I TAN CHAUH - 4

*I TAN CHAUH*

Chapter-4

By-Hluhlu-i Khiangte

Sumdawnna bul ṭan tum in hma ka la ve dawn chauh tih ah ka nuhrawn te nufa in min do char char avang in ka hawi ngam meuh lo a,ka tihngaihna hrelo lutuk kha ka ván ruai ruai ani ber e,ka tan kawng a ping em a,thawk ti harsa hial khawp a ipik a awm chu ngai a neih hleih theih a ni bawk lawi silo.

State chhuah san mai ka rilruk a,min hre ngai awm loh na ah nun thar neih kha ka duh a ni ber mai,Mizoram hi ka tan a zim lutuk a,kawh rawn leh sel rawn reng reng a awm kha kei mi derdep lutuk hian ka tuar thei hlawl lo.

Kal dan tur leh kal na tur ka dap a,mahse,ka Id leh ka lehkha pawimawh engmah reng reng ka kawl hauh lo,kan in,oh! Ka in lo ni ve ṭhin ah hreh zet in ka va kal a,ka ID leh ka card pawimawh pawh nuihsawh ka nihna hmun ah harsa takin ka va la thei hram! Flight ticket ka book vat a,mamawh lam khawm a chhuah vah pawh ka ngam meuh lo,hnaruak ka zawng a,ram dang a kal na tur anih hrim hrim chuan ka duh vek mai!

Hotel a thawh na tur ka hmu hlauh a,service ah a ni,a thiam sa lo leh a hre sa lo pawh zirtir na an pek theih thu ka hmu a,in ngaihtuah nawn miah lo in ka kal hmiah! Risk lak a ngaih chang a awm a,ka ti fuh meuh angem tih chu hun in a hril ang chu.

Airport ah chuan ka hawi kual ruai a,Helen ti a ka hming lam ri ka hriat chuan ka pan vat,ka thawhpui tur mizo hmeichhia tho Cathy alo ni a,min be sawm siam siam a,a fel hmel takzet,Phoenix Bay ah Hotel a awm thu min hrilh a,a nei tu mizo anih thu te,a staff te zing ah pawh mizo a duhsak thiam ṭhin hle ani tih te min hrilh malh malh chhungin kan thleng der.

Ti chuan service ah ka thawk ve ṭang ṭang a,ka thawhpui te an fel hlawm khawp mai,room kan ngah lutuk lo a,room 20 chauh kan nei,hlawh chu a ṭha phian a,kan owner te hi ka la hmu ve lo,kan hlawh pawh manager te kut aṭang kan la mai,unau pahnih ni in Robert.Ramhlunmawia leh Mimi.R.Lalmuansangi te an ni,a hmeichhe hming chu ka hriat tawh hnu ang ka ti hle a,mahse ka hriat na ka hrechuak zo tlat lo! Nu leh pa te thih san tawh an ni a,an nu leh pa rochun hotel leh resort an nei nuk,he Island ah hian resort 2 an nei a,hotel 3 an nei bawk,kan thawh na hi Portblair a awm ani a,an hotel leh resort dang chu Neil island leh Havelock lam ah a awm. Portblair ami bik hlawk na an tel te hi chu hnuchham enkawl nan an pe ṭhin ni in an sawi a,an fak awm ka tiin puitling ka ti unau hle.

Mahse,an zin chhuak an rawn haw staff zawng zawng min koh khawm chuan ka beisei loh lutuk thil ka hmu tel,ka natna tur pawi sa lo a diriam tak a min pawngsual tu ngei ka pute-a kha Mimi-i pasal anih chu! Ka harh zawk a,kan in hmuh hnuhnun ber ṭum a a thusawi MIMI.R.Lalmuansangi a tih kha he hotel leh resort neitu hi alo nih chu!

Ka phu dawrh a,washroom ah ka tlan lut rawk rawk,hlauhthawn na nasa lutuk in min tuam a,helai hmun ah pawh hian ka him chuang lo anih hi! Ka rilru ah Pathian demna bawk a lo lut leh a,tinge hahdam hian min khawsawk tir theih loh! Eng thil dang nge ka beisei a ka dil che,natna leh zahna ka tuar nasa lutuk tawh,i tenawm hle mai ti a au in ka ṭap hlawp hlawp!

Washroom kawngkhar a rawn in hawng rawp a,he hotel nei tu pakhat zawk Robert a rawn lut,mak ti zet in ka en haw! Ani pawh in mak a ti tih hriat zet in che lo in min melh ngur."Helai hi mipa washroom ania",a rawn ti thawp sup.

Ka tlan chhuak rawk rawk a,washroom kawngkhar ka khar hma chiah in a nui ri suk ka hre thei. Hmeichhe washroom lam a lut in ka in phih fai zawh ah Cathy zawng in ka kal kual a,ka hmu hlauh e,beer alo dawm ran a,a bul a awm kan thawh pui tho Brigid nen an lo in be mawlh mawlh,"Cathy",tiin ka phun sep a,"khawnge ilo kal daih a,madam te nupa khan an zawng deuh che a,ilo thawh aṭang an la hmu lo che a,manager in a fak che bawk nen a ngainat che ka ring,ilo awm bo daih a,ehe,tinge i hmel chu",ti in a rawn ding hluai.

"Ka nuam lo deuh a,ka haw mai thei angem le,hahdam ka duh deuh a",ka ti sep a,ka ṭap tih a hriat ka hlau hle,min melh vang vang a,mahse bu nghut chung in"awle,madam te pawh an chau deuh aniang,mu tur in an room lam kha,sir Rebert erawh ala awm in ka hria,duh leh lo va mu hahdam la,damdawi awm na kha i hria tiraw",min ti zung zung a,ka hriat thu a chhang in ka kal nal nal,kan room hi hotel bul lawk a awm ni in a zau nuam hle a,mizo hmeichhe hlang 8 lai kan awm ho.

Hna chu kan thawk leh mawp mawp a,kan owner te chu Havelock resort lam an ṭhutchilh a,Portblair min rawn tlawh zeuh zeuh chauh,mahse Sir Robert chauh a rawn kal ṭhin! Ka pute-a pawh ka hmu leh tawh lo a,kha mi zan khan a nupui kha duat hmel lutuk in a chul hliai hliau anih kha! Mak ka ti tehchiam lo,an rosum lak sak tum kha ani miau a,a duat der ve bawk ang chu!

Ka thla erawh a muang thei chuang hauh lo,hlauh nei reng reng in ka khawsa a,ka hahdam ngai meuh lo,Cathy bul a ka awm chuan ka nui ve bawk bawk ṭhin,mahse kan duty shift a in ang ṭhin silo a,duh ang pawh in kan in kawm tam hman bik meuh lo.

Hmun dang ah kal dawn pawh ni ila ka bang bo angreng hle a,ka hma hun hi a pik takzet,hun a liam a,thla a ral a,kum hial a liam ta,ka thaw ipik na te,ka natna leh ṭah na zawng zawng reh lo mahse midang hmuh a hnel hlim put leh nuih luih ah chuan harsatna ka nei tawh lo.

Cathy nen chuan kan in kawm ngawrh em em a,off day kan neih pawh in kan off rual a,unaunu ṭha tak ang mai ani,vawikhat kan off day chu Corbyn beach ah leng in zan thim rak thleng kan awm a,breezer ka in a,ani'n beer a in leh tawh thung,a chanchin min hrilh sep sep a,kum naupang te anih lai a apa ngeiin a sual luih thu a sawi chuan ka lo nat pui vawng vawng,a chang leh a ṭap a,a chang leh a nui leh hak hak ṭhin.

"Ka pa ani miau mai si a,tin,rilru lam ah chian loh na nei alo ni bawk nen engmah hremna ka lekkawh thei lo,mahse Pathian in min hrem sak ani ang chu ka ti mai,khumbet in kum 2 zet zawt a nat hnu ah a thi",tiin min hrilh,a zawng zawng min hrilh ngam tu chu ka ngaihlu a,ka chung a thil thleng te,kan boss pasal ber mai hi natna rapthlak lutuk min pe tu anih thu ka hrilh chuan a chek tlak tlak.

"Lungngaihna khur thuk tak a cheng veng veng ṭhin i ni in ka hre reng ani",ti a a sawi hnu ah damdawiin ah min kal pui tur thu a sawi a,mizo doctor pakhat mizo welfare ah pawh hruaitu doctor Jonathan a awm thu sawiin thu tawp a siam hmiah,hnial theih a ni lo bur,a kar leh kan off ah chuan Doctor Jonathan hospital thawh na GB PANT HOSPITAL ah chuan min kal pui ta reng a,damdawi kan va dil thawr.

Mahse min pek ngawt theih loh thu te,ka thisen an test nawn leh phawt tur thu leh natna dang ka nei em tih en fel anih phawt tur thu min hrilh a,ka zun,ka khak,ka thisen an la a,test result a chhuah hun a koh ka nih tur thu min hrilh hnu in kan haw san ta a,ni 3 hnu lawk ah min rawn call a,hospital kal tur in,ka hriat tawh hnu mah ni se HIV ka nih thu hriat nawn leh chu ka huphurh a,ka zam a,ka hah a,ka tha a khur ru der der,Cathy'n a theihtawp in min ngaihsak in min thlamuan hram hram a,ka tan chuan ka chhungkaw neih chhun ani.

Hospital chu kan va kal ta a,mahse eng thil mak nge thleng ta hi!

KA THISEN AH HIV HRIK HMUH A NI LO!