PRISKY chapter-6

PRISKY

By-Hluhlu-i Khiangte

Chapter-6

Rd-a ţhianpa Pd-a ka ngaihtuahna ah a lo lut bawk a,thihna hi chu a nunrawngin a tawp takzet kan ti fo a chu thi tur a dam kan ni a,dam tur a thi tur kan ni leh lawi si anih hi!

Muhil thei tawh lo in ka let ka let a,ka mang ngaihtuah chhunzawmin ka buai bawk nen,a tak a ang viau bawk si,khatiang khawp a thinrim leh na hmel pu chung khan Prisky ka la hmu miah lo,ka mang mai mah nise ka ngaih a ţha thei hauh lo nia.

Mi hausa chhungkua,sumdawnna lian pangngai tak nei an ni bawk a,khawsak rél tur a ka thawh chhuah a ngai hran lo a chu ka tho harh hram hram a,an awmpui nula pahnih te'n min awl tum viau mahse ka che lui ve tlat a,tihngaihna an hre lo in salad tur min chan tir ve ta ngawt,"keima'n damdawiin ah chuan ei tur ka va pe ang",ka tih chuan Malawmi zawkin,"Rd-a khan i nuam lo a ti bawk si a,min hau palh ang",a ti tlat nà a Rd-a chu ka hrilh tur thu hrilhin kal chu ka tum lui tho.

Rd-a ka call a,damdawiin kal ka tum thu ka hrilh a,Pd-a te in-ah a chhungte'n Pd-a te ţhian ho chaw ei tur a ngénngawl taka an sawm thuna sawi a,Prisky chanchin ka zawh chuan cabin a an in dah luh fel tawh thu leh a harh har an rin loh thu a sawi chuan ka lung a awi vak lo,"engvang tehhrep in nge min hrilh ve miah loh a",ka ti hlar a,inthiam lo àwka takin ngaihdam min dil sup,awmzia a awm vak lo nen ka ngawi zui mai bawk,khawsak kan rél zo ta bawk a,tiffin siam tur a ka hrilh hnu ah room lam ah kal in ka insiam rak rak a,ka Prisky ka hmu duh ani tawp mai.

Ka insiam zo chu tiffin khaiin damdawiin lam ka pan vat a,Rd-a khan cabin no-5 a an awm thuna sawi tak e,ka pan vat a,ka nu leh pa an lo awm tawh lo,ka tiffin khai luh chu nu Marami leh pa Ţpa'n an ei laiin hnai zet ah ka Prisky mu chu ka ţhutchilh a,a biang no chék ţhin,thisen a hloh vanga dàng lep mai chunka chúl sak a,nu Marami te lam hawiin,"Ka riah pui ang aw",ka ti thawr a,nu Marami'n a chaw bàr lai ner nawk pah a ţhulhin min en a,"i nu leh pa kan ni tawh,a in zah loh thlak lutuk,min mawl biak tawh suh ang che",a ti hmuk a,pa Ţpa'n nui sukin,"aw,ţhiani,a la zak ve anih kha,hrethiam ta che mawle,i tawn ve tawh hnu tho a nih kha",ti mahse ban chapin,"ka tihpalh,ka nu",ka ti sap tho.

Pa Ţpa bu nghat nghatin,"ni e,Màte,keini upa lam kan ni ve tawh si a,han riahpui ta poh che,kha,Bawiha lah kha a ţhianpa a boral hlauh mai a,zanriah pawh a ei dawn tak maw",a tih chuan lu ka bu nghat a,"Aw ka pa,a chhungte'n an ngénngawl ve bawk nen an kilpui dawn a tih tak kha mawle",ka tih chuan a bu leh nghut nghut a,zanriah an ei puar hnu chuan haw turin an insiam a,"Bawiha pawh helam ah rawn tlang mai se a ţha ang,hmeichhe tan chuan mahni ngawt a damlo buaipui a ţha ngai lo e,a buaithlak lutuk ang",a tih chuan a ngaih loh thu in ka hnial ve vat a,"akhaih,a ke hi a tliak si a,rawn harhin zunram a thiar duh paw'n a buaithlak lutuk ange,in nupa in riahpui rawh u",a tih chuan ka hnial duh ta lo law law.Pa tum tlang ve tak ani a,a zaidam viau thung tih ka hre ve bawk nen hnial en ah ka en ta lo.

Nu Marami te an haw hnu pawh chuan Rd-a ala rawn thleng lo a,na tuarin ka Prisky chu a rúm leh hak ţhin,a meng thei silo ka mangangin doctor leh nurse ka pun ta tawp a,"a rawn harh dawn anih hi,a rawn harh a nà a neih chuan min hriattir vat dawn nia",ti a an endik zawh hnu a an sawi erawh chuan ka lawm kher mai.

Doctor te'n min chhuahsan a,ka hmangaih na tuar a mu bàm mai chu ka ţhutchilh leh ràn a,kan hun liam tawh chhuikir a ka ngaihtuahna ka kawm lai chuan rawn harhin "Hluhlu",min ti sap a,ţawng zawm leh a tum chu a dangro vangin a thei lo tih ka hre mai,tui ban in no ah ka thli a,a lu chawikàngin tlem te te in dimdawi zetin ka tulh a,chauh hmel zetin a mu leh a,a ké leh a lu na atih vangin nurse te ka ko a,damdawi a an jection hnu ah a muhil leh siai siai.Nu Marami te call in Prisky harh thu ka hrilh vat a,an jection hnu a a mutthilh leh thu nen,anni paw'n Rd-a rawn thlen leh thlen loh min zawt a,a la rawn thlen loh thu a ka chhan hnu ah kan inbiakna kan ti tawp a,ka zun a chhuah vangin washroom ah ka lut a,ka chhuah leh chuan mak ti zekin ka hawi hau mai.

Jp-a lo ţhu rúnin Prisky chu hnai zet ah a lo bih anih chu!Zairempui(Jp-a hmingpum) ka tih ţhawt chuan khi sàwngin min rawn en a,a nui tak ang ţhaw lehnghal nen ka ngei lutuk.Min ti phu lutuk,khua a thim tawh nen,"engtinnge i lo kal a",ka tih chuan,"Eki,ka lo kal thei lo em ni?"nui vur vurin a la ti zui."Hmela,rawn luh an phal ami ka tihna anih chu",ka tih chuan an hospital anih thu a sawi ta mai a,ka awih lo lutuk chu ka nui hak hak,"i mawng anih chu a",a bul a ţhu thla pahin ka ti leh a,nui hawk hawkin,"ka pate-a te hospital alawm",a tih chuan ka nui ve mai bawk,ni dawn tak,a pate-a te'n hospital an neih thu chu a sawi tawh tak e,mahse,helai hi ani tih ka lo hre miah lo,"a thuhrim ah,engvang nge chanchin pawh min hrilh ve miah loh a",lawmlo àwka zet a a tih chuan inthiam lo zetin,"nia,ka nuam lo deuh a,kan hamhaih bawk nen nachang ka lo hrelo a",ka ti nawi nak a,"anih,engtinnge i hriat a",ka tih chuan a lu a tuai leh vut ringawt.

"Hmél-a",tiin a banpuam ah ka hnek dawt a,"awle ka pu(a duh dan dan hian min ko mai zel,huatah ka la lém lo),ka sawi ang,ka sawi ang,kan veng mitthi in-ah ka kal a,Prisky u ka hmu a,in innei ta mai bawk nen ka be ve a,i ţhianpa ka nih thu ka hrilh khan ka biakna pawh min chhang lo in a hmél a rum deuh úl mawle,ka tihngaihna hrelo in Prisky ţhian pawh ka nih thu sawi ta ngawtin a chanchin ka zawt keuh a,a accident thu leh i riahpui tur thu min hrilh a,chuan,in awmna zawtin thlífím angin ka rawn tleh chho ta mai anih hi",a tih chuan ka nui hak hak a,ţhianţha nih hi a tlin ve ania.

Kan titi dun bawrh bawrh a,kan titi kàr lakah,"Prisky hi ka nei ve daih mai dawn emawni le",a ti leh zauh ţhin,ka huat tur a ţawngkam hman hi nuam a ti tih ka hriat miau vangin ka ngai haw duh lo lui tlat a,amah zawk zawk chuan ka banpuam a min hnek zauh pahin,"haw ve ta che mawle",a ti leh hlawl ţhin a,kan nui dun leh hawk zel,"E,kha,Jp-a pawh ilo han thleng chho ani maw",ti ri kan hriat rualin kan hawi dun ţhawt a,"nia hei,tlangval tlawngàwl nih man ah ţhiante natna khum a mu reng mai chu tiin ka lo han chhohsan rawk rawk mai che anih hi",a ti teh vut a,Rd-a pawh a nui ve huk a,"ka rangkachak chu a harh tawh em?Ka duh ai ka tlai ta deuh a,Rose leh Didingi ka thlah kawi leh nen",a tih chuan a harh tawh thu ka hrilh sap a,Prisky ngaihtuahawm a ni tawh lo an ti bawk nen kan pathumin kan titi ho ta a,a ţhianpa Pd-a chuan a rilru a luah hneh ngang ani ange a sawi chhuak leh ţhin.

"E,taka,u Pd-a te nen engtia in hria a inkawm nge maw in nih le",ti a Jp-a zawhna chu,"nia,class kan kal ho ţhin a,pa thinnel leh zaidam tak hi ani roh a,kawm a nuam asin,a nawi peih ve viau ţhin a,fiam tak té hian kan fiam a,kan ţhianho ah chuan Hruaite-a nen hian fiam hi an hlawh ber mai,ka ui tak tak ani,a ui Vàrmaléki lah kha a lainatawm teh asin,an in awm nasa dun si a,pafà ang mai hian an innél roh a,ran mai mah nise atan tak pawh a hrilhhai thlak duh ngawt ang",a tih chuan,"tinge Vàrmaléki an tih kher a",ka lo tinve zauh a,nui hawk hawkin,"aw....a vàr lo ve chiang ém a",ala ti sam ét zui,a ui hming chu a phuah thiam mai mai mange ka ti rilru rauh rauh a,ka nuih chu a za ru viau.

Jp-a tho hluaiin a kal tur thu a sawi sup a,chelh khawmuang duh bik lo in kan mangţha ve mai bawk,kawngkhar thleng ka thlah a,a túk lama min rawn tlawh leh tur thu sawi supin min kalsan a,Prisky khum bulah ţhu in kan ngawi dun rauh rauh a,rei fé kan ţhut chawrh chawrh hnu ah ka pum a ri raih raih a,ka pum hup bet chawtin Rd-a ka en chuan chík zetin min lo en a,"engmah i ei lo nge i ţam leh tawh zawk",a ti sup.

Min hauh ka hlauh vangin thil ka ei thu ka sawi a,min rin hmel tehchiam lo,"kha,hei hi ei la,ţam zualpui chu a hném ang",tih pahin juice leh cake min pe a,"a thlum awm si,ka ei peih lo e a",ka ti hmuk a,nui hawkin min barh lui hram,thil thlum hi ka ti hleithei lo miau a,ka chhak chhuak leh vek!

Ka kam ţhuahin tui ka lem khawlh khawlh a,inthiamlo hmel a pu,ngawi rengin kan ţhu leh chawt chawt a,bench sei vak lo awm ah chuan mu turin min ti a,ka mi ve mai bawk,ka muttui lai takin ka sam a khawih niap niap tu an awm vangin ka harh a,hàm bai baiin ka tho a,Rda'n ka bul a ţhu in a mal minlo kham tir a,ka sam a lo khalh niap niap chu niin.

"Mu ve tawh la"ka tih chuan tlawmngai viau mahse ka ti lui ve tlat a,hreh zetin a mu,Prisky khum bulah ţhu in a khum ka bawh a,a kut ka vuan tlat bawk,ka lo muhil leh ani ange,"Hluhlu",ti a min sawi dat dat chuan ka harh a,Prisky ngeiin min ko ani!"Ka mautuaite",ka ti sap a,mittui tling pam a min en in a ke a nat thu a sawi sap.

Kar hnih vel kan inenkawl hnu ah Prisky pawh a ţha viau tawh a,duhtawk a kal a la harsat deuh e tih mai ani tawh tih ah kan in la chhuak a,a awm chhung zawng khan ka riahpui ngat ngat tawp,nu Marami te paw'n min ti lui bik lo a,Rd-a haw in tiffin a la mai zel,Jp-a paw'n min tlawh awl lo a,Prisky ei duhzawng tiin pizza a rawn khai ziah lehnghal,a chungah kei chauh nilo Rd-a te pawh an lawm ve viau in ka hria.

Kan inneihna pawh thla thum ngawt ani ve ta,inchhung awm ringawt mai ka nin avangin Rda'n dawr lian ţha ve tawk tak Millenium Centre(M.C) min hawn sak a,thawmhnaw dawr niin kan lún ve viau,in a awm chu Prisky paw'n a nin ţhin vangin a rawn kal ve ziah a,a la dam ţha lutuk lo nen hnathawh erawh ka phalsak lo bur thung,mahse,Prisky nunna zàwiàwi em em a,biak a min chhan mai nachang hrelo te'n a awm zeuh zeuh,engthil emaw ngaihtuah ni awm tak hian a melh ngai a melh leh tlawk tlawk ţhin,ka ngaih ti ţha lo in zawt ţhin mahila a nawm loh deuh thu sawiin zawh nawn theih lohin a awm leh tlat ţhin a,ka ngawihsan veleh mai zel bawk.Nu Marami te nen pawh kan inpawh ve viau tawh a,ka dawr a Prisky rawn kal pawh an sawisel em em hran ngailo.

Customer nei a ka buai lai chuan Prisky chu na tuar tih hriat takin a rúm hlat hlat a,a thàwm ah chuan hriain phàwk hrà in ka en a,a ke bul ah thisen lo tlingin a lo rúm hlat hlat!Rang tak a panhnai vatin ka ko chúl a,mittui tling pam a min en kiauin a tài zawn a dawm ngar ngar a,a hnu ah phei chuan meng à riaiin a tlu ta hnawk!

Mangang zetin ka dawr bul a dawr awm ve te chu ka ko chúl a,min buaipui sawk sawkin damdawiin lam ah kan in phur phei a,damdawiin thlengin doctor leh nurse te'n min buaipui sawk sawk a,Prisky an en lai chuan Rd-a leh nu Marami te chanchin hrilhin ka call a,rang takin ka call hnu reilote ah an rawn thleng hlawm.An rawn thlen veleh chanchin min zawt sap sap a,doctor te'n an en mek thu ka hrilh mawl tawp ringawt,an ngaihtuah hmel hlawm viau.Ni e,a awmlo hran lo e,an fanu neihchhun ani a,an tan a hlut zia ka hria,ka tan tak pawh ka hmangaih ani a,min ţhàwngin min bàrakhaih ve tho.

Doctor rawn chhuak chu a chanchin hriat chak taka zawtin kan lo bàwr khawm nghal laih a,a thusawi erawh chuan min ţhàwng kher mai."Theihtawp kan chhuah a,mahse,a naupai chu a chhiat hman ta ani,kan chhan thei ta ngang lo ani e,pawi ka ti khawp mai",a tih chuan ka nghíng dawt."Mah,mahse doctor,nau a pai hleinem",zàwi ràihin ka ti a,doctor pawh chuan phàwk taka min en kualin,"Nau thla hnih mi a pai ngei alawm,mahse,kan chhan thei ta lo ani,pawi ka ti khawp mai,damlo erawh ngaihtuahawm a ni tawh lo e",tiin a kalsawn zui nghal a,kan ţhu ngawi chawrh chawrh hlawm.

Ka Prisky,ka hmangaih khan min phatsanin mipa a mutpui a,nau hial a keng anih chu!