JOEL LALREMSIAMA chapter-12

 JOEL LALREMSIAMA

CHAPTER-12

By-Hluhlu-i Khiangte

Mit bui làk leh pawr fap a hlim hmel pu lui chung a rawn kal chu ka lo en a,ka hmel a hmuh rual a a mit a natna lang chhuak kha hmuh hmaih harsa ka ti thlawt.

Israel-i hnen ah insiam chhunzawm tur a hrilh in lut tur in min ti sap a,Israel-i pawh thuawih zet in room lam ah a lut nghal mai bawk,ṭhu tur a min tih chuan n ṭhutthleng tè fel ràn ah chuan ka ṭhu ruai ruai a,sawitur kan haihchham dun viau."Ka nau te ka'n insiam pui lawk ange",tih leh room lam a luh a rual a,min en chuang lèm lo na in ka bu nghut tho.

An room chu ka en kual a,pindan pahnih a awm a,choka tè fel zet nen, Sitting room ah ṭhutthleng te fel ren rawn an hung a,TV lian lutuk lo an hùng ran bawk,a sir tawn tawn ah dawl hnah ang zet an khawi bawk! Eng pangpar emaw tak chu ani ang,a hming pawh ka hriat ve siloh! An chaw ei dawhkan ah pawh glass in pangpar an khawi a,changkang vút hlawm lo mahse an bungrua chu a fai in a hnùm hlarh vek.A che fel ṭhin réng ani.

Israel leh Hruaia school kal tur in an chhuak a,ka hmangaih Annie chu ka bul ah a rawn ṭhu thla riai riai,sawi duh ka ngah a,sawi dan tur ah ka buai lawi si!

"Annie",ka ti sup a,rang zet in a rawn hawi vat,"i rilru ka tih nat avangin min ngaidam hram rawh aw",ka tih chuan a mittui a tla nghal zawih! "Shh",tih pah in ka kuah a,chhuak lutuk in a in hnit hlawp hlawp.

"Min kalsan a,ka video tenawm zet vang ah ngaiin keimah leh keimah ka in sit luat ah um pawh ka um zui ngam lo che a,mahse ka tan tho,ka mualpho i hlauh vang ani tih ka hre leh a,beiseina,beiseina ka neih avangin lo biak che ka tum a,mahse,kha nu,ih,kha nu khan i call a lo pick-up a",ṭap hlawp hlawp chung in a sawi a,"ka tihpalh",tih bak sawi tur ka hre lo!

"I hmangaihna te,i duatna awka te hriat leh ka duh a,keipawn ka tenawm zia ka hria,mahse chuti chung chuan ka hma sial zet in i hmangaihna dawn leh chak in biak leh tho che ka tum,mahse,kha nu khan i bialnu anih thu leh hna thil ah lo chuan be buai lo tur che in min lo ti a",tiin a in sût hraih hraih.

Venhimi mai mai chu(h)!

"Ann,ka hmangaih che,ka hmangaih vang che leh i mualpho ka hlauh luat ah hrilhhai zet in ka kalsan che a,mahse ka nun a hlim ngailo,zu te in in hlimna ka zawng a,ka ruih laiin Venhimi kha ka lo mutpui ani mahna zing ka harh in ka khum ah a lo mu ve a",inthlahrung zet in ka ti a.Ama tawk a na zet in thawk a la ve hrawk.

"Tunah chuan ka kalsan tawh lo ang che,hlim tak in kan awmdun tawh dawn nia aw",ka tih chuan a in la hrang hlawk a,a ngaihna hrelo lutuk in ka melh,k ban leh vut chu ka kut a vai per lawp a,"Hmeichhe dang nizan ah lawk i mutpui a,chuti chung chuan tunah min hmangaih thu leh kan hlim dun tur thu min hrilh a maw",a tih chuan sawi tur hrelo zet in ka hawi lawl lawl!

"Ka tihpalh,a thleng leh tawh ngai lo ang",ka ti leh sup a.

"Kei chu ka nunhlui ah tenawm takin ka khawsa,chhuan tlak engmah tih lah ka nei hek lo,chhuan tlak leh chhuan tham nun neih a hnèk in tenawm takin ka nun ka hmang zawk a,hmuhsit awm ngawih ngawih a nung in ka taksa hial ka hralh ṭhin,mahse nangnen kan in kawp aṭang khan rinawm takin,rinawm takin ka awm asin",a tih phei chuan Venhimi ka lo mutpui kha ka inchhir leh zual ngawih ngawih.

Mahni in sit reng reng in hun a hmang a,a nunhlui vang in a chau chhe zo a,chuta kar ah keiin ka lo phatsan ve leh zel bawk nen a ni hmeichhe awmnem tan chuan a na dawn lutuk.

Mipa nep tak ka ni,nep tak!

Ṭawng tum a ka àng ziau chu min dang in hna kal a ngaih thu a sawi a,ka thlah tur thu ka sawi pawh min hnial fithla ṭhak!

                         (ANNIE POV)

Na tak a min siam tu ka hmangaih Joel Lalremsiama chu ka kalsan dawr dawr a,ka hna kal tur min thlah a tum tlat anih chu!

Ka hnial chung pawh in ka hnung ah min zui ngar ngar,ka in ren avangin ke in ka kal ṭhin kha ania,mahse auto la hmak ila ni mai. Auto ah k ṭhu lut chiah tih ah a rawn ṭhu lut ve thurh! Rum fahran in ka melh a,a nui suk suk ringawt.

Ka hnathawhna hmun ka thleng a,chuan man pek ka tum chu min lo pek khalh leh nghal zat a,an pawisa in kir lai ka nghah a ngai,ka ṭhutna lam ah chhuah theih hek lo le. An in kir fel hnu ah a chhuk a,rang zet in ka chhuk ve nghal zat,hotel ah ka lut nghal dawr dawr a,Spa room lam ah ka kal nghal,Spa room ka lut chu ka ṭhutna ah Madam lo ṭhu in a kiang ah Ate-i a lo awm ràn!

A mawihnai ah morning wish ka hlan a,min nuih seih ringawt,ka bag ah ka dah ṭha tur chu a thusawi vangin ka ding dat,"zakthei lo lutuk",min ti hlak,kal leh mai ka tum a,"Ka sawi chu i hrelo em ni?Tun ah chhuak rawh,nang ang staff ka mamawh lo,nang lo midang,hna thiam zawk an tam",min ti phiar phiar,ka in her a,a taksa cher chhe lutuk tawh leh thinrim hmai sen,hrawk phiar ṭawng ṭawng khawp a thinrim chu ka nuih sawng.

A hnen a kal hnai in a sam ka va chùl riak riak,"ka chhuak ang maw?Ka chhuah san hma che in thil pakhat,ka ngai dawn si che a Mamta,in sex video nawm hmel zet kha ka tem ve chak a,kan ti dun ve phawt dawn em ni ang?,"ka tih chuan a meng phar awk a,Ate-i zawk in min rawn beng ṭhuai,nui suk chungin ka melh a,"I zei zia kha,kan in tluk tlang,oh,nilo,kei chuan mipa ka mutpui a,nang chuan i hmeichhiat pui ngei nuam i chen pui zawk tak e",ka tih leh chuan min ben tum in a ban a rawn vai leh zawk a,mahse a ban ah chelh sak tu an awm tlat,ka en chho riai riai a,Joel ani!

"Ka hmangaih tih nat tum tu an awm chuan chu a ti na tu a chu a lèt sawm a na ka tuar tir ang,hre reng rawh u",ti hrawk in a melh chhuk rùn a,hlauh hmel zet in Ate-i a meng phar awn awn.

A kiai khum suk a,min kaiin min chhuah pui dawr dawr.Kan room lam ah min hruai let leh a,min kaih ang ang in ka awm tawp,room kan lut chu hah lutuk in ka thaw hlawp hlawp a,khawiah nge ka nau te hi ka kal pui tak ang? Engtinnge ka enkawl tak ang le!

Mangang zet in ka awm a,Joel-a'n ka hmai ah min beng thek thek in engkim a ṭhat leh tur thu min hrilh mawlh mawlh.Ka mittui ka biang ah a luang ngiai ngiai a,hetiang tehhrep a nun hnawk lutuk neih bik reng hi ka va ning tawh tak èm! Ka nu leh pa te u,khawngaihin in bul a awm a,in kiang a cheng ve turin min hruai ve tawh mai rawh u.

Kei mi chaklo ber mai hian hrehawm ka ti a,he khawvel hi nuam tihna ka nei lo a,buaina neih reng hi ka hnè ngawih ngawih tawh,ka hah tawh lutuk,tunah pawh khawiahnge ka nau te hi mutmu ka tuah tir ang? Kan unau fahrah lutuk hi min dawn ve ula,nu,pa,in hnen a min dah ve tawh mai turin Pathian kha dil hràm teh u,ka hah tawh emai.Ka rilru in ka nu leh ka pa ka be mawlh mawlh a,ka mittui lah a tla reng bawk,Joel-a'n min kuah a,min hnem mawlh mawlh na pawh chu ka ngaihtuah theilo.

A che hrut a,a hmel en tur a ka hawi chho chu ka chal ah min fawp zauh in phone a hman lawk tur thu a sawi a,min chhuahsan,ka hriat ve chi a nilo ani mahna,nge ni a,kha a bialnu,Venhimi a ti anih kha,kha nu hnen ah khan a buai thu a hrilh dawn ani mahna! Chu thil ka ngaihtuah chhuah leh phei chuan ka natna a zual sauh,natna tinreng in a bawm,natna chauh hmachhuan tur nei,eng dang mah neih neilo mai ka niin ka in hria a,ka na ngut ngut. 

Rei lutuk lo hnu ah a rawn lut a,"ka room ah awm rih mai rawh u",a tih chuan duhlo lutuk in ka lu ka thing nawk nawk a,"ih,hna ka neih leh hma chu hotel ka la mai ang",ka ti sep,thawk la hawk in a awm ah min kuah bet a,"in thlahrunna tur a awm lo a,ka lak ah inthlahrung ngai hek suh,hotel i lak chuan ei leh in nen,in bill a buaithlak,hotel man tlawm lah a chhe si,ka room ah awm la,kei chu duh leh kan hotel lam ah ka riak zawk mai ang",a ti nghut,hnial leh ka tum chu "hnial lo mai rawh,i bungrua kan la phei dawn tho tho",ti ri ah ka hawi dawrh a,Mapuia,Muanawma leh Lalawmpuia te an ni,anni hi alo va hrilh hria a ni mahna.

"Lungngai suh aw,Naom-i nu te hi hotel leh resort nei an ni a,an hnuai ah hian mizo staff pawh tamtak an thawk bawk,Heleni kha i hria em?Kha pawh kha Ramdina nau ani a,Heleni khan neil island a an resort a enkawl bawk,an hotel leh resort ah hian spa an dah vek a,i thawh tur a awm em em ang,kan be dawn nia,Naom-i nu nen phei chuan in inkawm ngeih èm kha",Muanawma'n min tih chuan thlamuanna min pek mai bak ah mak ka ti takzet,chutiang hotel leh resort lian nei thei chu mizo ah hian an awm ka ringlo hrim hrim ani a,mahse ka ṭhiante hian dawt min hrilh dawn silo,bak ah Naom-i nu chu a changkang tih hriat hliah hliah mahse a nun a tlawm in chapo hmel hi amah ah ka la hmu lo hrim hrim bawk a,hotel an nei tih ringawt kha ka hriat dan ani bawk nen hetiang khawp a neinung an nih ka lo hre ngailo.

Heti zat ṭhian min hmangaih tu ka nei a,an phak tawk in min ngaihsak dawn tih ka hria,an tih dan ṭhin ani rèng bawk a,mahse Joel-a aṭanga ka hriat te an nih hlawm avang in Joel-a'n min kalsan pawh khan a tu a mah ka be ngailo,min biak an tum na pawh a awm nual a,mahse ka chhang ngai meuh lo,ka chhan ve chhun ah pawh Joel-a chungchang kan sawi chhuak ngailo.Hetiang ṭhianṭha,ka nat hlau tu leh min ngaihsak tu tal ka la nei a,nau duhawm tak Israel leh Hruaia ka la nei cheu bawk.

Anni hi beiseina min pe tur chuan an chak tawk a,beiseina min siam thei khawp a ka tan a hlu chu ka nau te leh ka ṭhiante hi an ni.

Ka bungrua min pack fel pui zung zung hlawm a,in hna in ṭhulh vek tihna em ni?Ti a ka zawhna chu min chhang ṭha duh lo,midang thawk tur an awm an ti ngawt a,mi hnuai a inhlawh ve tho an ni a,hetiang lutuk a min pui chu ka mamawh viau a chu nuam ka ti tehchiam lo.Ka naute school rawn ban hma in kan in pack fel vek,bungrua ka ngah lo a,ka room chhung a awm hi ka bungrua vek ani lo lehnghal,a ṭhen hi chu ka hnathawhna te lam in min dah sak ani a,tin,bungrua hi lian leh rit tak tak ka neih lemloh vangin kan awlsam phian mai.

Joel-a room Bathu Basthi lam ah kan in phur phei hlawm a,kan in vawm lut nawk nawk rih,ka nau te school bang hruai turin Joel-a a kal vut bawk,kan buai a ta lang in ka lo hre chang tawh hauh lo,ka inthiam lo ru kher mai.Bungrua min dah fel pui zung zung a,kan chet mawlh mawlh laiin Lalawmpuia a rawn nui chhuak hawk hawk! Hrethiam lo fe a kan en haw chuan a nuih a ti za zual sauh emawni a nui nasa zual sauh a,a nuih chhan hre miahlo in kan lo nuih ve ṭhaw ringawt.

A nuihza zual reh hnu ah Venhimin Muanawma a hlau lutuk tlanchhia kha a rawn ti chhuak hluai a,Mapuia leh Muanawma an nuih hawk hawk laiin ka nui tawp riai riai thung! Venhimi chu Joel-a bialnu ka ni inti kha ani!

Ka nui hmel reh riai riai min hmuh chuan an ngawi dak a,inthiam chiahloh hmel deuhin Lalawmpuia pawh a meng ralh.Inthiam lo zetin washroom ka kal tur thu ka hrilh a,harsa ti zet in ka nui lui bawk.Washroom ka lut chu ka awm ka ṭham tawk a,Venhimi kha ka haw lutuk,ka hmangaih mutpui tu ani a,ka haw ngawih ngawih,mahse a hmel pawh ka la hmu ve lawi silo.

Ka nu te pawh Joel-a rualin an rawn haw a,zawhna an ngah viau ang,mahse naupang chhia leh naupang à tak an ni lo a,engvak mah min zawt bik lo,mahse Hruaizela'n zanriah kan ei lai a"A u,min hnawt chhuak daih ami",a tih khan ka na vawng vawng,chhan dan tur ka hrelo lutuk kha ka en tawp a,a u Israeli'n alo nghawk zeuh,Lalawmpuia'n thildang a sawi pui ta daih a,naupang na na na chu a zawhna a hre zawm bik lo.

Ka nau te mut hnu ah kan titi ho a,naktuk lam ah Naom-i nu chu keimah ngeiin ka bia ang ti a ka ngen tlat vang in min remtih pui hram,min pui nasa a,hna nei ve tho an ni a,tih buai reng kha ka tan a nuam lo ve bawk a,chuvang a hnar ka ni bawk,Joel-a erawh chu ka melh duhlo lui ngar ngar.

Zing hma tak ah ka tho a,tukṭhuan tur ka siam a,ka nau te an rawn thawh hnu ah pawh Joel a rawn tho chhuak lo,a room ka va bih dak dak a,felfai zet in a lo inthlep ṭha vek!