gabriel zo tawh

GABRIEL LALRUATMAWIA



'Dawt i sawi chuan Sâr leh Pathian ngam rawh aw', pawr fèa ka tih chuan naupangchhia min tih hmel zetin a nui hawk a, ka chhip sam min tuai thur sak zauhin min kuah a, dawt a sawi loh thu min hrilh sup.
Ka la rinhlelh miau avangin ka talsawn a, a phun hluk thung, a mit a en kal chungin, 'Pathian hmingin i sawi ngam em?', Ka tih chuan a chek hluk a, a bu nghut ringawt, ngaihngam takin a âwm-ah ka bei siai siai a, ka lo titau rei lutuk chu ka inhaw hlur, keimah leh keimah ka lo inti hrehawm mai mai a ni. Hrep hian!
'A thawk a phitin Pathian hming chhal zawngin thusawi ching tawh suh aw', zaidam zeta min tih chuan ka bu nghauh nghauh a, duat takin min fawp vawng vawng.




'Lalruatdiki kha ka bialnu a ni lo ,nangmah chauh ka bialnu alawm inih Mate' ,tiin min kuah nghet sauh a, keipawh hlim takin ka nuih leh var var tawh hi. Lalruatdiki khan a bialpa angin a sawi mai mai chauh, a lo ngaizawng ve a ,mahse, Gabriel chuan keimah chauh min hmangaih tih min hrilh a, ka ring mai tur a ni, ka tette aţanga min duat em em tu a ni a, ka lo ringhlel vel kha ka zak ru zawk.
Ruatdiki hi kan home a awm ve tho a ni a, kei aiin kum khatin a upa zawk, fa atana la tu pawh a nei tawh a, mahse, karhnih hnu lekah an rawn dah let leh, eng nge a chhan kan hre lo a, amah chuan, 'kan home ka ngai a, ka ţap nasa thei lutuk a, min lo dah leh tawp', a ti mai zel a, ka nu in engmah min hrilh hlawm lo bawk, mahse, naupang à tak ka ni tawh bik lo a, chu thil vang mai chu a nih ka ring lo ve tawp.
'Au Mawite, Au Mawimawi, lal au Jebb', ti ri ka hriat chuan ka khi sak a, ka eih duh hauh lo. Home a naupang zinga ka ngainat fal em em Heleni min ko ri a ni, ka nghah a thleng ta, 'Jebedi Lalrinmawi', aw ţial ruana a tih chuan ka nui chhuak hak hak a ,'ka rawn kal ka naute', tia au lang langin pawnlam ka pan.




Jebedi Lalrinmawii ka ni a,ka kum a la tam lo a, kum sawmpakua ka tling awrh chauh, lehkha erawh ka zir tawh lo, a chhan pawh fahrah ka ni a, kum sawm leh pariat ka nih thleng khan sikul kaiin pawl sawmpahnih ka zo a, lehkha ka thiam thei vak lo bawk, mi harhvang tak ka ni a, kan home hi Roman Catholic hnuai a ni a, hnamdang hming kan nei vek ţhin, ka hminga Jebedi hi chu, Jebediah(Pathian ţhian) tihna a ni a, hmeichhia ka nih vangin Jebedi tih ka ni, kan home enkawltu, 'nu' tia kan koh mai ţhin, nu Ramtei fapa Gabriel Lalruatmawia nen kan inkawm tawk viau a, kan innel hle, inkawm tawk han tihah kei aiin a u a, nau enin min en ţhin, ka nel hle bawk, fa atana min la duhtu an awm avangin vawiinah ka chhuak dawn a, ka hlim hle rualin ka ngui ru em em thung, a chhan chu ka seilenna hnuchham in hi ka hmangaihin ka ngai a, tlawhpawh mai mai theih loh turin vairam-ah ka chhungkaw thar nen kan kal dawn bawk.




Ka pen zawng chuan ka hmeichhiatna a na leh zawk zawk ţhin a, ni e, nizan mai khan ka thianghlimna ka hloh miau alawm, ka hmangaih Gabriel-a lakah!
Pathian duh loh zawng a nih thu min enkawltu te hian min hrilh fo a, mahse, kan ti ta tho chu a nih hi.
Kan innel satliah lo a, kan in hmangaih em em bawk, Gabriel hi kei aiin a u hret ka tih tawh kha, kum sawmhnih leh pathum mi niin B.A a zir mek tawh thung, kan inhmangaih tih erawh tumahin an hre lo a, unau inhmangaih anga inhmangaih angin miin min hmu ,ni e, a tette aţanga ka ngainat em em kha a ni miau a, ka hmangaih bawk, thisen inzawm lo na nâ na chu unau inhmangaih aia thuk zawkah kan tlu lut a, kan in ngaizawng, mahse, tumahin an hre lo.



Ka kal bo dawn avangin keimah zawkin hmangaihna chen dun ka duh thu hrilhin ka sawm zawk anih kha!



Mak inti mai thei, mahse, a mak lo e, kan inhmu leh ang em? kan intawng leh ang em tih ka hre miau lo a, ka nu(Nu Ramtei) sawi danin hmeichhia te'n kan neih hlut ber chu kan thianghlimna(virginity) hi a ni a ti ţhin, ka pawm bawk, ka neih hlut ber kha ka hmangaih hnen a hlan ka duh miau alawm.
Nâ ka tuar a, ka taksa hi a thler vek ni maiin ka hre hial, engtinnge ka taksa phel kha a lo pum leh ka hre lo, mahse, ka hmangaih tana ka hlan theih awmchhun, ka neih hlut ber a ni miau a, ka hlan kha ka inchhir lo a ,inchhir ka tum hek lo. Inchhir a hnehin ka hlim hliah hliah zawk!



Pawnah kan chhuak a, ka thawmhnaw tam fahran lo chu Gabriela'n min khai chhuah sak hnak hnak a, an hmanhmawh avangin bungrua an dah chhungin ka nu ka kuah a, lawmthu ka hrilh bawk, motor a ţhu lut turin min ti a, ka ţhut luh hmain kan home, ka seilenna hmun, hlim taka tual ka chai ţhin na hmun chu ka thlir vang vang a, ka hawikual ruai ,mahse, Gabriel ka hmu tawh miah lo, ni e, nizanah khan a sawi alawm, 'ka hmuh laia i kalliam a nih chuan ka thaw hi a tawp mai ang', tiin.





Mittui khap per sak sakin ka nui lui a, ka nau te ho leh ka nu in an bân min vai khum lauh lauh hlawm a ,ka nu leh Helen-i an mittui a tla par bawk, harsa ti fahrana nui lui sangin motor-ah ka ţhu lut a, ka nu thar ni ta chuan a bulah min ţhuttir in min nuih sang a ,'remchangah kan la tlawh leh dawn nia Bawihi', tiin min hnem, ka mittui a hmu ru tih ka hre mai. Nu fing tak a nih ka ring bawk.
Ka awh ruk em em ţhin chhungkua ka nei ta, Ka chhungkaw thar chu ka hmangaih nghal em em a, ka nu ni ta, Ramdintluangi phei chu ka nel em em, ka pa thar, Zothankima nen hian an inhmangaih lutuk tih ka hmu thiamin ka hria ,kei leh Gabriel ang chiahin, Gabriela'n min en changa a mitmeng nung sarh mai, min duh ngawih ngawihna leh min thlahlel ngawih ngawih ţhin mitmeng ang khan ka pa in ka nu a en changin a hmangaih tih a mitmengah a langchhuak ţhin, kei mimawl mai pawh hian ka hmu thiam ve tlat a sin, hun rei la inhmu lo mah ila.




Lengpui an tih lam kan pan nghal a, Mizoramah la cham tum viau mah se ka pa hna avanga hun an neih loh thu ka nu chuan min hrilh siam siam a, nu ţawng duh tak a ni, mi harhvang tih takah keipawhin nuam ka ti nghal em em, kan mizia a inang a, ri phawng phawng chi kan ni, ka kum phu loa puitling min tih thu te min hrilh a ,ni e, an ti fo, a chhan chu pangchanna tur kan nei ve ngai lo a, hringnun zawh dan tur, kan chantawk a lungawi a, zuau lo a tuarchhel tur leh, tumruhna thinlung pu tlat tur a zirtir kan ni miau alawm.




Ka pangchan ve na ber Gabriel lah chu ka liamsan ta si a, ka hnena a thusawi hnuhnung ber, "Ka hmangaih che Mate, min lo nghak la, keimah a i zawng zawnga i tluk luh theih hun-ah, hna mumal tak ka neih a nuamsa taka ka dah theih hunah che, tuna min ţhenhrang tu i nu leh pa te hnenah ngei hian, inţhen leh tawh ngai lo tura ka nupui inih theih na atan palai an la rawn kal ngei ang', tiin min thlah a nih kha, dawt min hrilh ngai lo a, a thusawi pawh chu ka ring hmiah bawk, 'tuna kan inţhenna hi kan tawpna a ni dawn lo a, nakina kan awmdun theihna tur zawk a ni', tih hi ka pawmdan a ni ve bawk, ka lo nghak mawlh ang.






Lengpui kan thleng a, thlawhtheihna a tak ngei mai a, hnai fahran a ka hmu te chu ropui hi ka ti ngawih ngawih, van sang taka a thlawk lai hla tak aţang leh a lem bak hmu ngai hek lo í. Chumai a ni lo, thlawhtheihna lian zet mai-ah chuan kan lut a, he thil hmang hian kan zin, ni lo, kan haw dawn a nih chu! Ka tan chuan thil thar hlak a ni a, ropui tih loh chi rual pawh a ni lo e. Kan tawn ngai loh thil thar tawn chu a tu a te tan pawh hian a ropui a sin.




Kolkata khaw lian leh pui zet kan thleng a, driver in min rawn lam thlap, kan tlanpelh tak veng hming te chu ka nu chuan min hrilh zel a, 'hei hi kan veng, Picnic garden a nih hi a tih chuan nasa leh zualin tukverh aţang chuan ka hawi kual a, a ri ruai ruai reng a, motor horn in Kolkata khawpui chu a khat emaw tih mai tur a ni. Bengchheng tak a ni a, beng a kiu vawng vawng thei hial, mahse, chung thawm bengchheng tak te chuan min ti hlim tlat, ka tana thil thar, ka chhungkaw thar nen a kan huntawn hmasa ber zingah an tel miau a, ka ning phal thlawt lo.
Lehkha ka zir ve nel nual avangin English chu ka thiam ve mai a, Hindi erawh ka harsat phian, vairam ah ka khawsa ve dawn chu a ni si a, ka huphurh angreng, mahse, mi ngurchuai leh nun nguai ka ni ngai lem lo a, chhungkaw thar ka nei bawk nen ka hmabak huphurh ruk na ka nei na chungin ka cho sarh thung. Ka chhungkaw thar ,ka nu leh ka pa thar nen chuan, lamţang tur, min dawmkang tur ka nei tawh miau alawm.






'Good morning Mayadi', nui sàng chungin ka lo chibai a, 'Morning Priya', tiin min kuah zeuh, ani hi min zirtir tura in lama lo kal ţhin tura ka nu leh ka la te rawih a ni a, ka ngaina em em, a hming Maya a ni a, miss tia koh a duh lo, 'Mayadi', tiin min ko rawh a ti tlat, mak takin ka hmingin min ko duh bik miah loa, 'Priya' min ti hmiah, a tirah ka duh lo viau naa min koh tak zelah chuan ka Priya-i awm ve miah miah a, ngaiah ka nei tawh, Priya awmzia te chu ka zawt a, Belove(Hmangaih) tihna a nih thu a sawi, ţha te te-in min biak pawhin ka chhang mai zel.





Lehkha kan zir dun mawp mawp a, a kar lakah ninawm ka tih loh na atan fiamthu nen thiam takin min hrilhfiah ţhin chu ka ngainatna ti zual tu a ni, pawn ah ka chhuak ngai lo a, ka nu leh pa te'n min hruai a nih loh chuan!
A chhan pawh kum kal ta maia an fanu boral ta, Vivian Rohlupuii an tih kha pawna a chhuahna ah misual tawkin nasa taka nghaisak a ni a, pawngsual a nih hnuah Dil te-ah an paih thu hnukulh ţeuh chungin min hrilh, Vivian-i bo hnu ni hnih naah a ruang an hmu a, postmortem result chuan an thin a va ti na dawn tehlul ém. An lung ti awi lo lehzual turin tun hun thleng hian chung misual ho chu chhuichhuah an la ni lo! An fanu thar, kei chu khatiang thil rapthlak kha tawng lo tura min duh luatah pawn boruak min hmuh tir ngai lo a, ka zirlai a thil pawimawh leh ka hriat loh ka hriat theih na atana min zirtir turin Mayadi hi an ruai tawp mai a ni.





A tirah chuan hrehawm ka ti viau dawn a, mahse, an thil lo paltlang tawh ka ngaihtuahin ka dem ta lo, keipawh ni ila ka tihdan ve tur tho a niin ka hria.
Thla li chhung ngawt chuti reng reng chuan hun ka hmang ta, ngaiah ka nei chho a, ka nun a hlim tho, pawn lam boruak ka hip ngaio a, mahse, chhungkua ka nei aawm, ka tan an pawimawh a, an hlu hleuh hleuh hle bawk, in hrethiam lo mai thei, mahse, fahrah dinhmunah ding ve ula, chhungkaw neih tluka thlakhlelh innei bik kherin ka ring lo, ka seilenna hnuchham in erawh ka ngai thei hle, ka ngaihna ti zual tu ber pawh Gabriel-a a ni.
Mobile phone ka nei lo a, biak tur ka nei hek lo, ţhian ka nei lo a, kan landline aţang chuan kan home biak ka tum zet ţhin, mahse, ka call nachhan ber Gabriel a awm remchang ngai hauh lo!
Tin, ka nu leh pa te ka hmaizah ve bawk a, ka nunhlui ka hmanna ,kan home lam ngai lutuk anga min hriat ka duh lo ,a chhan pawh, ka nu leh pa titi ka hriat ruk vang ani ,'Kan fanu hi kan hnenah a hlim kim lo em ni aw, pawn a chhuah kan phalsak lo a, ka hria, mahse, a himna kan dah pawimawh vang a ni tih kan hrilhfiah tawh bawk si, kan kawmhlim tawk lo nge a nunhlui, kha home ngai reng reng khan a awmin ka hria, kan enkawl ţha tawk lo nge, nuamsa takin kan dah ve chuan ka hre si a', ti a ka nu in a sawi ka hria a, ka pa in, 'A tette aţanga a awmna, a seilenna a ni a, theihnghilh chu a har ang, i rilru ti buai duh suh', a ti sup anih kha, chuta ţang chuan home lam pawh ka be tawh ngai lo, mahse, ka thin a rim ru ţun reng ţhin, Gabriela'n min biak tum hek lo le!





Ka na a, mahse, amah ka rinna a nasat ém avangin ka infuih phur chawp ţhin, he in chhung hi ka khawvel chu a ni rih miau a lawm.
Ka hlim viau naa mak tih deuh chang erawh ka nei ţhin, ka pa hian a chang hian thinrim hmel zet hian min melh run run a ching ţhin a, mahse, amah ţawng tlem chi a ni a ,a hmel hi a rum deuh àl bawk sa nen ngaiah ka nei mai, vawikhat erawh min hau-in min vin chiam a, mak ti zet leh rilru na lutuk in ka thlir tlawk tlawk.
'Naupang zak lo, chhungte pawh nei hlei lo, duh ang ang ngen ve ngawt mai, ka hne zozai lutuk', tiin a sawi a, ni e, zanriah kan kil laiin Savawm ang taka an siam naute lem ka awh thu ka sawi!




Ka ţap tlaivar zak a, a tukah erawh ngaihdam min dil a, ka pa a nih miau avangin ka hmin rang kher mai, hna kal tura a chhuah hnu ah, 'Vivian-i khan i ngen ang kha aa ngaina lutuk a, i pa hian a leisak fo ţhin, duat tak té-in a duat a, kan fa neihchhun a niin nau ka keng thei tawh si lo nen a hmangaih hlum lo chauh a ni ber e, a hmangaih em em a fanu in a a ngainat ber mai naute lem i lo sawi khan kan fanu a hriatchhuah tir anih kha', tiin ka nu-in min hrilhfiah a, ka dam nghal vek, ka khawngaih em em a, an hrin ni lo, an kara piang ni miah lo pawh heti khawpa min duattu chuan a hrin ngei, a fanu, a ril a rah ngei a hmangaih dan tur chu ka hrethiam pha hauh lo ang le.




Dan ngai té te-in nî ka leng leh a, ka mut hmunah chuan Gabriel-a hmel, ţha ka tih em em mai te, kan hun hnuhnunga hmangaihna inhlan chunga kan mutdun dan te, natna nasa tak ka tuar chung pawh a a laka ka inpek theih vanga ka thinlung hlim zia te dawn kirin ka hun ka hmang a, ka mangah tal a hmel hmuh in beiseiin ka mit ka chhing riai riai.
Ka hun pangngai ang te te in hun kan hmang chho a, inkhik khak pawh kan nei tawh lo, an hnenah kum khat ngawt ka khawsa ve ta, tuk khat chu ka pa-in pawn lam boruak hip ve turin min ti ta mauh mai le!




Mak ka ti viau a ,a chhan chu ka dil ve chhun pawhin pawn chhuah min phalsak ngai miau lo, tunah erawh amah, ka pa ngeiin chhuak harh turin min ti! Mak tih loh rual a ni hleinem.
Mahse, chhuah harh chu ka phur ve hrep avangin engmah sawibuai lo leh zawhna pawh siam buai lovin ka insiam a, ka sam dum hlap mai, sei hniang mai chu ka thlah mawl tawp a, incheina chu nei ve tho mah ila a hman lam ka thiam vak loh avangin ka hmai ka phih a, foundation pan te a in hnawihin lipgloss, ka hmui ah tam lo té in ka inhnawih bawk a, a tawk dee, khua a lum avangin kawrfual var sar mai, ka nu min lei sak, ka khup khuh hnalh chu in belin flat dum ka bun a, ka hman chu a ni dér mai.





Driver ka hruai theih thu min hrilh na a, Taxi in ka chhuak a, hmun reh, mihring awm tam loh naah min hruai turin ka ti mawl tawp, a bu nghut a, a motor steering tuai kual mawpin min tlanpui a, rei fe kan tlan hnuah tuipui kam reh takah min hruai a, tlawhtu an tam lo, inngaizawng ni awm tak tlem te an awm e tih mai loh chu, ka duh ang ngeiin hmun reh takah min hruai, ka lawm hle bawk, kan thlen chuan min kalsan mai turin ka ti a, hruai leh ka ngai a nih chuan ka call leh mai tur thu ka sawi bawk, a number la-in kan inthlah a, min kalsan dawn chuan min khawngaih hmel pu deuhin ka hria, mahse, min khawngaih chhan tur awm ang ka hre lo.





Ka ţhu thluang diai a ,tuipui fawn inchhawk nghulh nghulh chu ka thlir a, ka mitthlaah Gabriel bawk a lang.





A mitmeng pà ka tih tak mai te, a thinrim changa a khabe bawr lian ţha ka tih ve tak mai, hnawksak ni miah si lo che kual ralh ţhin te, a chil lem zawnga a hrawkbawk che kal ralh zawng zawng te ka mitthla a, a mitmeng a min thlakhlelhna ka hmuh ţhin zawng zawng te, a taksa, sang ţha zeihzawih a thlamuang taka ka tluk luh ţhin zia te ka chhuikir a, ka thawk a sak ţalh, ka rilru tihfim tumin tuipui rim nam chàk chu ka hip vang vang a, thli thaw chuan min chhem heuh heuh a ,chu thli chuan natna a kengtel emaw tih mai turin ka lung a ti lengin a ti chhia a, ka mittui tla in a rei hnu phei chuan ka inhnît hlawp hlawp.




'Engahnge fahrah ka nih? Engvanginnge nun nuam tak nei tura min pian tir ve mai loh?Engvang tehhrepin nge khawhar reng reng a hun hmang tur a min dah?', tiin ka au tuar tuar a, ni e, ka nun a hlim ka ti ţhin ,a hlim kim mawlh si lo!
'Lalpa Pathian ,eng thil nge ka tihsual? I duh loh danin englai khan nge ka khawsak a, ka nun heti em em a mal tur hian eng thil hrep nge ka tihsual le?', Tiin ka phun leh sep sep.





Hun reilote liam taa ka pa mobile min leisak, ka nu leh pa number chauh ka save na mobile ţenghneng zet chu sana en tumin ka hmet eng a, zan lam dar 7:00pm a lo ri tawh, ka kal lai te chuan a la hma hle khan ka hre si a, ka inngaihtuah nasat vang nge, ka lo en miah lo, ka hawi kual a, hmuh tur an vang pharh tawh ,insum duh lo-in ka ţap leh, a ri meuh in. Ni e, chhungkua ka nei a, lawm tur ka ni, fahrah vakvai mai tur kha tuamhlawmtu ka nei a, mahse, ka nu leh ma pa takngial pawh hre lova ka awm hi chuan min ti na reng, midang hmaah chuan harh tak leh hlim tak angin lang mah ila, ka hriat chakna hian min kiansan ngai bik lo.
Pawnah ka chhuak ngai lova, mite nun ka awt lovin ka hre ţhin, mahse, vawikhat ka chhuak a, kawnga ka hmuh te, midang ka hmuh te chu an hlim hmel lutuk, lungngaihna an nei ve ngai lo a ni ngei ang.



'Lalpa, ka chantawka lungawi hi har ka ti lutuk, lungawina nun nei tura zirtir ka ni tih ka hai lo e, mahse, midang nun nuam lutuk ka hmuh hian ka inen a, bawlhhlawh-ah pawh ţawih mai tur ,laktlak loh, halral tlak pawh ni lo ang maiah ka inngai a sin! He khawvel a riangvai leh chanhai te hi i hmangaih takzet anih chuan, engah tehlul nge min siam?' Tiin ka Pathian ,Isua chu zawhna ka zawt mawlh mawlh, ka mittui a hul thei lo a, hul a hnékin a sur zung zung zawk!





'I nu chu chau tak chungin helai hmun-ah hian a rawn tlu lut a, nau a vei tih hrilh hran ka ngai lo, ka tawn tawh miau avangin, thiam leh thiam loin kan bawihsawm a ,ilo piang a, i nu erawh a chau chhe em em a, a chahthlak dawn khan a hmangaih thu che a sawi a sin', tia ţap hlawp hlawp chunga ka nu ,kan home enkawltu in min hringtunu chanchin a sawi lai te ka mitthla ah a lang a, 'Lalrinmawii ni rawh se', a tih hnu lawka a na tuar lo a a chahthlak thu ,hnukulh chunga min hrilh lai te, Jebedi erawh Father te'n min sak sak a nih thu te min hrilh laia ka ţap nasa lutuk Gabriela'n min kuah lai te ka hmu uar uar a, ka lung hi a dam thei mawlh lo.





'Kan buai luih luih a, thil a thleng chawpchilh lutuk bawk nen khan i nu hming takngial pawh kan hrelo, amah hriat theihna turin ID leh card pawimawh engmah a rawn húm si lo, amah zawh dawn lahin a chatthla zawm nghal mai bawk si, thlalak theihna tur engmah kan lo nei remchang si lo a, a hunlai khan', a ti bawk a nih kha.
'Nu, van aţang khan min lo thlir tiraw? I fanu, i fanu laktlak loh zet, i hming takngial pawh hre lo tu hi min hua em?' Tia phun sapin van lam chu ka thlir chho a, tuipui ri hum hum chuan ka beng an luh thei lo, ka rilru ah ka nu chauh a awm miau!





Lungawi hram hram ka tum a, kei aia chanchhia te en in ka infuih kal ve hram hram ţhin, mahse, tunah hi chuan, mahni inkhawngaihna sualin min luhkhung mek a nih si hi.
'I beidawng a, i chau a ,i ngui a, i lungngai a, natna hi i ta emaw iti em ni? Hawi kual teh, kut bul ,ke bul, mitdel te pawhin dam khawchhuah nan zah pawh dawn lo in kut an dawhna khawvelah hian nang ,kutke kim nei, mahni hma haikaw thei, khaw éng hmu thei a nungdam a Lalpa siam khan, i nunna hlu tak i chhat ang maw?', Tia ka nu in Ruatdiki inawhhlum a tum ţuma a sawi te ka hrechhuak uai uai a, ka rilru a rawn lut, tuipui a thi mai tura in barh luh duhna thinlung chu bo se ka tih avangin ka lu ka thing nar nar.




Ka rilru a thil awm chu do beh a, upbeh ka tum tawh lo, min tur a, min turna a nasat ém avangin ka na chhuak vek thei hial, tuipui ri hum hum mai, ka hlat lo tea awm, inchhawk nghulh nghulh lam ah chuan ka ke ka pen a ,ka hriat theih tirh ata tun hun thlengin ,ka natna khawlkhawm, fahrah ka nih vanga ka natna te, ka hmangaih Gabriel chunga ka lungawi loh na te leh ka nu leh pa thar te laka tling lo, fel tawk lo leh tihlim tawk lo nia ka inhriat rukna zawng zawng te chuan thih duh naah min hruai lut, ka kal chhat chhat a, tui vawt takin ka ngal a thlen chuan ka mittui a luang zung zung, ţah erawh ka tum tawh lo.




Tu emaw in min phih lawpin min kuahbet a, mak ti takin ka dingkhawng reng ringawt, bianga mittui luang ngiai ngiai chungin chu mihring,ka thil tih tum min lo dal tu chu hauha vin hrep tumin ka hawi chhuak a, a hmel ka hmu chiah chu mak tih luat vangin ka phu nghek.
'Gabriel', tiin ka au ţhawt a, ani erawhin rum taka min enin a bek a pawng ţawlh ţawlh thung.
A chil a lem khawlh a ,kei erawh mak ka tih luat vangin ka che thei lo, ka khawng lah a, Gabb chu ka melh tlawk tlawk ringawt, ka mit ka chhing sawk a, zawi tê-in ka meng leh, ka hmaah chuan ka hmangaih Gabriel tho a lo la ding, a awmzia chu he thil hi ka mumang a ni lo!



Ka la chechang thei chuang lo, kan din dan chu a rem teh lua si lo, ka khawng lah bawk si, ani lah chuan thinrim hmel taka min melh ngur chungin a ha a sehchilh rap rap, min kuah rún bawk si, a hming lam in ka phun sap a ,chutah ring fahran hian, 'Jebedi Lalrinmawi, eng angah nge i in ngaih a, nunna hlu tak petu che Pathian zah zo lo khawp a sàngah i inngai em ni? Hrep tak che hian', a ti ţhawt a, ka lo íp chawih chawih thung.




Chutiang em em a Gabriel thinrim chu ka la hre ngailo, sawi tur hrelo in ka riat nawi nak a, 'ka infiam mai mai alawm', tiin dawt ka sawi ringawt.
Za lo lutuk leh hul lutuk in a nui ro hawlh a, a chil lem khawlhin a mit a chhing vang vang a, kei chuan ngun fahranin a hmel ,rei tak ka hmuh tawh loh chu ka lo thlir ngawih ngawih thung.




Muangchangin a rawn meng a ,a thinrim hmel a paih tawh ,'a nih chuan infiam chiah ila', tiin ka hlatah a kal hrang hlek a, a kut hmanga tui khuapin ka lamah a rawn theh a, ka lo au ţhat, keipawhin ka theh ve bawrh bawrh a, kan nui dun hawk hawk ,nichin maia thih mai duhna rilru ka neih te kha chu lak bo ang hmiah a ni tawh, ka hlim kher mai.





'Chhuak tawh ila Mate', zaidam zetin a ti sup a, keipawhin pangchang takin min paw turin ka ti thawr, nui hawkin a hnungzâng, hlâi ţha ka tih deuh chu ka lawnkai theihna turin a dawh a, ka lawn vat, ka kaihza tawn tawna vuanin zo zetin min pen pui pawk pawk a, vaukam kan chhuah chuan chhuk ka tum chu phal loin min la paw lui ngar ngar.




'Ka chhuk duh, thil ka sawi duh a lawm', tiin ka ràk chúl a, min paw chung pawh chuan a ngaihthlak theih tur thu in min chhang leh mai, hahthlak ti zetin ka thaw hap a, a nui nghawr dawt thung.





'Engatinge min lo biak ngai loh? Ka ngai che tih i hre lo em ni?', Ka ti a, min biak pawh a hreh thu a sawi chuan ka ter nghal at, chhuk tumin ka tàl fat fat a ,ţha te te in min dahthla ve ta mai bawk.





'Min be hreh a, aw, a ţha, min be hreh, a tawk a nih chu, ka haw dawn', tiin ka inher nghauh a ,ka theihtawpa chakin ka pen sawn hlawk hlawk.
Ka kawngah kut nghet zetin min kuah run chuan duh lo in ka tal nghek a, a phun hluk thung, engtiklaiin nge ka bul a rawn thlen hman ka hre nek lo e.
'A tawk ,tal tawh suh, min ngaithla rawh', a tih chuan ka inthlahdul riai riai a, ka thà ka thlah rual rualin ka mittui ka biangah a luang lum nghal pap thung.





A lamah min kuaiherim duat zetin ka mittui min hruk hul sak a, ka biang tawn tawn a dawmin, 'Ka ngai ţhin che, nilo, ka ngai reng zawk che, ka awm loh na hmunah, ka tel ve lohna hmun a i awm daih khan ka ruak a, ka kim hlawl lo, mahse, be tur chein chakna ka nei lo, dawizep min ti em?', a tih chuan ka bu nghat nghat.





'Ni e, mipa dawihzep tak ka ni, ka hmangaih em em, ka naute, ka Mate-i kha ka be ngam lo ,a chhan chu maw, ka bia che a nih chuan,i aw, i aw mawi zet, ka thlakhlelh em em kha vawikhat chauh pawh ka hria anih chuan inngaihtuah buai hauh lo in i awmna ah ka rawn kal vat duh dawn, ka nu, dam lo na tak tuar mek kal sanin', a tih chuan ka phàwk hrà.



'Ka nu a damlo maw? Eng nge a an tawh a', ka tih chuan a vanvadak a, 'a hlim tawh e ,a him bawk e', tiin a phun sup. Hrethiam lo fé in ka melh haw a, ka mitmeng a zawhna awm a hrethiam a ni chék ang chu, 'ani chu nat awm ve tawh loh naah hlim takin a leng tawh, eng natna hrik mahin a ei chhe thei tawh lo, he khawvel natna hrik awm zawng zawng lakah a him tawh', a tih chuan ka hrethiam ta chiah ,ka nu a thi!






Dan rual lohin ka mit aţangin mittui a lo chhuak a, ka insút hlawp hlawp, ka nu, min hringtu ni lo mahse duat leh hmangaih taka min enkawl a min chawi liantu, humsual ka dai palh hlau reng reng a thu ţha tinreng min hrilh a min zilhhau tu, min fuih kal tu kha ka dawmhlum lohin a kal!





                        ZOTHANKIMA P.O.V



Ka hmaa nula leh tlangval, an nu sun a mittui tla a ţap mek te chu enin ka khi suk a, tun chauh a ni dawn lo, kha thil kan tawrh aia nasa, ni lo, a let tamtak saw hmeichhe tlaktlailo sawn a tuar dawn, a neih zawng zawng chu sawi loh, a la neih tur te nen lam ka ti chhe vek ang. Mahse ,tunah rih chuan a la thi thei lo, ka la mamawh dawn chauh.




Ka mask vuaha inher vutin hmanhmawh takin ka kalsan a, ka car ah ţhu lutin a seat ka ngheng dawt a, ka fanu duat em em mai, ka rohlu, ka Vivian nunna nei tawh lo tih hriat taka kawr a a ruang let hlawm reng ka mitthlaah a lang.
A hmai leh a vun a duk chur a, a thawmhnaw a thlér hne hnu bawk, postmortem la ni lo mahse ka fanu chu a serh zai thlér sak vek a nih avangin thil awmdan tur ka man thiam tho, mahse, ka pawm thei lo, 'Ka fanu, ka Vivian, Pappa ka lo thleng e ,bawihte, haw ang aw, hlau suh aw, tumahin an ti na dawn lo che ,keimah, i Pappa bulah lo kal la, haw ang aw, Mommy in a ngai tawh lutuk che a', tiin ka fanu hruai ka tum a, min phalsak lo anih kha, zawng Police tlaktlai lo ho khan!





'Pappa, ka hlau, min chhan rawh', tia thlaphang taka a au ruai ruai tur ka ngaihtuahin ka lung a awi mawlh lo, tha na fé in ka mittui ka khap per sak a ,ka fanu ti na tu hi ka chhuah bik hauh lo ang le, he a fanu Jebedi, a thisen bawlhhlawh zet aţanga insiam hmang ngei hian hremna ka pe khawp ang!





                             JEBEDI P.O.V



'Tinge engmah min hrilh loh? Tinge ka nu dam loh thu hrilh tlakah min ngai lo em ni? Chu chu sawi loh, a thih thu tal pawh hre ve tlak ah min ngailo em ni?', Tiin mittui tla chungin zawhna ka zawt a ,Gabriel awm ka chum dawt dawt bawk.




Mak tih hmel fé in min en a, 'i pa ka rawn hrilh a ,i rawn kal theih loh tur thu leh a lo hrilh mai tur thu che a sawi a, khami hnu a i hnen aţang call ka dawng miah lo kha ka dem che a sin', a ti ta mai. Mak ka tih luatah ka mittui a hul hlauh.





'Ka pa in min hrilh miah lo', ka ti hap a, a ngawi vung vung, bu nghutin, 'i rilru tih hah a hlau a nih dawn chu' ,a ti a, ka bu ve nghat nghat, ka himna an duh luata pawnchhuah min phalsak loh thu ka hrilh a ,boruak tih zangkhai tum taka ka hun hman dan min zawh chuan min zirtirtu Mayadi fel zia leh ka ngainat zia te, ka nu nen in-ah cake kan siam ţhin dan te leh ka hun hman dan ka hrilh siam siam a, ning hmel pu eih lo in min ngaithla.





'Chuan, tunah engtinnge hetah ilo lan hlawl theih zawk a', tiin ka zawt a, aw thian kharh in, 'in kal hnu lawk, thla hnih liam hnu lawk ah ka nu a na ta chiam a, a natna ber kan hre thei lo, rei daih lo in a kal ta mai a, ka nu a boral takah khan home enkawl tu tur thar an rawn awm nghal a, chuan, pa ka nei tawh lo tih chu i hriat kha, home a han khawsak zawm ngawt ka tan a rem lo bawk nen, ka nu in pawisa a khawl ve te la chhuakin i awmna lam ka rawn pan, vanduaithlak takin ka rawn kalkawngah ka mobile ka ti bo hlauh mai bawk a ,biakpawhna tur che u ka hre ta mai lo nen zawng hmu lo che in ka tàp kual ta reng, thla hnih ngawt ka khawsa ve tawh bawk ,hotel ah hnathawkin ka khawsa mek a ni', tiin a sawi a, a sawi zawm leh hmain, 'chuan', ka lo ti hmanhmawh.




Nui hawkin ka lû a tuai vut a, a sawi zawm leh, 'Zanin hna kan han bang kha han vah harh deuh ka chak thut a ,fianrial deuh hlekah min hruai turin ka ti a, helai hmun hi min rawn pan pui, chuan, intihhlum tum niin ka hria che a, tupawh nise nunna hi a hlu a lawm le tiin ka rawn pan che, mahse, ka zawn ruk reng mai, ka Mate-i kha ilo ni lek a, Pathianin ka ţawngţaina chhangin min intawn tir a nih hi', a tih chuan ka lo bu nghat nghat.
'A mak e tiraw', ka ti hap a, ani pawh a lo bu nghut, duat takin min kuah a, zan rei lam a nih tawh avangin haw mai kan tum ,a kiang a riak turin min sawm thut thut a, ka lo chak nasa.





Ka hmaa mobile hmang a ka nu leh pa te bia a phun sup chunga ril ruih a min en tu chu ka thlir ngawih ngawih a ,a hmel, pa hràk mai te chu ka ngaiin ka thlahlel a ,a taksa, ka tlukluh na, zo taka min dawm ţhintu a thinlung nen ,a samzai zawng zawng nen ka ngai ngawih ngawih. Mobile a la thla ruai ruai a, ngui hmel pu chungin min melh, ka lo thaw hawlh a, ka nu te chuan riah bo an remti lo tih ka man mai.




Nui suk chung a min pawm kang lawp a, min tihder thu sawitu chu ka chúm arh arh a, ka nui hak hak bawk.
Nui suk chung a min pawm kang lawp a, min tihder thu sawitu chu ka chúm arh arh a ,ka nui hak hak bawk.
Ka nu leh pa chuan Gabriel chu an ringtawk bawk a, a tuk tlai a min thlah haw tur thu a sawi pawh chuan hnial na an nei lo ni awm tak a ni. Mak ka ti hran lo e, unau pianghmun ang maia inhmangaihah min ngai dawn, kan inngaizawng tih an hre lo miau a ,hria nise zawng an remti bik tawp lo ang, an fanu duat ka ni ve tlat.




Hotel ah manager nihna chelhin a thawk hi a lo ni a ,a hlawh pawh a chhe hran lo, a chhungkaw neihchhun a nu a awm lo bawk nen a inchawm zo vai vai viau ang le.
Zanriah kan ei hnuah a room bathlar ah ţhu chhuak in kan titi siam siam a, breezer kan in bawk.
Hetianga zalen leh thawl halh hian ka awm ngai lo a, nuam ka ti viau mai. Arsi éng mawi tak, pe un mai chu kan thlir dun a ,a khat mawi tawkin inthlahlel takin kan infawp leh vawng vawng ţhin.

'A na', tiin ka ràk ţhawt a ,phàwk zetin min en ve dawrh tho, ka thianghlimna kha amah ngeiin a la tawh si a, engtinnge a la nat theih zawk le, chu mai a ni lo, thisen a la chhuak bawk! 'Ih, ka virgin tawh si lo a', mangang zetin ka ti chhuak ruai a, ka mittui a tling pam bawk, duat takin min chul heuh heuh a ,'naktukah doctor kan pan dawn nia', tiin dimdawi takin a che zawm mawlh mawlh a, a tawp lamah erawh ka na kha bo ta hlauh in nuam ti fahran hian ka lo dawh ve harh harh, ka thiam ang tawk té-in ka duhthawh ve kher mai.

Ka sirah a rawn let thla tawp a, min kuah hlu hlu in min hmangaih thu min hrilh ,keipawhin ka hmangaih thu ka hrilh ve sep a, ka beka min fawp vawng vawngin 'Duhthawh ve tàn tàn lutuk', tiin a nui hawk a, a hun laia zahna in min kalsan nen tunah chuan zah vàngin ka sen awp awp. Ka biang sa hat hat chu piai zeuh in, 'duhawm lutuk', min ti sup a, ka zah vanga ka mit ka chhin tlat chu mengin a hmuiah ka fawp zeuh a ,'i duhthawh fé zawk', uar zet a tiin rang takin ka tho. Bual in pan tum a ka pen chuan ka serh a na thíp zawk zawk a, ka ding ràn.

Mangang fé in Gabriel lam ka hawi a, 'a na a nia', ka ti ţuau. Rang fahrana rawn tho-in min pawm a, Bual inah min pawm lutin Bual kuangah chuan tuilum a dah a, a chevel mittui tling piau-in ka lo en ràn thung, ka zuau mah mah tih ka hria, mahse, pangchanna neih chu a nuam ém a sin.

Bual kuangah kan ţhu lut a, tuilum sa ţha ver vawr a ka inchiah takah chuan ka serh na pawh a nuam huai huai mai, body wash lain min chulh heuh heuh a, scrubber hmangin ka hnung leh ka ban te chu min nawh sak heuh heuh bawk, na reng ka hre chang tawh lo.

Nupa chengdun ang maiah inngaiin nuam ka ti veng veng.

Inkuah rialin kan mu a, thawmhnaw hak a la phal lo cheu, a ban min kham tirin min kuah a,nghet takin, thlamuang taka a âwm a bei hle hle in mangram ah ka lut riai riai.

'Anchhia inih kha, nang mi tenawmnu, ka that dawn che, mahse, nuamsa takin i thi lo ang, ka fanu in a tawrh aia nasa kha i tuar dawn khawp', ti a mi à ang mai a au chungin a kawnghren, savun ţha tak hmang a siam chuan min vua a, phuarbeh vek ka nih vangin na tuar chungin ka vial ngawl ngawl ringawt, talchhuak a kalsawn turin phuarbeh ka ni tlat, chemte hriam hmel zet, a hmawr zum kî vàn mai la in ka biang a thai riak riak a, a thíp nghal vawt vawt.

Ramhuai ang mai a meng sen rúm in huatna a khat mitmeng in min en a, 'Ka fanu tan', tia phun sup in a chem ken a lekkang a, tímna nei eih lo in ka thin zawnah min vit hrawk.

Nasa taka hlau leh khur chungin ka ţhu chhuak zawk a, ka hawikual ruai a, a thim mup vek. Kut hrawl zetin min ban chuan ka ràk ţhawt a, 'Keimah Mate', tiin mangang zetin a ţawng a, min bantu chu Gabriel a ni tih ka hriat ruak rualin ka kuahbet rawk rawk a, ka khúr zawih zawih.

'Ih, ih, ka pa in min that', mangang takin ka ti bah nak a, mangchhia mai a nih thu sawiin duat takin min kuah hle hle. Ka mang maksak zet chu ka hrilh malh malh a, min hnem tum takin min kuah bet tlat, ka thla ti muang turin ka ringtawk bawk a ni ang, ka khúr a reh a, mak ka tih zia erawh ka la thup thei lo cheu. Mangchhia satliah mai a ni tiin ka inhnem ve mawlh mawlh naa muhil tawh loin kan meng tlang ta tawp a ,varţianah tho-in khawsak kan rel a, kan rel ti ila amah hlirin a siam, kei chuan thu ho te te ka lo sawi melh melh thung, salad erawh ka siam ve hràm kha.

Hakthlak ka neih loh vangin a chenna piah deuh a Mall ah chuan a va kal a ,thawmhnaw bakah ka taksa lang lo china ka inbel tur nen lam a rawn lei, ngaihtuah kim ve lutuk.

Tukţhuan kan ei a, a na tawh lem lo a, kal a ţul ka ti viau lo naa Damdawi in min panpui ta ţalh, ka hnial duh bik lo.

'Sex kan hmang a, a virgin tawh si lo a, thisen a lo chhuak leh a', Doctor hmaa kan ţhut rual rualin a ti nghal thawr a, zah vangin ka lo íp chàwih thung, kan hman hnuhnun ber te min zawtin Gabriel chuan a chhang zel a, amah zawk na tuar emaw tih mai turin hrehawm a tih hmel fe zawk chuan ka nuih a ti za lek lek.

'Sex hman loh rei hian hmeichhe serh hi a lo tawt(tight) veleh deuh ţhin a, taksa no lai a nih vangin a nâ-in a pilh hma em em bawk, a vawihnihna chauh a nih chuan kum khat hnu-ah inhmang leh chauh nen, a dàn tur ve reng a nih chu, hlauhthawnawm a nio e', tiin damdawi hnawih tur erawh min pe a ,Hospital aţanga kan chhuak chu ka chúm dat dat, 'zahthlak lutuk, sex kan hmang tih a hre vek a, naaa', ka ti nang nang a, a khi suk suk duh lek.

Intihhlimna hmun nuam takah te lengkual in ni kan tumtawi hnuah kan in lamah min thlah a, polite taka che in kan inchhung thlengin min thlah thlap. Ka nu leh pa te pawhin an lo be ve bawrh bawrh a ,rei awm loin zan lama duty tur a nih vangin a haw thuai, ka ngaih bel nge ka hre lo, ka pa chuan min huat hmel riau hian ka hre tlat pek a, min duat a fahrah vakvai mai tur min tuamhlawmtu, chuti taka ka mangchhia vanga ka ring chhe mai chu ka inthiam loin ka in hau ru mawlh mawlh.

Ka nun chu a nuam a, chhungkua, nu leh pa hmangaihtu ka nei a, keimah a kim lo awm ţhin, ruak awm ţhin hnawhkhat turin Gabriel ka bul hnaiah a awm tawh bawk nen ka tan khawvel chu a par vul chúk a ni ber mai. A hna lamin chawlh an pek ni-ah te kan leng dun ţhin a, hun dangah lenchhuah an remti lo naa Gabriel nen kan nih chuan ka nu leh pa te pawhin min dang bik ngai lo, an ringtawk tih ka hre ve thiam a, ka hlim hle bawk.

Thla khatah ni hnih chauh chawlh a nei erawh inhmangaih leh inngai tak tan chuan a tlem lua chu a ni.

Nimahsela, mobile te neiin kan in be reng a, khawhar hrehawm lutuk chuan kan awm bik lo e. Mahse, ka mangchhia satliah emaw ka tih khan zual lam a pan tlat.

Rapawm tak taka ka pa khawsa lai ka mang lamah ka hmu ta fo a, a chang leh min pawngsual a, ka serh te chem hriam tak hmangin a zai thler ţhin, ka ràp takzet a, hlauhlawp in ka ţhangharh ta fo mai, a zual telh telh a, ka hmu zing telh telh.

Ka nu leh pa erawh ka hrilh ngai lo ,Gabriel erawh ka ţhanharh a piangin ka be ziah a ,ka ţah khum ţhin, hrehawm a ti thei hle a, kei ai mahin a mang a ang zawk in ka hre ţhin hial, a takah ngaihbel tur takngial pawhin ka chungah ka pa chu a khawsa ngai si lo, na taka kut min thlak chu sawi loh vawi te khat mah a pen takngial pawh min la pen lo, ka lakah a ţha em em a, naute lem ka awh thu ka sawi ţum a min vin chiam bak kha chu min ti na lo. A inthiam lo in naute lem lian zet mai pathum ngawt min lei sak tawh zawk a ni si a. A ngaihna tak pawh ka hre tawh nek lo e.

Ţumkhat chu message ka dawng hlawl a, ka hawn nak chuan.

'Gabriel hi ka ta anih hi, lo be buai ve tawh suh, zahna tlachham lutuk', tih thu lo awm vâng mai chu ka chhiar nawn tluk tluk.

Gabriel number aţanga ka message dawn chu ka awih phal lo a, mahse, ka dawng ngei si, number a dik lo ang tiin check nawn tluk tluk mah ila a number ngei a ni, kei hian mi kawplai ka lo ngaizawng em ni? Mi duhlai ka lo hmangaih em ni ang le? Chaw ka ei thei lo a, Gabrielan min lo biak a tumna call leh message zawng zawng chu chhang lovin ka hmet tawp hmak hmak ţhin, ni li ngawt a liam ta ,a mangangin ka nu te a rawn be hial a, min zawt ngial naa engmah ka sawi duh bik lo. Tlàwm ka inti a, tlawm duh lo eng ang mah ila ka tlawm lawi si.

'Màmte, eng nge thil awmzia? I nguai em em reng mai a?', tia ka nu in ka sam a chul heuh heuh a min zawh pawh chuan ka ngawi reng, ka mu kawm ngal bawk, ka ţawng chuan ka ţap dawn tih ka hria, door bell a ri tlang tlang a, ka nu in hawng turin ka pindan a chhuahsan chuan ka thaw huai mai, min duat tu aw ka hre reng a nih chuan insúm zo lo lék in ka puak thei mai ang, ka pindan kawngkhar a ri rek a, ka nu bawk a nih ka ring, hawi pawh ka hawi lo, mahse, 'tinge min biak duh loh', lungawi lo râwl tih hriat zet mai ka hriat rual chuan ka hawi dawrh a, ka khum mawngah Gabriel a lo ding rún anih chu!

Ka insúm hman lo!

Tho lawkin lukham ka la lawk a, ka vawm chawt, a lo dawng chat a, hamhaih hmel fé a min en chuan ka thin a ti rim ngei mai. 'Chhuak nghal rawh', ka ti chang fak a ,luhlul zetin a la ding ngawi ngul nia. Zak lo lutuk.

'Chhuak rawh ka tih chu, chhuak vat rawh, nu, ka nu, he mihring hi chhuah tir rawh', tiin ka au a, ka nu a rawn tlan lut vat, ka khumah ka ţhingţhi hnawk a, a ngaihna hriat loh hmel fe a min en tu te chu ngaihsak lo in ka tawt lutuk ka puak chhuak a ni ber, ka sam ka tuai thur chiam a, 'chhuak hram rawh ,i hmel tenawm zet kha ka hmu duh lo', ka ti leh tuar.

'Nu Tluang, ka lo bia ang', tia ka nu a chhuah tir te chuan rapthlak ti zetin ka melh a ,zahna tlachham chu kei ni lo he mihring leplerh, Gabriel Lalruatmawia hi a ni., 'Hrep che hian Lalrinmawi,eng chu nge maw i hriat le' ,ti hràwk in min la rawn pan nia!

'Gabriel, tenawmpa, min rawn hnaih hlek suh, i duh leh i bialnu kha va pan rawh', ka ti sehchilh nak a. 'Lalruatdiki mai mai chu', a tih sup chuan ka melh haw a, engtinnge tunah Ruatdiki a sawi theih!

'Hmanni mai khan a rawn lang hlawl a ,engtinnge min rawn zawnhmuh ka hre lo, ka chen naah ka awm tir ve ta ngawt a, pawisa a neih loh thu leh kalna tur a hriatloh thu zawng a sawi mai si a', a tih chuan ka hrethiam nghal ruak, tha na fé a melhin, 'chuan, a hma aţanga ngaizawng ngar ngar tu che chu i kiangah, i bul hnaiah a awm takah chuan min mamawh ve ta lo a,' ka ti a, min thlim ru ţhin nia ka hriat na chuan min ti tlawm takzet, thinrim hmel zetin a rúm nghut thung.

                        ZOTHANKIMA P.O.V

'Vijay tenawmpa, i fanu duhawm zet hi a la na dawn, fanu i nei tih pawh i hriatna ala rei si lo a aw, amah that tu tur kiangah thlamuang takin ala khawsa mek chu a ni si a' ,tiin ka nui hawk a, ka no-a a whiskey tak ţha zet chu ka thawkkhat nghal pap.

Ramhuaipa fanu ka sawngbawl dan tur ka ngaihtuah a, a hun a thleng ţep e, kan mitenawm pa pawhin fanu a nei tih a inhre tawh a, a zawng mek tih ka hria, ţul ka tih hunah ka hriattir chauh ang, a la na tawk tlat lo, ka fanu duatlai, ka rohlu, ka hmangaih ti nâ a, nasa tak leh rapthlak tak tuartir tu Vijay leh a thisen a fanu hi natna awm zawng zawng ka pe dawn khawp. Ka Cigar, ka kut a ka cheh beh chu fawpin ka sí vang vang a, phúr zetin ka tho hluai, tihdan tur ka hria e, ring taka nuiin ka fanu thlalak, bang a intàr dal mai chu ka en a ,'ka fanu, ka Vivian, a rei dawn tawh lo', tiin a thlalak ka chúl hauh hauh.

Room thuhruk aţanga chhuakin ka fanu lem, nakin lawk a ka thah mai tur pindan lam ka pan chhat chhat, a pindan kawngkhar ka hawn hmaa ţawng thawm ka hriat avang chuan ka thil tum ka ţhulh chawpchilh nghal a, inher vutin kan nupa pindan lam ka pan vut.

                           JEBEDI P.O.V

'Ka hmangaih che ka tih hian ka sawi satliah a ni lo, ka hmangaihna che hian rinawmna a keng tel a, chu rinawmna ka neih chuan i rin ngam ve kha a phút a ni Mate', tia Gabriel thusawi, a ţawngkam chuan min hneh kher mai, kal mai tumin a inher vut.

'Min kalsan dawn maw', ka ti sap, 'aw, i rinna min pek ngam hunah, rintlak nia min ngaih hunah min lo be dawn a nia, ka nghak ang che', tiin a pen sawn vut a, 'kal suh', tiin ka au vat, ka ţap khur ngawr ngawr a, luhlul chhuah a a pen lui pawh chu a tawp chawt, ka lam lo hawiin min rawn pan vat a, ka khumah rawn lawn ve in min kuah a, duat takin, chu chuan ka lung ti chhe zualin ka ţap uar sauh a, 'Shhhh, a tawk e, a tawk e, Ruatdiki pawh ka hau ang, fiamthu thawh dan a hre lo em mai', a ti ngawt, 'min lo biak luih ţalh pawh i tum lo a' ,ka ti leh ţiau.

Nui hawkin ţhuthmun a rem ţha a, ka chal a min fawp zeuhin ,'Mate, ka tum alawm, min block vek si a, biak ngaihna che ka hrelo alawm, Ruatdiki buaipuiin hun ka hmang a, kan hotu te hmuh pui vek a ngai a, a hnathawh ve na tur chungchang ah, thawmhnaw lah a nei lo, ka bazar pui leh vek a, nang lah chu min block chhan ka hre si lo, ka chawl ngawt thei si lo a ,rilru hrehawm reng rengin hun ka hmang a sin, mahse, a ni tawh em em lo tiin hei ka rawn kal ta ngawt a nih hi, nang lah chuan kan Ruatdiki ilo thík lek a', a ti a, a tirah zaidam viau mahse Ruatdiki hming a sawi chuan a aw a ri hluk. A mil bik vak lo, mahse, puitling zawk a ni a, 'fahrah vek kan ni, inhmangaih tlang tur kan ni', tih chângchawiin a ngawi thei viau thung.

Hnuchham in-ah pawh kan buai phah tawhna a ni a, Ruatdiki chu ka haw ru kher mai, amah vangin hrehawm takin kàr khat dàwn ka awm a ni si a. Ruatdiki chu an hotel neituten a pindan tur an buatsaih saka a awm tawh thu leh min tihbuai tawh loh tur thu te min hrilh a, keipawh ka lung a awi chhawm ve mai, pangchang zet a ka nghen leh ar ar tawh hi.

Gabriel-a a haw a, riah ve ngawt chi ni hek lo le, min chhuahsan rual rualin ka ngai nghal ngawih ngawih a ,insum zo lo in ka ngaih thu whatsapp ah ka va thawn nghal zat, min reply lo, ni e, message hmanga inbiak a peih vak lo a, a nin chuan min rawn call nghal vut zel. A chenna in a thlen hnuah min rawn call a ,ka lo chhing hman sek.

Phak chualin ka la a, ka mutchhuakin min hneh em avangin rei inbe loin kan dah vat a, ka muhil nghal bawrh bawrh.

Ka tui a hal em avangin ka harh hlawl a, ka room a thim khup, ka khum bula khawnvar chu chhit en tumin ka ban a, ka dap hmu hauh lo. Ka mobile zawng-in ka khum ka dap lawr dan dan a, a hit thlur mai, ka mutna chu ka khum pawh a nilo ,a ruhin a chang lutuk, ka harh zawk, kei hi ka pindanah ka awm hauh lo, rang takin ka inperh tho a, ka hawikual ruai a, engmah hmuh erawh ka nei lo, a thim mup miau!

Mangang zetin ka nu leh ka pa ka au tuar tuar a, ka kohna chhang tu an awm hauh lo chu ka mang a an ém vangin ka ţap teuh viau mai, engtinnge helai hmunah hian ka awm theih zawk? 

Kún khat khat chunga ka in dap buai chiam hnu ah plug ka dap fuh hlauh, ka hmet ri khep a, éng dal riai mai a rawn chhuak, éng chhete ka neih tawh vang chuan chu pindan chhung chu ka hmu thei riak a, a piah deuha plug awm chu hmufuh in ka pan vat a, plug zawng zawng ka on hnu chuan a éng ta pup mai, mak ti tak a ka hau chungin ka hawi kual ruai a, bang ah chuan hmeichhia, kei aia nau deuh tur hmel ţha tak, sam dum hlap ,ngíl tak leh sei hniang mai ,nú zém mai leh pawisawi lo zet, nunnem hmel em em mai thlalak chu a in tàr ţhàt.

Mak ti taka hawikual ruaiin ka en a, chu hmeichhe thlalak hrang hrang chu zu han in tàr khat vek a!

Ka piah chu a ri deuh rak a ,ka hawi vat, ka pa a rawn lut hlawl! Hamhaih tak chungin ka lo thlir mawl tawp a, biak nachang pawh ka hre lo, ka thinlungah erawh zawhna tamtak a awm.

Engvanga helai pindan a awm hi nge ka nih? He hmeichhia hi Vivian-i chu em ni? Engtinnge hetah hian ka awm theih? Tam tak zawhna ka nei, mahse, ka khâ a chih tlat, ka chil ka lem khawlh a, ka pa chuan kawngka chu khar lehin meng sen rúm chungin min melh ngur.

'Mak iva ti awm ve ka fanu lem te, kha thlalak intàr kha uluk takin en rawh, en rawh ka tih chu', tiin min vín ţhawt a, nasa taka phu dàwrhin, 'ka pa', ka ti ţiau.

'Kha i lei bawlhhlawh kha tansak che i duh loh chuan 'Pa' tiin min ko tawh suh', a ti fiak leh ţhak a, hlauh avanga khúr dar dar chungin mangang zetin ka melh ngawt ngawt a, ka mittui a baw zàwih bawk.

'Hrep tak che hian, mi tenawm thisen aţanga rawn piang, tualthattu thisen kai, naupang nunnem em em thattu thisen aţanga insiam ve mai, mi tenawm inih kha, i mittui tenawm zet kha ka hmu duh hauh lo' ,tia min vín ţhawt chunga chem,a  hmawr zum vàt mai, hriam hmel tak mai, a kekawr hnung lam aţanga a phawrh zàl zàl chuan hlauh vangin ka hnungtawlh dawrh a, ka khur ngawt ngawt.

Ka mang lama ka hmuh, lainatna tel map lo a diriam taka min sawisatu kha a ni, a chem ken pawh chu ka mumang a ka hmuh ang chiah, ka biangah rín riak riakin ka thin-ah min vit a nih kha!

Ka ngaihtuah chhuah rual rualin ka thin zawn ka dawm chat a, ka pa erawh min ten hmel zet a a ner nàwng hnuah nasa leh ring rapthlap takin a nui uar uar, kei erawh chuan ràp lutuk a melh tlawk tlawk chungin ka thin zawn ka hup bet ran.

Rapawm taka nui huah huah chungin min pan hnai zel a, hlauhthawnna a khat chungin ka tawlhhnung hrat hrat thung, ka la tlu sawp leh ta nghal a, hlau takin ka kut a innem khalh chungin ka la tawlhhnung hrat hrat, min hnaihchilh takzet tawh, mangang tak leh ţap chungin ka nu ka au tuarh tuarh a, ka koh eih zawh miau loh vangin Gabriel hming lamin ka au leh tuar.

'I dang thlér vek khawp a ring leh nasa in au eng ang mah la, tumah chhan tur che in an rawn kal lo ang', tiin ka bekah min chhuih chawrh a, ka thal nghal hiang.

Ka ţap hlawp hlawp a, ka khur dawt dawt lah a reh thei lo. In nemkhalh a, thawhchhuah ka tum chu min chhuihna ngaiah bawk min chhuih nawn leh a, patling thinrim tha tawpin min chhuih a ni bawk a,ka ngawng chhuih a, a na lutuk chu ţah pawh ka ţap tawh lo, ka mittui erawhin a luan a la ţhulh lo. Thei leh thei loin ka bek chu ka khawih a, a huh dap, hrilhhriat chawp ka ngai lo, ka pa in thisen min chhuah tih ka hria.

Fahrah rethei tak, a pa awmna chin pawh hre lo, a nu in a pianhlim a a boral san tak, in pawh nei lo, chhung leh kua nei loa nun hmang a a hringnun kawng sual chho ve, a chantawka lungawi tum a naupang té ni chunga mahni infuih kal ve reng, atan a beiseina, khaw éng, hlimna thlen tu chhungkua a neih ve tak avanga a hlimna leh a lungawina kha tihchhiat a ni asin.

A pa, a pa ngeiin kut a thlak a, thu mak pui pui sawiin tualthattu fanu ah a chhal a, hriatthiam har a ti ve a sin, ni e, hriatthiam a har takzet, ka taksa che thei lo khawpin ka tha chakna in min phatsan mahse ka rilru a harhfim kar si, hrehawm tih thumal hian a hrehawm zia a hrilfiah zo lo.

Chutianga min tih chhan chu zawh ka duh a, mahse, ţawng turin chakna ka nei lo, ka tlu hlawm reng chu min hnaihin ka kiangah a rawn ţhu thla a, mitmeng tenawm zeta min melh tu chu luhai chiai chungin ka en ve ràn a, chiang tak erawh chuan ka hmu lo, ka luhai avang leh ka mittui avangin ka hmu phé ruai.

Ka thawmhnaw hak a pawhthler kawk kawk te chuan ka thinlung a rúm vawng vawng a, tumah ka tan an rawn kal lo!

Pathian ka au a, min ţanpui turin, ka nu ka lam reng bawk, Gabriel-a nen ka koh chhawk chhen a, mahse, ka mangan laia ka koh, ka ţawng chhuak thei lo chung pawha ka rilru ngaihtuahna hmanga min chhanchhuak tur a ka ngen ngawih ngawih te chu an ngawi tlat. Tumahin min chhang lo! 

Dimna tel map loin min khawih bawrh bawrh a, ka hmaiah min béngin ka âwmbawr te chu a hrawm bawrh bawrh a, ka mawng te chu a ţhàm leh ţhin ,tihtheih ka nei lo a, tàl turin chakna ka nei hek lo, ka tihtheih tawk chu ka chakna zawng zawng sawmkhawm a in sehruh  chauh a ni.

Ka mang a ka hmuh ai nasa daihin chet a la tlat!

A chem hmawr zum tak chuan ka biang a thài a, a na lutuk.

Ka bân, ka âwm, ka mal te chu a thài riak riak a, ka thlér kawk kawk nimai in ka hria, a sulhnu ah chuan thisen a chhuak zel bawk ,mahse, ka mangah pawh ka man phak loh thil rapthlak lutuk a ti tel, ka bawp pahnih chu min dawrh tirin ka hmeichhiatna chu a khawih bawrh bawrh a, la duhtawk lo chuan chem hmang chuan a zai a nih chu!

Ka chau in ka na tawngkhawng ta.

Ka mitthla in ka hmangaih te hmel ka hmu zut zut a, ka nu leh pa nen a kan hlim lai te, Gabriel nen hlim taka kan nuih dun lai te, duat taka min chúl lai te leh Mayadi in lehkha min zirtir lai te,ka huntawn a hlimawm zawng zawng ka hmu fai kélh, rang tak leh fiah tak siin.Thi turin ka inring hmiah tawh a, min sawisakna avanga ka taksa chau leh na lutuk chuan nikhua min hriatloh tir ta hial a, a thim ta mup.

Ka taksa na thíp vawt vawt ah chuan ka harh a, ka meng hleithei lo, luhlul chhuahin ka mit men tumin ka bei ţauh ţauh a, ka meng chhuak hlawl, ka chung zawn a éng nasa tak avang chuan ka chhíng leh sawk a, rei fe hnuah zawi té in ka meng leh. 'Mate, mate, i harh tiraw?', ti a min hnaih ruak ruak tu thawm ka hriat chuan ka mittui a luang pap a, Gabriel aw ngei ani.

Ka rilru in, 'ka him tawh', tiin ka inhrilh mawlh mawlh a, chuti chung chuan ka na ngut ngut tho!

'I ţha em? Tui i duh em? Ka tihpalh aw', tiin min be viau mahse ka chhan miau loh vangin doctor leh nurse a ko chuk chuk a, thinlung natna a khat chungin ka lo in sehruh ngawt ngawt, ka duh loh ber, ka hlauh ber thil ka chungah a thleng miau, he thu ngawt hian min luhchilh, 'PAWNGSUAL KA NI' tih thu chuan!

Nurse leh Doctor ten min endik pahin min be mawlh mawlh a, ţawngkam khat mahin ka chhang lo, Doctor thu angin damdawi hmangin min chiu a, damdawi hnathawh vang nge ka taksa zawiin mutchhuakin min zém a ,rei loah ka muhil leh vat.

Ka harh leh chuan ka dang a ro em em a, ka khur zawih zawih bawk, thlan in min bual huh hnúp a, engdang vang a ni lo, ka mangah kha ramhuai, ka pa khan min sawngbawl lai kha chiang tak leh fiah takin ka hmu miau. Ka tha khur dawt dawt chung chuan ka hawikual ruai a, éng chhete tak tak a in chhí, kha pindana ka awmlai leh ka pa min tihdan kha ka mitthla ah a inlàr dawt zut a, ka mang nen, ka bulhnai ah awm an awm em tih en in mangang zetin ka hawikual ruai a ,tumah hmuh tur an awm lo, ka sir dinglam a ri rek a awm chuan nasa zetin ka phu dawrh a, ka ràk chhuak ţhat bawk.

Rang taka min hnaihin min kuahbet a, chu chu duh lo in ka theihtawp a nasa in ka tàl chiam, mahse, a thà a chak lutuk. 'Mate, keimah Gabriel', tiin ka hmai zawnah a au ţhawt a, ring tak a ţap chhuak chungin ka kuah bet tlat a, ' lo kal leh a, ka pa kha, nasa takin min....min sawisa', tiin ka hlauhna chu ka ţah chhuah pui hawm hawm, nghet taka min kuah chungin ka hnung a tuai heuh heuh. Hlau lo turin min fuih mawlh mawlh a, kei erawh chuan ţap khur ngawt ngawt chungin ka theihtawp a nà in ka kuah char char a, ka hlata awm a tum chuan, 'aih', ti vak chungin ka tha tawp chhuahin ka kuah nghet lehzual sauh.

'Doctor in i harh veleh ko turin min ti a, an endik leh dawn che alawm Mate', a tih pawh chuan ka thlah duh lo, ka hlau miau, na zet a thaw chhuak hawk-in, 'ka that khawp ang', huatna awka ,kha zet nen a ti chhuak hràwih a, chu ţawngkam,ka thlavang a hauhna leh min ti na tu a huatna awka kha zet kara min lainatna, min ngaihtuahna ri ka hriat tel chuan ka lung a chhia a, ka lungchhiat rual rualin ka thla a muang hliah hliah thung.

Thla hnih zén zawn Damdawi in lamah kan awm a, ka thil tawn in min nghawng nat ém avangin rilru lam Doctor pawh an ruai hial.

Zantin, ka pa in min tihdan ka mangphan a, hlauhna a khat a khur dawt dawt chungin ka harh chhuak ţhin, ka nui ngai lo a, min tihdan ang angin ka awm tawp, ka na a, ka nat dan chu ka sawifiah thiam lo, ka taksa hmun hrang hrang a ka pa in chem hmanga min thai ran na te chu a dam a, ser hnutchhiah lo tur pawhin min enkawl, mahse, ka thinlung hliam thúk tak hi a dam ve hlawl lo, lang chhuak si loin ka chhungah ser lian tak a awm a ,ser satliah ni lo, ser nung lian tak a ni.

Mipat hmeichhiatna min hmanpui hman loh thu ka hriat erawh chuan ka thaw huai a, chhete, chhete tak tak chauhin, ka nu in Police ho call in Gabriel pawh a call a lo ni a, silai hmanga kawngkhar kap chhiain an rawn lut a, ka pa leh kei, saruak vek a awm chu min rawn hmu ta a ni. Min mutpui tumin a lo in ruahman mek lai an nangching tih min hrilh laia Gabriel hmel rum lutuk kha ka hlau hial! Ka nat tluk zetin a na tih ka hria, chutiang bawkin ka nu pawh.

Kha thil thlenna hmun, kha pindan kha kan inchhungah ngei a awm a, bungraw hman zen zen loh dahkhawmna atana kan hman chhungah kawngkhar dang a awm leh a lo ni, kha thil vang kha a nih dawn kha ka pa in tumah luh min phalsak lo a, tala lian zet hmang a a kalh tlat ţhin. A tirah mak ka ti viau dawn a, bungraw hlui dahkhawmna mai a ni a, ka nu pawh a luh ngai loh thu ka hriat khan ngaihţha takin ka awm ta a nih kha.

Damdawi in aţangin kan chhuak a, rilru lam Doctor erawh hmu leh tura tih ka ni, mangchhia ka la neih ţhin vangin.

Ka pindan-ah ka nu leh Gabriel-a te nen kan awm a, ka nu chuan a aw a thian kharh kharh a, thil engemaw min hrilh duh thu a sawi, a zan mu zanlai a harhin a kianga mu ţhin, a pasal awm lo chu mak a ti viau a, Bual in leh pindan hrang hrang a enkual hnuah pawh a hmu lo, 'ka pasal kha Vivian-i pindanah a khawhar lutuk a lut fo a, a naute lem te pawm in a thawmhnaw, a bungrua te a thlir ngawih ngawih ţhin, a khawhar a reh ngai lo a, "ka tan hian khuarei a awm ve dawn lo, ka fanu ka ngai em mai", a ti ţhin, hna pawimawh a awm thut ang a ,a zan chhuah emawni le tiin ka call a, kan nupa room ah a mobile a ring ral ral si, kan nupa room lam pan a ka kal chuan store room inhawng huau mai hi ka hmu a, mak ti takin ka pan, zanlai lai a hnathawh a tum emawni tiin ka lut a, kawngkhar dang lo awm ka hmuh chuan mak ka ti viau.

Inchhung a khawsa a chenchilh tu mah ni ila ka pasal hi ka zah a, ka fanu Vivian damlai pawh khan kan intih palh a hlauh vangin store room luh min phalsak ngai lo, thu kan awih bawk a, kan lut lui ngai lo, pindan dang kawngkhar lo awm ka hmuh chuan beng si chétin thawm a awm leh awm loh hriat tumin ka ngaithla a, mahse, thawm engmah ka hrelo. Kan pindan pan san mai tuma phun nang nang chunga ka let chuan engemaw hi ka pal a, ka tlu ţhelh nghe nghe', tiin ka nu in a sawi a, a chil a lem a, tui ûm banin a in khawlh khawlh ,a mittui a luang zawih zawih a, mak ti leh hriat chhunzawm chak takin ka lo ngaichang ràn a, ka kutah Gabriela'n min vuanin ka chhip a fawp vawng vawng a, min hnem a tumna a ni tih ka hria.

'Ka thil pal chu bâwm a ni a, ka pal na lam ah a chhung a thil awm chu a rawn tla chhuak a, thlalak ang tak tak a awm avangin chu thil chuan he laiah eng nge a tih ang tiin ka hai a, ka bihchiang ta a ni. Ka pasal sumdawnna a a thawhpui ţhin, Vijay thlalak tamtak a awm a, chuan, Jebedi, nangma thlalak tamtak nen, lehkha pakhat ka hmu a ,ka keu pharh a a chhunga thu inziak ka hmuh chuan ka mitsulh thei.

"Vijay, ka fanu duat laka i khawsak dan tenawm zet avang khan i fanu, Jebedi Lalrinmawii hian a tuar dawn, ka fanu in a tawrh aia nasa zawk kha", tih a lo in ziak', a tih leh chuan mak ti taka hawi phàwk hràin ka nu leh Gabriel chu ka melh tawn sek.

'Mah,,...Mahse', ka ti nawi nak a, a dang chu ka pa kà aţang ngeia ka hriat tur thu sawiin ka nu chu ka pindan aţang inhnít hlawp hlawpin a tlanchhuak.

Mak ti takin Gabriel ka melh a, hriat a neih leh neih loh ka zawt a, a ngaihna a hre vak bik lo, ka pa Jail ah kan hmuh tur thu leh engkim min hrilh tur thu a sawi a, hah zetin thawk ka la hawk ringawt.

A tûkah chuan Tan-in lam chu kan pan a.

'Ka sumdawnna kawng a bul ka ţan pui ,min khai dingtu ti ila ka sawi sual lo ang, Vijay a ni a, ţhianţha takah ka ngai ţhin, ka fanu laka khatiang a a chet hma kha chuan', ti a sawiin ka pa chu a kun tlawk tlawk a, meng sen rum a a rawn hawi chhuah chuan ka tawlh dawrh a, ka khur ngawt ngawt, nichin lawka a ţawngkam, a awka dam dap leh zuai ruih kha a bo a, huatna mitmeng nen min en, kha zan a min melh dan ang chiah khan.

Gabrielan min kuah vat a, hlau lo turin min hrilh, engtinmah min khawih dawn loh thu sawiin min venhim tur thu a sawi mawlh mawlh a, kei erawh chuan ka pa hmel rum tak, min huatna a khat tlat mitmeng pu chung a rapawm taka nui uar uar chu hlau tak chungin ka melh tlawk tlawk.

'Tualthattu fanu', tia au ţhawt chungin min kawk và a, ka lo inbuatsaih ve na, ka intih paukhauhna chu ţhiahin a awm, ka hlau lutuk.

'Ka fanu khan engthil nge a tihsual? I pa, i pa tenawm zet khan ka fanu khawih a tichhia in a taksa a zai thler a, that zuiin dil-ah ka fanu duat, ka rohlu, ka Vivian kha a paih a sin, mi tenawm thisen aţanga piang chhuak ini a, nangpawh kha mi tenawm ini, hre reng rawh, hun ţha ka hmuh veleh ka that tho tho ang che', a tih chuan ka mittui a tla zung zung a, ka beng hup chawih chawih mah ila a au ring lutuk chu a thusawi ka hre tho ,Gabriel ka kuah a, a taksa insangmar nasa lutuk ah chuan nasa takin a thinrim tih ka hre thei.

'I kuthmawr pawhin i tawk tawh hauh lo ang', tiin ka pa chu na zetin a melh hrawk a, dimte a min kuahin chu hmun aţang chuan min hruai chhuak.

Engtiklaiin nge Uber a lo book hman ka hre lo ,kan hmaah a rawn ding chat a, dimte bawk a min ţhut luh tirin hmun reh hek hawk a min hruai turin a ti thawr, kei erawh a tih ang angin ka lo awm mawl tawp.

Ka rilru ah zawhna tamtak, a chhanna ka hriat siloh a awm a ,a chhanna kawl tu lah nasa takin ka hlau si, kawl a bun chung pawhin ka hlau miau a, ka rilru a zawhna awm kha ka zawt thei lo, a hmel ka hmuh rualin kha zan a a chetdan rapawm lutuk kha ka mitthla ah a lang nghal zel si a.

Park reh tak, mi tlemte hmuh tur awm pheuh pheuhna hmunah min hruai chuan ka lawm ru hle, ka haw chak hlawl lo, ka bul a ţhu, min hnem tum leh min tihhlim tum taka fiamthu hrang hrang sawitu chu en in, 'Gabriel, ka pa in khati khawpa min huat chuan ka nu pawh hian min haw ve ang tiraw? Vivian kha a fanu a ni miau alawm, keimah vanga thi a niin i hre ve tho em?Ka nu in min en laia a mit a natna langchhuak kha i hmu em? Ih, ka pindan aţang pawh khan ţap chunga a tlan chhuah kha', ka ti sap a, min chhang lo a min kuahin ka bekah a fawp tawk a,' tihsual i nei lo', a tih sap chuan ka thaw chuak ham ham.

Ni e, tihsual ka nei lo, min hringtu ka pa chu ka hre lo a, mahse, ka pa in Vijay a tih, Vivian chunga khatiang thil thlen tirtu nia a sawi kha chu min hringtu a ni lo ang, ka nu kha Mizo a ni a, keipawh mizo ka ni, Vijay chu vai hming a ni a, ngaihbel luih ţalh tumin inhmehbel tum pawh ni ila ka hmelah Vai hmel engmah a awm lo, ka pian erawh a zia hle ,mahse, chu ka pian sang zeih zawih, inkhaithli zarh mai chu ka nu lak aţanga ka lak a ni tih ka nu ,Gabriel-a nu khan min hrilh ţhin.

'I nu kha taksa chau tak chunga rawn lumlut anih vang khan a dawldang em em a, nangmah vei che in na a tuar bawk nen, mahse, a ruang kan phum dawn a a taksa kan en khan maw Mate ,nu pian ţha tak, lian ţha zuah mai a ni tih ka hria, i chhun a, nangpawh i pian a chhiat miah loh hi', tiin min hrilh a, hlim zetin ka nui var var a nih kha.

'Ka pa hi mizo a ni ang tiraw? Ka pa sawi Vijay kha ka pa a ni tak tak miah lo ang ,ih, mizo diktak ka ni ang tiraw', tiin beiseina nen Gabriel chu ka en a ,na zet a thaw hawkin min lainat hmel zetin min en ngawih ngawih a, duh lo zetin ka lu ka lo thing nar nar thung.

'Aih, khati khan min en suh, mizo ka ni, mizo diktak, Vijay fanu chu ka ni lo ang, vai hmel pawh ka put loh hi', ka ti hap a, 'Mate, ngun deuhin lo ngaithla rawh aw', tia Gabrielan min biak chuan ka lo bu nghat.

'Vijay khan nupui a nei a, a nupui hming chu Beena a ni, sumdawng hausa tak an ni a, an in ah i nu khan hna a thawk ţhin, Vijay chuan i nu kha a ngaizawng em em a ,a tawpah phei chuan insum zo loin i nu lakah khan a duhna a tilang ta hial a, a mutpui a ni, i nu khan a lo nep thei bik lo a ni mahna, nau a keng ta hial a, i nu naupai thu Beena-in a hriat khan thup theih ni tawh hek lo le ,a pasal Vijay nen a an fa anih thu a sawi ta mai a, Beena thinrim chuan i nu chu a hnawtchhuak nghal a ni.

Vijay chuan kamkhat pawhin a thlavang a hauh eih lo, a thlir liam tawp a, i pa, pa Zothana hian i nu chu lainatin a umzui a, Mizoram a a haw na tur pawisa a pe, a chhungte an hre bik lo a, a hmingpum pawh hrelo in an kohna Ramte tih ringawt chu a chin an hriat chhun a ni awm e, tichuan inţhen ta em lo in Vijay te pawh chu an awm a, a nupui vanga hlawhtling a ni bawk nen a thlauhthla ngam lo.', a tih chuan ka hau chungin ka lo ngaithla a ,ţawng tum a ka kà ka ang tihah min khap vat.

'Tichuan hun a kal a, kum tamtak a vei hnuah ţumkhat chu i pa Zothana leh Vijay te chhungkua hi an picnic a, an buai nak nak nen Vivian a awm lo tih pawh an lo hre lawk lo ,a bo ta hmiah a ,rei tak an zawn hnuah a ruang chu dil ţawp takah an hmu a, i pa hian a fanu Vivian ruang bulah Vijay-a sana a hmu nghe nghe a ni. Mahse, sum an nei em a, finfiahna ţha tak an nei si lo nen Police ten Vijay chu an man lo, i pa rilru a dam lo in Vijay te nen an inţhianţhatna bakah, an sumdawnna lama an thawhho na pawh a chhu chat vek a, i nu, hun rei tak liam taa an hnawhchhuah khan Vijay-a fa a pai tih hre ràn in Mizoramah a zawng ta a ni, mahse, i nu kha engtinnge a khawsak zui a hre lo a, a ll thi daih tawh nghe nghe, mahse, uluk taka a zawn hnu che chuan a hmu ta mai reng che a, fa atan ala che a nih kha ,i lakah a fanu phuba a lak theih na atan, a fanu tawrh ang chiah kha Vijay-a fanu pawhin a tuar ve a duh, nangmah hian, chu chu i pa Zothana sawi dan a ni', a tih leh chuan ka thaw a chham lo chauh.

'Tualthattu fanu ka ni maw? Ka ni duh lo, aih ,ka ni duh lo, in hresual a ni ang', tiin ka ţap hlawp hlawp a, min khawngaihna mitmeng pu chungin min thlir mawl tawp.

Ka tlan thut a, ka hnung aţangin ring takin ding turin min koh ţhawt ţhawt chuan ka ding dat a, lehhawi-in ka hmangaih,ka Gabriel chu ka melh, beidawn hmel fe hian min melh a, ka lehhawi rual rualin min um a a rawn tlan chu a ding ve chawt, ka hmui phun a ka hmangaih thu sawi sapin ka hnung lam ka chhawn a, ka hma lawk a motor kawngpui lian zet lam pan chuan ka theihtawp a chakin ka tlan leh.

A ri bur a, ka leng lawp ,nikhua réng ka hre ta lo, tualthattu fanu, mi tenawm fanu ka ni takzet anih chuan kei hi dam ve reng tlak ka ni bik lo ve.

Thil engemaw ri ţuk ţuk thawm ka hria a ,ka taksa chu a kham na ngut ngut bawk, ka lû a na búr a, mak ka ti viau, a thim mup si a, ka ngaina hlawl lo, ka mit chu men tumin ka bei a ,ka awmna thim lutuk aţang hian chhuah ka duh, mahse, ka thei lo, a inchàr bet tlat!

Ka tha neih zawng zawng hmangin ka bei nawn leh a, ka meng chhuak ta, ka men rual rualin thawm ri deuh hliai a awm nghal. Kei erawh a én lutuk vangin ka chhing leh sawk a, zawite in ka meng leh diar diar.

'Mate, i harh tiraw? Na i nei em? Mate, min hria em? Doctor, tinge Matei hi a ţawng loh, min hre lo em ni? Engkim a ţha ang in ti a ni lo em ni?Check ţha leh rawh u, min chhang miah lo a nia', mangan na awrawl zawng zawng neitu ni awm a mawiin phílí buai zet a a tih chuan ka hawi à deuh hau!

'Mate' ti a min ko tu, mipa sàng ţha tak, khabe hmul tawite a nei siar siar mai, mutmu tuah ţha lo tih hriat tak a meng phelh phang, hmelţha zet, pa hràk mai chu ka thlék ngial a, mahse, ka hre thei lo.

'Tunge i nih? Khawiah nge ka awm?', ka tih chuan rilru nat hmel fé a min en in a mittui a far fap a, na taka thawk la hawkin kan awmna aţang chuan a chhuak.

A chhuah rual rualin ka hawikual a, ka kianga awm ve ho Doctor ni awm taka kawrfual var ha leh nurse pahnih te bakah nu pakhat hian lainat hmel lutuk in chu mipa chhuak chu an thlir zui a, nurse pahnih te phei chuan an mittui an hru.

Ka khuh kharh a, min rawn ngaihven vat, tui min tulh in nà ka neih leh neih loh min zawt a, ka sir a nu pakhat awm chuan mittui tla deuh púr chungin, 'Mate', min rawn ti, ka hawi vat a, rilru nat hmel lutukin min melh ngawih ngawih, 'Ka nu',  ka ti sep a, a mitmeng a mak tihna langchhuak chu keiin mak ti takin ka lo thlir ve thung.

'Min hria maw, Mate, keimah i nu, min hria tiraw?', ding hliaia min rawn hnaih riak paha a tih chuan ka lu ka lo bu nghauh nghauh a, engahnge maw ka nu chu ka hriat loh ang le, nui var varin ka chalah dimté in min fawp a, 'Gabriel kha', a tih rual erawh chuan a nui hmel a tawp riai riai. 'Tunge Gabriel chu', ka tih chuan a àng ziai a, mahse, a chíp leh hmiah, Doctor chuan min rawn hnaihin ,'Accident i tawk a, i lû kha na taka i sawh bakah i ke ruh a tliak a, i bàn a auh bawk, i nàk ruh i sawh na bawk a, mahse, i ţha tawh ania, damdawi kan pe leh che ang a, muhil leh lawk rawh aw', min tih chuan ka lo bu nghat nghat a ,ka ban a min chíu hnu chuan rei vak lo ah mumang ram ah ka lut.

'Tualthattu fanu ka ni maw? Ka ni duh lo, aih, ka ni duh lo, an hresual a ni ang', tiin ka ţap hlawp hlawp a, min khawngaihna mitmeng pu chung a min thlir mawl tawp tu chu ka harh tirh a mipa ka hmuh kha a ni. Ka lû nasa takin a na a, a nat em avangin ka harh leh hlawl. Ka harh rualin ka lu na lutuk chu ka dawm chawt a, a puak mai dawn a ka hriat miau vangin ka mang a ang takzet,thei leh thei lo in ka nu ka au a,rang taka min rawn hnaihin ka lu na ka dawm a hmuh chuan Doctor ko turin a tlan chhuak vat, kei erawh ka lu ka dawm ngawih ngawih thung.

Doctor in nachhawkna a min jection hnuah ka lu na a reh riai riai a, ka nu leh Doctor melh tawn chhen chungin ka mumang ka hrilh, ka harh hlim a ka mipa hmuh hmel ka mitthla a, tunge a nih?Engvanginnge a kiangah ka ţah, kha pa khan tualthattu fanu min ti em ni? Ka ngaihtuah zawngin ka lu a na leh a, Doctor in thil ngaihtuah vak vak lo tur a min tiin ka accident na lama ka hriatna ka hloh ţhen thu min hrilh. Ka nu ka melh a, lainat hmel fe in min thlir.

Zawi zawi a ka hriatna ka neih let leh tur thu leh tunah chuan thil engmah ngaihtuah lo turin min hrilh a, ka lo bu nghat nghat ,'Mate, i pa i hria em?' ,ti a ka nu in zawhna min pek chuan mak ti takin ka melh leh hàw a, 'ka pa chu a thih tawh kha', ka ti sep, ka nu chuan a hmui a hup bet chawt a, mittui luang zung zung chungin min kuah a, 'ka fanu lainatawm', tiin a phun sap sap,a awmzia ka hre lo kher mai.

'Nu,ka hriatna chu ka hloh hlen dawn loh kha, ka nei let leh vat dawn a lawm', tiin ka hnem a,ka nu pawh mittui tla chunga nui luiin a lu min buk khum ve nghauh.

Nitin kha pa, Gabriel an tih kha alo kal ziah a ,Chocolate, Pizza leh eitur tuihnai tak tak, ka ngainat em em min lo ken sak ziah a, 'Mate', tiin min ko ziah, rilru na hmel a pu ziah a, thup tumin hlimhmel min hmuh ţhin mahse ka man kher mai, ka lo man thiam chhan erawh ka hre lo, ka lû an tuamna pawh an phelh tawh a, ka ke ruh tliak an zawm pawh a dam tawh viau, naktuk maia Damdawi in kan chhuahsan tur thu ka hriat vangin ka hlim hle mai, ka nui hak hak reng a, ka titi siam siam bawk. Mayadi ka ngaih tawh thu ka sawi chuan mak ti hmel pu chungin ,'Maya i theihnghilh lo maw?', ka nu leh Gabriel chuan an ti rual ţhawt a, ka nui hmel dahţha in, 'Engahnge ka hriat loh ang', ka ti let hâ.

'A ţha e ,i tutor Maya pawh i hria a, kei, i hmangaih leh hmangaihtu che pawh min hre lo maw, ngaihtuah teh Jebedi Lalrinmawi, min theihnghilh hlen i tum em ni?', ti a min vin ţhawtin min chhuahsan dawr dawr a,hrilhhai zetin ka en liam tawp.

'Nu, tinge Gabriel kha, ka hmangaih leh min hmangaihtu maw', ti hà in ka nu zawhna mitmeng nen ka melh a, a lû min buk khum zeuhin, 'ni e Mate, ani kha i u ,i bialpa ,i ţhianţha ber, i engkim a ni a lawm', tia min hrilh chuan rang taka thoin bai salh salh chungin ka tlan chhuak a, ka nu min umzui na pawh ka ngaihtuah lo, Motor kawngpui ka thleng a,hah zeta thaw hlawp hlawpin ka hawikual ruai a,ka hmu miah lo.

'Jebedi', ti ţhawt ri ah ka hawi dawrh a,ka lam panin chak zetin car a rawn tlan, ka insaseng hman tawh lo, thawklehkhat ah ka per nawlh a, lei ka deng dawt ,ka mitthlaah ka pa min sawisak dan te, tualthattu fanu ka nihzia te leh ka huntawn engkim a inlàr dawt zut a, namén lo in ka lu a na bawk.

Mangang taka Gabriela'n min hnaihin min buaipui a, lu na tak chungin, 'ka hre vek, ka hre tawh', ka ti nawk nawk.

Damdawi inah min hruai lut lehin Doctor te pawhin min buaipui sawk sawk a, ka lu na lutuk chu ka meng dava riai tawh, a tawpah phei chuan engmah hre lo bawkin ka awm leh ta.

Ka harh leh chuan khua a lo thim ruih tawh a,ka dang a ro em avanga tui lam vatin tui min lo pek chu ka in khawlh khawlh a, kàr lo ah ka in zo, ka ţhat leh ţhat loh min zawh chuan ka ţha tih hriattir nan ka bu nghat a ,hawikual in ka bula awm te ka melh a, vaipa pakhat, thau lampang ,lian leh sar vuah mai, chík taka minlo en tu, Gabriel leh ka nu kianga lo awm ve ka hmuh tel chuan ka thin a phu dawt dawt, ka thlan a tla a, a awmzia ka hre hauh lo.

'Hei hi tunge', ka ti sap a, Vijay anih thu Gabriel ka aţanga ka hriat chuan ka phu hlum lo chauh, ka mutna aţang ka inperh tho zawk nghe nghe.

Ka nâ pawh ka hrechang tawh lo.

Kut khur dawt dawt chunga kawkin ka pa ni a an sawi, Vijay chu ka melh kal, 'i fanu ka ni lo, ka ni duh lo, mi tenawm, tualthattu', tiin huatna thinlung ka pai zawng zawng nen ka ankhum a, ka thin a rim luatah ka ţawng ka sehchilh nawk nawk ,a hmelah eng thil danglam mah a lang eih lo te chuan ka thin a ti rim zual sauh.

'He mihring hi chhuah tir rawh u,ka sawi chu in hria em? Chhuah tir vat rawh u', ka ti tuar a, haw lutuk in ka melh leh hrawk.

Kiai suk chungin, 'i nu i chhun hle mai,kawlh lutuk' ,a ti hluk duh lek!

'Ka nu maw?' Tiin ka phun sap a,a bu nghauh. 

'I nu kha ka duh em em a,ka lém nasa hle ,mahse, a hnathawhna pa ka ni a, ka nupui a hmaizah nen a tirah chuan min hnar reng ţhin, ka lém tak rengah chuan ka nupui hmai éng pawh a zah zo bik ta lo a, ka nupui awm loh lai a ni, hna thilah amah kher zin a ngai a, keiin remchangah lo la-in kan lo mu dun ta a, ka nupui awm loh chhung khan nupa ang maiin kan khawsa, tichuan, nang hi a lo pai ta che a, a dang chu i hriat tawh kha, mahse, tualthattu ni a min puhna, Mr.Zo-a fanu kha chu ka khawih a nilo', ti supin a hmai a tuai pawk a, a thlan a tla bat bat.

'Ni lo, dawt a ni lo', ka ti ţhawt a, tualthattu fanu nih chu ka duh hauh lo, mahse, khati em ema ka pa in min huat na chhan kha thudik a nih ka ring tlat si a, Vijay-a chu hui papin, 'ni e ,Vivian kha khawih ka tum ngei a, kan inchai na lamah ka sana ka hloh nghe nghe, mahse, ka hlawhtling lo, midang ho pool a hlim taka an awm lai khan ka hruai hrang a, fimkhur takin, thil theihnghilh kan neih thu chhuanlamah hmangin dawr a kal pui ah ka sawm a, a hnial lo, a uncle angin min en a, ka lakah pawh a ngampa in min nel hle, mahse, zu ka lo nam deuh nen ka itna kha ka thunun ta lo a ni, dawr lama tlan pui lo in hmun reh lam ah ka tlan a, miin kan thawm an hriat theih lohna hmun ka thlen chuan ka sual ta a, mahse, ka hlawhtling lo, chu pawh, a ţawngkam pakhat vangin', ti leh in hah hmel zetin a thaw hawk a,ngun takin kan lo ngaithla ţhap. Ka nu phei chu a mittui a hru reng nghe nghe.

'Vivian khan, "i fanu i sual ang maw", tiin ţap chungin zawhna min zawt a, ka hlawhtling ţep  tawh, mahse, pa anga min en zia ka hria a, keipawhin ka duat hle, a kawr ka pawhthler te chu ka chul mam sak a, ngaihdam ka dil bawk, mahse ,ka rualin a let ve duh ta lo a ni. Lo phur haw lui ila Vivian kha kan chan lo ang a, a pa rilru a dam ang a, phuba lak a tum luata thil nunrawng tak a tih, pawngsual duhna leh thah hial duhna thinlung a put nasat avanga ka fanu chung a ţuan a ,ka fanu pawhin a theihnghilh ngai loh tur khawp a nunrawnna hi a thleng lo tur', a ti chhuak leh a, ka lo thaw hawk.

'Dawt i sawi lo tiraw?', ka ti hliai a, 'He thilah kher hi chuan ka nu hmingchhal meuhin ka sawi ngam, ka sawi takah te khan dawt pakhat mah a tel lo', a tih chuan ka thaw huai ,tualthattu fanu ka ni lo chu ka lawm a ni, mahse ,tinge hringnun ah hian, 'Mahse' tih thumal runthlak zet hi a awm fo le.

Thawk khat a veng a, lehlam ah thawpikna bawk a la awm si,ka chau hluah hluah a,hlimna chhete ka neih laiin lungngaihna erawh in min tuam mup lawi si!

Ka pa ka ngaihtuah a, a thil duh miah loh tur a fanu chunga a thlen miau avangin, a rilru na lutuk puakkeh in rilru fím a puttir thei lo a, a fanu tana a tihtheih sàng ber nia a ngaih hmangin ţan a khawh ve ni mai in ka hre ta, mahse, ka theihnghilhin, ka dam ta vek erawh a ni chuang lo, a dinhmun tur ka thlir a ,na tak leh tawt tak chungin a hun a hmang ţhin ang a, a fanu, Vivian thattu nia a ngaih ,Vijay lakah hma a la thei silo in ka lakah ţuan in khatiang khan a khawsa a ni.

Jail ah kal in ka pa kan hmu a, thil awmdan keimah ngeiin ka hrilh, ka la hlau a, thil thleng khan min la nghawng reng, mahse ,paltlang turin ka chak tawk a ni tih min hriattir turin Gabriel a awm a ,ka kiangah a ding tlat bawk, ani a awm vang chauhin huaisenna ka nei, mahse, ani chuan inngaitlawm takin, 'nangmah kha i chak tawk a, i harsatna paltlang a palzam thei turin theihna i nei', tih thu tawi te hmangin min nawr kal.

Ka pa pawhin ka lakah ngaihdam a dil a, mahse, dàn a awm miau avangin jail erawh a tàng tho dawn, ka nu mawlh ka lainat ,hetiang tehhrep buaina tawk tur hian tihsual a nei lo a sin mawle.

Vivian case pawh a kal leh a, mahse, kum hnih hnuah pawh an chhuichhuak thei lo, ka pa, Zothankima pawh jail aţang kan la chhuak tawh a, a rawn chhuak kha kan nufa in kan lo hmuak, kan in ah, a in ngei ah mai nilo,a fanu Vivian room ngeiah a lawmna kan buatsaih a,min hringtu ,Vijay leh a nupui pawh an rawn tel, chutah chuan a ni ka hringnun a ka hlimna ber mai alo thlen chu!

'Jebedi Lalrinmawi, i tello a khawhar a lungngai ţhin, i tel ve lohna chu ruahthimpui a sur ang mai a thim khup a suangtuah ţhin tu, nangmah ngai a khawhar leh lungleng a hun hmang ţhin, kei Gabriel Lalruatmawia hi min nei duh ang em?', tia ka hma a ţhingţhi chunga inneih puia min sawmtu chu ka thlir a, lawm luat avangin ka mit aţang a mittui chhuakin ka biang a luan huh a, hlim tak chunga kaitho in ka neih duh thu ka hrilh, ni e, ka hmangaih, ka Gabriel ngei kha a ni.

Rimawi, nalh tak, in tum ri riai riai karah zàm tak chungin ka pen lut a, ka hmangaih, ka engkim, hun nuam leh hun harsa min paltlang pui a, min hnem tu, hmel pà hràk, zún ngah, duhawm leh iaiawmna pakhatmah nei lo, ka tan chauh a par chhuak ţhin mipa, ka rohlu chu ka thlir a, min buk khum nghat. Min hrilh angin amah chauh ka ngaihtuah a, ka vel a mipui tlim hmur chu ka ngaihtuah lo, ka hmaa awm, ka ta chauh chu ka en a, zàm hauh loin ka ke ka pen zel, ka ban a min kuah tu, ka pa Zothankima chu bukkhum nghutin ka kut a la a, a ta ka ni tih ka thinlungin a pawm nghal thlap nia.

Inneih hunserh kan zo a, Pathian biakbuk kan chhuahsan chuan thawm ring tak, hlim thawm ni lawi si, ri mup mup ngaina ngai miah lo tan pawh a hlimawm, kan tan a hlim thawm min chhuahsak tute chu ka melh kual a, a phusa ber ah min er ţhin tu Ruatdiki a ţang hlauh!

Kan home naupangte an kim viau a, kan chhangchhe nak nak hle, zun leh ek cheh a, ţap rawng rawng thawm lah bo lo, mahse, ka hlimna an pawlh dal pha chuang lo, ka tana ni bik, chhinchhiah tlak ber, damchhung a ka kawppui ni tur a ka GABRIEL LALRUATMAWIA nen kan inneih ni a ni tlat, nau ţap te chu ngaihnawm ti em em in ka ngaithla nia mawle!

Mizoram, ka ramah ngei kan innei a, ka pa in min kailut in min hring tu, Vijay leh a nupui pawhin thilpek ţha tak min pe.

'Apa, EDWARD hian ka pum a lo tlawh leh tawh ania', tiin nui hak hakin ka pasal GABRIEL LALRUATMAWIA chu ka ko a, rang taka min hnaih vatin ka pum chhung a awm, kan kara kan fa hmasa ber tur, mipa ni tura a ruat nghal hmiah, a hming pawh a sak fel diam tawh chu a be nghal mawlh mawlh.

A fa, ka pumchhung a awm a, min tlawh dat dat ţhin tu, ka pasal in hmangaih tak leh hlim hmel pu sarh a a be mawlh mawlh chu thinlung lawmna a khat chungin ka thlir a, ka hlim ngawih ngawih.

Ka pum a na riai riai a, tawp mai lo in a na ta chiam, ka thlan a tla bat bat a, ka serh aţangin tui a put, ka kianga mu ka pasal ,Gabriel chu ka na tuar rum thawmah a lo harh a, hmanhmawh taka che vat in inhnuai ah a tlan thla a, kan in a min chenchilh a min puibawm tu, nu Faki chu mangang takin a ko, nu Faki rawn tlan vatin Damdawi in kan thlen hman a rin loh thu a sawi a, Gabriel-a hnenah chuan doctor ko mai turin a ti a, kei erawh an mangang phili buai karah ka in sehruh ngat ngat.

'Ţang nasa rawh Mate,a lo chhuak ţep ania', ti a nu Faki'n min fuih sauh sauh chuan theihtawp chhuahin ka sang leh vak a, ka fa, ka ril a rah, a pa nen a kan inhmangaihna aţanga lo par a lo piangchhuak chu a ţap chhuak raih raih a ,ka nà reng ka hrechang lo, 'fapa i hring a nih hi', tih nu Faki kà aţanga ka hriat phei chuan na tuar chungin a ri meuhin ka nui chhuak.

Ka bek, ka thlan vanga huh hliam mai chu min chul sakin min fawp tawk a, min hmangaih thu min hrilhin lawmthu a sawi sap, ka lo nui var var a, a hnu reilo ah doctor pawh a rawn thleng, ka inhliamna hnuhma te min buaipui zawh hnu in lawmpui na thu min hrilh a, keipawhin thinlung taka lawm chungin ka nuih var var.

Mizoramah kan khawsa a ,ka pasal pawhin a hnathawhna aţanga a khawl sa leh ka pa te pahnih puihna in sumdawnna bul a ţan a, kan khawsak a har hran lo,ka fapa ka neih aţanga thla khatna chiah a ni a, ka pa te chhungkaw hnih an lo zin dawn bawk a, phur taka insiam in Lengpui ah hmuah kan tum ani.

Kan chhuak ţep tawh tihah ka fapa in min zun khum a, nui hak hak chungin washroom ah inti fai turin ka lut a, Gabriel an nu Faki hnenah kan fapa Edward Lalchhanchhuaha hlan in min rawn zui lut ve vut, ka insil rak rak lai chu min kuah hlun a, hun lo ti lutuk in ka phun hlak.

'An tupa duat vangin kan tlai dawn ta sa sa, vawikhat chauh chu', ti a nui hawkin ka beng a seh ner ner a ,nupui in a tihtur pawimawh tak tiin ka pasal, ka hmangaih, ka fapa min pe tu, ka GABRIEL LALRUATMAWIA ,hmangaihna awm zawng zawng min pe a, hlimna leh lawmna min petu chu phur sarh in ka lo dawngsawng vat a, tisa chakna meipuiin min chhem alh laiin ring takin ka pasal mobile a rawn ri ral ral.

Ka nui chhuak hawk hawk a, Gabriel erawh a phun hluk thung, 'hun lo lutuk, zanah kan chhunzawm ang', ti hlukin a chhuak vut a,phone call lo kal pick-up in kan chhuah tur thu a hrilh mawlh mawlh, kan lo tlai tawh takzet a nih hi, keipawh ka kekawr ka thlak sawk sawk a, rang takin ka um thla ve vat, kan fapa pawh nu Fakin a lo thlak fel diam tawh a, duat taka pawm in kan chenna in kan chhuahsan.

'Ka tupa ,ka tupa duhawm Edward', ti chúl a ka nu leh pa bakah, ka pa Vijay te nupa in pawm an inchuh lai chu ka pasal nen inkuah rialin kan thlir dun a, kan tan hian khawvel hrehawm hi ava parmawi bik si ém!