nubawihi zo tawh

NUBAWIHI

'Ka fanu, lo tho leh la, i nu hi nu ţha tak ka nih theih na atan kawng min kawhhmuh ta che', tia lungngaia ka ţah rawng rawng na pawh kum dawn a lo vei leh ta.

Ka theihnghilh ngai lo a, theihnghilh turin min nawrlui eng ang mah se ka thinlung leh ka ngaihtuahna aţang hian ka fanu kha tumahin an nawtreh thei ngai lo ang.

'Bawihte, kum thum mi lek inih lai a khawhar in a ka hruai ţum che kha tumah hian ka hriatrengna ata hi an nawt reh thei lo a sin, naupang harh rual lek na nâ na chu i tlàn terh terh a, ka lo véng séng bik si lo che nen khawhar te chhúngkua in a an bathlara an hún, an barel tetakte, i chen tawk lekah khan chil i chhak a, ka thinrimin ka zak bawk si, hmawlh la-in ka vua che a, ngaihdam dil tur che a vín chung che in, 'ka ti tawh lo ang ti rawh' ti chungin ka vaw sawk sawk che a nih kha, mahse, nang chuan i mittui far khat pawh i séng duh lo a, luhlul zetin kha naupang ,ka thisen chhuak a, na tak tuara ka hrin, kan lawmna ti famkim tura i pa nen kan kàr a lo piang, fanu duhawm tak khan awrawl i chhuah duh lo a nih kha, a nâ itih thu i sawi lo a ,i mittui a far hlau zetin mittui tling pam a, na ti tih hriat zet a in sehruh ve fan chung khan i dawh ve tlawk tlawk kha a ni a.

Mahse, kha thil thleng khan ka nun-ah thil min zirtir a, ka fanu hi kutthlak a tih ţhat chi a nilo e, nêm tak leh zawldawh taka enkawl ţhat chi a nih hi, tih rilru min put tir ta hial a ,kut ka thlak leh ta lo che a nih kha, min kalsan hnu thleng hian!

Ka hnute tui ringin i lo ţhanglian ve zel a, hmangaih tawp loa hmangaihna a vúr chung che in ka theihtawp a ţha-in ka enkawl che a, ka ţam aiin i ţam ka hlau a, ka taksa na, tawrh hrehawm khawp a na lai kha ngai pawimawh lovin i kut pem te takte, thi chhuak ve sar sar kha buai phili tak chungin ka buaipui che a, duat taka kuah che in ka àwimu ţhin che anih kha.

I pu nen khan in in awm nasa em em a ,i ţawng tlem bawk nen, i ţawngthei dawn lo hial a ngaiin kan mang a ang hman a ,i pu nen TV in en laia i zunchhuak sawi si lo, i cheh mawl tawp te kha aw,....I pu khan, "i zun a chhuah te chuan ngawi reng loin sawi ve ţhin ta che", tih a tum na lamah ţawng sualin ,'ngawireng hian sawi ve ţhin ta che', a tih ţum a kan nuih pui nasat zia che kha Nubawih... 

Zirna sikul-ah te kaiin hmasawnna rahbi i rap chho ve a, pawl hnih zirlai chauh i la ni, in lama tih tur inzirtirtu te khan an pe che a, zirtir che ka tum ngial a, i zir duh tlat lo, han hrâwk lah chu engahmah i ngai si lo, eng thil mah i sawi duh bawk si lo, 'a na' itih thu takngial pawh, ka zaidam hran loh ém vang leh ka thin a rim takzet tawh vang khan ka vín deuh that that che a, awmzia a awm lawi si lo, kutthlak a tih vak chi ini bawk si lo kha, i nu lû i tih hai zia kha aw...A tawpah chuan, 'naktukah min zawt la, ka thiam vek mai ang' ,i ti ta thlawt a, tihngaihna hre tawh hek lo le, awih ngam lo chung khan mut ka phalsak ta che a ,a túkah chuan vawikhat i bih thuak hnuah ka zawt che a, thiam nàl zet khan i sawi thei mai si a, mak ka ti teh e, tun thleng hian ka la sawi fo ţhin.

Hun a liam a ,kum a vei a, nangpawh kum sawmpahnih mi i ni ve ta, i khua a sik hluah a ,i nau kiangah mu-in i mu lum zo lo a, mangang tak chungin min ko a, rang fahrana i pa nen kan mut lum tawh sa na thawhsan in, in unau mutna lam ah ka rawn tlan hlawk hlawk a, i kianga rawn mu vatin ka kuah thuai thuai che a nih kha ,khatih laia ka kianga thlamuang taka i mut a, tui taka i muhil hmel te kha thlalakah hmuh tur awm lo mah se, nu thinlungah hian hmuhhmaih harsa khawpa lian leh fiahin a in tàr kalh a sin.

I ţhiante kan in-ah an lo leng a, an hnenah hlim hmel pu sâng chungin, 'keima nu chu magic a thiam a, ka khua a sik a, vawt ti tawka ka awm lai pawh khan maw, ânu ka bulah a lo mu a, min kuah a, ka lum nghal vek a sin, ka nu chuan magic hand a nei bik asin', ti a intithei taka i sawi lai te kha ka va ngai tehlul ém. Hun kal zelin tleirawl duhawm tak i rawn ni chho a, ka hmangaihna che ringhlelin min pén bosan ta fo a, ka rilru na lutuk ţhin mawlh kha aw...

Min thlakhlelhna a bo a, min mamawh lo tial tial a, i ngaihdàn tê-a kal i ching chho a, hmangaih a kan zilh na che lah 'min hau reng mai' ti a titau bâr bâr chungin min hawisan a, thluak i ti buai ţhin teh e.

Nu ,kan unau hi thi ta ila, tu thihnaah hian nge i ţah nasat ber ang? Tia mawlmang tak ,ngaihtuahna ti thui zet lawi si a i zawhna kha ka la hre reng ţhin, Ka hmangaih dan che u hi a inzàt vek a, ka tuar na vek ang, tiin hamhaih deuh tak chungin ka chhang che a, ngaihdan nih loh hmel zet a min melhin ,'kei chu i ţah nasat pawh ka ring ve lo, ka u chu Mate inti a, ka nau pawh Bawihte inti a, kei chu ka hmingpum in Lalhruaitluang min ti bik a ,min duat ve lo, tiin i men deuh pûr a, i pa in, "Chutiang a ni hleinem, i u a lo piang a, koh duat na atan Mate ka ti a, nang ilo piang a ,Nubawih tiin kan ko ve thung che a, i nau a lo piang leh a, Bawihte kan ti alawm", tia a hrilhfiah chung che pawh khan chaw ei duh loa titauin i khumah i inlukhuh hmak a, zanlaiah i ril a ţam leh lawi si khan kan hriat hlau zeta thawm dim fahran a kal dé dé chungin chawbél i va hai rak rak a nih kha, nang hian min dawi â nasa ţhin a sin Nubawih.

In unau-ah bik chuan i luhlul fâl nalh a, kan hmangaihna che erawh a nép phah hauh lo, nu hlutna i rawn hrethiam chho a ,i daisual a i nu leh pa te natna i thlen phah ţhin pawh hrethiam chho-in hmalam i pan chho ve zel a, i ţhiannu Maria-i piancham kha ka la hre reng, i mobile aţangin youtube-ah hla zai tirin kan lam dun a, i ţhiannu in video in a lo cover bawk a, ka fanu, nang nena hlim taka kan lam dun kha ka la hre reng bawk a sin, hriatreng tur leh hriatreng tlàk tamtak i nu thinlungah hian i phúm a, hlim tak a kan nuih dun bawk bawk lai te kha ka va ngai tehlul ém..

Ţum khat zan hnih ngawt i riah bo kha aw, kan be tlang thei si lo che, i chin kan hre si lo, nu leh pa thinlung i tih mangan zia kha, mutmu tuah thei lovin kan mittui kan hru fap fap reng a, a zan thum na zanah, zanlai tawhah i lo haw a, kawngka i rawn kik dat dat a ,beisei nei tak chung leh 'in fanu ruang kan chhar a', an rawn tih mai hlau zetin kawngka ka rawn hawng a, inthlahrun hmel fê-a i meng kiau te kha aw....In chhung lama hruai lut sawk sawk che-in chaw ei dawhkanah ka ţhut tir che a, khúr ru dar dar chungin, 'Nubawih, i ril a ţam em? Chawhmeh kan nei lo lutuk a, chaw ei ka siam sak ang che aw, hei, Anţam tlak ka althak a, a tui reuh lutuk a nia, tiin chaw ei ka siam sawk sawk che a, i chaw ei laia i kianga ţhu-in, 'Min ti mangang lutuk a, a chhe ber thlengin kan dawn lo thei si lo, hmeichhe fa ini a ,mipa fa anga nung ve mai mai thei i ni lo tih hria la, i riak chhuak dawn a nih pawhin min hrilh ţhin la, tichuan mangang lutuk lo-in kan awm thei dawn alawm, tia hrilh keuh keuh che-in kan pindan lam ka pan san che a, ka hmel i hmuh theih loh veleh khan maw Nubawih, ka mittui hi a dír zung zung a sin ,kan pindana ka luh veleh ţah rik hlau zetin ka ţap khur dar dar a, ka rilru in Pathian ka be mawlh mawlh bawk, ka fanu, dam taka ilo haw avang khan lawmthu ka hrilh mawlh mawlh a, ka thinlung kha a hlim ém asin. Ka fanu, dam tak mai a i rawn haw leh avang khan ka hlim lo thei lo miau alawm.

Ramdangah, Vairam lamah hnathawka kal i ngen ta tlat a, kan kianga awm a, kan neih ang ang ei ho a, chhungkim tak a awm ho kan duhthu hrilhfiah tum tak chung che-a kan biak che pawh khan i kal lui tlat a, inphuar beh a, invau khur khur theih ni hek lo le, 'dam takin aw' tia kan vai liam che a ngai ta tho.

Kalkawngah harsatna tawk loin Pathian zarah i tum ram i thleng ve ta mai a ,ţawngţai turin ka chah lawm lawm che anih kha, hna te thawkin ţha takin i awm emaw kan tih laiin bawraw takin i zu khawsa a lo ni a, ruihhlo tlàn-in mipat hmeichhiatna kawngah i hming a mawi lo ta zauh zauh a ,ui tak chunga thlahliam tu che i nu leh pa, i u leh nau te hrilh iva ti hai kher ve le!

Lo haw turin kan chah lawm lawm che a, nang chuan kan lam i rawn hawi duh si lo, kan thu i ngaipawimawh lo a ,itan ninawm kan chang zo ta anih kha'. Tia ţap chungin ka fanu thlalak chu ka chúl heuh heuh a, a na ém a sin, nu tan hian.

Chutah ţap chunga sawi zawm lehin, 'Nubawih, eng anga nasa leh bawraw pawhin khawsa mah la, kan naute duat, kan fanu, kan hmangaih kha ila ni reng a, mahse, i hrethiam si lo. Kha nî-ah khan Phone call kan dawng hlawl a, i number aţang a ni, min biak hmasak khàt em vangin phur zetin ka la a, mahse ,kha phone call kha lo la lo tawp ila ţha tur, "Lalhruaitluangi chhungte a ni em aw?" Tia zawhna an rawn siam vangin mak ti zetin i nu ka nih thu ka hrilh sap a, a thu rawn sawi leh chuan min va tinâ in min va ţhawng kher ém! "Hetah ,Delhi Mizo Welfare aţang a ni a, hei, kan duh loh deuh thil a thleng tlat mai, in fanu hian damdawi a over dose a, kan chhan hman lo", tia a rawn sawi khan ka phone húm lai ka thlauh tawp a, hamhaih leh mangang lutuk a khúr dawt dawt chungin ka hawi à ruai a, i pa mangang in thil chinchang min zawt sawk sawk paha min hnaih rawk rawk te khan chhàng turin chakna ka nei lo.

I ruang, ka fanu, thi leh thau pawlh a, na tak tuar a thihna kotlang a dak chunga ka hrin, ka hmangaih khan kan chenna in a rawn thleng a ,i ruang, nunna nei tawh lo ka hmu chung pawh khan awih harsa ka la ti fan mai.

Nubawih, ka fanu, ka fanu duat, tia ţap chunga ka auh lawm lawm che khan min chhang loa, i nu, hmangaih taka enkawl a chawilian tu che, i u leh nau bakah, i pa, i tana hah pawh sawi loa thawk ţhinin awrawl tawpa kan auh na che pawh kha i chhang miah lo'. Tia ka fanu ngaia ka biak a, ka ţah hlawp hlawp lai chuan ka pasal, ka fa te pa chu ka kianga lo ţhu-in min kuah a, a na ka tih thu leh ka fanu ka ngaih zia hrilhin ka pasal âwma bei chungin insumna tel map lo in ka ţap hawm hawm.

'Ti teh ţhiani, kan fanu chu i va tlawh ang hmiang', tia min sawm chuan rang takkn ka tho a, inphih faiin ka insiam sawk sawk a, kan chhuah hma chuan ka fanu ei duhzawng tak mai, ka thlai rah bai leh chaw bakah, a hnar phal ngai miah loh vawk chuap, ka kan chu tiffin ah khungin ka khai a, ka pasal nen chuan kan fanu Nubawihi thlan chu kan pan dun ta.

Thlan kan thleng a, ka fanu thlan kiang-ah chuan ţhu-in ka chaw leh chawhmeh ken sak chu ka phawrh a ,min ei sak turin mi nung a ni ve tawh silo te chuan min vilh na ngut ngut.

"Nubawih, i nu in i chawhmeh duhzawng a siam a, i tan a lo ken che hi i eisak dawn lo em ni?", Hnukulh ţeuh chunga ka pasalin kan fanu ,chatuan ram min pansan ta thlan riang tak mai melh ngawt ngawt chunga a tih chuan ka baw leh hawk hawk.

'Lalhruaitluang, ka fanu, vawikhat chauh tal chu ka eisiam hi min eisak leh ta che, ka eisiam tui ti tak a ei a ,ka nu eisiam chu a tui bik e tia min fak a, i ei tui vanga thlan tla barh barh chung a i sî hliam hliam hmel te kha ka hmu leh chak em mai, vawikhat chauh tal pawh, min khawngaih la, i nu hi khawngaihin min chhang hram teh,' tiin lungngai tak chungin ka ţap hlawp hlawp a, ka pasal nen chuan kan fanu thlan hmaah ţhingţhi in kan kun tlawk tlawk. Nu leh pa tan fa te chàn nat zia hi tunge hrilhfiah thiam ang le.

Khuareiin min hnem an ti teh fo a, dawt an sawi a ni, dawt chauh a ni, keini zawng kan fanu kan ngaih hi a zual telh telh a sin, hlim taka a nui hmel te, titau tih hriat taka a tûm deuh bàr bàr te, suahsualna kawng a zawh hnu-a rui meng dava riai chung a min melh na te kha ka ngai vel vek a sin. Hmaih awm miah lo-in, a fel na leh a mawina, a sual na leh a chhiatna zawng zawng kha a nu hian ka ngai vek, chutiang bawkin a pa pawhin, kan tan hian khuarei an tih hi a awm ve thei ngai dawn lo a nih hi.

Lungngai tak chungin ka pasal nen kan haw dun  hnak hnak a, kan chenna in kan thleng a, kan fanu upa zawk leh kan fapa naupang té mai chu an lo awm rak rak a, min hmuh veleh, "Nu, diary kan chhar ,au Nu-i pindanah kan infiam a" ,tiin kan fapa chuan min rawn pan a, Mate-i, ka fanu upa zawk ka melh vat.

"Ka nu, Nu-i ka khawngaih lutuk, Delhi a awm hnu aţang khan chhiar rawh", tia mittui tling pam chungin a nau-in a nitin nun hman dan a ziahna bu, a ken lai chu min pe a, a mit a sen ràm dan ah a ţap nasa tawh hle tih ka hre thei. Ani hi zawng unau zing a upa ber a ni bawk a, a nau te hmangaih thiam tak, zaidam leh nunnem tak a ni a, kan chhuang ru ve hle ţhin ,a nau kaiin a pindan lamah a hruai lut a, hunthawl min pe-ah ka ngai, a nau diary ka chhiar theih na atan. Mak ka tih tak chu a diary hi tinge tunah chauh kan hmuh le? A bungrua kha kan hai kim viau-in ka hre si a.

Kan nupa pindanah lutin khumah ka ţhu a ,ka ţah nasat luatah ka mit leh ka lû a kham na ut ut tawh, ka hnar a ping a, insút hraih chungin ka fanu diary chu ka keu a.

Ka rinphak bak, ka rin phal loh ka fanu chungah a thleng!

A hun hman dan hlimawm tamtak a ziak a, tin, heta a chhungte'n a kan hriat dan kha alo ni miah lo, hotel a thawk lo-in spa-ah a lo thawk a, chuta an pu chuan a lo khuaikhem a nih chu!

Chutah ,video a lo cover in vau na atan chu video chu a hman thu te, mualpho taka awm ai chuan a tlawm tak fo thu te a ziak a ,"ka video vang hian kei chauh ka zak dawn lo a ,ka nu leh pa, hmangaiha min enkawl a min tuamhlawmtu, ka u leh nau te an mualpho dawn, ka ngaingam lo", tiin a ziak hial! A khawsik leh hritlang inkawp, a dam theih tak mai loh vanga a in entir tak ngawt thu te, eng engemaw test an tih sak hnu a H.I.V alo nih thu te, a nunram chau leh beidawng lutuk chu a natpui nasat zia te a ziak bawk.

A ziah tawpna ber phek ka keu chuan ti hian a lo inziak a, "Kei chu mi tenawm mai ka ni tawh a, ka nu leh pa thu kha lo zawm ila hetiang hi ka chungah a thleng bik kher lo ang ,nu, pa, min ngaidam rawh u aw, nu leh pa thu awih lotu chu Pathianin a hrem ţhin an ti a ,mahse, he hremna hi kei chuan nâ ka ti em mai, pasal fanau neih a chhungkaw hlim tak din te ka chak ve a ,mahse, ka tan a rem ve lo, ka thianghlimna ka venghim zo lo a ,chuta karah mi te ţih rawn natna ka kai phah bawk, keimah vanga kawh rawn innih a, in fanu vanga zahna inphurh ai chuan ka thih hi kan tan a ţha zawk, mualpho hi ka hlau lo, mahse ,ka mualpho naa in mualpho tel ve tur hi ka ngaingam lo a, hlauh tak té in ka hlau ngawih ngawih ,fanu fel tak ni loin natna thlensak fo che u mah ila, ka nu leh pa, ka u leh nau te hmangaih loa hawisan che u a, in natna thlen sak tur che u chuan khâkna ka pai tam tawk bik lo, mahse, ka nunna pawh hi la ila, chu thil pawh chuan a ti na dawn tho che u anih hi, min hmangaih miau si a ,fanu laktlak loh tak ka ni, ka nu, ka pa, ka hmangaih che u, ka u leh ka nau pawh", tiin a lo inziak.

'Aw...Nubawih, i natna te kha ngawih bo pui lo-in min lo hrilh ni la, i tawrhna te kha mahni chauhin paltlang tum lo la chuan, kan hnenah, kan kiang ah nungdamin ila awm ve tur ,i chhungte hian kan thlahlel che a, i tan engpawh tih kan huam a sin ,kan hmangaih che tih hrereng chungin i nunna i la maw? Min hmangaih a ,kan mualpho leh kan nat i hlauh vanga ti maw inih? Nubawih ,i thihna ,min kalsan na hian min ti na zawk tih i hre lo em ni? Ka fanu, ka fanu duat Nubawih,i à lutuk, i à takzet, kan kiangah awm la, i natna te, i tawrhna te kha tawrhpui che a, hnem tu che a ţan kan chak asin', tiin ţap chungin ka sawi a ,ka thusawi erawh a hre ve thei tawh lo. Harh chhuak thutin kan pindan chu ka chhuahsan a, choka lam ka pan rawk rawk.

Chawhmeh channa chemte la-in ka banrek ka tin a, mangang ràk téngtúng in ka pasal fanau te'n min en a, min khap tum mahse thutlukna ka siam tawh.

Ka fanu kiangah kal ve ka duh ,khawhar leh riang takin a awm rei tawh lutuk, a hnenah ka kal ve dawn.

Chem hriam tak chuan ka banrék ka zai hràwk a, ka mit nghal sulh. Ka tlu thlawp a, 'ka fanu, ka lo kal dawn e, Nubawih, khawhar leh riang takin i awm tawh dawn lo ,i nu ka lo kal e', tia ka rilru a ka fanu Nubawihi be chungin ka tawp riai riai a, ka pasal leh ka fa te mangang au thawm chu ka hriat hnuhnun ber a ni ta.

Mahse, ka thi miah lo, rang takin ka pasal fanau te chuan min bawihsawmin Damdawi in lam min pan pui vat hi a lo ni a, Doctor te pawhin min en vat vatin ka dam chhuak leh.

Ka dam chhuah chu ka duh lo a, ka fanu kianga kal kha ka duh ber a ni.

Mahse, ka pasal chuan, 'kan fanu vangin kan nâ tih ka hria, nang phei chu a hringtu ini a, ka hrethiam e, mahse, kal ve ringawt ta la, i chan tur chu hremhmun! Keini hi min ngaihtuah lo em ni? Kan fate hi en la, keipawh min en la, kan mamawh che a, kan ngai che, nu ţha ber ni lo mah la i thiam leh theih ang tawkin i pasal leh i fate i enkawl a, kha kha i dam chhanah pawh a tawk lutuk, i fanu pakhat kha itan thihchhan tlak a nih chuan, i pasal leh i fate pahnih hi dam chhan tlak pawh kan ni ve a sin', a ti a, ka fanu, min kalsan tawh tu chauh ka ngaihtuah luatah thil pawi zawk ka ti a, mahse, ka thi hman lo hlauh.

Ka inchhir a, ka pasal leh ka fate pahnih hi hmangaih lo ka ni lul lo, mahse, ka fanu ka ngaih em avang leh a thih hnu chauha a thil lo tawrh ka hriat chhuahna khan min ţhâwng nâ in, chu thil avang chuan ka nunna lak kha ka lo tum ta mai a ni.

Pathian rawngbawl ţhin tute bakah rilru lam Doctor te kan râwn a, ka dik lohna tamtak ka inhre chhuak bawk, Pathian ringtu ka lo inti a, mahse, ka lo ring lo hi a lo ni, a hming chauhin a ni ka lo rin!

Tunah chuan ka fate pahnih leh ka pasal te nen, kan chhungkua in Pathian rawng, kan phak ang tawkin kan bawl ve ta a, a hming chauha ringtu inti lovin, Pathian chu, 'KA PA', tiin ka ko ve thei ta.

Ka fanu Nubawihi erawh ka theihnghilh ngai lova, ţah chhuah pui reng lo mah ila ka hrereng ţhin.