, min ngaidam rawh, tih hlauhthawn che ka tum lo', a ti sup a, a ţawng zawnga a thaw lum chuan ka chhip a chhem lum hak hak.

Chutianga ngaihdam min dil a, min duatna awka ka hriat chuan nichin mai a hlauthawng lutuk a min siam kha ka ngaihtuah chhuak a, ka mittui ka biangah a luang lum pap.

'I sual lutuk', ka ti ţiak a, thaw hawkin a che hrut a, engtinnge a chet hman pawh ka hre lo, amah chu ţhutthlengah ţhu-in a mal chungah ka lo ţhu fel der nia!

'Ka hmangaih che, thih thu sawi tawh suh', tiin a mal chunga ka ţhu chu min bih ngur a, kei erawh chuan a chet ran em avanga phawk hra chunga melhin, 'aw, nia, hihi', ka ti bah nak ringawt, a nui hawk a, a nuih rualin min nghawr ve dawt, a awm-ah min kuah bet hlu hlu a, eng em em nge ka lo ngaihtuah tih min zawh chuan ka chil ka lem khalh a, 'eng vak mah', tiin ka chhang mawl leh tawp, lungawi hmel loh zetin a ner nang a, kei erawh za lo zetin ka nui ro halh thung.

'Ka hmangaih thu che ka sawi', a tih chuan keipawhin ka hmangaih thu ka hrilh a, hah hmel taka thaw hawkin, 'Mate, unau inhmangaihna a ni lo,' ti leh sup, phawk fe in ka melh a, 'eng inhmangaihna nge ni ang a?' Ka tih chuan thaw leh hawkin min pawm tho a, i dam lo palh ang tiin inhnuai lam min panpui nal nal.

Zanriah puar taka kan ei zawh hnu-in ka nu leh pa video call hmangin kan bia a, chumi hnu chuan lehkha zir turin kan pindan lam ve ve kan pan, lehkhazir lam ka rilruah a lut lo kher mai, ka u khan unau inhmangaihna a nih loh thu a sawi a, mahse, eng nge a awmzia ni ta ang le!

Ani hian min ngaizawng em ni? Nilo, thil theih a nilo, ka lu ka thing nar nar a ,à lutuk tiin ka phun sap, ngaihtuah loh tur ngaihtuah hi ka sim a ngai, ani chuan a nau ka nih ang bakin min hmangaih dawn lo tih ka chiang.

Ka lehkha zir lai ka ngaihtuah theih miau loh avangin inbual turin ka inbuatsaih a, Bual inah lutin tuilum hmangin ka inphuh sang sang ,rei fe ka inbual hnu-ah ka chhuak a, ka mu nghal hmiah.

'Teresy, ka thusawi ngun takin ngaithla ang che', ti a min be tu Rinmuani chu melhin ka bu nghauh a, 'khatia nau ka pai thu min hrilh khan kei chang ni lo ka pa pawh a ţhawng em em a, hlauhthawnnain kan khat ve ve, kan khaw dâi-ah hian lui dam ve deuh mai, pilril ru phian si hi a awm a, sub centre aţang chuan ka pa in min hruaiin chu lui ah chuan min hnim hlum a ni, mualpho a hlauh avangin', tiin a sawi a, ka thawk a tawp mai dawn.

'Ih, i pa in a that che a maw', ka ti bah niai a, a lu a bu nghat.

Mak ti zetin ka en a, lainatna, khawngaihna, mihringin kan neih theih zawng zawngin ka lainat, a pa ngeiin sualin a nunphung a buai a, a pa thiltih sual rah zar zo-in nau hial a keng a, chuta karah a pa chuan mualpho a hlauh vangin a fanu ngei chu thil rapthlak tawpkhawk, pawngsual a chunga a thlen tir hnu-ah tui-ah a hnim hlum leh si maw? Tih ngaihtuahin ka thaw hawk a, ka mittui a luang hial.

'Aw, i ngaihtuahna kha a dik, ka tawrhna i hre ta bawk a, min pui ang tiraw?', beisei nei hmel zet leh khawngaih thla la zetin min en a, a kut var lap mai, hik var mai chuan ka kut a hum ran, namen loin thinrimnain min luahkhat a, chu thlarau lainatawm zet, Rinmuanin ka kut a humna chu phelh sakin a kut ka hmer sak vawng vawng a, 'ka pui ang che', tiin ka phun sap.

Mittui luang ngiai ngiai chungin min melh a ,a mittui, mittui naran nilo, thisen ang maia senduk vek pawh chu amah ka khawngaihna leh lainatna a nasat em avangin hlauh en ah ka en lo a, ka kut la kangin a mittui chu ka hruk sak a, thlamuan hmel zetin a mit a chhing siai siai.

Ni e, ka ti ngei ang, a phuba chu ka laksak mawlh ang.

Mahse, engtinnge phuba chu ka lak ang?

Ka rilru a zawhna awm chu a hre thei tih hriat takin a mittui, senduk zet chu thawklehkhatah a hul a, 'kan that ang', tiin huatna thinlung nen a sawi, a ngaithla tu tan pawhin khákna nasa tak a pai tih hai theih loh khawpin a huatna pai chu a langsar hial.

Chutah zet zawng, ka hlau chu ka khur dar dar a, a lak ata ka kut la sawnin ka kut ka melh ngawih ngawih, he ka kut hian tual ka that ang maw?Tual ka that anih chuan man ka ni anga, ka chhungkua leh ka ţhiante zakin an kun ang, mi ten min dem rawnin min chilhlum duhna hial thinlung an pu dawn, ka khabe a inkhawng dat dat a, 'tual ka that thei lo ang', ka ti ţiau a, ka ngaihtuah thui ngam lo.

Mahse, ani chuan zaidam taka min melhin ngainatawm zetin a nui var var a, hlauthawng lo turin min hrilh.

Amah zui turin min hrilh a, khur ru dar darin a kut rawn lek chu tím daiin ka lo ban, min kai a, thawklehkhatah ka hmuh hmasak ber zana a dinna hmunah khan kan ding, mak ti zetin ka hawikual ruai a, tukverh lan thlir tur a min hrilh chuan tukverh lam chu ka hawi a, chu tukverha ka thil hmuh avang chuan ka insehruh ngawt ngawt.

Patling pakhat hian hmeichhe naupang hi dimna tel map loin a hrawm bawrh bawrh a, chu naupang chu a ţah pawh phal loin a hrawk khur khur, naupang hlau lutuk chu a mittui a luang zawih zawih a, a hnuah phei chuan chu pa chuan naupang hrawkah chuan chem hriam hmel zet a chuktuah ran.

'Tumahin an chhan dawn lo che, i pa ka ni a, ka duh angin ka ti dawn che, i chunga roreltu tur ka ni, thawm i chhuah anih chuan ka that ang che', tia chu patlingin a vau khur khur laia chu naupang hmel mawlh chu.

A mengphawk hrà a, a hlau in na a ti hle tih hairual lohin a hmelah a langchhuak, amah khawihtu pa leh a chem hriam zet ken chu a hlau hle tih ka hre thei, keipawhin ka lo hlauh pui viau, patlingin a duh a hmuh lai tak phei chuan en ngam lo in ka mit ka chhing sawk a, mahse, ka mit ka chhing chung pawhin chumi te pafa chu fiah lutuk in ka la hmu tho!

Naupang pawisawilo leh duhawm tak mitmeng a natna awm chu ka natpui ve vawng vawng.

Chu pa chu a tho a, a thawh veleh chuan hmundang daihah an awm leh tawh ,mahse, chu pa chu a lo upa lehzual tawh a, hmeichhia pawh tleirawl chu a ni tawh. Hmeichhia chu a hmel a ţha em em a, a sam a sei hniang bawk ,a mitmeng chu a naupan lai ang chiahin a fiahin a bial kal a, mitmeng zahawm ka tih chi tak a ni, chutiang mitmeng chu ka awt viau ţhin.

Mahse, a hmelah chuan lungngaihna a inphum a, inphum ru mai nilo in a langchhuak hial, hamhaih hmel a pu a ,a pa, a tette aţanga sual ţhin tu ngei kut chuan a kai a, ngawng chhuih chungin a zui ve chhat chhat, lui dam diai, lian vak lo hmun an thleng a, a kamah ţhu-in an indawmkun dun ngawih ngawih.

Chu patling pawh chu a rilru a hah tih hriat takin a thlan a tla bat bat a, a hui leh pap ţhin ,hmeichhia erawh tui-ah chuan a ke chiahin eng ber nge a ngaihtuah pawh hriat loh khawpin suangtuahna ramah a cheng ni maiin ka hria, a khat tawkin a pum a chul a, a pum a chul apiang chuan a nui leh ver ver ţhin, hairual a ni lo, a hlim tih a lang thei, mipa zawk chu thoin hneichhia chu a hnung lam aţangin a pan phei a, a fanu ngei mai chu a chhip samah ţhamin thatawpin a phih nawk nawk a, Rinmuani na tuar chu a rak ţhat ţhat.

Lui lai lamah phih pheiin a hnim bawrh bawrh a, tleirawl thih sual chuan a kut chu a theihtawpin a vai chiam a, a tal nasat avangin a pa pawh a tlu ţhelh nghe nghe ,ţang tak leh inhum ruh ţeuh chungin ka thlir a, ka ţan nasat luatah ka hah vek thei.

Hmeichhia chuan a tha a thlah a, a kal ta! A taksa, nunna nei tawh lo zawi ngiai aţang chuan a thlarau a chhuak a, a pa in a ruang tuikam lama a hnuk chhuak chu a en ngawih ngawih, huatna nasa tak nen a pa chu na taka khawih a tum a, mahse, a tawk thei lo.

Nasa takin a ankhum tuar tuar a, mipa erawh chuan a hre thei si lo, mipa in ama ruang ngei kianga ţhu a, a melh tlawk tlawk lai chu a hel kual vat vat a, a pa a khawih chak lutuk inhrosa vel ah chuan kha hmeichhe naupang duhawm tak, a lo ţhanlen hnu pawh a a duhawmna la awm reng khan a phatsan, ni e, a duhawmna kha a bo vek a, a hmelah leh a mitah chuan mi nunrawng, huatna a khat, natna in a pawlh nak chauh a hmuh theih.

'Kha kha ka pa in min pawngsual lai leh min thah lai chu anih kha, i na tiraw? I hah vek a ni tiraw?Kha hmeichhe naupang kha ţanpui i chak a ,kha hmeichhe naupai, tleirawl te mai kha a thihna tur lak ata kha chhan i duh tiraw? Mahse, i thei si lo ,a lo thlirtu nang, nangma tan ngeipawh khati khawpa a nat chuan, kei, a tuartu tana a nat dan tur i hrethiam em? Aih, i hrethiam lo, i tawng ve tlat lo a', tiin a sawi a, kei erawhin lainat lutuk in Rinmuani chu ka en vawng vawng.

Chhuatah min nem ţhu a, ka kiangah lo ţhu in ka kut min hum sak a, ka mit a min en chungin,

'Naupang mai, Kum sarih mi lek tenawm taka pawngsualtu kha mihring ,mihring tenawm lutuk, mahni fa, a ril a rah ngei mai PAWNGSUAL duh khawp a mi hurherh kha ka huatna a nasat lutuk avang hian, ka thlarau pawh a hahdam thei lo ,ka vàkvai a, mal tak leh huatna nasa tak pai chungin, theih nise,vawikhat tal ka mihring tisa kha luahlum leh ka chak ngawih ngawih.

Mi hurherh, pa tenawm, nunrawng lutuk kha chinlem nei loa chem hriam tak hmanga chandarh vek ka duh, mahse, thlarau mai ka nih tawh avangin ka thei lo' ,tiin a ţap,ni e, a mittui a tla, chu THLARAU LAINATAWM chu!

'Nang chuan i thei, i taksa kha reilote, reilote tak tak ka luahlum min phalsak rawh, nunrawng taka min sual tu, a fanu sual tu ka pa,.ka pa kha ka thah theih na atan.

Ka tetlai aţanga ka nuna thil thleng avang khan ka pa thah duhna hial thinlung ka nei ngai lo, mahse, ka naute, ka naute kha ka pum chhunga a awm khan ka hmangaih asin, ka pa a ni emaw ,ka bialpa, tu pawh a pa ni rawh se, a paitu ka ni a, ka pum chhunga naute awm kha ka hmangaih a, beiseina ka nei a, ka la hriat ngai reng reng loh hlimna min thlen asin, ka naute tal khan dam taka khawvel eng hmuh a, khawvel nawmna tem ve a phu asin.

Keimah vang ni lo in, pawisawi ve hauh lo, ka naute vang tal khan min pui rawh, khawngaihin ,i duh lo chung chuan i chhungah ka lut thei lo, i remtihna a ngai', ti a ngenngawl tak mitmeng pu chung leh khawngaihthla la zeta a tih chuan ka lu ka buk khum nghat a, hlim hmel pu chungin min kuah a, harh turin ka beng bulah min hrilh sap.

Ka harh hlawl a, ka taksaah chuan keimah chauh ni lo, midang cheng ve a awm tih ka hre thei. Ka chhungah hian Rinmuani a awm tawh, huatna a pai pawh ka feel pui thei a ,ka zahve hi kei ka la ni a, ka zahve dang hi Rinmuani ni maiin ka hria.

Ka room chu ala thim deuh khup a ,ka lukham bula ka mobile dah chu ban in sana ka en a, zinglam dar thum a ni ,tho chhuakin ka pindan chu a én theihna atan plug ka hmet eng khap a, ka thawmhnaw dahna chhuar hawngin thawmhnaw hak li/nga vel ka la chhuak a, bag lian lutuk loa ka khung hnuah hmanhmawh zetin ka inbual.

Thawmhnaw ka inbel a, kekawr mar ţha zet ha in tshirt ka ha bawk a ,ka shirt chungah jacket ha leh in boot ka bun leh tawp. Ka bike chabi leh helmet la in ka bag ka ak a, kan in ka chhuahsan.

Gate bulah ka bike ka ti nung a, inchhung lam aţanga pawnlam thawm a hriat lutuk loh avangin ka hlau hran lo ,sana ka en leh zauh a, dar 4:30am a lo ri der tawh, kan in bakah ka ţhiannu Mely te in ka thlir vawng vawng a, he thil hi naute pawisawilo lutuk tan ka tih a ngai miau si, minute 10 dawn kan in leh Melinda te in ka thlir hnu ah ka helmet khum in ka tlanchhuak ta vawk vawk a, Aizawl ka chhuahsan hma in ka card hmangin pawisa tlem ka la chhuak bawk.

Seling ah dingin tukţhuan ka ei a, tukţhuan ka ei puar ka tlan leh dawn chuan ka mobile ka hre chhuak zawk, ka silent daih a nih kha, phawrh chhuakin ka en a, missed call tamtak ka chhungte leh Mely hnen aţangin a lo awm dal, ka switch off ta ngawt a, ka tlan leh ta.

Kawngka inhawng hiai mai ah chuan dah luh pahin, 'inawm em? Hei ka bike a chhe hlauh mai a, siam chhungin in in-ah ka lo innghat thei ang em le? Siam chhung a rei hmel loh a', tiin ka ţawng bawrh bawrh a, inchhunga lo ţhu nu cher lam, tar lam lek lek tawh hian ţha takin min lo dawngsawng a, duhsak takin thingpui sen min thlit nghalin min kawm nghal bawr bawrh.

'E, ţhiani,mikhual kan nei a ni maw?' Ti chunga min chibai tum a kut rawn phar tu ka hmuh chuan ka uak lo chauh, insum hram hramin ka nui lui a,.ka chibai a ,ka kut a hmer nghet hle.

'Tenawm lutuk', ka ti rilru sap.

'Nu Maram, ka bike kha a part chhe lai an lo kawl mai lo a ,Aizawl ah an chah a, zanin chauh chu ka riah a ngaih hmel' ,inthlahrun hmel zetin ka ti sap a, a ţawng hma hauhin Pa Hmingthana, Rinmuani pa chuan, 'Ekhai, inthlahrun a ngai reng reng lo, i duh chen chen cham rawh', tiin a nui huah huah a, a nupui hmuh loh laiin ka melh ralh, lawm hmel zetin a khi vur vur a, a ruk tak chuan ka ten in ka haw takzet, mahse, tihlan hun a la ni lo.

'Kan fanu Rinmuani hian naupang te in min boral san a, tui a tla hlum ani nghe nghe, hei, ţhiani hian a tuar thiam lo em em a, a hnu kum 3 hnu lekah kan fapa neihchhun Hmingsangan min boral san lehzel nen a tar bawih bawih anih hi', tiin zanriah kan killai chuan pa Hmingthana chuan an chhungkaw chanchin min hrilh suam suam a, ka hriat sa vek a ni, a fanu thih chhan nen lam ka hria, zanriah eikham ah thingpui senhang te kan in zawh hnu chuan mutna kan siam a, an in a tlabal ve viau tawh a, an khawsak chu a har ve tih ka hrethiam ve mai, mutna ka siam a, Rinmuani nu-in min pui bawk.

Mutna kan siam pah chuan Kawlkulh kal tur ka nih thu te ka sawi a, ka bike a chhe ta bawk nen ka tangkhang thu te, harsatna ka tawh dan te dawt phuahchawpin ka sawi mawlh mawlh a, an awih ve viau chuan ka hria.

Tui zetin ka mu a, zanlaiah nu ber a hnâr deuh sak sak tawh tih in dim taka ka mutna lama penthawm ka hriat chuan thim hnuaiah ka nui ru sak.

Min rawn beisei ta ngei a, ka lo man lawk tawh reng tho mai, mitmei pawh ka hmuh ngei a nih kha.

'Naktuk varţianah ka bike la-in i khua aţanga km 2 vela hla a awm, ka rawn tlanpelh lamah khan ka kal anga, chutah chuah kan duh kan ti puitling dawn nia', tia ka hnar chuan lawm zet a ka bianga min piai zauhin a nui vun vun a, an mut pindan lam a pan leh ţham ţham a, kei erawh tui zetin ka muhil siai siai.

Varţianah tho-in ka bike chhe miah lo, an in piah lawk Lirthei an siamna ţhin dawr kawta ka hun chu la-in ka tlan chhuak a, khaw chhuah dawnah Rinmuani pa chuan min lo nghak ran tawh.

A fanu a hnimhlumna hmunah ngei chuan min hruai a, keipawh ka thiltih tur hmabak avanga phur zetin a hnungah ka kal ve sauh sauh ,venthawn tur a awm lo bawk nen a hmun kan thlen chuan min kuahin min fawp bawrh bawrh a, min thlah lawk tur a hrilhin min enchiang turin ka hrilh a, ka hmelah a fanu hmel a hmu chiang a ni.

A mengphar awn awn a ,a tawlhhnung dawrh bawk, 'ka, nang chu ka that tawh che', tiin a rak ruai a, tlanchhiatna tur a melh kual ruai, hmuhnawm ti zetin ka en a, ka nui sâwng bawk, tualthah chakna in min tuam a, huatna leh khakna hlirin ka khat tlat.

A tukhum sam a ţham in ka khai lawp a, ka tha chak zia chu mihring pangngai thil tih a ni thei lo, Rinmuani zawk a che miau a lawm le.

'I tar lamah pawh i hur ila thlah lo a nih hi, keiin i chak lohna laiah ka awk ta chat si che a tiraw ka pa', tiin ka ţawng a ,ni lo, ka chhunga awm thlarau zawk a ni ţawng chhuak, thil thlengin a nghawng lutuk chu kan mitenawma chu a thidang ta hial a, kan tan chet han lak a rem sauh, mahse, nuam taka thih tir kan tum bik chai lo.

Ûm ruak let ngât chu chharin tui ka thal a, a hmaiah ka theh ţhawt, khuh bawrh bawrhin a rawn tho a ,a hmaa ka ding min hmuh rual rualin ka hmaah a ţhingţhi rawp.

'Bawihte, mate, min ngaidam la, kei lehzel ka awm loh chuan i nu a dam zo lo ang, i laka ka thil tih sual rapthlak lutuk tuarin i nu a tar bawih bawih a, enkawltu pakhat tal a neih a ngai, khawngaihin', tiin min ngen ruai a ,mahse, a tlai tawh lutuk.

Ka thâ mai piah lamah Rinmuani thlarau chakna hmangin tui lamah ka theh lut rawk a ,a engamah hma a a inhai buan buan chu kei leh ka chhung a awm chuan deuhsawh zetin kan lo nuih thung, tui chhungah lutin a fanu, a ril a rah ngei a hnimhlum ang chiah, ni lo ,a aia nasa maha thlabara siamin kan hnimhlum a, a mangang tal vel chuan min ti lawm tlat.

A tha a thlah dul a, a zawi ta vek, a thlarauin a taksa a phatsan rual rualin ka chhung a awm chuan min kiansan a, nikhaw hre lo-in ka tlu ve der mai.

'Mate, tho teh, harh teh', ti a min sawi nawk nawk tu an awm chuan ka harh hlawl a ,ka u in min lo sawi nawk nawk a lo ni ,ka harh tih a hriat veleh min kuahbet thlawp a, ka hawi kual ruai thung ,ka kiangah chuan ka chhungte bakah Melinda-i te chhungkua an lo awm a, an mittui a lo tling pam hlawm, ka nu phei chu a ţap ţeuh tih ka hre thei. Chutiang bawkin Mely leh a nu pawh, mipa ho erawh an meng sen rûm hlawm a, ka piah deuha thawm ri nak nak lam hawiin an mitmengah huatna a lang chhuak.

An hawina lam ka en ve chuan Rinmuani pa chu a nupui, Nu Marami chuan a tha neihchhun hmangin a lo chhir ve sak sak a, aw khur dat datin anchhia a lawh bawrh bawrh.

'Ilo hlauthawng em? Kha mihring khan pawngsual che a tum a, in inchai a ,nikhua i hriat loh hnuah sual che a tum a, a nupui Pi Marami hian rawn nangching che u in a lo pui che a ni awm e, lung chhar fuh hlauhin a thatawpin nu Marami chuan a pasal lu ah a chhû a, tui ah tla lutin a rawn thawh tak mai loh avanga nu Maramin a en nak chuan a lo thi fel der tawh', tiin min hrilh a ,chu chu nu Marami thil sawi dan a ni.

An pindanah nu Marami nen kan ţhu dun ran a, 'I thiltih tum kha ka fanu in ka mang lamah min hrilh vek alawm, ka taksa hman tir ka duh a, ka chak si lo nen ka taksa a luah lum thei lo, inthiam lo duh suh ,mahni fa, a ril a rah pawngsual a thattu khan vawikhat mai ni lo, vawi sang tamtak thih a phu', tiin a fanu a sûn ţha leh tih hriat takin a inhnit hlawp hlawp a, a kut cher riak chuan ka ban a chul heuh heuh bawk.

Pawngsual min tum a, kan inchai laiin nu Maramin min hmu a, min lo puibawm a, pa Hmingthana chu thi ta niin thu an thehdarh a, thiam chang mahila mite chuan min en hrek hrek tho, Zoram khawvel a dengchhuak miau a, kha lama ka kal chhan erawh ka u Remruata leh Mely tih loh chuan min zawtchhuak zo lo, ni e, ka u leh ka ţhiannu bulah chuan a zawng zawngin ka hrilh vek a, min hrethiamin min hnem nasa viau.

Keifangah kal ka duh thu tukţhuan kil laia ka sawi chuan ka nu a lo ţeu hlar a ,mahse, ka u in min thlawp thung, chhuanlam ah nu Marami a lainatawm em mai, zankhat riak chauhin ka tlawh duh ka ti ve tlat bawk nen lungsi zan lo in min kal tir a, Melinda bakah kei leh ka u kan han zin chho leh ta.

Nu Marami chuan minlo lawm em em a,kan hnen a awm mai tura ka sawmna erawh a hnar.

'Ka fa te ka chawilenna hmun leh an lu nghahna hmun hi ka kalsan phal lo', a tih chuan ka nawrlui ta bik lo. Sum lamah a ni emaw, kawng dawngah harsatna a neih chuan min hrilh turin ka ti ta ngawt a.

Rinmuani khawvel a tawpna hmunah chuan nu Marami, Melinda, ka u leh kei chu kan kal leh hnak hnak a, kan thleng a ,nu Marami nen chuan ţap turin kan kal a ni ber e, Mely pawh hmeichhe lungno tih takah kei leh Rinmuani nu ţap min hmuh chuan a mittui a lo luang ve zung zung a, haw tum a ke kan pen chiah chuan kan hnunglam aţangin, 'ka nu', tih thawm kan hria a, rang zetin kan inher hlawm.

Kha thlarau Rinmuani, dâng var lap ţhin, lungngaihna a hmela awm tlat ţhin kha minung ang mai a lo dingin min lo nuih var var a, a heh a sen chek a, a hmelah hahdamna a awm bawk, hmanhmawh zetin nu Marami chuan a pan riak riak a, an inkuah thlawp, 'nu ka kal a hun tawh, ka phuba ka la zo tawh alawm', tiin a nu-in kir leh mai tura a ngen ngawih ngawihna chu Rinmuani chuan a hnawl sak a, an nufa chetla chu mittui luang zawih zawih chungin kan lo thlir ţhap.

Rinmuani chuan a nu chu nawr hla hlekin min rawn pan a ,ka kiang a lo thlen chuan min kuahbet thlawp, keipawhin ka kuah let ve vat a, ka beng bulah lawmthu min hrilh sapin lui lam chu a pan, tui chhunga a luh dawn chuan rawn lehhawiin a ban a rawn vai lap lap a, hlim hmel pu chunga nui var varin tui ah chuan a pen lut a ,a ral ta riai riai.

Chu THLARAU LAINATAWM zet chuan a lungangaihna,a hahna,a natna leh a huatna pai nasa zet aţang chuan hahdamna a hmu ta.

(TERESY)

Na taka min hrawm nawk nawk a, dimna tel map lo a min sual hnu a inha ţha mawlh mawlh leh, a kianga hlimhmel pu sâng chunga lo ding chu ka melh tlawk tlawk a, ka mangrama thleng tur pawh a ka duh loh, ni lo, chumai a ni lo, ka mangchhia pawh a ka hmuh duh loh lutuk ka chunga thlentir tute chu ka melh ngawih ngawih, ka ţap thei lo a, ka tawtin ka na ngut ngut thung.

Verthernaa khat mitmeng pu chunga min melh tu, nui hmel tenawm zet putu chu ka melh a, tawt zet chungin, 'Mely', ka ti ţiak a, ka inpetruh fan fan..

Za taka nui ri har harin Mely chuan ka u Remruata kamiz hmalam chu panhnaia a kilhsak hnuah min rawn melh leh ralh a, ka mit taka min enin a nui sak a, duat taka a bek tawn tawna dawm chungin a hmuiah a fawp, na zetin ka chhing sawk a, ka mit ka chhin rualin ka mittui ka biangah a luang lum pap.

"Mangţha le Teresy", tiin min chhuahsan a, kei erawh ka mut ngaiin ka mu tlawk tlawk tawp.

Ka nâ a, ka tawt a, ka ipik hluah hluah a, awrawl chhuah meuh a ţah chhuah ka chak ngei mai, mahse, ka thei lo, ka kut humruhin ka âwm ka chum dawt dawt a, helai tawt lutuk hi chhete tala a thawl deuh na atan tal pawh vawikhat chiah tal ţahchhuah hawk ka chak lutuk.

'Tualthattu inih kha, chhuanlam fahrah lutuk siamin lem i chang a, mi thianghlim ang maia lemchangin min bum a, mahse, min bum rei thei lo a nih hi tiraw ka nau, i chetdan tenawm zet ka hrechhuak ta si a, hei hi a nih hi surprise chu', ti a ka u in a sawi ri chu ka bengah a ri nawn tlut tlut.

He thil hi ka chunga thleng turin ka beisei ngai lo, beisei chu sawi loh ka la ngaihtuah chhin ngai hauh lo, mahse, ka pianchamah ngei kei hi pawngsual ka ni, ka piancham ah ngei ka khawvel an ti kehchhe ta, DAWTTHU vang lehnghalin, chu pawh, min hmangaihtu nia ka ngaih, ka nat hlautu tia chhuang taka ka lo sawi ţhin, ka pangchanna ka u lak aţang ngeiin a ni!

Ka tho chhuak a, chu hotel room zau zet chu ka enkual a, mahse, engthil nge awm a, eng thil nge inhung ka hre lo, ka mittui tla reng chungin ka ţap chhuak thei si lo, ka hah a, ka tawt a, ka pik hluah hluah, ka âwm ka ţham tawk tawk a, ka chum dawt dawt bawk, ka kawr hak thler deuh phang mai chu enin ka hnuai lam ka bih leh a, ka ţhutna khuma an bedsheet var sar phahah chuan thisen a awm, ni e, engahnge a awm loh ang, ka thianghlimna ka hloh miau alawm. Hlauhnain min tuamin ka bawp ruak hiang mai chu ka tawm chawih a, inhumhimna beisei zetin ka inkuah khawm ve ngawt ngawt a, ka taksa, bawlhhlawh chang mai tawh chu hliahkhuh tumin puan silh tura an chhawp chu ka ban rawk rawk a, ka silh nghal thuai a, ka taksa ruak kâng mai chu khuh mah se ka bawlhhlawhna a khuh bo pha si lo chu run lutukin ka ţap hawk, ni e, ka thei ve ta, awrawl chhuah meuhin ka ţap chhuak ve ta e.

Engemaw a ri rak a, kei erawh ka ţhut ngaia ţhu rengin ri lo chhuahna lam pawh ka melh lo, ka taksa aţanga chhuak thisen chu ka melh tlawk tlawk a, he thisen min chhuahtu hi ka unaupa ngei chu a ni si a!

Mangang takin ka nu àw in ,'Bawihi, eng nge thil awmzia, i ţha em?' Tia min panhnaih rawk rawk chuan mittui tling pamin ka lo melh a, mahse, ka inkhuhna chu la kiangin ka lo awmdan a hmuh chuan a tawp chawt a, rilru nat hmel fe-in saruak deuhthaw a ka lo ţhu niai mai chu min en tlawk tlawk.

Mak a ti tih hriat takin min melh ngawih ngawih a, kei erawh chuan a mit ah tak pawh en ngam lo in inkiltawihna a khat chung chuan a âwm zawn ka melh ngar.

Ka kawr hak inpawtthler deuh kawk te chu en in rei fe che chang lo a a din hnu ah harhchhuakin, ka kiangah a rawn ţhu hnawk a, min ban riak riakin min kuah thlawp, insum lek loin ka nu, nu a zawnga ropui ber maiin khawngaihna leh hmangaihna nen, lainatna zawng zawng nena min kuah chuan ka ţap leh hawk hawk a, ani pawh chuan ka chunga thil thleng hrethiamin a fanu duat, na taka hliam a awm chu min lainat luatah min ţahpui ve hawm hawm.

Mahse, engthil nge thleng hi!

Ka pa, kan ţhutna khum bul lawka ding run chuan min pan lawkin ka nu nen min kuai hrang a, min hnem a tum emaw ti a ka lo banna chu min hnawl sak rawpin ka chhip samanh a ţham a, khum aţanga min pawtthlain thinrim taka thaw hrawp hrawp chunga rum leh hawk ţhinin chu hotel pindan-ah chuan min hnuk kual a nih chu!

Ka nu mangang a au ţhat ţhat a, kei erawh ka pa min tih danin min nghawng luatah ka ţap ka bang hmiah a, na tuar ţhen chak chak chungin min hnuh na lam lamah tawlh kualin ka na tuar chu ka thaw hrawk hrawk, minute 5 dawn a ni awm e, min hnuk tawh loin min thlah hlawl a, kei erawh min hnutchhiahna hmunah chuan min kalsan ang angin ka awm mawl tawp.

'Zahpuiawm lutuk', tia min pan leh in ka tukkhum samah min ţham leh a, min phih tho nawkin min nawr kal dawt dawt a, ka ke pen a sak viau naa min nawr tu thà a nat em avang chuan pai chan chanin ka kal bah nak.

Ka tukkhum sama min ţhamna ti nghet sauhin kan hmaa bang awmah chuan min tauh tir dawt a nih chu!

Ka lû a hai chhawlh a, thei leh thei loin ka pa chu ka melh a, ka na tuar nasa lutuk chu tuar loin ka awn riai riai a, min dawm ding tum eih lo a ka pa ding ngul hnunga ka nu mittui tla chung leh min au tuar chunga ka lam rawn pan hlawk hlawk chu nuih lui sakin ka tlu ta thlawrh, ka khawvel a thim ta vek.

Hmun zau zetah ka ding ran a, field a ni maiin ka hria, ka hawi kual ruai a, tumah ka hmu lo, kha ka khawvel tehhrep ai kha chuan helai hmun a keimah chauha awm ka duh zawk fe, harhchhuah leh ka duh tawh lo.

Pen sawn tuma ka kè ka khaikang chiah tihah chuan ka hming ngeia min ko ri hriain aw lo chhuahna lam, ka hnung lam chu hawiin ka inher vut a, ka lainat leh ka khawngaih luat avanga ka taksa ka hman tir, ka taksa hmanga tualthattu, kha thlarau lainatawm zet mai, Rinmuani ngei khan min rawn pan!

Mak ti taka 'Rinmuan', ti a phun sapin ka ka hau a, ka lo en ngawih ngawih. A bo daih tawh ni khan ka hre si a!

Ka kiang a lo thlen chuan engdang mah a sawi lo, 'phuba i la duh em?' Tih chauh lo chu.

Inngaihtuah buai map lo in ka lû ka buk khum nghat a, nui var varin min ţanpui tur thu min hrilh sap.

A chanchin, a thiltawn leh a tawrhna zawng zawng ka hmuh a ka hriat khan ka nâ, ni e, ka na lutuk, mahse, a chunga thil thleng ngei mai, pawngsualna nunrawng zet ka tawh ve meuh chuan khang hunlai a ka natna te kha ka hmu tè ngawih ngawih, sawifiah thiam rual lohin ka nà a, ka natna hi eng ţawng mah hian a sawifiah theiin ka ring lo.

'Phuba la tur chuan i dam a ngai, tho rawh, tunah', min tiin Rinmuani chuan ka hmai ah min chhèm a, thli na zet thawk a min len kual nawk ang maiin ka vir zawk a, ka harh hlawl.

Ka ţhu chhuak zawt a, ka awmna hmun chu ka enkual nghal vat, damdawi in a ni tih ka hre thei, mahse, tumah ka awmna room chhungah chuan hmuh tur an awm hauh lo, ka lû na ngut ngut mai chu tawrh a har lam hret chu a ni e, ka dang a ro hle bawk, hawikualin ka mutna khum bul lawka tui bottle inhung chu ka ban a, hawng rawk rawkin ka dawt nghal khawlh khawlh.

Ka tui a hal luatah duhthawh takin tui chu ka in khawlh khawlh a, ka tuiin chu ka âm êm avangin ka in tihuh hial.

Tho chhuakin kawng in khar lam ka pan a, ka thleng ţep tih ah kawngkhar chu a rawn inhawng rawk a, nasa zetin ka phu dawrh, ka âwmzawn dawmin ka thaw hawk a, ka phut nasat vang nge ka lung chu a phu dawt dawt mai, tunge lo lut tih en tum a ka hawi chhuah chuan nuihza insum hmel zeta minlo en in mipa pakhat hi a lo ding run a, doctor a ni ngei ang le, doctor in an hak ang ţhin kawrfual a ha miau alawm.

A nuihza hmel insum vatin ka ţhat leh ţhat loh min zawt a, a zawhna chhang ta mai lo chuan 'tunge inih? Khawiahnge ka chhungte', tiin zawhna ka zawt let zat a, fiamthu ka thawh emaw tih mai tur a a nuih hawk chuan ka run kher mai.

Chutah, thutak zawkin, 'i chhungte ka la hmu miah lo, hotel ah nikhaw hrelo in i awm a ni awm e, mahni a chesual nilo in sawisak i tuar bawk', a tih chuan ka thaw hawk a, sawi zawm duh tawh lo in ka chhuah theih leh theih loh ka zawt a, mi khat tal la awm turin min ti sup a, ning zet a thaw hawkin ka ban ka phar hliai thung. Ka ţhat thu hrilhin ka insiam lui a, vanneih thlak takin ka card ka kawl hlauh, ka awmna man te pe felin ka chhuak a, harsatna ka tawh leh hlauh chuan amah be tur a min tiin a number min lak tir chuan ţha te in ka la ve mai bawk.

Ka chhuahsan dawn a min ngaihtuahna mitmeng nen a min melh khan ka hnuk a ti ulh lek lek mai.

Ni e, ka chhungte lak aţangin ngaihsakna ka dawng ta lo a, damlo chau tak chung a ka awm chung pawhin, kei, an fanu duat ni ţhin, pangchanna zawng zawng nen a tau ngher ngher ţhin tan kha chuan a na èm a, ka unaupa, ka hmangaih leh min hmangaihtu ni ţhin bakah, ka ţhianţha ber ti a ka chhal hnen aţanga diriamna ka dawn te, ka pa, min hringtu ngeiin ka dikna mai nio, a fanu in sual a tawk chung pawha thudik hailan tum lo a min sawisak lai a karah mihrang hlak, doctor pakhat ve chauhin min ngaihsakna mitmeng pu chunga min melh khan a nà èm asin.

Engvanga an rilru lo danglam zo ta nge an nih ka hre lo a, hriat lah ka tum hek lo, phuba chauh ka duh.

Mahse, chak lo taka khawsa thei ka ni lo, Teresy Lalngilneii lak aţang khan, a ngilneihna neih chhun kha lak boin a awm miau a, derdep taka khawsa tur a ni tawh lo, nunrawnna nen, huatna nen chauh ka hma hun ka en tawh ang a, chu chuan chak takin ka hma a hruai bawk ang, rilru natna indelhbeh tir a, ka awmhmun a indawmkun hman ka nio, ka phuba chu ka la ngei ang le, lo nghak reng rawh u.

Chemte hriam hmel zet, a hmawr zum kî vàn mai chu ka tuai hauh hauh a, he thil hmang ngei hian min ti na tute kha ka that dawn khawp.

Ka hriat ţhan em em mai thli vawt deuh var a rawn thawt deuh hak chuan ka nui chhuak hawk a, ka lam pana lo kal, THLARAU LAINATAWM Rinmuani chu melhin, 'a hun ta e', tiin ka lo phun khum sak, ani pawh a nui var var a, 'i kiangah ka awm zel ang, natna nunrawng ber hmanga ti na tu che hrawkhrui chu han chhat ta che', tiin min chhawn a, kum hial ka lo nghah a ka lo intuai hriamna, ka nghahhlelh ber mai hun ka tawng baw ta.

Picnic spot an hawn thar hlawt, R&M PICNIC SPOT ah chuan a ruk thei ang berin ka lut ţham ţham a, vawiin ni hian ka chhungkua lo ni ţhin, harsatna leh manganna vawrtawp min tawrhtir tu te chhungkua chuan an fapa, ka u ti a ka lo sawi ţhin leh ka ţhianţha ber ni a inchhal ţhin te inneih lawmna an buatsaih!

Sawm bik mi 200 bawr vel an ni awm e, an phu mur mur a, chung mihring ho lak ah chuan ka chhungril zawng zawng a ka mi huat te pahnih pawh an langsar nalh mai, wedding cake te chu zaiin hlim takin an nui hlawm a, ka nu erawhin hlim der hmel a pu, huatna ka pai nasat èm avanga chhuah a chet buan buan ka tum chuan min dangbettu a awm tlat a ,min dangbettu chu haw lutuk in na zetin ka thaw hrawih a, mahse, ka beng bul ah chiang leh fiah fahran a 'nghak hlek rawh, a rei dawn tawh lo', Rinmuani aw ngeiin a tih chuan ka ţhu leh hnawk a, huatna ka pai nasat èm avanga khur ru chungin an chetla chu ka thlir reng.

Chauh hmel zetin min hringtu ka nu, a theihtawp a ka thlavang hauh ve tu awmchhun chu an sir ah a lo ţhu ve a, ka nu ka hmuh phei chuan ka thawk a sak kher mai, a cher in a dawldang em em a, a mawihnai ah mikhual ho chu a nuih ve satliah mai chauh niin ka hmu bawk, ka pa erawh hlim tih hriat takin a nui huah huah a, ani pawh hian hremna a pumpelh bik hauh lo ang, mahse, natna vawrtawp, nunrawng zet min pe tu te ka chinfel hun ah chauh a ni ang.

A ţhenin tui an cheng a, ţhenkhat lahin ka huat te pahnih chu lawmpuina thilpek an pe deuh sek, hlim nui sangin an lo chhawn ţhin a, an au deuh lang lang tih loh chu ka thlirna a hlat deuh avangin an thusawi ka hre hleithei lo, an bengchhengin an ri nuaih nuaih hlawm a, inla changkang ho rual an ni bawk a, in tur chhawp hnur mahse rui buai hmel hmuh tur erawh ka hre lo.

Ni a tla ruai tawh tih ah chuan zanriah an ei hlawm a, kei anglo takin an hmel a hlim in an che reng reng chu an phur deuh surh vek ,chuang bik ka nih zia te ngaihtuah a ka hnuk a ulh dawn dawn lai chuan, min enkawltu Doctor, kum liamta a ngilneihna leh ngaihsakna mitmeng a min thlir liamtu kha ka hmu hlawl a, ral aţanga thlir ni si amah ngei a ni tih ka hre chat chu mak ka ti ru viau, ka kawmnel leh ka ţhian a ni lo a, mak tih loh rual ni lo chuan.

Mipui tam zawk haw in a hnukhawi ah mi 10 vel erh awrh chauh an awm ta, ka chhungkua ti a ka lo sawi fo te pawh rei awm lo in an haw a, ka mi duh te pahnih chu haw ve lo in an riak dawn anih hmel, an pahnih chauhin an awm ta, mahse,nghah hlek ka la duh, an nupa nun hmang lai ngei a ni ka thah dawn!

Zanlai a hnai tawh,dar 11 a ri dawn ruak tih ah thawm dim fahran in an riahna in tè ah chuan ka lut a, ka chemte pai hmangin harsa lo zetin kawngkhar ka hawng rak, inchhung ah chuan choka tè fel àt mai leh ţhutkhawmna ni awm tak tè fel khir kher a awm a, mut pindan lam aţang chuan nupa nun a thleng tur hlimthawm a chhuak bawk.

Ka hnaih hrat hrat a, an pahnih chauhin an awm bawk a, venthawn tur a awm an ti lo ni hmiang, kawngka pawh an kalh hran lo, kawngka inkhar chu ka nem hawng rawp a, duhthawh fahran a an lo che dun chu chawl nghal hmakin ka lam an rawn hawi rual ţhawt a, light èng fahran lo hnuai mah nise thimtham a ka awm rei tawh vangin ka hmu fiah kher thung.

Phàwk hrâ in an awm ngai ngaiin an awm tawp a, mit khap fak faka Remruata zawkin chet a lak rual chuan light a èng ta ut mai.

Saruak ngalngatin an awmdun a, eng hnuaia an nupa nun hman laia va ti khaihlak tu kei min hmuh chuan Mely zawk phei chu a ràk ţhawt a, Remruata erawhin tak deuh ngalin min melh ngawt ngawt.

'In hlim hun a tawp ta', ti a ţawng sehchilh nakin ka chemte ken chu ka tuai vir zauh a, ka mal loh zia min hriattir turin ka thlarau ţhian chuan a awm ngei a ni tih lantirin ka hnen a a rawn lan dawn apianga a tih ziah danin thli vawt vurin min rawn chhem leh a, thaw deuh hliaiin ka nui hak thung, ka mal lo e.

An mutna kianga an bathrope dah chu ban in Remruata chu a inthawlh sawk sawk a, Mely phei chu chetlak ngaihna hlawl hre loin a awm khawng lah reng, min ràp tih a mitmeng tlanchhe deuh dui aţang chuan ka hre thei, chu thil ka hmuh erawh chuan ka thiltih turah ka phur sauh thung.

'I hun a thleng e ka ţhian', ka tih rual rualin che thei tawh loin Remruata chu lai zetin a che chawl dawt a, hah hmel zetin a thaw hawk.

Ka bag ah tetakte a ka pai hrui chu la-in a kut ka hnungkhirh a, ka nem ţhut chuan a thlan a tla bat bat a, mahse, chetlak a remchan zawk na atan a kut, hnung lam a ka khirh sak chu a lu chung lamah la-in ka phuar ţha leh rih. Melinda erawh a mittui a tla pur mai, chet la thei lo tur leh ka tana awlsam zawk turin an taksa Rinmuani chuan a thunun miau a, engmah harsatna ka nei lo, ţawng tumin an bei ngial ţhin a, an khâ a chih tlat thung, ka tih tur ka ti mawp mawp a, an kut bakah an ke chu la kawp a ka phuarbeh zawh hnu chuan khum aţanga phih thla in chhuat ah ka mut dun tir rial a, Remruata bathrope hak pawh ka phelh hmiah avangin an nupa, min ti na tu te chu ruak ngalngatin an mu dun ral mai.

Nupa inngai leh innei hlim hlawt, inthlahlel zeta ka ke bula mu ţhiang rial te chu melhin ka nuih leh sak a, ka chemte la in a hmasa zawkah Melinda chu a thinhnun aţanga bulţanin ka zai riak riak a, nà a tuar si ,ţawngchhuak thei lo tura siam a ni si chu a thlan a tla bat bat a, kei erawhin nuam ka ti sauh thung zel si, ka chetlak a nuam sauh a, nâ an tuar nasat poh leh nuam ka tihna a zual ting.

A lâi ka zei thlen chuan chawl datin Remruata lam ka hawi a, a tha neih zawng zawng sawmkhawmin a inhumruh nasa hle tih a bek pawng ţawlh ţawlh leh a thlanin a bual huh hnap ah chuan ka hre thei.

Mely ka zai na chu duhtawkin a lu lamah ka chho a, a sam mawi zet leh hmangaihna an chendun avanga thur deuh bam ah chuan dimlo lutuk a ţham nawkin a hrawkah ka chemte hmang chuan ka zai leh hrawk a, a khurh deuh dat dat hnu ah a zawi ta hnawk.

Remruata lam hawiin ka inher a,a chhipsam a kek deuh lawpin thinrimna nasa lutukin min tuam avanga aw sehchilh nawkin, a hmangaih, a nupui lam chu en turin ka kuaiher a ,a nupui ruang a hmuh chuan a mitchhing sawkin a mittui a tla, ni e, min hmangaihtu ni ţhin, natna nunrawng lutuk min pe tu sakawlh kha a mittui a tla ve, a na ve thei anih chu!

Aw khur dawt dawt chungin, 'I nupui, dawta i bula ka chanchin sawi kualtu, i hmangaih kha nunrawng taka i sual khan a that, a awm tawh lo, a nâ tiraw, i hmangaih ngei mai i mithmuha a nunna chhah sak a nih chuan, mipa biangah pawh mittui a luang ve a nih kha tiraw? Kan hmangaih te kan mithmuh lai ngeia na tak tuar a, an nà chu tuar zo loa an thih khan a nà a ni tiraw? Chu ai chuan maw, kan hmangaih te ngeiin na taka min siam a, nunrawng taka kan chunga chet an lak hian tawrh a har asin, a na lutuk, mang lam pawha ka man duh loh thil, ka hmelma chungah pawh thleng tura ka duh hauh loh thil kha ka hmangaih, ka unaupa leh ka ţhianţha ber lak aţanga ka dawn khan a nà ka ti a sin', tiin ka aukhum tuar a.

Sawizawm ka tum ûk naa sawi duah ngaiin ka hre leh lo, thaw hawkin, 'a kiangah ka kaltir ve ang che', ka ti leh sap, a ke lamah kal thlain na taka min siamna hmanrua, a mipatna chu dawm chatin dim lo lutukin ka zai leh hrawk a, ka theihtawpa ka zai avangin a bung hmawk!

A hmel ka en chho a, a na tawrh avangin a sen ţul a, a thlan a tla nasa sauh, a insehruh nasa a, thawm erawh a chhuah thei hauh lo, ka huatna pai zawng zawng a laka ka inhrikthlak a, a hrawkhrui ka chhah hnu ah chuan ka taksa ţang lutuk chu ka thlahdul a, mahse, ka la hahdam lo, ka la thawl famkim hauh lo. A fanu, a hrin ngei aia a fahrawn nunrawng leh a fahrawn bialnu fuih kualna awih a, hurherh tak ngaiha min ngaia min thlauhthla tu kha tawrh tir leh ka la hmabak tlat.

Ka in tia ka lo sawi ve ţhin, hlim taka infiam a ka tlankual na ţhin, ka nu leh pa te pindanah chuan ka pa chu nunna nei tawhlo tih hriat takin chhuatah thisen nen a let bam a, ka nu erawh ka luh tirh a a taksa a damdawi ka thun avangin tui zetin a la muhil thung.

Ka pa ruang chu thlir nawn leh in ka nu mutna lam chu ka pan a, a taksa cher riak mai chu thlir a mittui far sak chungin a chal ka fawh vawng vawng hnuah mangţha hlen tawh turin ka chhuahsan ta a.

Ka kianga ding, ka hmuh theih si loh, ka hnena awm tlat si ka thlarau ţhian Rinmuani chu biain, 'kan tawrh ang tuar ve tu, vaubeh an tawh avanga kan pen anga pen thei lo, an ke penna lai tura daikhalh tu an awm avanga huatna leh natna pai te tan, an aiawhin penchhuak ang hmiang', tiin ka nui var var a, min pawmpui a ni tih lantir nan a hman ţangkai em em mai thli vawt var in min chhem leh chuan ka nui hak hak, ni e, ka phuba ka la ta ,TERESY LALNGILNEII ngilneihna lakbo a awm, huatna leh khakna chauh paitu, PAWNGSUALNA haw em em tu hi ka natna ang tuar te tan ka pen dawn a ni, ka kianga ding hian min phatsan dawn lo tih ka hria a, ka mal lo e, anni pawh an mal tawh tawp lo ang, an phuba laksak tu tur kei hi min nei tawh si a.

NOTE : A nasa inti em? Pawngsualtu ai khan a ràwng niin inhre hial em? Natna pai a nasat lutuk chuan pawisak a neih theih tawh loh!