PRISKY chapter-7

PRISKY

By-Hluhlu-i Khiangte

Chapter-7

Ka Prisky,ka hmangaih khan min phatsanin mipa a mutpui a,nau hial a keng anih chu!

"Tu fa nge maw a lo pai le?Ngaihzawng a neih awm kan hre silo a,Màmtei chu aw",ti vawng vawng tu nu Marami,ka pasal nu,ka Prisky nu ni bawk chu ka en a,a heh a pet ve fan fan mai,ka nat tluk zetin a na ve tih ka hria,tu nu nge mahni fa te sawnpai ah hian lawm thei bik ang ni?Kan nat dan a in ang lo chauh zawk,kei chu phatsan ka nih vanga na ka ni a,nu Marami erawh a fanu in humsual a dai hriatchhuah anih vanga zak a na ani zawk.Pa Ţpa pawh a ngawi ngul a,a ţhàwng ve viau in ka hria.

Ka nghilh dup a,ka mang vek,engtinnge a theih zawk?Ka tan,ka tan chauh a rinawm emaw ka ti a,amah ka hnaih theih nan a nuţapa ngei pasal ah hmangaih lo chungin ka nei a,ka theih zawng zawng atan ka ti a,ka hmangaihna a nasat lutuk vang chauhin asin hetiang thil hi ka tih.Tenawm lutuk!

"I ţha em?",tih pah a min rawn kuah tu ka pasal,ka Prisky ka hnaih theih nan a ka neih chu ka en a,ka bu nghat ringawt.

Prisky khum bulah kan ţhu leh ràn a,ka ngaihtuahna kawm kualin tunge a naute pa chu ni ang?Min phatsanna pa chu tiin ka ngaihtuahna a vàk kual ruai a,ka ngui hle mai,nu Marami te hnen a ka tihlan a rem silo,ka na ka thup bo a,lungngaiin ka thinlung a rúm ru vawng vawng,ka nat dan min hriatpui tu tumah an awm lo,ka hmangaihin ka la duh reng tih Rd-a bakin a hre lo a,mahse,ani chu phatsan a tawk lo a,ka chan chàu zet hi a hrethiam pha chuang lo,ka natna min hriatthiam pui tur chuan ka chan ang hi a chan a a tlàk ve phawt a ngai miau.

Ka hmangaih Prisky chu rúm ţiah ţiahin a rawn meng chhuak diar diar a,hnaih rawk rawkin a ţhat leh ţhat loh an zawt hlawm a,kei erawh ka ţhutna ngaiah ka ţhu mawl tawp reng.An fanu duat,tenawm taka min phatsan tu buaipui a an chetla chu ka en mawl tawp.

"Tunah nau a chhiat a,a na hnem tur ini asin,i pasal nau pawh chu i va ngaihsak lo ve",ti ri ah ka phu zawk a,Prisky'n,"nu,engemaw i sawi le",mak ti tih hriat takin alo ti sep thung."Bawihte,a pawi lutuk,i naute kha i chàn a",ngui nghiaiin nu Marami'n a chhang a,a naupai hi a hriatpui tih ka hre ta chiah,kan zavai lakah an thup ani.Prisky chuan a nu chhanna a hriat veleh mittui tling pam leh hrilhhai hmel zetin min rawn melh kiau leh ta nghal anih chu!Huh,hrep hian!

Mak ti zetin min rawn melh hlawm a,engahnge min melh loh ang,ka nui chhuak hak miau alawm!

"Na tuarin ka fanu a let a,a naute a chàn bawk a,ilo nuih a maw",nu Marami'n min tih leh ţhat chuan ka nui lui leh hawk!

"Tenawm lutuk",ti supin ka ding hluai a,ka chhuahsan dawr dawr,min phatsantu kianga ka khawsak ve reng hi a ţul ber lo e,chutiang bawkin ka pasal pawh ka hnaih chhanin min phatsan miau vangin ka ţhen ang!

"Lo ding teh",ti chung a thaw hlawp hlawp a min úm dawr dawr tu chu ka melh a,ngeiawm zet a ţhen sàwngin,"in ropui chhungkua e,nangpawh hian i hriatpui tiraw?In tenawm lutuk",tiin ka kalsan leh dawr dawr,nilo,ka tlan ani mah zawk.Tu emaw hi ka su her sawk a,"awi ka nu",tiin a ràk ţhat,ngaihsak zui lo a kal pelin taxi lo tlan chu ka phar vat a,ka luh hma in ka hawilet zawk a,rilru hah hmel fé a min lo en ngawih ngawih tu Rd-a chu ka ţhen khum leh sak a,ani erawh a bul mai a ka sutthluk nu pakhat thil tihbuak let rem rum mai chu chhar pui turin a kunhniam ruai ruai thung.

In chhung ka lut a,kan room a lutin ka thawmhnaw luggage ah ka khung mawlh mawlh a,ka inhnuh chhuah hma in kan room chu ka en kual leh vang vang a,hetah hian,ka pasal,ka hmangaih hnaih theih nan a ka hman ve mai nen thla thum lai kan chengdun a,inngeih takin kan awm ţhin,a bulah thlamuang takin ka muhil siai siai ţhin kha ani a,mawilo zawng a min khawih tum ngai hek lo a kiangah,kan nupa khum ah ngei lungmuangin ka mu ţhin kha ani si a,ka rilru chu a hním ve ruih tho,Rd-a ka hmangaih a ka ngaih vang nilo in kan lo chengdun a,duat pawh min duat narawh e,keipaw'n ka nél ve hman viau anih kha,mahse,he phatsantu nunrawng chenna,ka nun infiamna a ngaitu chenna ah hian ka awm tawh dawn lo ani bur,reilote chauh pawh!

Ka nu leh pa te in ka thlen chuan pawn ah ka nu in a pangpar alo singsa kual a,gate hawngin ka lut a,ka thawm ah ka nu lo hawi vatin mak ti zetin min melh a,luggage nen ka ni ţup bawk nen mak tih loh chi pawh va ni suh.

"Mate,enge thil awmzia?",Mangan hmel zet a min ti a min lo pan hlawk hlawk pah a au chúl mai ka nu chu en in ka luggage ka vawnna ka thlah a,ka kiang a lo thlen chuan kuahbet thlawpin ka ţap hlawp hlawp ringawt,ka hnung ah a béng thek thek a,ka sam a chúl hliau hliau bawk,duattu ka nei chu ka ţah a chhuak zual zel a,ka ţap tawp hleithei lo,"nu,engtinnge ka awm ve tak ang?",Tiin ka ţahna avanga aw hnawk leh lài ràt chungin ka zawt ţiau a,hah hmel fé a thawk la hawkin,"inchhungah lutin i room ah kal phawt mai teh ang",tiin ka room lam ah min kai hnak hnak a, la inhnít fap fap reng chung chuan ka zui ve dat dat.

Kan awmpui nula Partei leh ka nu chauh an lo awm a,ka u te pahnih leh ka pa an awm lo thung,ka pa chu sumdawnna hna pawimawh ah a zin chhuak tih min hrilh a,ka u te pahnih pawh hna lam an buaipui ani tih a sawi nghal a,ka haw ngawt nachhan erawh min zawt ta rih lo a,ka lawm ah a lo tla thung.

Ka room ah kan luh hnu ah,"nu,keimah a awm ka duh",tiin ka phun sap a,bu nghatin min chhuahsan a,ka nu hi chu mi nghah thei tak,nu nunném leh zaidam ani a,ka anpui ka kawp paw'n min hau lo in min fuih a,Pathianin anpui kawp a phal loh thu zaidam takin min hrilh keuh keuh ţhin,keipawh khan zawm tumin ka bei ngial ţhin a,tun thlengin ka la thei lo a, ka anpui ka kawp vanga zah leh tlàngrel phur chung a ka vawn tlat,a nu hmàiéng ka zah ém vanga ka ngaihsakna pawh ka lanchhuah tir ngam loh,chumi vanga a nuţapa ngei mai pasal a nei a,a ruk a ka kawp chuan min phatsan tak vangin ka na mek anih si hi!

Inthlak peih lo in ka kawrchung hak ka hlip a,ka mu kawm ngàt a,"engvangnge,engtinnge hetiang hian min tih theih zawk?Min hmangaih ani lo'm ni?Min phatsan a,natna nunrawng fahran mai hi engvanga min pe nge inih le ka mautuaite",ti a ka thinlung a ka hmangaih biak mawlh mawlh mai loh chu tihtheih ka nei lo."Lalpa,i duh loh dan in ka khawsa a,luhlul chhuahin ka nu thu zawm lo in ka duhdan in ka kal lui ngar ngar a,hei hi em ni ka tan a hremna min buatsaih sak chu ni ta?Engvangin nge mi pangngai rilru puthmang pu ve thei tur a min siam mai loh?Engvang tehhrep in nge?",Tiin Pathian ka dem ru hial a,nunphung pangngai tak,mi pangngai rilru puthmang ang hi pu ve in min siam mai se hetiang natna hi ka tuar kher angem?Ka ti rilru rauh rauh.

Ka hmangaih natna khum a mu,ka ten leh ka huat em em hmài dàng làp mai,hrilhhai lutuk hmél nen a a mutna aţanga min melh kiau tu,mitmeng dul ràih hi engtinnge ka mitthhla aţang hian ka paihchhuah dawn ka hre lo!Theihnghilh tum a ka beih nasat poh leh a lang chiang ting mai si anih hi!

Mak takin ka mittui erawh a hul ta hlauh thung!

Engtikin nge ka lo mutthilh pawh ka hre lo,ka kiang a phun ri sep sep chu hriain ka meng diar diar a,ka lu na ngut ngut chu zawi zetin ka dawm a,ka inbeng tho ţiah ţiah,ka mit ka chhing sawk a,Prisky bawkin ka ngaihtuahna a luah,"e,hei,matei pawh a lo harh ta alawm,in nupa khan inbe rawh u",ka pa aw ani,ka hawi kual a,ka pa in ka room kawngka a lo khar mek chu ka hmu hman,aw thian kharh ri ka hria a,ka ri hriatna lam a ka hawi chuan ka pasal,oh!Nilo,ka pasal hlui chu a lo ţhu rún a,ka ţha em tih min zawt sup.

"Tinge ilo kal",ka ti hmuk a,min chhang lo in a ngawi ngul,biak tum leh bik tawh chuang lo chuan ka tho a,washroom ah ka luh san daih.

Palai te rawn kalin min hruai haw tum eng ang mahse ka lét duh tawh loh thu in ka ţang tlat a,ka pa ngei pawhin tihngaihna min hre tawh bik lo ani mahna,palai te hnen ah,"tihian,han awm lungleng ve se la,inţhen hlenna ani dawn chuang lo a,nakinah ţhazàiin kan la indawr leh dawn nia",tiin a sawi ve ta bawk a,ka thawhuai mai,let leh ka tum miau lo,palai te haw hnu ah erawh ani leh ni lo angin zawi dam dapin,"Ka fate hi ka hmangaih cheu a,in tan ţha tur ka duh luatah leh in nawmsakna ka duh luat vangin ka lo nawr na deuh ţhin cheu a,tun aţang chuan chhungkaw inpawh tak,inngeih tak leh hlimtlang tak nih kan tum anga,matei pawh ka tilui dawn tawh lo che a,puitling in ni ve tawh a,in nun a thutlukna siamthiam turin in kum paw'n a pha tawh,mahse,fimkhur takin kawng zawh ula,kawngdik zawh hram hram in tum dawn nia",tiin chhungkua min ko khawmin a sawi ta hial!Mak ka tih zia kha!

Ka hriat ţhin ka pa kà aţang khatiang thu kha dawn ka inbeisei lo hulhual mai ni lo in,ka mang a thleng tur pawhin ka ngaihtuah chhin ngai eih lo!

Nuthlawi léngleh chu ka ni ve ta dér mai!

Rd-a paw'n a dawr min siamsak chu kan in a lo kal meuhin min pek leh tum viau mahse ka pawm duh ta lo a,ka u leh ka pa te hna lam pawh ka zawm chuang lo,in ah ka tawm deuh chawt chawt a,harhvang taka ni hman liam ka nei ta meuh lo.

Ka chhungte'n ka nguai búr reng mai min mangan pui a,chhuak harh tura min kar nasat hlawm ém vang chuan peihlo zet chungin ka insiam ve a,kalna tur pawh ka hriat siloh.

Thlasik khawvawt vín túk mai bo in nipui a her chhuak a,khua pawh a lum viau mai,ka kal fo na,nilo,kan kal dun fo na hmun ah khan kal mai ka rilruk a,ka scooty khalh peih lo in ka u Sangzuala bike ka keng hmiah,e,ni tak maw,ka u nen pawh Partei vang liau liau in kan inpawh ve viau tawh a,keipaw'n huatna ka nei hran tawh lo.Ka kal tumna hmun ka thlen chuan ka helmet la thla in ka chhuk a,ka bike húng remin ka hmangaih Prisky nen a hlim tak leh lungrual tak,thinlung inpawh tak chung a kan ţhut dun ţhinna hmun lam chu ka pan hnak hnak.Mahse,engthil nge ka hmuh hi!

Khawhar hmel zet hian Prisky a lo ţhu ràn a,a hnunglam aţang pawh hian engtikahmah ka hai thei ngai lo ang,kal hnaiin ka pan a,a bul lawk ka thleng tawh chung pawh chuan ka thawm hre lo tih hriat zet hian a hmazawn chu a en ngar a,a chérin a dawldang kher mai,tawh tumin ka ban dà dà a,a dàr ka khawih fuh ţep tih ah ka harhchhuak zawk.

Rang zet a inher in ka kal hmawk hmawk a,ka hnaih tawh tur a nilo,kha phatsantu kha!

"Hluhlu",ti sap ri ah ka ding dat a,hawilet duh lo in ka kal zawm leh chu"Lalnunhlu",tiin a rawn au ţhawt.Inher ruai ruai in phatsantu chu ka en a,mittui tling pam in min lo en kiau,ka lam panin a rawn pen hlak hlak a,ka hmazawn lawk a rawn ding a,"inbe lawk ang",a tih leh sep chuan ka ner sawk.

"Phatsantu,tenawm lutuk,tu mipa tehhrep chu nge ilo mutpui a?Sawi ta che,ka zawng zawng ka hlan che a,ka hmangaih miah loh nang vang tehhrep hian,nang ka hnaih theih nan che pasal ah ka nei hial a,ka lakah eng thil nge ila duh?Sawi rawh",ti sehchilh nawk nawkin a dàr ah ka man a,ka thing nawk nawk.

A mittui a tla a,a in sút hlawp hlawp,hmuh hrehawm tak ani ka tan hian,ka huatna ai hian ka hmangaihna hi a la nasa zawk miau alawm!

"Sawi tur i nei lo anih kha,ka kal dawn",tiin ka  hnungchhawn leh a,pénhnih lek ka pén hman tih ah a thusawi vangin ka ding chawt a,a lam hawi a inher in "engtinmaw",tiin ka zawt a,ţhingţhi hnawk a awrawl chhuah meuh a ţap chungin,"Pawngsual ka ni",a tih nawn leh chuan ka mit nghal sulh!