JOEL LALREMSIAMA last

 JOEL LALREMSIAMA

CHAPTER-13(last chapter)

By-Hluhlu-i Khiangte

Zing hma tak ah ka tho a,tukṭhuan tur ka siam a,ka nau te an rawn thawh hnu ah pawh Joel a rawn tho chhuak lo,a room ka va bih dak dak a,felfai zet in a lo inthlep ṭha vek!

Mak ti zet in a room ah ka lut a,a khum bul dawhkan te ah kan pahnih a kan thlalak frame mawi zet a lo hung ran.Ka hawi kual a,a felfai phian mipa room ah chuan,nizan ah hetah a riak lo ani mahna,kan unau in a hnen ah kan riak si a,ani lah a riak chhuak daih lawi si! Nuam lo kan tih a hlauh vang nge maw ni dawn le.

Ngaihtuah zui duh lo breakfast kan ei san a,ka nau te school kal turin an liam tawh,kan awmna veng anih tawh loh vangin auto stand thleng ka thlah hnu ah ka let leh a,Joel-a alo la haw lo cheu chu ka hrethiam lo kher mai,ka call dawt hreh bawk si nen lài zet in ka tawi ka tawi a,ka mobile ri ah ka la phu zuk zui,ka awm dawm vang vang in tunge lo call tu ka en a,Naom-i nu ani,a ni hnen ah hian tlu lut rawih ila ṭha ber in ka hria,rang takin ka pick up a,thu ho te te sawiin kan nui dun hak hak,hmuh ka duh thu ka sawi chuan rangzet in a lo aw hmiah.

Kan in hmuhna hmasa ber light house ah kan ṭhu dun ran a,keiin beer ka in khalh khalh laiin Naom-i nu chuan breezer a in thung,harhfim kek kawk chuan ka zàm a,ka zak bawk,a nuam tawk vel in ka awm ta maw tih ah ka chanchin kimchang zetin ka hrilh fai kelh a,ka nau te chawm nan hna ka mamawh zia te pawh ka hrilh mawlh mawlh,ka rui lungpuam deuh nen ka mittui a parawl ṭeuh a,Naom-i nu Mimi-i lah chuti tho.

"Hna chu a awm em em ang,kan pa hnen ah ka lo sawi anga,kei chu ka fa te ka enkawl tawh vang hian hna lam ka buaipui lutuk tawh lo a,ka lo sawi pui dawn nia,lungngai reng reng suh",ti a min hnem chuan ka thaw huai a,pawisa min pek a tum erawh lawm lo fahran in ka hnar.Mihring ṭheuh ṭheuh dinhmun hi a va inthlau thei tak èm!Mi in ei sen loh an neih ṭen ṭun laiin keini fahrah leh baihvai zet in hun kan hmang a,keini ai chan chhe zawk ke bul leh ban bul,dam khaw chhuah tum a kut hial dawh an la awm lehzel bawk!

Pathian hi a fair lo ka ti ngawih ngawih!

Rualkhai deuh zawk hian ro a rel thei mai lo em ni?Tiin ka in zawt fo.Chhanna ka pe thei lo a,chhanna pe thei tu lah hian ngawih a chuh lawi si!

Chau zet in ka haw a,Naom-i nu in bazar ah min vah kual pui leh hrep a,chhun chhun h beer ka in bawk nen lu a na tel bawk.In ka thleng chu kawngkhar hawn mai ka tum a,kan in hlui ah zawk ka haw tih ka hre chiah,rilru natna bawk in min hmer leh a,Joel-a in lam ka pan leh hnak hnak a,ka duh loh dan zet in mahni in khawngaih in ka mittui a far fap fap.

In ka thleng chu Joel-a leh ka naute bak ah Mapuia te pathum an lo buai hle a,ni e,ke ngal ngat in ka haw hnak hnak kha ani a,ka thleng tlai viau bawk.Joela'n min pan vut in ka biang lehlam lehlam ah a rawn dawm chawt a,ka chal a fawh hnu ah nghet lutuk in min kuah bet tlat a,thawk a lak ham ham hnu ah "min ti mangang alawm",a ti sup.Aw thian ri kharh ka hriat rual in rang fahran in ka tawlh sawn dawrh a,za zet in Mapuia te pathum bak ah ka nau te'n min lo nuih hawk hawk hlawm,lài lutuk in ka lei ka chhuah zauh a,Lalawmpuian ka ban puam a rawn hnek dawt.

"Mawl lutuk mai",a ti vei sup a,chimawm chhuah ṭhin mahse min ngaihtuah tih ka hria a,ka lawm viau tho.Min hau sap sap a,ka nuih tlawn var var hlawm.

(Thlawh kan duai mai ang aw)

Naom-i nu te hotel pakhat ah spa manager tho a thawk in ka hlawh pawh a ṭha viau a,lungphangin kan awm ta bik lo ve.Ka hlawh ṭhenkhat ka khawl ve zel a,ka in dah lut ve nual tawh nghe nghe.

Kum thum liam hnu ah meuh chuan ka hrehawmna te ka hre reng ta bik lo,Joel nen pawh kan ṭha chho zel a,inneih a sawi ri fo tawh nghe nghe,ka nau te ka la ngaihtuah deuh vangin ka la hnial ve hram hram rih a,a lungawi lo lek lek ṭhin,mahse ka tan an in a ka nau te chhawm luh a rem ṭeuh bik silo a,ka la ti lui ve ṭang ṭang,thianghlim takin kan in kawp a,ka nunhlui min sawi chhuah sak ngai hek lo,a kiang ah ka thla a muang a,ka hahdam ṭhin bawk,ka hmangaih ai nasa in min hmangaih bawk a,mahse beer in a phal ta lo bur!

Keipawh in thu awih zet in ka in lo ve mai bawk a,ti buai tu leh er tu kan nei lem lo bawk a kan hlim tlang hle,Mamta madam a boral tawh a,Ate-i pawh Abhishek nen an innei a,a che na thei riap riap hle,mahse tu ma ngaihsan a hlawh lem chuang lo a,min kher zui tawhlo ngawt pawh a lawmawm,Sanjay pawh a la tlangval tluang zel a,nupui neih a la peih ngang lo ani mahna le.

Ka nu te pawh ngaihtuah awm an ni lutuk tawh lo a,Israel-i class 12 anih tawh laiin Hruaizela class 9 ani ve mek,Israel zawk hian college te han zawm ve se pasal neih te pawh ka ngaihtuah ve tawh ang chu.

Hun a liam zel a,keini pawh inneihna buatsaih in kan buai mawp mawp a,palai tirh na tur chungchang kan sawi chuan hrehawm hi ka ti ngawih ngawih,nu leh pa ka nei tawh lo a,ka pi leh pu lah ka hre hek lo! Khawzawl Arro veng a ka nu duhsak ve em em ṭhin tu ka pu Hmingliana'n ka man a dawng a,a hma a kan in pawh kha thawm ṭha in ka nau te pahnih an awm a,mahse mal in an awm bik lo,ka tih ngai hauh lo in ka pasal leh ka nu leh pa lo ni ta Nu Ngaihi leh Pa Khianga'n an ngaihsak em em reng a,sawiselna tur reng ka hrelo.

Mahse nau hi ka pai hleithei lo tlat mai,kan awt ve ngawih ngawih a,Pathian in rem min la tih sak lo ni hmiang,ka pai thei silo,mahse ka tan a hrehawm turin ṭawngkam an nei ngai lo a,a ruk erawh chuan ka inthlahrung hle thung.

Tuk khat ka tho chu ka tho fuh lo lutuk a,ka lu a hai muai muai reng mai a,ka luak a chhuak hlui reng bawk nen ka thin lah chu a chhe hlur a,tukṭhuan ka siam te chu ka che sawk sawk ani mai,chau hnep in ka bawl zo thei hram,rawng ka bawl zo kan nupa room ah ka lut a,khum ah ka mu thlawp,ka khua te hi a sik deuh in ka hria,che peih tawh ngang lo in ka mu kawm ngat ngat,engahnge maw tukin ber kher ah ka chhungte pawh hi an thawh theih miah loh le! Joel-a lah a hna thil ah a zin daih si a,ka thin pawh a rim thei lo,ka nu ka ngai vawng vawng mai,kan room kawngkhar a ri rek a,hawi pawh ka hawi chhuak peih lo.

"Ehe",ti hliai chungin ka nu(Joel-a nu) in min rawn pan vat a,nikhua ka hre mumal tawh lo,ka mit ka chhing riai riai a,in sehruh tur pawh in chak na ka nei ta lo,ka khawhmuh a fiah lo a,a thim ta mup.

Ka harh hlawl a,ka mang lam a ka nu ka hmuh kha ka ngai ngawih ngawih,vài riai in ka meng a,min ngaihtuah hmel zet in ka chhungte'n minlo en ṭhap,Joela'n min ban vut a,ka ṭhat leh ṭhat loh thu min zawt nghal sap sap,ka ṭhat thu in ka chhang var hlawm a,an thaw huai hlawm.

Joel-a hmel ah leh ka nu leh pa te hmel ah hlim hmel lang chhuak nghal in nau ka pai thu min hrilh chuan ka nghilh dup!

Kei hian nau ka pai maw!

Ka mittui a tla sawk a,mahse hlim vang ani.Nu ka ni ve tawh dawn anih chu! 

Ka fapa Nicholas Ramdinpuia ṭap ngak ngak vang chuan ka harh vat a,phì ruai chungin meng hlei lo in hnute ka barh tawp,ka pasal Joel-a mawi leh ril zet in a rawn nui hawk a,kan fapa chu hnute a hnek rem theih nan a siam rem vei sut sut,a atchilh ania!

Na tak tuar in fapa duhawm zet ka hring a,ka fapa hmel ka hmuh khan kei hi lawm vangin ka mittui a tla hial! Nu leh pa te tan fa te hi an lo va'n hlu dawn tak êm,naute dang zawng zawng aiin ka mit ah a ṭha lawr lak a,chhìng zo tu an awm hian ka ring mawlh lo.

Thilpek ka dawn tawh a zawng a hlu ber mai ka fapa leh a pa,ka pasal ni bawk Joel infiam nui hawk hawk chu hlim zet in ka thlir a,ka dul puar lian ve tawh tak chu ka chul heuh heuh,harsatna tamtak ka paltlang te khan min ti na tawh lo a,mahse,ka nawmna um a kawng dik lo ka zawh erawh hrehawm ka ti ṭhin,ka thianghlimna ka hlan hi ka hmangaih hian a phu a,ani ai phu an awm si lo.

Ka tan a kawng min ruat sak zawh lo a ka duhdan a kal a,amah ka lo dem ṭhin na te,min chhanna nghak lo a ka mihring rilru a kawng ka lo in sial sak ve chiam na te khan natna bak min thlen lo tih ka hre har lutuk a,kha thil vang khan ngaihdam ka dil fo ṭhin,a hnen ah ṭawngṭai in.Mahse,ani chuan min pawm a,a angchhung ah min kuangkuah a,malsawmna min vur hial bawk,amah kha ani,ka dem ṭhin Pathian kha!

Beidawnna,lungngaihna leh ṭahna te,natna te kha ka ta emaw ka ti ṭhin a,mahse hei hi ka hre tawh.

Hlimna,lawmna,thlamuanna leh nuihna te pawh hi ka ta zing ah a lo tel ve reng.

Ka hlimna leh lawmna ka neih theih nan a Pathian min pek ka pasal hi ka hmangaih a,ka hmangaih reng bawk ang.

Hmangaihna tamtak min vur a,lawmna leh hlimna tamtak min pe tu,ka tling lo chung pawh a tling a min pawm a,khawvel a hmeichhe hlu ber ang hial a min in ngaih tir thei khawp a hmangaihna ngah tu JOEL LALREMSIAMA hi ka phat ngai lo ang.

(A tawp ta thut mai,min hau suh u aw)