ka hnungchhawn zo tawh

KA HNUNGCHHAWN TAWH SI A

'Hmangaihpui, chhuak lehnghal rawh, zankhat pawh hi kan in chhunga riah hi i phu lo, kha i puma i pai lai ,ka fapa fa ngei itih pawh kha a nih ka ring nek lo e, a zah pawh i zak chai lo em ni?Naupang, kum sawmpasarih mi lek ve si, ka rài è i ti a, chutah, ka fapa fa-ah ila rawn puh leh ta nghal a, zahna i pianpui ve a nih ngai chuan maw, chhuak mai rawh', tia ka fa paina pa, u Mazuala hringtunu ngei mai, nu Grace-in min kawh sawk sawk chuan chhan ngaihna hre lo lêkin ka ding ngawi tlawk tlawk.

Tha chakna ka nei lo a, keimah ka inkhawngaih mai bakah ka naute, ka pumchhung a awma, ka thisen ringa nung ve ţawk ţawk chu naupangtè mah ni ila ka lainat lutuk, ka thà a khurh nasat avang leh nâ ka tih èm avanga ka aw pawh khùr chhuak hial chungin, 'Nu Grace', ka ti ţiak a, mahse, na taka ka hmai a ben sawk bak hlawhchhuah ka nei lo!

Beiseina mitmeng nen u Mazual ti a ka koh ţhin, kei aia kum hnih awrha upa, Lalţhazuala chu ka en a, mahse, kei hian, a mitmeng tlanchhe dui aţang chuan thil awmdan ka hmu thiam ve a sin, kei aiin a nu, a hringtunu ngei thu a zawm dawn tih hi!

A mitmeng tlanchhe deuh dui mai ka hmuh rual chuan ka kehchhe ta, insum zo lo lêkin ka insùt hlawp hlawp a, ka bag khai tetaktè mai, ka thawmhnaw pawh hak nga ţha awrh a awmna chu ak ţhain chu in, hmuhsit leh diriam ka tawhna hmun, ka innghahna ve ber pawhin a min chhan ngam lo leh ka thlavang ţawngkam khat maha a chhahchhuah duhloh na aţang chuan ka penchhuak chhat chhat.

Ka mittui chuan ka mit a awh khah vek avangin ka khawhmuh a fiah lo hial a, ka inpal deuh khat khat bawk, mahse, ka tlùk hlau a min dawmtu hmel reng reng ka hmu lo!

Ka inpal na lam ah ka tlu ţhelh a ,ka hlauthawng lutuk chuan ka pum ka dawm chawt. Thawk la deuh hakin ka mittui ka tuaihul a, duh ka nih ve lohna hmun in chu ka chhuahsan, an compound zau leh nuam ţha tak ka pelh pawh chuan umzuitu hmel ka la hmu lo cheu!

Beidawng zetin an gate lianpui mai chu ka kalsan a, pen sawm erh awrh chauh ka la pen hman tihah chuan Gate inhawng ri rak thawm ka hria a, beiseina nen ka hawi let vat, mahse, ka beisei loh lutuk thil ka hmu!

Nu Grace-i, Lalţhazuala nu chuan min lo um hlawk hlawk a, min pawm tawh mai dawn emaw tiin beiseina ka lo nei hmanhmawh, mahse, ka beiseina neih ve chu mitkhap kar lekah a thamral nghal hmiah, engdang vang mah a ni lo, nu Grace-i chuan ka banrekah manin ka kut-ah Envelope var min hmehbel chawt a, a ţawngkam hman chu ka duhloh ber te zing ami a ni mauh mai.

'I naupai i tihtlak a turin hei hi ka pe ang che, i chhungten i hur rah kha an pawm awm chai si lo, min tibuai zui tawh suh ang che', tiin min inhersan leh hmak ,ka bei a dawng takzet ta.

Tlawm theihpatawpa tlawm chhuahin ka nu leh pa te chenna in ka pan a, mahse, hnawl ka ni ta tho, ni e, tleirawl chhuak hlimhlawt, an fanu in humsual daiin an zahna tur ka thlensak miau a, ka beisei a sang thei lo, ka nu in min boral san tawhin ka nuhrawn thuhnuaiah ka pa a awm si a, ka rindan chu ni lawk tho mah se ,min hringtu, ka pa ngei chuan ka harsat mangan lai bera ţawngkam khat leka min thlamuan ka beisei ve a sin le, mahse, tumah hi ka tan beisei tur an lo awm ve tawh lo.

Bing mup mup chungin ka nu thlan lam panin ka kal leh hnak hnak a, ka nu thlan kianga ţhu-in ka harsat manganna te chu leihbua in ka ţap hawk hawk.

Mahse, a fanu duat min chhawn turin mihring a ni ve tawh silo, mahse, duhloh ka nihna hmun a na lutuk a awm ai chuan na tho chunga min hmangaihtu, duat taka min chawilian tu ka nu ruangdai an zalhna hmun, a thlan chul riap mai pawh chuan hahdamna min thlen zawk miau si a, kalsan ka tum lo, a lung bulah mu in ka bag neih ve chhun chu ka kham a, ka nu thlanlung chu kuahin minung angah riak chan-in ka titi pui siam siam a, min kalsan hnu a ka hun hmandan te sawi a be rengin hun hlimawm ka tawn ve chhun, ka hmangaih U Mazuala nen kan chanchin ka hrilh malh malh a ,mahse, a tawp kharna erawh mittui tho a ni lawi si, bei hi ava dawng ngawih ngawih tehlul èm.

Ka nu kianga mu a ka titi pui reng lai chuan ka titi pawh chhawntu awm ta lo chu ka mut a chhuak ta riai riai a, 'ka nu, ka ngai lutuk che', ti a riat nawi nakin mang ramah ka lut riai riai.

'Bawihte, itan chauh i ding tawh lo ,i pumchhung a ka tunu tan khan chak takin awm ta che ,nu dinhmun, dinhmun a zawnga pawimawh berah i din tawh kha, engahnge nangmah chauh i inngaihtuah a, engvanginnge hmeichhe derdep tak anga i khawsak, hlau lo la, tho ta che, i lamţang an la awm a nia' ,tia ka nu in duat taka min biak a, min fuih chuan min kalsan leh mai hlau zetin ka kuah chawih chawih a, mahse, a ral riai riai tho!

Ka harh hlawl a, ka hawikual nghal ruai, ka nu hmel ngainatawm zet kha hmu loin a ruang dai an zalhna chauh chu ka hmu a, mittui tling pamin 'ka nu', ka ti leh sep a, mahse, chhawn zai min rel tawh lo, a thlanlung chu ka chul riak riak ta ngawt.

Ka hmin a min ko ri ka hriat rualin aw lo chhuahna lam ka hawi a, ka ţhiante pahnih, Materuat ti a kan koh ,Lalruatmawii leh englai mai pawha ka tana awm reng ţhin Mapuia, Bimbim ti a kan koh bawk, Lalrintluanga chuan mangan hmel zetin min lo zawng a lo ni.

'Materuat, Bimbim', ti a ka koh rualin min rawn hnaih dun ruak ruak a, min lainatna mitmeng pu chungin min kuah dun nghal chuk chuk.

Ka hun hman dan ka sawi chuan Materuati chu a lo ţap faih faih a, Bimbim-a erawh a inhumruh ngawt ngawt, thawk na taka la kawkin, 'Ka khawih dawn khawp, kan mitenawm-a chu', tiin a ding deuh hluai a, pen tam a pen hmain Materuati'n va um in a va kuahbet chawt, a thinrimna a sosan em avanga Materuatin a kuahna a vai per nawlh chuan, 'Lalrintluang', ka ti ţhat a, rawn hawi vutin ka mittui tling pam a hmuh chuan min rawn hnaih leh ruak ruak.

'Chet la suh, keipawhin theihnghilh ka tum mai ang, mahse, awmna tur ka nei lo', tiin ka kun lap a, lungngai lo tura min fuihin Bimbim-a chuan an in a ka awm theih tur thu min hrilh sup.

Duh lo in ka lu thing deuh nak mah ila kalna tur dang ka nei chuang lo, Materuati lah nuhrawn hrawn ve tho niin kei ang èm in ti hrehawm lo mah se atan an in a nuam bik chuang lo miau a, Bimbim-a zui bak tihtheih ka nei lo.

Bimbim-a chuan ka bag min khai sakin min kai a, ka sirah Materuati a kal bawk, thlanmual kan chhuahsan a, Bimbim-a te veng lam panin kan kal, Materuati leh Bimbim-a te hi vengkhatah an awm a, mahse, khua a thim chhawlh tawh avangin a mal zawk chu tiin kan thlahkawi hmasa a, kan thlah hnu-ah Bimbim-a te in lam kan pan a, kalkawngah chuan lungngai lo tur leh ka tana an din reng tur thu-in min fuih chamchi reng bawk, thu tam sawiin min hnem thiam lo mahse ka thlamuanna an ni lawi.

An in kan thleng a, kan luh dawn chuan ka zàm èm avangin ka tawi hrat hrat, ka naupai thu hi kei leh u Mazuala leh a nu bakah, ka nuhrawn leh ka pa chauhin kan hria a ,thlanmual a min rawn hmuh khan ka ţhiante pahnih pawh ka hrilh ta chauh kha a ni a, vawitam leng lutin an fapa ţhian ka nihna angin min lawm ţhin viau mahse ka dai sual rah ka seng mek chu an hre lo thei dawn si lo, hnawhchhuah tawkin anmahni bel turin ka kal miau si a ,a zàmawm takzet.

Ka zàm zia hria-in min kailut a ,Nu Mary, Bimbim-a nu chuan bag nen a kan inkhai deuh ţap avang leh ka ţahna avanga ka mit bui lak a hmuh avangin thil awmzia minlo zawt nghal chul.

Ka huntawn chu ţap chungin ka sawi mawlh mawlh a, ka ţah miau avangin ka thusawi pawh an hrefiah thei kher lo ang tihtur khawpin ka aw chhuak a dik thei lo.

Mahse, ka beisei loh zetin ka chanchin ka sawi zawh chuan Nu Mary chuan min kuahin min hnem a, chu duatna leh lainatna avanga kuah ka dawn chuan ka lung ti chhe lehin awrawl chhuah meuhin ka ţap leh.

Pa Hmachhuana, Bimbim-a pa pawhin min hnem hluak thiam lo mah se ka lama a ţan tur thu min hrilh ve sup a, kan boruak uap churh tihzangkhai na atan Nu Mary chuan fiamthu te sawiin ka inbualna tur tui min lum sakin min siam sak vek a, chutianga ka in pawh ni lo, ka thisen zawm te pawh ni lo te lak aţanga duatna ka dawn chuan ka mittui a ti hul hleithei lo.

'Naupai lai chuan indim tur a ni a, Bimbim-a chauh fa kan nei a, fanu thar kan nei a ni mai alawm, tu hmel hmuh pawh kan chak teh ania, naktukah i thawmhnaw dang pawh kan va la daih dawn a nia, lungngai lo la, ka nu ka pa tiin min ko tawh rawh aw Hmangaih', tiin nu Mary chuan bual in pindanah chuan min hruai vei thlap.

Tuilum sa nuam takin ka inbual a, ka harh sawng sawng thei hial, zanriah te eiin rei meng loin kan mu ta vat a, an mikhual pindanah ka thawmhnaw dahin mutna atan pawh ka hmang dawn a ni.

Ka muthmun-ah chuan zanriah kan kil laia pa Hmachhuana ţawngkam, 'Hmangaih, kan fanu ini tawh a, engkim, he inchhung a thil awm ve chhun chhun te hi i ta anih pawm thiamin, i ta ang vekin i en dawn nia, i mal lo a nia', tia a sawi chu ngaihtuah zawmin ka manga ka hmuh, ka nu thusawi te nen ka kaikawp a ,ka nu thla chu bia-in lawmthu ka hrilh sap, ka mal loh zia min hriattir miau a ,anni chhungkua hi ka kianga ding, ka chhungkuaah mak takin ka pawm hmiah bawk.

Zing ka thawh ve meuh chuan ka thawmhnaw la turin Nu Mary leh Pa Hmachhuana chu kan veng lamah an lo kal daih tawh ,ka zak kher mai, tho tlai berah ka ţang si a, zana ka mut hmuna ka rilru ka vahkual tir chiam vang vek a ni.

An nula, langa kal a an hna thawhsak ţhin tu Didiki chuan khawsak a lo rel mek a, puih ka tum chuan awm mai mai tur leh a peih fel ţep thu sawiin min hnial mah se salad tur chu ka chanpui ve hram tho.

Rei thang lovin nu Mary te pawh an rawn haw a, ka thawmhnaw an rawn khai bawr deuh ţap mai, nu Mary chu, 'mak lutuk mai, an fanu an tih retheih zia pawh veng hrana awm mah ni ila kan hre ve tho a, hmangaih taka zilhhau awm lo, khatianga keini thleng thleng a min ţawngkhum kha ka ngaithiam thei lo, ngawi tak rawh se, eng ang pawhin rawn ngaihsak leh mah se an fanu hi an hmu let lo ang e, ka ta, ka fanu a ni tawh, duh loin an hnawtchhuak vei maw, an vengchhungah a mawi lo thei ang berin an chhuah a maw, a fanu suahsual zia hi hre lo kan ni bik hleinem, mipa sual pakhatin a bum avanga Hmangaihi humsual dai palh heti em a an tàwng mai hi chu, a fanu kir ker sawn mualphona a la tawngbaw ve khawp ang', tiin a rawn àng lut hlawih hlawih a, ka lo en kar min hmuh chuan insum in hlimhmel pu sàngin min be leh bawrh bawrh.

Ka nuhrawn-in ka chungchang a lo tlangthan tir dan tur leh nu Mary te a lo dawnsawn dan tur chu an thu a ziktluakin hrelo mahila ka rin dan a sual hauh lo ang le.

A chhe thei ang bera min chhuah duh tu kha a ni miau mai a, mak pawh ka ti hran lo.

Harsatna em em tawk lo in hun leh ni kan hmangliam ve zel a, ka naupai pawh in thla nga a pum ve dawn hnai ta, kei erawh ka pai tirh aţang rèng a hmuhsitna ka dawn leh duh loh ka nihna chuan, ka chenpuite'n min duatin thil ţha tinreng min pe mah se min chenchilh tlat a, ka naute vang liau liauin thil pawh ka ei lui hram a ni ber e, mahse, ka luakchhuak leh zel si a,ka chèr kawk kawk chu a ni ber.

Ka zing tho chu ka nuam lo kher mai, a lu a hai a, ka tài a na ngut ngut bawk,ka na tawrh avangin tho peih loin ka mu kawm chial a, a hnuah phei chuan ka thlanin min bual huh hnâp thei hial. Ka mang a ang takzet ta, ka naute chàn mai hlauhna in ka khat a, ka chauh theih èm avangin min kaitho ngai lo, duat dan chitin rèngin min duat a ni ber mai, tukin pawh min kaitho duhlo a ni ngat mai.

Ka nâ chu a nat tak em avangin thei leh thei lo in ka tho chhuak hram hram a, bang a innemkhalh chungin harsa ti zetin kawngkhar lam ka pan a,mahse ,ka thleng zo ta lo,pawnlam a an ţawng ri chu hre mah ila min puitu tur au tur pawhin ka ţawngchhuak thei lo, ka mit deuh sulh a, ka tlu dawn a ka inhriat chuan ka pum ka sawh tur chu ka theihtawp a humhim tumin ka kuah khawm a, a thim ta vek.

Ka harh leh chuan damdawi in kumah ka lo mu bâm a, ka kianga thlaphan hmel zeta lo ţhu bial laih te chu en in ka pum ka dawm chawt a, ka duh lo, a thèp vek!

'Ka naute', tiin ka melhkual ruai a ,hahdam tura min hrilh supin Bimbim-a chuan tui min rawn tulh a tum a, mahse, duh lo in ka lo vai lawp.

'Khawiahnge ka naute chu?', ka ti ţhat a, an kun nghiai hlawm a ,tumahin min chhan an tum lo a nih chu!

'Min hrilh ta che u ,ka naute chu a ţha tiraw? Ih, thla kim loin ka hring em ni? An up a ni ang maw? Kan la hmu thei lo em ni? Lungngai suh u, a ţha vat mai ang ,thla kim lla naupiang chu an up ţhin a lawm, lungngaihna tur a awm lo e', tia sawiin ka melh kual a ,mahse, tumahin en pawh min en duh hauh lo!

Ţap chhuak rawihin nu Mary chuan, 'Ka fanu lainatawm lutuk, ka tunu chu kan chhan hman lo, min ngaidam rawh', tiin pa Hmachhuana àwmah a bei a ,a insùt zui hlawp hlawp.

Ka hawi â ruai a, nilo, ka chan thei lo, ka damchhan, ka innghahna, ka nu in ka mang lama 'ka tunu' a tih avanga ka fanu tia ka lo sawi ţhin, a hming pawh ka lo sak diam tawh, a nu ang lo taka Lalpa nena nun hmang tura ka pai lai aţanga ka fuih ve fo ţhin, a hmingah pawh LALNUNPUII tih ka lo hauh diam tawh ka fanu chu a awm tawh lo maw? Thil theih a ni lo. Ka nun, mi hmuhsitna leh diriamna ka tuar chung pawh a amah rin chhan tak meuh meuh a ka lo sual ve, harsatna paltlang pui huama luhlul chhuah a ka la dam ve ţawk ţawk na ka naute duat chuan min kalsan maw?

Dawt vek a nih ka la ring fan!

Mahse, Doctor te ngei lo kalin ka naute ka chân thu min hrilh chuan awih loh theih a ni ta lo, eng ang pawhin awih lo mah ila ka naute chu a lo let phah dawn si lo maw?

Nâ ka tuar mai bakah ka thinlung nà a nasat èm avangin ţhat lam ka pan hleithei lo, Damdawi in ah chuan ka awm deuh ta reng a, ka fa ka chàn tih ka hriat rual ruala intihhlum ve ka tum aţang khan ka kiangah tu emaw ber tal an awm ta reng, ka zunram thiar pawh min vèng run zel, karkhat kan awm tlin ni chiah a ni a, Nu Mary, ka nu tia ka koh takin min awmpui a, keipawhin ka natna dahţha famkim thei rih lo mah ila ka nu fiamthu thawh chu ka nuih pui ve hak hak ,kawngkhar a rawn inkik dat dat a, nui sângin kan lo chhawn a, mahse, ka beisei loh leh ka thin tirim tu, ni lo, ka mihring huat ber a rawn lut a nih chu!

Lalţhazuala chu lo kal hnaiin ka mutna khum bulah a rawn ţhu a, pangpar bawr nalh zet a lo ken chu min pek a tum a, ka lak duhloh hnu-ah ro leh za lo zeta nui lui chungin bulţan ţhat puiah min sawm a nih chu!

Ka mutna khum aţanga tho-in thinrim luat avanga aw khur dawt dawt chungin ,'Lalţhazual, zahna hi pianpui ve teh, ka mamawh lai che khan khawiah tehhrep nge i awm? I fà ngei, i thisen hmanga insiam ngei thlavang pawh i hauh ngam lo a ni lo em ni? Ngaihdam min dil a min hmu ngam tur ni pawhin i inhria em ni? Ka naute humhim tuma pa tel loa enkawl pawh huama ka theihtawp ka chhuah lai khan ka tan i ding em? Mipa pawh i ni nek lo e, nèp lutuk, kal bo rawh ,kal bo vang vang rawh', tiin ka kawk vah a, kun ngul chunga ngaihdam min dil leh chuan kutthlak a ànkhum leh nek tumin ka hnaih leh ruak a, mahse, ka thinrimna a nasat èm avangin engmah ka sawi thei tawh lo.

Ka taksa a khur hlawk hlawk a, ka duh hun a ka ţawng thei lo chu duh lo lutuk in ka sam ka kèk tawp, ka ţhu hnawk a, ka saràk chiam a ni ber ang chu, ka ràk nawk nawk a ,ka theihtawpin ka au bawk, bengchheng kan siam avangin Damdawi in lama hnathawk tute an lo tlan khawm hial a, thil awmzia min zawt an awm rualin min rawn hau nghal nawk nawk tu lah bo lo, mahse, ka inbengdai thei lo, Lalţhazuala a awm ve chhung chu, ka sam ţhàm nawk nawk chunga ka ţhu khur hlawk hlawk chu ka nu chuan min rawn hnaihin min rawn kuah a, 'hahdam rawh, a kal tawh e Bawihi', tia ka hnung a a ben thek thek chuan zawi zawiin ka inbengdai a, mahse, ka tha khur a reh rual chuan natna in min luhchilh a, BUMHMANG ,ka tana ding ngam lo mi nèp vangin ka ţap leh ta.

Ka naute, ka thinlung a bu khuar reng tu ka chânna chuan min rawn tina thar nawn leh a, ka lainat lutuk, nunna pek ka duh a sin ,pa loin seilian mahse ţha taka enkawl ka tum ,ka theihtawp chhuah ka tumna ka naute ka sùnna chu kha mihring dawihzep, Lalţhazuala vang khan chiang lehzualin ka thinlungah a rawn thar nawn leh awn awn.

Ni hnih chhung Damdawi in lama kan awm leh hnu-ah kan chhuak a, keimahah hian kim lo a awm, ka ruak huai a ,engdang vang a ni lo, min chenchilhtu ka naute kha a awm ve tawh tlat lo alawm.

(KUM NGA HNU-AH CHUAN)

Zàm zet chungin ka nu leh pa ti a ka koh, nu Mary leh Pa Hmachhuana te hmaah chuan Bimbim-a nen kan ţhu dun a, kei phei chu ka thlan a tla nasa in ka sa hat hat thei hial.

Engdang vang a ni lo ,Bimbim-a'n ka nu leh pa te hnenah inneih kan duh thu a hrilh miau a, kum nga kal taa humsual ka dai avanga anmahni ka tih buaina, khang hun chhung zawnga an ţhatna te kha heti mai hian ka thungrul chu a ni si a, mahse, kan inhmangaih miau a ,hlau lo anga lan ka tum ve tlat thung.

Bul kan ţan dawn pawh khan ka hrilh ngei alawm, 'kei chu ka bawlhhlawh tawh, nau pawh keng tawh ka ni a, ka mualpho a zarah nangni chhungkua pawhin mi en hrek hrek inhlawh hial a, ka chhungte tia ka lo sawi ve ţhin te hnen aţang ngei pawhin', tiin atan a ka tlin tawk loh thu te, kei aia ţha, kei aia tling zo pawh ka kawhhmuh hial. Mahse, min hmangaih miau a, keipawhin a tawpah chuan hnar zo lo-in a zûnah ka tàng ta der si a ,mahse, nula bawlhhlawh tawh ka nihna chu min haider sakin hmeichhe thianghlim ber angin min cheibawl a ,chu chuan ka rilru a hneh tak meuh meuh.

Kan inpawh in ţhianţha lo ni sa kan ni bawk a, hmangaih thu kan infah tawn hnu pawhin kan la inpawh reng ,kan inkara hmangaihna lo piang chuan min suih nghet sauh zawk.

Nu Mary chuan aw a then kharh kharh chuan ka thlan ka hru zeuh a, 'Hmangaih, ka fanu ang chiahin ka en che a, mahse, he thil hi chu a theih loh,min chhuahsan mai a ngai ang', tiin a tho nalh a, an pindan lam a pan daih!

Hawihai zetin kan inmelh dun a, za taka an pindan lam aţanga nui ri hawk hawk ri kan hriat leh phei chuan mak ka tihna a zual sauh.

Kan chanchin kan sawi aţanga lo ngawi reng, chìk zeta min en tu, ka pa chu nui huk huk chunga ţawngchhuakin, 'Ţhiani, i ti hrilhhai a lawm', a ti sup a, nu Mary chu lo chhuakin min rawn kuah vat a, min fiam mai mai thu a sawi hnu-ah, 'Min dil har ka lo ti lutuk a ,in nu leh pa te hi fate mitmei hrethiam lo tur khawpa à kan nih loh hi ,kan hre sa vek a lawm, ka fanu', min tih chuan ka ţah nuih hawk a, Bimbim-a pawh nui suk sukin a hlim si, a tihngaihna hrelo chuan ka nu chu a chawi lawp a, a virkual pui chiam ringawt, kan zavaiin kan nui ta dar dar a, ka hlim a ni.

Chhungkaw diktak ka nei ve tawh dawn si a.

Mizo dàn-ah palai te tirh a ngaih avangin Materuati nu leh pa te min biaksakin an in lamah ka awmphei ta rih a, Bimbim-a chu a rawn leng zing ngei mai, mak takin Materuati nuhrawn, nu Hma-i leh a pa ,Pa Emes-a te pawh chuan minlo lawmin min duat kher mai, bungrua chhawm bûng bûng loa tih kan duh tlang viau naa Lalţhazuala nu, nu Grace-in min pek pawisa kha hman lohin ka la dah a ,hawn pawh ka la hawng eih lo zawk, an tù ngei tihtlak na tura min pek chu ka thuamchhawm ve tur manah ka hmang hmak, a lo tlem chhe lem lo bawk nen ,mite anga man to tak chhawm lut thei lo mah ila ka mualphona tur chu min hliahkhuh e, Pa Emes-a leh nu Hma-i lahin i pazawn ,i nuzawn kan ni e tiin thuamchhawm tur ţha tak min lei sak bawk nen, ka chhungte mamawh chuan ka khawsa bik lo.

Kan inneih ni tur pawh harsatna dang awm lo in thla khat hnu lawkah kan ti dawn a ,sawm bik tlemte chauh awm se kan duh naa nu Mary te leh nu Hma-i te lam chuan an lo duh îkhàw lo mai, ropui thei ang ber a inneihna hun hman tir min tum khawp, tunah chuan, lungngaihna avangin ka mittui ka seng tawh lo va, lawmna avanga mittui bak ka biangah a luang ta lo. Ni e, ka mal si lova.

Man inhlanna kan neih dawn ni chuan ka pasal tur, Bimbim-a bakah, Materuati leh a bialpa te nen bazarah kan chhuak a, kan bazar zawh hnu-ah kan leng thawveng leh, Kurta hringduk ha-in ka sam sei zet chu ka thlah hniang a, ka rilru damna in hlimna min thlenin ka taksa pawhin ngai a awh leh tawh bawk a, keima tawk te te-ah chuan ka khal nalh ve leh tawh khawp mai, mahse, kan lenna hmunah chuan ka nunhlui, keimaha awmzia awm tawh lo, a fà avang chauh a ka nghilh theih loh Mazuala bawk chu kan hmu leh a, kan kalpel mai tur chu min lo ko ding leh ta nghal nen Bimbim-a hmai ka zah ngawih ngawih.

Atan thìkna tur awm tawh lo mahse, ka nun hlui a ka zawng zawng ka lo hlan mipa kha a ni miau a, ka pasal ni mai tur tan chuan hmuh dun nuam tak tur kan ni lo.

Mahse, zaidam dapin, 'be dun ang hmiang', min ti a ,keipawhin ka hnial hran lo.

A bawrchhawr em em a, inmèt fai vang ţhin kha a biangah leh a khabe ah te chuan hmul a lo ţo buk deuh lâk tawh, a chauh hmel ngawih ngawih, ka kurta hak rawng mil kher Kamiz a la ha leh ta nghal nen, inkawp kan ang zawk daih hial, Bimbim-a chuan Ţhazuala chu a dar a hmer sak chatin, 'hmana duh loa i thlauhthlak kha keiin duh tak leh hmangaih takin ka lo kuangkuah tawh a, nangmah avanga a tawrhna zozai ngaihtuahin heti hian che fo lo la ka duh khawp mai, amahah hian nghawng nei tawh lo mah la naute, kan chan tak avang pawh khan a rilru a dam thei ngai dawn lo, hmangaih takin a dawmin a hmathlir, ka damchhan ti hiala a sawi kha a chan si a, hmeichhe derdep leh thinlung nêm tak tan chuan a nat tur zia dawn pui ve la, khawngaihin min inthiarfihlim san ta mai che ţhianpa', a ti dam dap a, ka lo chhuang veng veng thei hial.

Beidawng zetin U Mazuala chu a ţhingţhi hnawk a, a inchhir takzet tih ka hai lo, mahse, kir leh thei ka ni tawh lo, KA HNUNGCHHAWN TAWH SI A. Zawimuangin ka kalsan a, ka hnung lama a thinlung na lutuk thaw hrawk pawh chu hnem turin a tan ka pâr ve tawh lo, ka pasal ni mai tur, Lalrintluanga ta ka ni tawh si a.

Bumna min tawn tir a, phatsanna nunrawn zia min hriattir tu, kha phatsantu khan lo hre ta che, i chungah ka lawm lutuk a ni tih hi! Natna nasa tak min pek rualin, chakna, paukhauhna leh tawrhchhelna, luhlulna pawh min pe tel a, chak lo leh derdep tak ni ţhin kha mi chak tak ka lo ni ta, ka lawm e aw bumtu nunrawng ka ti rilru ve hial!