RAMHUAI NEN KAN INBUAN

RAMHUAI NEN KAN INBUAN

By-Hluhlu-i Khiangte

Ni a sa vawl vawl ngei mai,thlan tla bawrh bawrhin lo atana kan neih ram,Khuailui ram kan tih mai ah chuan kan bung hlawm a,hah hle mah ila kan hlim viau lawi.Kan tuhrah,kan thawhrim rah kan seng dawn hnai miau alawm le.

Favah a buh hmin ţha tak chu àt in ka phur ah ka vawm lut zel a,ka biang a sa hat hat tawh,mahse,sawi tak ang khan kan kumtluan thawh rah kan seng miau a,rilru erawh a hlim viau.

Àm tak a kan thawh zawh hnu ah riak tur ho an la bung a,keini lànga feh ho pali chu bàng hma deuhin kan insiam sang sang a,keiin chawhmeh ka lo làwr dan dan,kan inpeih fel ta tih ah kan haw hnak hnak hlawm a,infiam bawk bawk chungin kan kal zel a,ni a tla hnai tawh bawk a,kawng kal pawh a nuam viau mai.

Kan khaw luh dawn kilometre-1 vel a la awm tih ah phai a awm pút mai a,thlasik lai phei chuan a vawt thei vur vur viau,mahse,thil phur leh kawng thui ve tawk tak kan kal tauh tauh avang chuan vawt kan ti lutuk lem lo,leilet phai lam ka hawi a,pa lian sàng tak mai leh pa tawi lam pawl lek lek,sa ţha tlet tlawt hi phai luh hma deuh a Khiang kung lian ve tak bulah chuan an lo awm dun ràn a,pa lian sàng zawk chu a chér lam lek lek tih theih ani,a sàn ém avangin ka hmu cher pawh ni fahmiang.

A phun bul bul a,Khiang kung nghéngin a ding àwn duai mai a,kan kalna kawng aţang a hla lutuk lo nen a phun ri chu ka hre pha,a sawi tak erawh hriat fak theih ka nei lem hlei lo a,mahse,chiang taka ka hriat erawh kei leh ka u te pahnih bak ah,ka nutei te chhawlhal kawngsir a ţhu hahdam a,kan tui pai haw kan khiat khalh khalh chu min kawkin,'Khu mite khu hneh vek tur',a tih chu ani.

Ka kalpui te ka en a,hmu leh hria angin an awm silo,kan inkar hlat zawng lah patling hlam sawm (10) awm lek ani mai si,mak ka ti in ka hawi hau mai a,ka nutei leh ka u te chu biak bik pawh nei lo chuan,"Khi mite khi in hmu em?",tiin an lam ka kawk vàng mai le.

Mak ti zetin ka kawhna lam Khiang kung dinna chu an en rual ţhawt hlawm a,engthil mah an hmuh loh thu an sawi sap sap hlawm,mak ka ti ta deuh,'Khi mite pahnih khi in hmu lo a maw?",tiin ka kawk ţha leh ngat a,an hmuh loh thu bawk an la sawi cheu zu nia.

Ka ngaihdan a ni ta lo,hmeichhia mah ni ila ramţang rual kan nih aţanga kan chhungkaw khawsak harsat vanga ram lam a hun hmang tam nge nge,hlauh lam ah pawh a kal lo,ka thin a rim lek lek zawk hial.

Ka tho tharh a,Khiang kung lam pan chuan ka kal dawr dawr,ka hnaih ta khawp mai,ka en chuan mihring hmel an pu si a,nimahse,mihring pangngai an ni lo tih ka hre mai,ka kawng dawm meuhin ka en dun ran a,an ni pawhin min melh ve ngur bawk.Hnai set sawt a kawkin,"He mi te hi in hmu lo maw?",tiin ka nutei te lam ka hawi a,an lo ţap púr mai.

'He lam ah rawn kal vat rawh',tiin aw khur dar darin min ko a,an thla a phan hmel em avangin ka pan ve mai,kan phur ţheuh phurin khawchhung lam kan pan ta dawr dawr a,ka u te leh ka nutei te chuan an lo hlau nasa mai chu niin.

Kan khua hi in 300 bawr lek kan ni a,kan awmna veng tak phei hi chu Khaw tawp a awm ani nghe nghe,khawchhung kan luh chuan khaw tawntirh ah ka nutei hlau lutuk chu a tlu ta mai,hlàng siamin kan zawn haw ta ngawt a,pa tlawmngai deuh ten an zawn ani mah,in kan thlen chuan tuisik a an theh ţhet ţhet hnu ah a harh ve mai bawk a,chuti taka an hlau chu keipawh ka ngaih chu a ţha ta chiah lo.

Ka nutei harh hnu chuan  aw sai hlak hlakin kan thil tawn chu an sawi hlawm a,kei erawh hlauh nachang ka hrelo a,mi ten a ramhuai/thla tih vel an hmuh chu hmel ţihbaiawm tak,hmul der dur,mihring rik rap zawng a khawsa ţhin an ni si a,kei a hmuh ve kha ramhuai emaw,thla an nih pawh ka ring nek lo e,mahse,ka kalpui te khan an hmu ve thei bawk silo,eng ém kan tih loh avang chuan zanriah ei a hun tawh hnai nen an haw sap sap a,keipawh mak ti zetin ka insiam a,tuikhur lam panin inbual turin ţinpui pahnih khaiin ka kal a,ka u te erawh tuikhur pawh pan ngam lo in lam ah an inbual ta anih kha,tui kan harsat nen,nép ka ti ru viau a chu engmah ka sawi lo thung.

Hmanhmawh takin ka inbual sawk sawk a,kan in aţang hian tuikhur hi a hla lo a,mahse,veng mawng lam a awm kan ni a,kan in hi in hnuhnung ber ani bawk,tuikhur zu pawh tur chuan ramhnuai lek lek kal a ngai a,kawng a zím bawk,fúr lai phei chuan vangvat an tam thei hle a,kalkawng hi thui nilo mahse kan kai ţeuh hman ţhin.

Ka inbual zo a,ţinpui hnih khatin tui ka kawt haw bawk,in ka thleng a,kan barel hlui ve angreng tak,a bang ţhir pawh tuiek nuai tawh ah chuan ka tui kawh haw chhung lutin ka ke ka tleuh nghal a,inchhung ka lut chu khawsak an lo rel peih vek tawh,zanriah kan ei a,Maian bai leh lairawk tumbu ngei mai kan han hmeh chu ka puar kher mai,eihnawkna kan singsa fel a,chhun lam a ka chauh deuh vangin mut pindan ah lutin ka mu nghal a,rei lo ah ka muhil nghal mai.

Ramhnuai dur khup mai ah ka ding ran a,tlai lam kan feh haw kawng a ka hmuh mi pahnih bawk kha ka bul ah an ding ràn bawk,tlai lam ah khan a pa tawi zawk khan hmul a ngah zawk thung,a hmul chu a sen hiar leh ta nghal a,kan inmelh ren rawn hnu ah min rawn pan hnai chhat chhat a,ka banbul ve ve a min chawi lawpin min theh phar nghal dawrh!

"Ehe he",tiin ka tho a,ka thin a sa phat,hnaih nghal ruakin ka va bawh phei a,kan inbuan chu a ni der mai.Kan let dun tawp tawp a,nà reng ka hrelo,chak thar ta riau hian ka inhre leh ta nghal a,kan inhneh tawk viau mai.

Chan ţha zawk changin ka bawhbet ràn a,a hrawkah ka tha tawp a rékin a ni pawh a thaw hrawk hrawk.

Che chang thei lo a a zawi nghiai chuan chau zetin ka ding chhuak a,ka thaw ve hlawi hlawi tho,chutah,a pa sàng zawk chuan min rawn panin min rawn hrawm ta nawk nawk mai le.

"Mai mai a",tiin ka in sangmar a,ka theihtawpin ka sual let,ka khàn lo vai vai kher mai,ka lo hah ve tawh bawk nen ka bet ta ngar ngar a,tlawm erawh ka tlawm duh bik lo,chutah min bawhbet rún chung chuan khawi aţanga a lak nge pawh ka hriat loh,chempui hriam hmel tak,hrawl zet hi la-in ka kiu aţanga ka banrek thleng in min zai thi ta zawih zawih mai le.

Na ka hre miah lo chu mak tak ani,ka hah in ka thawk a sak deuh tih loh chu,ka tal fat fat hnu chuan kan in hran san hlawk a,tho ţuah ţuah in ka pan,kan inbuan chhunzawm leh a,ka thà a chak belh nge ka hneh zawk lam lek lek ani.

Rei fe kan inbuan hnu ah ka vanneih a siamin a bawhbet tu ah ka ţang ve ta ran mai le,ka bulhnai ka melh kual ruai a,a chempui kha ka zawng ani,mahse,ka hmu tlat lo.

Chutia ka tha thlah zeuh a chempui zawnga ka hawi kual lai chuan min buan let tawp a,min khawih zui lo in min hlat zawngin a kal daih chu mak ti tak leh thlan tla zawih zawih chungin ka en.

A pa tawi zawk zawi ngiai mai chu pu lawkin min hlat zawngin a pen pui pawk pawk a,kei erawh chuan thinrim takin ka au tuarh tuarh.

"Zawng ramhuai hnaisai lo,rawn let rawh,kan la zo lo",tiin ka cho chhek chhek a,a mi put pa la pu reng chung chuan a inher vut a,min rawn pan leh chher chher,ka dinna hmun aţanga patling hlam hnih vel a la awm tih ah a mi put pa chu a keuh dawp a,a taksa phu lo a rang tak a min rawn hnaih min ka kawngah min pawm chawt a,ka tàl nghal nghek,mahse,ka tal chhuak thei ta hauh lo,kan bul thingkung lian zet ah chuan min rek kang vawi vawi a,min reh na kut phelh tumin ţan ka khawh viau a chu ka theilo,ka thawk a zawi tial tial a,ka mang a ang ta viau mai.

Ka tha ka thlahdul riai riai tih a hriat rual rualin min la rek reng chung si chuan a kut lehlam in ka hrawk a reh na chu a thlah a,ka kaihza a chawiin kan piah deuh ah chuan min paih léng lawp mai,lei ka thlen rualin ka harh zawk a,a thim mup,ka hrawk ka dawm nghal chat a,ka dang a ro in ka hrawk a kham na ut ut bawk.

Ka ban dinglam chempui a min zaina zawk chu ka dawm a,a thip vawt vawt mai.

Ka mutna khum thawh sanin ka u te ka kaitho a,ka nu leh pa lo lam a an riah avangin kan unau in kan awm,ka ban chu a thi ser ser a,ka mang a ka hmuh a min zaina chin ah chuan a in rín riak.

Pawnchhe thianghlim la in tap lam an pan a,tui chhuang vut vut in an tui chhuan ah chuan puanchhia chu an thlak a,an duhtawk ta maw tih ah la chhuak in an sawr a,ka ban hliam lai chu min deh sak,a thíp kher lehnghal.

Kan feh haw kawng a ka hmuh kha ramhuai pahnih kha ka mangphan tih ka hai lo,mak ve deuh chu mang satliah chu ani lo, tun thleng hian ka mang lam a ka ban min zaina kha a ser ta reng a,lian tak erawh a nilo.

(A tawp daih)🙈