PRISKY last

-
PRISKY



By-Hluhlu-i Khiangte



Chapter-10(last chapter)


Prisky Lalmuanpuii chu engtikah mah ka hmuh theih tawh loh turin an zalh a,lei in an chhilh asin!A nat zia hi in hrethiam em?Nilo,in hrethiam hauh lo ang.




Midang an haw hnu pawh chuan ka la awm ta reng a,Jp-a a awm ve reng bawk,ani pawh mipa,pa ve tawk tak pawh ni mahse ràwl chhuah meuh in a ţap ve rawng rawng anih kha,kan hmangaih,Prisky thlan,an chhilh na pawh la rei lo zet chu kan thlir dun tlawk tlawk a,inhném tur chuang kan awm lo.



Midang haw rém hnu ah Prisky nu leh pa an rawn thleng a,nu Marami chuan Prisky thlan,thing an siam kawkalh an phun chu kuah chungin a rawn ţah anih chu!Rd-a leh pa Ţpa pawh mittui dír zung zungin thlan chu an melh ngawt ngawt a,Ka lo sa phat thung.




"In duh loh a,in tuithlàr,in fanu atan pawh a in pawm duh loh khan,a natna tuar lo in khawvel a chhuahsan ta chéng a,tunah,a tuar ber awm ziazangin in rawn ţah khum ngam a maw?",Khur dawt dawt a tiin ka kawk sawk sawk a,min chhang eih lo.Mawi leh mawilo ka ngaihtuah tawh lo,a mamawh lai khan khawiah nge an awm?A tana ni ropui ber mak an inneih inkhawm ah pawh an rawn lang lo a,nau a pai a,a hlimna te kha hrilh turin a hringtu nu nilo in ka nu asin a biak,chu ai a runthlak zawk chu maw,na a tuar a,mangang taka a awm lai te khan koh tur nu a nei lo a,pa a neilo,a pasal chhungte'n asin buaipui a ţawiawm,mangangin a thinlungin a au ve ruai ruai anga,mahse,a tan beisei tur heng mihring ho lakah hian siamsak ani ve silo.Tunah lém,awrawl tawp pawh a koh eih theih anih tawh loh hnu ah,a thlakhlelh em em ţhin hmangaihtu pawh a chhan theih tawh loh hnu,lei hnuai a an zalh hnu ah ţap chungin an rawn au leh lawi a,a na ka tih pui ém asin.




Ka Prisky lainatawm lutuk,duhawm lutuk leh rilru ţha zet khan a ngaidam thei anih pawhin kei chuang engtikah mah ka ngaidam ve lo ang.A thlan bula ţah te hi an phú ve hlawl lo.




Jpa'n min kaihrangin min haw pui a,kan haw kawngah chuan,"A chhungte an ni a,an fanu boral chuan a ţhawng na ve dawn lutuk",hnukulh fé chunga a tih sup pawh chuan thinrim vangin na zet zetin ka thaw sawk sawk ringawt.




Ka Prisky fapa,vawikhat pawh a hmuh hman loh chu sawiloh,vawikhat té lek pawh a kut a khawih hman lo a a boral san,ka fapa lo ni ta Thomas Lalnundika chu duat zet a chawi chungin hnute ka pe a,nu hnute,a chakna atan a nu hnute tui vawikhat pawh dawng lo in,khawvel thiamna hmanga an siam chawp hmang a hrai puar a ngai te chu ka nat pui ngut ngut,Ka Mautuaite,lo tho leh la,i fapa rilţam hi vawikhat tal pawh i hrai puar chak lo em ni?Ka ti rilru vawng vawng a,ka mittui ka khap per sak sak.



Inthing nawkin ka fapa chu ka ngaihven a,a hmel ka en apiang hian a nu nuihmel duhawm lutuk kha ka hmu tel tlat a,a ţah lahin a nu,lungkuai zet a rawl chhuah meuh a a ţap ve rawng rawng ka mitthla tel a,a thil min hnutchhiah,he naute duhawm lutuk hi ka Prisky tan ţha taka enkawl hi ka tihtur ani tih ka pawm hmiah.Tichuan,a kiang a ka kal ve hun ah,lei chhuahsan a chatuan hmun ka pan ve hunah ka chhuahchhal ve thei ang chu.A fapa,nu mamawh lutuk mai leh keini,amah hmangaihtu te min kalsan vang hian chhuahchhal a phu ngawih ngawih.




Hmalam pan harsa ti ve ve,kan hmangaih kan chàn vanga rilru fím pawh pu lék lo a nitin,kan hmangaih an zalhna hmun thlanmual pan dun chhat chhat a,a thlan kiang a ngawireng a ţhu dun tlawk tlawk ţhin te pahnih kei leh Jp-a chu min manganpui a,ka nu leh pa te bakah,Jp-a nu leh pa te mangangin kan in lamah Jp-a leh naute an dah ta ngawt a,keini pahnih pawh naute,damdawiin lam aţang an lakchhuah tawh vangin kan buaipui lo thei lo,indawm kun reng tawh lo in kan fapa kan buaipui a,Thomas vangin kan nui dun veleh hawk hawk thei ta.Thomas Lalnundika chuan nu a mamawh si,ka nu leh pa te leh Jp-a nu leh pa te'n Jp-a nen min ko in innei mai tur a min tih chuan kan phàwk dun hrà a,kan hnial dun nasa teh e. 



Ka Prisky pasal,ka ţhianţha ber ni bawk hi ka nei ang maw!Teuh lo mai,thinrim luat vanga tha khur dawt dawt chungin ka melh kual a,"In thluak ah khan eng thil tehhrep nge awm a?Ngaihdan atthlak lutuk leh mawl zet kha engtinnge in neih theih zawk",ti chungin ka ànkhum a,an ngawi ngul hlawm te chuan ka thinrim an ti zual sauh."Zairempui,nang pawh khan sawi ve ta che",ti leh hràwk a kalsan hlawmin scooty chabi ka la a,chak zet a inkhalh chhuakin Prisky thlan bawk ka pan leh,a thlan kiang a ţhu in ka ţap leh hawk hawk a,Ka hmangaih ka chàn vanga ka lung a dam loh sa naklai a ngaihdan tenawm zet an nei kha ka haw ngawih ngawih hlawm."Lalmuanpui,i kal hma lutuk,kal thei ila nilo asin,min ngai ve miah nange,i pasal,i hmangaih kha nei turin min ti anih chu?I phallo tih rawn hrilh tur talin vawikhat chauh tal pawh rawn inlan ta che",tiin ka hmangaih an zalhna thlan chu ka be mawlh mawlh.



Ka pa leh Zairempuia(Jp-a) pa in khunkhan taka min titi pui a,Thomas Lalnundika hmakhua ngai tak chung a thutlukna siam tur a min tih hnu ah chuan mak tak maiin ka rilru an hmin pha tlat nia,ka hmangaih Prisky,ka bialnu ni ţhin,ka laizawnnu ni ta,ka Mautuaitei tan a ka tihtheih hnuhnung ber ani dawn tiin ka thinlung ah thu min hrilh tu a awm miau."Ka pa,Prisky thlan ah bawihtea nen kan kal phawt ang",ka tih sap hnu ah ka pa te chu ka chhuahsan hnak hnak.Jp-a erawh a ngawi ngul a,inngaihtuah hah tih hriat fé in a thaw leh hawk ţhin.



Prisky a rai tih ka hriat veleh a mipa ni tur a ka duh nghal ve ngawt,a nu pum pawh ala puar hma hauh a mipa naute kawr mawi zet ka lei hmanga Thomas-a mawi taka ka chei hnu ah ka insiam rak rak a,dimdawi fahran a pawm chungin a nu thlan ka panpui hnak hnak,thlan ka thleng a,khua a lum tawh vangin ka thlan a tla bat bat.



Prisky thlan hma ah dingin ka thlir vang vang a,lunglenna in min tuam hlup hlup.Thil awmzia hre ve ang hrimin ka puak mek naute chu uar fahranin a ţap ve rawng rawng a,a ţap ri chuan ka lung a kuaiin ka thawk a ti pik zual kher mai.




"Ka Mautuaite,i fapa fahrah tir hi i phal biklo tiraw?Min ngailo in nang zawng i liam ta si a,i ril a rah,a pian hma hauh aţanga ti hlim a ti nui fo ţhin tu che i fapa ţap ri takngial pawhin a kaiharh zo ta silo che,i awmna hmun aţang khan min thlir reng tiraw?I fapa hi enteh,nu a mamawh a,ala mamawh zel dawn asin,kei hi,i fapa nu atan min pawm em?Duat takin ka chawilian anga,ka theihtawp,ka theihtawp takmeuh meuh chhuahin nunkawng dik a zawh theih nan ţan ka khawh ang a,chu thil ka tih chuan na tuar a i rúm laia i kianga ka awm ve loh vangin min ngaihdam phah thei angem?I bulah,pialral a ka lo kal ve hun ah i fapa chanchin tamtak ka hrilh theih nan che min phalsak ang tiraw?,",tiin ka be sap sap a,min chhang lo in a reh vung vung lawi.




Min chhangtu awm lo mahse ka biak ka ţhulh phah lo.




Kan hun hman dun hlimawm zet te,lungngai tak chung a kan inhnem tawn ţhin lai te,duat taka ka kuah a,ka àwm a thlamuang taka a bei lai te ka mtthla ah a lang zut zut a,ka nui sak a,ka mittui a tla leh ţhin bawk,mumal lo zet in ka be mawlh mawlh a,mahse,a ngawi tlat asin.




"Prisky Lalmuanpui,ka Prisky,ka Mautuaite-i ini reng ang,",ti a phun leh sap in ka hmangaih an zalhna thlan chu ka hnungchhawn a,khawvel thar hmachhawn turin,ka fapa tan hian ke ka pen dawn ani.Eng pawh tawk dawn ila ka hawikir lo ang.




(Thlawh kàn leh duai ang aw)





Ka fapa,kum 16 zet ni ve tawh hnen ah chuan a nu tak ka nih loh thu te,a nu nen a kan thawnthu zawng zawng ka hrilh hnu ah,a sénlai bak a ka pan pui loh a nu thlan kan pan dun leh ta.



Ni e,Jp-a nen kan inneih hnu lawk ah ramdang ah kan fapa hruaiin nun bul kan ţan a,mizoram kan tlawh ta miahlo,kan fapa lah chuan a pi leh pu te chu mobile aţang bak ala hmu hek lo,tunah chuan kan fapa pawh ràwlthar niin,mahni a ngaihdan hran nei ruak a lo ni ve ta,a nu a chhun em em a,rilru lian zet anih rualin thinlung ném leh tihnat awlsam em em ani lawi.



Mizoram ah chanchin a hrilh ni la la in kan thlawk haw rum rum a,a ţhawng na viau tih ka hria,mahse,ka fapa duhawm lutuk hi a nu in a boral san tawh a,fahrah ani tih hrilh kha ka ngam ngai ngang lo,nu nép tak ka ni.




A nu thlan hma a ţhingţhi a,a nu thlan a kut a dawm chung a sawitur hre hauh lo a kun ngawt ngawt chu lainat zetin ka thlir a,ka mittui hru zeuhin ka fapa Thomas chu a nu,kum tam liam tawh hnu a sún a,a lungngaihna leh a hlimna,a nun a a thil tawn te a hrilh theih nan ka kalsan ta a.




(A tawp ta)

Comments

Post a Comment

Popular posts from this blog

TERI MERI KAHANI 1

-
Image
TERI MERI KAHANI (Story of you and me) CHAPTER - 1 Hluhlu-i Khiangte "Mi fate nipui hi a va vawt tak", tiin ka phun hlak, ka mit a kham na urh a, ka thawk a sa ham ham bawk, tukin ah ngawt pawh ţum thum(3) lai ka luak tawh a, ka zawi tawh hle, chhun buai tak takah ka tlu mualpho thei mai dawna hriain ka huphurh hle a, inthlahrung tak chungin ka boss hnenah chawlh dil turin choka kawngkhar ka hawng a, ka ke ka pen pawh tha hman a ngai nasa kher mai, ka khur der der. Ka boss chuan min lo ngaihtuah viau mai a, "lo nghak rawh Nûte, pindanah lo va awm hahdam la, naupang ho hi card ka va lak tir ang e", tiin min tir lut leh a, keipawh pindan ka thlen veleh ka ţhu zawi hnawk, ţhutthleng nghenchhan neiah hahdam tum takin ka ţhu dar dar a, ka mit kham lutuk tih ziaawmna atan ka mit ka chhing riai riai, ka nu ka ngai kher mai. Rodawngkimi ka ni a, kum 25 mi ka ni, Nûte tiin min ko tlangpui, kohhran Hospital pakhata an canteen ah ka thawk a, choka ah awmin coffee leh special t...
Read more

TERI MERI KAHANI LAST

-
Image
TERI MERI KAHANI Chapter - 12(last) Hluhlu-i Khiangte Ka khum ah ka ţhu hnawk a, ka khur dawt dawt, ka thu hriat khan min ţhawng em a ni, ani kha thah ka tum maw? Ka hmangaih em em, ka pasal chu engvanga thah tum nge ka nih tehlul ang? Min hrilh teh u. Ka chhang thei miau lova, phone a dah leh hmak a nih kha, ka tha khur nasa zual a reh a, ani khan a duh ang angin min puh a, kei hian ngawi rengin ka lo pawm mai ang maw, a teuh lo mai. Ka thawmhnaw ka thlak sawk sawk a, ka chhuak nghal, kawngpui ka thlen thlak veleh taxi hman tur ka hmu nghal mai bawk a, ka kal duhna hmun ka sawi hnu chuan hmanhmawh turin ka to zui zat. Ka sa pup pup reng a, ka taksa pawh a thlan dapin ka hria, ka sam, ka khuih loh vanga thur deuh bâm mai, ka thlah mawl tawp chu ka tuai leh thuak ţhin. Ruatdika te in kawt kan thleng a, chuan man ka pek fel hnu-ah ka pan nghal, lawmthu pawh ka sawi hman lo, kawngka chu a lo inkhar lova, ka lut tlang nghal tawp. Nu Rami leh pa Buata(Ruatdika pa) chu ţhutkhawmna pindanah a...
Read more

TERI MERI KAHANI 2

-
Image
TERI MERI KAHANI (Story of you and me) Chapter - 2 Hluhlu-i Khiangte Ka insiam rak rak a, zan thum leh ni thum in lama kan awm hahdam takah chuan damdawi ka ei ţha bawk nen, damdawi min chawh ang la ei zo lo mah ila ka dam angreng tawh khawp a, luak leh taksa nâ te a kiang a, ka harh viau, mahni in lum nge nge chu damdawi pakhat a tling a, tin, an theihtawkin ka pa leh ka nauin min duatin chakna lam pai theitui leh ei leh in min hlui awl lova, ka thau belh hialin a nia ka hriat, dawr lamah an buai bawk nen damdawi chu khi lamah pawh a ei zawm theih tho a tiin chhoh ka tum a ni. In lama ka awm chhung hian kohhran ho ţawngţai puina ka dawng awl lova, kohhran hruaitute an beng a varin min kan a, ţawngţaina te hmangin ka lu chungah kut an nghat a, hriakthih rawngbawlna nen, ka thawhpuite leh ka boss te pawhin ka chin zawtin min phone awl lova, Pathian ţhat zia ka hre nawn awn awn a ni ber mai. 2wheeler Taxi hi hman bik ka neih vangin kan in leh ka hnathawhna hi chu a hre bel khawp a, ka ca...
Read more