PRISKY chapter-2

PRISKY

By-Hluhlu-i Khiangte

Chapter-2

Prisky nen a kan hlim lai te ngaihtuah kir a ka mitthla a hmu chung in damdawi,ka nu in ka tan a ţha ti a min pek chuan min hneh deuh bawk nen mang ram ah ka lút riai riai a.

Ka harh leh chuan khua a lo thim ruih tawh a,rin ai tak chuan ka mutui phian mai,ka harh veleh a ka rilru a lo lang nghal pawh engdang ni lo in ka Prisky bawk ani.Aw,engvang kher nge maw hmeichhia a ka lo pian kher le!Tiin ka thinlung a rúm vawng vawng a,mipa chu lo ni ila chuan engkim mai hi a dik thlup mai tur.Ka room kawngkhar ri rak ah chuan ka suangtuahna ata harh chhuak zawk in ka hawi phei a,kan awmpui nula Partei'n nui sen sen chungin tray in engemaw hi a rawn chawi lut a,"hei,i taksa chak lo kha chak tak a awm tir a ngai ania,ei tur tui tawk ka siam sak che a",tiin ka khum bul a dawhkan té chu rawn hung rem in ka ei tur a a siam chu a chhawp malh malh a,"ka ei chak lo",ka lo ti hmuk ringawt.

Nui var var in Partei chuan,"ei chak lo mah la i taksa khan a mamawh si a,tlem tal ei luih tum rawh",min ti leh sawt sawt a,Partei hi thingtlang lam mi niin a chhungkaw chawm nan naupangte ni chungin an khawsak a harsat vangin kan hnen ah a awm a,kum thum ngawt chu a awm tawh,kei ai kum khat chauh a a u avangin ka u ngai lemlo,Prisky kan in a ka hruai haw chang pawh in nel takin a lo be barh barh ţhin a,nula fel leh harhvang tak ani a,kan inchhung khur a nawm loh tehlul nen hian tu te mai pawh hi hlim hmel pu sàng in min be siam siam peih vek mai hi mak ka ti viau ţhin.A fel ém vang hian a lak a sual chhuah pawh ngai ka ti lo,chutia ka tan liau liau a ei tur hah tak a siam a min rawn pe tu chu be chhe duh bik lem lo in,mahni intih harh nan leh ka taksa in a mamawh tho avang chuan ka ei sak ve mai bwk a,beisei aiin ka ei tui phian mai.A zahve dawn ka ei tawh ang tih ah pawh a la chhuah miah loh vang chuan "tinge ila awm reng a",tiin ka melh hà a,nui hak hak chung in,"awi,i lo paih leh vek ang tih ka hlau alawm le",tih pah a ka ban puam a min chum taih chuan ka nui ve hawk hawk.Ni e,a rawn awm tirh deuh khan ka u Sangzuala nen a ngaihzawng Mary nen an chungchang ah kan in hau buai a,chu pawh Mary'n mipa dang a len chhuah pui ka hmuh thu leh in ngaizawng an ang ka tih thu ka sawi vang ani,kha ta ţang khan min duat viau ţhin tu u Sangzuala ka lak ah a mize put hmang a dang ta hlauh a,a bialnu chu a chhan hlum lo chauh ani ber,mahse nikum lawk khan u Mary chuan ka sawi ang tak takin pasal dang a nei ta daih a,ka u in thu dik a hriat aţang chuan min biak ţhat a a hma anga kan unau in pawh leh turin hma a la viau a chu ka pawh hleithei tawh lo,tunah phei chuan ka hmangaih Prisky nen kan in ngaihzawn aţang kan inkar ah a lo in rawlh ve sek bawk nen ka haw ta tlat,ka u nen kan in hauh lai khan ka thinrim titau chaw ka ei duh lo a,ka room a min rawn pek pawh a ruk in ka paih vek a,a hnu ah ka room a tih faiin a hmu leh si a,kha thil kha a la hre reng anih hi.

Chutia kan nuih dun hawk hawk lai chuan,"Ka naute chu enge a an tawh a",kawngka rawn hawng pah a rawn ti lut bawrh bawrh tu ka u Sangzuala chu kan en rual ţhawt a.Partei hian ka u hi a hmel duh tih ka hriat vangin Partei lam hawi in ka mitko ka sàn àk a,lài tih hriat zet in a biang a sen ţawn ţawn dawn emaw ka tih laiin,"hei,kan naute hian ka thu a zawm ţha khawp mai",tih pahin Partei chuan a mitko min rawn sàn khum vel anih chu.Mak ti zet in ka en kawk a,ka u lah a lo nui hawk hawk a,ka lo ner ru nak thung.Anni hi an lo in ngaizawng reuh emawni le!Ho emai,ka ngaihtuah tur a awm lo e,keimah ah hian buaina ka ngah tawk chu thuhran,keimah hi buaina pakhat chu ka tling ve hrim hrim.

Ka u a awm ve ta reng a,ka be ţha lo a,ka be chhe hek lo,min biak pawh in a rul tawk lek lek in ka chhang mai a,ka thinlung hian a pawh hleithei tlat tawh lo!Ka ei zawh chuan ka ei na plate vel Partei'n a seng a,ka u in a zui chhuak ve vut chu mak ti deuh in ka melh hé haw hnu ah tho chhuak in ka hak thlak tur leh towel la in washroom ah ka lut a,tui vawt a inbual in ka harh sawng sawng thei nia.

Ka inbual zawh hnu chuan zawi zet a ka room ti fel in thawmhnaw te ka thlep ţha a,ka khum bul dawhkan a album ka dah,ka mautuaite-i thlalak tam tham zet awmna chu ka keu a,duat taka ka fawh vawng vawng lai te,duhawm zet a a nui sen sen lai te leh kan hun hman hlimawm tamtak,valentines day a kan len dunna te keu a ka en chuan ka biang ah mittui a luang leh a,he hmeichhe awm ném,rilru no zet leh tih nat awlsam em em hian engtia rei nge min velh a min rúm tir vawng vawng dawn le?!

Ka thinlung ah a khat liam a,a tello in ka hlim thei hleinem,ka in hua a,ka in ten a,mahse,ka thinlung leh ka ngaihtuahna te hi ka thunun zo silo.Mi chak tak angin ka lang chhuak a,na ve thei lo ang maiin,mahse,ka chhungril hi a na lutuk,engtinnge hun ka hman anga,ka Prisky tello in eng kawng nge ka zawh tak ang?

Ramhnuai thim khup a kal a,khawnvar tel lo a ka vah chuan bo bak hmabak eng thil dang nge ka neih chuan?Ka khawnvar,ka éng neih chhun Prisky chu keimah hian,ni e,keimah ngei hian ka ti mít asin!Mi à tak ka ni.Ka khawnvar tel lo in ramhnuai pilril,ramsa hlauhawm tak tak te tualchai na,ramhuai leh ramsa kawlh zet awmna a in dap chawp a kal siam turin thu ka ti tlu ani si a,mahse,ka hmangaih tan ka tih a ngai si maw!

Ni e,kei chuan ka hmangaih a,a tan ţha tur ka ngaihtuah reng ţhin a,a hmeichhiat pui nen a damchhung hun a hman dawn chuan mi hmuhsitna te,diriamna,en tleu na zawng zawng a dawng anga,chutiang turin a chak tawk lo,ka kal tir a,a tello a nun hmang turin ka chak tawk lawi silo.Chu thil ka ngaihtuah vang chuan ka hma sial zetin ka chelh a,ka hmangaihna ka hlan a,ani pawhin a hmangaihna min hlan bawk,kan hlim dun a,kan nui dun a,kan in fawp a,duhthawh tak leh huamhauh takin,kan thikthu a chhia in kan in hauh dun em em a,midang biak hlek kan phal lo a,kan hun hman zawng zawng in hrilh fai kélh in kan hun tam zawk phei chu kan hmang dun ţhin anih kha.

Ka hmuh hmasak ber ni kha ka la hrereng mai,ka pa dawr zing a pakhat zarkawt ah a nu,nu Marami nen an rawn kal in ani a,ka pa manager leh nu Marami an in dawr mawlh mawlh lai khan,ka Prisky,ka hmangaih lo ni ta chu uluk zet in ka lo thlir veuh veuh a,"Thlun beh anga dingin,ngunthlu in ka thlir a,a ţangnem phen a thinlungah sawn,pasalţha anga,hmingthang ve in,a thinlung ram la tu ni thei ila.Nei tu niin,hawn tu ni thei ila.I mawina in min sal,min bual a ka tuiral,tawnmang lova lasi nula,ka hnún ah i cham,min zàwl min lem,min vél min zem,min dawivai zo ta,nangngai a kúr,saltang mitang ka ni."(K.Hminga)

Tih vawng vawng na tham tur khawp a nalh kawr fual simple zet a hak chuan a khup thleng a khuh hnap mai a, sandals simple leh nalh zet,a keţhiah mawi tak leh thianghlim sar nen a in rem em em mai a bun te chu mit khap lek lo in ka pa office aţanga chhuak a ka haw tur chu ding chawt in ka thlir a,ka chík viau,a vun lah chu a nung sar a,kut lawnga khawih atana uiawm khawpin a nalh,heti em em a ka mit la tu hi ka la tawng ngailo,a sam a dum hlap a,a fai tih hriat ngawih ngawih in a tle sat sat hial thei nia.

Ka hmeichhiat puiin chuti tak mai a ka mit ala chu mak ka inti ru viau a,an indawr fel a ka pa dawr an chhuhsan hnu ah harh chhuak zawkin ka lu ka thing nawk nawk anih kha.

Chutia nunhlui ngaihtuah a kúr a,ka lung ka tih len veng veng lai chuan ka nu in minlo ko a,chhungkaw thil pawimawh sawitur a awm tiin!Hetiang ah hian koh ka ni ngai silo a,mak ti zetin ţhutkhawmna pindan lam panin ka kal thla chhat chhat,kan ţhu khawm ren rawn a,ka pa in ding hluaiin thu a sawi a,"Hei le,kan chhungkaw dinhmun chu kan hre vek a,kan sumdawnna SPH(Kan unau min kohna hming bul ţheuh Sangzuala,Puia leh Hluhlu-i hming a vuah ani) hming  pawhin Pathian zarah hma a sawn ve bek bek zel a,kan sumdawnna zauh zel hi kan tih makmawh ani a,chumi tur atan chuan kan fanu,Hluhlu-i leh kan sumdawnna a mi pawimawh tak,min pui nasa em em tu te company,K&K(Khawlhring&Khiangte) company a an fapa Ramdinsanga nen innei in palai te ti fel ila tiin Marami te nen kan inbia a,in inbuatsaih ţheuh dawn nia",a tih chuan mak tih vangin kan hawi phawk hra hlawm.

Kei phei chu min ţhawng takzet!Engdang vang nilo in,chu chu ka Prisky te chhungkaw company ani a,a u ani mahna!

Lu thing nak nak chung a"Ani theilo ka pa",ka tih ţhat chuan,"duhdan leh ngaihdan sawi turin ka ti lo che u,ka thu hi zawm ula in tan a ţha ang,chuan,Sangzuala leh Par-i pawh in inkawp ani awm a,tawp ang che u",ti hmak in an room lam a pan vut a,ka nu in min en kual zawk hlawmin ka pa a zui vat bawk.

Ka u te pahnih mak tih hmel taka hawi hra leh Partei,zak tih hriat tak a ding zum zat mai chu en zawkin ka room lamah ka tlan chho a,ka khum ah bawk in ka ţap hlawp hlawp,ka nun hi infiamna ang mai ah ngaiin min khel kual vel ni ber in ka hre ta hial!Ka hmangaih ka thlah a ngaih chu sawi loh,an company mai nilo,an inchhung ah ka unaunu anga hrawn chu ka thei lo ang,nilo,thil theih a nilo bur!