SIGNATURE zo tawh

SIGNATURE

'Ring the bell, lo kal vat teh', tia min ko lawng lawngtu chu ka ţhianţha ber Zonunsanga ngei a ni, rawn luh ve mai tur hi a ni a, pawn aţangin ring zetin min ko kher zel, chhang ta lem lo chuan ka nui vur vur a, ka rack-sack ah chuan Remremi tana Amazon a ka chah sak purse mawi taka ka tuam chu dah lutin ka ak a, darthlalangah chuan uluk fe hian ka inen leh te te a, ka lukham bula ka mobile dah chu ban leh vatin pawnlam ka pan nghal zat.

Vawiin hi Zonunsanga bialnu Remremi birthday a ni a, kan pathumin kan lawm ve dawn a ni. Kan kal na tur lah chu surprise an ti deuh tlat a, a pawi lo e, surprise te chu a nuam a lawm.

Ţhian dang vak kan nei lem loa, kei leh Zonunsanga hi tette aţanga inkawm chho kan ni,  a bialnu Remzopuii, Remremi tia kan koh nen hian kum hnih vel an inzui ve tawh a, an inngaihzawn dawn pawhin ka phalna a la thlap nghe nghe, kei hi kum sawmpariat mi ka ni a, Zonuna hi kum sawmhnih a ni tawh, a bialnu nen hian kan inrual thuak a, kei aiin thla li lekin a upa zawk, Lalrinsangi ka ni a, No-i emaw, Ringring tiin min ko ţhin a, Zonunsanga liu liau hi chuan Ring the bell min ti ţhin.

Ka hua tih a hriat avang hian min koh nuam a ti sauh lehnghal.

Pawn ka chhuak chu kawtah Zonuna leh Remremi bakah mipa pakhat hi an lo awm a, chu pa chu ka la hre ngai lo, Remremi ţhian a nih ka ring ngawt, Zonuna nen hian inkawm chawt kan ni a, mahse mipa a ni a, ţhian ţha lutuk lem lo han kawm ve zeuh chu a nei tho, a ţhian kawm ve zeuh zeuh ho chu hriat loh ka nei tlat lo a, Remremi pawh chu engahnge maw midang a rawn hruai le ka ti rilru nang nang a, ka zepui chhuah thei dawn lo nia inngaiin chu pa lo tel ve chu ka huphurh nghal ringawt!

Harhvang tak leh phawk ve tak ni mah ila ka hriat ngai loh bulah erawh ka ţi ve dûk ţhin miau a.

'Ring the bell, hei Zorinsanga, Zorin tiin i ko dawn nia, Remremi cousin a nih hi, a tlan loh ni a nia, Remremi pawh a scooty a chiang lova, workshop ah a dah, keng mai rawh', kan Zonunsanga chuan a lo ti nghal zuah zuah a, ner khum nângin ka let leh a, ka nu hnenah scooty ka ken a ngai tih sawi pahin chabi leh helmet ka la a, ka chhuak leh hna hna.

'In pahnih khan rawn inphur mai rawh u', tiin kan inngaizawngte chuan min tlan chhuahsan daih a, ka chhiatkhum nghek ringawt, ka insiamchhia chu a hmu em mawni, ka bula mipa sang lam, sam kir lek lek, mitmeng thuk zet chu a lo nui ri hawk a, a landan cool ang chiahin a nui ri pawh a ni ruih mai, enga! Kei hian mipa, ka la hriat ngai hleih loh hi cool ka ti a maw! Rapthlak inti deuhin ka lu ka thing nawk nawk a, scooty chu ka start a, kan kal na tur ka hre hauh lo!

Ka hnungah chuan a rawn ţhu ve a, a hniam suihin ka hria, a thau bawk si lo, a sang em em tawp a, eng titih a chutia rit em em nge maw a nih le ti rilru in kan kalna tur ka zawt a, nui leh hawkin a chhuk a, keipawh chhuk turin min mitmei vut, rei vak lo mak ti deuh taka ka melh hnu-ah ka chhuk ve mai a, ka chhuk a ka din fel veleh ka helmet chu a rawn phelh nghal vut, ka lo mengphawk deuh hrû a, hepa hian ka scooty khalh a tum ringawt a nih chu!

Mahse kan kalna tur lam ka hre si lova, engmah chu ka sawi bik lo, amah chuan khalhin a hnungah ka chuang a, a khalh a chuan a nuam em em, tlan chak si lovin a muang chuang hauh lo, hahdam takin ka ţhu a, mahse, ka ning rilru hle, min biak a tum si lo, keiin be hmasa dawn ila sawi tur ka hre bik der si lo. Lái ru deuhin kan kalna tur ka zawt a, side glass aţanga min rawn melh zeuh hnu-ah min chhan pawh tum lovin hmalam a melh lehnghal ngur ringawt, ka ner nâng a, han vin chiam ka tum naa ka insum rih ang e, ngawi rih phawt mai teh ang.

Sairang lam panin kan tlan tih ka hria, PTC peng kan tlanpel a, Sairang kan luh chuan dawr lian ve pangngai tak kawtah kan ding a, eitur kan lei dawn a ni mahna le, mineral water leh chips eng eng emaw kan lei a, ka hmaih theih loh ice cream ka lei tel hram bawk, thil thlum ka ngainat awmchhun chu ice cream hi a ni mai awm e, mak deuhin thildang thlum lam ka kâ a a luh chuan ka ka chhung hi a thùr ka ti a, ka buai ziah, pumpui chak loh vang an ti a ni awm e.

Kan tlan zel a, lei kan thleng a, lei chu tlanpel lehin thui pawh kan la tlan lo tihah kawngsir ah a ding a, ka chhuk vat, 'khawnge Zonunsanga te chu, an kal hmasa zawk sia' tiin ka zawt nghal a, a bike ka hmu tlat lo a ni. A sam tuai vutin 'ka hre lo' a ti hawk a, ka lo meng tang hrâ thung.

'Ehh, ehe.. eng nge a awmzia?' Ka ti nak a, mak deuhin ka hlau rilru ta tlat, a ramhnuai ve tawh angreng si a, motor rawn tlan awm lovin he pa hian min pawngsual ta se tih zawng zawng ka ngaihtuah nghal a, ka insehruh vak ringawt, ka ngaihtuahna chu a hria a ni mahna, nui chungin ka sam a rawn tuai thur a, ka chhungril a khur ru der der ringawt, 'i ngaihtuah ang kha a ni lo a nia, ka tina dawn lo che, mahse ka nau piancham kha an pahnih a hman an duh deuh a, hmundangah an kal, kei hi min ring tawk a, ka kutah an dah che a ni' ka mitah tak en chunga a sawi chuan ka mittui a tla nghal ringawt.

'Hey, i pawi ka sawi em ni? Tihnat che ka tum lo, i duh loh chuan kan haw lehnghal dawn nia, ţap suh', ka mittui tla chuan a rilru a tibuai tih hriat zetin a sawi nghal zung zung a, ka lû ka lo thing nak nak thung.

Kei hi min thlim a nih chu! Ka ţhianţha berin min thlim, kei aia ngaihpawimawh a nei a, ni e, an inngaizawng a, ka hrethiam lutuk, mahse, min hruai ve turin ka ngen pawh a ni lo, anmahni zawk khan min ngaipawimawhin min sawm zawk emaw ka ti a, hnawk min ti leh tho si! Hnawksak min ti leh tur chuan min sawm buai loh mai tur a lawm.

Rei fe ngawi renga kan din hnu-ah chuan, 'helai a kawng an siamah hian chho ila, hmun nuam deuh a awm a sin,' a ti a, ka mittui chu ka tuaihul sawk sawk a, ka bu nghat, kan thil lei te chu khaiin hma a hruai a, kawng zau vak lo an sial-ah chuan kan kal a, thingkung leh mau karah kawng tetakte hi a awm, kûn dan dan chunga kan chhoh hnu-ah chuan a lo eng deuh uar a, ka au hluai bawk, tuikhawhthla lian vak lo hi a awm a, a hnuaiah chuan tui chu tlingkhawmin lungpher zau fahran pathum ngawt a awm bawk, ka nui var var a, eng sawi set set lovin ka kekawr ka pawtchhing nghal hmak.

A zau hran lo naa a nuam viau mai, lungpher ah chuan ţhu-in ka pheikhawk ka phelh a, ka ke chu tuiah chiahin ka mit ka chhing vang vang, thing rim, ramhnuai rim te chu duhthawh zetin ka hip kawk kawk a, ka hlim leh veng veng tawh mai.

Hla ruahţhamloh dik tak, thar vâk mai chu phuah nawk nawkin ka zai rat rat a, ka la zai lai reng chuan Zorina chu a rawn nui ta hawk hawk mai, mak ti deuhin ka en vat a, a pum dawmin a lo nui tlek tlek, min kawkin a  nuih za lutuk chu a pum a dawm ngawih ngawih a, a ngaihna hre lo zetin ka lo khi ve hui ringawt, a hnu-ah chuan insum in ka zaithiam loh zia chu a rawn sawi a, 'hmm, thiam ka intih vang pawh ni lovin ka lungleng zai a ni ve mai a', ti nghatin a aia ringin ka zai lehnghal lung lung.

Ka darah a rawn hmer a, ka en chho vat, beer can hi a lo hum a, ka duh ve em tih min zawt nghal zat, ka lû ka lo bu nghat a, ka in ngai lem lo na-in ka chhin ve chak tlat, min kheuh hawnsak hnu-ah min pe a, a lo dai deuh ràih mai, a pai lawksa a ni ngei ang le, ka dawt khalh a, a hiar, kha ru deuh, ka sawi thiam chiah lo, mahse ka lem chiah chu ka pum a dai thla raih raih mai, a tui loh lem loh hi, ka in ta khawlh khawlh a, ka in zawh hnu-ah a dang a la neih leh neih loh zawtin a buk nghut takah chuan ka dil leh nghal zat, min en vung vungin a va lakbelh a, min kheuh hawnsak leh hnu-ah min pe leh a, ka lem lehnghal khawlh khawlh.

Ka zâng deuh hûih a, a nuam viau mai.

A hnu-ah ka phur chuan ka kawr hak chu ka hlim a, ka kekawr hlip lehin tuiah chuan ka lut a, ka cheng barh barh a, ka rak chul bawk.

Lungpher a ţhu a beer lem chunga min lo en vung vung tu chu ka ko lawng lawng a, lut ve turin ka sawm nghal, a lu a thing a, mahse a cheng ve tur a ni tawp.

Ka va pan a, lo lut ve mai mai rawh tih pahin ka pawt sek sek a, a hnuah chuan inhlip in boxer nen a rawn lut ve a, tui a intheh in kan nui dun hawk hawk zel.

Lung hriam nge mawni ka rap fuh a ni mahna, ka kephah chu a na thip zawk a, ka au ţhat, Zorina chuan min rawn ngaihven vatin thil awmzia min zawt a, ka lo sawi a, kan ţhutna lungpher lamah chuan min hruai a, ka kephah kan han en chu thuk vak lo hian a lo kak a, a thi ţha duh phian zui, a bandana ken chuan min tuamsak hmiah a, a tuam lai chu ka lo en kar a, ka keţhiah te chu ţhing ka ti reuh bawk si, ka zak lek lek mai.

A tuam zawh chuan a rawn hawi chho a, ka lo melh ve kar bawk, a thawk deuh thut ka ti mai, min rawn hnaih lehzualin ka hmui ah tak a rawn fawp siah a nih chu!

Min ţhawn vang nge ka hre lo, ka hamhaih te pawh a ni mahna, ka lo dawh mawl tawp a, a hnu-ah phei chuan thiam leh thiam lovin ka lo fawp let ve a, kan che chhunzawm nghal buan buan. Nakinah ka inchhir ang em ka hre lo, mahse tunah chuan insum tumna ka nei hauh lo!

Ka thianghlimna ka hloh na hmun leh ka hloh na hun chu ka ngaihtuah chhin ngai lo, pasal neih takngial pawh! Tuichhungah, ka vawikhat hmuhna mipa lakah leh nghal!

Kan zo chiah chu ka thaw hawk a, a tirah na mah se a tawp lam kha chu a na karah a nuam a tel!

Ril deuhin min fawp vang vang a, kei erawh kan thiltih zawh chiah khan min la nghawng nasa lutuk, ka lung su dup dup pawh a la reh lo, reife tui chhungah chuan kan awmdun leh a, Zorina chu inpeih leh nghal at mah se 'i chau lutuk ang', min tiin a insum a, tui aţanga kan chhuak chiah chu ka pum a ri nghal rawk rawk.

Ka nui var var a, ka ke pen chu a zàng haih lo, a nuam lo ţhûm, kan thiltih vang ni-ah ka ngai ve mai a, tawrh hrehawm lutuk erawh a ni lo.

Kan chips lei thlak te chu hawngin kan ei a, ţam chu a hnem ve deuh e.

Rei awm tawh lovin kan inphur haw a, kan la huh deuh zuih mai, tuiah kan awm reng bawk nen ka thil in khan hna a thawk rei lo a ni mahna, ka lu a na fek fek a, beer ka duh leh thu a hnung aţang chuan ka hrilh sa sa a, min chhang lem lo naa a taksa che aţang chuan a nui a nih ka ring, ka khi ve sak ringawt.

Rangvamual kan thleng chho a, in pakhat zawnah min din pui dat, beer chu can hnih a lam a, ka bag ah ka dah vat, tluang takin kan in chu kan thleng a, Zorina pawh chu rawn lut kawi lovin a haw nghal a, keipawh in-ah lutin ka inbual sawk sawk a, khawsak ka rel hnu-ah ka pindanah ka mu hahdam a, rei pawh ka mut hma-in ka muhil a ni ngei ang, ka mangah chuan hmeichhe aw mawi zet hian 'No-i, ka hmangaih che, ka ta inih loh chuan tu ta mah ini thei bik lo', tiin min lo bia a, a aw chu mawi viau mah se thinrimna thûk tak a pai tih ka hre thei!

'He i puma naute pawh hi ka that dawn' ti ţhatin ka dul chu a tlawh chawrh a, ka râk ţhat rual deuhthawin ka harh hlawl, khua a lo thim deuh ruih tawh, ka mang avanga ka thlan tla deuh hliam chu ka hru tawk tawk a, chutih lai mekin ka mobile a lo ri ral ral bawk.

Zonunsanga a ni.

'Hello' ka ti sap a, ka aw chu a khur dar dar mai, ka mangin min la nghawng deuh a ni mahna le, vawiin a min thlim avangin thupha a rawn chawi a, han ankhum hrep ka chak viau naa ka ţhulh leh, a pawi loh thu hrilhin ka chauh thu ka sawi a,  'naktukah kan inhmu dawn nia' tiin min chhanletna pawh nghak lovin call ka ti tawp hmiah.

Min thlim avang te, ka hriat ngai hleih loh mipa kianga min awmtir avang te khan hauh hrep a ka awmdan lèlo zet avanga amah Zonuna chu puhmawh vek hial ka nâp a, mahse, ka inngaihtuah harh zawk, a thiam loh a ni lo, kha pa Zorina khan min tilui ngawng ngawng lova, keipawhin ka lo mamawh let ve tih ka pha thei lovang, naupangte ni chungin ka thianghlimna ka hloh der chu a ni a, chuta karah ka bialpa a nih chu sawi loh, ka vawikhat hmuhna lehnghal, ka nu in hria se a va na dawn tehlul em.

Thu ţha tamtak min hrilh zingah mipat hmeichhiatna hi nupui/pasal neih hma chuan a ţha lo a, Pathian pawisawina a ni tih a sawi tel ziah si a.

Kan chhungkaw chanchin tlem sawi ta ila, Laipuitlanga khawsa kan ni a, kan in hi mite aia changkang leh nalh chu ni lo mah se mi in kan luah erawh a ni lo, ka pa hian ka sen laiin min sazumeidawh san a, ka nu hian min enkawl zui a ni. Unau pian pui ka nei lo bawk.

Ka pa hi Lalramnghaka niin ka nu hi Ramchullovi a ni thung, ka nu sawi hmangin amah hi Thingtlang chhim lam khaw chhuak a ni a,  ka pa chhungte leh ka nu chhungte hi an induh lo tawn ve ve a, mahse tuithlar pawh pawisa lovin a hmangaih vangin ka nu hian ka pa a zui! Tun thleng hian ka nu leh ka pa chhungte hi ka la hre pawh lova, anni pawhin min ngaihsak fahran bik lo a ni mahna. An inneih tirh chuan an hlim hle a, an inthlakhlelhna a nasat vanglai tak a nih vang te pawh a ni ang chu.

Ka pa chuan taxi a khalh ve ţhin a ni tih zawng ka hria a, a nupui, ka nu aia a thlan tak pawh chu ka hre chuang lo, a chanchin hi ka hre tam lova, ka nu in min sawipui a tum pawhin ka bengkhawn duh lo ţhin. A chungchang hi tam ka hre hek lo, a nupui leh a fa sèn kalsan a hmeichhe dang um thei mipa chu ka haw hlur a ni tawp.

Nausen pawm a nih avangin ka nu hian ka sen zual lai phei chuan zu a zuar ve ţhin nghe nghe a, ka leikang deuh huna tawpsan tum a ni.

Mahse, a pasalin na taka a hliam miau avangin a rilru hrisel lo ta na nâ na chu a taksa pawhin a tuar lo thei lo a, a kum aiin kum 10 dawnin a lang upa nghe nghe, thinlung taka a nui ka hmu ngai lova, ka tan erawh hlim hmel a pu lui ţhin, middle school ka kal thlengin zu chu kan zuar a, mahse, ka school kalna lamah kan sum lakluhna avanga hmuhsit ka tawh ţhin avangin a lo inkhawl ve tawh na te nen ka nu chuan wholesale dawr lian ve pangngai tak a siam ta a, hnathawk pawh mi pali lai a chhawr ve nghe nghe.

Pathian hian hmeithai leh fahrah te hi a lo hmangaih khawp a, kan nunhlui min chhui sak lovin kan eizawnnaah chuan kan tluang em em a, kan nufa chauh kan ni bawk a, mi angin hausa lua ni lo mah ila rual awt takin kan khawsa bik lo, ka nu chuan nitin dawr a nghah peih loh pawhin kar khatah ni li tal a kal ţhin a, a siam tirh te aţanga kan hnathawk te hi chhawr chho a ni bawk a, an rintlak em em, intihah lo turin ka ti fo naa a thawh nawm chuan in a tawm reng zawng tiin a chhuak leh nge nge ţhin.

Thu ţha leh nunphung min hrilh awl lova, hmeichhe tana virginity a hlut ziate, eng thil pawh ti ila rinawm taka awm tlat turte, bul kan ţan tawh a nih chuan tawpsan hni hne lova a tawp thleng ngam turin min fuih ţhin.

Keipawhin ka tana ka nu thawhrim zia ka hria a, tihnat ka duh ngai lo.

Mahse, kei hian vawiin ni ngeiah khan ka nu chu ka phatsan a ni, keimah leh keimah ngei pawh ka inphat a, mahse, inchhir tur ka ni lo, engpawh he thil hian lo nghawng se min vuakletna chu ka tuar ngam tur a ni.

'TIHPALH A AWM LO' tih hi ka sawi fo ţhin a ni lo em ni!?

Ka tuhrah seng ngam lo khawpa hmeichhe dawizep ka ni lo ka ti ţhin a, tunah pawh inchhir sawt tawh loh naa indawmkun ka tum hauh lo, ka rilru a nuam lo tih erawh ka zep chuang hek lo.

Ka nu in a aw dam ràihin hmangin chaw ei turin min rawn ko a, ka hmel landan chu darthlalanga en in hmel danglam tak pu lo turin ka nui lui vel a, hetianga ze zawi deuh ruiha min hmu a nih chuan zawhna khirh tak min zawt ngei ang.

Theihtawpa nui luiin pindan chu ka chhuahsan a, chaw ei ka siam nghal rak rak, ka landan ţhin pangngai anga lan ka tum viau chung pawhin ka nu chuan dik lo a awm tih a hre tlat, min zawt ta nge nge a, tui kan chen rei deuh thu leh ka lû a nat deuh thu ka hrilh ta ngawt, chaw pawh tihluihna hmangin ka thléng ami chu ka ei zo lui hram hram a, ka nuam lo nia ngaiin ka nu chuan thleng ka sil pawh a remti lo, ka pang min deh sak a, a lo sa deuh a ni mahna, nachhawkna eia mu hahdam turin min ti a, keipawh ka thâ a za lo bawka, hnial lui loin ka pindan lam ka pan nghal mai.

Naktuk hi College ka rahna ni hmasa ber tur a ni a, ka kal ve châkna ngawih ngawih ţhin a nih vangin College lam chu ka ngaihtuah lui ve ngar ngar a, tlemte tak tak chuan ka zia deuh e, mahni indemna nei lian viau mah ila ka rilru tak chuan ka inthiam ru mawlh mawlh reng a, thildang ka ngaihtuah mumal thei lo achha chu a ni e.

Nachhawkna chu ei ta lem lovin kan haw kawnga beer kan lak chu ka bag aţangin ka phawrh a, kheuh hawngin ka dawt khawlh khawlh, ka in zo vat a, pakhat la awm pawh chu ka kheuh hawng leh nghal zat.

Khaw en laia ka awm a tihnawm ang khan ka awm thei ta miah lo chu mak ka ti, khatianga rilru zângkhai tak khan awm ka duh leh a, mahse, ka fim kar lawi.

Thawk la hawlhin ka tho a, ka hmai phihin ka hrûkpuan hmanga ka hrûk hul hnu-ah ka khumah chuan ka mu ngât a, ka mut lah chu a chhuak hlawl lo.

Lehkha ka chhiar peih si lo chu ka mobile ka lek a, whatsapp-ah pawh lût peih lovin youtube-ah ka lut a, offline a ka save ho ka mut dawn apianga ka ngaihthlak fo chu ka play a, ka mitchhingin hla thu-ah chen ka tum a, ka dam suai suaiin ka hre hial.

Rei fe ka ngaihthlak hnu-ah ka muhil ve leh mai bawk a.

'He i puma naute hi ka hua, kei hi eng nge ka ţhat lohna? Fa ka pe thei ve lo che a tiraw? Mahse ka hmangaih che a sin, nang hian i hrethiam duh lova, min hnaih ve chang pawhin ka rilru ang pu ve hauh lovin ţhian ang chauhin min kawm a, he mipa ka hnaih chhan chu maw, nang ka hnaih theih na atan che a ni, he pa hi engahmah ka ti lo, nangmah ka hnaih che a, i bula ka nuih a, ka kianga hlim hmel i put theih na atan chauh a ni ka hnaih ni.'

Ka mitmeng hmanga thu tamtak ka fah che lah i hrethiam lo a, min thlir liam mai mai a, hmangaihin hmangaihtu engahmah ngai lova a enliam mai mai chu hmangaihtu tan a na lutuk, ka nâ, ka na lutuk, chuvangin na tawh lo turin kan pahnih hian thi dun law law ang Lalrinsang', tiin hmeichhia, a hmel ka hmuh theih si loh hian min lo hrâwk tuar tuar a, ka ip chawih chawih thung.

Ka harh leh chuan zing lam dar 4 a lo ri tawh a, mu tawh lovin ka mumang chu ka ngaihtuah zawm a, hmehbel tur ngial pawh ka hre lo.

A mak tih bak ngaihdan ka nei thiam lo, hmeichhe ţhian hnaih tak ka nei si lo, ka hnaih ve ber lah chu ka ţhianţha ber bialnu a ni a, an inhmangaih hle tih ka hre bawk si, mang satliah anga ngaih ka tum ngial a, ka rilru kil khatah erawh a awm reng dawn tih ka hre mai, mang danglam tak a ni ngat mai.

Ngaihtuah zawm ka duh loh vangin ka mobile bawk ka bél leh a, youtube aţang chuan movie te ka en ta vel mai mai a, ka ţahpui leh pur tawh, ka mittui hi a tla sam em em a, rilru na taka ţah erawh ka nei lo, chutianh ka nih lai chuan Movie leh thawnthu ka chhiar a ka en hian ka mittui hi a tla sam em em a, hmeichhe no tak ka ang ţhin. Thawnthu ţhenkhat phei chu thawhah dâwn dawnin ka ţahpui thei nia mawle!

Khua a éng ta ut a, ka inbual sar sar, ka intifai zo ka college rah ve na tur ni hmasa ber atana ka inchei mawlh mawlh ka zawh meuh chuan ka phur leh viau tawh mai.

Ka mamawh tur te chu ka khung kim em tiin ka bag ka endik leh te te a, theihnghilh leh hmaih ka nei lo nia ka inhriat hnu-ah pindan ka chhuahsan a, ka nu-in ka ţhat leh ţhat loh min lo zawt nghal zung zung.

Ka thawh nawm viau thu hrilhin tukţhuan ka ei nghal sawk sawk a, ka helhhawlh ve deuh nge mawni chaw ka ei lai te chuan ka nui leh vur vur ţhin, hahthlak hian.

Ka tlan loh ni a nih vangin ke a ka kal a ngai dawna, taxi lak ka peih lo a, ke in ka kal mai ţhin, chhuk deuh hlir a ni bawk a, ka ei puar hnu chuan ka bag ka ak a, ka first day a nih vangin ţan hma-in fan kual vel te ka duh ve dawn nen, chhuah nghal vat ka tum a, ka nu chuan nileng a hun nuam tak ka hman theih na'n duhsakna min  hlan mawlh mawlh, nuih var var paha a biang piai sak vei zauhin ka chhuak a, ka nu pawh â min tih hmel zetin a nui ve hak hak tho, kan kawta ka thil hmuh vang erawh chuan ka mengphawk hrâ ringawt.

A bike ni ngei tur ngheng pahin kawisawi leh thatchhiat hmel zet hian Zorina a lo ding run a nih chu! Min hmuh chuan a lo ţhen deuh sak a, a ban min vai khum zauh bawk.!

'Ish, eng nge ilo tih ringawt a?' Ka ti bah deuh nak a, a khi suk, min chhang lovin a khabe a tuai zauh a, ka lo en kar thung, 'ka lo hruai dawn che', a ti sup a, 'no, thanks' tih khawmawi pawh awm lo chuan za lo zetin ka ţhen khum ve ringawt.

A bike chuan kan inphur leh vuk vuk a, ka college kal na tur HBC ah chat min thlah a, ka kalna tur ka sawi hauh lo! Biak pawh kan inbe lo zawk mawle. Phâwk fe-in ka en deuh hâ a, 'ehhhh' ka ti hliai ringawt, a nui suk a, ban hun-ah min hruai leh tur thu min hrilh hnu-ah min kalsan a, ka hmuh phak loha a tlan liam thleng chuan ka en zui vang vang.

'Hey hey, Ring the bell', min ti lawng lawng ri ka hre leh a, Zonunsanga leh Remremi an rawn lang nghal zat, Remremi pawh hi a first year na ve tur tho a ni a, kan Zonuna erawh 4th Sem a zir mek thung, Remremi nen chuan kan subject lak tur pawh a lo inang a, Arts kan la dawn a ni, ţhian dang zawnbuai ngai lova kawm tur ka nei chu ka lawm ru viau mai.

Kan kal hma bawk a, mi tlem a zawng bak kan la awm lo, Lecturer ho lirthei dahna phei chu a la ruak vek.

Zonuna chu thil lo hre sa tawh a nih vangin kan tana ţangkai hmun te chu min fankual pui a, a hnu-ah chuan chaw chhun ei huna inhmu tura intiam in kan class tur thleng min thlah a, ani pawhin min kalsan zui a, tlar hnung ber dawttu-ah chuan Remremi nen kan ţhu dun ran a, mithar vek kan ni bawk a, kan zawiawi rih viau mai, Remremi chu a titi sap sap a, kei lahin chhaih phet ka lo tum ve bawk nen a lai zawk nge ka hre lo, a tûm leh deuh hmak zel, Remzopuii nen hian kan mizia a inang lo viauin ka hria.

Ani chu ze zawi leh dam ràih mai a ni a, a nun a nem hlein ka hre bawk, thil a sawi siam siam lai hian a nui sen sen zel a, engtinnge kan Zonunsanga pui hi a duh le aw ka ti ve vawng vawng zel, ani aia ţha a hmu hnem awm si a, Zonuna lah inti mipa ta ngang a ni bawk a, an inhmeh lo hi ka ti ru ţhin khawp lehnghal.

Mahse le(h), hmangaihna a ni miau a, kei erawh ngaihzawng ka nei ngai lova, star ka neih ţhin awm pawh ka hre lo, chutihrualin Zonuna nena nikhua kan hriat aţanga inkawm ta ngang kan ni a, ka zia pawh a nû hnâp ve hran lo, ka pa hràk chuang lem lova, ka tal talin ka tal ve tawp a ni ber e.

Ka tetlai aţang tawh hmeichhe naupang lawmzawng te hi ka lawm ve lem lo a, Zonuna infiamna duhzawng ka tui pui ve hmiah zel.

Kan ni hmasa ber a ni tlang bawk a, zirtirna pawh mumalin kan la dawng lo, inhmelhriattawnna kan nei a ni ber e, kan lecturer zinga hmeichhe pakhat, Miss Genevieve chu a chhelo kher mai, Zirtirtu dangte angin a nui tam ve lo a, a nuih ve chhunah pawh a tilui niin ka hria, ka thawnthu chhiar ţhenkhata 'hmeichhe vawt tak' an tih ţhin ang mai hi niin ka hria a, a cool ràih mai, nel taka biak har tak angin lang mah se ka ngainat zawng tak a nih ka ring ve nghal ringawt.

Miss Genevievein kan class a chhuahsan hma chiah chuan Remremi a rawn melh vang vang a, a mitmengah chuan huatna ni awm tak ka hmu, mahse a rei lo em a, ka hmu sual a nih ka ring, mahse, zawi fiah deuh taka Remremi'n 'Zawngi' a tih sap chuan ka phu dawrh a, ka en hâ bawk. Miss chu a lo melh let ve râm a nih chu!

Miss-in min chhuahsan chuan thawm a reh dûk a, a hnu-ah an phun deuh sap sap, 'kha nu kha a ni lo'm ni a bialpa jail a khungtu kha, Genevieve, aw, Detective Genevieve kha' tih te, 'Detective ni tlak a ni lo reng a ni, mahse a bialpa phirpui Jonathan nen khan an innei a ni lo em ni? Kha a case hnu-ah khan an reh zui vang vang a, tunah a rawn lang leh hlawl si a, ani hian phirpui a nei ve tho nge ni a ka hai zawk le', tih te a ri nuai nuai reng, kei erawh ka lo hawi deuh hau ringawt thung, ka lo hre ve ngai hauh lo, ani chu lecturer niin kan hmaah a rawn inlan zo chiah a, engvanga Detective an sawi nena hmehbel tum phet nge maw an nih le?

Huizzz, ka buaina tur a ni lo e, ani chu lecturer ngei a ni. A inrintawk hmel viau bawk a nih kha.

Kan ban hnuah chuan kan ţhian thum bawkin kan inzui leh a, an pahnih chuan Remremi scooty a inphur in min kalsan thunga, ka nu dawr ka tlawh kawi tur thu ka sawi vanga min kalsan an ni, mahse, Zorina'n min hruai tur thu min hrilh vang a ni zawk mah.

Darkar chanve dawn ka nghah hnuah pawh chuan a lo lang thei si lo chu ka lunghnur ru viau a, min hruai tur thu min hrilh loh mai tur hi a nia tiin a thla ka hau vei ngat ngat, bus tawt zetah ka chuang peih bawk si lo chu ke a haw mai ka tum a, pen thum chauh ka pen hman awrh tihah chuan hmeichhe aw hian ka hnung lam aţang 'Rinsang' min rawn ti lang lang a, ka hawi let vat.

Miss Genevieve-i chuan min lo pan mek hi a lo ni a, inti nelawm takin ka lo nuih ve san san, haw na tur ka nei lo tih a hrethiam a ni mahna ka bul a lo thlen chuan 'Chaltlangah ka kal a ngai, ka thlah kawi ang che' min ti nghal sap a, ka hnial zeta a ti lui ve tlat, keipawh a Car ah chuan ka chuang ve ta nge nge a, class-a a hmel leh nungchang kha paihin a titi siam siam a, kan nui leh hak hak ţhin, kan college chu ani pawhin a zawm ve chauh thu te a sawi a, a ni hmasa ber a lo ni ve reng!

Kan class a an thusawi kha ka hre chhuak uai uai a, 'a ni lovang, mi dik lo chu hremna a pe lovang', ti rilru in ka lu ka thing nak nak, 'eng nge ni ta Ringring' min ti a, ka harh zawk, kan in kawtah kan lo ding reng tawh!

Ani pawh hi kan in ka hrilh miah lo, class ah khan kan hming leh kan chenna veng chu kan sawi a, mahse kan chenna in hre chat tur chuan hriat sa a ngai tlat.

'Miss, min hre sa em ni?' Ka ti deuh nawk nawk a, ka tha a khur ru deuh ngawt bawk.

Zing lamah lah Zorina khan ka kalna tur ka sawi miah lo chung khan hmun diktakah min dah a, tunah miss pawhin!

Zorina chuan a cousin Remremi aţangin ka kal duhna hmun lo hria pawh nise a la pangngai, mahse miss nen chuan kan la inhmu miah lo, vawiinah kan inhmu a, tin, zirlai tamtak zingah ka hming a lo la hre chat kha chu a thluak a ţha pawh a la tihtheih cheu, mahse tunah, kan in kawtah ngei a ding bawk si.

G

Nui hak hakin miss Genevieve chuan 'nangpawhin min la hre thuai ang, Remrem, ka hmanhmawh a, nakinah engkim ka la hrilh ang che, mahse tunah chuan ka kal phawt ang e', a ti a, a mitmeng hmang chuan hlau lo turin min ti ni maiin ka hria.

Ka buk khum nghauh a, car aţanga chhukin gate ka hawng tawh tihah chuan min lo ko leh a, ka phu deuh zawk a, rang fein ka hawi let.

Car nghengin a lo ding a, a lama kal turin min hui bawk, a bul ka thlen chuan ka kut pahnih a la kawpin min hum sak a, ka mitah tak min en kal chung chuan, 'Rini, i ţhiannu Remremi lakah khan inveng ang che', min tih chuan sawi tur pawh ka hre lo. Ka buai nak mai, an inmelh dan te leh Remremi ţawngkam te kha!

'Zawhna nei rih lo la, nakinah ila hria ang ka tih kha, mahse, min hlau suh aw' a tih chuan chhan ngaihna ka la hre chuang lo.

'Lalzarzo' ti ţhawt ri-ah chuan ka phu zuk a, kan bul maiah Zorina a bike nen a lo awm reng!

Thinrim hmel fe-in miss chu a melh a, Miss pawh chuan ka kut a vawnna la thla in mitmeng ngeiawm zet nen Zorina chu a melh let kal.

Hemi te pahnih pawh hi an inhria maw?!

An inmenrum siak ka ti mai, ngawi rengin an inmelh ngar a, awmngaihna hre lo lutukin thawk ka la hawk ringawt ţhin.

Sawi duh tamtak nei hmelpu dun siin an ngawi dun reng lawi a, 'ih' ka lo ti sap chu Zorinsanga chuan vin fiak zet hian 'nang kha lo ngawi rawh' min ti ţhak.

Ka lo ip chawih a, a insehruh nghek, engvang tehchai nge pawh ka hre lo, ka mittui a tla ringawt lehnghal.

'Nakinah kan inbia ang', ti nghutin miss chu a en leh ngur a, min rawn panin kan in lam pan chuan min hruai a, a kaih ang ang chuan ka lo awm ringawt, khatiang em em a ţawngkam vin kha ka la tawng ngai lova, hlauh ka neih lah ka hre ngai hek lo.

Chuvang a ni mahna ka hamhaih a, eng ber nge ka ngaihtuah pawh ka hre lo.

Ka nu chu dawrah a kal a ni mahna, kawngkhar chu a inkalh a, chabi hi pahnih kan nei a, pakhat keiin kawlin ka nu-in pakhat a kawl ţhin, chabi phawrha tala hawn ka tum pawh chu ka kut a khur hlak hlak a, Zorina chuan ka kuta chabi chu min laksakin awlsam zet hian a hawng a, ka en chho deuh haw chu a thinrim tawh lo a ni ngei ang, a hmel pawh hmuh a nuam deuh tawh, min lo nuih deuh suk a, ka hawisawn vat.

In a ka pen luh hma chuan ka lehhawi hram a, miss chu a lo la awm reng, min lo thlir veuh veuh bawk.

Engmah sawi lovin ka lut a, Zorina'n min la kai reng, ţhutthlengah min ţhuttirin ka bag pawh min lakthlak sak a, keimah zawk chu ka inchhung ngeiah mikhual chan ka chang ni maiin ka hria.

'No-i, in miss nen khan thil pawimawh kan sawidun dawn a, ka hman veleh ka lo bia ang che, hlau lo la, itana hlauhawm kan ni lo a nia, mahse zawhna lo nei rih lo la, in miss thusawi leh ka thusawi hi awih ang che, Remzopuii lakah hian fimkhur hle ang che.' Min tiin min chhuahsan vut a, kawngka pawh a rawn khar leh deuh thlap.

Ka ţhu deuh reng a, ka rilru buai nuai nuai hi engtia hmachhawn tur nge ka hre lo, engvanga Zorina leh Miss Genevieve khan Remremi hnaih lo tura min duh nge an nih? Remremi chu kum hnih ngawt ka ţhianţha ber bialnu a ni a, a bialpa nen kan inkawm nasat miau avangin nel pawh kan innel viau kha a ni si a, anni nimin, ni lo, miss phei chu vawiin aţang tak tak ka hre chauh si a, engvanga kan inhriat tirh phata khatianga ka chunga che nge an nih? Remremi ni lovin anni kha a ni ka tana hlauhawm chu.

Niminah pawh khan Zorinsanga khan, ka insum theih lohna turin ka thil in-ah khan engemaw tak pawlh a nei a ni ngei ang.

Ka mobile ka phawrh a, Zonuna ka call vat.

Hello pawh a tih hma hauhin, 'Zonun, zawhna min zawt lo la, thil pawimawh lutuk, Remremi, i bialnu kha a cousin Zorinsanga leh Miss Genevieve-i lakah venghim ang che,' tiin ka hmet tawp lehnghal hmak, thawk la leh hawkin ka inhumruh a, anni game khelhah khan ka awk dawn lo ti a insehruh ţeuh chungin ka pindan lam ka pan a, ka thawmhnaw hlipin bual in lam ka pan nghal zat.

Vawiin nî-a ka thil tawn tehhrep vang hian ka chau hluah hluah.

Uluk zetin ka inbual a, ka zawh hnu chuan khawsak ka rel zui mawlh mawlh, ka vawiin thiltawn ka ngaihtuah nasat luatah ka khawsak rel pawh ka lo ngaihsak tawk lova, chaw leh chawhneh ka ti ût rem rum mai!

Mak ve tak chu a ni, mahse, anni pahnih kha ring lo tur ka ni tih ka hria, ka hriatchian leh ka kawmnel hmasak zawk Remzopuii hi ka ring tlat tur a ni. Zonunsanga vang tal pawhin.

Khawsak ka rel zawh hma deuh chuan ka nu a rawn haw a, dawra a kal vangin ka lo hau hlak hlak, min nuih var var chungin a chauh loh thu sawi mah se a mitmeng dul ruihah chuan hnathawh a zo lo tih a lang reng a, a pindana a luh hnu thleng pawhin ka âng chhunzawm hlak hlak reng tho.

Zanriah kan ei lai pawh chuan, 'nu, i tel lovin engkim an khawih thei a, an rintlak viau bawk, tinge luhlul i chhuaha hna i thawh luih tlat zel le?' Ka ti thlawt a.

Ani erawh chuan, 'No-i, ka chau lo, ina tawm tlawk tlawk reng zawng ka intawm no mai mai, counter-a zu ţhut bak engmah ka ti chuang hleinem', a ti dam diai a, ka lung a awi thei chuang lo, ka nu hi a hriselna a pan a, ani hi na zualin chau se, kei chu engmah ka ni lo, ka la puitling lo lutuk, ka inngaihtuah lungpuama ka chaw ei puar leh puar loh pawh ka hre lo, ka inâng tui bawk nen ka kham tau deuh hmak a, ka nu chuan a tihdan ziahin, 'Lalrinsang, i lung a awi lo a nih pawhin ei turah ţuan suh', a ti chang fak.

'Bungrua leh ei tur te hi rim taka kan thawh aţanga kan neih a ni a, thinurna kan nei a nih pawhin pawisawi ve hauh lo eitur leh bungraw lakah ţuan loh tur', tiin min zilh fo mah se thinrimna ka neih chuan ka lo tilang leh ţhin, ngaihdam dil supin ka nuihtlawn var var a, ka nu pawh a khi ve sak.

Ka vawiin hun hman a nuam em tih min zawh chuan engkim a ţhat thu uar zeta sawi chungin ka nui lui var var bawk a, a rilru hi nuam lo a siam ka duh lo, ka séntet, ni lo, ka pian hma aţang hauha na tak tuar chunga a enkawl ka ni a, nausen ka nih laiin a pasal, ka pa ngeiin kan nufa in min phatsan bawk nen, mak takin kan changkang viau tawh emaw tih hnu-ah pawh hian leh, kan zirsang tawh viau emaw tih pawh hian, Mizo chu Mizo nge nge, hnamdang chu ka hre lem lo, an ni ve tho ang em? HIV natna vei kan en dan te, hmai fai hlarh, changkang inti leh neinung tak tak te, hnamdang karah pawh zahpuiawm hauh loh te lak aţang ngeia heng natna vei ho-in hmuhsitna an dawn nasat zia te, mi pasal leh mi nupui lo ngaizawngah rau rau pawh a nupui phatsantu mipa zawk thlavang an hauh chiam ţhin te, phatsan tawk zawk hmeichhia chu a hmeichhiatpui ngeiin an diriam zui ţhin te hi naupangte mah ni ila ka hai bik lo. Ka ti rilru ve ţhin, Pathian leh a Kohhran hriatpuina thlapa thutiam neitu, a pasal emaw, a nupui phatsan theitu chu thiam loh ka chantir, kei a iak ve ringawt chuan eng khua mah su kaw hek lo le, hetiang boruak ka hriat ve chang chuan ka lo na ru veng veng ţhin, chuvang chuan, keimah vangin ka nu hi a na in a tuar nasa tih ka hai bik lo a, hahthikûlin ka tan a thawk tih ka hria, sual viau mah ila ka theihtawpin ka zahna ka lantir ve ţhin.

Ka nu in TV a en lai chuan naktuk aţangin class pangngaiin kan kal dawn tih sawiin inbuatsaih ka duh thu ka hrilh a, ka pindan lamah ka luhsan, inenlawk chu teuh lo lutuk hi a ni ringawt, ka vawiin thiltawn bawk ka ngaihtuah a, ka rilru a buai deuh nuai avang chuan youtube ah lutin ka Writer ngaihsan em em Toni Da Ralte ziah Boss Amanda, Rca Chhangte in a chhiar chu ka ngaithla a, chu pawh chuan Miss Genevieve min hriatchhuah tir tho, ani ngei pawh khan Detective a nih thu a sawi a nih kha, thawk la hapin hla ka ngaithla ta daih a, hriat loh karin ka lo muhil a, ka mangah lah chuan Remzopuii'n thah min lo la tum zui.

Ka harh leh meuh chuan khua a lo var iar tawh a, rang taka tho-in tukţhuan tur chawhmeh ka siam zui nghal malh malh a.

Ka scooty in kan college lam ka pan a, kan lecturer ho te chu a bulţanna aţangin an ţang nghal viau mai, mahse ninawm ngawih ngawih a zirtirna pe an awm lova, a zangkhai viau, miss Genevieve in zirtirna min pek lai erawh chuan ka ngaihtuah mumal thei lo, ani erawh chu nimin boruak hre lo ang hmakin a khawsa a, hmeichhe hriatthiam har tak a niin ka hria.

Chaw chhun ei hun a nih chuan Remremi leh Zonuna nen kan pathumin kan College Canteen ah kan inhnawhpuar a, sawi hun a ni em ka hre lo naa min turtu engemaw tak a awm avangin midang hriat hlau takin eitur kan ei pah chuan nimin lama Zorina leh Miss te nen a kan hun hman dan chu ka hrilh sar sar a, Remremi chu ka mitmei deuh naa awih loh hmel fe a a nui leh hak ţhin bak chu engmah a hmel leh mitmengah thil danglam a awm lo, Zonuna zawk chu a insehruh ţawlh ţawlh a, Remremi zawk chuan a bengdai leh thûl, ka ring pumhlum ta hmiah.

A piancham lawmpui na atana ka chah sak purse ka la pek hman tak loh pawh chu ka pe nghal a, a lawm thiam viau lehnghal.

Ka lo ringhlel ru deuh pawh chu ka inthiam lo leh hnuhnawh hial a, buaina em em tawk lo-in nî kan leng veleh mai bawk.

Kan ban hnu-a kan inţhen dawn chuan, 'Ringring, ka u leh miss thusawi kha chu engahmah ngai suh, kum hnih lai kan inhre ve tawh a, rinhlelhawmin i lakah ka la khawsa lo, chuvangin min ring turin ka duh che, ţhianţha tak kan nih zawm zel ka beisei a nia', Remremi'n min tih chuan keipawhin nuih var varin ka lû ka buk khum nghat a, ka kuah deuh thak bawk, a taksa ka deh chuan a khur deuhin ka hria a, engahmah ngai lo angin lang mah se a u ngei leh kan miss in an puhna chu a la na ve viau niin ka ring hmak, a hnungah ka bensak thek thek a, innuih var varin kan inţhen ta a.

Lehkhabu chhuak thar 'Zoremi Hmar Zote' in a buatsaih 'Zomors Zunzam' tih chu ama kut ngei aţanga ka lei ve duh avangin an chenna veng lamah ka inkhalh kawi a, in ka thlen meuh chuan a tlai deuh ruih tawh, kawngka a lo inhawng deuh huai a, in chhung ka luh chuan a lo reh tlawk tlawk, ka nu chu ka ko lawng lawng a, thawm a reh tlawk tlawk thung, a muhil em mawni le ti rilru in a pindan lam ka pan a, a lo ruak huai tho, mak ti fe-in ka zawng kual a, ka hmu mai lo, inthlak sawk sawkin ka nu chu ka call a, Choka lamah a ri tlang tlang, hmanhmawh zetin ka pan a, ka nu chu choka chhuatah chuan mitthi ang maiin a lo let deuh ngât a, rang taka panin ka ţhuhniam rawk rawk.

Au deuh chûl chungin ka sawi nawk nawk a, mahse a mit a meng hauh lo, ka che buai vek a, ka thin a phu rang hle bawk, reife ka buai hnu-ah harh chhuak thutin ka tlan chhuak a kan ţhenawm chiaha awm nu Mawitei te in-ah chuan ka tlan lut a, bah nak leh khur dawt dawt chungin mangang lutukin ka nu awmdan chu ka hrilh zung zung a, rang takin a fapa Francis-a nen kan in lamah an tlan vat.

Keipawhin ka zui ve vat a, in chhung kan luh chuan nu Mawitei chuan ka nu chu a mar te a deh sak a, u Francis-a chuan Ambulance a ko thung, rei thang lovin Ambulance pawh chu a rawn thleng vat a, ka nu chu New Life Hospital lamah kan tlan thlak pui a, nu Mawitei chuan kan mamawh tur a buatsaih fel hnua a lo kal ve tur thu sawiin u Francis-a chuan min zui thung a, kan tlan chhung te chu rei ka ti kher mai, ka kut a thlan dap a, ka kawrah chuan ka hru leh tawk ţhin.

Damdawi in kan thlen chuan Doctor leh Nurse te chuan min lo buaipui vat a, ka nu chu ICU lamah an nawr lut a, an hmanhmawh lutuk te chuan ka mangan a ti zual kher mai.

Ka neihchhun ngawih ngawih a ni a, pawisa tantak leh in leh lo ai pawhin ka nu nunna chu a hlu zawk fe a ni ka tan hian.

U Francis-a chuan tih tur pawimawh awm ang ang chu a ti zung zung a, kei erawh ICU kawngkhar thlir chungin ka lo awm ngawt ngawt thung.

Min thihsan ta se tih ngaihtuah reng rengin ka buai philî vek a, ka mittui erawh a hul hlauh, ka buai em em a ni tawp mai.

Doctor te an lo chhuah rual chuan nu Mawitei pawh a rawn thleng a, u Francis pawh a awm ve tawh bawk.

Ka nu Mawitei chuan ka nu dinhmun a zawt nghal zung zung a, Doctor in engtinnge a chhan pawh ka hre ve hauh lo thung.

ICU kawtah chuan kan ţhu ta a, ka buai mangang zual a reh tawh a ni mahna ka inkhawngaih in ka nu ka lainat bawk si nen ka ţap chhuak ta hlawp hlawp, nu Mawitei chuan min kuah a, a theihtawpin aw dam dapin min hnem mawlh mawlh, ka nu chu a thi dawn lo a, a ţha leh vat dawn, ICU ah ala awm rih a ngai tih te min hrilh mawlh mawlh a, kei erawh ka ţah chhuak lutuk chu ka bang thei mai lo lehnghal.

Chutia kan lo inhnem mawlh mawlh lai chuan Zonuna leh Remremi bakah, miss Genevieve leh Zorina te chu an rawn thleng ve hlawl a, an hah hmel hlawm viau, chanchin hrilh turin ka chiai nasa bawk nen engtinnge kan chanchin an hriat pawh ka hre lo, zawh lah ka tum rih lo, Remremi chu ka bulah a rawn ţhu vat a, min kuah ve thlawp, keipawh ka theihtawp chhuaha inti pachang luiin ka mittui te ka hru hul a, mahse, tumah ka la be lo, an zavai mai chuan lainatna mitin min en vek a, chu chuan min ti no zual zel lehnghal.

Nu Mawitei chuan ding chhuak riai riai pahin, 'No-i, i ţhiante an awm ta bawk a, in lamah kan han chho phawt ang, tiffin rawn kensak che in ka riah pui ang che aw', min melh a, ani pawh a mittui tling ve pam mah se a insum tih ka hria, ka nu nen hian inţhenawm satkiah ni ringawt lovin an inkawmngeih em em bawk a, ka pa vanga zahna kawna ka nu a din lai pawhin ani chauh hian hmangaihin an fuih tih ka hre ve a, kan nufa tan an hlu takzet.

'A ngai lo, hei, keiman ka riah pui mai ang, Zonuna hian chaw min pe thei bawk a', Remremi'n a lo tih chuan nu Mawitei a thaw hawk a.

'Ni e, No-i tan tak pawh a nuam zawk ang, riahpui ka duh viau naa ka fapa te zawk Ruatruata hi khawsikin a man ve hlauh mai a, chutia in inbuaipui theih chuan a lawmawm ngawt ang, mahse min mamawh chuan ka lo kal thei reng a, hei a u leh a pa te pawh an awm a, na chhia a ni lo bawk a ka kalsan thei tho a nia,' a tih chuan ka lo inrawlh ve vat a, 'Nu Mawite, ka lawm lutuk, awm lo ula chuan keimahin engmah ka ti thei lo ang, Ruatruata chu han enkawl rawh ,unau te leh pa te awm mah se nu kut nge nge hi a hlu a, a mi deh dan a dang a nia' ka lo ti ve vat a.

'Nû kut', tih ka sawi lai chuan ka nu nui hmel leh tlang hrileng ka dawn lai pawha min duat ţhin zia hre chhuak uar uarin ka mittui a tla leh sawk.

Nu Mawitei chuan min ngaihtuah hmel fe-in min en a, a ngaihţhat na atan tiin ka lo nuih lui var var thung, mamawhna ka neih chuan call mai tura min hrilh leh zet hnu-ah min kalsan ta hram a, rei vak lo hnu-ah miss leh Zorina pawh chuan min hnem mawlh mawlhin min chhuahsan ve a ,lawmthu ka hrilh ve sap sap, Zorina pawh chuan min hawsan hnu-ah kan zanriah tur tiffin min rawn pe a, riah ve a tum naa pathum riah an remti lova, kei leh Remremi erawh kan riak thei thung.

Lungawi loh hmel deuha tûm bûrin a haw a, a hreh hmel lutuk chu enin keipawh ka nui hak hak mai, inbe mang lovin Remremi nen chuan kan ţhu dun tlawk tlawk a, a bialpa ţhiannu mai ka ni a, chutia ka tana a inpe te chu ka lawm hliah hliah.

Ka nu dinhmun ţha lam leh chhe lam pawh hriat tur a awm lova, thlamuang taka muthilh erawh harsa ka ti ngang mai, mutna ţha a awm lo bawk nen, kan ţhutna hmunah chuan ka chau chu ka lo muthlu leh lâp ţhin, mahse rei muhil lovin ka harh leh vat zel a, Remremi chuan ka harh apiangin min lo thlir vang vang zel a, a muhil ve miah lo tih ka hria, a hrehawm a tih vang niah ka ngai a, ka inthlahrung viau mai, ka harh tih a hriat veleh min lo nuih sak zel a, muhil ve tura ka tih pawhin a lû a thing ringawt zel.

A tukah chuan Remremi chu class kal turin ka nawr a, tukţhuan ei puar hun velah nu Mawitei a rawn lang leh bawk nen duh lo viau mah se ka nawrlui ve tlat a, lungawi lo lek lekin a kal ve hram, ban hun-ah min rawn tlawh leh tur thu a sawi naa ka lu ka lo thin khum a, a tûm deuh bâr mai, a kal hnu chuan ţhian ka neih ţhat zia nu Mawitei chuan sawi mawlh mawlhin fiamthu te a sawi chhunzawm a, keipawh ka nui hak hak mai. A kianga awm chu ka nu tluk lo mah se a nuam ka ti viau, chaw chhun kan ei zawh chuan in lama haw a intifai tur leh hahdam turin min tilui tlat a, ka hnial ve tak naa min nawr dat dat bawk nen nui var varin ka kal ve hram, ka intihfai zawh veleh ka kal leh tur thu ka sawi ţalh a, min hnial lui tawh bik lo.

Taxi la-in kan in lam ka pan a, ka thlen veleh ka phone chu ka charge a, inbual sawk sawkin ka insiam leh, chaw chhun tur ka siam bawk, ka siam lai chuan ka inngaihtuah nasa leh viau a, college lah ni hnih chauh ka la kal si, ka nu hetiang hi a ni leh mai bawk si a, ka nu kha amaha chesual nge a nih a midang thiltih tih te ka ngaihtuah nasa viau, a hunlai khan ka chiai bawk nen ka lo ngaihtuah hauh lo a, a tukhum ah khan hliam a nei a nih kha.

A tlukna lama a insawhna nge ni a midangin na takin an vua tih ka hre lo, vuakna lo ni ta pawh nise chutianga ti duh tur awm ka hre lo, ka inngaihtuah chhungin ka thilsiam pawh a lo hmin a, off vatin tiffin ah ka khung mawlh mawlh, ka kal hma chuan rukruk hmang thiltih lo ni ta se tih ngaihtuahin kan in chhung chu thlantla hluamin ka dap leh viau a, mahse, bo a awm pawhin ka hre lo, Damdawi in lam pan tuma kawngkhar ka kalh vel lai mek chuan ka mobile a ri a.

Number hlang a ni.

Pawimawh a nih takin tiin ka pick up a, 'Rinsang' a rawn tih chuan miss Genevieve aw a ni tih ka hria, 'aw, eng nge ni ta,' ka ti let hâ a, 'kan inhmuh ngei ngei a ngai, tunah Chaltlang Dawrkawn ka rawn thleng, min lo nghak lawk rawh', tiin a hmet tawp zui a, ka mobile ka melh hû ringawt, a rawn thleng ţep tawh tho a tiin ka lo nghak ve mai a, a rawn thlen chuan a carah ka lut nghal hmiah, Zorina pawh a lo ţhu ve run a, miss chu a inkhalh chhuak leh nghal.

Zemabawk lam panin a tlan a, sawi mai tur ka hre lo, ka nu ka ngaihtuah bawk si, anni lah hi engmah sawi tum lovin an ngawi run bawk si a, awmdan tur ka hre lo lutuk chu ka kut ka khal neuh neuh ringawt.

'Sawtah kal lawk a ngai, i nu chu ngaihtuah suh, nu Mawitei a awm kha, a pawimawh a, kan rei vak lo ang,' miss chuan a ti a, ka lo bu nghauh ringawt, Zemabawk kan tlanpel a, bawlhhlawh paihna hmunah chuan kan ding a, an chhuah avangin keipawh ka chhuak ve nghal zat, 'helai hmuna kan kal chhan hi min hrilh thei em?' Ka ti a, min en lovin anni pahnih chu an inen a, Zorina chuan miss chu a buk khum nghut.

Miss Genevieve chuan min en a, thawk a la halh bawk, 'Kum li lai liam taah khan helai hmunah hian ruang pathum ngawt chhar a ni a, thah vek an ni, pahnih chu hmeichhia ve ve an ni a, pakhat chu min hringtu ka pa a ni, chu case chu kei hian ka buaipui a, tudang ni lovin ka hmangaih em em Ruatsaka thah an ni. Ni lo, a ni emaw ka ti a, jail ah ka khung bawk, mahse a hnu-ah chuan Ruatsaka thah ni lovin a phirpui Jonathan-a thah a nih zawk thu ka hre leh a, ka hmangaih pawh hrehrang thei lo khawpin natna tamtak min pe tu, ka huat em em ka pa thihna chuan min nghawng hial a', tiin thawk a la leh kawk a, a mitmengah chuan natna leh mahni indemna, insitna leh inchhirna a inlar dawt zut. A mittui chu dan tum teh mah se hmeichhia ve tho a ni a, a mittui a khap per sak, ţap hliam hliam erawh a ni lo, kum tam a la liam lo bawk nen kei mimawl pawh hian a hmaa a huntawn chuan a la nghawng nasa reng tih ka hre ve thei hial.

Ka lo ip chawih a, hun rei la inhre lo mah ila hmeichhe fing tak niin ka hria a, chutia amah ngeiin a chetpelhna a sawi chu mak ka ti ve viau.

'Tichuan, Jonathan zawk chu Ruatsaka emaw tiin ka hnaih a, mahse, thinlung inpawh si lo, inhmu a awmdun thei kan ni a, tawpna siam ka tum ta a, zanriah kan ei chhuah naah inneih puiah min sawm a, tah chuan Ruatsaka emaw ka tih chu Jonathan a ni tih ka hre ta a, tualthattu pawh amah ngei a ni. Pawisawi lo, ka hmangaih zawk ngei kha hremna ka lo pe a, ka inchhir chhunzawm nghal, ka chetbuai lai tak chuan ka tana Vantirhkoh a ni hial ang chu, Zorina hi a rawn lang hlawl a, Jonathana'n ka bekah a tin ran, min kah a tum chu a rawn nam sawn dawrh a, kei chu chet nachang ka hre lo, khatih lai khan mahni inhuatna rilru bak ka pu lo, ka hmangaih pawh hre lovin ka lo awm a, mimawl tak ka ni.

Tichuan, tualthattu diktak zawk Jonathan chu rang takin Jail-ah khung a ni a, pawisawi ve hauh lo ka hmangaih Ruatsaka lakchhuah kan tum erawh a cell chhungah inawkhluma hmuh a ni ta a ni.' Tiin a ţap chhuak hawk a, keipawh a thusawi chuan min nghawr dawt, ka mittui a luang ngiai ngiai a, a natna ang chu ka va pawh phak ve kher lo a ni thei, mahse ka lainatin pawi ka tihpui takzet.

Mahse, chu thil chu engvanga min hrilh nge a nih ka la hrethiam lo cheu, ka tan eng nge a ţangkaina?

'He thil hi ka hrilh chhan che i hre lo mai thei, mahse i hriat a ngai, zawhna lo nei rih lo la, ka sawi phawt ang aw', a mittui hru hula min en chunga a tih chuan aw ka lo pawh vat a.

'Ruang hmasa ber kan hmuh hma khan pawngsual case khawih ka nei a, a khirh em avanga kei min pun a ni bawk, Jenny a ni a, mak takin a chunga thil thleng chu a mang hriat chauh a, a eiturah damdawi engemaw tak phul a niin kan hria, ngaihtuahna mumal a nei lova, a mangchhia emaw tiin ani pawh a ngaih chu ţha chiah lo mah se a ngawi zui mai a, mahse, a hnu-ah, a bialpa nen inneih an tintuah lai mekin a awm nuam thei lo a inentir chuan nau a pai thu a hre ta mai a, chuvangin kha thilthleng kha a mang ni lovin a tak ngei a ni tihna a nih chu, a chhan chu a bialpa nen khan khumpui an la kai dun tlat lo.

Indawt deuh zuta ruang pathum kan chhar leh, nichina ka sawi ka huntawn avang khan ka tawmbo ngar ngar a, mipui lam lahin, "Detective ni tlak lo, pawisawi lo zawk hremna pe a, a hmangaih nia a sawi ngei pawh hre lo, Ruatsaka thih naah pawh ka kut zâla thi ni lo mah se ka thah ngei a ni, tih vel thawm a tam a, tawm bosan sen loh khawpin ka chungchang hlir chu mi zawng zawng titi a ni a, tumah ka lamţang an awm lo, kei ngei pawh hi ka lamah ka ţang chuang lo, mi zawng zawng khan ka thiam loh a nih loh thu sawi pawh nise kei hi ka inthiam thei tawh ngai lovang, chutiang boruak ka tawn avang chuan Jenny chungchang pawh chu anmahniin case la let lo mah se chhunzawm sak ka tum kha a ni a, mahse, chutianga keimah ber ka buai tak avang chuan tawmbo san rih a, mi titi a dan deuh hnu-a hna dang hmanga eizawn ka tum ta zawk a ni.' a ti leh a, ka lo lainat ve em em ringawt.

Zorina chuan car ami tui a la a ni mahna, miss chu a rawn pe a, ani pawhin a lo in ve mai bawk, a thusawi chuan a tihah a ni mahna rei ve fe a ngawi vang vang a, kan lo nghak chawrh chawrh a ni ber e.

'Mahse, chu boruak ka tawm bosan aţanga kum khat hnu-ah chuan Jenny thih thu ka hna ka thawh laia ka assistant Zothana aţangin ka hre ta hlawl mai a, a pasal nen khan nau duhawm tak an nei ang a, chhungkaw nuam tak an din ang chu tih ka lo rin laiin Jenny thihna chuan min ţhâwng, a chhan ber pawh thih dan pangngai ni lo lehnghalin a nia a thih, a dulah chem hriam zet a bur vâ a, a thlalak chu Zothana chuan min rawn thawn bawk, thah a ni tih a chiang a, mahse kei chuan eng case mah khawih ka tum tawh lo, ka inringtawk tawh lo a, keimah ber ka inrintawk loh miau chuan midang tan pawh min rinngam ngaihna a awm dawn bik lo tih ka hria, chhui thei lo mah ila a ruang tal ka hmu ve duh tiin mask ka vuah a, an chenna in lam ka pan ta a, mahse, an lo inkalh vek, an ţhenawmte chu Jenny pasal te in chu ka zawt a, an sawina lamah chuan ka kal ta a, rei vak lo-ah ka thleng mai bawk, in chhungah chuan a lakah ka inthiamlo bawk nen, mi hmaieng ka zah tho nen inthlahrung deuhin ka lut a, ka hmu ve ngei duh tlat a ni.

'Tichuan, a ruang, kuanga an zalh chu ka en a, mi mit chu ka chungah a fu ţhupin ka hria, mask vuah mah ila mi chuan min hriain diriamna mitmeng nen min en vek ni hian ka hria a, rei pawh awm lova chhuah lehnghal mai ka tum chu a pasal chuan ka ban a lo chelh vat a, pawn lamah min kaichhuak a, 'ka nupui kan vui zawh, tlailam dar nga ah, i office hluiah, Zothana a awm ang,' tih zawng sawiin inchhung lamah min luhsan lehnghal a, keipawhin mak ka ti viau naa kal erawh ka tum. Ka tana hriattur pawimawh a awm tih ka hrethiam ve mai, tichuan hmun dangah kal tawh lovin detective ka nih laia ka office ni ţhinah chuan ka va kal a, ka assistant hlui Zothana a lo awm tawh, kan inhmu chu kan lai dun ve takzet, chiang takin inhre lo mah ila thawk dun tawh kan ni a, mobile hmangin la inbe zauh zauh mah ila midang lak aţanga ka inkharkhip tlat hnu a hmaichhan a kan inhmuh leh vawikhatna a ni ve tho.

Jenny pasal pawh chu a sawi ang hun-ah chuan a rawn thleng a, engdang sawi tawh lovin amah kan lo ngaichang a, 'ka nupui thihna hi nang hian a ruk thei ang berin chhui la ka duh a ni. A thattu hi ka cousin Remzopuii a nih ka ring tlat bawk', a tih chuan ka lo phâwk hrâ a, kei ang thoin Zothana pawh Jenny pasak thusawi chuan a ţhâwng ve tih ka hria, engvanga a cousin chu ringhlel nge a nih ka hre lo. Chu Jenny pasal chu hei, Zorina u chiah Muanawma a ni.' A ti a, keipawh ka lo phawk ve viau mai.

Sawi zawm leh a tum tihah chuan ka mobile a ri a, a ngawi leh dat, nu Mawitei call a nih vangin ka nu a harh a nih ringin ka pick-up vat a, mahse, nu Mawitei chu a rawn ţap rawih rawih nia!

'No-i, ka lainat nufa em mai che u, i nu a awm ve ta lo', a rawn tih chuan ka nui hak a, ka awih lo lutuk chu ka nuih a za a ni.

'Nu Mawite, intihderna chi a ni lo a nia, ka nu a harh a ni tiraw, khatia rawn intihder kher a ngai lo, ka buai deuh a, ka rawn thleng vat ang, thihna chungchangah fiamthu thawh tawh suh aw, a nutling tih chi loh em mai', ka ti hlak a, Zorina'n ka mobile a rawn pawtthla vut.

A benga chuktuahin, 'keimah Zorina', a ti bul nghut a, a ngawi zung vung vung, 'kan rawn thleng nghal ang', tiin ka nu thih thu chu Miss a hrilh a, an che zung zung, kei erawh ka nui var var reng a, chetsawn pawh ka tum lo, 'Lalrinsang, inthingharh rawh, i nu kan hmuh a ngai', vin ţhawta min tih chuan ka nui tawp riai riai a, keimaha na thei zawng zawng chu a na chhuak vek.

Ka ngawng chhuih a, ka à huih ni maiin ka hria, Car kawngkhar chu Zorina'n min hawn sakin min nawr lut a, a tih ang angin ka awm, ka ring phal lo a, ngam pawh ka ngam lo, ka nu in a hrisel loh avanga min thihsan mai tur anga ka suangtuah ringawt chhin ringawt pawhin thawk lak ngaihna hre lo khawp hialin ka ţap ţhin a ni a, a taka thleng tur phei chuan ka duh hauh lo, kan thlen lai pawh ka hre lo, ka nu chu mitthi ang maiin a hmai chu puan varin an khuh vek a, chu te chu duh lovin ka hai hawng rawk a, ka sawi dawt dawt pawha a rawn harh theih loh avangin ka bulhnaia awm te chu ka en kual ruai a, Doctor leh Nurse te bakah ka chezia min hmutute chuan lainatna mitmeng hmangin min enrawn vek!

Chu an mitmeng tehhrep pawh chu ka ngaina hauh lo. Khawngaih nih ka duh ngai lova, mahse, keimah ngei pawh ka inkhawngaih ngawih ngawih, ka zawng zawng, ka neihchhun, min hmangaiha min enkawl tu ka nu chu phal lovin duh lo teh mah ila thlan khurah zalh a ni a, ţawngkam khat pawh ka chhak chhuak lo, ka mittui lah a chhuak thei lo, dawt ni se ka tih em em chu a takin a thleng dawt zut a, 'lei chu leiah, vaivut chu vaivutah', tih thu ka huat ber ţum a ni.

Ka nu chu ţawihral turin ka phal thlawt lo a ni ber, khawtlang mite leh ka classmates te, Lecturer ţhenkhatte pawhin min ţawiawm hlawm a, ţah chu sawi loh ka mittui takngial pawh a tla thei lo chu ka inhua a, ka nu hun hnuhnung bera ka kut vuan loa a kal te chuan ka inhuat a tizual viau.

Ka bulah Zonuna leh Remremi, Zorina leh miss Genevieve pawh an awm chawt, ka nu kan vui liam aţangin kar hial a vei ta, min hnem tura lo lengte ţhin te pawhin an hna pawimawh an chhunzawn hlawm tawh a, ka kianga awm reng ţhin pali te erawh chu an thawmhnaw la meuhin ka kiangah an la awm tho, an thusawi te chu engpawh nise ţhian ţha tak an ni hlawm, chaw ka ei ngai lo a, ka muhil ngai hek lo, ka chau tawngkhawng a ni mahna luhaiin ka tlu hial a, thisen chaw pawh ţum thum lai min khai sak ta bawk.

Min fuih eng ang mah se an thu ka ngâi ngai lova, chau eng ang mah ila zantin ka nu an zalhna hmun, a thlan lama kal erawh ka sim thei rih lo.

Ninga nî a ni a, ka inngaihtuah nasa leh viau, ka rilru a fim ve ţan a, ei an rel sa chu ei turin ka tho ve a, tam ei thei lo mah ila an lawm viau, tukţhuan kan ei puar hnu chuan kan zavaiin ţhutkhawmna pindanah kan ţhu khawm a, min ngaihtuah lo tur leh ka ţhat thu hrilhin kar thar aţanga class pawh ka kal tur thu ka hrilh a, ka aw erawh ka ţawng loh rei deuh avangin a láwi deuh rât. Chutianga intihharh ka tum chu an lawm hlawm takzet tih an mitmengah ka hmu thei a, a der a ni hlawm hauh lo lehnghal.

An vai mai chuan an in lam ţheuh panin min ţinsan ta a, ka tihmakmawh a nih hriain keipawh ka inbual fai hnu-ah nu Mawitei te in lamah lawmthu hrilh turin ka kal a, an in ka thlen chuan a lo reh viau mai, kawngka erawh a lo inkalh lova, ka tlangnel ve avangin ka lut tawp.

Ka hawi kual a, helai in chhungah ngei hian ka nu kha a lenglut ve ţhin kha a ni a, a ţhianţha neihchhun chu nu Mawitei hi a ni ti ila ka sawi sual lo ang.

'Ka hawina lam apiangah i hlimthla ka hmu zel mai dawn chu a ni a, engtinnge khawvel hi keimah chauha ka pal theih ang le ka nu, i tel lo chuan hmeichhe derdep mai chauh ka ni si a', tia ka thinlung hmanga ka nu rauthla ka biak mawlh mawlh lai chuan nu Mawitei fapa naupang zawk Ruatruata pindan aţang chuan invin deuh ţhawt ri a awm a, ka phu deuh dawrh mai.

Mi chhungkaw buaina lo hriat ve chu thilţha a ni lo tih hre mah ila ngaithla tura min turtu engemaw a awm tlat a, an in hi a chhawng niin in chung lamah midang pindan bakah mikhual pindan tura an tih a awm a, inhnuai lamah erawh choka, ţhutkhawmna leh nu Mawitei te nupa bakah Ruatruata pindan chauh a awm thung, ka pan hnai hrat hrat a, an vin leh tawh lo, pindan kawngka chu chhete tak tak hian a inhawng a, a bul te-ah dingin ka ngaichang kar.

'Lalruatmawi, engkim hi itana ti ka ni, i mualpho ka duh lova, kan chhungkaw mualpho lah ka duh hek lo, ani kha a thi a nih loh chuan mi zawng zawng thinhrik kan ni dawn a sin, chu thil chu engtikawng mahin ka thlen tir thei lo, ani chu hrisel lo sa leh ICU a an dah hial a ni tawh a, khatia a chawlh kha atan a hahdamthlak zawk bawk. Hrereng rawh, i unaute leh i pa in an hre tur a ni lo, ni lo, midang reng reng pawhin, ani chu a thi tawh a, kan inngaihtuah a ngai zawk, a fanu erawh saw chu kan theihtawpin kan tuam hlawm tur a ni, Bawiha, ani chu khawl hmanga thawk tir a ni a, a lu a dim lo taka vuak a nihna khan a lo nghawng nasa a ni ngei ang, a dam leh kha doctor te pawhin an beisei lo hrim hrim a, ka tih chu maw, an thawk tirna khawl va off zawng kha a ni mai, ka thah a ni lo,' zawi fiah zetin a ti fak fak a, kei erawh ka nghing dawt dawt.

Ka nu leh ka hming lam ri lo mah se kan nufa chungchang ngei a ni tih ka thinlungin pawm turin min ti tlat.

Ka chesawn thei lova, mak ka tiin ka hrilhhai bawk.

'Nu, mualpho chu eng nge i hlauh viau, ka hrechiang, midang hliam ka buaipui na lamah ka kai tih, a chhan chu drugs ka ti ngai lova, nula leh mipat hmeichhiatna lah ka ngaihsak lo ni bik lovin ka insum, hmeichhia chauh ni lo, mipa pawh hi thianghlim taka khawsa tur kan ni tih ka hria asin, ka natna vangin ka thi nghal dawn a ni lova, eng nge mi pawh chuan hria se i hlauh viau le? Kan mualpho ang a, kan zak ang, eng ang pawhin nulat tlangvalna vanga kai ka ni lo tih hi au pui dum dum mah ila miin an awih dawn lo tih pawh ka hria e, mahse nu, midang nunna nen hiala thleng tur chuan eng ang fakau a hlu leh sang bik nge ka niha kan nih? Ka tihsual loh rah ka seng a, kutkawr hman tur awm si lo nen kha mite chesual kha ka pui a ni a, ka khawloh vang ni lova midang ka ţanpuina vang zawka he natna ka nei hi kei chu ka inchhuang zawk a sin.' Ruatruata chuan a ti a, ka rilruah HIV a lo lang nghal.

'An nufa chauh an ni a, No-i a nu laka a innghah zia pawh nang aia hrechiang tunge awm? I ţhianţha a ni a, harsatna kan neih pawhin a tlanchhe ngai lo, engtinnge ka ţhianţha ber tia i sawi ţhin ngei nunna kha i lak theih zawk le?' Beidawng tih hriat zet hian a ti leh a, a chiang ta e, ka nu kha thah a ni!

'Ka tan kha thil tih kha a nuam bik lo a sin, ka na ve lutuk, ihmaw Bawiha, kei leh midang, nangmah hmangaihtu te hian hrethiamin sit lo che mah ila, midangin hria se eng nge thleng tur i hria a ni lo em ni? Kan khawtlanga i natna ang vei te nun chep zia chu, hrethiam chu mi tlemte chauh an ni, a tamzawk hian an thinhrik dawn che, an kawmserh bawk ang che, he natna hi inkawm vang te, chaw ei ho vang te leh thildang dang vangin a inkaichhawn theih loh tih hre mah se an sitna che kha a nep phah dawn lo, kha'ng zawng zawng, hmuhsit leh endawng i tuar tur ka ngaihtuah khan rilru mumal ka pu lo a, ka rûm ru vawng vawng a sin, ka ţhiannu a ni nameuh mai, mahse ka hrin, thi lek leka na tuara ka hrin ka fapa mualpho tur kha ka ngaingam ngang lo a ni Bawiha, miin Ruatruata saw HIV POSITIVE a ni tia an kawk tur che kha ka hlau em a ni', nu Mawitei chuan ţap chungin a ti khur dar dar a, kei rawh ka mittui a luang zung zung.

An ngawi ta chawrh chawrh a, keipawn zawimuangin an in ka chhuahsan, kan in-ah chuan ka lut a, ka nu pindanah chuan lutin a ri meuhin ka ţap chhuak hawk hawk.

A fanu tana thâwk chhuah tuma a bei tur te, a thi tur mangang chung pawha a mitthlaah kei, a fanu hi ka lan tur thu te, a ţhianţha berin a thihna tura hma a lak dan te hi sawi chhuak thei si lovin a hre ngei ang a, a rilru a va na dawn tehlul em ka nu kha.

'Nu, kalsan lo tur che ka ni a, tumah, nangmah ni lo reng reng kha lo ring lo tur ka ni a, rawn let leh vat tur kha ka ni tiraw nu, mahse, kei chu ka muang a, i lei taksa thlah tura nawrluih i nih lai te khan i kut lo vuan tlat tur ka ni bawk, mahse, nu, kei chu i kiangah ka awm lo, ka tihpalh, ka tihpalh lutuk', ka ti mawlh mawlh a, min kalsan pawh ka nat pui tehlul nen, thah a ni tih ka hriat phei chuan thihna rau rauah pawh a na bik ngawih ngawih.

Tu pawi mah hi ka nu khan a sawi lo a sin, a kimki dêk reng a, a dam chhungin a pasalin a phatsan vanga na reng rengin a hun a hmang a, thup eng ang mah se kei hian ka nu tawrhna kha ka hria a sin, a fanu in puitlin kawng ka zawh ve mek a, ka inzir puitling ang a, ka enkawl ve thei dawn a, tluk zo lo mah ila a tih ai te pawh ka ti ve ţhei ţan a, hlimna kan tawngbaw ve ţan a sin.

Engvanga nunrawng em em nge an nih? Ka nu nunna hi kha natna HIV vang khan an titawp a, nunna hlut zia an hre lo em ni? Anmahni nunna la tu ai chuan midang nunna laksak thei hi ka dem zawk, an chungah chuan engpawh an ti thei, a hremna chu Lalpa thu a ni. Chumi a nih avang chuan an nunna an lak kha ka thlawp ta tihna a ni lo.

Mahse, an pek pawh ni miah lo midang nunna an la a, an thiltih dik loh lang chhuak lo lah a tam, a langchhuak lah chu ringtu zinga ţha zual te lahin sual thup mawina atan hian, 'sualna nei lo chuan deng rawh se', tih chângchawiin an sawimawi zawk mah fo a, sualna ka nei, kan nei vek, ka deng lo a nih pawhin talhfiak a awm alawm le, kan vua ang a, kan hlap ang a, kan duh leh deng lo pawhin kan vawm ang chu.

Amah leh amah intihchhiat nan chuan engpawh a ti thei, damdawi rui se, zu leh ruihhlo dang pawh a ngawl hial vei pawh ni rawh se, midang nunna la turin eng ang fakau a lian nge an nih a? 

A petu Pathian lakah tinge an dah theih loh?

Reife ka ţap a, ka ţap chau vek hial, ka nu khumah chuan ka mu a, a lukham te chu zawi zetin ka chul riak riak.

Ka lo muhil a ni mahna le, ka ban thip deuh zawk avang chuan ka harh zawk a, ka mit ka men rualin nu Mawitei ka hmu nghal, mittui luang zawih zawihim chungin min lo chiu chu niin, 'No-i, ka tihpalh a ni', tih a sawi chu ka hria, engemaw sawi ka tum a, mahe, min chiuna khan hna a thawk chak a ni mahna le, engmah hre mumal lovin ka awm zui nghal.

Ka thi dawn a ni ngei ang, tunah hian thih hlauhna ka neih leh neih loh min zawh chuan, ka chhanna chu 'nei lo' tih a ni, ka thi chak em em zawk, ka nu kianga kal ka duh a ni, fahrah leh lutuk chung leh, keimaha khawvel hmachhawn turin huaisenna ka nei ngah tawk lo, ka thinlung natna vang pawh hian ka thi vat tho ang.

Ka harh leh chuan ka awmna hmun chu a thim  ruih a, ka hawi kual ngial naa engmah ka hmu lo, ka mutna aţang chuan tho-in ka dap kual nak nak a, ka awmna chu ka hre lo naa a rimchhia erawh ka ti, chutah nui hak ri ka hria a, 'tunge' ka ti ţhat.

'Tum buai duh suh, he hmeichhia hi mi à a ni, kan chhuak lo ang, a duh anga kan awm loh chuan kan thi ang, kan thi har tawh lo ang', a ti ta mai a, tu chanchin nge maw a sawi le?

'Tunge i sawi, nu Mawitei maw?', A aw ri ka hriatna lamah chuan ka indap phei rak rak a, a hlat vak loh vangin ka thleng ve mai bawk, min lo ban ve mai bawk a, 'ni lo, nu Mawitei itih chu tunge pawh ka hre lo, he hmeichhe puitu hi a ni mahna le, ka sawi chu Remzopuii hi a ni,' a ti a, Miss leh Zorina thu min hrilh vangin rinhlelhna nei ru ve tho mah ila min ţhawng dawt tho. Chu nu awm ve bulah chuan ţhu-in a thusawi tur ka ngaichang a.

Rei ve tak a ngawih hnu-ah 'Remzopuii hi mi hlauhawm a ni, a hmeichhiatpui a ngaizawng ţhin a, an lo duh let ve loh chuan a that mai ţhin, mi à leh mi sual, mi hlauhawm diktak a ni', a ti a.

Ka lo phâwk hrâ thung, 'mahse, ka ţhianţha ber Zonunsanga nen an inngaizawng a sin', ka tih chuan a nui leh mai a, 'Zonuna kha ka u a nih kha, ani pawh kha mimawl a nih kha', a tih chuan ka lo phu leh dawrh!

Zonuna nen hian nikhua ka hriat tirh aţangin kan inkawm chho kha a ni a, nau a neih thu ka hre miah lo chu a mak, an chhungkaw thlalakah pawh a lang tel ve ngai lo!

'Zonuna'n nau a nei lo', ka ti sap a, ani chu a dan ngaite-in a nui leh mai a, a bul setah ka ţhu tawh bawk a, ka ban a rawn vuan a, a kuah a ni mah.

'Zonuna nen hian nu hmun kan ni lova, kei hi Zonuna pa, ka pa ni ve bawk Pu Hmuchhuaka fanu ngei ka ni, a tawi zawngin sawi ila, ka nu hi nula tlahlang, lepchiah an tih ang mai hi a ni ve a, a hming chu Thansangi a ni, ka nu chu a nu leh pa, ka pi leh pu te thu zawm lovin vai ramah a kal lui a, chutah chuan an chhungkaw harsat ţhinna vanga rethei reng renga khawsa ţhin ka nu chuan, vai hausa tak tak te'n an tawktarh chu a nunkhua a nawmna a nih ve beiseiin a hnar phal lo a ni mahna, nawhchizuarah a chhuak ta der mai a, a nu leh pa te chenna inah a nuamsa lo bawk nen ka pi leh pu te bula a awm ai mahin a nuamsa ta a, chu nawmsakna chuan ruihhlo leh nawmchenna dang dang a fawm tel vek mai a, entawntlak chu a ni mawlh lo mai, mahse ţawp tak tak leh a nazawng chu a fawm kual lem lo a, chutia nun nuam ti taka a awm lai chuan Zonuna pa hi a hna pawimawh ti tura phai lam a kal naah ka nu nen hian an inchhar a, ka nu chu a khawsak danin a zir lo laklawh bawk nen pu Hmuchhuaka'n a beisei deuh pawh chu a lo hnar hran bik lo.

Tichuan, a cham chhung chuan nupa ang maiin ka nu in luah ah chuan an khawsa dun a, Mizoramah nupui raipuar ţeuh tawh a nei tih erawh ka nu khan a hre lo, ka nu chu nawhchizuar mai mah ni se mi pasal pawmlai a kawp duh lo ve tlat thung a, sum a duh vang maiin pawisawi ve lo a hmeichhiatpui tihhrehawm a duh bik lo a ni. Tichuan inngaihzawnna em em pawh awm lovin khumlaizawl nunah an inzawm ta chu ka nu pawh a ruak lo ta hial a, hetah hian ka nu pawh a che pelh ve a ni, midang a mutpui chuan invenna a hman tir zel a, mahse pu Hmuchhuaka a mutpui chuan invenna an hmang hauh lo, tichuan pu Hmuchhuaka chu a haw zui a, ka nu pawhin a vei zui lem lo.

Mahse, a haw aţanga thlahnih lai a vei hnu chuan ka nu chuan insawiselna neuh neuh a nei ta a, a ruak lo tih a hre chhuak ta a ni, a nun chu a bawlhhlawh a tih avangin umzui pawh a tum hran lo, chutiang hmeichhia chu tumahin an neih duh a ring lo bawk, theihtawpa inuluk leh inenkawl chungin min pai a ni tih a hriat hnu aţang chuan a sum neih sa ve te nen a inzawrh ţhin leh a ruihhlo khawih ţhin te pawh bansan rihin a puma naute chu min enkawl a, tluang takin kei hi ka lo piang ta a ni, ka leikang deuh hnu chuan min awmtu tur ruaiin a eizawnna ngai bawk chu a khawih leh a, mahse ruihhlo erawh a tih chhunzawm tawh lo, mipat hmeichhiatna chu a mamawh ve tawh bawk nen sum hmuhna lo awlsam pah lehzel si nen a tlan leh ta tawp mai a ni, mahse kum 16 ka nih kum chuan natlawkna pawh nei hran lovin ka nu chuan min boral san ta mai a, ka tuar viau nghe nghe, tichuan ka nu diary hi ka hai chhuak hlawl a, a eizawnna pawh chu a diary ka chhiar aţangin ka hre chauh a, mahse ka nu kha ka dem chhin ngai lo, ka nu a ni miau a, diary ah chuan ka pa chungchang te, min hrin hnu-ah a ruka ka pa a zawn thu te, neih kher pawh phut lovin fa a nei tih tal chu hriat ve ngei a phu alawm le tia a biak a tum thu te a inziak a, mahse ka pa chuan nupui fanau a lo nei reng tawh hi a lo ni a, chuvangin a hrilh leh ta lo a ni tih te a inziak a, min awmlohsan takah chuan ka pa chu zawng chhuaka tlawhpawh hrim hrim turin min chah bawk a ni.

Ka nu kha khatiang mai kha ni mah se a fanu hma chu a lo ngai ve viau a ni ngei ang, bank account ka hminga hawngin sum ţhahnem ve tawk tak a lo dah lut ziah hi a lo ni a, chung te chu a tam tham ve a, kum tam ve fe min daih dawn tih ka hria, mahse hman ral ve zel a nih vangin ka class kal karlakah part time in ka inhlawh ve reng a, pawisa hlawm hman ngai ni lemloah chuan ka intodelh ve thei ta mai reng a, chumi hnu-ah sum hlawm ţhahnem ve tak la chhuakin Mizoram chu kum 18 ka tlin kumin a vawikhat na atan ka rawn chuang chhuak ve ta a ni, ka nu khan Mizo ţawng hlirin min bia a, chuvangin ka buai hran lo, kan awmna hmun Delhi ah Mizo tamtak an awm ve bawk nen Hindi leh English nen ka thiam dan a inchen reng a, ka buai ka ring hran bik lo a ni, kumhnih zet mai ka nu min kalsan aţanga ka la rawn haw loh chhan pawh ka zam a ni. Ka nu rilru ang tho ka pu ve a, ka pa khan a fanu ka ni tih a hriat bak ka beisei lo, a mi enkawl ka beisei lo a, mahse, thisenzawn ka neih ve chhun te hmai hma ngeia hmuh ve kha ka chak a ni.

A hmasa in ka pi leh pu te chenna lam Sairang lam ka pan phawt a, mahse anni chu an lo boral ve ve tawh a, ka nu nuţa neihchhun chu a nupui fanau te nen an lo awm a, ka putea hnena kan nufa chanchin ka sawi chuan rei vak lo a ngawi vung vung a, mahse ka nu chu a thih hma aţang tawha an tuithlar tawh thu te, an hriat ve tawh loh thute ka putea chuan min lo chhahchhuah khum ta mai a, rilru na tak chunga Aizawl lama let leh nghalin Hotel ah ka innghat ta ringawt mai a ni.

Chutianga ka nu nuţa neihchhunin a tunu duh lova min hnawl chuan ka rilru a tina em em a, ka suahsual a chhuak a ni mai ang chu, thuhnuairawlh taka ka awm a ţulna hre tawh bik lovin min hringtupa chenna in chu a tuk tlai lamah ka pan leh ta a, an lo awmkim ţhap, chu chu ka duhdan chiah a ni, chhung inkhawm an lo hmang mek a, an thil tar pawh chu pawi sa lovin ka lut hmiah, mak ti deuhin min lo en ţhap a, chhung inkhawm an hman thu min hrilh paha lo nghak mai tura min tih chuan ka sa zak, an chhungkaw thisen ka kai ve thu te sawia ang phiar phiarin an fapa bulah chuan ka ţhu hmak a, chu chu Zonuna hi a ni, ka nu leh ka pa chanchin ka hriat ang ang chu ka sawi ta mawlh mawlh a, a nupui chu a ţhawng takzet, an zavaiin a ţhawng a ni zawk mah, a tuar na zual ti ila a dik zawk awm e.

Ka duh ka sawi zawh hnu chuan ka thinurna pai chu ka leihbaw ta bawk nen ka rilru a nuam lo chawpchilh nghal a, ka putea laka lungawilo anni chhungkaw chunga ka va hrithla ta ngawt te chu naupanchhiatthlak ka ti leh hnuhnawh bawk nen, min enkawl ka beisei lova, ka nu in zawngchhuak tur chea thu min hnutchhiah vang chauha rawn inlan ka ni, ka kal ang e, tiin min hringtu chu ka melh kal hnu-ah ka chhuak zui a, mahse Zonuna chuan min rawn um chu niin, zaidam dap hian min chelhbet chungin min bia a, keipawhin a nau angin min pawm hmak a nih ringin ka thlenna hotel leh ka mobile number te chu ka pe ve mai bawk.

A tuka min rawn hmuh tur thu min hrilh hnu-ah taxi min phar sak thlap a, keipawh chu thuawih deuhin ka kal ve mai bawk, a tukah chuan a rawn kal ta ngei a, mahse amah chauh ni lovin Remzopuii nen an ni, inngaizawng an nih thu te min hrilhin kan titi ho a, kan nui nasa bawk nen  ka nu min kalsan aţanga ka hlim ber ţum a ni tiin ka ţawngchhuak hial a, mahse, chu misual Remzopuii duhzawng chu ka lo ni a ni mahna, min en ngawih ngawih a, kei chuan a bialpa nau, inlar thut ka nih vanga min en duh ni maiah ngaiin ngaihţhat lohna pawh ka nei hran chuang lo, ka zun a chhuah em avangin toilet lam ka pan zuai a, ka zun lai mek chuan chaw chhun tur kan chah a rawn thleng a ni tih ka hrethiam ve mai, a lo ni reng bawk a, kha mite pahnih khan engtiklaiin nge ka ei turah khan damdawi an phul hman ka hre lo, kan ei zo chu ka dava riai a, ka la awm ngai bawk si lo nen mak ka ti viau, a hnu-ah phei chuan engmah hre lovin ka awm zui ta mai a, ka harh leh meuh chuan he hmunah hian ka lo awm tawh.

Thil zawng zawng ka hre lova, an tan hlauhawm tham ka ni lo tih an hriat vang nge an chet tawh dan ţhenkhat chu ka hria, Remzopuii hi Zonuna hian a hmangaih em em a, a dawi à te hi a ang hial zawk, zing leh tlaiah an rawn kal ziah a, eitur min pe ţhin, dandawi hmangin ka tha a zawi theih na atan min chiu ţhin a, chu bak chu min tihrehawm lo, kut pawh min thlak ngai lova, eitur lah nise ka beisei dan loh ang zetin tuihnai tak tak min pe, an duhdan chuan stripper ang maia an hmaa saruak deuhthaw a lamkual a, an tisa chakna ka chawhthawh sak hnu-ah eng eng toys emaw hmang tel chunga Remzopuii mutpui turin min duh a ni. An thilduh ka hriat hnu-ah chuan chaw pawh ka ei ţha duh ta lova, anni duhdan anga khawsak ai chuan thih ka thlang zawk a ni, ka luhlul ka chhuah ve tlat vangin a tira min tih ngai loh danin kut pawh min thlak ta zauh zauh a, thahah pawh min vau ţhin, zunram ka thiar leh ka ţam tawngkhawng changa eitur min pek ka ei chang bakin êng pawh ka hmu ta lo, mahse maw. Ka hmuh apiangin Zonuna mitmengah hian min lainatna ni awm tak hi ka hmu tel ţhin a, mahse, a nau a hmangaihna ai chuan kha hmeichhia a hmangaihna leh tihlawm a duhna kha a chak zawk zel tho', tiin rilru nat hmel fe hian a thusawi tawp chu a khar a.

A thusawi zawng zawng ka ngaihthlak hnu chuan ka rilru a buai nuai nuai, ka khawngaih a, ka inkhawngaih bawk, chumi piahlamah chuan Remremi chu ka râp em em a, mak ka ti bawk, chu aia mak ka tih chu Zonunsanga a inrawlh ve dan a sawi chu a ni.

Ka hrechiang viauin ka lo hre ţhin a, mahse, kei hi mimawl tak, an lo bum kawi mai mai ka ni, inzui kawi reng ţhin ni si kha bialnu a neih hnu-ah kan inţhianţhatna la reh lo mah se mi à ka ni lova, hunthawl ka pe ţhin, an mamawh tih ka hre ve thiam miau a, ka hriat loh karin chung zawng zawng chu an lo tidun chu niin! Ka hua em tih ka hre lo, mahse ka rilru a tina ngawih ngawih, chuti chung chuan ka bula ţhu, ka ţhianţha ber tia ka chhal ve ngat nau ngei mai thusawi zawng zawng, a bikin a u, Zonuna inrawlh ve lai kha dawt nise ka tihna chu a nasa zawk.

Ka rilru a na em em a, ka bula awm tan hian a u a ni a, ka tan ka bestfriend a ni, hmelhriat ngai loh te'n kan chungah heng thil hi ti ni ta se a hrehawm in rilru pawh a na ngei ang, mahse, kan tana mi pawimawh leh hlutna nei te ngeiin kan chungah hetianga nunrawnna an lantir zawng, a na bik ngawih ngawih, kei phei chu kutthlak ka la tuar lova, tin, min chiu tu kha nu Mawitei a ni bawk, chuti chung chuan ka na ngut ngut tho.

Ka bul ami chu a hming ka zawt sap a, 'Sharon' tiin min chhang ve mai, 'Sharon, a pawi hle mai, mahse, Remzopuii hi a cousin Zorina leh Detective Genevieve in an chhui mek a, a laka fimkhur tur pawhin min chah nghe nghe, anni pahnih chuan ka awm lo tih an hriat veleh a an bitum tur chu Remzopuii hi a ni, hlauthawng suh aw, min chhanchhuak em em ang', tiin ka hnem veleh chhawng a. Diktak chuan min chhan pawh ka ring hran lo, mahse beiseina tlem tal Sharon hi pek ka duh a ni.

'Kei chu thih mai hi ka pawisa hauh lo, min that se ka ti zawk mah, ka nu kiangah ka awm chak a ni', a tih chuan ka mittuiin ka biang a luan lum nghal pap a, zawite-in 'keipawh' ka ti sep.

Ngawi rengin kan ţhu dun tlawk tlawk a, vawilehkhatah kan awmna pindan chu a rawn inhawng rawp, a rawn eng lut ruai a, kawngka inhawng lam ka melh zeuh a pawnlam ka hmuh zuai chuan a en loh danah zan a ni tih ka hre mai, an mobile light ti engin min chhun a, thim a ka awm rei tawh vang nge ka mit a na nghal, ner nawkin ka hawisawn a, ka hawisawn rual rualin pawisawi loh hmel zeta Remzopuii nui hak ri ka hre zawm zat bawk.

'Nangni tehhrep hian min that vat lo a nih chuan hremna inhmu ngei dawn a nia, inthah tak Jenny ang khan hrehawm takin inthi zawk mai thei bawk, Detective Genevieve leh Zorina hian an veh reng che u a nia', ka awrawl tawpa ka au ţhat chuan an nui dun nghal hawk hawk a.

'Aw..I Genevieve, detective a zawnga laktlakloh ber mai leh i inphalraina pa ka u te chu kan bumna thangah awkin i ruang lem an ţah dun melh melh ang mawle No-i', Remzopuii'n nuih zat hmel fe-a chhanna min pek chuan min tihnual rawih mai.

'Ei tur kan rawn pe dawn che u a, nangmah vuinaah min rinhlelh loh na atan kan lan a ngai sia' tih pahin ei tur a sawi chu a ni ngei ang, a rawn theh thla thak a, 'ka duhdanin inla awm ngei ang, a phurawm tawh takzet', ti leh sapin an chhuak a, kawngka kharin an kalh ri leh rawk rawk.

'Zonunsang, i ţhianţha ber ka ni emaw ka ti a,' tiin ka au chhuak ţhawt a, ring takin ka awrawl tawpin ka ţap nghal hawm hawm.

Ka natna zawng zawng paihchhuah tuma ka ţah hlawp hlawp lai chuan kawngkhar a rawn intheh hawng rawp a, Zonunsanga a ni! A hnungah chuan Remzopuii chuan rak ţhat ţhat pah chuan a rawn zui bawk a, Remremi en chunga, 'Remzopui, nang hi ka hmangaih zia che i hria, mahse nang ka hmangaihna che a nasat em avanga hetianga ka nau leh ka ţhianţha ber chunga tenawm taka ka che hi tawp a hun tawh, ka inten ngawih ngawih tawh a ni'. A tih chuan mak tiin ka meng phar awk a, ka lam rawn hawiin za lo tih hriat zet hian min nuih suk.

Remremi inhersan in ka lam a rawn pan a, ka kiang a rawn thleng ţep tih chuan silai a puak dur mai le, ka au chhuah ţhawt rualin Zonuna chu ka hmaah tak a rawn bawk thlawp a, 'ka tihpalh', tiin Sharon nena min melh tawn vung vungin a zawi hnawk a, Remzopuii chuan ring zeta nui uar uar chungin Sharon-i lam chu a pistol ken chuan a tin zawm leh zat, ka hmaa thilthleng chuan min barakhaih em vangin ka mitsulh a, silai puak nawn leh ţhuai ri chu ka hriat hnuhnun ber a ni ta. 

Ka harh leh chuan damdawi in khumah ka lo mu bâm a, ka mutna khum bulah chuan Detective Genevieve leh Zorina an lo ţhu bawk, ka harh tih an rawn hmuh chuan an ri hliai a, tui min tulh vat bawk, tui ka in zawh veleh chuan harhchhuak thutin, 'Zonuna leh Sharon-i kha,' ka ti chhuak nawk nawk a, ka tal chiam bawk.

Ka awmdan mumal lo tak chu min bengdaiin, 'Zonuna chu a thi, Sharon-i pawh beisei a sang viau lo', Zorina'n min dawm beh paha a tih sup chuan ka mittui a luang ngiai ngiai a, nakinah in sawi chhunzawm dawn nia, damlo hi a hahdam leh deuh a ngai tiin Doctor rawn lut chuan min chiu zawm zat a, rei loah ka muhil leh vat.

Damdawi in ka chhuahsan aţangin kar khat lai a liam tawh a, in lamah ka tawm rih tlawk tlawk, Zorina'n min tlawh awl lova, Sharon-i buaipui a ngaih vangin Genevieve-i erawh Damdawi in lamah a tâp chawt, Zonuna thih chhanah Sharon leh kei chu min mawhpuhin Pu Hmuchhuaka te chuan min ngaihsak eih lo, kei chu thuhran, a fa hrin ngei Sharon thihna nena insuala a awm lai leh thudik tak an puangchhuak tawh chung pawha chutiang rilru a la pu chu Pu Hmu-a ka haw ngawih ngawih, pi Rini, Zonuna nu tan chuan thil awm lo pawh a ni hran lo, mahse a pa ngeiin a ngaihthahna chuan Sharon thinlung a tina viau ngei ang le.

Khatia Remzopuii'n Sharon-i a kah rual chiah khan Genevieve leh Zorina te bakah police rawn thleng chawpchilh ve nghalin Remzopuii chu an kap ve nghal a, mahse a sahuatah ni lovin a ke ah a ni thung, amah Remzopuii ngei pawh Damdawi in lama police te venna hnuaia awm chunga enkawlna a dawn hnu-ah amah ngeiin a pha lo bawk nen, a thilsual tih zawng zawng mai, Jenny a thah dan te, Sharon-i laka chet a lak dante leh keima chung ngeia a thiltih te chu a puang fai kelh a, nu Mawitei, a fapa natna hmanga a vau dan te pawh a sawi tel vek, a thil sual tih zawng zawng avanga sum tamtham tak chawitirin damchhunga tang tura a chungthu rel a ni a, nu Mawitei pawh chu ka laka a chetna aimahin, ka nu a thah avanga damchhunga tang tura tih a ni ve tho, Ruatruata natna kha Remzopuii'n a hriat chhan chu a ţhianpa hi kha hliam tuar tu, Ruatruata'n a puih kha a ni a, a ţhianpa natna a hria a, Ruatruata lahin hmanhmawh thilthuah a ban hliam ngaihtuah lo lekin a buaipui miau a, chance a ţha viau, Ruatruata chu a ţhianpa dam hnu-ah lawmthu te hrilh turin an kal a, a ţhian chuan a natna chungchang te chu sawiin Ruatruata pawh a intest vat a, hlauh ang ngei ngeiin a lo positive ve hlauh mai, chu chu remchangah la-in kei hi min lo duh ru reng tawh bawk nen hmanruaah a hmang chhunzawm ta mai a ni awm e, Zonuna erawh chu a thi miau a, a chungah action lak theih pawh a ni lo.

Zoram mipui titi berah kan chanchin chu rei tak a tling nghe nghe a, kum li lai liamtaa pawngsual case nen, a hnu kum khat hnua pawngsual tuartu Jenny thah a nihna te nen a hnawk viau a, a awm ve reng e.

Sharon-i pawh kar hnih a liam leh zet chuan a rawn harh ve ta a, biak tlak erawh a ni mang lo, a rawn harh hnua a thusawi hmasa ber chu ka chungchang a ni! Ka ţha em, ka him em tih chu a zawt mawlh mawlh a, min ngaihtuah takzet tih hriain keipawh ka inthingharh a, ka awmpui ta chawt a, a bula ka awm lai chuan, 'tinge ka thih mai loh le? Ka thisen zawmpui te'n min duh lo vek a, min hmangaihtu awmchhun ka nu lahin min thihsan bawk si, lo thi law law ila a ţha tur', a ti a, midang awm ve laia a intih paukhauhna hlipin ka kiangah chuan a ţap fo ţhin.

Thlakhat dawn Damdawi in lama kan inenkawl leh hnu chuan ka in lamah kan haw dun a, kan dinhmun inanna lai a tam bawk nen pianghmun ang chiahin kan innel a, kan inhmangaih hle bawk, tihian unau kan ni tawh e tih chu kan thutlukna a ni, sum lamah buaina kan nei lova, kan thiltawn erawh chuan min la nghawng na reng mai.

Chutianga awm reng zawng tiin Genevieve leh Zorina chuan min thlem reng a, class kal tur leh hmalam pan turin min fuih reng ţhin, keini unau pawh chuan, 'thilsual titu zawk ang maia kan kimkit reng chhan tur a awm lo', tiin thutlukna kan siam a, ka college kalna ah Sharon pawhin admission te ti vein class kan kal dun ta ziah a, kan chungchang an hre vek bawk nen a tirah chuan en hrek hrek leh kan kâ ngei aţanga thil lo hriatchian chak fal kan tawng fo, kan pal lui ve zel a, tunah meuh chuan mitin deuhthaw chu kan nuna thil thleng hria ang pawhin an awm tawh lo.

Chutihlai karah chuan Detective Genevieve pawh lecturer a la ni reng a, kan case ah lah lang lo lam aţanga a thawhrim rah a ni tih an hriat vangin an en dan pawh a dang ta-in fakna lam hlir a ri ta a, ani erawh chuan, 'midangin min ngaihdanah ka buai lo, engang pawhin midang chuan min fakin thiam min chantir tawh mah se keimah ka inthiam thei ve ngang lo a ni', tiin tuna a hna hi nuam a tih thu a sawi mai ţhin.

Kan inpawh ta em em a, ani pawh amah chauha khawsa a ni bawk nen kan in lamah chaw a rawn ei ve deuh reng, weekend ah te chhuak hoin unau ang maiin kan inkawm a, kan zinga upa ber a ni bawk nen thu ţha tinreng min fah mawlh mawlh ţhin.

Zorina pawh a rawn lenglut ve reng a, kan innel viau, mahse nulat tlangvalna hawizawngin min en tawh ngai lova, a hmaa thil thleng kha chu tihpalh thilthu a thlengah keipawhin ka ngai hmiah.

Ril zeta min melh leh vung vung ţhin erawh mak ka ti.

Remzopuii a tlawh zeuh zeuh thu ka hria a, ka dem hran lo, a nau a ni miau a, chutia ensan tawp chu a harsa ang tih ka hria, amah ngeiin a u hmabak chu a chhui zawm a, la chhuak duh nise hremna pe turin ke a pen ka ring lo, tum pawh ni tehreng se thil theih a ni lo bawk.

Chutia pangngai taka hun kan hman chhoh ve bek bek lai chuan thil danglam a thleng ta tlat, nu Mawitei fapa Ruatruata leh Sharon chu an inhmelduh ta tlat a, Ruatruata hi mi rilru ţha tawp a ni a, ka haw hran lo, a nu chetdan avanga an chhungkua ka laka an inthiamloh zia ka hriat vanga tlawhpawh lo ka ni, ka nu thattu te inchhung hi ka ngaina tehchiam tawh lo bawk nen kan inhlat dû tawh rêng a, chu chu an hriat avanga inthup pawh an ni, chutiang chanchin ka hriat thawi chuan Sharon-i leh Ruata chu titi pui ka duh ta a, zanriah eikhamah Sharon-i hnena dawr ka kal lawk tur thu sawiin ka va phei ta a, an kawngkhar ka kik tur chu ka tîm deuh, mahse insangmar in ka kik a, lut turin min sawm zui zat,  an in chhung ka lut chu an lo phâwk hra hlawm a.

Zanriah an lo ei ve mek a, min hmu chu mak an ti tlang tih ka hria, Ruatruata leh Pa Zoa chu ka biak duhthu hrilhin Sharon-i nen an chungchang tih ka sawi a, Ruatruata chu a kun nghal daih, a inthlahrung tih ka hria, a natna lah chu kan buaina nena inzawm a ni ve miau a, a tlangthang bawk nen ka hrethiam tho, 'zanriah in ei puar lamah in lo phei mai dawn em ni', ka tih chuan pa Zoa a lo bu nghat. Puar deuha ei tura tiin ka chhuak leh ta vat a, kan kawtah chuan Zorina a rawn inkhalh thleng ve chiah, amah chauh a ni chu mak ka ti deuh a, Miss awmna zawh na'n mitko ka san khum ak ak a, a nui huk mai, 'ani chu in lamah zanin chu ka awm ang e, inenlawk ka duh a ti a nih kha', a ti ve mai bawk.

In chhung lama kan luh hma-in zaninah thil sawipui duh che ka nei a nia tiin a hmuiin ka hmui chu a rawn nûl a, min fawp duh chiah si lova min chhaih hnu-ah hamhaih deuha ka ding chu nui huk huk chungin min luhsan daih, ka hmui khawihin ka nui var var a, ani hi ka duh lo a ni lo, ka va hmangaih em em hran pawhin ka hre lo, mahse ka mit ka chhin apiangin a hlimthla ka hmu tih erawh ka pha thei bik lo ang, amah zawk hian min hawi lo riaua hriain ka lantir lo mai chauh a ni.

Zâng vahin ka lut a, rei pawh kan ţhut hma chuan pa Zoa te pafa chu an rawn inzui lut bawk , Sharon-i leh Zorina pawh chuan mak an ti tih ka hria, anni pafa lah an zum dûk mai bawk nen ka han inla mitak kual vel a, 'Ruatruat, Sharon nen hian in inzui tih ka hria a', ka'n ti tâwng mai a, bah nak hian 'nia, ih' a ti ngawt a, Sharon pawh a mitmeng a pha dui mai.

'I nu vangin heng thil hi iti em? Ka unaunu hmang hian min beih itum em ni?'  Ka'n ti leh ţhat a, a nih loh thu mangan hmel fe-a a sawi chuan za zet hian ka nui chhuak a, an mit chu ka chungah a fu ţhap.

'Ruatruat, i nu hi ka haw lo ka tih chuan dawt ka sawi mai thei, ka nu min laksaktu a ni miau mai a, mahse, chuvang chuan nangni pawisawilo hi ka haw reng reng lo che u, i nu thil tih vangin min pawh ngam lo tih ka hria a, chuvangin keipawh ka inla hla ve mai chauh a ni, hrehawm intih loh na atan, hetianga kei min zah run a hrehawm taka inzawmna inneih hi a ţha lo, kan in-ah te rawn lenglut la, keima lamah engmah harsatna a awm lo, amaherawh chu kan kum a la naupang tlang a, fimkhur tak erawh chuan awm hram ang che u', ka ti dap dap a.

'Ringring, i sawi chu a dik, Sharon-i pawh i lakah a inthlahrung a, keipawh chuti tho, mahse ka dam huai e, i puitling hle mai', tiin a ngawi dat a, rilru hah hmel fe-a thawk la hawkin 'mahse ka natna hi,' a ti chhuak hrawk.

'Ekhai, chutiang ngaihtuah reng reng suh natna hlauhawm ber a ni hleinem, thihpui ngei ngei tur a ni lova, i kai chhan lah i khawloh vang a ni hek lo, treatment ţha takin i la ang a, fa neih kawngah pawh harsatna a awm hleinem, thiamna a sang a, tin, treatment i lak ţhat miau chuan i kawppui hi i natna i kai kher lo thei ve tlat, kha i damdawi ei khan i natna hrik kha tihlum lovin a rep ro ve a, midang kai lovin i awm thei reng alawm, insit phah na atan hman tur a nih loh rualin basa ngam erawh a ţha hauh lo thung', thutak fe hian ka ti a, a lo bu nghat nghat.

Pa Zoa pawh mipa a ni tak naa a lung a chhia tih ka hria, lawmthu min hrilh hial a, tichuan boruak tih zàn deuh na atan tiin Sharon lakah chuan ka laka zep a neih vangin ka han thinrim der leh vel nen hlim takin kan inkawm ho ta a.

Pa Zoa haw hnu pawh chuan Ruatruata chu a la leng ve reng, hunthawl an mamawh ve tho avang leh Zorina'n min biak duhthu a sawi avangin kawtzawl lamah kan chhuak a, anni in chhungah an inkawm thung.

Thla eng mawi zet hnuaiah chuan kan ţhu dun ran a, min melh vung vung chuan min ti lai deuh, ka tihngaihna hre lo chuan 'eng nge' ka ti hlar a, a nui huk, 'ka rin aiin i puitlingin i pachang daih mai', a ti sup a, 'kan huntawn vang hian rualpui te anga khawsa thei kan ni tawh lo a ni, puitlin na tham chu a ni ve alawm', ka ti sap ringawt.

'No-i, ka duh che', a ti a, ka en hau ringawt mai, fiamthu a laksak tumin ka nui lui ngial a, a thutak em avang chuan ka nui tawp leh riai riai, ka lung a su dup dup a, mak takin mipat hmeichhiatna hial pawh ka lo hman pui tawh lakah chuan ka zàm chhe der mai, amah en loh tumin ka hawi kual ruai a, nui sukin a lamah min kuaiher a, min fawp hmiah, a rei tak deuh hnu chuan keipawhin ka chhang let ve tan tan a, duhthawh takin chu zan chu kan hmang dun ta a. Inngaizawng hming kan pu ve reng mai.

Kartawp a ni a, tlang hmun thengthaw nuam takah Zorina piancham lawmna ni pah fawmin kan unau leh Zorina bakah, Ruatruata leh Miss Genevieve-i te nen kan leng a, beer kan keng a, kan dawt khalh khalh, bluetooth speaker kengin hla kan play a, kan zai pui lang lang bawk nen nuam kan tiin kan hlim tlang viau mai, ni a tla ruai tawh a, a sen phût mai bawk nen haw mai tumin kan intintuah a, kan chet nak nak lai chuan, 'ngawi rawh u, tlai ni tla tur kha a mawi lutuk, tikhan awm ula, thla kan lo lak ang che u ', tiin Zorina nen min awmtirin anni pathum chuan min hlat zawngin min kalsan diak a, 'kan lak ţeuh tawh kha mawle,' nui hak hakin ka ti nanga ka hnial hran bik lo.

An bluetooth speaker ken hmang chuan rimawi an play ri riai riai a, camera lek chhuak pawh an awm si lo nen mak ti taka ka en chuan an lo nui sang hlawm a, Zorina ka en chuan ka bulah a ţhingţhi thla ruai ruai, mak ka tiin ka hamhaih a, zawhna hlirin ka khat tih ka inhai bik lo, a kuta bawm tetakte mawi danglam zet keng chungin min en ran a, 'i ţhiante leh i bulhnaia awm te kiangah hlim awm takin lang mahla, hmangaihtu hian i khawharna leh i malna ka hmuhhmaih ngai lo, i nunruak zawng zawng hnawhkhat zo lo mah ila, kan thiltihna kawng engkim deuhthaw a kan tana kan SIGNATURE a pawimawh ang hian, kei hi i tel lovin ka kim tawh lova, i tel lova nung zo lo chu ka ni hauh lo ang, mahse, i nunkhua leh ka nunkhua ti famkim lehzual turin nang hi ka nupui ini duh ang em? I pasal atan min nei duh ang em?', Tia ngenngawl zet mitmenga min en paha thûk ruiha ţawng chhuak Zorinsanga chu ka en reng a, mittui luang reng paha nui var varin 'aw ka duh e', ka tih chuan bawm chhunga silver ţhi nalh leh dangdai zet, simple ru phian kara 'SIGNATURE' tih mawi zeta inziak kual raih chu dimdawi zeta ka sam min huisawn sakin min awrh tir a, kan ţhiante, kan unau te ni bawk chuan min lawmpuina atan kut an lo beng vei dar dar.

'Ka nu, ka ngai kher mai che', tiin ka phun chhuak sap a, min hrethiam zetin min fawp vawng vawng.

Mo kawrfual mawi tak ka ha ve ta mai chu mumang a ang lek lek hial mai, laina hnai ka neih loh em avangin pa Zoa te in-ah amah Pa Zo-a leh Miss Genevieve-i chuan palai te pawh an dawngsawng vek a, Kohhran hall ah chuan Pa Zoa ngeiin min kai lut bawk, simple thei ang berin kan ti naa a pui ru kher mai bawk a, Ruatruata leh Sharon-i chu kan dinpui ve a, hlimtlang takin kan innei ta, rei vak loah nau te keng ve in kan in-ah kan la khawsa zui a, Sharon-i leh Ruatruata te inneih hun tur pawh kan hlat tawh lo, an inneih fel hun-ah Zorina te in a insawn tum kan ni a, Sharon-i ngaihtuahin Zorina nu leh pa, ka nu leh pa lo ni ve ta te pawh chuan min rem tihpui thlap, ka in leh lo chu ka laizawn neih chhun Sharon kutah ka dah tawh thung a, hlimna hlirin min bawh vul chûk a ni ber mai.

Ka naupai lah chu huat a hnehin ka ngeih phian a, ei leh in leh enkawlna ţha ber ber ka dawng bawk nen keima tawkah ka no ve suah mai, ka rih tak tak hmaa Remzopuii tlawh ka duhthu ka sawi chuan ka pasal Zorinsanga chuan remti chiah lo mah se ka dil ngawrh em avangin a phal ve hram a, a farnu a la nih ve miau avangin ka lakah a inthlahrung tih ka hria, kan tan hlauhawm a ni tawh lova tiin mangţha tih tal ka duh ve a ni.

Ka nu leh Zonuna thlan kan tlawh dun hnu-ah Remzopuii awmna Central Jail lam panin kan chhuak a, tunhma a kan hun lo tawn tawh ngaihtuahin ka zam ru takzet, eng thil nge ka sawi ang tih pawh ka hre bik lo, kan thlen chuan Remremi chu ka melh kal a, ka dul, ka naupai lang ve tawh chu melh zeuhin a khi suk a, a mitmengah chuan inchhirna pakhat te mah ka hmu lo.

A inchhir loh zia lah chu mimawl ber tan pawh hriathmaih chi ni lo khawp hian, 'kha i pumchhunga naute nen khan, a rual talin kan la thi ho ang chu', a ti hial!

Mahse, ka kiangah ka pasal a awm a, ka hlau hran lo, ngeiawm zetin, 'i thei ngût ang e maw chu', ka ti ve ngat.

Kan haw lamah chuan kawngsir zau laiah dingin min en a, ril ruiha min fawh vawng vawng hnu-ah, 'ka nupui ini hi ka inchhir ngai lo ang, ka lawm e ka nupui', min tih chuan ka nuih let var var a, keipawhin he ka pasal Zorinsanga hi ka hmangaih takzet, ka puma awm, kan pahnih tana malsawmna ni tura Pathianin min pek kan fa nen hian.