PRISKY chapter-9

PRISKY

By-Hluhlu-i Khiangte

Chapter-9

(Thuhma - Awle,ka story ziah hi min ngaihhlut sak a,min chhiar sak tu te zingah Upa.Darnunmawia Chinzah,Kum 87,88 na hmang mek a awm ve a,mit ţha lo chungin a lo chhiar ve tlauh tlauh zel a,ngaihnawm ti tak a min chhiar sak ve ţhin tu te zing a kum upa ber ni a ka hriat ani a,a pual liau liau in he chapter hi ka hlan ni teh se,min chhiar sak tu te zawng zawng chung ah ka lawm bawk a,min chhiarsak leh zel tur pawhin ka sawm nghal bawk che u😘😘)

Ni e,kan bei anga,kawng dik zawh tum in,theihtawp kan chhuah anga,kan la ti thei ve maithei asin.

Chuta ţang chuan kan in a room awl pakhat ah Prisky chu in vawm lút ve in kan zingah a khawsa ve ta a,ka laizawn anga ngaih a,ka hmangaihna nawhreh chu thil har tak ani.Ka thei ngai pawh hian ka ring lo hial.Daisual leh daipelh kan nei rem rum chung pawhin ka nu leh pa kan lam ah an ţang tlat a,kan kalsual thui tur min véng reng rengin hun an hmang ani ber,a inthlahrun awm duh ţhin viau mai.

Gospel Camping,kan veng,Zarkawt a an buatsaih ah te chuan kan lut ve a,kan harsatna hrethiam takin speaker leh councellor ho pawh chuan min duhsak ve viau in ka hria,keipawh Pathian au in ka ţawngţai ve thei ta hial a,ka Prisky erawh ka hmangaihna a la ngai reng a,a nasa zual sauh zawk,mahse,ngaihzawng hmangaihna ni lo in,ka laizawn ka hmangaih ang zawkin.

Ka hmangaihna hi chuti mai a reh thei ani lo a,a reh ngai bawk lo ang,mahse,tun ah chuan,Pathian khawngaihna zarah leh ka nu leh pa puihna zarah liau liau laizawn ang a khawsa in kan inhmangaih dun em em a,a nat ka phal lo bur,kei ai a kum lam a nau hret anih vang leh hmeichhe rilru lian tak anih vangin a harsa in a khawlh viau a,mahse,tunah chuan ani pawhin hmalam panin ngaihzawng a nei ve ta,a ngaihzawng lah chu ka ţhianpa,ka ţhian ngawih ngawih Zairempuia(Jp-a) ala ni leh ta nghal!

Kan in ah a rawn leng fo a,ka ţhianţha tak ani a,ka mi hriatchian ani bawk a,ka Prisky enkawl a dawmkang turin ani ai rin ka nei lo,ka lawmpui viau mai.

Prisky chu a chhungte a lakah an la hel tlat a,a u rd-a erawh chuan a ngaihsakin a rawn tlawh awl lo,eng ang nu leh pa nge maw an nih tiin mak ka tiin ka dem ru viau ţhin.

Jp-a leh Prisky pawh inkawp rem chho zelin palai hmel hial kan hmu ta! Ka nu leh pa te'n lo dawngsawngin inrem takin inneih hun tur te kan ruat fel a,an inneih ni chuan a mawiin a nalh kher mai,ka thinlung aţang ka thlah fel tawh emaw ka ti a,ngaihzawng angin ka en tawh lo emaw ka ti a,mahse,pasal nei a in hrang a min liamsan takah chuan ka na vawng vawng tho nia!

Chaw lem harsa ka ti a,ka nun hi a ruak a,ka na ngawih ngawih,mahse,Pathian ka bel lui tlat a,bàng lo a ka nu leh pa min ţawngţai sakna zar ah kum hnih tehmeuh a liam chuan ka dam ve ta.Prisky erawh nau a pai hleithei lo a,an fa hmasa ber tur a chhiat nen,a rilru hah thu leh fa a awh thu min hrilh siam siam ţhin a,ka lainat thei viau mai.Tunah chuan ka nihna ka pawmthiam ve tawh a,mipa a siam ka nilo,ka nihna a lungawi tur ka ni a,mipa ang mai a khawsa tur ka nilo tih hria in,ka anpui kawp tur ka nilo tih te ka hrechiang chho zel a,ka nun a hlimin ka hmel pawh a éng sarh sarh tawh khawp mai,mipa pangngai zingah min ngaizawng a min duh der tu pawh ka tawng ve zel a,mahse,keiman duh leh hmangaih ka la neih miau loh vangin ka hnar thei zel rih.

A der a mi hmangaihna hlan a,a der a thlakhlelhna tih lan a,a der a,milem ang mai a nung turin ka thiamna leh theihna in a tlin lo a,thiam turin lemchangthiam ni miau hek lo í.Ka ţhian,min ngamtlak ber tu,ka hmangaih Prisky pasal ni ta,Jp-a phei chuan,"nang hi chu,ila nú lo ani ang,i hahthlak,i léng tar anga,i nau(Prisky) fa i awm pur pur zel dawn nia",tiin a nupui Prisky'n kum hnih an inneih hnu a nau a pai ve hnu phei chuan min fiam awl lo a,ka nuih liampui mai zel.

Ka u Sangzuala leh Partei,kan awmpui nula ni ţhin pawh Prisky leh Jp-a te inneih hma lawk khan innei in fa an nei tawh a,fanu duhawm leh hmelţha zet an nei a,an fanu Ruthi Malsawmzeli chu Pathian zarah a hrisel ţha in kan chhungkua min ti hlim viau ţhin,kan ri chél chúl mai zel,min ngaina em em a,kan inpawm tam viau.

Ruthi ka khum a mut a, ka chhaih nuih hak hak lai chuan ka mobile a ri ral ral a,ka lukham bul a ka mobile dah chu ban vat in Bawihtei(Ruthi) chu a tlàk hlau in ka véng pah a,minlo call tu ka en chuan Jp-a ani,"buai lai laiin enge maw ni reuh le",ti supin ka pick-up a,"enge hmela,ka buai aw",ka ti nghal làng làng.Mahse,patling aw khur dar darin "Hluhlu",min tih chuan phàwk hrà in "Jp-a ani nange",ka ti thawr a.

Ka zawhna leh lehlam aţanga min chhanna thu intu lo zet erawh chuan min ţhawng kher mai!

Prisky a awm ve tawh lo!

Ka nghíng dawt a,dawt tih ţalh tum mahila mobile aţang chuan ţap ri chuah chuah thàwm ka hre lawi si!

Ka mobile ka thlauh tawp a,ka hawi à hú hú ringawt mai,ka dàr a min sawi dawt dawt tu an awm chuan ka harh zawk a,ka u Sangzuala leh ka nu an lo awm a,ka nu a ţap nasa tih hai rual a nilo,a chiang lehzual e."Bawihte,insiam vat la,kan phei vat dawn nia",tiin Ruthi pawmin min chhuahsan a,a inti pachang lui tih ka hria.Ka u Sangzuala paw'n ka chhip a min fawp zauhin insiam turin min tih ve sup hnu ah min chhuahsan veleh.

An kal hnu pawh chuan ka awm ngaiin ka awm mawl tawp a,chét ngaihna pawh hrelo khawp a ka awm mawl tawp vangin Partei rawn kal in ka thawmhnaw bawm a hai rawk rawk a,ka thawmhnaw hak lai min hlih sakin eng thawmhnaw nge pawh ka hriat loh min hak tir chuan ka mitthla a Prisky hlim hmel,a lungngai hmel leh lungkuai taka a ţap lai te,za taka a nui ar ar lai te hmu dawt zut chungin ka dawh mawl tawp bawk.

Chhingaveng kan thlen lai pawh ka hrelo,ka ngaihtuahna,ka rilru ah hian Prisky ngawt a awm a,ka mit a ka hmuh theih ah thil tam awm mahse, a hmel,mawi leh ţha tak,a hmeichhiat pui ngei pawh hmangaihna a tluk luh tir thei khawp a zún ngah,nunném zet mai,a nui hmél hmuh nawn chàkawm zet te leh lungchhe taka a ţap ri lungkuai,a kiang a awm ninawm loh khawp a nélawm leh hmelţha lutuk a nui sen sen ţhin kha a lang tlat!

Inchhung ah min kai lutin ka Prisky,nunna nei tawh lo an zalhna,a kuang bul a min ţhuttir chuan ka harh chhuak hlawl ni maiin ka hria.Kan in aţanga kan chhuah lai leh kalkawng a kan kal lai pawh hrelo khawpin suangtuahna ah ka lo chéng veng veng anih chu.

"Bawihi,hei,Hluhlu-i alo thleng asin,ilo chhàwn dawn lo em ni?Min tlawh khàt ti a i vui na te kha han thlen la,hau ta che,bawihte,a pawi emai",tiin Jp-a nu in min ţah khum bawrh bawrh a,kei erawh ka mittui a tla thei hauh lo,ka tàwt up up a,ka na ngawih ngawih lutuk chu engtia tih reh chi nge anih ka hrelo!Tu pa fa mah hian an hriat ka ring bik hek lo.

"Hei,kan chhiattawhna hi sawi zau ka duh a,khatia hun lo tak a,nau thla sarih mi lek a pai,a hrin hun lo a a vei tak ah khan mangang zetin damdawiin kan pan rum rum a,theihtawp a chak a kan kalpui chung khan naute chu chhan hman in tunah an up mek a,in mi ţawngţai na ah min han hriat sak reng ula, bak ah a nu,kan fanu Prisky Lalmuanpuii pawh chhan hman lohin an boral ta a ni a,theihtawp chhuahin doctor te phe vut vut mahse an chhan hman lo,kan na tuar min hnem tur a lo pungkhawm zawng zawng te hnen ah lawmthu kan sawi tak meuh meuh a,in ţhatna hi kan rúl thei lo ang che u,mahse,van ami kan Pathian khian a lét tamtak in malsawmna in vúr cheu sela tih hi kan tih theih tawk leh kan lawmthu sawi theih dan tawk ani e",Jp-a pa,pa Rinawma'n hnukulh ţeuh chung a a sawi chu chiang lo ruaiin ka hria a,ka ţap thei lo ka àwm chhung tawt lutuk si chu ţhàm tawk tawkin ka Prisky chu ka en ngawt ngawt.

Ţap insum hleithei lo a an awm laiin kei ve thung chu ţah thawl hawk tum a ka beih ngial pawhin ka mittui a hul hlauh!

A vuina hunserh zo in thlalak na hun kan hmang a,a kuang zawnin motor ah an hlang a,motor hmangin thlanmual lam a zalh tur a an phurh liam,ka Prisky kan umzui pawh chuan ka mittui tehhrep hi a la tla thei lo cheu!

Thlanmual kan thleng a,ka Prisky,ka bialnu,ka hmangaih ni ţhin,ka laizawn ni ta in a natna tuar lo a a boral tak vanga lei dàn a phúm a ngaih miau vanga thlàn khur a an thlàk chuan ka baw ve ta hawk!Nasa lutuk in ka ţap hawm hawm a,ka au ruai a,mahse,min chhang duh miah lo anih chu!

"Ka Mautuaite,kha tah te chuan i khua a har dawn lo em ni?I u,hmangaih tu che,Hluhlu-i hian i aw,i awrawl kha vawikhat tal hriat leh ka duh,khawngaihin",ti a ţap chhuak rawih rawih chung a ka ngen pawh chuan a reh hmak,ka Prisky khan miin reh san hmak asin!

Pastor-in Bible chhiar a thlahna hnuhnung absawi te chu hre chang lo lék in lungchhe vankaiin ka ţap chung pawhin tumah in,pakhat té pawhin ka Prisky an kaitho duh lo te chuan min va run tehlul ém.

A kuang la chhuak a kaitho leh tur a thlanmual a awm,mipui ho ngenngawl tak a ka ngen a,ka melhkual ruai chung pawhin a thlan an vúr lui a,tumahin ka thu an ngai pawimawh duh lo,a na emai,a na lutuk asin.Pastor,Pathian nung bia a,a rawngbawl sak tu pawh chu hnaih rawk rawkin Pathian au turin ka ngén a,kaitho leh turin Pathian au rawh,tiin a àwm a chúm dawt dawt in ka ngén,mahse,ka Prisky,Prisky Lalmuanpuii chu engtikah mah ka hmuh theih tawh loh turin an zalh a,lei in an chhilh asin!A nat zia hi in hrethiam em?Nilo,in hrethiam hauh lo ang.