JOEL LALREMSIAMA chapter-2

JOEL LALREMSIAMA

CHAPTER-2

By-Hluhlu-i Khiangte

"I fiamthu tiraw?dawt sawi suh aw",awih lo lutuk in ka ti a,na zet in thawk a rawn la hawk!

Lehlam atang chuan"fiamthu mai mai nang Lalruatdik,itan,i pasaltha hmeltha nunrawng hi ka rawn kal dawn",nui hawk hawk in a rawn ti a,"engtik in nge i rawn kal dawn?I awm loh chuan ka chhungte min ngaihtuah a min ngaihven sak tu tur an awm dawn lo asin! Ngaihngam takin hun ka hmang thei dawn em ni",ka ti zuai ruih.

"I pasaltha hian a ngaihtuah fel vek tawh,i chhungte chu ngaihtuah an ngailo,i nu leh i nau te in in a awmchilh a veng turin kei i pasaltha hian ruahman na siam in nula fel zet Puipuii ka be fel vek tawh,aw....In ngaihtuah hah duh mah ta che,a fel lutuk tlat,rikrum thil ah pawh a rintlak,amah hi a nû lutuk lo a,i neih ang nei mahse a rorum tha ania,keipawn ka ngam teuhlo mai",a rawn tih chuan ka thaw hawk a,Ka nui hak hak,ni e,ka best friend,ka chhungkua pawh min hmangaih pui em em tu,ka nu leh ka nau te pawh kei tluk a hmangaihtu hian a rintlak a tih chuan a rintlak ani mai.

"A thu hrim ah,ka rawn kal pawh chu i va hlau awm ve",titau awka zet a a rawn tih leh tak ah chuan ka nui hak a,"pasaltha tihtauh ching pa,ka chhungte ka ngaihtuah vang mai mai alawm,i rawn kal te chuan ka lawm na hian van a tawng chu sawiloh,a lehpel vawn vawn ang chu le",ka tih chuan a rawn chek tlat tlat.

"Lalfanu zei har har te,ka rawn thlen hun ah i chak lo ang",ti a min vau fiam na chu ka hlau hran lo,ani tluk a min hmangaihtu chu Ka chhungte chauh an ni miau,hna ka tlai dawn vang a insiam ka ngaih thu hrilh in kan in biakna ka ti tawp a.

Karleh mai a rawn flight tur anih vangin ka phur tawh hle.Ka thiantha ber a rawn kal chuan ka mal lutuk na te pawh a reh ve tawh anga,kawm tur ka neiin titi pui tur ka nei ve anga,ka harsat mangan na thlen na tur ka nei ve tawh dawn,mahse,thil pakhat,nawhchi ka zuar a,ka hmeichhiatna hmang a sum ka hai luh ṭhin hi a hre tur ani lo bur!

Joela'n a hriat chuan ka nu in a hria anga,ka chan a chau hle ang,mualpho ka hlau lam ni lo in anmahni vang a ka thiltih thin ka nu in a hriat hun a a na hmel tur ka hmu ngam lo ang! Ni e,mi kawlh tak,huaibâk zet ni mahila ka chhungte hi ka chak loh na an ni miau! Chutih rual in Ka chakna te an ni bawk.An vang a ka nun ka tichhia tih a hriat hun a ka nu na tuar hmel hmachhawn ngam tur khawp a mi huaisen ka ni tlat lo.

Joel lo thleng thla chuan zawhna a ngah kher mai,engvanga accomodation a awm lo a flat hran luah nge ka nih?Engvanga Ate-i hian min huat hmel tak a min en thin nge anih tih te,tam tak zawhna a nei a,ni e,Ate-i chuan min haw ta daih,a chhan pawh a bialpa Sanjay Ali ka chhuh sak vang mawle! Tih takzet in a duh a,kan spa a kan regular client ani nghe nghe! 

Mahse Sanjay hian ka lan ve tak chin ah a bialnu Ate-i ai chuan min duh zawk miau hek! Kei lah ta pek chuan thian tih vel thliar map lo in ka lo kawp ve mai bawk a,ka flat luah man leh ka mamawh engkim bak ah ka chhungte enkawl na tur chen in min pe a,mahse ani chuan ka nawmsak na ka duh luat vanga in phalrai ah min ngai thung! Ani pah ve hrim hrim bawk a,tu mihring in nge mahni nawmna ûm ko bik ang? Ka tan ui a nei ngailo a,Ka mamawh ka sawi ngai hauh lo in sum chu min vûr hneh viau!

Ka ti lawm hnehsawh ve em bawk a!Ate-i tan chuan thinrim thlak ve tur tak pawh ani ve lah tak a,a sugar daddy khan a sugar girl ah min thlang ta mauh mai si a,kei lah in mi hran hran mutpui ai chuan tiin Sanjay-a ah hian ka bur ngar ngar a,mahse tu khaw hriat loh in massage room ah a tak ram thleng lo in vanram kawtchhuah chu ka client te ka tem tir fo thung.Sum mamawhna sang hek ì.Sanjaya'n min vur eng ang mahse awlsam tak a sum thawhchhuah theih na ah ka tang tawh miau a,ka tan daisual leh chu thil harsa ni miau hek lo le.

Joel-a bul ah erawh chuan mawi tak in ka pha mar vek a,ka thusawi rinhlelhna a nei map lo,ni e,engvang tehlul in nge min rin loh ang! Dawt kan in hrilh ngai miau hleinem,mahse a thiantha ber,a lal fanu in dawt ka hrilh mek.

Mahse ka flat a khawsak ve a tum erawh ka hnial fithla thak! Kan inhnial thinrim phah nghe nghe a,ka tan a spa owner te'n min laksak ani a,mikhual thlen thu ah buaina a awm tehhrep chuang lo a chu in chenchilh ang chuan rem an ti lo tih ka sawi a,rei ngial kan buai hnu ah ka flat atanga hla lo te-ah room a la ve a,engnge thawh a tum ve hrim hrim ti a ka zawh lai a "ka veng dawn che,spa a thawk hmeichhia te hi miin kan en dan a hniam si a,an zuam che anga,mi nikhua lo awm ang ziazang a an melh tur che ka phal lo! A en hè tu che leh i hnathawh vang a hmusit tu che chuan min hmachhawn ang",ti a min chhan chuan ka awm chhung a na rawih rawih!

A thiannu,a thlavang na tak a a hauh hi ka tenawm si a,hmuhsit awm ngawih ngawih leh diriam tlak ngawih ngawih ka ni tih a hre chai silo,kha zan khan chhin te khat mah ka chhing eih lo!

Mahni in sitna ka nei a,ka thianghlimna hlu tak,ka zahawmna neih ve chhun ai khan ka chhungkua a pawimawh miau mai si a,inchhir tur ka ni lo,siamthat theih tawh loh vang a natna in siam ai chuan ka nihna ah hian ka lung ka ti awi chawp mai tur ani lo'm ni?

Joel-a te hi keini ang em em a khawsak harsa nilo mahse an hausa lua bik chuang lo a,rual awt lutuk in an awm lo ti ila a dik ber ang chu,a nu leh pa pawh mi fel tak an ni a,neinung tak ni lo mahse an chhungkaw nun,an in chhung in relbawlna kawng ah mi awhawm tak an ni thung,Joel-a pawh hotel ah thawk in front office ah a duty a,a hlawh pawh a chhe hran lo.

Tichuan hun kal ve zelin keipawh chuan nawhchizawrh hna chu Joel-a hriat hlau tak chungin ka chhunzawm ta zel tho a,hrehawm ti a in dawmkun chang nei fo mahila ka hrehawmna te hi ka in delh beh rei tir duh ngai lo.

Thinrim lutuk hmel nen a ka lam lo pan in ka kiang a rawn thlen rual in ka biang a ri sawk! Mak ti lutuk in ka en a,ka thiantha ber,ka nat hlau ngawih ngawih tu in kut min thlak anih Chu,thinrim lutuk lehnghal in!

Ṭawng tum a ka âng zuai(h) chu a ban vai in ṭawng lo turin min ti nghut a,a vei tawn sek!

Ka dar ah rawn man in min thing nawk nawk a,ka lu a hai nghal chhap thei! Heti tehhrep a Joel-a thinrim leh lung nilo hmel hi ka la hmuh loh vangin ka hlau takzet! Ka tawlh hnung dat dat a,bang ani tawh,tlanchhiat na tur a awm lo,mahse tlansan ka duh,ka hlau lutuk.

Ṭawng a tum ṭhin,a ṭawng thei lo,a khur ngawt ngawt a,meng sen rûm in min melh a,ten hmel zet in! Au chhuak ṭhawt in ka hnung bang chu a rawn hnek ṭhuai,nasa lutuk in ka phù a,ka rak ṭuar(h).