PRISKY chapter-8

PRISKY

By-Hluhlu-i Khiangte

Chapter-8

(Prisky hi a tak ah a awm a,ka ţhiannu ania,mahse,kan inngaizawng lo aw🙄🤣,chuan,a chhelo bawk,a single bawk🙈)

Ţhingţhi hnawk a awrawl chhuah meuh a ţap chungin,"Pawngsual ka ni",a tih nawn leh chuan ka mit nghal sulh!

Ka hriat loh vang ni miah lo in a kiang ah ţhu thla a hnaih rawk rawkin a dàr ah ka vuan a,"eng thil hrep nge maw i sawi le",ka ti hriam hràk.

"A dik alawm,kei hi,i hmangaih Prisky,i mautuaitei hi ka bawlhhlawh tawh asin,ih,ka hneh lo a,ka chakna zawng zawng sawmkhawm a,ka tha tawp chhuah a ka beih lét ngial pawh khan ka hneh lo a,ka ţang zo thlawt lo",insút hlawp hlawp chungin hriat harsa lek lekin a ti chhuak a,ka kuah bet thlawp a,ka àwm a beiin ka kawr hnung ah na zet a ţhàm tawkin a thaw hlawp hlawp a,ţah pawh a ţap chhuak hleithei tawh lo,a thaw kawk kawk a,ka hnungzàng ah duat takin ka chúl a,a chhip ah ka fawp tàwk  ringawt ţhin,ka bíng mup mup a,min ţhàwng takzet.

I hmangaih,i duat,nangmah i inhmangaih na ai pawh a nasa zawk a hmangaihna i hlan,ka engkim,ka hlimna ti a i sawi ţhin khan, nunrawng taka tihluih na a pawngsual tawk se engtinnge i awm ve ang?

I na ngut ngut ang tiraw?Thinrimna leh natna in a chiah ang che tiraw?Ka nat ang a ka thinrim ang chiah hian.

Kei,kei ngei pawh hetiang a min tih nat si chuan,a tuartu,ka naute,ka Prisky nunném leh àwmnem tak,tihnat awlsam em em hian engtiang chiah a nasa in nge a tawrh ang?Ka ngaihtuah ngam lo a,ngaihtuah loh theih ani silo.Ka chung a a thlen miau loh vangin a natna zawng zawng ka hriatthiam pui thei lo mai ni lo in,a natna tawrh zahve lek pawh hi ka na lo,a va mangang dawn ém,a rilru in min ko anga,min au lawm lawm anga,chhan turin ka awm silo,a nu leh pa,a u,leh a hmangaih Hluhlu-i kha mangangin a au ruai ruai anga,chhan turin tumah kan lang silo,a theihtawp chhuah in a bei ve anga,ani,hmeichhia a zawng a nunném ber mai,tha chaktak nei lo khan mipa tharum a hneh dawn chai silo a,ka Prisky,ka va lainat tehlul che ém.Ti rilru vawng vawngin ka Prisky ţap chau,awmna hmun pawh hrechang lo lék a ka awm thlamuang taka bei a muhil sàk sàk chu duat zetin ka kuah a.

A rawn harh chuan an in a haw a duh tlat loh vangin hotel kan la ta ngawt a,ka nu call in ka ţhian pakhat a damloh thu hrilh in ka riahpui tur thu ka hrilh a,dawt ka sawi ta ngawt.Prisky kianga ka awm tih ka hriattir anih chuan a rilru a na leh dawn miau.Prisky kalsan thei ka ni silo,ka dinhmun hi a va chàu chhe tehlul ém,kei aiin Prisky dinhmun a chàu lehzual.

Rd-a call in a nau nen kan riah dun tur thu ka hrilh a,rei fé a ngawih vang vang hnu ah aw min pawh ta chauh.

Hotel a hnathawk tu hnen aţang IB(Imperial Blue) la in pawisa ka pek hnu ah min chhuahsan a,no pahnih a thli in kan in dun a,Prisky chuan in har a ti viau a,no hnih chu ka in luih tir,rilru na chhawk zangkhai nan a ţha ber chu ruih chhum hmawk hi ani tih hi ka ngaihdan ani,reilote tal a rilruin hahdamna nei ve rawh se.

In ngai lo tih takah a rui viau mai,a in nawm nan coke ka pawlh sak bawk nen,sawi hreh em em pawh a neilo,"Sex hman hi ka chak ve ţhin a,ka suangtuah fo ţhin,mahse,midang nen ka ti lo ania,nangmah nen ania ka tih",te a ti tak ang mai mai a,za lo zetin ka nuih pui sak sak ringawt.Mihring pangngai chuan kan suangtuah vek a,kan suangtuah dan kawng a in ang lo mai chauh,ka dem hran lo,kei ngei pawhin ka suangtuah nasa ţhin viau miau alawm.

"Mahse,ka suangtuah ang a nilo,khatiang kha sex,nupa nun,hmangaihna chen dun anih chuan tawn leh ka duh tawh lo,ka duh tawh miah lo",tiin a ţap leh tlawk tlawk a,a rui pah bawk nen a ţap ţha duh viau,duat taka kuahin khum dúp nuam zet ah ka mutpui a,a zu in in a hneh deuh ani ange rei lo ah a ţap bàngin a muhil leh siai siai.

Zanin chauh tal pawh ka kiangah thlamuangin muhil sela,ni thar lam ah a kimchangin ka zawt ang chu,ti rilru in ka ban ka kham tir a,muthilh tumin ka mit ka chhíng ve riai riai.

Ka kiang a mu taksa khúr dawt dawt ah harh hlawlin ka ţhu chhuak a,ka Prisky chu thlan tla hliam in a lo ţap khur ngawt ngawt anih chu!Rang takin ka kuah a,ka àwm a a bei veleh ràwl chhuah meuh in a ţap a,"ka hlau lutuk,a lo kal leh a,ih,ani khan min khawih leh a tum a",mangang zetin a ti ruai a,ka mittui khap per sawkin ka kuah nghet sauh sauh a,ani erawh hlau tih hriat takin a tawm chaih chaih reng.

A mangchhia mai a nih thu ka hrilh a,hetiang hian,khang hun chhung zawng kha ka lakah inthup in hrehawm nasa tak a lo tuar a,hahchawlhna hun zan hun hlu tak ah pawh hahdamna hmu lo in,a mangram ah lehzel pawh kha thil tehhrep khan a tibuai in a umzui zel chu ani si a,kei lah chuan phatsantu tiin,tenawm ti takin ka lo kalsan a,min mamawh ber lai lehnghalin,ka indem ngawih ngawih!

I hmangaih venghim thei lo in awm la,chu ta kàrah amah dem zawngin khawsa ve ta la i indem lo bik angem ni?!

Ka na ngawih ngawih chungin na ve ngam tur ka nilo in ka inhre hial asin!

Ka àwm a bei kàk a lungkuai zeta ţap hlap hlap chu chúl heuh heuhin ngaihdam ka dil sup leh ringawt ţhin,ka kalsan vang te,min mamawh ber lai a lungmuang taka ka awm lai te khan mangang zetin min au ruai dawn asin.

"Nangni kha,tenawm lutuk,zahna tlachham dún lutuk mai",ti a min kék nawk nawk tu nu Marami,Prisky nu ani!

Nizan ah khan muhil ta miah lo in kan tlaivar dun ta ţhak anih kha.Amah sual lui tu ka zawh chuan,"mask a vuah a,chemte nen min vau a,Hluhlu,ka hlau lutuk asin!Ka bulah i awm silo,engtinnge ka room ah alo luh theih ka hrelo,a pianzia pawh ka chiang lo,ka la dam ţha silo nen thà ah ka hneh lo ngawih ngawih a,ka theihtawp a ka sual lét chung khan ka hneh lo",tiin a sawi anih kha.

Hotel kan chhuahsan a,kawt a kan chhuah thlen veleh nu Marami lo lang nghal chatin min ţawngkhum bawrh bawrhin min kék nawk nawk,khawih lét tumna ka nei hauh lo!

A fanu lakah thilsual lian lutuk ka ti miau a,mipui rawn pungkhawmin min ţhelh laih laih pawh chuan a la duhtawk mai lo.

"Nang,ka fanu ti a chhuang taka ka sawi ţhin pawh khan lo hre rawh,ka fanu ini tawh lo,ka hmangaih itih,mipa pawh khawpkham lo a i úm nu,hotel a a rúk a i riahpui a,nuam i chenpui nu kha zui haw nghal ang che",hriam hràk Prisky kawk khur dawt dawt chung a tiin min kalsan dawr dawr a,Prisky chu mittui kuang zawih zawih chungin a kun ngal a,a zakin a na takzet tih ka hria,kuah thlawpin lungngai lo turin ka hrilh ve sap sap a chu awmzia a awm hmel loh kher mai,khawi aţangin nge nu Marami kha a rawn kal a,a rawn lan hlawl pawh ka hre nek lo e.Zingkar ah pawh mipui chu an tam viau,hmeichhia leh hmeichhia inkawp chu an ngaithiam lo tih hriat zetin tenna mitmeng nen min thlir ţhup a,"helai hi drama show na hmun a nilo,kal darh vek ru",ti anka au ţhawt chuan "zak lo dun mange",min ti sap sapin min kalsan hlawm a,kan piah deuh aţang min la thlir ţhap tho nia!

"Mate,enge thil awmzia,Prisky nu lah khan min rawn ànkhum hrep a,in inkawp leh tawh em ni?Awhaw,Prisky bawihte,in sam te chu ngati pheng phung nge?Ti teh u,inchhung ah lut vat ang u",ti sawk sawk tu ka nu chu kan zui mawl tawp ringawt.

Thil awmdan ka nu chu ka hrilh vek a,ka hrilh zawh hnu chuan ţap a insút hlawp hlawp chungin Prisky a kuah thlawp a,Prisky pawh ka nu àwm a bei chungin a ţap ve hlawp hlawp tho,ka pa lo tho chhuakin thil awmzia min zawt a,ka chhang lo,zép theih ni tawh hek lo le,ka nu in thil thlen dan a hrilh zung zung hnu ah chuan pawi tih hmel fé in ka pa pawh a chek tlak tlak.Ka room a hahdam phawt tur a min tiin nakin lam ah kan sawi ho dawn nia tiin min thlah a,ka room ah Prisky nen kan ţhu ngawi chwt chawt.

Zanriah ei hun dawn ah ka pa in min ko vangin an room ah kan lut a,nilengin ka room ah kann awm dun tlawk tlawk,tih hlim ngaihna ka hrelo a,a natna ka chhawk zangkhai thei silo,hrep hian,a chung a heti taka che a,nunrawng taka khawsa duh hi tupawh lo ni se ka zawng chhuak dawn khawp.

"Marami leh Ţp-a(Prisky nu leh pa) pawh ka bia a,an rilru a hming ngang lo,an fanu chung a thil thleng rapthlak tak ka sawi lah an ring duh silo,an tuithlar thu min sawikhum in Ţp-a lah chuan kan sumdawnna kawng a kan inţhian ţhatna pawh a chhu chat hmak mai si a,enge an rilru ah hian awm pawh ka hre nek lo e,heti hian Prisky pawh kan kiang ah a awm anga,kan fanu ani anga,a duh leh nakinah boruak a daih deuh hun ah a haw leh mai tur lah niin",a tih chuan Prisky chuan thu a sawi ve duh thu sawiin ka pa a dil a,ka pa pawh bu nghutin a ţhu ruai ruai a,a thin a rim takzet tih ka hria.

"In mi duhsakna ah ka lawm ngawih ngawih a,Hluhlu-i nen kan chungchang lah in hre vek a,heti chung pawh a fanu a min pawm hi ka lawm lutuk,sawi dan tur pawh ka hre lo zawk,nu leh pa duh loh,an hnawhchhuah,an tuithlar ka ni ta hial a,min hringtu ka nu leh pa te ngei pawhin min duh loh a kàrah nangni ka tawng cheu hi ka lawm a,ka lungchhe takzet a",ţap hlap hlapin a tih chuan ka nu nen kan mittui a far ve zung zung.

Sawizawm thei lo in a thaw hlawp hlawp a,ka pa inrawlh vatin,"Ekhai,kan fanu ini tawh a,engmah lawmthu sawi leh inthlahrun na thu hla neih a ngai lo e,i in a ni tawh a,i nu leh pa kan ni tawh bawk a,Mate-i pawh i laizawnnu ani tawh bawk a,in thinlung a induh na kha paih bo in unau in hmangaih a in hmangaih tumin bei ula,Pathian nen kan ţangkawp anga,in ti thei em em ang,lungngai lo ula,in lam ah in nu leh pa bakah kan ai a ropui zawk Pathian a ţang tlat tih hre bawkin,sual kalsan a,a ţha lam zawh intum dun anga,a tir ah harsa viau mahse in thei tih ka hria ani.Kan tawrh zawh bak,kan phurh zawh bak phurrit leh natna hi Pathian hian min pe ngailo ania,mi te aia harsatna kan tawk nasa anih a,mi te ai a natna kan tawngbaw hnem zawk anih pawhin Pathian hian chaktawk min ti a,phurrit phur tlàk khawp a chak ah min ngai tihna ani tih hria ula,hnunglam a thil thleng tawh,kan lo tihsual tawh chu siamţha thei lo mah ila,kan hma hun,kan tun hun hman mék aţang hian kan insiam thei tih in hre dawn nia,lo hnai teh u,ka lo ţawngţai sak ang che u",tiin a sawi a,min hneh viau.

Ka pa chuan an nupa khum bul ah min ţhingţhit tir a,kan kiangah ka nu a rawn ţhingţhi ve bawk,ani dingin kan pahnih lu chungah kut a nghat a,kan tan,a fanu leh a bialnu,Prisky tana thinlung leh tih takzet a Pathian a auh chuan insúm zo lo in ka ţap hlawp hlawp.

"Lalpa,ka nupui leh fanau te tana hrawn hrehawm khawp a sum úm,nawmsakna úm a sual tamtak khawih a,i kohhran ah pawh ka hmingmawi nan chauh a inhmang,ka hlép rúk leh tenawm tak,midang tamtak ka bumna sum tlingkhawm aţanga lanmawi duh vanga thawhlawm thawh ve mai,lepchiah taka nun hmang ţhin,i ngaihhuat em em sual nasa tak uire na khur ah hial tlu lut a ka nupui fanau te ti na a,ka nawmna úm ţhin pawh min ngaidam thei tu Pathian ropui,ka fa te hi,anmahni kaihruai turin ka tling tawk lo tih i hria e,i kut ka fanu te pahnih hi i hruai atan ka hlan e,hmangaihin lo kuangkuah la,an hma hruaisakin an hnung dawl tu ah nang lo ţang zel ang che",ti in a chham a,a ti takzet tih ka hre thei ani.

Mak takin ka pa in min ţawngţai sak zawh hnu chuan ka thawl huai a,ţawngţaina in thil a tithei tih ka nu sawi fo ţhin kha a takin ka tawng ve in ka hre hial!

Ni e,kan bei anga,kawng dik zawh tum in,theihtawp kan chhuah anga,kan la ti thei ve maithei asin.