DETECTIVE GENEVIEVE(ZAWH TAWH)

DETECTIVE GENEVIEVE-I HNUCHHUINA

Ka pen hum chu ka seh neuh neuh a, ka sam ka tuai leh thuak ţhin.

Jenny pawngsualtu leh thah tumtu nia Jenny'n a sawi hi a pianhmang takngial pawh kan hre lo chu a ni a, ka ngaihtuah ngial pawhin ngaihdan neih harsa ka ti viau.

Jenny hian dawt a sawi a ni thei ang em tih ngaihtuahin ka cigarette ka ţan a, ka mit chhingin ka sî ham ham.

Thawm bengchheng tak ri rawk ka hriat chuan ning zetin ka thaw hawk a, muangchangin ka meng riai riai, ka assistant Zothana a ni, office kawngkhar rawn su hawng deuh pawpin a inkhai bawr ţûn a, thawveng zetin a hla phuahchawp sâ-in a rawn zai lut lawng lawng, tûr deuh khài a ka lo melh a hmuh chuan a zai lai pawh a zuih ral riai riai.

'Ka Boss hmel ţha leh thinchhia Genevieve hian a thluak a lo hmang leh chiam tawh a ni maw?', tiin a ţhu a, pizza a rawn phawrh nghal zat.

Chhan pawh ka chhang peih nek lo ve.

Ka mit ka chhinsan leh a, a chek tlat tlat.

'Gen, titeh, ngaihtuah vak tur a awm lo, Jenny kha pawngsual a ni lova, lem a chang bawk, a chiang reng a lawm, eng ang a mangang pawhin awm mah se a sualtu chuan a hnaihchilh a ngai a, a pianzia chu a hamhaih leh a hlauhna a nasat avangin chîk lo mah se a sam a zuah buk dan tal chu a hre tur a ni. Engmah, a sam rawng takngial pawh sawitur a hriat loh kha, a mitmeng a hlauhawmin a sen rûm tih bak', a ti hlut a.

Ka ngaihdan erawh a dang daih thung.

Lemchang niin ka hre thei tlat lo.

Hmeichhia ka ni a, dawt a sawi a ni emaw lemchang ni se ka hre tur a ni. Lemchang leh ti tak tak hrehrang lo tur khawpin ka â lova, ka nú hek lo.

Ngawi tura hrilhin pizza chu banin ka ei a, a tui kher mai.

A tuina hriatfiah leh zual tumin ka mitchhingin ka lem a, ka lem fel rual rualin ka thluak a vir nghal zawk.

'Ka ei duhzawng tak mai chicken pizza ka ei a, ka eipuar hnu rei pawh la ni lo-ah ka muhil, ka vài riai mai a, ka mangah chuan duhthawh taka mipat hmeichhiatna hman pui ka lo ni a, chiang lo riaiin ka harh, ka harh tak tak nge ka mumang zel tih ka hre thiam lo, muhil niin ka inhre si lo, chiang takin ka sawi thei lo a, a ni nuai nuai vek, min khawihtu pianphung leh pianzia pawh ka hre lo, mitmeng rum tak, hlauhawm tak a nei a, a sen rûm bawk, kha mitmeng erawh kha chu tun thlengin chiang takin ka la mitthla thei.

Ka harh chuan ka mut dan ngai ngaiin ka lo la mû a, thawmhnaw pawh ka inbel fel thlap, mangchhia satliah a nih ka ring, ka zun a chhuah avangin bual in lamah ka lut a, chutah chuan sex hman pui ngei ka niin ka hria, ni lo, ka chiang a ni, mahse ka chiang ngam lo', a ti a nih kha.

A thil ei turah damdawi an pawlh a ni ngat mai.

A chunga pawngsualna a thlen hun aţanga thla hnih lai a liam hnuah chauh min rawn pan a ni a, chupawh nau a lo ken avangin! A pasal hualin a hre si a, thup theih a nih tawh loh avanga sawi chauh a ni. A taksa kha damdawi hmanga tihzawi lo ni tehreng pawh ni se khawl hmanga hmuh theih a ni tawh lo, bu nghat nghatin ka nui var var a.

Ka nuih chhan hre hauh lova ka assistant Zothana lo nui keh hui chu en in a ri meuhin ka nui chhuak a, mak min tih hmel zeta min en hû ka hmuh chuan ka mit ka siai deuh sak.

Nui hmel ka pu khat ve bawk êm a, a awm ve reng mai.

Hmeichhe vawt tak tia an sawi Genevieve Lalzarzo-i ka ni tlat.

'A ri meuh a za taka i nui ka vawikhat hmuhna,' a tih sap chuan ka nui tawp riai riai a, ka nunhlui ka mitthlaah a rawn inlar dawt nghal zut.

'Hmanah chuan mi hlim thei em em ka ni a, za takin ka thinlung chhungril ber aţangin ka nui ţhin, tunah chuan', tia ka thusawi ti tawpin ka room bik lam ka pan a, kawngkhar kalh a ka ţhut fel veleh ka mittui a far kauh kauh, ka sam ţâm zet pahin thawk ka la hap a.

Naupangte ka nih lai khan za takin ka nui ţhin, ni e, phatsantu nunrawng ka tawn hma kha chuan.

Va pawh tawh lovin ka awm ta reng a, tlai lam dar nga a nih chuan mit hnawm deuh chapin ka chhuak a, a lo muthlu bawrh bawrh, kaiharhin haw turin ka ti a, a zîk mar ar ar hnu a min en chuan ngaihţha vak lo hmel pu in a âng deuh zuk a, 'zawhna ka duh lo', tiin ka lo khap vat, a kâ chu a chip leh ruai ruai a, ka bag leh ka mobile banin lo kalh fel mai tura ka tih hnuah ka chhuahsan.

Haw pahin Jenny ka tlawh kawi ang ka ti deuh naa ka haw tlang ta mai.

Mood ka nei tlat lo.

Ka in ka thleng a, lut a ka intihfai zawh hnuah fridge aţanga beer la chhuakin ka khumah ka ţhu a, ka laptop phawrhin ka tih fo angin folder pakhat ah ka lut a, thlalak fiah lo riai chu hmet chhuakin en pahin ka beer chu ka dawt khalh khalh, ka pum a hik thla riai riai a, min ti hahdam sawng sawng mai.

Kum hnih liamtaa case pakhat ka chhui laia ka hun tawn ka ngaihtuah let a, thingtlang khaw te takte a tualthihna chungchang a ni a, a hunlaia ka thiltawn te ngaihtuah chhuakin ka lung a leng takzet.

Ka thih teuh zia te ngaihtuahin ka nui var var a, mahse, ka nunna chân lova tun thlenga nungdama ka la awm ve chhan thingtlang tlangval mi dik, ram lam hna a thawh nasat avanga pawr deuh fap mai, pa taka nui deuh sak ţhin, min thah tumtu min thal sak hnu-a min kaitho tu, kut thap deuh hrâp mai neitu Ruatsaka chu ngaihtuah chhuaka ka mitthla a chamtir chungin ka nui tawp riai riai.

Ani nen khan hun rei pawh kan inhriat hma hauhin kan induhtawnna kan lanchhuahtir a nih kha.

Mipa ngaihsak ngai lo, hnuchhuina lam a mipa te tluk tum ran hmeichhe luhlul zet thinlung ti tuiral theitu a ni miau a, a hlutna a sang takzet.

Mahse, phatsantu tiin ka hre reng lawi!

Duhthawh fahran a hmeichhia nen a an khawsa dun lai video ka hmu miau a, 'tihpalh hi a awm lo a ni,' tia sawi ţhintu kei hian ngaihdamna rilru a lakah ka pu thei tlat lo.

Zawhfiah lah ka bat a ni hek lo, dawt hmanga insawifiahna ri bak a chhak chhuak lovang, mipa diktak a ni takzet a nih chuan a tihsual a pawm ang a, chu zawng chu.

Ka hna ber ka thawk zo tawh miau a, ka haw san aţangin ka sim card number ka thlak nghal hmak a min biak ngaihna atan a awm lo, social media lah a hun laiin la khawih lo a, ani pawhin a khawih ngai bikin ka hre lo, kan inbia in kan inhmu tawh lova, mahse, tun thlengin ka thinlunga a hming ziaka awm hi nawhreh harsa ka la ti fo.

Thinlung chhungril bera fiah taka ziaka awm tur hian hun rei a lo ngai hauh lo, hun hlu tak vawi khat hman dun lek pawh a tawk viau tih ka hria, darkar khat, ni lo, minute khat lek pawh ni se.

Ka ngaihtuahna chu duh lovin ka laptop ka khup thawk a.

Vawi khat chiah ti a phun sapin ka hawng lehnghal zat.

Video clip tawite chu a vawi engemaw zat na atan ka play leh a.

Tlang thengthaw nuam tak a ni a, phûl in a bawh a, thlifim a thaw heuh heuh tih hriat takin hmeichhe sam dum hlap, sei ngil sang mai chu a leng sang sang a, rál aţanga thlir pawhin hlimna in a luahkhat tih hai theih loh khawpin a nung sarh a, a kianga mipa awm ve lakah chuan a innghat viau tih lah a hai theih loh, mipa awm ve pawh chuan lungawi hmel takin chu hmeichhia chu a pawmin a kuah hlu hlu a, camera lam hawi a engemaw sawi a phun supin a kiai suk suk bawk.

A hunlaiah chengin ka nui var var a, video a tawp rual erawh chuan ka nui hmel tawpin lungngaihna in min bawh leh nghal, Pathianni tlai lam a ni a, ka case khawih lai a zo tawh, ni lo, khalai hmun a ka hlín tur chu ka hlîng tawh, Aizawl lama ka let a hun tawh a, mahse, ka nun a mipa awm ve chhun ka tawn vang nge ka tihdan ni ngai hauh lovin ka châm a, ni khat lek kha chu a pawina lah ka hre lo, an khaw chung lam tlangah khan kan leng dun ve kha a ni a.

Inhnaih taka awmin kan titi sap sap a, ka nun a thil awm thar, ka la tawn ngai loh a nih avangin ka hlimin ka lung a awi kher mai, a kut thap hrap mai te kha deh nuam ka ti a, kan titi kar laka min tih nuih na atana fiamthu rawlh zeuh paha a kiai suk ţhin te khan min lêm ngawih ngawih a nih kha.

Ngaihtuah zawm duh lovin ka inthing harh a, tho chhuakin ka hmai chu tui vawtin ka theh ţhat ţhat, chokaah lutin fridge ka hawng a, tui vawt ka dawt khalh khalh, zanriah atana noodles rin leh mai tumin ka noodles ho ka dahna chhuar pawhdawh ka hawng a, spicy noodles ka lak chhuah rualin ka mobile a ri ral ral.

Mut pindan lamah ka lut leh a, min call tu ka en chu Inspector Marama a ni.

'Hello', ka ti sap a, 'i inrawlhna tur chi, ruang kan chhar', tiin a rawn thaw hawk.

An ruang chharna hmun vel zawh pahin ka mamawh tur ka ban khawm vat vat a, rei insiam na atana hun hmang lo-in ka chhuak vat.

Ka Bike in chak angreng takin ka tlan a, ni a tla tawh a khua a thim lek lek tawh, rei fe ka tlan hnu-ah Zemabawk ka thleng ta bawk a, kawng pawh a thawl ţha tawh viau, chak lehzualin ka tlan a ruang an chharna hmun bawlhhlawh paihna ka thlen chuan Police paruk vel an lo awm laih a, mipui pawh sawmnga awm vel chu an lo ri ve mam mam bawk.

Hnaihchilh vatin inspector Rama ka pan vat a, min lo ngaihsak vatin an ruang khuhna chu a hawng a, karei maw! A ruang chu a nam lek lek tawh, a thihna hi ni hnih ţha tal a ni tawh ang.

Hmeichhe tleirawl tê a ni tih a hriat theih a.

Kutkawr bunin ruang chu ka tuai let kual vel a,

A rim chu tawrh a hrehawm lek lek, a lû-ah hliam a tuar nasa viau bawk.

A chal a kak a, a tukkhum a dûp dul mai bawk, a kawr hak chu a thler sung a, a taksa hnuai lam phei chuan khuhtu pawh a nei lo, ka chek tlat tlat.

Ka thil huat ber mai Pawngsualna a tel ka ring nghet hmiah.

Pawngsualna tih thumalin ka ngaihtuahna a luh rualin tha na fe in ka thaw hawk.

Chik lehzualin ruang chu ka bel leh a, a ban leh mal te chu a duk thluah a, a nghawngah rehna hnuhma a val kual raih bawk, a tal ve nasat dan tur ngaihtuahin thawk ka la leh hawk ţhin.

Ka duhtawkin ka belchiang a, a hliam hnuhma vel chu ka mobile phawrhin thla ka la bawk, Inspector Rama chu hnaihin hmuh dang an neih leh neih loh ka zawt a, sarang pakhat min pek chu ban vatin ka hawng a, bracelet mawi tak a ni.

'He thil hi a lo hum a,' tiin min hrilh a, mak ka ti viau, ama ta ni se chu a bun awm si a, tualthattu ta ti dawn ila mipa ngei a nih ka ring si, a chhan chu pawngsual a nih ka ring tlat miau va.

An inchai na velah a phelh ti dawn ila chutiang chu ni se bracelet kha chat awm tak a ni a, him pialin a hum lawi si.

'He case hi ka chhui dawn chuan he thil hi kawl ka duh ang', ka ti nghat a, 'titeh, Detective Genevieve, khawlh viau lo teh, kan thawh ho dawn chuan kan station aţangin le', a tih chuan ka hnâr ka tum dat.

Mahse, inhnialna hun a ni rih lo.

'Ruang hmutu hi ka be duh', ka ti leh nghat a, thil an zawhfiah tawh thu leh a tuk lama station a an koh thu a sawi chuan ka bu nghat, a nau te hnenah ruang chu postmortem tura Damdawi in lama thawn tura a tih zawh hnuah thil thlen dan chu min hrilh mawlh mawlh a.

'Ruang hmutu hi Lalnunmawia niin Tuirial a khawsa a ni a, chhungkaw harsa tak anni, a nu leh a pa hi zu ngawlvei ve ve niin hmanni deuh lawk khan an thi tawh a, ani hian nau pahnih neiin a enkawl a ni, mi fu tui leh thei rah leh a hmuh ang ang hlawh neiin a zawrh ţhin bakah bawlhhlawh paihna hmunah hian thirchhia zawngin a hralh ţhin bawk a, mipa naupang kum sawmpahnih mi lek a ni.

A thil zawrh tur neih ang ang a hralh zawh hnuah thirchhia zawng turin a kal leh a, bawlhhlawh chitin reng a hai na lamah chuan air bag palin a tlu palh a ni awm e, a air bag pal chu a en a, a la ţhat hmel viau, tihfai a hman tlak a la nih beiseiin a hawng a, a chhunga hnawmhnawk awm chu bunruah a a bag a chu hawn a tihfai a tum a ni, mahse, hmeichhe ruang a lo awm ta si a ni awm e, mangang takin kawngah a chhuak chho a, Tuirial lamah tlan vatin puitling a hmuh hmasak ber hnenah a thil hmuh chu sawiin min rawn phone ta a ni', a tih chuan ka bu nghat nghat a.

'Chuti anih chuan station a ko lovin naktukah a chenna hmunah thu zawt fiah turin kan kal chilh tur a ni ang', ka ti sap, a bu ve nghut nghut a, a lo ngaihtuah ve tho thu a sawi chuan ka ner ru sak. A tirah station a ko buai lova an pan tur thu hrilh mai awm tak a ni.

He Inspector Rama hi ka mil thei thlawt lo, ka laka a sualna ka hre lova, mahse a hawiher aţang hian ka mil lo ve tawp, hmeichhe zia an sawi zinga ţha lo pakhat mi ngei ve tawp zia hi ka nei a nih ka ring.

Ani pawhin min nel teh hurh bik lo tih ka hai lo, mahse, hnuchhui lamah an chak tawk lova, case tenau aia sang hret-ah chuan thawhpui turin min ko ziah. Min ţangkai pui rualin ţangkai puina zawn ka nei ve tho, ka hnuchhui na kawngah an thiltihtheihna ka hmang ţangkai ve tho mai.

Kan inmamawh tawn a, kan inmil chuang lo tihna anih chu.

'Naktukah chuan helaiah hian kan inhmu leh mai dawn nia', tiin ka bike ah ka lawn a, min chhanna pawh nghak lem lovin ka tlan chhuak daih, darthlalang aţang chuan a lu a tuai vut chu ka hmu a, ka nui sak, ka chezia chu a mawi lo tih ka hria, mahse, he pa hi chu runluih ka chak ngawih ngawih ţhin, hmeichhe inthunun thei tak ka nihna hlohin a kiangah chuan ka awm ziah a, mak ka inti viau a chu a pawi pawh ka ti hran chuang lo.

Ka haw kawngah zanriah tur ka lei haw nghal a, ka in ka thlen chuan ka chau ve takzet.

Intifaiin ka eitur lei haw chu ka ei nghal a, tam pawh ka ei thei lo, kha ruang rim leh a vela bawlhhlawh rim khan ka pum a ti no nghulh mai, fridge a ka dah beer chu la-in ka kheuh hawng a, ka khumah ţhu mu pahin ka dawt khalh khalh.

Ka rilru tih thawven tumin ka mobile a ka games neih ve chhun candy crush chu hmet chhuakin ka khel a, level harsa tak a ni.

Rei fe ka beih hnu-ah pawh hneh thei lo bawkin ka out leh a, whatsapp leh facebook group velah lut kualin chanchinthar an post chu ka chhiar leh zawr zawr a, ruang chhar chungchang pawh an chhuah hi.

A hming leh a nihna hriat a la ni lova, postmortem result ah eng nge kan hmuh ang ka hre lo, mahse, he tualthattu hi ka hling ang a, a mipatna hmanga a nunrawnna a lantir a ni tih a chian vaih chuan hremna na thei ang ber ka pe ngei ang tih erawh ka chiang.

Cigarette pahnih ngawt ka zuk ral hnuah light off in muthilh tumin ka chhing riai riai a.

Ka khum kiangah chuan pa lian ve tak mai hi a lo kal hnai chhut chhut a, zu rim a nam huam huam  bawk, hlau em emin ka khur bap bap a, 'aih, ti tawh suh, khawngaihin', ţap pur chungin ka ti bah niai.

Ka thusawi chu ngaipawimawh lo tih hriat fe hian a nui huah huah a, a rapawm takzet.

Min hnaihchilhin min nghaisa a, ka hmaiah bengin min hnek dawt dawt bawk, ka chunga nunrawng taka a chet hnuah a inha ţha mual mual a, mahni inten zetin ka inkuah khawr hlãn mai.

'Ramhuai ai pawhin i nunrawng zawk', ka ti sap a, a rum nghut.

'Hrep tak che hian Genevieve,' ti vin ţhakin a bul dawhkan a chemte chu a la a, min hnaih ruak.

Dim lo leka ka pum sir lam a vih hrawih rualin ka ţhu chhuak hlawl a, thlan in min bual huh dap.

A hunlai a zan tin ka tih ziah dana cheng lehin hlau taka hawi kual ruai chungin ka ţap khur ngawt ngawt.

Kha hun kha ka theihnghilh leh tawh ngai lovang.

Kha hun kha chu liamin ani khan min tina thei tawh lo.

Mahse, ka nun a sawp retheih em em chu duhtawk lovin zantin ka mang ramah a rawn inlar ziah a, rapthlak takin min khawih ţhin.

Ka hlau a, hlauhna satliah a ni lo, ka hlau ngawih ngawih.

Mahse, chu mangchhia runthlak em em chu ka hnawt bo thei si lo.

Ka khumah chuan ţhu tawm kákin ka kut ka suih a, tih takzet a ţap chunga ka thiam ve ang tawka ka ţawngţai zawh hnuah ka khum sir pawhdawh a ka dah damdawi chu la chhuakin ka hmawm a, tui ka in khalh khalh.

Mangchhia tel lova zan khat chauh, zan khat chauh tak tak muthilh theih tluk a thlakhlelh ka nei lo.

Zing lam dar 3 rik hma deuh chuan ka muhil leh siar siar a, rei muhil lovin dar 5 velah chuan ka harh leh var tawh.

Ka ha te nawtin ka inphihfai a, ka tih fo danin insawizawi turin ka in chu ka chhuahsan.

(CHAWHNU DAR 1:00 PM)

Bawlhhlawh paihna hmunah chuan ka ding a, rei ka awm hma-in Rama te pawh an rawn thleng nghal vat, Tuirial lam panin kan inkhalh chhuak a.

Ruang hmu hmasa ber tu naupang Nunmawia te inah chuan kan ţhu khap a, Nunmawia chauh ni lo, a nau te naupang kum 4 mi awm lek pahnih te chuan hlauh hmel fe a min enin an u chu an bel ve rak rak a, an lainatawm viau.

An chawhmeh tura ka kensak thlai leh sa bakah pawisa tlem azawng chu Nunmawia kutah ka hlan a, Nunmawia'n a a pun tlangval police te call tu chuan dawn sakin lawmthu a sawi vei luam a, ka lo buk khum nghat nghat.

'An inluah neitu te fapa hi ka ni a, ka hming chu Rosangpuia a ni, khatia thlaphan hmel taka Nunmawia rawn tlan hlawk hlawk kha lo ko dingin thil awmzia ka lo zawt a, ruang a hmuh thu a sawi tawp, ka nu leh pa ka hrilh hnu-ah naupang thusawi mai a ni a tiin police ka call hmaa va fiah phawt ţha-in kan hria a, ka ţhianpa kan ţhenawm lawk ami Ramsanga hi sawmin kan va kal a, ruang chu va hmuin police kan call ta a ni. Police te rawn thlen hma chuan lo khawih duh lovin ruang bulah chuan kan lo nghak a, chu zawng chu a ni", tiin a sawi a.

Thu danglam bik a awm hran lo bawk a bawlhhlawh paihna chhehvelah rinhlelh tur ang hmel an hmuh leh hmuh loh te kan zawh hnu chuan kan chhuahsan ta a.

In aţanga kan chhuah fel rual chiaha Rama mobile ri ral ral chu kan ngaichang a, kan rin ang chiahin postmortem result a chhuah tawh thu an lo hrilh a lo ni.

Result lam turin kan test tirna hmun Civil Hospital lam panin kan tlan chhuak a, Bawngkawn ka thlen phei chuan ka mobile a rik avangin kawngsir remchangah dingin ka pick up a, ka assistant Zothana a ni.

'Nizan lamah ka khua a sik hluah mai a, ka tlun vei rawl nen mut ka hmu meuh lova, buai viau inih loh chuan rawn chhuah loh mai ka duh deuh', a rawn ti nuah nuah a, a pawi loh thu hrilhin ruang chhar a nih thu a hriat leh hriat loh ka zawt nghal a, a lo hre ngei e.

'Aw a ţha e, inenkawl ţha la, i dam chian var hunah i rawn kal dawn nia, ruang chhar chu i hriat tho chuan kha case kha kan chhui ang', ka ti a, aw min pawh vat, kan inbiakna kan ti tawp a.

Ka bike start a ka tlan leh chuan ka ding dawt, ka sir a step awm lam chu ka melh vang vang a, amah kha a ang takzet.

Ni lo, ka chiang a ni, ka mitin hmu chiang lo mah ila ka thinlung hian a hre chiang, amah ngei a ni.

Bum tu, phatsan tu, amah Ruatsaka ngei kha!

Ka dinna chu mi dawr kawt a nih avangin inthing harhin ka tlan chhuak leh ta a.

Result pawh hrilhhriat ka ni ve tawh a.

Ka rin lawk ang chiahin kan ruang chhar chu pawngsual a nih hnuah thah a ni, hah zetin ka thaw hawk ringawt. 

Naktuk lamah chuan tunge a nih pawh hriat a ni tawh mahna le.

Hahdam tum taka mu paha nunhlui ka chhui kir rauh rauh lai chuan ka mobile a ri ral ral a, peih lo zetin min call tu pawh en mang hlei lovin ka pick up a, ka ţhu mar zawt, ruang dang leh bawk!

Kan case neih sa pawh kan la ţan tak tak hma-a ruang dang chhar a ni leh chuan min ti lunghnur kher mai, ka tho vat a, sana ka bih zeuh, zan dar 8 a ni tawh, a hmun ngaiah bawk a ni. A hmaa ruang an chhar dan ngai ang chiahin.

Bawlhhlawh paihna lam pan chuan ka inkhalh phei leh a, kawng a thawl ve tawh deuh bawk a hun ka hmang rei vak lo, ka va thlen chuan police paruk vel an lo awm bial laih a, a hma ami ang chiah, light hmanga ên in ruang chu ka bih chiang a, a hma ami nen a danglam lo kher lehnghal. An danglamna chu chu nu chu nutling tawh a ni a, a hmel pawh a chhe vak lo thung, a nihna hriat a harsa lo ang chu.

Chu mai a ni lo, a hma ami ang chiahin a kutah Bracelet bawk a lo hum, a hma ami ang chiah tho a ni.

He tualthattu hian a sign ah bracelet a hmang a ni, ka hawi kual a, kan chhehvel chu ka mobile light hmangin ka en kual bawk, a en thui lo kher mai, mahse, kawng chhak lamah thingkung phenah chuan hlimthla phe vuai ka hmu tlat, ka hlimthla hmuhna lamah chuan tlan vatin helamah tiin ka au ţhat a, mahse, ka va thlen chuan engmah ka hmu lo.

Ka hawi kual ruai a, thawm ri rek pawh ka hre lo.

Mak tak maiin ka lung a phu dawt dawt a, hlauh vang leh hah vang a nilo, hetiang a ka lung a phut chuan chhan pakhat chauh a awm thei, ka kianga Ruatsaka a awm hnaih chauhin heti hian tihdanglamin ka awm ţhin tih ka chiang.

A thim avangin ruang awmna lamah ka let leh ta ngawt a, hmuh ka nei em tih min lo zawt sap sap.

Hlimthla phe vuai ka hmuh thu sawi duh lovin ka mitvai anih ka rin thu ka sawi ta ngawt a, ruang chu thla kan lak leh hnuah hospital lamah kan thawn leh.

An ruang hmuh dan te ka zawt luam a, hnuhma engemaw hmuh in beisei a an kal thu leh ruang an hmuh leh si thu a sawi chuan ka bu nghat nghat.

A tuka enfiah leh tur a intiin haw tum angin ka tlan a, mahse, tumah hrilh lo mah ila ka in a haw tlang lova let leh ka tum ruh khawp.

Kha hmunah khan chàn chhuah engemaw tal ka neih ka ring bur.

Zuangtui peng a waiting shed-ah ka ţhu ran a, zan a tlai telh telh a vei vak pawh an awm vak tawh lo. Cigarette ka zu sek sek a, tlawn 3 lai ka zuk zawh hnu chuan sana ka bih a, zan dar 12 a lo ri tawh, a hun vel chiah e.

Ka bike nen chuan ruang chhar na hmun chu ka pan a, thlen thlak hma deuh kawng kawi ah chuan ka hung a, ke in ka chhuk thla ta a.

Vei vâk an awm pawha ka hmuh chian theihna tur kawng chhak lam thingkung phen deuh chuan ţhuthmun ka rem a, bawlhhlawh paihna hmun chu ka en ngar.

Rei fe ka ţhu tawh, a reh churh churh a, ka mut pawh a chhuak lek lek mai.

Inthingharh hramin varţian thleng tal chu awm ka tum ve ngar a, ka mobile la chhuakin ka hmet eng zeuh a, zinglam dar 3 a ri der tawh nia.

Engmah hmuh chhuah tur awm si lo chu ka thin a rim hlur tawh.

Ka thaw hawk a, zik mar tumin ka tho ţuah ţuah a, ka ke a mu chuah chuah nia, ka ke mu churh churh mai ka chum nawk nawk lai chuan ka hnung lamah thawm ri rek hriain ka ding ngil zawt a, ka hnung lam en tumin ka vir zawk, mahse ka lû a ri chawrh a, a hai nghal chhawlh, ka pai nak a, ka awmna hmun chu tlem a a awih ve deuh avangin thui lo te ka lum nghe nghe.

Inbengkan tumin ka bei ngial a, mahse a har lam hret. Ka luhai hian min tibuai deuh tlat.

Min vaw tu chu ka lam panin a rawn chhuk a, 

'Tunge inih', harsa ti fe-in ka lo ti chang fak.

A nui hawk a, 'i mi zawn lai ka ni', a tih thum chhak chuan ka thaw hawk a, a hma aia nasa in thawh tumin ka bei leh, min khawih zui tum lovin min en ngur tih ka hria, nghet vak lovin ka ding a, ka hma a ding chu hmuh chian tumin ka mit ka khap fak, mahse, ka lu chu a la hai lû a ni, ka hmu phê riai a, ka luhlul chhuaha nghet lo taka ding luiin, 'i zalen rei tawh lovang', ka ti a.

'Detective Genevieve, nang hian hremna min pe thei lovang, i inngai ropui mah mah a ni,' nui hawk a tiin ka lu ah bawk min vaw leh chawrh, ka tlu leh hnawk, min hnungchhawn a kal a tum chuan 'Ruatsak' ka ti sap a, a ding dat, amah ngei a niin ka hre tlat, a hmel ka hmuh theih loh nan mask hmang mahse a mitmeng kha ka hria a ni, a aw lah Ruatsaka aw a ang ka ti a, mahse, a ţawng ve chhun kha thinrimna in a pawlh vang nge ka chiang thei lo, hun kan hman dun ve lai reilote-ah khan a aw a zaidam viau ţhin, a thinrim râwl ka hre tlat lo, thim viau mah se thim zinga ka awm rei tawh avangin ka hai ka ring hauh lo bawk.

Chu mai a ni lo, a bulhnai a ka awm apianga danglam ţhin ka lungphu kha a aw ka hriat rual khan danglam lehin a su dup dup a nih kha. Ka hlauh vang zawk nge? Min en tawh lovin, 'phatsantu chuan a thiltih man a hmu zel ang, tumahin min dang lovang, nang pawhin', tiin a pen sawn vut a, ka khaw hmuh a thim ta mup.

Ka harh leh chuan Damdawi in khumah ka lo mu bam a, ka lu chu an tuam tih ka hre thei, ka taksa dangah erawh harsatna ka nei lem lo a ni ngei ang, ka mutna kiangah police pakhat a lo ţhu bawk, a hming ka hre lo naa Rama nau te zing ami a ni tih ka hria. A hmel ka hmu tawh tlat.

Ka harh tih a hriat veleh ka ţhat leh ţhat loh min zawt vat a, ka ţhat thu hrilhin tui ka dil vat.

(JONATHAN LALREMRUATA POV)

Kha detective khan engvanga ka phirpui hming a min ko nge a nih chiang takin ka hria, ka phirpui ngaihzawng hlui a ni miau a, Ruatsaka hretu chuan amah emaw min ti fo ang.

Danglamna kan nei tlat lo.

Kan mizia tih loh chu.

Jonathan Lalremruata ka ni a. Ka phirpui erawh Lalruatsaka a ni thung, kei chu Jonathan, tlangval hausa ka ni a, hmeichhe lama lerh ve tak ka ni, ka unaupa erawh tlangval rethei leh mi dik, lumna ngah tak, hmeichhe ho-in mipa diktak an tih ang hi a ni, midang pawisawi hlau tak chungin a ţawng duhin midang hlim na atana fiamthu han thawh te hi a hreh lova ,kei erawh ka tak rún reng, Ruatsaka bulah lo chuan ka nui khat viau bawk.

Ka unaupa kianga hun ka hman erawh chuan nui ngai lo Jonathan pawh a nui ţhin. Ka unaupa mah ni se mibik ka ti lo thei lo.

Ka nau pindanah chuan lutin hahdam lo tih hriat taka a muhil chu ka melh vung vung a, a muthilh lai ngei pawhin kha phatsanna khan a vaw na tawk tih hriat takin a mit aţangin mittui a luang ngiai ngiai mai.

'Hetiang tehhrep a tawrh tir tu che hi a nat theih dan zawng zawng a ka tihnat kim a, ka chaih buai fe hnuah ka that ngei ang unaupa', tiin ka phun sup.

Ka sawi satliah a ni lo, ka ti ngei ang.

Bumtu, phatsantu Genevieve, inring nasa rawh tiin ka rilru in kan detective-i chu ka vau mawlh mawlh a.

Ni e, ka ti ngei ang. Ka unaupa hringnun hremhmun a siamtu hi zalen tak leh hlim taka a khawsak ka rem ti thei tlat lo.

Ka neih chhun a ni si a.

Ni e, a mak inti mai thei, kan dinhmun inang lo hi, fahrah niin hnuchham enkawlna in ah dah ka ni a, vanneih thlak takin mi hausa tak chhungkua in fa atan min la a, phirpui ka neih ka hre ngai lo. Mahse, khawchhak lama thingtlang khaw pakhatah ka pa sumdawnna buaipui a ka zinna ah ka phirpui chu ka hmu a, danglamna kan nei hauh lo, ani chu mi rethei chhungkua a ni a, lo nei mi anni.

Ka rilru a nuam thei ngang lova, amah hmu a be pawpin kan thisen kan test kha a ni a, a lo inmil chiah.

Chutah chiah chuan fahrah ka nih ka inhria.

Ka thisen zawmpui, ka unaupa ka hmuh avangin ka nu leh pa pawhin thu dik an thup thei ta lova, chutiang bawkin Ruatsaka nu leh pa pawhin, thu dik kan hriat hnu pawhin kan nu leh pa te ve ve chu thlauhthlak a hran san kan tum lo ve ve.

Min enkawl seilian a chhungkua min pe tu an ni miau a, kei chu nunphung pangngaiin ka kal mai a, mahse, ka unaupa chu a ţha reng ve tlat lo.

Hmangaih a tawng a, amah Genevieve hi, ani ngei hian a ni ka unaupa ti na a mi â ang mai a chhuah a, natna pe ni.

Ka ngaidam lovang.

(GENEVIEVE POV)

Ka chunga thil thleng chu Rama ka hrilh a, a chek tlat tlat, mahse, hliam tuar mah ila tualthattu ka rinzawn thei tawh a, hmasawnna chu a ni tho e.

Zan khat ka riah hnuah damdawi in aţangin ka chhuak a, ka assistant Zothana pawh a la dam hleithei lo, chawl rih tur leh inentir turin ka la ti tawp.

Ruatsaka chu tualthattu ni turin ka ring phal lo a, a tih chhan tur lah hmeh bel tur ka hre hek lo.

Phatsantu a huat thu a sawi a nih kha, amah ngei pawh khan min phatsan a, engvangin a anpui chu a huat viau.

Kan ruang chhar pawh a nihna kan hre tawh a, a ngaihzawng chenin.

Kan ruang hmuh hmasak zawk chu Vivian Lalhrilliani a ni a, kum 18 mi lek a ni. Ngaihzawng neiin a ngaihzawng chu Rosangpuia a ni a, Rosangpuia sawi hmangin a ruang chhar a nih hma karah an inzawmna an chhu chat a, engdang vang ni lovin Vivian chuan ngaihzawng dang a lo neih san vang a ni.

Kan ruang hnuhnung zawk chu Pi Lalremruati a ni a, kum 40 mi a ni, ani erawh pasal a nei tawh, Chanmari a khawsa an ni a, ani pawh phatsantu niin a pasal a uire san a ni.

A pasal Ramdinpuia erawhin uire san a nih a inhre lova, mahse, rinhlelhna erawh a lo nei a ni awm e.

A chanchin kan chhuina lamah a mobile kaltlangin a ngaihzawng tlangval la naupang tak Samuel Lalawmpuia pawh kan chhui chhuak a, pasal nei lai a ni tih hre reng chungin inzawmna a lo neih pui.

A nupui ruang a hmuh hnu lawka uire san a nih a inhriat leh na chuan pu Ramdinpuia pawh a vaw na tawk tih a hriat kher mai.

Kan ruang pahnih chu Ruatsaka sawi ang ngeiin bumtu leh phatsantu ve ve an ni.

'Phatsan tu pahnih, uire nu leh mi rinawm lo, an phutawk chiah a ni', Inspector Rama chuan a ti nghut a, ka hnial vat thung.

Bumtu niin phatsantu ve ve mah ni se pawngsualna tuar tur chuan ka la phal chuang lo, eng anga misual pawh ni se pawngsualna tawk kher kher chu tumah hi an phutawk ka ti ve thei lo.

A nat zia leh a mi den a nat zia hre tu ka ni miau a, ka sawi ve thei tlat lo, pawngsual ka ni ve tawh miau a.

Nun hian awmzia a nei lova, dam reng chungin nitin kan thi miau a ni.

A tuar tu lo tan chuan hriatthiam a fiah chi a ni lo ve.

Zing lam dar 3 a ni a, ruah a sur a, thlî thawk telin a thaw vuk vuk mai, khawpui ri dur durin ţek a tla tel cheu va, ka khumah chuan ka blanket nen a inpawm khawm hlânin ka ţhu tawm chawih chawih a, ka hlau takzet a ni.

Kha zan lungchhiatthlak tak khan min luhchilh ngut ngut a, khawpui leh ţek, ruah leh thli karah duh lova ka tal kha ngaithei lo zet a min phuar hlawmin dimna tel map lovin kha ramhuaipa khan min sual a nih kha.

Ţhutkhawmna pindan lama darthlalang tla keh chuai ri ka hriat phei chuan ka khur hlawk hlawk tawh.

Ngam leh ngam lo-in ka tho a, khaw chhiat avangin current a awm lo nen a thim khup bawk, kawlphe de zuai zuai chuan darthlalang chhan aţangin inchhung chu a rawn chhun eng leh zawk ţhin a, ka mobile light pawh hmet eng ngam lovin kawlphe eng hnuaiah chuan pindan pawn lam ka pan ţham ţham a, ka lung chu a su dup dup mai, thawm chhuah hlau zetin pindan kawngkhar chu ka hawng a.

Ţhutkhawmna pindan zim tê-ah chuan mihring ruangam hi a lo ding a, ka rilru in Pathian ka au mawlh mawlh.

Ka khum bul a misual an lo luh pawh a inven na atana ka dah hockey stick chu lak tumin ka let leh a, mahse, let kehin ka lukham hnuai a ka pistol chu ka la ta zawk.

Let leh tum a ka inher chiah chu ka phu deuh dawrh a, kawngkhar bulah kha ruangam kha a lo ding run, ka pistol chuan khur dar darin hlimthla chu ka tin thuai a, 'che tawh suh, i chet leh chuan ka kap ang che', tiin ka vau ve khar khar.

Ka aw khur chu a hriat ka hlau kher mai.

'I mipa hmangaih ni ţhin hi i kap hauh lovang Genevieve', a tih thum chhak chuan ka kaihza tha a zawi a, ka kat deuh nawk.

Ni e, ka hmangaih ni ţhin mai ni lovin ka la hmangaih mek pawh a ni, natna min petu, chu mai a ni lo, tualthattu ni bawk Ruatsaka aw ngei a ni.

Kawlphe eng leh zuai-ah chuan a hmel pawh ka hmu e, amah ngei a ni.

'Nang hian min bum a, i mipa thar nen ka hmuh lohna hmun turah che min tlansan a', tiin thinrim awka takin a sawi a, a nui deuh hawk bawk.

'Ka tlanchhe lo, phatsan tu zawk chu nang ini', ka ti khur dar dar a, ka khurh nasat deuh avangin ka pistol hum pawh chu a che dat dat thei.

'Mipa nen a hlim taka in chetla lai vid hmuh tir ka ni a, khang hun laia ka awmdan kha ka sawifiah thiam lo, mipa hi mittui tlain min siam asin, mi â ang maiin ka khawsa a, nang hian ka lakah dawi thil i hmang em ni tih zawhna ka nei hial', a tih leh chuan ka ţhu hnawk a, ka pistol ken pawh ka thlauh tawp.

Ka rilru ah thil pakhat a lo lang a, bum kan ni tih hi!

Min rawn hnaihin ka kiangah a rawn ţhu a, ka khur dar dar chu min kuah, lo bei a lo sual let turin tha ka nei lo, ka hamhaih vek a, ka na ngut ngut tawp.

Ka khumah kan ţhu dun a, a thawmhnaw hak chu a lo kalna lamah a huh avangin a phelh bawk.

A boxer pawh hlip telin towel a veng a, current a awm ta bawk nen duh aiin kan inhmu chiang.

Sawi tur tam tak nei si, sawi ber tur hre si lovin rei fe kan ţhu ngawi dun ran a, ani pawh chuan mak ti hmel a pu bawk, kan mit leh mit a intawng leh ţhin, ka chil ka lem khawlh khawlh leh ngawt ţhin a, ani erawh ri mang lovin a nui leh suk suk ţhin.

Ka aw thian kharhin, 'tualthattu ini a', ka ti ţiak a, zahpuiawm zetin ka ţah a chhuak ru ţun bawk.

'Tual ka that lul lo', tiin a thaw hawk.

Ni lo se ka ti kher mai, mahse amah ngei hi a ni tualthahna hmun a ka hmuh, keipawh nikhaw hre loa min siam tu kha.

'Ka phirpui Jonathan Lalremruata a ni', a tih chuan ka phawk hra a, 'phirpui i nei maw?', Ka ti haw ringawt.

A bu nghut a, ka bum nia a hriat hnua a awmdan leh a phirpui Jonathana'n kei min tih nat a duh luata a thil tih a nih thu a sawi chu ngun takin ka lo ngaithla a, a thusawi kar lakah na zetin thawk a la leh hawk ţhin, keipawh ka bang bik lo.

Fahrah an nih thu leh nu leh pa hran ve ve in an enkawl seilen dan te, an inhmuh chhuah dan te sawiin, 'phatsan ni a ka inhriat na khan mipa pawh min ti mipa thei lova, mi a ang maiin ka khawsa, nang hian chak lo ah min siam a, tlawm intihna nen ka insit bawk, ţha tawk lo ni a inngaiin keimah chu ka inhmusit ngawih ngawih a, mi nep ber angin ka tlawm nawn awn awn a, nitinin ka na nawn ţhin, ka nung a, ka dam si lo, hna ka thawk thei lova, ei leh in lah ka ti lui thei lo, chutiang a ka awm chuan ka nu leh pa ti mangangin ka unaupa an bia a, inenkawl dan tur a hriat zawk takin an ţahawh tawp', a ti a, a aw ah chuan tawrhna ri ka hre tel hial, tlawm intihna leh a inngaihnepna pawh ka hre thei.

'Kum khat liam ta a nih kha nangnen a kan intawn a hmangaihna kan kara a par, kha hmeichhe detective lu zo tak, induhtawk tak, mahni inngaihlu tawk tih hriat taka hawi valh valh, a nun a chapona hmuh tur awm si lo, bumtu ni a ka hriat si kha ka ngai a, nang ka hmangaihna che avang a ka tawrh nat lai ber pawh khan ka haw phal lo che.

Huat che chu sawi loh ka ngai reng che a, min duh lovin mipa dang i nunah senglut tawh mah la ral aţanga i chezia thlir tal kha ka chak ţhin a, i hnathawh ka hriat avangin chhui chhuah i har lo, ka unaupa in hmelhriat a ngah a, kei ang lo takin sum a ngah bawk nen i office ep chiaha in hi ka unaupa in a lei a, tukverh aţanga i hlimthla lang kha nitin ka thlir ţhin, mahse, ka hmuh loh a i awm chiah khan ka talbuai leh ţhin a, damdawi hmanga chiu ngai hial khawpin a nasa ţhin.'

'Chutiang reng reng chuan a kum dawn ka tal buai a, ka unaupa chuan a haw takzet che, a pangkhing ti na tu ini si a, chuvang chuan a chhui chiang leh zual che a, pawngsualna nunrawng tak i tawk tawh tih leh pawngsualna chu i haw takzet tih te, i nun a thuruk awm zawng zawng chhui chhuakin nangmah tihnat dan tur che a dap a, he kawng hi a zawh ta a ni', tiin a thusawi a ti tawp a, ka chil ka lem dawk ringawt.

Sawi tur tamtak ka nei a, sawi duh tam tak ka nei bawk, mahse engmah ka sawi thei lo.

Ka nâ a, ka hamhaih a, mak tihna in min bawm bawk.

Khua a var a tukţhuan tur ka buatsaih a, engtinnge kan hma hun a awm dawn ka hre lo, engtinnge ka case khawih lai hi ka chhunzawm ang ka hre hek lo, pawikhawihtu hi ka hmangaih unaupa a ni a, a thisen zawmpui neih chhun, a pangkhing a ni, a thiltih chhan pawh kei min tihnat a duh vang a ni a, pawngsualna in min vuak nat zia a hria, ni e, a chanchin sawi ringawt pawhin min ti chau thei.

Ka chauh rak thleng a min chaih kual a min thah a tum tih Ruatsaka hian a sawi!

Hlîngin hremna pe pawh ni ila nuam ka ti dawn lo, hnehtu ka ni thei lo ang tih ka hlau, ka inringtawk ta lo viau!

Mahse, darkar tlemte, hun rei lo te tal chu thildang ngaihtuah lova ka hmangaih kiangah hian awm ka duh, tuk khat chauh tal pawh hi, kan inkar awm zui zel dan tur ka hre lova, tihnat belh erawh ka hreh tawh tih ka hria, ka tawrh aia nasa in a tuar a, kei chu phatsan ni anga ka inhriat lai pawh khan ka luhlul na-in min nawr kal a, na chungin ka kal lui ţhin.

Ruatsaka'n hmeichhia pawh tluk lo mi nep ber anga a inngai pawh kha ka duh lo, hmangaihna hi a ropui a, hlimna nasa tak a pek theih rualin lungngaihna vawrtawp pe theitu pawh hmangaihna bawk a ni.

A nep vang a ni lo a, min hmangaihna a san em avang zawk tih ka hria.

Tukţhuan kan kil dun a, a thawmhnaw pawh spin in ka nawt ro tawh bawk a a inbel thlup tawh.

Kan ei hnawkna vel ka seng fel lai chuan ka mobile a ri ral ral a, Inspector Rama a ni.

Ka pick-up vat a, a hmun ngaiah bawk ruang chhar a nih thu a rawn sawi leh rual chuan ka chhing sawk a, ka kal tur thu ka hrilh hnuah Ruatsaka ka melh a, 'i hriatpui em?', ka ti sap.

Mahse, chhanna min pek kher ngai lovin a mitmeng aţang chuan a hriat pui lo tih ka hre thei.

Inspector Rama khan mipa puitling ruang a nih thu a sawi a, mak ka ti viau mai.

Insiam sawk sawkin ka inkhalh chhuak a, min zui tum viau mahse a kal ve ka rem ti lo, a unaupa Jonathan hmu turin ka hrilh a, ka thu a hnial bik lo.

Ka tlan chak bawk a ka thleng vat a, ruang an khuhna an hawng a, mitthi hmel ka hmuh rual chuan ka kat nawk a, ka tha a khur nghal hlawk hlawk bawk, tawlhhnung dâwrhin ka ţhu sawp niai a, ka mittui luang nghal zung zungin mitthi hmel chu ka thlir a, ka hai thei lo, ka hai ngai lovang, amah a ni, ni e, ka pa, nunrawng taka min sualtu ngei kha!

Mak ti takin ka chezia chu min thlir ţhap a, an hamhaih tih ka hria, mahse ka inthunun thei tlat lo.

Kum tam ka lo zawn ruk tawh, ka hmuh theih reng reng loh, ka kut ngei a thah ka duh mihring ruang ngei ka hmaah nunna nei tawh lovin a let bâm a, a thih hmain na a tuar nasa tih chu en mai pawhin a hriat theih hial.

Pangngai tumin thawk ka la kawk kawk a, ka kianga police awm, a ngaihna hre lo tak te chu tui in tur dilin min pek rual chuan in tumin ka bei a, mahse ka thei lo, tui ûm chu ka hum nghet zo lova, Rama'n min hnaihin tui chu min tulh a, ka lo dawt khawlh khawlh.

Mahse ka la pangngai thei mai lo, zah pawh dawn lovin inspector Rama chu min kuah turin ka ngen ta ngawt a, engkim a ţhat thu min hrilh rawh ka ti mawl tawp bawk.

Ka awmdan chu hrethiam lo mahse ka sawi ang chuan a ti ve mai bawk a, minutes 10 dawn min kuah a thil engkim a ţhat thu min fah mawlh mawlh chuan ka pangngai ta deuh.

Tlemte tak takin, inthinharh ka tum hram hram a, mahse, a har lam hret chu a ni.

Min ngaihtuah tih hriat takin min melh ţhap hlawm a, mahse ka ţhat thu hrilhin ka tho a, ruang chu ka va en a, sawisak nasat a nih a hriat kher mai, a taksa chu duk lo lai a awm lo tih theih a ni a, thawmhnaw reng reng a inbel lo bawk, ka en kual a, a mipatna phei chu tan sak a ni!

Ka thaw hawk a, ka khuh ţha leh vat.

Engmah dang sawi lovin haw ka duh thu ka sawi a, ka awmdan min hmu hlawm bawk a hahdam ka mamawh thu sawiin min chhawn vat hlawm.

Ka bike ah ka lawn a ka tlan chhuak vat a, Rama'n ka inkhalh haw thei ang em tih min zawhna chu chhan pawh ka chhang lo.

Ka in-ah ka awm leh ran tawh, khumah ka ţhu a, ka tha khur a reh hleithei lo, vawt ka ti em em a, nachhawkna hmawmin ka mu thân a, thil thleng khan min ţhawng takzet tih chu ka pha lo.

Ka lo muhil a ni ngei ang, door bell ri tlang tlangah chuan ka harh a, nachhawkna in min chhawk a ni mahna ka thlan a lo tla dap mai, tho chhuakin tunge lo kal tih hriat tumin tukverh aţangin ka en a, anmahni anni. Ka khum lamah letin ka silai ka ban a, let lehin kawngkhar chu ka va hawng a, Ruatsaka leh a phirpui Jonathan an lo ding ran mai.

Tu zawk nge Ruatsaka tih hriat tumin rei fe ka thlek a, danglamna reng reng an nei lo an mitmu rawng chenin!

'Tu zawk nge tualthattu', ka ti sap a, ding lama ding zawk chu a nui hawk, amah ngei a ni tualthattu chu.

Silai chuan ka tin nghal a.

Rum taka enin, 'ka pa i that a', ka ti a, ţul lo lutukin ka mittui a lo tling pam bawk, kha mihring thah a nihna khan kei hi min ti lungngai tur a ni hauh lo, a thihna kha ka tuar lo, ni e, keimah ngeiin ka kut hmanga thah ka duh vangin ka lungawi lo a ni ngei ang le.

'Nangmah pawngsual tu che thah a nihna chuan a ti lungngai che em ni?' Tiin a ner sawk a, ka mit ka chhing sawk.

Silai a ka tinna chu ngaipawimawh lo zetin a rawn lut a, amah tin chung zelin ka inher ve hrat hrat bawk, tlan chhiat a tum lova, phat buai lah a tum hek lo.

Ka inchhung chu ngun fe hian a en kual a, a duhtawk a ni mahna ţhutkhawmna pindana ka sofa hun ve ranah chuan a ţhu a, min rawn melhin, 'police call rawh le', a ti sup.

Ka mobile phawrhin Rama ka call a, ka in-ah tualthattu a awm tih ka hrilh a, mak a ti viau, engtinnge? Tih zawhna chu chhang lovin ka in lama rawn kal turin ka ti leh a, phone call ka dah ta daih a.

Ruatsaka chu lut turin ka ti a, engmah sawi lo a rawn lutin a unaupa bulah chuan a va ţhu a, engmah reng reng a la sawi ve hauh lo.

Police an rawn thlen hma chu ngawi rengin kan ţhu ngawt ngawt a, sawi tur ka hriat loh ang bawkin an hre bik lo a ni ngei ang le, police an rawn thleng a, silai lek vah chungin an rawn lut a, kei leh Ruatsaka te unau chu mak ti tih hriat takin min melh tawn chhen a, kei chuan an mitmeng a zawhna awm chu haiderin Jonathan zawk chu ka kawk a, 'man rawh u', ka ti mawl tawp.

Engmah sawibuai lovin handcuff hmangin a kut an thlung a, a kiai suk suk duh lek!

Tualthattu, pawngsualtu, ka phuba min laksak a ka pa ngei pawh min thah sak tu chu a inpuang a, hremna na tak pek niin pawngsual thubuai bakah tualthah thubuai a nei a, damchhung a tang tura tih niin jail run thimah a awm ran tawh, mak takin pawikhawihtu a nih thu a sawi a, a chetdan erawh a kimchangin engmah a sawi duh lo,  nasa taka an dawp chung pawhin a sawi sa bak chu engmah sawi belh a tum lo, luhlul ngar ngar tak a ni.

Tualthahna thlen hmaa ka hna neih Jenny case erawh a khawlh viau a, anmahni zawkin thawmthang vela ka hna an hriat vang leh, a pasal hual pawhin chu naute, Jenny pumchhung ami chu a pawm thlap vangin chhui zawm tawh loh mai an ti a, a ruka ngaihven chu ka tum tho mai.

A nupui ni mai tur a ni a, engtianga nau pai ta mai nge a nih hrechiang lovin a nei duh a ni a, ka fak takzet, hmangaihna hi chu a lo mak a ni e.

Case lian tham khawih mai tur thil thleng tharlam a awm tawh lova, mipui tualthahna thleng dawt zut avanga kimki te pawh an zalen leh ţan e, kan awlthawng rih viau mai.

Ruatsaka'n min tlawh awl lova, ka duh lo e ka ti lo, ka hmangaih tawh lo e ka ti hek lo, mahse a hma anga pawh taka awm a inkawm hlim harsa ka ti a, kan hrang ru viau, a unaupa hremna ka pek vanga ka inthlahrungah ngaiin inthiamlohna nei lo turin min ti leh ngawt ţhin a, mahse, chu chu ka puh ve si lo, kan awm dun lai reng pawhin kan inhlat ru dû mai si!

Zanriah kil dun tura min sawmna erawh ka hnial lo, zaninah ngei hian thu tawp sawi dun law law ka duh, ka hmangaih ta lo a ni lova, mahse, awmdun reng, thinlung inpawh tawh si lovin kan awm a, ka hah a, a kianga ka awm hian ka pik ţhin, kan inkar tih tawpa, kan kawng ve ve a hrang a zawh ka duh tawh, mahse ka zam ru tak zet, hlauhna ka nei nge ni a ka awmdan ka hrethiam lo, ka huphurh ru ţun mai.

Ka insiam a, ka thawmhnaw ngainat zawng jean kekawr leh top bakah jacket hak leh tawp ka tum zet a Ruatsaka ngenna tihhlawh tlin sak ka duh ve tho, kawrfual mawi zet, ka khup khuh pha chiah chiah a fual, a bân lace, a rawng senduk simple zet, nalh ru tak si chu ka ha a, a milpui tur pheikhawk pawh a rawn dah tel thlap, ka tawk chiah chiah ve ve, ka clutch neih ve chu ti faiin ka pistol ka dah lut a, engemaw tak tawng tur ang mai hian ka awm a, a nuam viau lo.

A unaupa Jonathan pual bika an dah sumdawnna a ţhutchilh a, Jonathana'n a nu leh pa te hnena a ngen angin, an hrin ni lo mahse a tette aţanga chawilian tu an ni a, an hmangaih viau, tualthattu a nih pawh hriain na viau mahse a ngenna hnuhnung chu an tih sak tho a ni.

Motor thawm a rawn awm a, khua a thim ruai tawh, ka inpeih sa diam tawh avangin a rawn luh hun nghak lovin ka chhuak a, car aţanga rawn chhuak a ka in lam rawn pan a tum mek pawh a pen kal lai a tawp chawt, coat suit a ha thlup a, pa lian lutuk a ni lo naa a mawi tawk a ni, kei ai chuan a lian viau tho, a zahawm khup mai, kawi lek lek a dingin thûk zetin min lo en ngur a, ka zam lek lek, ka inchei danin min ti confi lo nen ka chet chhiat ka hlau ru ve viau mai.

Car a ka ţhut luh hnu pawh chuan ka zam avangin ka kut ka hum thlan dap thei, khaw dai lam deuh a hotel hawn tharah min hruai a, hotel lian tak ni lo mahse a changkang ru zek a, special takin a chei tir tih hriat takin engkim chu a ni thlup vek, a mawi a, a hahdam thlak a, a cool raih mai. Ka rilrem zawng tak a ni.

Music cool zet an play riai riai a, inhmangaih te tan chuan a tluk a awm bik kher lo ang le, keini erawh kan tawpna tur a ni tlat.

Zanriah tuihnai tak kan eidun a, ka zamna leh ka huphurh lawkna hre lo lekin ka ei tui ve ngial mai.

Kan ei zawh hnuah chuan music ri riai riai karah chuan a ding chhuak a, a tak run reng maiin ka hria, ka nel lo.

Lampui turin min sawm dawn niin ka hria a, lampui ve mai chu ka tum, kan titi pah thei ang chu, mahse, ka thawh chhuah ve hma chuan ka lamah a rawn kal a, a rawn ţhingţhi ta mai!

A coat ipte aţangin bawm a la chhuak a, 'min nei duh ang em?' tiin a bawm ken chu a hawng a, ngenngawl zel mitmeng pu in min en chho a, ka lung a su dup dup nia!

Ka chil ka lem dawk ringawt, bawm te takte a thil awm chu ka en thla a, ni lo!

Tualthattu a ni he mihring hi!

Corals a ţang a siam bracelet mawi tak chu a lo inkual raih a, a sirah a milpui tak mai zungbun a awm bawk.

Mahse, chu bracelet chu khang ruang te hum ang chiah chiah kha a ni!

Ka clucth a ka pistol chu la chhuakin ka tin ran a, 'tualthattu', tiin ka phun sap.

A bawm ken chu zawimuanga chhuata dahin a kun ngur a, ding chhuak a banphar tur a tiin ka vin ţhat ţhat a, a kamsir tuai zeuhin a khi suk a, muangchangin a ding chhuak ruai ruai.

Zâm hmel a pu eih lo.

'Detective ropui chuan a hmangaih a hai a, tihsual nei lo Tàn in lama a khung hnuah pawikhawihtu zawk chu zalen takin a kiangah a tal tir a, huh, a mipa hmangaih mitmeng chhiar thiam lo khawpin a tlawktlaw a ni, i mipa, ka unaupa kha ka vau a, keimah anga lemchang turin, a tih loh chuan ka thah ve tur thu che ka hrilh a, huh, mipa nep lutuk khan a hmangaih chhanhim nan chuan ihe lovin ka thu a zawm a sin, nang vanga a nâ kha hmu thei lovin natna pe tu nangmah ngei kha tihnat let ve che ka tum a, mahse kha mimawl khan a thisen zawmpui ai chuan nang, hmeichhe pakhat ve mai, pawngsual tawka a hringtu a pa ngeiin nawmchenna atana a hman hnu hi a ngaipawimawh zawk tlat, ka that lo kha a vannei zawk ngawt asin', a ti chhur chhur a.

Ka thu hriatin min ţhawn em avangin ka kat nawk a, midang awm ve lo tura chu dawr chu a book vek vangin midang an awm lo, thawktu tal an awm takin tiin ka hawikual a, mahse, ka talbuai lai chuan Ruatsaka, ni lo, Ruatsaka emaw ka tih Jonathan chu a vir zawk a, ka silai chu min chhuhin ka bek zawnah min tin ran a.

Ni e, mimawl tak ka ni, ka mipa hmangaih ti a ka chhal ve ţhin pawh ka hre lo a, a mitmeng lah ka chhiar thiam lo, khatia hremhmunah ka nawr liam dawn lai te khan amah hrechhuak turin min duh ngawih ngawih awm si a! Ka inhmusit ngawih ngawih, tuar ve tlak reng ka ni.

'Ti rawh, min kap rawh', tiin ka phun sap a, ka mit aţanga lo chhuak ka mittui chuan ka biang a luan lum pap.