PRISKY chapter-4

PRISKY

By-Hluhlu-i Khiangte

Chapter-4

Ka nu aw in,"lut ang ule,hun nuam tak in hmang dawn nia Bawiha",a tih chuan hreh zet a ka ban vaiin ka nu leh pa ka zui lut hnak hnak a,Hluhlu-i pawh in ka huphurh ang tluk zetin a huphurh ve tho tih ka hre thei.

Ka khum ah mu in ka in lukhuh a,ka mobile ka sik nauh nauh a,ka u leh Hluhlu-i hnen aţang call emaw message pawh ka la dawng miah lo chuan min ti thinrim ţun a,ka mittui a tla pàr tawh,ka call in an pick-up thei silo,tun ah phei chuan an call tlang theih loh hmiah,ka hné lutuk,ngawi teh,an ni hi! Ka in perh tho zawt a,nupa nun an hmang ani thei angem?Nilo,thil theih a nilo,a thleng tur a nilo bur.

Rang zet a thawmhnaw lum ha sawk sawk in scooty chabi la in ka chhuak a,tuma'n min hmu lo hlauh e,ka thawm an hriat ka hlauh vangin garage aţanga nawr chhuakin kawngpui ka in nawr thlen chuan ka thlan nasa hlé,khawpui lah chu a ri ang dur dur a,ruah hian sur a tum emawni reuh le.Ka scooty start nung vat vat in ka tlan chhuak a,thli a thaw deuh vuk vuk nen ka tlan thaw pah bawk si a,a vawt ka ti viau mai,Aizawl khawpui laili tak mai,Chanmari a khawsa kan nih vang hian,kan in aţang hian an riahna hmun kan farm house hi a hla zék leh ta nghal a,ka speed pawh a zawi lo kher mai,ka rilru ah an lo chetsual dun mawlh ka hlau a,chu chuan zan khawthim pawh hlau zo lo a min siamin ka tlan ta mai chu ani si a,ka unaunu ah ka hmangaih hi ka pawm thei hauh lo ang,maubawk tlan pel in khawpui ka chhuahsan a,ruah sur buan buanin khawpui a ri dur dur bawk a,kawl a phe zawr zawr bawk nen,ka huh zawr hneh tawh kher lehnghal.

Kan farm house ka thleng ţep tawh,kilometre 1 vel lek a awm tawh tih ah chuan kawng kual lai ah truck lian zet a rawn lang thut a,a headlight eng pawh ka hmu hauh lo,ka scooty khalh lai ka tha tawp chhuah a steering ka herh kawi zawk chuan kopang su dawt in a ri hrawk a,ka tawp chawt a,ka lu leh ka nàk thla na nghal zawk zawkin ka ke a na viau bawk,thei leh thei lo in ka hawi a,kha truck khan min tlansan daih,ka che sawn thei lo a,ka scooty in min delh tlat bawk nen,thih ka hmabak tih ngawt ka rilru ah a awm a,ka thinlung hmang a ka hmangaih Hluhlu-i leh ka u ko in ka rúm ru vawng vawng,tawrh hleihtheih loh khawp a a nat hnu ah ka mit ka chhing a,a thim ta mup mai le!

                             Hluhlu-i P.O.V

Kan riahna tur farm house kan thleng a,ka chau viau mai,kan kal tur hreh lutuk hmel pu chung a ka mautuaitei'n min thlah liam mawlh kha ka mitthla ah a cham reng mai.Call tumin ka mobile ka ban zuai a,mahse ka call tlang thei miah lo,network a chhia ani mahna,nakinah ka try leh mai ang chu.

Inthlak a in ti fel in ka bungrua tlem chu ka dah fel a,vawiin lam ah ka thlan nasa bawk nen ka in bual nghal bawk a,ka inbual zo  bualin aţanga ka chhuak chu mak ti zet in Rd-a chu ka en a,khum ah a lo ţhu rún anih chu!Bah nakin"tah hian i riak ve dawn mi?",ka ti sep a,nui hawkin a lu a tuai vut a,"nupa kan ni tawh a,riah hran a ngai em ni?",ti a min zawh let khauh chuan ka ter nghal at a,ka towel bih pawm khawm ţàt pahin,"i hur e a",ka ti leh ţhat ringawt.Chutah,za em em a nuiin a pum a dawm vel a,min en a,a nui nghek nghek ringawt! "Ka nu in hun nuam tak hmang dun turin min tih kha",a tih leh chuan ka thinrim bawk si,ka ngei bawk si chu ka ţap ţep thei hial.

"Inthlak fel la,movie en pahin beer dawm dun ila",a tih chuan ka phawk hrà a,"ehhh,hetah i kawl em ni?",Tiin ka zawt khauh.Bu nghut a nui tuh tuh in min chhuah san a,room kawngka ka khar a, kalh nghal sawk sawkin ka inthlak vat a,boruak a vawt deuh vur bawk nen thawmhnaw lum ka keng lo chu à hi ka inti ngawih ngawih,ka inbual zo chiah bawk nen ka khur ru deuh,khum a puannuam pakhat inthlep chu la in ka sin chhuak hlàn a,kan farm house riahna hi in pangngai ang maiin an sa bawk nen a zau nuam viau,room pawh pathum ngawt an dah a,ţhutkhawmna pindan zau lutuk lo awm in choka pawh an bei phuisui viau.Ţhutkhawmna pindan lam ah kal in,"movie en na tur a awm em ni",tiin ka au lawng lawng a,Rd-a chu rawn hawiin min hmuh chuan ka zawhna chhang lo in min rawn pan vut a,ka pang rawn dekin a bu nghut nghut a,mak ti zetin ka lo en kar ringawt.

A room lamah lutin damdawi a rawn keng chhuak a,ka kut a min pe in choka lam a pan leh vut a,tui rawn suakin damdawi ei turin min ti nghut.

"Ih,ka damlo hleinem",ka ti sep a,"i pang a sa deuh a,i khua a sik maithei,khua a nuam lo bawk nen ei khalh daih rawh",min tih chuan ka ei ve mai bawk a,ka mit leh lu vel a na kham ţhúm bawk nen ka damlo dawn tak takin ka hre leh hnuhnawh.Ţhutthleng ah ţhu dun in beer kan in dun khalh khalh a,ka beer in leh ka damdawi ei in hna min thawh sak ani mahna ka thawk a sa deuh ţan,bottle khat ka in zawh hnu chuan la duhtawk mai lo in whiskey a neih leh neih loh ka zawt a,a bu nghut nàngin min pek zu tum chuang ţhak lo a!

"Whiskey chu",ka ti bul hmuk a,min en vutin a lu a thing nghut a,"uikawm lutuk",tiin ka phun sap a,ka lawm hlawl lo,"damdawi i ei bawk nen beer pawh kha in lo la ka ti zawk ngawt asin",a tih leh nghut chuan ka lu ka thing nak nak a,"i uikawm ve hrim hrim anih kha,ka rul leh ang che",ka tih chuan thaw hawkin a tho vut a,room ah lutin B.B(BACARDI BLACK) whiskey a rawn la chhuak a,uikawm nih chu a duh lo ve kher mai,choka aţanga no la leh in a thli kerh kerh a,ka in chak tawh lutuk chu chil ka lem dawk dawk thei,tui a pawlh pawh nghak hman lo chuan ka ban vat a,phun chhuak hluk in min chhuh leh daih anih chu!

"Prisky hi ka hmangaih tih i hria tiraw?Ani ka hnaih theih nan chauh ka nei che tih theihnghilh suh ang che,thil ţha lo lam kha ngaihtuah hlek suh"ka ti bah nawk nawk a,nui sukin,"i ngaihtuah zawk anih hmel viau mai",min tih chuan ka ter nghal at,"zakthei lo lutuk mai,Prisky pawh kan bul ah i hruai ve duh lo a",ka tih chuan tho vutin min pawm kang lawp a,ka phu dawrh a,ka tàl chiam a chu awmzia a awm lo kher mai,"hruai ve ila kan thil tum,in tan a ka tih hi ka nu leh pa te'n an hrethiam vat dawn,dawhtheihna nei ve ta che,ka rangkachak paw'n hreh tak chungin min vai liam kha,tuar rih rawh",min ti pah nghut nghut a,tàl tawh lo in ka thaw dep dep ringawt,a sawi dik miau!Room ah min luh puiin khum ah min mut a,puan min silh tirin muhil turin min hrilh sup,"ka la rui lo,ka in leh duh",ka tih leh hràm chuan a ner nawk."I rui tawh takzet",min ti nghutin min chhuahsan vut a,lawmlo zet in ka hawi tau hmawk hmawk.

"Prisky kan la call miah lo ania",ti pah in ka chhuak leh a,engti tih a theihnghilh nge maw ka nih zawk le?A mobile bih ngur chungin a lo dawt karh karh bik anih chu!Ngei zet a melhin ka in thlit leh thawr a,tui tam lo té a pawlhin ka lem khalh khalh."Ka rangkachak miss call a awm a,mahse,ka call back dawn a,a tlang thei miah lo,message ka hnutchhiah ringawt",a tih chuan ka harh zawk a,ka mobile la turin room lam ka pan dawr dawr.

Ka bag ka hai rawk rawk a,khawiah nge maw ka mobile kha ka dah le!E,ni dawn tak,kan thlen tirh khan Prisky call tumin ka hmang a,lukham bulah ka dah tak kha mawle,lukham bul a ka mobile let ngàt chu la in ka hmet éng dawn a,a lo in switch-off daih anih hi,hrep tak hian!

Charger nen connect in ka chhuak leh a,Rd-a bulah ţhu leh in ka mobile battery a low thu ka hrilh nghal bawk a,ka sawi mek laiin zu bottle ka ban leh dà dà chu ka banrék a rawn hmer chawt.Ka phu zawk a,nuih tlawn deuh var varin ka en kal a,nui sukin ka hmui ah a rawn fawp zeuh,ka thawk a sa ham ham a,in lakhran lehnghal a tum chu ka zu bottle vawn na thlahin rem leh rem lo in a bek ah ka dawm sak a,duhthawh zetin ka fawp anih chu!Keimah a awm ngai miahlo chàkna ka hriatthiam loh engemaw in min thunun a,inthunun lék lo in ka che ve ringawt,a hamhaih deuh nge min chhàng let miah lo.

In la hrangin"tihpalh,a thleng tawh lo ang",ka ti sep a,ka zak ve det! Rúm hawk in min hnaih rawk rawk a,nasa leh huamhauh zetin min fawp nawk nawk,theihtawp a uarin ka chhanglet ve a,ka hnute leh ka nàk thla vel te chu a chúl thawi thuak thuak a,nuam ti zet a dawh in ka in siamrem ve sàt sàt bawk,mahse,thawklehkhatah in la hrang hlawk in mu turin min ti sup a,ka harh chhuak zawk bawk.

Tunah khan ka Prisky ka phatsan lo chauh,nilo,ka phatsan ani zawk,ka rilru hian ka Prisky a hre chang hauh lo,ka phatsanna pa lah chu a u,a pianpui unau ngei ani lehnghal!

Room ah tlan lutin kawngkhar nghengin ka ding vang vang a,ka lungphu rang lutuk chu dawmin thawk ka la kawk kawk,Rd-a zawk khan ti tawp lo se inthunun tumna ka nei hauh lo tih ka pha thei lo ang!Ka hmui ka hru tawk a,mahse,a thleng vek tawh,eng thil nge ka hriat a khatianga ka chet mai le.

Ka ké a min pawt dat dat tu a awm chuan ka harh hlawl a,lu na zetin ka inbeng tho ţuah ţuah a,khua pawh a la vàr chiang hleinem le,mahse,ka ngaihtuahna vir zawkin rang fahranin ka ţhu chhuak zawt."Prisky engtinmaw a awm?",ka ti hà a,hlauhthawnna in min bual,a bo a ti in ka hria!

"Prisky a bo,ka nu in min rawn bia a,a awmna chin an hrelo,insiam vat la,chhuak ang",a tih chuan rang zetin ka tho a,ka hmanhmawh luatah ka che phelh phung thei hial! Ka lung hi hlauhthawn vangin a su dup dup a,ka thlan tla chu ka hru leh tawk ţhin,ka hamhaih nge,min ţhawng lutuk chu ka che buai vek ani ber.

Ka hawi à riai a,ka ngaihtuahna in kiltin chhui chungin ka mutkawr hlipin ka hmuh hmasak ber thuamhnaw ka inthawlh a,ka sam sei ve tak chu ka bawk tawm tawp.Rd-a rawn lutin ka kawr hak chu min phelh sak a tum a,eng thil nge tih a tum pawh ka hre lo,ka dawh tawp ringawt,ka mang vek!Ka khur dar dar chu ka taksa a khawih vangin a hria ani mahna a awm ah min kuah bet a,ka chhipsam a fawpin Prisky a ţhat tur thu min hrilh,mahse,ka hmuh hma chu ka awih lo ang,"a bul ah kal ang,ka Prisky bulah kal ang",ka ti ţiau a,a chungah eng thil nge thleng ang ka ngaihtuah ngam lo.

"Awle,kan kal dawn nia,i kawr hi a letling zawngin i ha a,ha ţha la,kan chhuak nghal dawn nia",min tih chuan ka kawr hak ka bih vut a, a awm leh awm loh pawh ngaihtuah tawh lo in ka hlip sawk sawk a,ka ha ţha vat,ka mobile ban vatin kan chhuak dawr dawr a,Rd-a car tih nun vat vat ah lutin hmanhmawh turin ka hrilh nghal thawr,a búk nghut bak chu ţawngkà-in min chhang lo.

Khawchhung lam pan a thui pawh kan tlan hma-in motor a ti ding hrawk a,mak ti zet a ka en chuan Rd-a chuan car kawngkhar hawng rawk rawkin a kal chhuak vut a,engthil nge tih hriat tum a a kalna lam en a ka hawi chhuah chhuah chuan kopang a scooty lo let bal mai ka hmu a,rang zetin ka chhuak ve nghal rawk rawk.A bul ka va thlen chuan ka thawk hi a tawp mai dawn in ka hria!

Ka hmangaih,ka Prisky chu tisa dang bei mai pu chung leh hmui duk deuh chur in,a lu leh a taksa dang aţanga thisen chhuak chungin na tuar chungin a lo let reng a,a kiang ah chuan ka khúp zaw in ka ţhingţhi thla hnawk.