beiseina in zo tawh

BEISEINA IN


'Lalhruaizeli han luhlul dan em em hi chu aw, nu leh pa nei lo tih awm tawk lek, a pi leh pu te pawhin an ngeih lo a nia, zilhhauna dawng lo naupang tih hriat lutuk', tiin an miss Sangtei chu a an chhunzawm hlak hlak a, a fahrah nihna hmang kher a an zirtirtu te zing ami ngeiin a hmusit chu a la na bawk nen insum hman lo lêkin a khawih bawrh bawh, Miss Sangtei chu a rak ţhawt ţhawt a, thinrim chunga khawih a ni bawk nen ani inla no chi chuan a hneh lo lam deuh chu a ni. A khawih ve hman meuh lo. 




Pawhsawn lawp a nih rual rual chuan a biang a ri chawrh a, a na thip nghal veng veng, 'hnawhchhuah ini ngei ang,' an Headmaster chuan a ti hluk a, za lo tih hriat fe-in a lo nui hul hak thung, an en ţhap a, 'ka tih hmasak ni hlei lo-ah sualrawn ka ni a, min hneh leh si lovin dawt phuah kualin min hek a, ka insawifiahna pawh kam khatmah in beng kawrawngah a lut lo, anni mittui lem leh lei dawthei thu chu inlem duak duak a, ka ţawng ve erawh thingbul biak ang maiin tumah hian inngaithla lo, chuta karah ngawih chuhin kal mai ka tum a, ka fahrah nihna hmang khera min hmusit lehzel kha ka ngawih reng chhan tur ka hre bik nek lo e, ka zirlai pui te tam zawk lakah chuan ka ngawi thei, ka zirtirtu, mite zirtirtu nangni ho hmuhsit lehzel tur ka ni lo, in nu leh pa te nunna kha in chelh ding thei bik meuh ang maw? An boralsan ve hun-ah che u chauh ka dinhmun inhrethiam ang', rilru nat vanga a mittui tla mai tur khap per sak sak chungin a sawi a, tumahin chhan ngaihna an hre lo, an en mawl tawp vek, Tehruaii chu a inhumruh ngar ngar bawk a, 'nangni hmuhsitna tawrh renga thiamna sang ber neih ai chuan hmuhsitna tuar lova mimawl ber nih ka thlang e, inhnawhchhuah chawp ngai lovin ka bang e, mahse hei hi ka tiam a che u, nakinah chuan nangni ho aia sangah ka la ding ang', zawi tak mai, fiah felfai kâka tiin amah sualrawn tute chu na zeta a melh kawk hnu-ah a School bag pawh la lovin an School chu a chhuahsan a.



Ni e, hmeichhe kawlh leh ngawhngawl tak a ni tlat a sin kan Tehruaii chu. 



A lai-ah hming chu Lalhruaizeli a ni a, Tehruai tiin an ko deuh ber, tleirawl chhuak hlim hlawt mah nise a dinhmunin a zir bawk a, a puitling khap reuh a, a cool deuh raih bawk nen rawlthar leh tlangval pawh bang lovin, an khawchhunga mipa awm ho mit la tu a ni der tawh mai a, chungte chu a hmeichhiatpui dangte huat a hlawh lehzual chhan a ni ngei ang le, a nunnem em em leh rilru ţha tak a nei tih chu tu khawkha mahin an hre lo thung, a tawhkhirh zia leh a kawlh hrâ mai te chu an hriat dan a ni a, tu vak mahin kawmtlakah an ngai lo, nu leh pa thihsan a nih bakah amah enkawl seiliantu a pi leh pu te lak aţangin duat a hlawh viau lo nen a mizia chu a huntawn han chhut thiam pui tan chuan a demawm lohin a awm ve reng mai. Tumahin an chhût lo mai pawh a, an ţhenawm a nupa rek awm te chauh lo chuan.



 Mizoram khawchhak lam khaw lian vak lo, Ngûr khuaah a piangin a seilian a, sawi tak ang khan nausen mai a la nih lai hian amah hmangaihtu a nu leh pa te hian an boral san a, duat khu chûk lo mah se a pi leh pu te chuan mahni tû nge nge chu an enkawl chho a, mahse hlim ni an nei meuh lo, a lo tleirawl a, ţhanthi a neih hlim hlawt chuan a pi leh pu tan hnawksak a ni ta mai reng a, a pu chu mipa ngang a ni a, a ang ve hluk hluk lo bawk a a zia tak a awm, a pi mawlh chu a ni, a nu leh pa an inneih dawnin a nu hi famo-ah a pawm lo sa nen a fanu enkawl hman mang lova a thi leh mai si nen, a fapa thihnaah lah a mo chu ala puhmawh zel a ni ber a.
A fapa Zohminga leh a mo Ramdini hi Ramdini te khua, Neihdawnah Ramdini nu, Tehruaii pi boral avanga kal an ni a, Tehruaii pawh hruai ve-in thla khat dawn an cham hnu-ah Pi Zaii, Zohminga nu hian a chah ngun em avangin hmanhmawh takin an haw a, an haw kawngah vanduaina tawkin, an chhungkua te-a an inphurh na Scooter upa ve lam tawh chu an khua an luh hma deuh, an khaw ho in lo an neihna thlen hma si chuan a chhe hlauh mai.



Chuta karah thawklehkhatah thlî leh ruah na taka thawkin thing zar te chu a auh ţhawt ţhawt mai a, Thli leh ruah karah chuan lo hmasa ber a pu Ringaia te thlam tawm na atana hman tumin Tehruaii chu a pa chuan a pawm a, an tlan hlawk hlawk, thli lah chu a na telh telh emaw tih mai tur a ni bawk nen kawl lah a phe zur zurin khawpui riin a rawn pui bawk, chutia mangang taka an awm lai mek chuan vanduai lehzual na tawngin an chung zawn taka thingzar lian zet chu a rawn tliak ta phut mai a, mihring te chelh din rual loh Tehruaii nu leh pa te nunna hlu tak chu thing zarin a rawn delh rual rual chuan tih tawpin a awm ta, nausen lainatawm tak Tehruaii chu a ţap ngak ngak a, a pa insaseng hman tawh si lovin a tha tawpin a theh lawp mai bawk nen a insawh ve bawk, amaha tal hrang thei a la ni bawk si lo, rinchhan nei chunga pen hnih vel pen ve thei chhat chhat mai nausen chuan tuamhlawmtu nei lovin a rilţam tawpah phei chuan a ţap chau ta hial a.



Chu hun aţang chuan a ni Tehruaii nun chu hremhmun tenaua a chan tak ni.




Mak tak maiin ruah leh thli chu thawk na viau e ti lovin a bang mai a, ni a chhuak nghal ut, Pu Ringaia pawh a thlam, thliin a nuai chhiat te chu thlam aţanga chhuakin a en vung vung a, a sa rinawm tlet tlut bawk a, chuti em em chuan a chhe nasa hran lo, thli a na em mai pawh a, hmanrua la chhuaka a thlam thawm ţhat tuma a inbuatsaih lai tak chuan nausen ţap ri ni awm tak a hre ta mai, a hawi phawk hrû a, ţap ri chu a zawi tial tial, eng mi pawh nise ti chungin a thawm hriatna lamah chuan a tlan hlawk hlawk a, a ţhenawm lawk ami Zohminga te nupa thing zar lian takin a lo delh reng mai leh an piaha nausen lo awm reng vun duk deuh chur mai chu a va hmu ta mai.



A phu dawrh a, reilote a hamhaih zawk, hmanhmawh em emin a pan hnai leh sauh a, 'Zo-a, Zohming', tiin a au ţhawt ţhawt bawk, mahse, an mar te a han deh chuan anni chu chhan tlak an ni ta lo, a lû a dawm vawng vawng a, a lainat takzet, an piaha nausen lam chu panin a chawi chang a, chu nausen pawh chuan nunna nei hmel a pu mawlh lo, a duk deuh chur mai a, bei tih dawn na'n tal tiin a mar a zawng a, hmu zo lo, a hui pap pap a, lainatna nen a thlir ngawih ngawih lai chuan mak tak maiin chu nausen chu na deuh takin a rawn thaw ve kawk mai.


A phut nasat em avangin pu Ringaia pawh chuan a nausen pawm lai chu a thlauh ţhelh a, mahse harh chhuak vatin hmanhmawh em emin thlam lamah a tlanpui dawr dawr, mei a nun vat vat a, nausen tuamna huh zawr hnâp mai chu phelhin a mutbu ro chuan zei lo zetin a theihtawpa ulukin a tuam a, meilum hnaihah chuan a dah ve ta ngawt mai a, chu bak han enkawl vak ngaihna a hre lo, hmanhmawh a ngai tih hrilh hranpa a ngai bik lo, Khuanu zahngaihna nge ni dawn ni, mak tak maia khati khawpa duk chhuak vek tawh si kha meilum hnaiha a awm hnu darkar hnih dawnah chuan a vun te chuan ngai a rawn awh chho leh ta mai a, pu Ringaia pawh a lawm viau, khawchhung ka thlenpui thei tawh ang tiin nausen chu a pawmin khawchhung lam pan chuan hmanhmawh takin a tlan pui dawr dawr a. 




Vanneihthlak tak si, amah Tehruaii tana vanduaithlak tak siin a damkhawchhuak hlauh mai a, tichuan nu leh pa nei lovin a pi leh pu te kiangah a lo awm ta a ni.
Vanduai a inti in a nu leh pa in an kalsan dan te, a lo damchhuah bik dan te chu an ţhenawm te nupa ka aţangin a hre bawk a, nunna chu hlu ti ve hle mah se amah lo chhan tu Pathian leh a mi hman Pu Ringaia chu a dem lek lek hial ţhin a nih kha.


Tehruaii kal ta chu an in-ah pawh haw peih lovin an khaw thlanmual lam a pan a, an sikul lama a buaina tawh chu a pi in a mah zawk a demin ţawngkam chhe tak takin a ankhum leh dawn tih a hrethiam ve bawk a, a thlahlel lo pawh a awm lo e, mi zingah kawlhsen tak leh ngawhngawl tak angin lang mah se rilru no tak a neih ve miau avangin, a nu leh pa thlan hmaah chuan ţhu-in a fahrah avanga hmuhsit a nihna te chu nâ a tih thu sawiin a nu leh pa an zalhna kiangah chuan ţap chungin a sawi ve hliam hliam a, nu leh pa tan chuan a va na dawn em. Hmangaih taka kuangkuah turin an tisa chu a ţawihral vek tawh si a le.
Chutia lungchhe vankaia a lo ţah kerh kerh lai tak chuan, 'hey, i ţsp zawi deuh thei em?' Ti ri a hre ta thut mai le, a hawi chhuak vat a, a hmaa mipa hleitling lampang, sam buk ve lampang, ngên hmel zet chu chiang leh fiah kâk hian a melh a, 'ahhh, in ţap ve duh em ni?' A tihngaihna hre lo chuan a ti ngawt a, chu mipa chu a lo nui huk.



'Ahhh, ţap duh lem lo e, i ţap chau ang tih ka hlau mai a nia', tiin chu mipa chu a pensawn vut a, Tehruaii chuan a en haw ringawt, a che lai lutuk chuan a lei a chhuah tet a, an in lam pan chuan khua a tlai tawh bawk nen a kal ta a.


In a thlen chuan a pi chuan a lo ankhum ngh bawrh bawrh mai, a hau dawn tih hre tho mah se hetiang em em chu a beisei lo, 'Lalhruaizel, zahpuiawmnu, zawmthaw si, chapo tlak ni mang si lo chapo ve hlut ringawt, ka in aţang hian chhuak nghal rawh, ka ten hluah hluah che, lo thi ve law law la a ţha tur', tih lai chuan a ti na em em a, ngawi renga a thuam neih ve ho chu bag a dah chungin a mittui tla chu a hru pah zeuh zeuh a, a nu leh pa te kha belchiang hman lo mah se a ngai a ni.



A bag ak par chunga a chhuak tur chuan, 'ka pi, hnawksak itih em em chu a kal dawn e, mah se mamawh i la nei ve ang a, hna thawk thei lovin i la zûr vat ang, chutih hun-ah chuan i tunu hi min la ngaiin min la mamawh ve ang', a ti sap a, a pu chuan, 'Mate, chhuah kher a ngai em ni?' A lo ti ve chuar chuar, a pu lam hawi chuan 'min ui der suh, ka hnawk zia ka hria, ka kal ang,' a ti a, a lungchhe hmel paihin tumruh hmel a pu nghal zat. Harsa mah se a lo awmna, a chen ve na rûn chu engthil hlu mah nei lovin a chhuahsan ta hnak hnak a, uider a umzuitu a nei lo te chuan a hliamah chî phul belhin a na ngut ngut ringawt.
Pan lam tur hre mai hek lo, an ţhenawm te in-ah tlukluh rawih mai chu a tum a, mahse, an kawt lawk a thleng tihah chuan a inhumruh a, a hnungtawlh hrat hrat.
'Tun aţang chuan tumah ka mamawh tawh tur a ni lo, keimah ngeiin ka hringnun chu ka sual dawn a ni', tiin khaw pawn lam chu a pan chhat chhat a, a mittui chu sen tum lovin a mit a nuai chat chat bawk, an khaw ho-in lo atana an neih na lamah zan khawthim hnuaiah chuan a kal a, nungcha tenau hram ri chuah chuah leh thawm lo ri leh rak ţhin te chuan a thinlungah hlauhna a tuh pha lo.



Lalhruaizeli diktak a lo lang ta, insehruh chungin a ke a pen zel a, a ke chu a kham takzet, din erawh a tum lo, a kawng èn turin thla chu a eng ruih a, khawchhung aţanga lo a hlat tham vak loh vangin rei lutuk lo ah chuan lo hmasa ber an khaw pa awmthei ve ber pu Zahawma lo chu a thleng a, chu zan hun chu pu Zahawma thlamah chuan hman a tum a ni, lo lam awllen lai a nih vangin lo lama riak an awm hauh lo a, hmeichhe tleirawl lainatawm tak Tehruaii chu thlam chhuatah chuan a mu kawm ngal a, muthilh erawh harsa a tiin a nun lo hman dan ngaihawm loh zet te chu a phaktawkin a chhui kir ve rauh rauh.



Lungngaia indawmkun tum lo eng ang mah se a huntawn chu a lungawi thlak loh miau a, a intihpachanna chu ţhiaha awmin a nu leh pa te thih dan a ngaihtuah chhuah meuh chuan a mittui a dang zo ta lo, chaklohna lantirna tiin mittui chu haw viau mah se a ţap ta hlawp hlawp a, chhang thei lo tu a nu leh pa te chu a au rawih rawih, lainatawm hian.




A ril a ţam hle nangin ei tur han dap na'n zan a ni bawk si nen a ţap chau vat a, a hriat loh karin a lo muhil ta a, a mangah chuan a ngaih em em a nu leh pa te chu a hmu a, mittui chu chaklohna lantirna a nih loh thu te, a chak lehzual zawk na atana amah hnawhtu natna chu mittui hmanga luanchhuah tir tur te a fuihin an lo kuah vawng vawng mai a, chutih lai mek chuan zu rim na zet a hip kawk avangin a harh hlawl mai, a hawihai viau dawn naa a rei lo, ban tha chak em em hian a hrawkah a rawn rek chawt mai a, a theihtawpin a tal nawk nawk, ani tleirawl te mai, rilţam leh thophang bawk si chu a tha a zawi ta viau mai a, amah khawihtu chu khua a thim vangin a hmel a hmu thei lo bawk nen ka thih a hun ve ta a ni ang tiin tal a sual let pawh tum tawh lovin a khawih ang chuan a awm ta tawp mai a, amah khawihtu pawh chuan Tehruaii a inthlahdul tak hnu chuan a rehna chu la sawnin a thawmhnaw a phelh sak ta mial mial mai, Tehruaii chuan a chunga thil thleng tur chu a hria a ni, a hlau a, mak a ti bawk, mahse chakna a nei lo, khawng lah hian a awm a, amah khawihtu sual let tumna pawh chu nei tawh lovin a insehruh ngat ngat ringawt, a hmeichhiatna na lutuk avang chuan a mittui a tling pam a, a retheihna ti belhchhah turin a zahawmna chu chhuh a ni ta, a chunga duhtawka che pa nena an taksa a inzawm loh veleh chuan a nui chhuak hawk a, nat luat vanga nuihna a ni. Che lo in a awm reng a, inhak ţhat pawh a tum lo!



Chu pa pawh chuan Tehruaii chu a en vung vung hnu-ah thlam chu a chhuahsan a, Tehruaii chuan hlauh leh chuang tur a nei ta lo, khawvar thleng chuan a mu kawm reng a, hma hun ngaihtuah dan pawh a thiam tawh lo, mahse a chakna atan ei leh in a mamawh tih hriain inngaihtuah hah loh hram hram tumin a tho chhuak a, a thawmhnaw te chu a inbel mawlh mawlh hnu-ah eitur a zawng ta a, a thlai hmuh ang chhun chhun te chu siam ve in a inhnawhpuar a, a nu te khua Neihdawn lam chu pan phawt a rilruk ringawt mai a, motor hmuh mai tur a awm lo nen ke a a pan a ngai dawn a ni, harsa dawn mah se kal tawp chu a tum ta a, a neitu thu lova thil lak chu a ţha lo tih hre mah se a chauh chhiat vat loh na'n a mamawh miau si a le, siam chawp ngai lo tur fanghma a hmuh ang ang te chu a la a, a bag ah chuan a dahkhawm a, a chet leh pen zawng te chuan a hmeichhiatna chu a na in a kham ţhûm mai a, mahse pal luih chu a tum ve bur ringawt, a thil lak te chu la beitham viau mah se a rit ve bawk si nen a mamawh tur ang zat pawh la ta lo chuan a kal ve ta ngawt a.



A nu leh pa te nena an chetsualna hmun pu Ringaia lo bul lawk a thlen chuan a ding vang vang a, a kianga awm ve ang maiah ngaiin, 'nu, pa, ka tluk changa min kaitho tu tur ka nei ta lo, mahse tlawm turin min duh lo tih ka hria, ka theihtawp ka chhuah ve na tur kawngah hian tlu nawn fo dawn mah ila chakna neia ka thawh leh zel theih na atan in rauthla tal chuan min awmpui tlat rawh u aw,' tia biain a phun sap sap a, kum naupang tak la ni mah se a nunkawng a bumboh ve em avangin a kum phu lovin a puitling reuh bawk nen a ţawngkam chhuak pawh a naupangchhia lo hle mai.



Kawngsira thingţang lian ve tak mai chu chharin tiang atan a hmang a, ramhnuai reh tak maiah chuan a kal chhat chhat a, a ke te chu nâ in kham tawh viau mah se khaw en lai ngeia a theih anga thui kal tum chuan a pen ve tauh tauh a, ramsa koham tak pawh tawng thut thei a nih hriain a thiam dan danin rilru ţawngţaina a nei ve pah mawlh mawlh.
Hah takin a kal a, a ţam tawpkhawkah chauh a fanghma ah chu ei a tum ve bawk a, chaw chhun ei hun-ah pawh a ei phal lo ve tlat a ni.



Chutihlai mek chuan a pi leh pu te chu an lo inhau ve mek bawk a, a pi chuan a tunu Tehruaii chhuak ta mai chu ngaihtuah a hnehin a ang bawrh bawrh a, ţawngkam chhe tinrenga a tunu thlâ chu tàwng ngat ngatin a inâng thinrim telh telh a ni hrim a, a pasal zawk chuan a nin vangin a lo khap ve bawk nen ani âng thinrim chuan a pasal ngei chu a tunu ngaizawng ang thawthangin a puh ta mai, kut em inthlak lo mah se an thawm a ţha bawk nen an ţhenawm te nupa chu an va tlan lut ta ngawt a, mihring hmai eng meuh pawh zah zo lovin ani lah chu a lo la âng tui nasa mai, va khap ve an tum te lah chu anmahni nen lam chuan a lo ankhum a, pu Ringaia fapa chu kawk sawk sawkin, 'Chhanhim, i pa Ringaia khan he hmeichhe tlaktlai lo lutuk nunna hi engvanga lo chhan nge maw a nih chai le, zahna leh buaina bak min thlen lo a nih hi', a lo ti hmawrh hmawrh.


Chu em em zawng Chhanhima chuan a lo la na ve ngang mai, 'minung rama awm ve tawh lo ka pa thlarau i zah lo a nih chu thuhran, i hrin ngei mai i fapa thlarau meuh pawh zah lovin a fanu chungah heti khawpa tawrhna hi i thlen chu a ni si a, misual vanneihna hian tawp chin a nei a nia, ngai reng rawh, bawrhsawmna tinrengin a la tlakbuak khawp ang che, hnawksak itih em em i tunu hi i la ngai ve khawp ang', tiin a nupui chu kaiin a chhuahpui dawr dawr a, a thinrim insum zo lovin Tehruaii pi chu kut a thlak mai a hlau a ni.



An inchhung an luh meuh chuan a nupui chu a inhnit hrâih a, 'Tehruaii chu ka va han lainat tehlul em', a ti vawng vawng, an ngaihtuah ţhin ngial a, a beidawng lutukin ama nunna te a lak mai an hlau nen a ruka zawn chu an tum ta, a awm an rinna ber a nu leh pa te thlan lam an pan a, a awm si lo, an theih ang angin zawng ve chiam mah se an hmuh phak loh ramhnuai reh takah Tehruaii chu hah vanga thlan tla bawrh bawrh chungin a awm mek chu a ni si a.



Beidawng fe-a an zawn hnu-ah hmuh tur awm hek lo, an in lamah chuan an let leh hna hna a, an in an thleng tihah chuan an kawtah chuan an khaw tlangval hmai fai ve pawl tak ni ţhin, zu a in nasat avanga pawr ta fap Fakzuala chu a lo awm a, zu a duh em avangin an lawm tehchiam lo, Fakzuala pawh chuan Chhanhima leh Hlimpuii te nupa a hmuh veleh, 'u Chhanhim, biak che ka duh a ni', tiin zam hmel em em hian a lo be vat a, chutiang ta chu leng lut tura sawmin an inzui lut ta hlawm a.




'U Chhanhim, min huain min ten dawn tih ka hria, mahse, kha hmeichhia khan hmangaihtu a neih awmchhun in ni a, ka zep thei lo a ni', tiin a kut hum thlan dup pahin a sawi te te a, Hlimpuii te nupa rilruah chuan Tehruaii a rawn lang nghal zawt, engmah zawt duh rih lovin a thusawi leh tur chu an lo nghak a.
'Ka zu in tur mamawh in Vengthlang lam pan ka tum khan Tehruaii kha in in lam pan tum a lo kal, a lo lut dawn emaw ka tih hnu-a kal leh ta si kha ka rui sual chuan ka enthla chak a, ka zui ru zel mai a, an chhungkaw chanchin lah sawi ngai lova khawtlangin kan hriat a ni a, chutia zan khawthim hnu a amaha khaw pawn lam a pan ka hmuh khan mak ka tiin keimahah chutia hmeichhe tleirawl hmel ţha tak, amah chauha pu Zahawma thlam a awm ta chuan zauthauna min thlen nasa em em a, mahse inngaihtuah harhin khawchhung lam ka rawn pan a, zu in tur chuan ka kal ta a, sual viau mah ila hmeichhe duh lo chunga han khawih chu ţha ka ti bik lo, mahse ka ruih chilh ka ti mai, ka theihnghilh thei reng reng lo mai a, ka ruih viau hnu chuan thlam lam pan chuan ka kal leh ta a, kha tleirawl kha ka va pawngsual ta mai a ni', a ti chiah chu a bek a ri chawrh a, khawih let pawh tum lovin Chhanhima khawihna chu a lo dawh ngawt ngawt mai a ni.



Thinrim lutuk vanga khur dawt dawt chungin a hnek mial mial mai a, hetiang em em a a nat chhan pawh Tehruaii a khawngaih luat vang ni mah se a nupui, a hmangaih em em hian pawngsual a lo tawk ve tawh a, a nun a nghawng nat zia a hre bawk nen a thinrim mai bakah a na ngut ngut a ni, Fakzuala hmai leh bek ah te chuan thisen a kai hne hnu a, Hlimpuii chuan a that thei mai dawn tih hriain a pasal chu ţap hawk hawk chungin a va kuah bet chawt mai a, ţhenawm hnai zual te chu an thawm hriain an rawn tlan lut ve bawk nen an ri lê lû mai le.



Tehruaii pawh chu chau tak chunga nilenga a kal takah chuan a taksain tlin hek lo, kawngsirah chuan a ţhu hnawk a, reilote tal ka chawlh a ngai a ni tiin a bag a la thla a, a fanghma chu pakhat la in a tuai fai thuak thuak a, a ei ta hmiar hmiar a, tui a pai bawk nen a tuihal pawh a chhawk viau reng a, a harh sawng sawngin a hre hial.
Pakhat bak ei phal lovin la kham lo viau mah se a duhtawk rih a, a chapal bun lah chu a hlui tawh vangin a lo thler zui, kelawnga kal ngawt aiah a chhe chung chung chuan a la bun ve hram hram kha a ni a, a chapal bun chu phelhin a ke kham chu amahin a hmet ve nawk nawk.
A ke kham zualpui a reh takah chuan Tehruaii chuan kal a siam leh ţan ta a, khua a thim hnai bawk nen a theihtawpin a kal ve tauh tauh a, thui pawh a la kal lo tih ah chuan motor thawm a hre tlat mai, a lawm em em a, eng mi pawh ni se a ruala kal ve ka dil tawp ang ti rilru in a lo nghak tawp mai a, chu motor thawm pawh chu a rawn hnai tawh viau mai, minute khat vel a nghah leh hnu chuan car pakhat hi kawi-ah chuan a rawn lang hlawl mai a, lo phar tuma a kut a lek hma hma chuan chu car chu a ding chawt, a hnung lawkah chuan car tho pakhat hi a rawn ding ve leh a, car hmasa zawk aţang chuan hmeichhia leh mipa chhelo tak, mahni inrintawk hmel zet chu rawn chhuakin amah chu an rawn pan a, car hnuhnung zawk aţang chuan hmeichhe pahnih leh mipa pakhat, hmelchhe lo tak chu an rawn chhuak veleh bawk, anni erawh a hmasa ami te aiin an naupan hmel deuh, car hnuhnung zawk a chuang te zinga hmeichhe sam tawi zawk chuan, 'eng nge ni a Zorin', tiin an hma ami te chu a rawn bia a, hmeichhia zawk chuan lo chhangin, 'ţanpui ngai a nih hmel', a ti sap ringawt.



Chulai ramhnuai kawng zau lem lo, car lian vak lo tan pawh a tlan nuam tawk lek ni si laia hmeichhe tleirawl pawr fap, chauh hmel tak leh a chapal bun te lah chu thler hni hne tawh a lo awm mai chu mak an tiin pawh mai nachang an hre bik lova, mahse hmeichhe upat hmel berin, 'chibai, nula, ţanpui i ngai em ni?', Ti chunga a pan takah chuan midang pawh chu harh chhuakin an rawn pan hnai ve vat a, Tehruaii pawh chuan hmeichhe pathum lai mai awm ve leh amah an rawn ngaihsak takah chuan a thla chu muang deuh huaiin 'khawngaihin', tih bak a sawi lo, a ţah a chhuak tlat a ni.



Nula samtawii bawk chu an car lamah letin tui ûm a rawn la chhuak a, 'hmanhmawh suh, hei hi in phawt teh', tiin Tehruaii chu a tui ûm ken chu a pe a, lawm taka lo banin tui chu a in khawlh khawlh hnu-ah 'tute nge innih?', A ti a, Zorin tia hmeichhe samtawiin a koh chuan, 'ele, keimahni mawle', a rawn ti nghut, Zorina chhanna vanga Tehruaii a hawihai em em lai chuan midang chu an lo nui huk a, hmeichhe pakhat chuan, 'Zorinsang, uan hun a ni lo', a lo ti nghat.



A fiamthu thawh ve dan hi a mak a nia ti sap chungin Samtawii chuan a pan a, 'harsatna i neih chuan sawi rawh ţhiannu, kan pui thei che ang em?', A ti vat vat a, Tehruaii pawh chuan Zorina fiamthu thawh dan chu nuih pui ve hak hakin a chunga thil thleng zawng zawng chu a thiam tawkin a sawi mial mial a, hmeichhe pahnih chuan an mittui hru a an lo insût pui ve hlawp hlawp laiin hmeichhe upat hmel ber erawh chu inngaihtuah mûk zet hian a lo ngawi ran thung, mipa pahnih pawh chu an inhumruh ngei mai, a chanchin a sawi zawh meuh chuan khua pawh a thim chiang viau tawh a, thla éng leh an car headlight an on vang erawh chuan an inhmu thei vek, sawi mai tur hre lovin an ngawi ţhap a, chutihlai chuan, 'hremna na thei ang ber ka pe mawlh ang', hmeichhe thinrim awrawl tih hriat tak mai hriam hrâk mai chu a zawi kher mai, mahse an hre vek thung.



'Sapui hmel ţha Genevieve hliamin a awm leh ta, lo kal rawh u, khua a vawh hi, car chhung lamah i lut ang u, Ngûr khaw lam kan pan a ngaih hmel', Zorina chuan a ti sup, an vaiin an lut ta diak a, Remremi chu Zorina leh Genevieve an tih kiangah chuan chuang ve in a kalpelh tawh lam Ngûr khaw lam pan chuan an tlan ta a, kalkawngah chuan Zorina chuan, 'Kei hi Zorina ka ni a, ka ţhiannu hi Genevieve a ni, car pakhata chuang samtawi kha ka nupui Lalrinsangi a ni a, kan fa hmasa ber tur kan chhiat hlim hlawl a ni bawk nen kan fan ngai vak loh ram kan rawn fang kual a nih hi, rilru tih thawven na atan, hmeichhia leh mipa dang awm ve kha Ruatruata leh Sharon-i an ni a, an ni pawh kha nupa ni mai tur an ni, kan boruak tawn vangin inneihna kan la buatsaih lo, unau pianghmun ni lo mah ila unau vek kan ni a, kan hneichhe pathum te hi nang ang tho a fahrah ve tho an ni, tin, sawi nuam a ni hauh lo naa kha, i bula ţhu kha i tawrh ang chiah lo tuar ve tawh tu a ni a, chuvangin i unau te angah min ngai la, i chunga tenawm taka khawsa chu tupawh ni rawh se, hremna kan pe ngei ngei ang, thlamuang takin awm rawh aw Tehruai', tiin a fuih mawlh mawlh a, Tehruaii pawhin a kianga awm te nen chuan inanna zawn tamtak an nei a ni tih hre ve thiamin hahdam takin thawk a la ve siai siai mai.



Lehlamah chutia Ngûr khaw lam pana thinrim rilru ţeuh chunga an tlan lai mek chuan Chhanhima te in lamah erawh an buai nasa mai a, ţhenawm khawveng rawn tlan lut ţhenkhat te chuan chutia pa zaidam ber mai Chhanhima meuhin Fakzuala thisen chhuak hne hnu a a lo khawih mai chu mak an tiin an hrilhhai hle a, ţhenkhat pa vengva deuh chinin amah Faka te in lamah an tlan bawk a, zu in ei chhia in a nungchang pawh ţha viau lo mah se mahni fa te na nâ na chu an hmangaih a ni ang e, engmah hre hawt lo chuan Faka nu chuan Chhanhima chu a ankhum nasa viau a, a thinrim luat vang nge ni dawn, Chhanhima lah chu ţawng mai thei lovin a khur ngawt ngawt mai a, thil awmzia hria lah a nupui leh harh pawh harh ţha lo Faka chu an ni mai.



Hlimpuii lah eng han sawi thei bik lovin a ţap pur mai a, a pasal an ankhum hlawih hlawih mai chu hrehawm ti takin a lo ngaithla ve chawrh chawrh ringawt, an ţhenawm chiah an ni bawk a Tehruaii pi leh pu te pawh an rawn tlan lut ve bawk a, Tehruaii pi leh pu, pi Sangmawii leh pu Chunga a hmu chiah chu Chhanhima chuan a kawk khur ta ngat ngat mai thinrim takin, 'nangni vang vek hi a ni, in tunu fahrah leh rethei lutuk chu zan khawthim hnuaiah inhnawtchhuak a, he mipa, ruih bak thiam nei lo hian in tunu chu lo hmutaiin dimna tel map lovin a sual a sin', a ti ta riap mai le.



Chutia a sawi takah chuan pi Sangmawii pawh chu eng a hria chu ni maw, a ngawi ve dâk mai.



Chutia an lo awm laih lai chuan motor thawm a rawn awm ta, an in kawt lawka rawn ding ni mah se tumahin an ngaihsak lo, a fapa chu sual hle mah se la chutiang em em ti tura a lo rin phal loh vangin Faka nu chu a na em em a, a fapa na tuara let bal mai chu thlir ngawih ngawihin a lo ţap hawm hawm mai a, fa te tihsual hian nu leh pa a lo vaw na ber a nih mai hi!



Ţap thawm a awm bawk nen, Tehruaii te pawh chu inmelh kual chungin thil awmzia hriat tumin Chhanhima te in chhungah chuan an lut ve rawih mai a, ţhenawm hnai zual leh khawtlang hruaitute lo awm ţhap mai leh Fakzuala tlu reng mai bakah, a pi leh pu te nen lam a hmuh takah chuan Tehruaii pawh chu mak tiin a hawi hau mai a, Genevieve erawhin thil awmzia a lo chhut ru niap niap thung, thisen nen a let rum mai chu Tehruaii khawihtu a nih ngei a ring a, chutia an ţhenawm lawk, a chanchin lungchhe taka a sawi lai khan hmangaihtu awm chhun ni hiala a ngaih Chhanhima te in a lo ni kher nen, mahse chutia Tehruaii sawi pawh ni lo, a hma zan lawka thil thleng ni si chu hriat chhuah ngaihna awmin a hre chiah si lo mak a ti ru ve tho mai.



A inngaihtuah mûk viau lai chuan Tehruaii aw thâm chhel maiin, 'U Chhanhim', a ti lawi rât ri chu a hria a, a hawi vat, Chhanhima melh reng chung chuan Tehruaii chuan, 'ani hi em ni? Amah hi a ni em min sual tu kha', tiin a mitmeng chu a sen deuh râm mai a, mitin mai chuan amah chu mak ti em em hian an en vek, Chhanhima pawh chuan lo chhàwn vatin, 'a nih kha', a ti nghut.



Tehruaii chuan engdang mah sawi lovin rei pawh a la hriat loh, a rinchhan ber lo ni ta Genevieve chu a en tawp a, Genevieve pawhin lo hrethiam vatin amah chu a ţawng ta a.
Ţhian leh unau ni bawk vah khawthawn paha an fan ngai loh ram an han fan chak vanga chhuak an nih dan te, khua ah pawh riak lem lova an puan in te kaiha hun an hman ţhin thu te, ei leh in an ngah vak tawh loh vanga khua an hmuh hmasak ber pan ngawt tum an nih dan te sawiin an kalkawngah Tehruaii an hmuh hlawl thu leh ţanpui ngai nia an hmuh vanga an pawh thu te, Tehruaii chuan a chanchin a lo hrilh dan leh amah khawihtu hmel pawh a hriat loh thu te a sawi a, chumi vanga khuaa rawn let pui an nih dan zawng zawng te chu hmaih neih hauh lovin a sawi ta a, engtia lo inman chhuaka hetiang hi thleng ta mai nge an nih tih a zawh chuan Chhanhima pawh chuan an huntawn, amah Faka ngei an kianga a rawn inpuan thu leh a thinrim khaw hmu lovin a khawih mai thu te a lo sawi ve bawk a.



Genevieve chuan uluk taka lo ngaithla in Chhanhima thusawi zawh veleh , 'kei chuan hmeichhe hlutna ve ber, kan inchhuanna neih ve ber, kan zahawmna kengkawhtu ni hial mai chu, chhuh luih a ni hi rem ka ti lova ,thilsual titu chu eng mi pawh ni rawh se, ngaihdam tlak a ni lo, he mipa hremna ka pek na tur kawngah hian min dan tumtu chu eng anga milian pawh ni rawh se, ka pal lui zel dawn a ni, dan rorelna hi a tuartu tan a nep lutuk, ka ram dan zah viau lo ila chu keimah ngei hian dam si lo, thi si lova kum tam awm tir ka duh a ni, chung chu ti hlawhtling pawh ni ila he ka nau, Lalhruaizeli hian engtik khawtikah mah a thianghlimna a nei let dawn lo', a ti hmiah hmiah mai a, tumahin chhan let pawh an tum lo.



Mahse, an rin loh lutuk maiin Pi Sangmawii chuan a tunu Tehruaii chu a rawn kek ta bawrh bawrh mai le, an vai chuan an hamhaih luatah chet mai nachang an hre lek pek lova, mahse rei hawihai lovin an va pawt sawn vat.
'Nang hmeichhe tenawm lutuk, nang hian i duhthu vang rengin i dawh a ni khawp mai, naupangchhia pawh ni lo, chutia mipa kawihher theiha i awm chu i hur sual vang bak a ni lo ang e, tunah pawh i ţhat khawp kha, zahna nei hauh lovin i la rawn let ngam a, ka tunu i ni lo, hetiang tunu ka duh lo', tih leh ţawngkam chhe tinrengin a ankhum bawrh bawrh mai a.



Mak ti taka chutiang khawpa a tunu-in thil hrehawm tak a tuar chung pawha a thisen kai ngei zawk a dem ta daih mai chu Pi Sangmawii an en ţhap lai chuan,
Tehruaii chuan sam thur deuh bam chunga a pi chu fiah taka melhin, 'ramhuai ini hial lo maw, i tunu chu ka lo ni ngei e, zahna tur ngawih ngawihah pawh ka zak miah lo, hmeichhe tleirawl la naupang tak, kei a kum ang rual leka a thianghlimna hloh hi ka zak map lo a nih chu, a mak iti em? A mak lo, thil sual titu zawk ka ni lo tlat, chuti chuan mak i la ti em, i tunu chu ka lo ni takzet e, zahna chang hre lo pîtu kan ni e', a ti ve ţhak a.



Hmeichhe zaktheilo tih paha Pi Sangmawiin Tehruaii kutthlak tuma a kut a lek chiah chu, 'ka kap hreh lo che a nia', ti zawi fiah kâk ah chuan a tawp chawt.
Aw chhuah na lam an han en nak chuan Detective Genevieve chuan a pistol hmanga tin reng chungin fiah em em hian Tehruaii pi chu a lo melh kâk mai a.
Pi Sangmawii pawh chu a tawp chawt, a nupui silai hmanga tin a nih takah chuan pu Chunga chuan a inrawlh a ngai tih hriain a nupui chu a pawt sawn a, ngaihdam a dil sup bawk, Pi Sangmawii pawh silai kaw hmawr a hmachhawn takah chuan a zam ve deuh nge a ngawi dâk a, a tunu chu a la melh rum hle tho, heti em em a a tunu ngei ni si a hua hian chhan a nei nge ni ang a a suahsual vang hrim hrim zawk ni ta ang le!



Genevieve chuan Hlimpuii chu tui awmna a zawt a, an inbual pindan lam a kawhhmuh takah chuan a lut vat, tumahin ţawngzai chhat lovin an lo thlir ţhap a, ţîn lian vak lo a tui dahin a rawn chhuak leh vat, pawngsualtu Fakzuala tlu let reng mai chu a tui khai chuan a theh ţhawt mai a, an lo phu suau a ni ber mai, Fakzuala pawh rawn che ve ţual ţualin hawihai zet hian a rawn meng phawk hrâ a, a taksa nat vang chuan a ţhen leh chawk chawk ţhin, 'tute nge innih a?', Tiin amah lo thlir ţhap tu te chu a lû dawm vang vang chungin a melh hau mai a, Tehruaii zawn a mitin a chhui thlen rual chuan a mit kal lai a tawp chawt, huatna mitmeng nena lo melh kalh tu a hmuh chuan, 'ka hre teuh hle mai che', tiin a phun sup a. 



Chhanhima insum zo lo pek chuan ţawngkam chhia phuh chhuakin lemchang buai lo turin a lo ti nghut a, han ţhàm leh nek chu a chak tih a hriat reng mai. Mahse Fakzuala mitmeng buai ru tak mai chu Genevieve chuan lo hmu thiamin, 'a ţha dawn lo tawp mai', ti paha Chhanhima chu lo khapin Fakzuala chu a hnaih vat a, Faka awm dan chuan a ţhawng hlawm bawk a ni ang, an lo ri nuai nuai a ni ber. Chung thawm te chuan a luna chu a ti zual telh telh mai a, a hnu deuhah phei chuan a vial ngawng ngawng, puakkeh mai tur ni awma mawi hian a hria a, 'thawm lo nei rih lo hram teh u, a lû-a a hliam tuar hian a khawih pawi deuh niin a lang, tuilum a awm em?', A tih zawm nghal zat a, rang taka Hlimpuii chu che sawk sawkin mei a nun vat a, rei lo-ah tui lum chu a peih ta mai reng a.
Puan thianghlim nen a hliam tuar te chu han tih fai sakin Genevieve chuan, 'Damdawi in kan pan pui a ngai ang', a ti a, Faka chu a hliam an buaipui sak lai chuan nikhua a hre leh tawh lo.
'Helai hnaiah Nurse emaw, Health Worker emaw koh mai tur an awm em?', Genevieve bawk chuan a ti leh a, Faka dinhmun chu a ţha lo tih hria-in anni pawh chuan an khua-a Nurse pension tawh, Champhai Damdawi in lama thawk ţhin Pi Thluaii chu an ko vat a, ani chuan a dinhmun te en-in Genevieve sawi ang bawk chuan Damdawi in lam panpui a ngaih thu sawiin nachhawkna a kawl sân ve ber hmang chuan a chiu a, Faka nu pawh inthingharhin an in lamah a fapa an sawngbawl lai mek khan kalin Faka thawmhnaw thlakna tur leh pawimawh tur ni a a ngaih te chu a rawn keng lut ve mek bawk a.



Tichuan Zorina te chuannaah chuan Zorina nupui, Lalrinsangi chu insawnin Genevieve, Zorina leh Tehruaii te nen chuan hnung an dawl a, Ruatruata leh Sharon chuan Faka leh a nu chu phur ve bawkin hma an hruai ta a, kawng nuam tak ni lo mah se hmanhmawh a ngai tih an hrethiam vek bawk a, hmanhmawh tak chuan an tlan pui a, khua an chhuahsan hian zan dar 12 a ri der tawh a ni. Ngûr aţang hian ke-in darkar thum vel kal a ni a, Motor nen an niin an hmanhmawh bawka darkar khat vel an tlan chuan Champhai chu an lut mai bawk a, Champhai Damdawi in lam pan nghal vatin zanrei tawh viau mah se a serious viau avang chuan Doctor leh Nurse duty te chuan an lo ngaihven vat a, an buai nak nak hnu-ah ICU ah an dah lut ta hial mai, Faka nu chu ţap ri lo mah se a mittui a tla reng a, mi pasarih ngawt an nih vang chuan awm vek an phal tak tlat loh vangin Faka nu leh Zorina chu Damdawi in lamah chuan awmin midang chu riahna tur an zawn a ngai dawn a ni, an chhuahsan hma chuan Genevieve chuan Tehruaii hnen-ah chuan, 'i intest a ngai, he pa chi hi i taksa ah a awm leh awm loh finfiahna kan mamawh a ni, ila insil lo tiraw?', A tih chuan a lo bu nghut a.



A case a serious avangin zan tlai pawh sawi lo chuan Doctor te pawhin an han buaipui leh zung zung bawk a, result a chhuah huna inhriattir leh tura an inhrilh hnu-ah anni pawh chuan Sharon-i te'n an riahna tur hmuh an sawina hmun lam pan chuan an kal ta a.
Tehruaii an test lai khan Sharon-i leh Ruatruata te'n riahna tur hmun an lo va zawng thung a, Damdawi in aţanga hla lutuk lo ah chuan man chawia riahna tur an hmu hlauh mai, hotel changkang tak han panna turin a tlai tawh bawk nen lungawi takin an awm ho ta a, pindan pahnih chauh hmunruak an lo nei bawk nen Ruatruata leh Sharon-i chu pindan pakhatah awmin Genevieve, No-i(Lalrinsangi/Ring the bell-i) leh Tehruaii chu an pathumin pindan pakhat an inţawm bawk.




An han intihfai a an mut hnu chuan an thiam tawpin an hnem ve a, Genevieve ber chuan chutiang ringawt sawi chu a ţha lo tih hriain fiamthu te thiam lo zet chuan a thawh bawk a, a fiamthu thiam loh em vang chuan an nui hak hak, chutia an titi ho mek lai chuan Tehruaii chuan, 'kei chu u Fakzuala kha thi se ka duh lo', a ti chhuak hlawl mai, a rilru tur hrethiamin an lo bu nghat nghat a, ni e, Damdawi in lama awm te leh pindana mu mek te, Ngûr khaw lama an huntawn boruak hria te ho chu awmhmun inang si lovin an rilru ngaihtuahna erawh Fakzuala ah chuan a awm vek a, thi turin an duh lo vek a, an duh loh chhan erawh chu a hrang daih. 



Midang zawng chuan thilsual titu mah nise an ţhenawm hnai, an khaw tui liak a ni a, sual ve viau ţhin mah se thil sual eng anga nasa pawh tiin hremna pawh hmu se awm an ti, thih kher chu a phu bik lo an ti a, a chhungte rilru erawh an fapa khawsak danah chuan na viau mah se an thisenzawm a ni miau a, an hmangaihna a chak zawk a ni. An lainatin pawi an ti a, chuvang chuan a thilsual tih an va thlawp ta tihna erawh a ni lo. A pa erawh pa dik a ni bawk a, a fapa chu a hrin ngei mah nise a dem a, chuvanga Champhaiah pawh zui ve duh lo a ni reng bawk a, a nupui kal tur erawh a hnial bik lo thung. Tehruaii leh a lama ţangte erawh chuan an duh loh chhan a dang, dam chung ngeia a thil tihsual hremna hmachhawn tir an duh vek a ni, chupawh chu a la tawk zo lo ni-ah an ngai vek thung a, a thih mai chuan a hremna a nep an ti a ni, mihring ngaihdanah leh a tuartu rilru puthmangah chuan thil awm tak pawh a ni reng a ni.



Hahdam an mamawh tih hriain reilote tal muhil ang u an ti a, buaina nei hran lovin an muhil sak sak hlawm, Tehruaii erawh a mang lamah a huntawn bawk khan luhchilhin a tal sek a, harh erawh a harh mai lo. A hunlai kha chuan beidawnga vei hman a ni lo tih hriain a intipaukhauh lui ve ngat ngat kha a ni a, tunah chuan rin chhan tur a nei ta bawk nen a natna te chu a thiam ang tawkin a tuar ve ni hmiang, a manglamin a nghawng tih hriat takin a thlan te chuan a bual huh hliam mai a.



Buaina lian tham erawh a nei bik lo.



Ni thum lai an awm hnu-ah pawh chuan Faka chu a harh thei lova, an zing aţang chuan pakhat talin nitin an awmpui zel thung, mipa an ni bawk a, Ruatruata leh Zorina chuan an awm pui mai zel a, thilsual ti ve miah lotu Faka nu chu an lainat ve a ni, a fapa tihsualin nasa taka a nghawng hnu lawkah tina tu ngei a fapa chu thih leh dam inkarah a awm miau mai a, a tla kuam mai. Chutih lai chuan Tehruaii an test na result pawh a lo chhuak bawk a, a chi chu a lo awm ngei e, finfiahna an nei bawk a, Tehruaii lah kum la tling lovin kum 17 chauh la ni mah se a huntawnin a zir bawk a, naupangchhia taka khawsa mi a ni lo bawk nen, hremna chu a hmu ngei dawn e, mahse, pawikhawihtu ber chu a la harh tlat loh avangin Police venhimna dawng chung zelin Damdawi in-ah chuan Fakzuala chu a awm ta rih a.




Kar khat ţha zen zawn an enkawl hnu-ah chuan Faka dinhmun pawh a rawn ţha chho a, harh mai thei dinhmunah a ding tawh a ni, mahse, a hriatna ţhenkhat chu a lu lama hliam a tuar vangin a hloh mai theih thu Doctor chuan a sawi tlat mai, chu chuan a kam deuh ţhûm hlawm a, mahse chutia a rawn kân deuh tak hnu chuan mak khawpin a rawn ţha sawt sawt mai a, ni khat a liam leh meuh chuan a rawn harh ta hlawl mai.



Fakzuala harh chu mak ti tak hian a hawi kual a, a hliam an tuam te chu a han en ţhin, a kân chak em vanga a harh mai ringin an nghak ţhap bawk nen midang pawh an kim vek a, a nu leh Tehruaii chu a hriat chhun an ni, a nu mittui tla pâr mai chu enin zawite hian a ko sup a, thawm dang a awm loh vang erawh chuan an hre vek thung, an hmel chu a hlim sawt hlawm a, a hmabak la ko viau mah se a thil tihsual hre miah lova a awm ai chuan a hlu an la ti tho hlawm a ni. Tui tlem a zawng a'n han tulh hnu chuan a hawi kual nawn leh ngat a, Doctor leh a nu bakah midang lo bial ţaih tute zinga police hmel a hmuh ve takah chuan Faka pawhin thil awmzia hrethiamin, 'ka inpeih e, Tehruai, i chunga ka thil tih kha a dik lo takzet a ni, ngaihdam dil tumna che ka nei lova, a chhan chu ngaihdam tlak ka ni lo a tin ni, mahse khawngaihin, ka chunga hremna in lekkawh hma-in ei tur min pe ta che u', tiin a sawi zawm zat a.


Chutia an beisei san loh viau laia a rawn harh hlim maiin thil engkim mai a rawn hria leh eitur a han dil mai chu mak an ti hlawm viau mai, an hrilhhai letling zawk mah a, mahse harhchhuakin a nu chuan a fapa ei theih tur zawng chu Doctor zawt vatin a hrilh hnu-ah chuan dawr lam pan tumin a tho thuai a.



Chutichuan harsatna dang nei lova rorelna hmachhawnin finfiahna a awm mai bakah amah ngei pawhin a pha lo bawk nen, Champhai Dist. Jail ah chuan a lut ve ta a, Tan-in a awm mah ni se in check-up leh tura tih a ni thung, mak tak maiin Genevieve chuan Tehruaii a biak vek hnu-ah an ukil chu be lehin pawikhawihtu ngei, an mi khin ber mai chu zahngaihna leh hremna nep thei ang ber pe turin an han dil a, mak an ti tlang teh e, ngun taka an ngaihtuah hnu-ah Kum 7 chhung Jail tang turin rorel sak a ni ta a ni. Tehruaii leh Genevieve chu an ţhiante chuan an en hâ a, anni erawh chuan an lo buk khum nghat ringawt.



Fakzuala pawh chu a mittui a tling ve pum mai a, a inchhir takzet tih a lang reng mai, man chawia an riahna hmun an thlen chuan an thiltih chhan an ţhiante'n an han zawh chuan Tehruaii zawk chuan lo chhangin, 'a tihsual a hria a, a inchhir bawk, rilru thar leh nun thar nen a rawn chhuah ngei pawh ka ring a ni. Mahni diklohna pawm ngama hremna tuar ngam mi chu eng mi pawh ni rawh se, ka ngaisang a ni, kei chuan chhungkua ka nei ta che u a, ka hlim a ni, engtikahmah ka thianghlimna ka nei let tawh lo ang, mahse, keimah vang leh amah vang ni bawkin nun thar a nei ngei ang.' inringtawk tak chuan a ti charh charh a, chu chu ka ngaihdan chiah a ni tiin Genevieve chuan a lo thlawp ve zat bawk.



An case chu puanzar loh nise tiin dilna an thlen bawk kha a ni a, a chhan pawh hma hun tamtak a la nei a, mite entleu a hlawh an hlauh vang a ni.
Tehruaii erawh chuan a pawina a hre hauh lova, mite hmuh danah ka buai lo, keimah ka dik tih ka hria a, nangni hian min hriatpui bawk, he thil thleng vanga mi pakhat tal pawh a lo fimkhur a, a lo inhmuhchhuah ve phah chuan chu chu a ţha a ni a ti thung a, mahse thil thui zawk an dâwnin a ţha lo an ti a, a tam zawk duh dan chu an kalpui ta thung.


Zanin chu Champhaiah hian riak leh ila, naktuk lamah Aizawl-ah kan haw thla dawn nia tiin ro an rel a, khua a la thim lo bawk nen an han bazar leh rih a, Tehruaii ta tur ngawt an melh ţhup vek.
Tehruaii pawh chu inthlahrung ru deuh mah se, a hlim em em a, unau ang tak takin an en ni ngeia hria-in a chhungkuaah a pawm hmak mai a ni.
Tichuan an bazar zawh hnu chuan an thlenna hmun lamah kalin a tuk zingkar a chhuak tur an ni bawk nen bill te chu an ti fel ta a, thlamuang takin zanmu an chhing ta siai siai a.
Zingkarah tho-in an bungraw neih an pack fel sa vek tawh bawk nen an chhuak ta vat a, Aizawl lam pan hmasa lovin Ngûr ah chuan Tehruaii thil pawimawh la turin an kal phawt a, Tehruaii chhuak tur kha inrinlawkna awm lo leh thleng nghal mawp mawp a nih ve avang khan certificate, nakin zela ala mamawh tur te leh a nu leh pa te nena a sênlaia an thlalak, hlui ve angreng tawh tak chu an la a ni, a pi leh pu te pawh chuan dana ţawngkam lo neih an tum hran bik lo, an chhuahsan dawnah erawh an rinphak hauh lovin, 'inenkawl ţha la, i nu leh pa tlawh pah leh i pi leh pu te laka phuba la tur talin lo kir leh ang che', tiin Pi Sangmawii chuan a tunu chu a thlah khauh!

Midang chuan Pi Sangmawii chu a inhmuchhuak ve a, mahse tlawm a hreh vangin ngaihdam a dil duh si lo ţawngkam ni-ah an ngai mai a, Tehruaii leh Genevieve erawh chuan sawi lem lo mah se a pi khawsak danah chuan thil inthup engemaw tak a awm an ring ru deuh, mahse tunah zawk nghal an duh lo mai a ni.

Chhang let lem lovin an chhuahsan a, Chhanhima te in-ah lut lehin lawmthu a thiam ang tawk chuan a va sawi leh a, nui var var hian an nupa chuan an lo thlah a, duhsakna an hlan mawlh mawlh bawk. Chutichuan, tawi khawmuang tawh lovin Aizawl lam pan tum chuan an chhuak ta a, kawng lakah chaw eia an chawlh bak an chawl khawmuang lo bawk a khaw thim hma-in Aizawl chu an lut a, No-i in, pasal a neih tak avanga Sharon-in a luahlum tak, Laipuitlang ami ah chuan an han haw khawm phawt a, khawsak pawh rel peih lovin pawn lam ami an chah ta ngawt a, Sharon-i leh Genevieve-i chuan an kianga awm turin Tehruaii chu an inchuh nghal pang bawk.

Zanriah an kilho lai pawh chuan an inhnial reng a, Genevieve tihngaihna hre lo lutukin, 'nang chu pasal i nei mai dawn, kei chu keimahin ka awm a, pasal ka nei lo bawk, bakah ka upa ber a, min hnial thei lo ang', a tih te chuan an nui ham ham hlawm a, Zorina te nupa in an lo chuhfiam ve bawk nen an thawm a ţha teh e, ri lê-lû chung chuan zanriah chu puar leh tlai takin an ei tlang ta a.

Tichuan, Sharon kianga awm rih a, Ruatruata nen an inneihna a zawh fel veleha Genevieve hnena awm turin Tehruaii chu an ti a, ani pawhin chutiang khawpa an hlut chu nuam a ti viau mai.

Midang ho zawng chu zanrei tak thleng an awm hnu-ah an chenna in lama haw ţheuhin, Sharon-i leh Tehruaii chu an ţhiante an thlir liam hnu-ah insilfai zuai zuaiin mut zai an rel ta a, pindan hran awm tho mah se Sharon-i chuan mutdun a rawt tlat mai a, Tehruaii pawhin a unaunu ang maiah ngaiin a lo pawm pui ve nawk enn an mu dun rial mai, rei vak lo titi dunin an tlan chau deuh bawk nen an titi pawh a zuihral tial tial a, tui takin an mu ta a.

Tehruaii chuan mang mak tak neiin a mangah chuan a pi Sangmawii thisenin a bual huh zuih chung hian a lo let reng mai a, a âwmah tak Chemte bûr vâ a hmu bawk, mak lehzual deuh mai chu amah ngei chuan a pi âwma chemte bûr chu a lo hum ran mai a, hrilhhai taka a awm lai chuan a u lo ni ta anga a ngaih hmak tawh Detective Genevieve Lalzarzovi ngei chuan, 'Lalhruaizel, pi Sangmawii i thah vangin man ini', tiin a silaiin a lo tin reng mai.

Thlan tla hluamin a harh hlawl mai a, dim light an chhit avangin a eng rei ruai bawk nen hamhaih rei lovin a awmna chu a hre vat a, a kianga tui taka muhil sak sak mai Sharon-i chu a en a, tihharh hlau tak chunga tho chhuakin bual in lam a pan a, toilet a ţhu chungin a kut chu a en ngar ringawt, a mang mai mah nise a tak a ang em bawk nen a ţhawng takzet a ni.

Chutia ngawi renga rei fe a ţhut hnu chuan Sharon-i rak tuar thawm chu a hria a, hmanhmawh taka bual in chu chhuahsanin a thil va hmuh chuan a ţhawng kher mai le.

Pa lian tak mai pahnih hian Sharon-i chu hneh zet hian an lo man bet a, a au zawm loh na turin pakhat zawk chuan a kâ a lo hup bawk, a unaunu chu ko-in Tehruaii chu a au ţhat a, mipa te pawh chuan an rawn melh vut, Sharon-i au thawm avangin Tehruaii rawn lut thawm chu an hre lo a lo ni a, 'ka unaunu kha chhuah rawh u', tiin zam hmel put loh tumin a vau ve kha kha.

Chumi te pahnih chu inmelh in pakhat zawk chuan Sharon-i chhipah tak chuan a tha tawpin a chum bur mai a, ani pawh a zal der mai, Tehruaii lam an pan tihah chuan, 'tute nge innih? Engvanga rawn lut ru nge innih?' Tiin hnungtawlh hrat hrat chungin a zawt a, a aw chu a khur dar dar mai.

Chhang lovin an hnaih zel a, Tehruaii au chhuah tum chu a tlai lutuk deuh a ni, anni chuan dim lo taka kutthlakin engmah hre lo chuan an siam a, an khumah chuan Sharon-i nen chuan dah dunin anni unau engmah hre lo leh che thei lo chu khawngaihna lei lo lêkin an sual dun a, pakhat ve ve-a an mutpui mai chu duhtawk lovin an chan lam an han thlak thul, eng ang taka hrehawmna nasa nge an tawrh leh dawn ni?!

An duhtawka an khawih hnu chuan pakhat chuan han reh hlum mai a tum a, mahse a ţhianpa chuan 'Rosang, that suh, tute nge kan nih an hre chuang lo, inthupna(mask) kan hmang tho a, thah kher zawng a ţha lo e', tiin a lo khap a, tichuan fimkhur takin an chhuahsan zui ta a ni.

Tehruaii te pahnih erawh an kalsan dan ngai te tein an la awm reng a, an lû-ah leh taksa remchang lai laiah kut an thlak avangin an harh mai hauh lo, zing lamah pawh thawm an neih har em avang chuan Sharon-i pasal hual, an ţhenawm chiaha awm Ruatruata chu a ngaih a ţha lo ru hle a, a nupui hual hi rei tak a mu ngai lova, a thawhkhalh zawk ziah tih a hrechiang tawk a, mahse, an zin chau ve bawk nen mut lam an âm ve deuh ni-ah ngaiin va kaihthawh erawh a tum bik lo, mahse, tukţhuan ei hun-ah pawh thawm engmah an neih loh avang chuan va kaihthawh tumin a phei a, mahse, an in chu pawn lamah tala tel si lovin a lo inhawlhkalh reng chu niin.

A mobile phawrhin a call vat a, inchhung lamah thawm chu a awm si, phone ring ral ral ngaithla pah chuan mak ti em em hian a ding khawng deuh reng a, mahse, eng thil emaw tla keh chuai ri a hriat rual chiaha hmeichhe rak ţhat thawm a hriat chuan rang taka kawngkhar chu hawngin in chhungah chuan a lut a, Sharon-i pindan lam a pan nghal vat. Pindan chhunga a hmangaih em em, nupuiah hial pawh neih a duh, rokhawlhna engemaw avanga a nupuia a la siam loh chauh a hmangaih Sharon-i thawmhnaw engmah inbel lova khum bul chhuata lo mu a ama lam lo melh ţawk ţawk tu leh, a bul lawka Tehuaii engmah hre lova saruak vek bawka lo let bâm mai a hmuh chuan chet nachang hre lovin a ding khawng reng a, zawi zeta Sharon-in a rawn auh takah chuan a va hnaih vat, dimdawi zeta chawi kangin khumah chuan dimte bawkin a mut riai riai a, puan in an pahnih chuan a khuh nghal vat hnu-ah a hmangaih kiangah chuan ţhut nachang pawh hre lovin a ding khawng lehnghal luah a, a mit chuan a nupui hual chu a melh ding ngur bawk.

Mak a ti a, a rilru a na bawk, thil thleng tur awm chu a hrethiam vek a, mi â ni hek lo le.

Sharon-i chuan hliam a tuar nasa lo zawk bawka a a mobile ri-ah khan a harh a, amah call tu a hre si, a mobile a ban pha bawk si lo chuan beiseina chhete tal nei lui chawpin harsa ti takin a mutna lam sira a pangpar khawina pot, glass vek chu a tha tawpin a nam kha a ni a, thatawp hmang a ni bawk a, ani pawh chu chhuatah a tla ve nghal dawpin a rak ţhat, chu thawm ngei chu a ni Ruatruata khan a hriat ni, a pasal hual hamhaih lutuk chu chau tak chung leh mittui luang ngiai ngiai chunga melhin, 'Genevieve te call rawh', a ti sap a, Ruatruata pawh harh zawkin a phone chu a hmang chhunzawm nghal zat a, Genevieve a biak hnu-ah an in lama tlan leh vatin a pa a ko chul a, thil awmzia chu bah naka sawiin a pa chu a pawt kal dawr dawr.

Ruatruata pa, pa Zoa'n a fanu ang maia a en Sharon-i leh a unaunu thar Tehruaii dinhmun a hmuh ve meuh chuan ani pawh chu a meng dur nghal khup mai a, mahse pachang tak a ni bawk a, a motor la chhuak vatin a a fanu te chu an zawn chhuak a, ţhenawm khawveng te'n rawn hmu ve-in an pui bawk, a fanu te chu Damdawi in an thlenpui vat a ngai tih a hria a ni. A pasal ni mai tur pa, Pa Zoa a hmuh chuan Sharon-i pawh a thla chu muang deuh huaiin a mit a chhing riai riai a, a intiharh lui peih tawh ngang lo a nih kha.

An motor ah chuan Ruatruata leh a u Francis-an Sharon-i te unau chu an veng a, pa Zoa'n a khalh thung, a rem lovin hmanhmawh tlan an ni bawk a, an buai viau, Ringringi(No-i) nu damloh laia an dahna hmun New Life bawk chu an panpui a, an thleng chiah tihin Genevieve leh Zorina te nupa pawh an rawn thleng ve nghal bawk. Tichuan hmanhmawh taka che rum rumin Tehruaii chu ICU ah dah luh a ni a, Sharon-i erawh dah luh em ngai ve lovin doctor te chuan an enkawl vat vat a, ani chu a lû a an chumna leh an pawngsualna avanga a taksa dang dang nâ ve bak chu na dang a nei lo bawk a, darkar chanve vel bawr an han buaipui hnu-ah chuan a lo harh mai bawk a, a kianga awm te chuan a thla an muan hneh bawk a, an chunga thil thleng, a hriat ang chen chen chu a sawi ta a. Pawngsual an nih ngei pawh a rin thu leh a serh nat thu te, pakhat zawkin thah tuma a chet hmaa pakhat zawk thusawi, 'min hre chuang lo, inthupna kan hmang bawk nen', a tih chu hria-in an chhuahsan rual deuhthawin nikhua a hre lo leh nghal mai tih te chu rilru na fe hian a sawi vek a.

A lo ngaithlatu te chu an thinrimna ai mahin an rilru natna a thuk zawk awm e, an meng thip râm hlawm a, Ringringi phei chu a ţap hial, midang pawh chu ţap chhuak em lo mah se mittui an khap per ve sak sak tho mai, an huntawn chu lawmna chi ziazang ni hek lo le, Ruatruata phei chu khapbeh ngai khawpin a talbuai hial, mahse inbengdai tur leh a hmangaih hnemtu a a ţan a ngaih thu zaidam taka an hrilh hnu-ah chuan a nupui hual bulah chuan ţhuthmun a rem ta zawk a.

A chungah thil ţha lo tak thleng mah se thih hlauhawma a awm loh vang chuan an ngaih an ti ţha chawp a, Tehruaii mawlh chu an lainat a ni.

A fahraha a retheih tehlul nen, pawngsualna nunrawng zet a tawk a, chu case chu an tifel zo chiah a ni a, a taksa hliam chu dam leh mah se a thinlung, hliam nasa tak tuar chu a dam tawh dawn lo tih an hre vek, a taksa pawh chu damin an chelh ang em tih hre lovin an nghak mek chu a ni si a, chutia lainat em ema midangin Tehruaii an ngaihtuah vek lai chuan an zinga pakhat rilru chu a dang tlat mai le.

Chu chu Sharon-i pasal hual Ruatruata unaupa, Francis-a ngei a ni, ani hi Tehruaii chungchang zawng zawng an hrilh lo bawk nen, ani chuan an chunga anchhia rawn kengtu ang maiah ngaiin a ţawng chhuak ta hial reng a.

A pa chuan thawm bengchheng siam hlau tak chung si leh khauh fur si hian a rawn khap vat a, ani pawh a ngawi veleh mai, a ţawngkam chheh duhdanah chuan a bula mite chu an lawm lo tih a hre thiam bawk a, ama pa ngeiin a khap avanga ţawngkam dang nei lo mai mai tih a hrethiam ve bawk nen a lo han haw tur thu sawiin a chhuahsan vut a, ngawi reng leh insehruh ţeuhin an en liam ta ngawt, 'ka zilhhau ngei a ngai a ni', tiin a pa pawh chuan a zui ve vat a.

An chhuah fel hnu chuan midang chu ngawi rengin an ţhu kun tlawk tlawk.

Pa Zoa chuan a fapa chu va umphain an pafa chuan an haw a, kalkawngah chuan engmah an sawi lo, mahse in an thlen hnu chuan a fapa chuan chutiang ngaihdan a neih tawh loh na'n leh diriamna tel lo pawha Tehruaii chu a retheih tawk tawh zia te chu zaidam takin a hrilh malh malh a, Francis-a mitmengah pawh lainatna leh inthiamlohna a lang chhuak chiang kher mai, tunhma zawng zawngin Ringringi nu lo tlu reng hmuh a nih bak kha chu tawhsual an la tawk lo bawk nen, a nau in natna khirh tak, mihring ngaiha dam thei tawh lo HIV a pai tih a hre ve bawk si, a nupui hual laizawnnh nau chhiat boruak avanga ţhulh leh rih an ni chauh a, a nau hi a hmangaih bawk nen, khatianga a nupui hualin pawngsual a tuar tel ve ta mai kha a la hriatchian ve loh, an zinga mithar awm Tehruaii ah chuan a puh ta mai kha a ni a.

A thiam loh a nih thu sawi ve supin a pa pawhin a lo buk khum nghauh nghauh, 'Mama, i nu chu tualthattu a ni a, i nau lah mite endawng natna vei a ni, a nupui hual, kan fanu Sharon-i lah nizan lamah khawihchhiat a ni a, eng em em hi nge maw keini chhung hian kan tihsual le ka ti rilru ţhin, mahse, i nau leh a nupui tur ber pawhin dam thei lo a nih hrerengin a natna an pawm thiam dun a, tuna an huntawn pawh hi an paltlang leh em em ang tih hi ka ring tlat a ni, Sharon-i hian inkiltawihna leh tling zo lo nia inngaihna a nei ngei dawn a, hmeichhe rilru thianghlim tak a ni bawk nen, mahse, chutah chiah chuan kan pafa ho-a kan ţanrual pawh a ngai dawn.'

'Tehruaii pawh a sentet aţanga fahrah a ni a, chiangin a nu leh pa a hre hman lo, chu pawh atan a na tawk tawh, a pi leh pu te'n an thlauhthla leh a, chuta karah amaha inhaikuak ve tuma a kalkawngah pawngsualna a tawk a, unau thar, kan fate rawn chhar hlauhin a nun chu a sual chho veleh dawn chiah a, hun tam a liam hma-in heti khawpa natna hi a chungah a tla leh chu a ni ta si a, lo dam chhuak leh ta tehreng pawh ni se a pawmthiam tawh kher ang em tih te ngaihtuah pui ila, kan theihtawpin kan ngaihsak ve tur a ni ang', a ti dap dap a, an ţhianho tan chuan tihtakzetin ţhingţhi chungin an ţawngţai ta hial a.

Damdawi in lamah chuan Tehruaii chanchin ţha lam hriat tur a la awm lova, Sharon-i nikhawhrelo a an siam hnu-a an pahniha khawih rawn kha an ni bawk a, a lu lamah an khawih nasa deuh nen a serious viau mai a, Sharon erawh ngaihtuahawm lutuk ni tawh lo mah se a chunga thil thleng chuan amahah nghanwg a nei nasa viau mai. Pa Zoa te kal hnu lawkah a chauh deuh vangin a muhil zawm leh kha a ni a, a rawn harh leh meuh chuan mipa chu a hlau ta tlat mai a, a pasal hualin bawihsawm a tum pawh chu duh lo lutukin a ţap nasa mai a, rilru na fe-a melh bak tihtheih an nei lo, Genevieve leh Ringringi bakah Damdawi in hnathawk te-ah pawh a hmeichhiatpui chauh chuan an hnaih thei a, an buai viau.

Mahse, Zorina chuan Ruatruata hrehawm lutuk tur chu man thiamin pawn lamah a hruai chhuak a, Car-ah ţhut luh puiin khaw pawn lam a pan pui ringawt, Zemabawk dai an thlen chuan a reh tawh tho bawka tiin a din pui a, Ruatruata a en nak chuan Ruatruata biangah chuan mittui hi a lo luang a nih chu! Zonuna'n, 'chak taka awm tum hram teh', tiin a dara nghet taka a dawmsak rual chuan Ruatruata, dam thei tawh lo tur a natna, a thiamlohna pawh ni hauh lova a pai tih a hriat tirh pawha dam taka pawm tum lui tlat tu, mipa chak ve tawk tak chu kehsawm vekin a ţap ta hawm hawm mai a, mipa thinlung na lutuk puakkeh a ni bawk a, a mipatpui Zorina ngei pawh chuan ngaihthlak nuam a ti hauh lo.

Chutih lai mek chuan Damdawi in lamah pawh chuan Sharon-i chu Ringringi leh Genevieve te chuan an lo bawihsawm ve mek bawk a, mipa zawng zawng hlauh phah vek tur a nih loh dan te an sawi mek lai chuan Sharon-i chuan, 'ka hlau lo', ţap chhuak hawk chungin a ti a, mak ti deuhin an en tawp, 'min hnema min thlamuan te ka thlahlel lutuk alawm, mahse, min en ta che u, hmeichhe thianghlimna nei lo, hmeichhe tenawm mai ka nih tawh hi, ka thlahlel lo a ni reng reng lo, ani aia mamawh kha ka nei hleinem, ani kha ka kianga awm tura chelh ngam tur ka nih tawh loh miau avangin lem ka chang mai a ni, ani chauh hlau anga ka lan chuan a na zual dawn a sin', tiin a ţap hlawp hlawp mai a.

'Sharon, ani khan i hmangaih ang chiah che hian a hmangaih ve che a, ani pawh a natna a pai chung pawh hian i hmangaihin i vuan a, inkiltawih phah lo turin i fuih fo a ni lo em ni?', Genevieve chuan a ti a, hneh ngei a tum bur. An inhloh hlen a nih chuan an pahnih bawk hi a ni kehchhe hlen tur chu, tunah pawh an kehchhe mek a nih si hi.

'Ani chu midang a ţanpui vang a ni, ani aia mipa thianghlim an awm lo, kei chu, kei ve chu, ka neih hlut ber, amah pawhin min laksak phal loh kha khang mite khan min laksak a sin, ani nen kan inang lo', a ti leh tuar a, Ringringi chuan, 'Mate, in case hi a inang reng a sin, ani pawh a duhthu ni miah lovin a kai a, a insitna leh intenna te chu nasa viau mah se a aia chak zawk hmangin a hneh a sin, nangpawhin i thei ve ngei tur a ni, i duhthu a ni lova ,chhuhluih ini zawk, i insitna leh tenna kha kan hrethiam, tling ve tawh lo niin i inngai a, mahse, chu i insitna vang chuan i hmangaihna chu tlawm zawkah i ţan tir ang maw? Thil fair lo tak a ni.' A ti nghat nghat, Ringringi chu a thin a rim lek lek zawk a.

'I tawng ve lova, chhuhluih ini ve lova, i hrethiam lo ang', tia a la hnial zel takah chuan a puakkeh takmeuh meuh.

'Sharon Lalawmpui' tia a hmingpum ngeia ko-in, 'chhuhluih chu ka ni hauh lo, ka pasal hnenah ngei hian ka hlan a ni, chupawh inneih chu sawi loh, kan inngaihzawn hma hauhin a ni! Chu thil kan tihsual avanga hremna chu Chunglam khian min pe a sin, kan fa, a pian hma hauha kan hmangaih em em kha laksakin kan awm a sin, chuti chung chuan beidawn kan tum em? Pathianin ro min rel sak danah pawm tumin inhriatloh lamah kan infuihtawn fo a sin, kan fa kan chân kha kan na takmeuh mai, mahse, Pathian pawisawi hmasa zawktu chu keimahni kan ni a, a hremna pawh kan tuar ngam a ni, nangni chu thil inti sual lo, midang tihsual rah inseng a, Pathian ropui tak hian a hrem che u i ring em? A teuh lo, khang misualte kha a ni a hrem zawk dawn ni? Chung misualte vang chuan nang hian hnungtawlh zawnga ke chheh i tum a maw?' A ti vin ţhat ţhat a, Sharon chu a lo ţap tlawk tlawk thung.

Hmeichhe luhlul tak mai Genevieve Lalzarzovi meuh pawh chu a ţap chhuak hawk a, 'ka nau te u', tih bak a sawi lo thung.

Engmah sawi tawh lovin an ţhu ngawi tlawk tlawk a, chutih lai chuan Zorina te kal ta pawh Ruatruata insumtheih deuh hnu chuan rawn letin Sharon-i awmna cabin ah chuan an lo lut ve mek bawk a, Sharon-i chuan a hlau nia an la ngaih miau avangin amah hlat thei ang ber ah chuan kawngkhar bulah an ţhu a, Ruatruata mit erawh chuan a hmangaih chu a hawisan hauh lo.

Sharon-in amah a thlakhlelhna mitmeng chu Ruatruata chuan hmuthiam thuaiin mak ti em em hian a ding hluai a, 'in inhmangaihna kha chak ber reng fo rawh se, nui hmel lemlâwi tak te leh in ţawngkam thiamna hmang te, bum ve thei lo tu nia an sawi inmitmeng  hmang ngei pawhin midang leh nangmahni pawh in lo inbum hial a ni thei e, mahse, hmangaihna hlu tak hi chu bum ve lul suh u', Genevieve chuan a lo ti a, Sharon chu a lo nui sen sen.

A hmangaih nui hmel a hmuh chuan tîm dai hian Ruatruata chuan a pan a, Sharon-i chuan amah chiah a ni a lo en ve tho ni, inhnaih taka an awm tawh tihah chuan Ruatruata bawkthlain a kuah thlawp a, na zet hian a thaw ham ham, Sharon-i pawhin a theih tawkin a lo kuah let a, midang chu inhnawhpuar tur leh anni pahnih chu hunthawl pe ni pah fawmin an chhuahsan ta a.

Sharon-i pawh chuan lem a chan chhan te chu a hrilh melh melh a, a sawi zawng pawh chuan mahni intenna chu a mitmengah chuan lian takin lang mah se lang ve dang a awm tel, chu chu Tumruhna leh Beiseina ngei a ni.

'Tunah tut tut a reh dawn lo, i taksa hliam pawh a la dam chiang lo a ni a, thinlung hliam phei chuan dam na atan hun tamtak a mamawh dawn, mahse, nangmaha chu thil beidawnna leh insitna chu i sual let ka phal lo, keimah nen, keimah rinchhanin ke pen rawh aw', tiin a sawm a, ngenngawl awrawl chu hriat hmaih luih chi ni nghal lo chuan, Sharon pawh chu a lo bu nghat nghat a, inhmangaih te chu an inpawm leh vawng vawng, an va hmuhnawm dawn tehlul em.

Genevieve-i pawh chuan bansan hmak a tum tawh hnuchhui lam chuan amah a pan zel ni mai hian a hria a, a nau te a fuih a, amah a lo infuih ve miah lo! A nau te, a kiang hnaia awm beidawnna sualin a beih te chu beiseina pek a tum a, mahse, amah chuan beiseina a lo nei ngam tawh hauh lo tih a hria a, a thil ei lai chawl meuhin a hmazawn chu ding takin a melh ngar ngar a, chutah, 'umm, ka ti ngei tur a ni', tumruhna nena ti chhuak sapin a mobile a phawrh a, a hnathawhna hmun lo ni ta HBC College Thuneitu chu a call ta a.

Call a lo lak ve leh, 'Sir, ka bang e, keimah kha nih leh ngei ka duh a ni', inringtawk taka tiin call chu a off leh hmiah!

Polite lo a inti leh si chu amah leh amah chu a innuih hak a, a kianga ţhu Zorina te nupa chuan mak tih hmel fe maia an lo en a hmuh chuan a hna ngai a thawh leh tur thu a sawi vat a, anni nupa pawh an ri hliai mai, a luhlul em vanga an nawr nat ngam loh, tuna a hnaah hian a tui hlawl lo tih an hriat ve siin hmalam pan a tum mai chuan a ti lawm a ni, tawrhna karah pawh hmasawnna tur chu a lo inphum ru zel tih xhu hrechiang an inti hle a, lawm takin an thu thar neih chu hrilhhriat ve vat tumin an thil ei lai pawj chu an thawhsan hmiah!

Nidang chu ni se a nau te chu khapin, kan hmaa ei tur awm, sum a kan lei chu ei ban loh tur, paih pawh paih loh tur a ti leh ngei awm si a, mahse, eng thil mak nge thleng ta hi, amah ber ber chu hmanhmawhah ţangin Bill pawh pe ta lo chuan hmanhmawh fe hian a chhuak dawr dawr a, Zorina te nupa chuan a liam tur chu thlirin an nuih var var a, an thil eina man te chu pe felin Damdawi in lam pan chuan an chhuak ve ta a.

An han thlen chhoh chuan hah hmel zet hian Genevieve chuan thawk a lo la kak kak a, Ruatruata leh Sharon-i te chuan mak tih hmel deuhin an lo en bawk nen an han nui lut sûng mai a, Ruatruata zawkin 'sawi ta vat che h mawle, eng nge khatia inawm hlawm a', a lo ti hluk, Genevieve chu a ding hluai a, an lo en ţhap.

A aw a then kharh kharh hnu-ah, 'No-i te nupa kan hria a, harsatna tamtak an tawk, mahse beidawng lovin an pal a, huaisen takin an hma hun an thlir bawk, tunah nangni, nupa ni mai tawh tur Sharon leh Ruata inni leh a, nangni pawhin hmalam inpan zel dawn tih ka hria, ka duhsak che u a, in harsatna leh tling ve lo nia in inngaihna paiha huaisen turin ka duh che u in ka fuih bawk che u, tichuan harsa dawn mah se, kan thei a ni tiin nangni chuan ke pen tumin rilru insiam a, kei ve hi', tiin a ngawi dat a.

A mittui a far fap bawk, an û ber, an hotu ber chutia a mittui a tla mai chuan a ţhawng a, Zorina te nupa erawh chuan an man deuh, mahse a mittui a seng khat ve em a, mak an ti lo bik chuang lo. A mittui chu hru-in a nui sâng a, a nau te chu melh kual lehin, 'upa ber ka ni a, ka lo dawizep ber si a ni, ka hun kal tawh ka inbawhbeh tir reng a, mahni inringtawk tur leh huaisen tura fuihtu che u hi ka lo inringtawk in ka lo huaisen miah lo mai a, chuvangin, û chan ka chang ta sa sa, in u nih tlin lehzual turin kei hian ka bei ve dawn a ni. Kan hotupa ka biain ka ban tur thu ka hrilh tawh a, nakinah no dawmpui pahin kimchangin ka la hrilh tho ang, nangni hian hre hmasa ber ula ka duh a ni. Tuna kan unaunu te pahnih, Sharon-i leh Tehruaii vanduaina tawh pawh hi keimah ngeiin ka chhui dawn a ni.' A tih chuan a hneh tlang bawk a ni ang, an ngawi dûk a, an hmelah chuan lawmna a inphum vek thung.

'Engpawh nise, Tehruaii la harh lo mah se hnuchhui ka ţan dawn a, duh angin ka rawn awm tam hman kher lo ang, min pui turin Zothana pawh ka be tawh', a tih chuan englaiin nge a biak an hre si lo, chu mak an ti leh pek teh e.

Tichuan an inchibai sap sap a, lungngaihna in bawhin an hmahun chu huphurhawm takin lang mah se an rilru tih tharin a awm tlang a, huphurh hmel lang eih lovin phur hmel, cho sârh hmel an pu vek. An lawm ti zual tura Doctor rawn lutin Tehruaii a kân thu leh ICU ah pawh dah a ngaih tawh loh tur thu a rawn sawi a, an zuang lo chauh a ni ber e.

Cabin an luah bawk a, Sharon-i awmnaah chuan Tehruaii pawh awm ve mai turin thu an ti tlu ta a, an indahfel hnu chuan Genevieve chuan chhuah a ngaih thu a sawi a, hrethiam takin duhsakna nen an thlah liam liam hnu-ah zâng vahin a chhuak ta a.

Genevieve-i kal chhuak ta chu a in lam panin a kal phawt a, fai taka a inbual hnu-ah chuan Zothana nghah pahin a ngainat em em mai Beer chu a dawt leh khalh khalh a, amahah chuan phurna leh chona nasa tak awm mah se a nau te case chu a awlai dawn lo tih a hre tho, mahse hlawhtlin ngei a tum, Jonathan-a case a ngaihtuah a, Ruatsaka a ngai vawng vawng, ngai ve tlak ni lo hialah a inngai a, amah vanga thi-ah a chan tlat na chuan a la kam ţûn tho mai, 'Ruatsak, min ngaidam thei lo mah la ka dem lo che, dem thei che pawh ka ni lo, mahse, nang chu i kal tawh miau a, min hmangaih ţhin a nih kha, ka thutlukna hi i pawm tiraw? Hmalam pan tur hian min duh ve tih ka ring tlat tawh a ni' tia a lo phun mawlh mawlh lai chuan a ze pangngai chhuahin Zothana pawh a rawn ri lût lawng lawng a. Genevieve pawh a nui ve suk, in tur a lo pe vat a, mûk takin an titi ta a.

Damdawi in lam pawh an hmel a nung sârh vek, Tehruaii lah ngaihtuahawm lutuk a nih loh thu Doctor ngeiin a sawi bawk nen an lawm tlang hle a, Ruatruata chuan zan lama riahpui a duh leh thu a sawi pahin in lam pan zawka intihfai a duh thu a sawi zawm zat a, Sharon-i pawh a muhil bawk nen Zorina te chuan an lo pawmpui vat bawk nen in lam pan tur chuan a chhuak a, reiloah in chu thlengin a pa chanchinbu chhiara lo ţhu a hmuh chuan a u awmna a zawt vat a, pa Zoa chuan a pindan lama a awm thu a hrilh vat.

Engmah sawi tawh lova a u pindana lutin a u in a laptop aţanga hna a lo thawk mawlh mawlh lai chu a ţham tho lawp a, a hnek pai nawk mai, a u chu a lo khi suk a, chu chuan a thinrim ti zualin a hnek nawn leh nghal zat.

An thawmah pa Zoa chu rawn tlan lut vatin a rawn khap a, thinrim mah se a pa a zah em avangin a khawih zawm tawh bik lo.

'Ka nau, i thinrimna chu ka hria e, thil ka lo hriatchian loh vang a ni, Tehruaii chungchang khatianga sawi kha ka tih loh tawp tur a ni, min ngaidam rawh', a ti a, Ruatruata pawh thinrim viau mah se a u inchhir hmel a hmuh chuan a buk khum ve nghut a, a pindan lam panin a inbual zui nghal a.

A inbual zawh hnu chuan rang takin a insiam a, a ART damdawi te chu rack-sack ah khungin inthlakna tur tlem a zawng a dah hnu-ah Sharon-i te in lamah chuan a kal leh a, Sharon-i lehkhabu ngainat em em chu la-in a chhuak leh nghal vat.

Damdawi in a thlen chuan Sharon-i pawh lo harhin Zorina te nupa nen chuan titi in an lo nui ho hak hak a, ani pawh an kiangah a va ţhu vat, reilote bak a la ţhu hman lo tihah Zothana leh Genevieve-i te an rawn lut a, a ţhat leh ţhat loh te zawta an lo lawm viau lai chuan Zothana erawh chuan ding takin Tehruaii lam chu a melh vung vung mai.

Mipa harhvang leh fiamthu duh em em, polite tak maiin an biakna te a chhan hauh loh takah chuan an han en a, Zothana erawh Tehruaii mutna bulah a lo ding run tawh.

'Amah hi a ni em Tehruaii chu', tiin Genevieve-i chu a melh a, aw tiin a lo chhang vat, 'a nu hi Lalramdini a ni em?' Ti lehin a hmel a buai deuh nak, a lo buk leh nghat takah chuan thawpik hmel zeta a lû tuai vutin chak em em leh engmah zawh hman loh chuan cabin chu a chhuahsan ta mai a, a awmdanin a tih hamhaihna aţanga an harh meuh chuan a mawngphe takngial pawh an hmu tawh lo.

Genevieve-i chuan, 'a hre sa a ni ngat mai', a ti zawi sap a, hriatchhuah a tum bur bawk.

Zothana chu biak ngei a ţul nia hriain a mobile a phawrh chhuak vat a, a call hma chuan a nau te chu an ri hak, a chhan hriat tuma a hawi nak chuan Tehruaii chu a mutna khum aţang chuan a lo ţhu chhuak hi a lo ni a, a mobile chu dah leh vatin a va hnaih nghal ve rawk rawk.

Tehruaii chu a pangngai tlat lo, a mitmengah chuan hrilhhaina, natna, tawrhna, thih hlauh lohna leh huatna leh chu a lang chhuak vek a, rawn tho chhuakin thisen chaw an khaina chu a phihthla ta mai, 'ka that dawn khawp' tiin a la ţawng chhuak zui bawk nen an din bial laih ringawt a.

'Khang ramhuai pahnih kha ka that duh', ti lehin tlan chhuah a tum ta mai, rang taka dawm betin a tal na bawk nen an dawm hneh lo ţhelh a, Zorina chu tlanchhuak vatin Doctor a va ko nghal ruai bawk ,hmanhmawh taka Doctor pawh rawn tlan lutin harsa tak chungin Tehruaii chu a han chiu a, a chiu aţanga hun rei pawh liam lovah chuan Tehruaii chu a zal nghal a ni mai e, a mitchhinga a muthilh hma chuan, 'ka that dawn tho tho' zawi zet hian a la ti sap tho.

A muthilh takah chuan Doctor chuan a check leh zung zung a, Zanlai velah chauh a rawn harh a rin tawh thu sawiin ngaihtuah lo turin a ti a, a huntawn vangin huatna a pai nasa a, a inthunun zo lo tiin a awmdan avanga hrilhhai ho chu a hrilhfiah bawk.

Ngawireng hian an ţhu hlawm a, Sharon-i pawh a natna thlir hauh lovin Tehruaii a lainat lutuk chu a lo nat pui ve ngawih ngawih mai.

Chutia an lo ţhut ţhap lai chuan kawngkhar rawn ri rakin Zothana chu a rawn lut a, anmahni pawh en lova Tehruaii lama kala Tehruaii chal a va fawh sak chuan mak tiin an lo en mawl tawp ringawt, meng sen deuh rûm chung hian an kiangah chuan kalin a wallet phawrhin a ţhu ve ta a, a wallet aţang chuan thlalak hlui ve tawh tak phawrh chhuakin Genevieve chu a pe nghal a, ani pawhin rang takin a lo ban ve mai bawk, thlalak a en vang vang hnu-ah chuan a mengphawk ta viau mai a, a nau te chuan eng tak ni maw tiin an rawn en pui bawk, anni pawh an dang chuang lo, mak an ti tih chu an hmel en chuan a hriat reng mai hlawm a.

Zothana lam chu zawhna nei tih hriat takin an en vek.

'Kha kha Tehruaii nu chu a ni tiraw, Ramdini chu', a tih chuan an lo aw dial a, a khi suk, 'ani kha ka farnu a nih kha', a tih chuan an ri leh hak.

Mahse engtinnge Zothana chu Ramdini nuţa a nih theih? Tih chu an zavaia zawhna a ni.

'Fanu a nei tih reng reng ka lo hre lo a', ti lehin a mittui a far fap a, tha nat hmel zetin a thaw leh hawk ţhin.

Anni erawh an mak tih a zual zel hi a ni hrim a.

'Ni e, Neihdawn hi ka khawchhuahna a ni a, Ramdini hi ka u chiah a ni, unau pahnih chiah kan ni a, min duatin min hmangaih ţhin hle ,keipawhin ka phak ang tawkin ka hmangaih ve bawk a ni. Mahse, Rawlthar lek ka nih lai hian ka nu leh pa, inhau ngai reng reng lo chu an inhau a, ka u chu a lâwm te nen an feh, lâwm nei rual a ni ve tawh a, lo zawh ni a nih avangin ka nu leh pa chu an feh ve lo a ni, keipawh feh tur chuan ka kal ve ngei a, mahse, vanduaithlak takin lo kan thlen hnu, bung ţan tura thlam ka chhuahsan ve tur chu chesualin ka tlahawlh hlauh mai a, ka ke chu a vûng nghal deuh bûr bawk nen bung ve lova thlama lo awm mai turin min ti a, ka ke chu min tuamsak bawk, keipawh tlawmngai ru ve viau mah ila hnathawhpui turin ka ke chu ka zo meuh lo.'

'A hnu-ah phei chuan ka ke na chuan min turin ka khua a tisik ta hial a, khawsik e ti lo chuan ka thlan hi a tla bawrh bawrh mai a, in lama va haw mai chu ka rilruk a, ka u Ramdini chu ko-in ka haw tur thu ka hrilh a, min hruai haw tu tur ngaihven a tum pawh chu a inthlahrunawm tiin khapin keimaha ka kal theih thu ka hrilh a, ani pawh chuan ka tihluih tlat vangin min ngaihtuah viau mah se a remti ve mai a, tichuan ka lo va haw hmasa ta a ni.'

'Kan lo aţanga khua a hlat vak loh vangin ke na chunga kal mah ni ila ka thleng har lo khawp mai a, mahse in chhung ka lut chu ka nu leh pa inhau thawm chuan min lo hmuak reng chu niin, an awki a sang ve angreng bawk nen khap tum chuan pindan lam ka pan a, ka nu-in ka pa chu nep, mipa lo lutuk tia a lo ankhum bawih bawih mai ka hriata ka hmuh chuan ka inrawlh vat, duhtawk tur leh mi hriata a mawi loh thu ka va sawi a, mahse ka nu chuan nang fahrah mai mai, lo inrawlh suh min ti ta zauh mai le, mak ti taka ka en lai chuan ani pawh sawisual intih hmel tak hian a hmel a pha nghal dai mai a, kei erawh awmdan tur ka hre lo.'

Chutih lai chuan cabin kawngkhar rawn inhawngin riahpui tu tur ni lo chu haw tawh turin nurse pakhat hian an rawn ti a, laklawh viau mah se anni pawh an tho sang sang.

Damdawi in kawt thleng chuan Ruatruata chuan a thlah a, Genevieve-i riah tum chu khapin buaipuiawma an awm a rin loh thu a sawi bawk, an innawr fe hnu-ah an inthlah ta hram a, tichuan Ruatruata chu a let leh ta a.

Zanlaiah Tehruaii rawn harhin buaina erawh a awm zui lo, a ţap a, a âwm a chum a, tun ţum a vanduaina tawh chu a pawm thiam tawh mawlh lo tih a lang reng.

Thil sawi tumin a kâ a âng ţhin, engmah sawi thei lo chuan a baw leh hawk ţhin a, Ruatruata chuan a kuah bet tawp mai a ni, Sharon-i pawh chuan mittui tla zawih zawih chung hian a lo thlir ve reng a, ani chuan hmangaihtu, a tling lo chung pawha hmangaiha nupuiah pawh iai chu sawi loh, neih loh a hlau zawk emaw tih mai tur Ruatruata a nei a, chuti chung pawhin a nâ a ni a, Tehruaii zawng, Fahrah nu leh pa thihsan, pi leh pu duh lo, rawng taka sual luih vawihnih tawk, chuta karah a aia la naupang lehchhawng a ni a, a natna chu va hriatthiam pui vek lo mahs e fahrah ve tho, nu thihsan, pa duh loh kara pawngsual tawk ve tho a ni bawk nen a va hriatthiam pui ve kuar kuar.

Talbuai leh chetchhuah tum ang zawnga a khawsak loh avang chuan Ruatruata chuan chhuahsanin Nurse a va ko a, anni pawh chu tlan vatin Tehruaii chu an va endik leh a, a ţap chau vek dawn tih hriain muthilhna damdawi hmangin an chiu leh ta ngawt mai a. Rei vak lo hnu-ah ani pawh biang huh hliam chungin a muhil ve leh ta suai suai.

Nupa ni mai tur te chuan inkuah rial chung hian lainatna mitmengin an thlir ngawih ngawih a.

Buaina dang nei lovin tui takin an muhil hlawm a , Genevieve te ho pawh Damdawi in-ah an ţhu leh khar tawh, a hma ni lama a sawi zawh hman loh chu Zothana chuan a sawi zawm leh a, Tehruaii a harh tak avangin a bul aţang a dawi leh thuak thuak bawk, Tehruaii mitmengah chuan mak tihna bak hmuh tur a awm lo, putea a neih a hre lova, a nu lama a pi leh pu te lah thlalak ah bak a la hmu hek lo, an hming leh khua a hria a ni mai a, intlawhpawh a har bawk nen naupang mai niin a pi leh pu te a lakah an ţha lo kan tih tawh kha, khang avang khan an inpawh lo pakhat bawk a ni.

Tehruaiin zawhna a zawh hma chuan lo khap vatin Zothana chuan, 'chutia fahrah tia min koh chuan min ti hamhaih a rawlthar chhuak tir mai mah ni ila khatih hun lai khan hlauhthawnna sawi a fiah thei lo khawp ka nei ve a ni, rei tak chhung chu kan ngawi ţhap a, pindan lama kal tura min tih pawhin ngawi rengin ka ding, a hnu-ah chuan insumthei lovin ka zawt ta nge nge a, an fa ka nih ve loh thu leh ka u la tet deuh laia an thlam kianga min chhar thu chu rei fe kan innawr ngial hnu-ah ka zawt chhuak ta a.'

'Ka nu, min hringtu emaw ka tih ngeiin chutia a fahrin ka nih loh thu a sawi zawh chuan kei chuan ngawirengin an pindan chu ka chhuahsan a ka u nena kan pindan inţawm lam chu panin sarang lian ve tawk takah ka thuamhnaw ţhenkhat ka dah khawm zet a, mahse, an fa ka nih ve loh thu chuan min vilh ngut ngutin ka thuam khungkhawm sa pawh ka dah leh a, nachhawkna hmawm zawkin in aţang chuan ka chhuak a, tichuan a tawi zawngin mi motor kal hmu fuhin Aizawl hi ka pan thla ve rawih mai a ni.'

'Tichuan, a rem rem naah awmin kar khat dawn chu awmna tur mumal nei lovin ka awm a ka vanneih a siamin ei leh in erawh ka nei chho ve zel, muţia ah te ka ţang chho a, a hnu-ah phei chuan Damdawi in canteen ah thawkin thlengsil aţangin ka ţan a hlawh ţha lo mah se ka riahchilh a, ei leh in ka dawng tel bawk nen a xia viau, tichuan thlengsil tur awm loh karah kan cook chetphung te zirin ka pui chho ve zel a, ani pawhin min ngaina in ka lo chhawk ve theih hnu phei chuan a thiam leh theihna te chu min zirtir chho ve a, kum nga dawn chutia ka inzir takah chuan kan cook chu nupui te neiin hna dang hlawk zawk a thawk chho ta a kei chu cookah ţangin a neitu te insawn na apiangah ka insawn ve zel a ni. Ruihhlo ka khawih ngai lova, mei ka zuk bak chu engmah zuk leh hmuam dang pawh ka ti lo a, ka hlawh a tam tham chho ve zel a, ka inkhawl ve nual nghe nghe, chumi hnu-ah chuan Genevieve nen hian kan intawng ta a, ka tui zawng tak a nih vang leh ka nu leh pa diktak, duh lova mi thlam bula thi tura min dah tute kha dawn chhuah ka duh bawk nen ka hna pawh ka bansan a, mahse, tun thlengin ka la zawng chhuak lo a nih hi', tiin in te fel ren rawn a luah thu chu a sawi zawm leh zat a.

Chhunzawm zelin,

'Hna kan thawk dun chho a, nuam ka tiin ka hlim bawk, mahse, rei pawh kan thawhdun hma-in Jonathana case kha a thleng a, kan tawp zui takah chuan keipawh ka thiamna neih sa chu hmang ţangkaiin thingpui dawr ka siam ta a, chumi hnu-ah Remzopuii case kha kan khawih leh a a chhan pawh Jenny pasal min biak vang a ni, Jenny thihnaah khan a ringhlel a, a ring sual lo bawk, kan zawh hnu-ah tihian ka hna ngai bawk ka khawih leh a, Genevieve-in min lo biak leh takah chuan ka hna ngai zawm leh kha ka duh a, ka nau te an fel bawk nen ka dawr pawh ka tlawh reng thei dawn tho tiin puih leh ka tum a ni. Tehruaii ka hmuh khan ka ngaihtuah reng ţhin ka u chu ka hre chhuak a, ka u khan min enhrang ngai lova, a ka aţanga ka fahrah thu pawh hria ka ni hek lo, ka nu leh pa te pawh demna ka nei chuang lo, min chawilian a, ramhnuaia thi mai tur kha nunna min pe ka ti lo thei lo, mahse, pawh leh a, hnaih leh turin ka insit tawh a ni. Hmuh leh chak ţhin mah ila ka hmu ngam tawh lo a, ka u thih thu pawh hre lovin ka awm ta a nih hi, vawikhat tal lo tlawh ila, a huntawpah tal lo thlahliam ve ila ţha tur, ka u min ngaidam rawh aw', a ti a.

Lainat hmel zeta lo melh tu a tunu Tehruaii lam hawi lehin, 'Bawihi, thisenah ka u nen khan inzawm lo mah ila i putea ka ni tho tiraw?' Beiseina mitmeng nen a melh a, Tehruaii pawh chuan aw a lo pawh vat. A nu leh pa te thihdan leh a nun chhoh dan te, tun dinhmuna a awm dan thleng chuan a hrilh ve ta vek a, Zothana chu a lo inhumruh nasa mai. A tunu, a chawi loha rethei taka seilian chu mipa mah ni se a lainat em avangin a mittui a luang a, awrawl erawh a chhuah em lo, thinrimna leh lainatna chu a mitmengah a lang chhuak a.

A tunu chu kuahin, 'i mal tawh lo e, i putea ka awm alawm, heng harsatna thlen tu che hi tupawh ni rawh se, hremna ka pe mawlh ang, ka hriat har che avang erawh chuan min ngaidam rawh aw, keimah chauh inen lovin hmangaih taka min chawi liantu ka chhungte kha lo ngaihven ni ila, heng zawng zawng hi i tuar hauh lo tur', a ti vawng vawng a, a thinlung chu a rum a ni.

Chumi hnu-ah a tunu Tehruaii chu beidawng lo tur te, a tenawm loh thu leh, huatna a pai avanga atthlak taka che lo tur tein uluk leh dam tak hian a fuih mawlh mawlh a Tehruaii pawh a bu nghat nghat, Genevieve leh a pute Zothana chuan misual chu an zawn chhuah sak thei ang em?

Chutih lai chuan Sairang lamah ve thung chuan ţhiandun hi an inhnial rap rap a, 'i duh ve tho kha, i nuam ti thawk la ri pawh kei aiin a ring khawp, fel awm takin lang duh suh Zoremmuan', pakhat zawk chuan a ti a, 'Rosang, a tirah ka duh lo a ni lo'm ni? I pi thi lek leka awm chhuanlamin enkawlna tur i neih loh thu i sawi a, i neih chhun a ni tiin mi in rawk hial pawh ka thlawp che, in rawk ta lova hmeichhe pawisawi lo pahnih ngawt laka nunrawnna kan lantir ah pawh ka la thlawp zel che, tinawn leh tur chuan min nawr duh suh.' Zoremmuana chuan a ti let ve thung a.

'Ti teh, chuti a nih loh chuan ka inpuang ang a, i him dawn bik lo a nia, min thlawp mai rawh', Rosanga chuan a ti let ve leh a, Zorema erawh chuan a lû tuai vutin a ţhianpa chu a kalsan nghal vat, rawng taka a pawngsual pakhat kha a vei a ni. A inthiam lo a, khatih lai khan a lo lem ve sek bawk nen, a rawlthar chhuah hma hauha a nu ngeiin a mutpui ţhinna chuan piangsualah a siam a ni ber a, mipat hmeichhiatna hman chu a mamawh a, a inhrithla fo, amah a pa lianin rethei te mah nise hmeichhe mit la zawng tak a ni bawk nen mutpui tur pawh a vàn lo nangiang mai. A talhiar reng bawk a, a nu in a thihsan hnu-ah a pa nen chauh an awm a ni a, a pa lah chu a hrisel lovin natna khirh tak, Doctor te pawhin a natna an hriat chhuah theih loh a nei bawk si, a bawksawp reng mai a, talhiar in zu pawh lem ve ţhin mah se a pa erawh a hmangaih a, a ngaihsak viau.

A ţhianpa harsatna pawh hrethiamin sum lamah a pui thei si lo, mi in rawk chu kawng awmchhun niah a ngai kha a ni a, an luhna in berkherah chuan hmeichhe tituai nalh tak pakhat chauh an hmu si, rawk an tum lai chuan kha hmeichhia kha rawn harhin an tum loh zetin kut an thlak a an rik rum rum laiin an hmuh hmasak aia nalh zawk mah, itawm tak, la naupang tih hriat tak mai an hmu leh zel nen ani pawh kut an thlak ta kha a ni a, mipat hmeichhiatna mamawh ta reng reng chu a ţhianpa in pawngsual tuma a hmanrua a lek chhuah takah chuan chawplehchilhin ani pawh a lo inpeih at kha a ni a, mahse, an kutthlak hmeichhe hnuhnung zawk a mutpui takah chuan kha aia nawmna kha a la tawng lo.

A vei zui ta reng a, a hmaa hmeichhe inphelh ruak dang lakah a mipatna chu a pa thei ta tlat lo, ni khatah vawi khat tal hmeichhe mutpui lova awm thei lo, sex addict tlat mai mipa Zoremmuana kha ni khat mai ni lo kha hmeichhia vang khan a tilreh hawi ta vel mai mai chu a ni si a, a ţhianpa ber maiin a hmeichhe pawngsual, a vei em em ngaizawng der a a neih rosum laksak dan ngaihtuah tura a tih chu a fuh lo a ni. A ţhianpa Rosanga hian an hneichhe khawihte kha chhui zuiin tam tak pawh a hre reng a, Sharon-i chu pasal nei mai tur a ni tih thlengin a hria a ni, pakhat zawkin pasal a neih chuan pakhat zawk khan in chu a nei dawn niah ngaiin chu hmeichhia chu bitum a rilruk a ni a, ani ai thlawt chuan hmeichhe lêm kual lamah leh thildangah reng reng pawh a ţhianpa Zorema chu a zeihawi zawk tih hai hek lo, a nawr ta kha a ni reng a.

Aţhianpa in a thu a hnial chu a ngaithiam lovin a thin a rim hle nghe nghe a ni.

Zorema pawh muk taka reife inngaihtuah in, a pa, enkawl reng ngai kalsana Jail bang zut ai chuan a ţhianpa duhdan chu zawm rih mai a tum ta a, a ti lo a nih chuan Rosanga hi a inpuang duh tak tak dawn tih a mizia a enin a hre ve tlat.

A thutlukna chu a hrilh ta a, Rosanga pawh a nui leh vur vur tawh e. An tum ang hian an che thei reng ang e maw chu.

An tana hlauhawm ve chhuna a ngaih an Detective ve lah chuan a bialpa, a hmangaih pawh jail bang a zut tir a ni a, a chhui chhuah a ring tlat lo, chhui tur pawhin ani chu lecturer a ni daih tawh a, mit ti kham thamah a dah lo a ni ber e. Genevieve-i chuan tha tharin bul a ţan leh dawn tih erawh a hriathmaih tlat. A kiangah a bitum tur pute-a, mipa zaidam leh fiamthu duh tak, a tunu tana thih huam a la awm bawk, Lalrinsangi leh Zorina pawh an duai bik hauh lo ang le, a nupui hual chunga rawng taka che duhtu te thihchilh huam mipa fel leh nun ngil, Ruatruata leh huatna thinlung paitu Sharon-i leh Tehruaii an la awm cheu bawk.

Tehruaii leh Sharon-i pawh an ţha chho zel a, ni hnih hnu maiah chuan in lama inenkawl pawh an phalsak tawh tur thu an hre zo chiah bawk, chuta karah Ruatruata pa, Pa Zoa ngeiin an dam fel veleh hnuchhui an ţan hmaa innei turin thu a ti tlu bur bawk nen an ri lê-lû mai a, hrehawmna tamtakin bawhin, an hma hun-ah hremna pek tur hmabak nei mah se an hlimna chu an hnualsuat phal rih lo.

Tichuan, tluang taka damdawi in chhuahsanin in lamah an inenkawl a, palai chu Sharon-i hringtu pa te'n amah Shron-i an pawm miau loh avangin Ringringi pasal Zorina pa te hnenah an tir a, Zorina pa Pu Zosanga te lam pawhin ţha taka lo dawngsawngin a hun leh ni pawh leng nawn tura insawm lem lovin an ruat chawpchilh nghal mai a, thla thar ni sawmhnih leh pariatah an ti a ni, thla khat zenzawn an la nei a, Sharon-i pawh enkawl hautak a ni lova, a dam ţhat var var tawh a rinawm, chutin Tehruaii pawh, Tehruaii lah chu a pute Zothana'n a hnena hruai haw a tum bur bawk nen luahtu nei lova in ruaka dah tawp chu tiin nupa tuak thar te chuan an luah lut dawn a ni. Chutiang a nih avang chuan thuamchhawm pawh an mamawh lem lo a, Sharon-i tan pawh a pasal tur te in chu an ţhenawm chiah a ni bawk nen a thawven thlak khawp mai. Inneih zo fel se, tha thar a misual man chhuak tura theihtawpa beih erawh sawi ri lo mah se an rilru kilkhatah erawh chuan an tum tlang vek a.

Hmeichhe ho chu bazar lama Sharon leh Tehruaii an la chhuah ve theih loh avangin online in mokawr te chu an en a, an mawi tihzawng a inang si lo, an inhnial nak nak hlawm a, a damlo te pahnih ber lah chu an nâ an theihnghilh ta emaw tih mai turin an harh phian, an taksa nâ chu a dam a ni mai a, an hliam tawrh dan huatthlala zetin an thinlung a hliam na em mai pawh a an dam chak vak lo, mahse, an natna te chu an theihnghilh ta e tihna ni hauh lovin inneih boruakah chuan an rilru an pe ve zawk a, ţhian atan Tehruaii an ti hmiah bawk. Ani pawhin hnial tumna a nei bik lo, an enhran loh zia a hre telh telh a, mawi taka lan ve a tum tlat a ni.

A tawpah chuan an duhzawng inang hlawm hek lo chu an thlan chhuah ţheuh chu a thlalak an mipa te an hmuh tir ta ngawt a, anni'n a mawi an tih ber an thlang dawn a ni.

Sharon-i thlan chu Ruatruata'n a pawmpui a, chutia an han inmil lutuk chu ngaithiam lovin Zorina chuan Ringringi thlan chu a lo pawmpui ve bawk, a ni thei bik lo ve tiin Zothana'n a tunu Tehruaii lam a lo ţang ve chat bawk a, Genevieve-i'n dinpui tu a nei ve ta lo, an en ţhap a, ngeiawm zetin an melh ralh hlawm.

Ani lah chu nui lui tih hriat taka ţhen sak chung hian Sharon-i te in chu a chhuah san a, an hawihai deuh, an fiamna chu a lo la na ta mai em ni tih ngaihtuahin an inmelh ţhap a, harhchhuak hmasa a ţang Zothana'n umzui a tum chiah chu kawngkapui aţangin Genevieve-i leh pa Zoa an rawn inzui lut, ani hi pa Zoa hnenah a va vui ta mai em ni le, pa Zoa lah chuan thinrim hmel hi a pu bawk si a, lai leh mak ti deuhin an lo en tawp ringawt, Genevieve-i lah a tûm hmuk bawk nen a hma lawka an boruak hlimawm zet chu a inthlak hlawk a.

Ngawi ngur chunga an lam rawn pan zelin pa Zoa a rawn thlen chuan an laptop a thlalak awm ho chu a rawn bih ve ngur a, Genevieve-i thlan chhuah chu kawkin, 'hei hi a ţha ber, ka fanu chuan he kawr hi an inneih ni-ah a ha tur a ni', a ti nui ta sun sun a, Genevieve-i nui riin a zawm bawk, an hrethiam ta, lamţangah a lo va sawm chu niin. Ruatruata u Francis-a rawn lutin Genevieve-i lam a rawn ţang ve bawk, pathum ţang ho chu an hneh ta lo a ni e.

Hlim takin an ri lê-lû a, 'zanriah chu kan in-ah kil vel tur', pa Zoa'n a ti bawk nen an thawm a ţha teh e.

Chutia an hlim em em lai chuan Zoremmuana leh Lalrosanga te chuan tihchhiat tumin an hnaih leh mek si a le, anni lah chuan engmah an hre der si lo!

Hriatlohna hian mi a ti thlamuang ţhin reng a ni.

An vanduaina tawh kha report an thehlut lova, chu chu an lo hre bawk nen an ngam zual sauh bawk, mahse, Genevieve-i leh Zothana hi an awm mai mai lo, test ngai ang test-in report an thehluh duh loh chhan pawh, a ruk thei ang ber a police tel lova chhui an duh tlat, rinhlelh nei sa an ni lo bawk nen, thu thang a awm ngei ang a, misualte tan inralrinna dar vuak rik an tum lo bur, an hriat chhun lah sam buk lam ve ve, palian lam, intiat tawk tak pahnih, pakhat chu a ţhianpa in Rosang tiin a ko tih zawng chu a ni mai bawk si a, a ruk thei ang bera hmalak an tum a ni, an tihsual loh beisei pui phawt mai teh ang.

Man hlanna hun te an neih fel hnu-ah buaina engdangmah tawk lovin inneih ni chu a thleng ta a, Sharon leh Tehruaii pawh an dam ţha var mai, hmai chei thiam ruaiin simple tak si, nalh tak siin an chhuah ve ve a, an hmel ţha dun kher mai, an hmel ţhat dan inang si lo, hmel ţha tia sawi theih ve ve hi an ni roh a, a hmutu mit a zir a ni ang chu.

Sharon-i chuan Tehruaii kawr hak chu chul sakin 'mo ai a ţhiannu in mipui mit a la dawn tih ka chiang ngam sak', a tih chuan Tehruaii chuan a chum vei taih a, fakna dawn hi nuam a ti lo, hmel ţha in duhawm tak ni mah se thingtlangah, ei in ţha hmu vak lo, duat taka tuaihnuma cheibawl tu awm lo, make-up chu sawi loh lotion takngial pawh inchulh ngai lo tak mai niin a hmel ţhatna leh a vun nalh na te chu a lang chhuak famkim lo ringawt hi a ni mai a.

Rilru hlim taka a awm ve theihna hmunah a awm a, khawpui a ni bawk nen, ei leh in lah a tui ţha ţha an hlui a, thawmhnaw lah a nei ţha tawh narawh e. Hmeichhe vul hunlai ber a tawng chho mek bawk nen thu uar thiam tak phei chuan sawi se lasi ang thawthângin an chhuah duh hial ta ve ang.

Inneih boruak chu hlim tak leh tluang takin an zo fel a, tam tak pungkhawm lo mah se an inneih thutiam a ropui nep phah chuang lo e, a tel chhun te chuan hlim hmel an pu vek a, tlar hnung bera mipa pahnih ţhu te chauh lo chuan.

Dan pangngaia a pasal te in-ah lawi lut ve-in zan an riak ang a, a tuk maiah an insawn lut dawn a ni, mipui an tam loh ngaihtuahin lawmpuina thilpek an dawng ţha phian a, an hlim nupa hle, mitin mai chuan an lawm pui bawk a, langsar lo thei ang bera lo awm ve tlangval pahnih erawh chu an lawm ve ta hauh lo.

A chhan pawh pa Zoa'n an nupa chuan hmeichhe in zawk mah ni se in ruaka dah an duh loh thu te, nu berin hah taka a lo sual chhuah in chu tihral atan pawh an phal loh thu te a sawi vang a ni. Mahse, kha zan khan an hmel an hmu lo miau a, lawm vak lo mah se kawng erawh a pin phah lovin an hria. An rilru kaptu erawh chutia an nupa a an luh si chuan, Tehruaii zawk chu an tum angin hnehin hmangaihnaah hnuklut pawh nise chu an hausakna chu an chhuh thei kher ang em? Tih chu a ni.

Inneih zanah chuan a pasal te in-ah Sharon-i chu a riak dawn nen amah chauha riah tir chu phal lovin Zothana chuan a tunu chu a riahpui a, chipchiar lehzual zawkin a chanchin chu a zawt leh dap dap a, reife an titi hnu-ah a mal tawh loh tur thu-a hnem lehin mut zai an rel ta a, mahni chauha pindan a riah chu Tehruaii chuan a la hlauh vang leh mangchhiain a tibuai ţhin bawk nen pindan pakhatah chuan an riak dun a, khum erawh an inţawm lo thung.

Sharon-i te nupa pawhin an in chu luah lut tawhin Tehruaii pawh a putea kiangah a awm a, kum a laklawh tawh vang erawh chuan open ah pawl sawm chu exam turin an ruahman a, tutor a rawihsak bawk, a chhuahsan a ngaih ţhin vang erawh chuan a fimkhur a, mipa tutor ruai lovin hneichhe tutor Rinzuali a rawihsak bawk. Ani hi tunhmaa a thawhna ţhin canteen neitu te fanu neihchhun a ni a, a hmel chhe lo viau a, a felin a harhvang bawk a, thiamna a nei bawk nen rintlakah a ngai a ni.

Mahse, he Rinzuali hi a ni Zoremmuana hmaa mu dawrh fo te zinga a langsar ber chu. Tehruaii tan hian a hnawk mai ang em le?

A dan ngai te tea a nu leh pa te chu a ţhiannu birthday an lawm tur thu a bumin Rinzuali chuan in chu a chhuahsan a, a scooter hmanga tlanin hlauhna pawh nei eih lovin amah chuan Sairang a pan a, Zoremmuana hi Sairang khua niin Aizawl lam erawh chhohna man cheng 50 lek a ni bawk nen a chho fo, a chang phei chuan Rinzuali nen hian an inphur chho ţhin a ni.

Rosanga'n leng tura a sawmna pawh hnarin muk taka inngaihtuah chungin Zorema chuan luhai chiai chiai theihna fim chi chu a dâwt lep lep a, Hmanni lawka inneihna hmuna an kalnaa mo ţhiana ding Tehruaii, amah ngei pawhin rawng taka a lo pawngsual ngei mai hlim hmel chu a mitthla pah reng bawk, a thil in chuan hna a thawk pawhin a hre lo, chutih lai chuan a pa chu na nei tih hriat tak hian a rûm a, rang taka va hnaih vatin a pa chu a va bawihsawm a, nachhawkna sang chi chu pe in a chhawk takah chuan a chhuahsan ve leh mai bawk.

A ţhu fel awrh tihah chuan kawngkhar rawn inhawngin a sum leh a taksa nalh na hmanga thlem ţhin tu Rinzuali chu a rawn pen lut zân zân a. A lo melh zawk ringawt, Rinzuali chu tlangnel taka Zorema si chêta ţhu-in no a zu awm chu a tlak nghal pap a, ner nâng nângin a meizial a ban lehnghal vat, pak hlat hlat pah chuan a titi siam siam a, Zorema erawh chuan a ngawihsan hmiah, zawh chawp ngai hauh lovin a ni hman dan te chu a sawi siam siam a, a haw dawna Tehruaii a selfie pui na chu hmetchhuakin zirtirna a pek thu te chu a sawi siam siam a, a thusawi a ngaihsak loh vanga a kianga ţhu chu enin a ko sap a.

Zorem tia a koh takah chuan ani pawh hawi ruai ruaiin Rinzuali'n a thlalak hmuh tir a en chu a meng nghal awk mai.

Mahse mipa a ni bawk a, a insum vat, Rinzuali chuan Zorema mitmeng danglam zawk chu a lo hmu hman bawk nen a hria em ni tih te a zawt nghal a, a engamah hma-in a meng ling lehnghal ringawt tawh.

Zorema pawh chuan a hmeichhe vei ruk tih a hria a nih chuan a hmeichhe hnaih dang ho a tih ang bawkin na tak takin a ţawngkhum duh dawn tih hrethiam nghalin, 'Hmanni khan Rosanga chhung hnai te inneih naah kan awl lai a ni bawk nen kan kal a, ani kha ka hmu thânin ka hria a, chuvang mai mai maw le', ngaihsam hmel zet hian a ti liam puat a, a awih loh a hlau ru kher mai.

Mahse, 'umm, a nih chu, hei hi a nia ka zirlai chu, a fel reuh a nia, a putea nen an awm a, a putea hi a rawlthar chhuah hlim hlawt aţanga kan hnena thawk ţhin a ni a, tunah chuan Detective Genevieve nena an thawhdun tawh bakah amahin restaurant lian tawk tak a nei tawh nghe nghe, a chhungte kan hre ngai lova, amah kan zawh ngai loh bakah a sawi bik lo bawk nen, pawh erawh kan la inpawh viau a, tunhnaiah hian a tunu hi a rawn lang hlawl a nih hi.' Tiin a hriat chin ang ang te chu a sawi a, Zorema pawhin ngaihven hurh anga lang duh si lovin a beng a chhi kar thung.

'Hmanni ah mi kutpalh tuarin damdawi in-ah a lut hial a ni awm e, chuvanga kei kher min ring ngama min ruai a ni bawk a', a tih chuan Zorema chu a ruk hian a lo ip chawih a, kutpalh! Nunrawng takin kha hmeichhia kha i kianga ţhu ngei hian ka sual a sin, a ti rilru a, mahse, a awmdanah ngaihţhat lohna a neih hlauin, 'a zialo hle mai, mahse a dam tawh a kha, a ţha a lawm, ani chanchin sawi turin nge i lo kal keinah vangin', tiin awmze nei zet hian a melh ta a. Rinzuali pawh hlim zetin a lo nui var var.

Am taka infawpa inpawm leh ţhinin mipat hmeichhiatna erawh Zorema chuan a hman pui lo thung, lawm vak lo, a lawmlohna lantir hreh siin Rinzuali chu lai zetin a awm a, zu a in sek danah chuan Zorema erawh chuan a hrethiam tho mai, a pa chu che hleithei lo mah nise a zah viau a, mahse, Rinzuali chuan a in nual avangin chetsual a hlauhawm bawk nen, zana inkhalh haw lo mai tur leh a ţhiannu te in lama a riah tur thu hrilha a nu be turin a ti ta zawk.

A khum-ah chuan mut tirin amah chu ţhutthleng seiah chuan a mu a, Rinzuali aţang hian Tehruaii hi hnaih theih a inbeisei tlat, Rinzuali chu biak ţhat a, a hma ang tho a zui leh zel chu a tum a, a rinhlelh loh na'n erawh fimkhur a ngai tih a hria, Tehruaii a ngaihven tih hria se chuan Tehruaii lakah a ţuan dawn tih lah a chiang, a putea ngeiin ring ngamin a rawih sak si a, chance a ţha lutuk tlat.

Zingah hma takah a tho a, Rinzuali nen chuan tukţhuan te ei puarin Aizawl lam chu an pan a.

An thil in in a nghawng nge an ei tam lem hlei lova.

Aizawl an thlen chuan Rinzuali te in lamah awm dunin an inawm nileng a, Zorema pawhin hnar thei lovin a bawhbeh leh zân kha. A lung a tihawi sak a ngai tih a hre tlat.

Tlai lam a nih chuan Tehruaii te in lamah chuan an inzui dun leh hnak hnak a, Rinzuali lahin a atchilh a ni hrim bawk a, a thiltih naa a zui kual fuh chu a lawmah a lo tla, hriat lohna hi zawng.

Zorema'n Tehruaii a hmuh chuan a lungphu a rang sauh a, a theihtawpin a inthup ve bawk tak naa an hriatchhuah mai a hlauh vangin mask a vuah daih. Mahse, chu chuan Tehruaii a pui tlat, kha zana mipa kha ang a ti em em a, a hriat loh karin a lo en leh hâ ţhin, a thil zir pawh chuan a beng a luh thei meuh lo chu a ni e.

Chuti fahrana a duhlai melh duhtu chu Rinzuali chuan a ngaithei hauh lo mai chu niin, hmeichhe fing leh lu zo veh vawh mah nise a atna lai te pawh ni fahmiang, Tehruaii chu a ţim ta hrep mai. Zoremmuana lahin a lo melh duh ve bawk nen thinrim tak tê in a thinrim miau a, a rawl a ring ve bawk nen, chuta karah Zorema'n a lo khap ve bawk si chu an ri rem rum a ni ber mai e.

Mahse, Zothana a rawn haw ta hlauh, in a luh phat chuan ţawngkam chhe tinreng dawngtu a tunu lo ding kun lap mai leh Rinzuali leh mi pakhat lo inchelh ràn a hmuh chuan a ngaihna hre lo zet hian 'tinge' a ti hû a, a tunu lam a en bawk, Tehruaii lah chuan hahdam sawt tih hriat taka thawk a lak hliai bak engmah sawi a tum lo.

A tunu lak aţanga a mit la sawnin Rinzuali a melh a, ani erawh a kâ a kal par par teh e.

A bialpa Zoremmuana lo ngaizawng ve a chuhpui a, mutpui tura thlemtu ang hialah a chhuah ta mai a, amah tih loh chu an hawi â hu ringawt, Zorema pawh a bang bik lo, hniak phawi map lova dawt chiang tak a sawi mai chu mak an ti em em a, kan Tehruaii lah chuan *ehe...* a ti deuh hluai ringawt, chutiang bawkin Zorema pawh a ban a phar hluai tho mai.

Ani lah chuan zak hmel a pu eih si lo, a ti mah mah e tiin Zorema chuan ngawi turin a vin ţhawt a, a rawl a ring bawk a niang Rinzuali meuh pawh a ngawi nghal kar mai, 'engpawhnise, min chhuahsan teh u', Zothana chuan a ti nghut a, anni pawh an chhuak ve mai bawk, kalkawngah chuan Rinzuali chu a ân chhunzawm leh bawrh bawrh tho a, Zorema ning lutuk chuan, 'ani kha ka duh, ani kha i tina tur a ni lo, hre reng rawh', tiin a let san nul nul.

Rinzuali chu rak tuar tuar turah a ngai kha a nia, mahse, a ngawi reng, mak a tih deuh vangin a hawi let a, mimawl ang mai hian a lo ding ngawi reng, a let leh chuan atan beiseina siam leh a hlau si, a lainatin hmanruaa a hman vangin a inthiam bik si lo. Mahse, a kalsan ta tho a, an chhuahsan tak in kawtah chuan dingin kawngkhar chu kik mai a tum a, mahse, hmeichhe ţap hlawp hlawp ri a hre ta mai, kik ta lo chuan a kut a la thla riai riai a, lungchhe taka hmeichhe ţap awrawl leh ţah hla chu mahni indem luat vanga inhumruh ţeuhin a ngaithla ta a.

A tawpah chuan a tuar ta lo, kawngkhar chu hawng rawpin a lut a, mak ti taka lo en tute hmaah chuan dingin a kut a phar chhuak a, Zothana chu melh fiah kâkin 'min man rawh, kei hi thil tisualtu ka ni', a ti chhak mai le.

Rinzuali leh a ţhianpa in an chhuahsan hnu-ah chuan Zothana chuan a tunu chu thil awmdan zawtfiah pah siin a chhimbudawi kual kha a ni a, Tehruaii pawh chuan Rinzuali ţhianpa kha Sharon-i nena pawngsualtu pakhat zawk kha ang a tih vanga en duh a nih thu te thlengin a sawi fai kelh a, thu awmzia a hriat hnu-a Zothana'n, 'engvang chuan nge chutah chuan i ngawih reng, kan Rinzuali khan dawtin a puh che a, mihur ang maiah a chhuah che kha, i putea leh mipa dang awm ve reng laiin, i ngawi zel dawn em ni? I diknaah pawh engvanginnge i ţan ngam loh?' Thinrim titihin a sawi a, chutah chuan a ni kan Tehruaii insum zo lo a puah chhuah tak ni.

Ţap chhuak hawkin, 'eng chu nge ka tih anga pute, kei, fahrah nu leh pa thihsan, pi leh pu te hnawk tih, ka tette aţanga mal taka awm ţhin, naupang dang te pawhin an kawmserh vek, chuta kara pawngsual vawi hnih ngawt tawk tawh hian eng tehlul chu nge sawi se min tih, na lo angin ka lang a, ka nâ a sin, sawifiah thiam loh khawpin ka nâ a, chu chuan min vilh ţhin, Detective Genevieve leh ka unau thar te bakah, nang vanga chhungkua tia sawi tur nei, unau tia sawi tur nei ve chawp chauh hi ka diknaah pawh ţang ngam lo tur khawpin ka huntawn zawng zawng hian mi dawizepah min siam ta a nih hi.

Hmeichhe tenawmah ka inngai a, ni lo, ka nihna zawk a ni, pawm ngai si, ka pawm ngam loh mihur nihna min bel a nih kha, ka rilru tur i hre lo em ni chutiang zawhna te chu min zawh a,' a awrawl tawpin a au a ni hrim a, a ţap hlawp hlawp bawk nen, chu hmeichhe beidawng au aw chuan a ni Zoremmuana thinlung kha nasa taka sawisa ni.

Insum thei lo lêkin a rawn inpe ta a nih kha, chutianga Rinzuali ţhianpa in thilsual titu anga a rawn inchhal mai chu mak an ti tih chu an hmelhmaiah a hriat reng mai.

Zorema lah ngawi ngulin a ding reng si, 'Vala, eng nge i sawi awmzia', Zothana chuan a ti a. Zorema chuan a mask pawtthla in,

'i tunu pawngsual tu kha ka ni', a ti leh, Tehruaii chuan a lo melh ngawt ngawt a, a mittui erawh a  hul tawh thung.

Zothana chuan a mobile phawrh vutin Genevieve-i a call a, a lo pick-up hnu-ah, 'kan in-ah, tunah', tih zawng sawiin a dah.

Genevieve leh Sharon-i te nupa bakah Zorina te nupa te'n Zothana te in an luh chuan an lo ţhu ngawi ţhap hlawm a, Tehruaii chu a hmel a dik loh vangin an pan nghal ţhap, thil awmdan Zothana chuan a sawi mawlh mawlh a, Tehruaii leh Sharon-i pawngsualtu nia insawi Zoremmuana a kawhhmuh chiah chuan Ruatruata a tho vut, Zorema chu a khawih nghal bawrh bawrh a, midang erawh an ding hluai ringawt.

Zorema chuan a khawih let ve bawk si lo nen, Ruatruata chuan a khawih hlum mai hlauin reife hnu-ah an pawtţhen a, Zorema chu a thi hne hnu hman tho mai, a kamsir a thisen chhuak chu tuaiin a khi suk a, a ţhianpa Rosanga pi, a thisen zawm awmchhun chunga thihna in thla a zar te, ama chanchin leh a pa bawksawp dan zawng zawng te, pawngsual tur ni lova in rawk tuma lut an nih dan te leh an tum ang lo deuha an chet dan te chu fiah tak hian a sawi a, a thusawi tih tawp na'n Tehruaii chu a hmelduh thu a bulţanin Rosanga nen an inhnial dan te, Tehruaii hmuh a duh vanga Rinzuali a hnaih dan te chu sawi mai zelin an tun hun thleng chuan a sawi fai ta kelh a, a sawi zawh chuan mipa thinrim insum rum deuh nghat ţhin karah chuan Sharon-i aw ngeiin, 'Zorem, ka lawm e', a rawn ti chhuak ta mai le.

Mak ti zet hian a pasal leh a unaute chuan an en ţhap hlawm a, anni aia mak tia mengphawk chu amah Zoremmuana ngei a ni.

'Engvang chuan nge i lawm a? He mihring leh a ţhianpa hian kan pahnihin dimna tel lovin min sual a, chu pawh duhtawk zo lovin i neih rosum chhuh che an tum bawk a, chutah chuan engvanginnge lawmthu i hrilh?', Thinrim zet hian Tehruaii chuan a ti a, chu chu midang ngaihdan vek pawh a ni.

'He mipa hian a ţhianpain min thah mai a tum kha a khap a, nungdamin kan la awm a ni, thildang zawng aiin nunna hi a hlu a, anni hremna pe tur pawh hian nungdama kan awm tho a ngai a ni lo em ni? Keimah bik sawi ila, nu thihsan, pa duh loh, ka pa fapa lahin min ru bo, a ngaihzawng Remzopuii tan! Ka unaunu Rinsangi ka tawng a, unau ka nei ve mai chauh, chutah pawngsual ka tawk a, ka pasal tur tan tenawm ka ni lehzel, mahse min pawmin tunah kan innei a, hlimna ka tem ţan ta a nih hi, chu chu nungdama ka awm vang a ni a sin. Zorema hian a ţhianpa Rosanga tia a sawi kha khap lo nise, tunah hian kei chauh ni lo, nang pawh hi tunah hian ţawng tur kan awm dawn tawh lo. I putea pawh i hmu lo ang a, nangmah hmangaihtu keini, i unaute'n an hmangaihna che i hriatfiah tawk loh mai bakah, i nun tichhe tute hremna pe tur pawh hian thawk i la tawh lo ang.' fiah felfai takin a ti chhuak a.

'Nungdama awm hi ka thlahlel lo, thih a, chatuan hmuna kal a, min hringtu ka nu leh pa hmuh ka chak a sin, nang chuan hmangaihna diktaka hmangaihtu che pasal i nei a, kei chu, kei chuan chhungkua hi ka din ve thei tawh lo, tu tehhrep chuan nge mipa pathum ngawtin an bawhbeh tawh hmeichhia, sum leh paia chhuan tur nei si lo hi duh a, pawm ve ta ang? Chu chu thuhran, mi pawh pasal nei lova chhungkaw din lovin an awm ve, mahse ka thinlung nâ leh mahni intenna awm bet tlat tawh, mahni dik naah pawh ţang ngam hlei lo hi huaisenna leh chakna min pe ve ta ang? Ka chau a ni, ka chau ngawih ngawih.' Zuai ruih hian Tehruaii chuan a ti ve leh a, an ngawi ţhap.

'Keimah hian nangmaha i paltlang ngam loh i sawi zawng zawngah chuan ke ka pen pui ang che', an ngawih ţhap na kara awrawl lo chhuak chu an en leh ta vek mai le.

Zoremmuana bawk a ni. 'Zah nachang i hre miah nange, nang hian ke min pen pui ang a maw?' Tehruaii chuan a ti vin ţhak a, 'Tehruaii, ka sual tih ka hria, mahse ka duh che tih ka sawi, ka duhna che hi duhna satliah a ni lo, i laka ka thiltih vangin min hua tih lah ka hai lo, mahse, kha thil kha ka duh vang reng leh ka tum lawk vang renga ti ka ni lo tih ka sawi, chu chu a dik bawk, min ring turin ka ti thei lo che, min rin lah ka ring hek lo, mahse dawt erawh ka sawi lo, hremna tuar turin ka inpeih e.' Mahni inringtawk takin a ti a.

Tehruaii chhanna nghakin an ngawi ţhap, na taka a ţawngkhum an ring vek, amah Zorema ngei pawhin, mahse, eng thil mak nge thleng ta, 'kei chuan hremna ka pe lo ang che, i thiltiha i inchhir a, i sual i pawm phawt chuan zalen la, nun bul ţan ţha leh rawh, kei chuan hremna pe che pawh ni ila ka thianghlimna ka nei let dawn lo, nang aia hmaah khan ka thianghlimna chu tihchhiatsak ka ni daih tawh, ka u leh nau te leh ka putea te ruala ke pen leh ka duh, beidawn ka tum lo, thleng tawh chu a thleng tawh e', a ti fel thak mai le. Mak tih vangin an ka hau hlawm a, sawi mai tur hria lah awm hek suh.

An ngawih ţhap na kar aţanga Zothana chu rawn ţawng chhuakin, 'engpawhnise, a tuartu pahnih inawm a, pawikhawihtu pawh chuti bawk, kei chuan ka tunu thutlukna hi ka zah sak a, engpawh nise a lam ka ţang ang, mahse, keini thu a ni ngawt lova, Sharon-i pawh a awm, ani phei chu pasal nei tawh a ni a, ani thu chauh ni lovin a pasal thu pawh kan ngaih thiam a ngai khawp ang, Sharon-i leh Ruatruata khan in ngaihdan han sawi ula', a ti ta a.

'Kei chuan Tehruaii ngaihdan ka ţawmpui e, thleng tawh chu thleng tawh a ni a, mahse ka thu tih tlang ka tum lo, Zorema ang hian a ţhianpa khan inchhirna rilru a nei ve em tih te pawh hriat a ţul, ni lova min tihchhiat a la tum ţalh a nih chuan a chungah hremna kan lekkawh a ngai dawn a, ani kan hrem a nih chuan Zorema ngei pawh a tuar tu a nih tel ve a ngai ngei bawk ang', Sharon-i chuan a lo ti ve a, Ruatruata pawh lungawi hmel pu lo mah se a nupui thu chu hnialkalh a tum bik lo a ni mahna, a lo bu ve nghut ringawt.

Tichuan chu zan chu mutmu pawh tuah lovin an ţhu tlaivar zak a ni hrim a, a tukah chuan an motor thawhchhuahpui in Sairang lam chu an pan vek a, a hnathawhnaah Rosanga chu zu kal chilhin Zorema chuan a zu kheuh hrang a, ani pawh lo ţangbuai lovin a kal ve mai bawk, midang ho chuan khaw tawntirhah an lo nghak a, zui ruk pawh an tum hran lo, engvanga Zorema chu ring ta vek nge an nih erawh an hre lo ţheuh. An rinna chu tihlawhtlingin a ţhianpa chu a rawn hruai ta reng a, Rosanga'n a hmuh chuan a meng bial nghal kaw kaw mai.

'Min phatsan a maw?' Tiin mak ti fe hian Zorema chu a melh a, 'kan tisual a ni' tih bakin a chhang lo thung. Tichuan car 2 ah inhnawh in Aizawl lam panin an tlan leh ta a, thui tak an la tlan hman lo. Tlanchhiatin awmzia a nei lo tih chu hriain talbuai a tum dawn lo emaw an tih laiin Rosanga rilru erawh a dang daih thung. A inngaihtuah rauh rauh hnu-ah rang taka chet la thutin a hnaih ber mai Sharon-i chu a bitum chat a, mahse a tlai hret, Sharon-i chu na taka kutthlak a tum kha a ni a, hremna a hmuh dawn rau rau chuan pakhat tal khawih nat a tum a ni. Mahse amah zawk chu a beka na taka hnek chawrh a nih na chuan a beh tir rawk rawk mai a, car a ding chîk tuar bawk, ţhen chak chaka thawh leh a tum chu a hlawhtlin loh chu sawi loh kutthlak a ni zawm char char, a nupui duhlai khawih tumtu leh rawng taka an pawngsual hnu-ah pawh duhtawk mai lova thah tumtu chu chiang takin Ruatruata chuan a lo en reng hi a lo ni a, a chet la tur mitmeng danglam zawk vang chuan a khawih hman ta mai a ni. Genevieve-i leh Zothana a hmaah ţhu-in car hnunglamah Sharon-i te nupa inkarah Rosanga an ţhuttir kha a ni a.

A mi khawih pa rawn thawhchhuah tum leh chu rang tak tak leh na zet zet hian a khawih leh chawrh a, a chet lakna car chhung zimte mai a ni bawk nen car kawngkhar chu hawngin Rosanga chu a pawt chhuak lawp a, a khawih zawm leh mial mial, inhnaih taka tlan an ni bawk a car chhung a thil thleng tih loh chu Zorina te nula leh Tehruaii bakah Rosanga ţhianpa, Zorema pawh chuan an hmu hman vek, mahse, Ruatruata chu a meng sen rûm bawk nen ţhelh pawh an tum lo. A sawisa hlum mai ang tih hlauva an pawhţhen meuh chuan Rosanga chu a mu zawi nguai a, a thi hne hnu bawk. Rang takin an han hnaih a, kaihharh an tum chuan mitthi ang mai hian a zawi reng, a mar te han dekin an hmu tlat lo, a thi dèr mai chu a nia! Rem han ruat dan tur an han ngaihtuah zung zung a, a tawpah zawng Genevieve-i an en leh ţhap.

A chungah an zavai mit a fu tih a hriat chuan a aw a thian kharh a, 'Zorema'n a zu kheuh hrang tih kha an hre dawn a, Zorema an puh dawn chiang sa, thudik kan puan a ngai ang', a tih chuan an thum hak a, mahse, ngawi tura zâp lehin, 'Helaia kan chetla lai hi miin min hmu lo in ka hria a, ka mit ka len ngun viau pawhin ka hre mai tlat lo. He thihna ah hian thudik zahve kan sawi a ngai a ni.' A ti a, an mitmengah chuan a awmzia an hrethiam vak lo tih a la lang reng tho mai.

Sawi zawm lehin, 'Pawngsual innih zan aţang khan kan sawi ang, mahse, pawngsualtu che u chu mi pahnih ni lovin mi pakhat, Rosanga chauh hi a ni. A hmai a tuam lova, a hmel inhriat vangin amah kan zawng hmu, amah kan man theih na'n a ţhianpa, a kawmngeih em em mai Zorema kan bia a, ani chuan min puih a remti bawk, tichuan, Zorema chu zu kalin thil pawimawh a awm tia chhuanlam siamin a hnathawk lai a zu hruai a, keini'n Police Station lam pan kan tum mek laiin Ruatruata thah tumin a bei thut a, ani lo inveng chuan a khawih let a, a thi ta mai a ni, mahni inven na'na that a ni. Inhrethiam vek em?' Tiin a en kual dan dan a.

'Mahse, kan khuaah pawh Police Station te chu kan pan thei reng sia', Zorema'n a lo ti khauh.

'Aizawl PS ah a ruka kan case min hriatpuitu Sangzuala a awm, ani ka bia ang a, Sairang police ho ruai lova Aizawl lam kan pan chhan tur ang chu aniin a rel mai ang.' A ti a, an thaw huai hlawm. Genevieve-i remruat ang chuan an kal ta a, an ţawng bahlah lo turin an inthunun erawh a ngai hlawm, mahse, an harsat hran lo, harsatna tamtak lo pal tawh tu an ni hlawm miau a, Rosanga case an buaipui lai chuan hriat loh karin Zoremmuana leh Tehruaii pawh induhna aia thuk zawk hmangaihnaah an lo tlu lut hial a.

Hun rei ni lo mah se Zoremmuana chuan mize hlui tlansanin nun tharin bul a lo ţan ve bawk nen, a tirah nasa takin haw mah se Tehruaii chuan a nep zo ta tlat lo, inzawmna an neih tirh chuan a putea ngei pawhin do deuh mah se a hnu-ah chuan Zorema khawsak phungin a zir bawk nen a pawm ve ta mai bawk a, mahse, buaina pakhat Tehruaii chuan a nei tlat, a thla tin hunbi ah thi a nei tlat lo, thla khat mai a ni tawh si lo, thla hnihkhat han awl te chu dan pangngai a nihna chen a awm ve mai bakah, raino tawrh tur anga an sawi luak chhuak leh a dang tamtak a nei eih si lo nen inrinhlelh nachang a hre lo kha a ni a, mahse, a hnu-ah chuan a unaute leh a bialpa mai bakah, a putea pawh hrilh lovin pregnancy test kit a lei a, a zun a test hnu chuan a positive tlat!

Beiseina chhete tal la nei lui ţalhin doctor a hmu a, mahse, nau a pai ngei a ni tih leh a upat zat te chu chiang takin a lo hrilh si, kha zan, Sharon-i nen vanduaina an tawh zanah ngei khan a ni a lo insiam ni!

A na nawn leh a, Zorema fa nge Rosanga fa a nih ang? Rosanga fa lo ni ta se Zorema chuan a pawm ang em? Beidawnna inhneh tir duh ngai lo tu Lalhruaizeli meuh pawh a beidawng ve a ni ang e, kham ko a rah tak ni!

Mahse, a zuanthlak hma chuan a dul chu a chul a, Rosanga fa pawh lo ni se he naute hian eng nge tihsual a neih? Khawvel eng hmuh hi a phu lohna a awm em ni? Tih zawng zawng a ngaihtuah chuan a thutlukna a sawhsawn ta tlat, a dul chu duat taka chûlin, 'ka venghim ang che', a ti nghet charh.

Genevieve-i, Sharon-i te nupa bakah Zorina te nupa leh Zorema, Zothana te nen chuan Tehruaii kohkhawm angin Zothana te in-ah an ţhu khawm ţhap a, eng nge a kohkhawm chhan tih an ngaihtuah tlan vek vangin an mûk hlawm kher mai, 'nau ka pai a', tiin Tehruaii chuan bul a ţan nghal tâwng a, amah leh Zorema tih loh chu an lo phûl nghal hlut hlawm.

A nu leh a pa nia an hriat Zorema te an hmelhmai a dik loh vang erawh chuan an nui rei lo.

'Zorema nen kan la mudun lo, kha zan bak kha', a tih leh sap chuan an hrethiam tlang ta bawk a, an ngawi dâk hlawm. 

'Rosanga fa pawh nise i pumchhunga awm kha ZOREMMUANA LEH LALHRUAIZELI fa a ni.' Zorema chuan a rawn ti nghet charh.

Tehruaii erawh chuan a kut hum thlan dap chungin Zorema chu a lo melh ngawih ngawih a, Zorema chuan a hmangaih chu panhnaiin a hmaah chuan a ţhingţhi a, a nun hrehawm sa a sawisak retheih zual lutuk vanga a inchhir luat vangin mittui tla chung meuhin ngaihdam a dil ta, chu in chhunga awm te zingah chuan mittui tla lo fa reng reng an awm lo. Mipa pawhin an mittui an hru ru zauh zauh a, an boruak ni churh mai chawh zangkhai na'na Genevieve-in naute lo piang tur hming satu nih a rawn chuh takah chuan an inhnial fiam nghal laih laih.

Motor kawngpui a ţhat vak loh chhuanlama an hmang chung pawha naute paitu ber Tehruaiin a ngen tlat takah chuan hnial hneh hlawm ta hek lo, Ngûr khaw dâiah thisena unau ni si lo, in unau na aia an inzawmna thûk hlawm si chu an awm ţhap a, rei khawmuang lova khawchhung lutin Tehruaii pi leh pu te in an pan nghal chat.

In chhunga an luh chuan Tehruaii pi chu dam ţhalo tih hriat tak hian ţhutthleng seiah a lo mu bâm a, thisen chaw an lo khai bawk, a bul sêtah chuan a pasal a lo ţhu ngui lâp bawk a, thawm hriaa an hawi chhuah chuan an phawk kher mai.

Duh lova an hnawl hnu an tunu dul kawh lah mai leh, a bul chêta amah vengtu ang hrima ding ngawi ngal Zorema te, amah thlawp tih hriat taka a unau te bakah a putea lo ding khup te chu en-in, 'Bawihte, phuba lak na tlak ka ni ta lo', tiin Tehruaii pi chu mittui luang zawih zawih chung hian a rawn ţawng chhuak a.

Ţhuthmun pawh rem buai lova ţawng chhuakin Tehruaii chuan, 'ka pi, min huat chhan ka hre tawh e, kei hi i fapa fa ni lovin, i pasal fa ka ni, i pasal, ka pu nia ka hriat leh i famo kha mudun in kei hi ka lo piang a, chuvanga min hua chu ini tiraw?' Zawi sap mai, fiak tak si hian a ti chhuak a.

Midang zawng an hawi buai nak lai chuan Tehruaii pi chu a lo bu nghat nghat.

Tehruaii ngei pawh hian a hre lawk bik hauh lo, amah tur et et tu engemaw tak a awm vanga Ngûr khaw kal ngen lui tlat pawh kha a ni a, a pi leh a pu te a hmuh huna sawi tur lah a hre hek lo, mahse, a pi leh pu a mit ngeia a hmuh chiah khan kha thu kha a thinlungah chiang takin a rawn ri a, a sawi chhuak ta mai a ni.

Tehruaii pi mitmengah chuan natna, phatsan a nih vanga tawrhna nasa tak leh a tunu a hmangaihna te nen a lang dawt zut a, a mittui a luang zung zung bawk, harsa ti taka ţawng chhuak lehin, 'min ngaidam rawh bawihi, ka ti rethei em mai che, mahse ka hahdam ta e', tiin a tisa thlah a, kir leh tawh lo tura a chatuan hmun pan turin a mit a chhing ta riai riai a.

Tehruaii pu chu zak takin a kun reng ringawt, a tunu, ni lo, a fanu Tehruaii chu a zah a, a nupui a zah bawk, a thuruk hailan a nih bakah a nupuiin a chahthlak san a, hawi ngaihna a hre lo a ni ber e.

Khuangtè nena zai ri tlang tlang karah chuan Tehruaii pi ruang kilin an ţhu bial ţaih a, thlankhur thuk taka an thlak a hun dawn ta, Tehruaii chu a pi beng bula kun hniamin, 'ka pi, he in, i thihna in hi kei chuan BEISEINA IN ka ti a sin, hrehawm tamtak ka tawrh na hmun, beidawnna inhneh tir duh lova ka seilen na hmun a ni a, huaisenna leh tumruhna bakah, chakna tamtak min pe tura hrual seilen ka nihna hmun hi kei chuan ka ngaihlu a ni. Ka tan chuan BEISEINA IN a ni reng ang, ka dam a, nang pawh muang takin chawl ang che aw.' Tiin zawite in a phun chhuak sap a.

Nausen duhawm tak ţap ri ngâk ngâk a hriat rual chuan Tehruaii chu chau zet hian a nui var var a, eng mi nge, kutke kimin a piang em tih chu a hre chak, mahse a zawhbuai ngai lovin Nurse chuan, 'mipa i hring e, a lian ţha lutuk, kutke kim thlapin a piang e, kan lawmpui a che', a ti a, a lawm a zual ngei mai, hun harsa leh khirh tak tak karah inti paukhauhin a pen lui ţang ţang a, tunah chuan a nuna hlimna thlen turin pasal ţha tak a nei a, an inneih boruak erawh sawi sise lo mai ang, an ti pui chiam lova, simple takin Picnic Spot pakhatah an insuih tawp, Tehruaii pi a boral hnu lawka innei kha an ni a, puar kawh lah tawh mah se a mo kawrfual hak a inhmeh loh phah chuang lo, mi tamtak tel lo mah se telpui tu awmchhun te erawhin an thinlung takin an lawmpui tih a hriat a, Zorema pa pawh a fapa te inneih ni chuan mak tak maia rawn tho kângin natna nei lo ang hrimin a tel pui ve hial a, mahse, an inneih hunserh leh vuakvet a zo fel chiah tihah hmel hmuh nuam tak pu chungin a chatthla ta mai kha a ni a, Zorema chuan a tuar ve viau naa hun rei tawh tak bawksawp reng tawh a nih vangin a tuar thiam viau, lehlamah thihna mah nise a pa thih danah chuan a lung a awi a, hahdam takin a chawl a ni tih a pawm thlap, a nupui thar leh a fa lo piang mai tur an lo awm bawk nen a puitling khawp mai.

Tichuan Sairanga an in chu a theihtawpin a thawmţha a, mi luah tirin Zothana, a nupui putea in-ah chuan an khawsa zui a, makpa chhungkhung ni mah se tlawmah a la hran lo, Zothana tan lah Tehruaii chu a hmuh hnu lawkah a hralh a ni a, awmhrang turin a phal lo, a tu lo piang mai tur nen, tin, a makpa Zorema nen lah unau ang maiin an inkawmngeih ta bawk a, chutiang lamah buaina an nei lo, nakinah Zorema in ah ngei an khawsak hun te pawh a lo la thleng ve ang chu tiin thu an ti tlu kha a ni a, buaina dangin a bawh tawh lo bawk nen an hlim tlang e.

Nau neihna pindan pawn aţang chuan nausen ţap ri chu an hria a, phurna, lungchhiatna, hlimna in a bawh vek, Zorema leh Zothana phei chu an phî sek a, an chebuai dun lutuk chu midang ho chuan an lo nuih leh ţhin, nakinah chuan fapa duhawm, fuke kim thlap mai an neih thu leh naute nu pawh a ţhat thu hrilh hriat an ni ta a, an lawmna chuan van a tawng a ni ber e, naute chu an hmu ta vat a, pawm hmasak an inchuh liam liam hnu-ah a pu Zothana hneh an awm ta lo, zei lo fe hian a pawm a, a suk pui hluau hluau mai a, a mitmengah chuan hlimna tamtak a lang chhuak hial a, 'min chhun zia hi, a kâ, a hnar leh mit, a hâ thlengin min chhun vek', a ti hluai a, an lo nui hluah hluah.

'Nausen hâ pawh la nei lo khan i hâ a chhun a maw?' Tiin Genevieve-i ber chu indawm ngawih ngawihin a dir tlek tlek a, Zothana'n a lo run ve leh khanglang nen an han inmelh rum leh rih thul, an lungngai chu a ni hauh lo.

Kan Zoremmuana lah chuan a fapa chu a awi ve durh durh a, a lawm thiam si lo, a fapa sûk pui hluau hluau pahin, 'aahhh, aahhh, khi bawihte Bulb', tiin an chunga bulb inchhî te chu a kawk thul nen an ri teng tung mai a.

Chutih lai chuan Zorina leh Ringringi erawh an lo inkuah nghet viau, an fa an chhiat tak kha an hre chhuak lo thei tlat lo, an unau te chu an lawmpui rual rualin thikna thinlung an pu a, an demawm hran lo e.

Pathian khawngaihna dawngin Ringringi pumchhungah chuan nausen duhawm tak ni tur a insiam mek tih an hre tlat lo a tin ni.

Chutiang chuan kar khat hnu lekah Tehruaii pawh a inhliam nasa lo bawk nen tluang takin Damdawi in chu an chhuahsan a, a hming satu nih an inchuh nasat vangin nausen duhawm pawh chuan hming pawh a la nei lo!

Mahse, a tawpah chuan Zothana chu an sak tir a, ani chu ding chhuak hluaiin a aw a thian kharh phawt a, 'kan tupa, kan fapa hringtu te hian hun khirh tak tak an palin an dai a, keini a pu leh a nu leh pa te pawh hian kan dai e, kan harsatna palah khan Pathian reng reng kan hrechang ngai lova, keimahni mihring remhriatna hmanga kan pal luatah tawrhna pawh a tam phah niin ka hria, kan mihring pui chungah kan beiseina kan nghat châwk a, anni chu kan mihring pui ve tho an ni miau a, engkim tithei ni bik hek lo, chu thil chuan min tina ţhin, kan hmangaih kan fapa pawh hi Pathianin rem a tih chuan a rawn ţhanglian ang a, hun harsa leh khirh pawh a la rawn pal ve dawn. Chutah chuan a pi leh pu te, a nu leh pa te anga beisei loh tur beisei lovin, beisei tur dik Lalpa chauh a beisei a, a hma hruai saktu atan a lo thlan ngei hi ka duh sak takzet a, chuvangin a hmingah pawh VANLALBEISEIA ni rawh se.' Tiin a tupa chu pawmkangin thu a sawi a, an pawmpui hlawm bawk a niang an lo bu tliar tliar.

Genevieve-i chu rawn ding chhuakin, 'a hming ka phuahbelh ve dawn', rawn ti a, an lo nui hak hak. 

Ani pawh ţhen sakin, 'a hnamdang hmingah MATHIS (gift of God/God present) ni rawh se', a ti a, Zothana kut aţanga naute chu la in 'MATHIS VANLALBEISEI' tiin a phun sap a, nausen duhawm chu a fawp zawm zat.

Hun kal zelin Ringringi leh Zorina pawhin fanu duhawm tak mai Rohlupuii an nei tawh a, Beiseia nen an inkawm ve thei viau, Sharon-i te nupa erawh a la rem lo nge, an la pai lo thung, an rilru chu a hrehawm rilru ţhin a, mahse, Hlupuii leh Beiseia hian an tihlim viau tho, anmahni ngeiin an neih ve hun-ah phei chuan an hlimna a sang viau ang le.

Zothana pawhin tleirawl duhawm zet mai, â phuang bawk si a fa rual zet chu a hel a hel ve a, amah tlangval naupang lo tak a ni tawh bawk nen a chebuai lutuk ţhin chu an nuih an nuih mai, mahse, chutia hel hel ta na nâ na chu a hlawhtling ta reng a, inneih lam erawh an la sawi bik lo, a hmeichhia a la naupan vang pawh a ni mahna le.

Kan Genevieve-i zawng, heltu an tam poh leh a laka beidawng an tam ting a ni hrim a, Zothana phei chuan Ruatsaka vangah la ngai rengin, 'Ruatsaka chu a liam tawh, i thlah tawh i hna pawh huaisen takin i zawm leh a, rawn kir tawh ngai lo tur vanga i nun i tihhrehawm reng a ngai lo, kan nau te hian fa an neih a chhungkua an din vangin an thlauhthla ngai dawn lo che, mahse, chhungkua an neih miau vangin an duh angin an ngaihsak thei kher lo mai thei che, i chhiat ber hun-ah pawh i kianga awm a, tar chak lo inih hun-ah pawha dawmtu tur che chhungkua i neih a ngai', a ti ngial ţhin a, mahse, 'ka tar huna min enkawltu tur chu fa ka la mai ang, ka buaipui mek', tih bak chhanna a dawng ngai lo.

Beidawng zet hian a inhersan vut zel a, a mitmeng chhiar thei lo tura Zothana'n a inhersan veleh, 'ka rilru puthmang i hre si lo, nakin lawkah nupui i nei ang a, chutih hun-ah chuan kei chu ka kalhrang ang', tiin a thinlung hmangin a be ţhin. Zothana pawhin Genevieve-i a inhersan veleh, 'ka kiangah awm duh ni la ka ti, mahse, ka beidawng tawh a ni e, i thinlungah mipa pakhat chauh a awm a, kha mihring kha ka thik a ni, min hawi ve phah beiseiin hmeichhe dang ka chhài kual lah engahmah i ngai si lo', tiin a rum ru ve vawng vawng ţhin a.

Thinlung puthmang inang, induhtawn ve ve si, bulţantu nih tum si lo te hi an induhna hian pàr a chhuang dawn nge ni a thinlung inhmu si lovin an hrang hlen ang le, chu erawh an kut a ni tawh e.