JOEL LALREMSIAMA chapter-8

JOEL LALREMSIAMA

CHAPTER-8

By-Hluhlu-i Khiangte

(A ngaihnawm lo in a tawi deuh viau  ang,min lo hrethiam hram teh u)

Ka mobile a a number save chu ka en a,Naom-i nu tiin a lo in save kiau a,ka nui hak,a fanu chu a chhuang hle mai ti rilru rauh rauh pah in ka beer ka lem leh khawlh khawlh.

Joel-a bul ah ka in ngailo bawk a,a manhla kher mai,khaw lum bawk nen beer vawt han in khalh khalh mai chu,chilly chicken ka hmeh pah bawk nen,dinner pawh ka ei nghal law law mai ang ka tih rilruk lai in nichin a ka mi hmuh te kha an rawn lang leh hlawl. An in be zo tawh ani mahna,min rawn be leh sawt sawt a,a rul tawk lek lek in ka chhang thung.

Dinner ei ho ila an tih chuan ka bu nghat a,mawl min ti ngawt in ka ring,ka mawl ve bawk lah tak a! Mahse engnge pawi? Ka mawl vang a an pawi ka sawi pawh ka hriat siloh. Chu rilru pawh mawl vang bawk!

Dinner tui zet kan ei ho a,an naute Naom-i chu a duhawm kher mai,kum 6 mi tur vel a ni a,ka nau te ka ngaihtuah chhuak a,ka ngai vawng vawng,an ni chu nu leh pa chu sawi loh,anmahni enkawl nan hna ka thawh a ngaih miau avang in an u pawh in ka uap lum thei si lo a,Naom-i chu vannei ka ti kher mai,min nèl in min be ve sawt sawt a,ka nelawm loh nen naupang hian min duh ve thei phian a,chhaih nui har har thiam chai silo hian ka nun an ti hlim veng veng lawi.

Dinner kan ei ho hnu ah ka room tur lam ah auto bawk la in ka kal a,min thlah an tum viau na a ka hnial ta mai,dinner lah min treat vek bawk nen nuam ka ti chiah bik lo deuh.

Beer bottle hnih ka hawn leh hram a,room ah ka in chhunzawm ngar ngar! Ka in mawlh mawlh laiin Abhishek call a lo kal a,peih lo zet in ka pick-up hram,"Annie,tun thla chu chawl rih la,hna chu thla thar aṭang in ṭan dawn nia,hlawh chu i la tho ang,thla a thar ṭep tawh tho",a tih chuan chek hluk in,"engvangin",ka ti hlar. A rawn nui leh hawk a,"baby,i thinchhe lutuk hian min ti phur riau",a ti a nih chu! "I chhe ve e",ti hlar in phone ka off hmak. Engah nge maw min duhsak chiam ni? A awmzia ka hrethiam map lo e,pawi lo,hlawh ka hmuh tho chuan a tawk chiah,mahse a ninawm duh dawn mange,hna han thawh loh chu,ni 10 zet thla thar nan kan la bàk si a,e taka,mizo welfare ah te ka in register ve tawh ang chu,bangalore ah khan ka ngaihsak lo lulai lutuk a,chhiat kan tawh khan min en san hmiah thei an ni,mahse mizo rilru tak in min ṭawiawm in min puibawm tho anih kha,chhiat ṭhat tawk thei reng kan ni a,bakah a ṭha ve reng reng,hmelhriat neih na te pawh ani ve leh mai,mal tak a awm ka tum tawh bik lo.

Naom-i nu kha ka biak mai loh chuan,sana ka en a,call ka tum zuk ania,a lo tlai tawh angreng si a,whatsapp ah message ka hnutchhiah ta mai,"Naom-i nu",tih zawng ka va thawn. Ka nuih a ti za reuh takzet,a hming pawh ka hre lo ania,zawh nachang pawh ka lo hre chuang lo,an pa kha chu Ramdina a tih kha maw,Naom-i nu tiin ka ko mai dinner kan ei pawh khan,ko tur a min duh dan aniang chu ka ti bawk a,pawi lo tur ah ngai ang.

Min rawn reply lo in min rawn call a,ka pick vat,welfare ah member ni tur a in ziahluh ve ka duh thu ka sawi chuan min ngaihven vat,"kan pa hi welfare secretary a ni ve a,a buaithlak lo lutuk,ka va'n lawm tak,manager ah tiraw i awm dawn,in hotel fortune ah pawh khan mizo chu thawk an awm ve nuk kha",ka nui hak hak a,"a eng ber nge ka chhan dawn che",ka tih chuan za lutuk in a rawn nui a,ka phone ka beng bul aṭang ka la sawn vat,a nui ring fiak ṭha kher mai,a viak a ṭha viau ang,a tet lai in a harh ka ring viau bawk.

Kan nui dun hawk hawk a,spa manager a ka awm tur thu ka sawi a,engnge an thawh ve tih ka zawh chuan sumdawnna chhe te an enkawl tih a sawi a,an chezia aṭang ho te a khawsa an nih ka ringlo ve hmiah,ka ring vak lo na a ka zawt chìk lem lo thung,min hrilh duh chin chu min hrilh mai ang.

A tuk a inhmu tur a kan in biak fel hnu ah phone kan dah a,keipawh mut zai ka rel ve ta a,muhil thei lawk lo in thil ka ngaihtuah a,engdang ni lo in Joel bawk ani ka ngaihtuah ni. Mak hi ka ti tawp theilo,min hmangaih em em in ka hre ṭhin si a. Ngaihtuah zawm duh lo in ka mit ka chhing lui ngar ngar a,beer ka in hnem bawk a ka muhil ve mai,zing hma zet ah ka ṭhangharh a,hnathawh ngai a ka awm in thawh hre thei mang silo hi thawh a ngaih loh veleh ka tho hma lawi a,laktlak lo lutuk,hmanhmawh lo zet in ka inbual sar sar a,vawiin chu Portblair hi ka dài dar dawn.

Breakfast ei in ka ei zawh ah ka insiam a,ka chhuak vat a,Naom-i nu nen Nayagaon a inhmuh kan tum vangin amah ka call hnu ah ka chhuak a,auto chuan hi ka nin tehlul nen a dang hman tur awm silo,two wheeler hawh tur zawng ila a ṭha ang,mahse,chinchang ka la hre lo a,Naom-i nu kha ka zawt mai a niang chu.

Kan inhmuh na hmun tur ka thleng a,minlo nghak vang tawh mai,min hmuh rual rual in min kuah chung chung a,an pa hna thil a neil island lam a a kal avangin ama'n min buaipui dawn ni awm e,ka lawm takzet,hetiang a min han nel ve mai hi,min hriatna a la rei loh nen. Kan kal na hmun chu Doctor quarter hi a lo ni a,doctor Jonathan te an ni,chhungkua in an awm a,helam mizo chuan harsatna an neih a an pun ber ṭhin ani awm e,mizo welfare ah president a ni bawk.

Member fee te in pe fel in hna chungchang kan sawi a,doctor Jonathan-a nupui hmelṭha zet in lunch tui tak min chhawp bawk a,nuam ka ti ve hle,rual ka pawl meuh ṭhin loh avang hian mi ningkhawng hi ka hrelo a,ka hna leh ka chhungkua ngawr ngawr kha ka thupui ber ṭhin bawk a,rual han pawl na hun tur ka nei tehchiam lo bawk nen,han tih ve tak ah chuan nuam ka ti ve riau,ka khawvel kha a lo zìm bawk ṭhin èm ani.Pathianni tlai ah mizo ho in inkhawmna hun an hman ho ṭhin thu te leh an kal phung ka hriat ṭul awm ang min hrilh a,pa dam thluam mai hi ani roh(rauh) bawk nen a nelawm kher mai,ka number te la in welfare group ah te min add ve bawk a,Naom-i nu nen tih tur kan neih chhuanlam in kan haw san ta hram,an kiang ah kan va tâp nileng ani ber,vawiin zet chu ka thawl halh a,ka zalen a,nuam ka ti ru ve phian,Portblair dài dar te chu hnai lo,veng hming pawh ka la hre kim lo chu ania le(h).

Food court an tih ah Naom-i nu(Mimi R.Lalmuansangi) in min hruai in thil kan ei leh a,a pasal in khawlai a thil ei a phal loh ṭhin thu min hrilh chuan ka nuih a za ru takzet,Pu Jonathan te in ah khan kan ei nual tawh si a,a la ei nghek thei tho! A bul a awm a nuam in a harhvang bawk a,keipawh ka nui nasa kher mai. Chau hnap in room ka thleng a,kan vahkual na ah ka thlan a chhuak nasa bawk nen ka in bual te te a,beer bawk ka dawm leh.

Khawharna in min luhchilh lehnghal a,ṭul lo zet in mahni in khawngaihna ka nei bawk,ka na tur a ni tawh lo ang ti eng ang mah ila ka nat loh phah chuang silo a,hetiang a hrehawm tak a dam ve reng ai chuan tinge ka thih ve daih mai loh ka ti rilru rauh rauh,chutih rual rual in ka nau te hmel ka mitthla ah chiang zet in an rawn lang a,an neihchhun ka ni a,ka neihchhun tak meuh meuh an ni bawk,kalsan thei ka ni lo a,enkawl tur zawk ka ni ti a in fuih in,chak tak a awm ka tum lui ngar ngar  tur ani.

Tumah lak ah rinna ka nghat tawh lo anga,beiseina an lak ah ka neih miau loh chuan min ti na thei lo ang.

Thla a ral a,hun a liam a,keipawh in hna ka ṭan mawp mawp bawk a,mizo welfare thil tih na ah te tel ve ṭhin in khawhar lutuk chuan hun ka hmang bik lo e,ka therapist te pawh mizo an awm ve nuk a,an fel hlawm hle,ka nau te pahnih pawh mi in a khawsak reng tir ka ngai ngam chiah lo nen hruai ve mai ka rilruk a,Abhisheka'n hlawh min pe ṭha bawk a mangang in kan awm bik lo tur ah ka ngai.

Ka nau te ka hruai thlak na pawh thla thum ngawt a liam tawh a,helam ah school te kai tir ve in harsatna kan nei em em bik lo,room hran ka luah ngai lo in Abhishek-a room min pek ah kan awm ve naw naw a,hetiang a min duhsak hi mak ka ti ru viau thung.

Vawiin chu Mizo welfare din cham ani a,function a awm dawn a,kan unau thum in kan thuam neih ṭhat ber ber nen kan in duang a,ka nau te phur leh hlim hmel hian min ti nui ve fo ṭhin,tunah pawh in fiam in an ràk leh teng tung tawh hi. Nui bawk bawk chung in ninhlei lo a insiam thuai turin ka hrilh a,ka nau mipa zawk Lalhruaizela'n "a u,anu ka ngai e",a rawn tih chhuah phawng chuan ka ngui nghal ruai ruai a,Israeli'n "keipawh ka ngai",a rawn ti ve sap bawk, mahse in ti phur chawp in ka dèk chiam a,an ni pawh naupang à lutuk an ni tawh lo bawk a an sawi chhunzawm tawh bik lo.

Function hman na hmun tur kan thleng a,kan tam tham ve viau,Navy,army,doctor leh pastor,hotel a thawk leh spa a thawk te pawh kan chikim viau a,chhungkua a awm pawh an awm ve nual mai,item hrang hrang te neiin boruak a zangkhai hle a,kan hun hman min kaihruai tu in member thar pali ngawt mai kan nei a,an ni hi bangalore lam a hnathawk ṭhin an ni a,tun ah hian special item an rawn nei dawn a,an zai dawn ani,nula ho khan uar zet in kut lo beng rawh u,tlangval ṭhiau an la ni e,a tih chuan nui hluah hluah in kut kan beng dar dar a,mahse back stage aṭang a rawn chhuak te ka hmuh chuan mak ti lutuk in ka meng pawng zawrh zawrh ang le.

Joel-a,Mapuia leh Muanawma bak ah an ṭhianpa Lalawmpuia te kha an ni!